ܨܠܽܘܬܳܐ ܕܫܽܘܪܳܝܳܐ

ܬܠܺܝ̣ܬܳܝܳܐ ܕܡܶܢ ܩܢܘ̣ܡܶܗ ܘܝܳܬܶܗ ܡܶܬܝܰܩܰܪ܆ ܘܒܰܟܝܳܢܶܗ ܠܳܐ ܡܶܬܦܪܶܫ ܘܒܰܠܚܘ̣ܕܳܝܽܘ̣ܬܳܐ ܡܶܬܝ̣ܕܰܥ: ܘܨܶܒܝܳܢܳܐܝ̣ܬ ܡܫܰܠܰܛ: ܚܰܟܶܡ ܠܥܺܕܬܳܟ ܐܰܠܳܗܳܐ ܕܰܕܠܳܐ ܥܘ̣ܩܳܒܳܐ ܬܰܘܕܶܐ ܠܳܟ: ܘܰܬܫܰܒܚܳܟ ܒܗܳܢܳܐ ܝܰܘܡܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܘܰܒܟܽܠܗܘܢ̇ ܝܰܘܡ̈ܳܬܳܐ ܕܩܳܐܶܡ ܒܗܘܢ̇ ܥܳܠܡܳܐ ܗܳܢܳܐ: ܘܰܒܗܰܘ ܕܰܥܬܝ̣ܕ ܬܗܰܠܶܠܝ̱ ܠܳܟ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝ̣ܢ܀

ܦܪܽܘܡܝܽܘܢ

ܬܶܫܒܽܘ̣ܚܬܳܐ ܠܰܬܠܝ̣ܬܳܝܽܘ̣ܬܳܐ ܩܰܕܝ̣ܫܬܳܐ ܘܠܳܐ ܒܪܝ̣ܬܳܐ ܐܝ̣ܬܝܳܝܬܳܐ ܘܰܡܬܘ̣ܡܳܝܬܳܐ ܣܓܝ̣ܕܰܬ݀ ܒܰܩܢܘ̣̈ܡܶܐ ܬܠܳܬܳܐ ܚܰܕ ܐܰܠܳܗܳܐ ܫܰܪܝ̣ܪܳܐ: ܠܰܚܕܳܐ ܐܰܠܳܗܘ̣ܬܳܐ ܡܪܰܝܰܡܬܳܐ ܘܠܳܐ ܚܒܝ̣ܟܬܳܐ ܕܒܰܬܠܝ̣ܬܳܝܽܘܬ ܫܡܳܗ̈ܶܐ ܘܦܰܪ̈ܨܽܘܦܶܐ ܡܶܬܟܰܪܙܳܐ: ܟܰܕ ܠܰܝܬ ܒܳܗ̇ ܩܢܘ̣ܡܳܐ ܕܩܰܫܝ̣ܫ ܘܩܰܕܝ̣ܡ ܘܰܛܠܶܐ ܡܶܢ ܚܰܒܪܶܗ: ܠܰܚܕܳܐ ܐܝ̣ܬܘ̣ܬܳܐ ܠܳܐ ܦܠܝ̣ܓܬܳܐ ܕܰܒܫܰܘܝܽܘ̣ܬ ܟܝܳܢܳܐ ܐܘ̣ܣܺܝܰܐ ܘܫܘ̣ܠܛܳܢܳܐ ܘܡܳܪܘ̣ܬܳܐ ܘܡܰܠܟܘ̣ܬܳܐ ܘܨܶܒܝܳܢܳܐ ܘܚܰܝܠܳܐ ܡܶܬܝܰܕܥܳܐ: ܕܠܶܗ ܚܢܰܢ ܗܳܫܳܐ ܬܠܝ̣ܬܳܐܝ̣ܬ ܢܫܰܒܰܚ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܫܽܘ̣ܒܚܳܐ ܠܳܟ ܬܠܝ̣ܬܳܝܳܐ ܘܰܠܚܘ̣ܕܳܝܳܐ: ܕܰܬܠܝ̣ܬܳܐܝ̣ܬ ܠܚܰܙܳܝܰܝ̈ܟ ܟܳܪ̈ܘ̣ܙܶܐ ܘܰܡܒܰܕ̈ܩܳܢܶܐ ܘܡܰܟܪ̈ܙܳܢܶܐ ܕܰܩܕܳܡ ܡܳܪܘ̣ܬܳܟ ܒܰܬܠܝ̣ܬܳܝܽܘ̣ܬܳܐ ܠܗܘܢ̇ ܐܰܢ̱ܬ ܠܳܟ ܓܠܰܝܬ: ܐܝܟܢܐ ܕܒܰܬܠܳܬܳܐ ܚܰܕ ܢܶܫܬܰܘܕܥܘ̣ܢܳܟ ܡܶܢ ܒܪܝ̣ܫܝ̣ܬ ܐܰܢ̱ܬ ܐܰܒܳܐ ܝܳܠܘ̣ܕܳܐ ܘܥܶܠܬܳܐ ܕܥܶܠ̈ܬܳܢܶܐ ܕܰܒܪܳܐ ܘܪܘ̣ܚܳܐ ܥܶܠܬܳܢܘ̣ܬܳܐ ܕܰܩܢܘ̣̈ܡܶܐ ܘܠܰܘ ܕܰܟܝܳܢܳܐ: ܘܡܰܥܒܕܳܢܘ̣ܬܳܐ ܕܰܓܒܝ̣ܠܘ̣ܬ ܐܳܕܳܡ ܫܰܘܕܰܥܬ ܘܐܶܡ̣ܰܪܬ ܕܬܰܘ ܢܶܥܒܶܕ ܐ̱ܢܳܫܳܐ ܒܨܰܠܡܰܢ ܘܒܰܕܡܘ̣ܬܰܢ ܠܰܬܠܝ̣ܬܳܝܽܘܬ ܩܢܘ̣̈ܡܶܐ ܐܰܪܶܙܬܳܝܗ̱ܝ ܘܠܳܐ ܡܶܢ ܒܳܬܰܪ ܣܥܳܝܳܐ ܘܫܳܝܽܘܛܘ̣ܬ ܦܘ̣ܩܕܳܢܳܐ ܡܳܪܳܢܳܝܳܐ ܕܰܣܥܰܪ ܓܒܝ̣ܠܳܐ ܩܰܕܡܳܝܳܐ ܒܡܰܗܠܳܢܘ̣ܬܳܐ ܕܒܶܗ ܕܰܗܘܳܐ ܐܳܕܳܡ ܐܰܝܟ ܚܰܕ ܡܶܢܰܢ: ܟܽܠܗܘܢ̇ ܢܒܺܝ̈ܶܐ ܘܚܰܙܳܝ̈ܶܐ ܕܓܶܠ̈ܝܳܢܰܝܟ ܘܰܡܪ̈ܰܥܝܳܢܶܐ ܕܡܳܪܘ̣ܬܳܟ ܠܰܬܠܝ̣ܬܳܝܽܘܬ ܩܢܘ̣̈ܡܶܐ ܕܪܰܒܘ̣ܬܳܟ ܓܠܰܘ ܘܚܰܘܺܝ̣ܘ ܘܕܠܰܝܬ ܒܗܘܢ̇ ܡܘܙܳܓܳܐ ܘܒܘ̣ܠܒܳܠܳܐ ܬܪܝܨܳܐܝ̣ܬ ܐܰܟܪܶܙܘ̱: ܚܰܕ ܐܶܡܰܪ ܫܡܰܥ ܐܝ̣ܣܪܳܐܝܶܠ ܡܳܪܝܳܐ ܐܰܠܳܗܳܟ ܚܰܕ ܗ̱ܘ̣: ܘܕܰܢܚܶܬ ܡܳܪܝܳܐ ܒܰܥ̈ܢܳܢܶܐ ܘܩܳܡ ܥܰܡܶܗ ܬܰܡܳܢ: ܘܰܩܪܳܐ ܒܰܫܡܶܗ ܕܡܳܪܝܳܐ ܘܰܥܒܰܪ ܡܳܪܝܳܐ ܩܕܳܡ ܡܳܪܝܳܐ: ܘܰܐ̱ܚܪܺܢܳܐ ܐܶܡܰܪ ܕܰܚܙܺܝ̣ܬ ܒܗܰܝܟܠܳܐ ܠܰܐܠܳܗܳܐ: ܘܩܳܠܳܐ ܫܶܡܥܶܬ ܡܶܢ ܟܪ̈ܘ̣ܒܶܐ ܘܰܣܪ̈ܳܦܶܐ ܕܩܳܥܶܝܢ ܬܠܝ̣ܬܳܐܝ̣ܬ ܩܰܕܺܝ̣ܫ ܩܰܕܺܝ̣ܫ ܩܰܕܺܝ̣ܫ ܡܳܪܝܳܐ ܚܰܝܠܬܳܢܳܐ: ܘܰܐ̱ܚܪܺܢܳܐ ܕܠܳܟ ܐܳܡܪܝ̣ܢ ܢܰܒܘ̣ܟܰܕܢܰܨܰܪ ܒܳܒܠܳܝܳܐ ܫܘ̣ܠܛܳܢܳܟ ܥܒܰܪ ܡܶܢܳܟ: ܘܟܰܕ ܚܙܰܝܬ ܡܳܪܝܳܐ ܡܪܰܚܡܳܢܳܐ ܕܠܰܬܠܳܬܳܐ ܒܥܶܠ̈ܕܒܳܒܶܐ ܡܳܪ̈ܘ̣ܕܶܐ ܒܝ̣ܫܳܐ ܘܡܰܘܬܳܐ ܘܰܚܛܝ̣ܬܳܐ ܐܶܬܥܰܒܕܰܕ ܝܘ̣ܩܢܳܐ ܪܚܝ̣ܡܳܐ ܕܐܰܠܳܗܘ̣ܬܳܟ ܓܳܠܘ̱ ܪ̈ܰܚܡܰܝܟ ܠܦܘ̣ܪܩܳܢܶܗ: ܟܰܕ ܠܚܰܕ ܡܶܢ ܩܢܘ̈ܡܶܐ ܕܰܬܠܝ̣ܬܳܝܽܘ̣ܬܳܐ ܡܶܠܬܳܐ ܐܰܠܳܗܳܐ ܫܰܕܰܪܬ ܠܡܰܦܢܳܝܽܘ̣ ܠܥܶܪܒܳܐ ܕܰܛܥܳܐ: ܟܰܕ ܐܰܢ̱ܬ ܐܰܒܳܐ ܨܒܰܝܬ ܕܢܶܬܓܰܫܰܡ: ܘܪܘ̣ܚܳܐ ܓܰܫܡܶܗ: ܘܟܰܕ ܡܶܢ ܥܘ̣ܒܳܟ ܐܝ̣ܬܝܳܝܳܐ ܠܳܐ ܫܰܢܝ̣: ܘܰܒܡܶܬܓܰܫܡܳܢܘ̣ܬܶܗ ܕܡܶܢ ܡܰܪܝܰܡ ܠܳܐ ܐܰܘܒܶܕ ܐܰܠܳܗܘ̣ܬܶܗ: ܗܘܳܐ ܒܰܪܢܳܫܳܐ ܕܰܡܢܰܦܰܫ ܒܢܰܦܫܳܐ ܚܰܝܬܳܐ ܘܰܡܠܝ̣ܠܬܳܐ ܘܝܰܕܘ̣ܥܬܳܢܝ̣ܬܳܐ: ܟܰܕ ܠܳܐ ܩܰܕܶܡ ܓܒܰܠ ܦܰܓܪܳܐ ܘܟܶܢ ܐܰܓܶܢ ܒܶܗ: ܘܕܐܳܦܠܳܐ ܐܰܠܳܗܘ̣ܬܳܐ ܡܰܠܝܰܬ݀ ܠܶܗ ܕܘ̣ܟܰܬ݀ ܢܰܦܫܳܐ ܐܶܠܳܐ ܗܘܳܐ ܒܰܪܢܳܫܳܐ ܟܰܕ ܠܳܐ ܐܶܫܬܰܚܠܰܦ ܡܶܢ ܗܳܝ ܕܐܝ̣ܬܰܘܗ̱ܝ ܐܰܠܳܗܳܐ: ܠܳܐ ܗ̱ܘܳܐ ܬܪܶܝܢ ܡܶܢ ܒܳܬܰܪ ܚܕܳܝܽܘ̣ܬܳܐ ܫܰܪܝ̣ܪܬܳܐ ܐܶܠܳܐ ܚܰܕ ܡܶܢ ܬܪܶܝܢ: ܚܰܕ ܡܳܪܝܳܐ ܘܚܰܕ ܩܢܘ̣ܡܳܐ ܡܪܰܟܒܳܐ: ܚܰܕ ܟܝܳܢܳܐ ܕܝ̣ܠܶܗ ܕܡܶܠܬܳܐ ܗܰܘ ܕܐܶܬܒܰܣܰܪ: ܟܰܕ ܠܰܢܒܺܝܰܘ̈ܳܬܳܐ ܕܰܢܒܺܝ̈ܶܐ ܓܡܰܪ ܘܫܰܡܠܝ̣ ܒܰܩܢܘ̣ܡܶܗ: ܘܥܰܠ ܡܶܐܬܝ̣ܬܶܗ ܕܰܠܥܳܠܡܳܐ ܐܶܬܢܰܒܝ̣ܘ: ܟܰܕ ܚܰܕ ܡܰܢ ܐܳܡܰܪ ܕܣܰܒܘ̱ ܒܢܰܝ̈ ܗܳܠܶܝܢ ܬܠܳܬܳܐ ܕܳܫܢ̈ܶܐ ܕܰܗܒܳܐ ܘܡܘ̣ܪܳܐ ܘܰܠܒܘ̣ܢܬܳܐ ܘܣܝ̣ܡܘ̱ ܐܶܢܽܘܢ̇ ܒܰܡܥܰܪܰܬ݀ ܓܰܙ̈ܶܐ ܕܝܳܕܰܥ ܐ̱ܢܳܐ ܕܦܳܪܘ̣ܩܝ̱ ܡܶܟܳܐ ܠܚܰܡܫܳܐ ܝܰܘܡܝ̣̈ܢ ܐܳܬܶܐ ܠܦܘ̣ܪܩܳܢܝ̱: ܘܐܰܚܪܺܢܳܐ ܐܶܡܰܪ ܕܢܰܦܬܶܐ ܐܰܠܳܗܳܐ ܠܝܰܦܬ ܘܢܶܫܪܶܐ ܒܡܰܫܟܢܳܐ ܕܚܳܡ: ܘܐ̱ܰܚܪܺܢܳܐ ܐܶܡܰܪ ܕܠܳܐ ܢܶܥܢܰܕ ܫܰܒܛܳܐ ܡܶܢ ܝܺܗܽܘ̣ܕܳܐ ܘܰܡܒܰܕܩܳܢܳܐ ܡܶܢ ܒܶܝܬ ܪ̈ܶܓܠܰܘܗ̱ܝ ܥܕܰܡܳܐ ܕܢܺܐܬܶܐ ܡܰܢ ܕܕܝ̣ܠܶܗ ܗ̱ܝ̣ ܡܰܠܟܘ̣ܬܳܐ: ܚܰܕ ܐܶܡܰܪ ܕܐܘ̣ܪܫܠܶܡ ܚܳܪܒܳܐ ܒܩܶܛܠܶܗ ܘܐ̱ܰܚܪܺܢܳܐ ܐܶܡܰܪ ܕܥܳܐܶܠ ܡܳܪܝܳܐ ܡܳܪܰܢ ܐܰܝܟ ܫܰܒܳܝܳܐ ܠܰܫܝܽܘܠ̇: ܘܐ̱ܰܚܪܺܢܳܐ ܐܶܡܰܪ ܕܩܘ̣ܡ ܡܳܪܝܳܐ ܥܰܕܰܪ ܠܰܢ ܘܰܦܪܘ̣ܩ ܠܰܢ: ܚܰܕ ܐܶܡܰܪ ܕܐܰܝܠܶܝܢ ܕܝܳܬܒܝ̣ܢ ܒܚܶܫܘ̣ܟܳܐ ܘܰܒܛܶܠܳܠ̈ܰܝ ܡܰܘܬܳܐ ܢܘ̣ܗܪܳܐ ܕܢܰܚ ܠܗܘܢ̇: ܠܰܬܠܳܬ ܢܶܫ̈ܶܐ ܕܰܡܫܰܚ̈ܝ̱ ܦܰܓܪܶܗ ܬܠܝ̣ܬܳܐܝ̣ܬ ܦܪܰܥ: ܠܚܰܛܳܝ̇ܬܳܐ ܕܡܶܢ ܢܰܐܝܺܢ ܫܒܰܩ ܚܰܘ̈ܒܶܐ ܕܝ̣ܠܳܗ̇: ܘܰܠܗܳܝ ܡܰܪܝܰܡ ܕܡܶܢ ܒܶܝܬ ܥܰܢܝܳܐ ܚܰܕܝܳܗ̇ ܒܢܘ̣ܚܳܡܶܗ ܕܐܰܚܘ̣ܗ̇: ܘܰܠܗܳܝ ܚܰܛܳܝܬܳܐ ܡܰܪܝܰܡ ܡܰܓܕܠܳܝܬܳܐ ܕܰܒܝܰܘܡܳܐ ܕܰܬܠܳܬܳܐ ܕܚܰܫܳܐ ܟܬܰܒ ܫܡܳܗ̇ ܒܰܣܒܰܪܬܳܐ ܘܚܰܘܺܝ̣ ܠܳܗ̇ ܢܘ̣ܚܳܡܶܗ: ܟܰܕ ܠܰܕܒܝ̣ܚܘ̣ܬܳܐ ܦܳܪܘ̣ܩܳܝܬܳܐ ܒܩܰܘܡܬܳܐ ܬܠܝ̣ܬܳܝܬܳܐ ܘܐܳܕܳܡܳܝܬܳܐ ܐܶܬܳܐ ܘܒܳܗ̇ ܣܥܰܪ ܟܽܠ ܚܰܝ̈ܠܝ̣ܢ ܘܟܽܠ ܬܶܗܪ̈ܝ̣ܢ: ܘܰܠܠܰܘܛܬܳܐ ܬܠܝ̣ܬܳܝܬܳܐ ܕܰܥܒܳܪ ܦܘ̣ܩܕܳܢܳܐ ܥܩܰܪ ܘܰܬܠܰܫ: ܟܰܕ ܠܛܘ̣ܦܣܳܐ ܬܠܝ̣ܬܳܝܳܐ ܘܝܰܘܢܳܢܳܝܳܐ ܓܡܰܪ ܘܰܒܩܰܒܪܳܐ ܬܠܳܬܳܐ ܝܰܘܡܝ̣̈ܢ ܥܡܰܪ: ܘܰܒܫܳܥܬܳܐ ܬܠܝ̣ܬܳܝܬܳܐ ܕܠܺܠܝܳܐ ܩܳܡ ܡܶܢ ܩܰܒܪܳܐ ܕܠܳܐ ܚܒܳܠܳܐ: ܘܠܰܬܠܳܬܳܐ ܛܶܟ̈ܣܶܐ ܕܰܒܢܰܝ̈ܢܳܫܳܐ ܚܰܘܺܝ̣ ܢܘ̣ܚܳܡܶܗ: ܠܢܳܛܘ̣ܪ̈ܶܐ ܘܰܠܢܶܫ̈ܶܐ ܘܠܰܫܠܝ̣ܚ̈ܶܐ: ܘܰܠܗܳܝ ܕܰܦܩܝ̣ܕܳܐ ܒܢܳܡܘ̣ܣܶܗ ܫܰܪܰܪ: ܕܒܰܬܠܳܬܳܐ ܣܳܗܕܝ̣̈ܢ ܡܶܫܬܰܪܪܳܐ ܙܳܟܘ̣ܬܳܐ ܘܡܶܙܕܰܟܝܳܢܘ̣ܬܳܐ: ܘܠܰܫܠܝ̣ܚ̈ܶܐ ܬܠܳܬ ܙܰܒܢܝ̣̈ܢ ܐܶܬܚܰܘܺܝ̣ ܒܝܘ̣ܡ ܢܘ̣ܚܳܡܶܗ: ܠܫܶܡܥܽܘܢ ܘܠܰܩܠܶܝܽܘܦܰܐ ܘܰܠܠܘ̣ܩܳܐ ܘܰܠܥܶܣܪܳܐ ܟܰܕ ܟܢܝ̣ܫܝ̣ܢ ܒܥܶܠܝ̣ܬܳܐ ܘܫܰܟܶܢ ܠܗܘܢ̇ ܪܘ̣ܚܳܐ ܩܰܕܺܝ̣ܫܳܐ: ܬܠܳܬܫܳܥܺܝ̈ܢ ܩܰܘܺܝ̣ ܒܕܝ̣ܢܳܐ ܟܰܕ ܡܶܬܬܕܝ̣ܢ ܡܶܢ ܚܰܠܳܫ̈ܶܐ ܐܰܝܟ ܬܠܳܬܫܳܥܝ̣̈ܢ ܕܰܥܒܰܪ̈ܝ̱ ܚܰܝ̈ܘܳܬܳܐ ܩܕܳܡ ܐܳܕܳܡ ܟܰܕ ܩܳܪܶܐ ܠܗܶܝܢ ܫܡܳܗ̈ܶܐ ܘܡܶܫܬܰܥ̈ܒܕܳܢ ܠܶܗ: ܒܰܬܠܳܬܫܳܥܺܝ̈ܢ ܣܠܶܩ ܡܳܪܰܢ ܠܰܨܠܝ̣ܒܳܐ ܚܠܳܦ ܥܰܒܕܶܗ ܕܐܰܣܟܶܠ: ܬܠܳܬܫܳܥܺܝ̈ܢ ܐܰܡܠܶܟ ܚܶܫܟܳܐ ܥܰܠ ܟܽܠܳܗ̇ ܬܺܒܶܝܠ ܘܠܶܒܫܰܬ݀ ܚܰܫܳܐ: ܘܰܬܠܳܬ ܬܡܝ̣̈ܗܳܬܳܐ ܣܥܰܪ ܡܳܪܰܢ ܒܰܩܥܳܬܳܐ ܕܰܠܘܳܬ ܐܰܒܘ̣ܗ̱ܝ: ܐܰܦܰܝ̈ ܬܰܪܥܳܐ ܕܗܰܝܟܠܳܐ ܕܐܶܣܬܕܶܩ ܡܶܢ ܡܨܰܥܬܶܗ ܘܐܰܪܥܳܐ ܕܐܶܬܬܙܝ̣ܥܰܬ݀ ܘܫܘ̣̈ܥܶܐ ܕܐܶܨܛܰܪܝ̣ܘ: ܬܠܳܬ ܡܥܰܠ̈ܝܳܬܳܐ ܣܥܰܪ ܒܡܰܘܬܶܗ ܒܡܰܓܥܠܳܢܘ̣ܬ ܪܘ̣ܚܶܗ ܒܐܝ̣̈ܕܰܝ ܐܰܒܘ̣ܗ̱ܝ ܘܥܰܡ ܓܰܝ̈ܳܣܶܐ ܬܶܪܨܰܬ݀ ܠܦܰܪܕܰܝܣܳܐ ܘܦܶܬܚܰܬ݀ ܠܶܗ ܬܰܪ̈ܥܰܘܗ̱ܝ ܕܐܰܚܝ̣ܕܝ̣ܢ ܗ̱ܘܰܘ ܒܰܥܒܳܪ ܦܘ̣ܩܕܳܢܳܐ: ܘܰܠܢܰܦܫ̈ܳܬܳܐ ܕܰܒܗܳܡܳܢ ܚܒܝ̣̈ܫܳܢ ܗ̱ܘܰܝ̈ ܣܥܰܪ: ܘܰܬܠܳܬܳܐ ܪ̈ܳܚܡܶܐ ܗܘܰܘ ܠܶܗ ܒܰܩܒܘ̣ܪܬܶܗ ܟܺܐܢܳܐ ܝܰܘܣܶܦ ܕܫܶܐܠ ܦܰܓܪܶܗ: ܘܦܺܝܠܰܛܳܘܣ ܕܰܦܩܰܕ ܕܢܶܬܥܰܦܶܐ ܦܰܓܪܶܗ: ܘܢܝ̣ܩܳܘܕܝ̣ܡܳܘܣ ܕܰܡܚܰܢܶܛ ܠܶܗ: ܬܠܳܬܳܐ ܛܟ̈ܣܶܐ ܕܡܰܠܰܐܟ̈ܶܐ ܐܶܬܘܰܥܰܕܘ̱ ܠܰܩܒܘ̣ܪܬܶܗ: ܘܰܬܠܳܬ ܓܘ̣̈ܕܶܐ ܚܙܰܘ ܝܰܘܣܶܦ ܘܢܝ̣ܩܳܘܕܝ̣ܡܳܘܣ ܕܰܡܥܰܢ̈ܝܳܢ ܨܶܝܕ ܩܰܒܪܶܗ ܘܐܳܡܪ̈ܳܢ: ܬܠܝ̣ܬܳܝܳܗ̇ ܕܐܰܠܳܗܘ̣ܬܳܐ ܠܳܟ ܝܳܐܶܐ ܕܰܢܫܰܒܰܚ ܘܢܺܐܡܰܪ: ܩܰܕܝ̣ܫܰܬ ܐܰܠܳܗܳܐ ܕܟܰܕ ܐܝ̣ܬܰܝܟ ܐܰܠܳܗܳܐ ܗܘܰܝܬ ܒܰܪܢܳܫܳܐ ܘܟܰܕ ܐܶܬܡܰܣ̣ܟܰܢܬ ܪܰܒܘ̣ܬܳܟ ܠܳܐ ܐܶܫܬܰܚܠܦܰܬ݀ : ܩܰܕܺܝ̣ܫܰܬ ܚܰܝܠܬܳܢܳܐ ܕܟܰܕ ܚܰܝܠܬܳܢܳܐ ܐܝ̣ܬܰܝܟ ܒܰܟܝܳܢܳܟ ܡܶܛܽܠ ܒܢܰܝ̈ܢܳܫܳܐ ܠܒܶܫܬ ܦܰܓܪܳܐ ܘܐܶܬܚܙܰܝܬ ܡܚܝ̣ܠܳܐ ܠܡܶܙܕܰܟܝܳܢܘ̣ܬܳܐ ܕܡܳܪܘ̣ܕܳܐ: ܩܰܕܺܝ̣ܫܰܬ ܠܳܐ ܡܳܝܽܘ̣ܬܳܐ ܕܟܰܕ ܠܳܐ ܡܳܝܽܘ̣ܬܳܐ ܐܝ̣ܬܰܝܟ ܗܘܰܝܬ ܒܨܶܒܝܳܢܳܟ ܒܰܒܣܰܪ ܡܝܽܘ̣ܬܳܐ ܐܰܝܟܰܢܳܐ ܕܰܠܡܳܝܽܘ̈ܬܶܐ ܬܢܰܚܶܡ: ܬܠܳܬܳܐ ܩܘ̣̈ܕܳܫܶܐ ܫܡܰܥܘ̱ ܡܶܢ ܡܰܠܰܐܟ̈ܶܐ ܘܰܠܗܳܝ ܕܐܶܨܛܠܶܒܬ ܚܠܳܦܰܝܢ ܐܰܘܣܶܦܘ̱ ܝܰܘܣܶܦ ܘܢܝ̣ܩܳܘܕܝ̣ܡܳܘܣ ܘܐܶܡܰܪܘ̱: ܕܐܶܨܛܠܶܒܬ ܚܠܳܦܰܝܢ ܘܠܰܘ ܚܠܳܦ ܡܰܠܰܐܟ̈ܶܐ ܕܦܰܓܪܳܐ ܡܶܢܰܢ ܢܣܰܒܬ ܘܒܐܝ̣ܕܰܝ̈ܟ ܢܰܥܶܠ ܨܠܰܘ̈ܳܬܰܢ ܐܳܘ ܬܠܝ̣ܬܳܝܳܗ̇ ܕܐܰܠܳܗܘ̣ܬܳܐ: ܒܰܕܓܘܢ̇ ܒܳܥܶܝܢܰܢ ܡܶܢܳܟ ܡܶܠܬܳܐ ܐܰܠܳܗܳܐ ܕܰܬܚܰܕܶܐ ܠܰܢ ܒܚܰܕܘ̣ܬ ܢܘ̣ܚܳܡܳܟ ܘܬܰܦܨܰܚ ܠܟܽܠܰܢ ܒܝܰܘܡܳܐ ܕܰܩܝܳܡܬܳܟ: ܘܬܰܫܘܶܐ ܠܟܽܠܰܢ ܠܦܶܨܚܳܐ ܦܨܝ̣ܚܳܐ ܕܰܥܬܝ̣ܕ ܐܰܢ̱ܬ ܕܬܶܥܒܶܕ ܠܚܰܪܬܳܐ ܕܙܰܒܢ̈ܶܐ ܘܦܳܪܰܥ ܐܰܢ̱ܬ ܠܟܽܠܢܳܫ ܐܰܝܟ ܥܒܳܕ̈ܰܘܗ̱ܝ: ܘܝܳܬܶܒ ܐܰܢ̱ܬ ܥܰܠ ܟܘ̣ܪܣܰܝ ܡܰܠܟܘ̣ܬܳܟ ܘܕܳܐܶܢ ܐܰܢ̱ܬ ܠܝܽܘ̈ܕܳܝܶܐ ܘܰܠܟܳܦܘ̣ܪ̈ܶܐ ܕܰܛܠܰܡܘ̱ ܫܪܳܪܳܐ ܕܰܩܝܳܡܬܳܟ: ܘܡܰܫܪܶܐ ܐܰܢ̱ܬ ܒܒܘ̣̈ܣܳܡܶܐ ܪ̈ܓܝ̣ܓܶܐ ܠܰܐܝܠܶܝܢ ܕܗܰܝܡܶܢܘ̱ ܒܳܟ: ܘܢܳܨܶܒ ܐܰܢ̱ܬ ܟܘܪ̈ܣܰܘܳܬܳܐ ܠܰܫܠܝ̣ܚ̈ܰܝܟ ܩܰܕܝ̈ܫܶܐ ܘܥܳܐܠ̈ܳܢ ܫܰܪ̈ܒܳܬܳܐ ܕܰܒܢܰܝ̈ ܐܝ̣ܣܪܳܐܝܶܠ ܠܕܝ̣ܢܳܐ ܕܟܺܐܢܘ̣ܬܳܐ: ܘܡܶܬܬܕܝ̣̈ܢܳܢ ܡܶܢ ܫܠܝ̣ܚ̈ܶܐ ܒܢܰܝ̈ܗܘܢ̇ ܕܥܶܒܪ̈ܳܝܶܐ: ܘܒܰܟܐܳܬܳܟ ܩܫܝ̣ܬܳܐ ܡܡܰܪܡܰܪ ܐܰܢ̱ܬ ܠܗܘܢ̇: ܘܰܠܕܝ̣ܢܳܐ ܕܠܳܐ ܪ̈ܰܚܡܶܐ ܥܰܡܗܘܢ̇ ܥܳܐܶܠ ܐܰܢ̱ܬ: ܒܗܳܝ ܫܳܥܬܳܐ ܡܳܪܰܢ ܐܶܬܪܰܚܰܡܥܠܰܝܢ: ܘܕܐܰܘܕܝ̣ܢܰܢ ܒܳܟ ܐܰܘܕܳܐ ܒܰܢ: ܘܰܫܒܘ̣ܩ ܠܰܢ ܚܰܘܒܰܝ̈ܢ ܘܰܚܛܳܗ̈ܰܝܢ ܘܐܰܥܒܰܪ ܣܰܟܠ̈ܘܳܬܰܢ: ܘܐܰܢܝ̣ܚ ܥܰܢܝ̣̈ܕܰܝܢ ܕܰܫܟܶܒܘ̱ ܥܰܠ ܣܰܒܪܳܟ ܘܰܡܣܰܟܶܝܢ ܠܓܶܠܝܳܢܳܟ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ̇ ܢܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝ̣ܢ܀

ܥܶܛܪܳܐ

ܬܠܝ̣ܬܳܝܳܗ̇ ܕܐܰܠܳܗܘ̣ܬܳܐ ܕܠܰܬܠܳܬܳܐ ܝܰܘܡܝ̣̈ܢ ܕܢܘ̣ܚܳܡܶܗ ܐܰܟܪܶܙܘ̱ ܡܰܪ̈ܳܚܶܐ ܩܕܳܡ ܦܝ̣ܠܰܛܳܘܣ ܘܐܶܡܰܪܘ̱: ܡܳܪܝ̱ ܐܶܬܕܟܰܪܢ ܕܝܶܫܘ̣ܥ ܟܰܕ ܚܰܝ ܐܶܡܰܪ ܕܩܳܐܶܡ ܠܰܬܠܳܬܳܐ ܝܰܘܡ̈ܝ̣ܢ: ܦܩܘ̣ܕ ܕܢܶܥܒܶܕ ܢܳܛܘ̣ܪ̈ܶܐ ܐܰܝܟܰܢܳܐ ܕܡܶܙܕܰܗܪܝ̣ܢ ܒܩܰܒܪܳܐ: ܐܰܢ̱ܬ ܡܳܪܝ̱ ܥܰܠܳܐ ܥܶܛܪܳܐ ܕܦܝ̣ܪܡܰܢ ܠܘܰܥܕܳܟ: ܘܩܰܒܶܠ ܨܠܰܘ̈ܳܬܰܢ ܘܒܳܥ̈ܘܳܬܰܢ ܒܪ̈ܰܚܡܰܝܟ: ܘܐܰܫܪܳܐ ܫܰܝܢܳܟ ܘܰܫܠܳܡܳܟ ܒܰܝܢܳܬܰܢ ܕܢܰܘܕܶܐ ܠܳܟ ܘܰܢܫܰܒܚܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀

ܚܽܘܬܳܡܳܐ

ܬܠܝ̣ܬܳܝܳܐ ܘܰܠܚܘ̣ܕܳܝܳܐ ܕܰܬܠܳܬܳܐ ܝܰܘܡ̈ܝ̣ܢ ܗ̣ܘܳܐ ܒܠܶܒܳܗ̇ ܕܐܰܪܥܳܐ: ܘܰܒܫܳܥܬܳܐ ܬܠܝ̣ܬܳܝܬܳܐ ܕܒܳܗ̇ ܡܰܡܠܶܟ ܚܶܫܘ̣ܟܳܐ ܣܰܓܝ̣ ܩܳܡ ܡܶܢ ܩܰܒܪܳܐ ܘܰܙܟܳܐ ܠܚܶܫܟܳܐ ܘܒܰܛܶܠ ܫܘ̣ܠܛܳܢܶܗ: ܘܚܰܘܺܝ ܕܗܘ̣ܝܘ̣ ܢܘ̣ܗܪܳܐ ܐܳܦ ܡܰܢܗܪܳܢܳܐ ܕܰܒܪܝ̣ܬܳܐ: ܐܰܢܗܰܪ ܠܰܢ ܡܳܪܝ̱ ܒܢܘ̣ܗܪܳܟ ܗܰܘ ܠܳܐ ܥܳܒܘ̣ܪܳܐ ܘܐܰܦܨܰܚ ܠܰܢ ܒܕܶܢܚܳܟ ܠܳܐ ܡܶܫܬܰܪܝܳܢܳܐ: ܘܚܰܘܰܪ ܠܰܢ ܒܚܶܘܳܪܘ̣ܬܶܗ ܕܝܰܘܡܳܟ ܗܰܘ ܥܺܐܕܳܐ ܦܨܝ̣ܚܳܐ ܕܰܡܠܰܟܬ ܠܰܐܝܠܶܝܢ ܕܡܰܚܒܝ̣ܢ ܠܳܟ: ܐܰܝܟܰܢܳܐ ܕܥܰܡܗܽܘܢ̇ ܢܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀