ܦܪܽܘܡܝܽܘܢ

ܬܶܫܒܘ̣ܚܬܳܐ ܠܰܚܕܳܐ ܐܰܠܳܗܘ̣ܬܳܐ ܡܪܰܝܰܡܬܳܐ ܗܳܝ ܕܒܰܬܠܝ̣ܬܳܝܽܘ̣ܬ ܩܢܘ̣̈ܡܶܐ ܡܶܬܟܰܪܙܳܐ: ܒܰܬܠܳܬܳܐ ܫܡܳܗܝ̣̈ܢ ܡܶܣܬܰܓܕܳܐ ܘܡܶܬܬܰܘܕܝܳܐ ܘܰܠܟܽܠ ܒܳܨܽܘ̈ܝܶܐ ܘܥܳܫܘ̣̈ܩܶܐ ܙܳܢܩܳܐ: ܠܰܚܕܳܐ ܬܠܝ̣ܬܳܝܽܘ̣ܬܳܐ ܠܳܐ ܒܠܝ̣ܠܬܳܐ ܕܒܰܚܕܳܢܳܝܽܘ̣ܬܳܐ ܠܳܐ ܡܶܬܦܰܠܓܳܢܝ̣ܬܳܐ ܘܠܳܐ ܡܶܣܬܰܕܩܳܢܝ̣ܬܳܐ ܡܶܬܦܰܪܫܳܐ ܘܡܶܬܚܰܝܕܳܐ ܘܡܶܬܬܰܠܘ̣ܬܳܐ: ܘܰܠܫܰܦ̈ܝܰـܝ ܠܶܒܳܐ ܘܩܰܛܝ̣̈ܢܰܝ ܣܘ̣ܟܳܠܳܐ ܡܶܬܗܰܝܡܢܳܐ: ܠܗܳܝ ܛܳܒܘ̣ܬܳܐ ܫܦܝ̣ܥܬܳܐ ܘܠܳܐ ܡܶܬܬܪܝ̣ܡܳܢܝ̣ܬܳܐ ܕܰܠܟܽܠܗܶܝܢ ܒܶܪ̈ܝܳܬܳܐ ܒܪܶܡܙܳܐ ܕܥܳܒܘ̣ܕܘ̣ܬܳܗ̇ ܬܰܩܢܰܬ: ܟܰܕ ܠܰܐܒܳܐ ܝܳܠܘ̣ܕܘ̣ܬܳܐ ܘܠܰܒܪܳܐ ܝ̣ܠܝ̣ܕܘ̣ܬܳܐ ܘܰܠܪܘ̣ܚܳܐ ܢܳܦܘ̣ܩܘ̣ܬܳܐ ܘܢܳܣܘ̣ܒܘ̣ܬܳܐ ܫܰܘܕܥܰܬ݀: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܬܠܝ̣ܬܳܝܳܐ ܘܰܠܚܘ̣ܕܳܝܳܐ ܩܰܕܡܳܝܳܐ ܘܰܚܕܳܢܳܝܳܐ: ܕܰܛܠܶܐ ܘܩܰܫܝ̣ܫ ܘܩܰܕܝ̣ܡ ܠܟܽܠ: ܗܰܘ ܕܰܬܠܝ̣ܬܳܐܝ̣ܬ ܘܰܚܕܳܢܳܐܝ̣ܬ ܡܶܢ ܡܒܰܕ̈ܩܳܢܶܐ ܘܟܳܪ̈ܘ̣ܙܶܐ ܩܰܕ̈ܡܳܝܶܐ ܢܒܺܝ̈ܶܐ ܐܰܠܳܗ̈ܳܝܶܐ ܐܶܬܒܰܕܰܩܬ ܘܐܶܬܶܐܪܶܙܬ: ܠܳܐܕܳܡ ܨܰܠܡܳܐ ܕܪܰܒܘ̣ܬܳܟ ܒܰܕܡܘ̣ܬܳܐ ܕܰܬܠܝ̣ܬܳܝܽܘ̣ܬܳܐ ܚܕܳܢܳܝܬܳܐ ܕܰܡܝ̣ܬ: ܒܗܰܘܢܳܐ ܘܰܡܠܝ̣ܠܘ̣ܬܳܐ ܘܚܰܝܽܘ̣ܬܳܐ: ܟܰܕ ܠܰܬܠܝ̣ܬܳܝܘ̣ܬ ܩܢܘ̣ܡ̈ܶܐ ܘܰܟܝܳܢܳܐ ܘܐܘܣܺܝܰܐ ܕܒܳܟ ܐܰܣܝ̣ܢܝ̣ܢ ܒܳܐܕܳܡ ܘܫܺܝܬ ܘܚܰܘܳܐ ܨܳܪܬ ܠܝܳܠܘ̣ܕܘ̣ܬܳܐ ܒܝܳܠܘ̣ܕܘ̣ܬܳܐ: ܘܠܝ̣ܠܝ̣ܕܘ̣ܬܳܐ ܒܝ̣ܠܝ̣ܕܘ̣ܬܳܐ: ܘܰܠܢܳܦܘ̣ܩܘ̣ܬܳܐ ܒܢܳܩܘ̣ܦܘ̣ܬܳܐ: ܟܰܕ ܠܡܽܘܫܶܐ ܡܢܝ̣ܚܳܢܳܟ ܪܫܰܡܬ ܬܠܝ̣ܬܳܝܽܘ̣ܬ ܩܢܘ̣̈ܡܶܐ: ܐܶܢܳܐ ܡܳܪܝܳܐ ܐܶܬܓܠܝ̣ܬ ܠܥܰܒܕܝ̱ ܐܰܒܪܳܗܳܡ ܘܠܐܝ̣ܣܚܳܩ ܘܝܰܥܩܽܘܒ ܐܝܠܫܰܕܰܝ ܐܰܠܳܗܳܐ ܘܫܶܡܝ̱ ܡܳܪܝܳܐ ܠܳܐ ܚܰܘܺܝ̣ܬ ܐܶܢܽܘܢ̇: ܠܕܰܘܺܝܕ ܢܒܺܝܳܐ ܗܳܝ ܕܰܢܒܰܪܟܰܢ ܐܰܠܳܗܳܐ ܐܰܠܳܗܰܢ ܘܰܢܒܰܪܟܰܢ ܐܰܠܳܗܰܢ: ܠܚܰܙܳܝ̈ܶܐ ܕܓܶܠ̈ܝܳܢܰܝܟ ܘܰܡܒܰܕ̈ܩܳܢܶܐ ܕܐ̱ܪ̈ܳܙܶܐ ܕܐܰܠܳܗܘ̣ܬܳܟ ܛܘ̣ܦܣܳܐ ܘܰܫܪܳܪܳܐ: ܘܐܰܢ̱ܬ ܒܰܩܢܘ̣ܡܳܟ ܦܶܠ̈ܐܳܬܗܘܢ̇ ܐܶܬܰܝܬ ܘܚܰܬܶܡܬ: ܠܚܰܕ ܡܶܢ ܩܢܘ̣̈ܡܶܐ ܕܐܝ̣ܬܘ̣ܬܳܟ ܠܦܘ̣ܪܩܳܢ ܗܰܘܢܳܐ ܬܠܝ̣ܬܳܝܳܐ ܫܰܕܰܪܬ: ܠܡܰܘ̈ܠܳܕܶܐ ܬܠܝ̈ܬܳܝܶܐ ܫܰܡܶܫ ܒܡܶܬܒܰܣܪܳܢܘ̣ܬܶܗ: ܠܝܰܠܕܳܐ ܦܰܓܪܳܢܳܝܳܐ: ܘܰܥܡܳܕܳܐ ܝܘ̣ܪܕܢܳܢܳܝܳܐ: ܘܢܘ̣ܚܳܡܳܐ ܬܠܝ̣ܬܳܝܳܐ: ܘܰܒܗܰܘ ܠܗܰܘܢܳܐ ܬܠܝ̣ܬܳܝܳܐ ܡܶܢ ܬܠܳܬܳܐ ܒܥܶܠ̈ܕܒܳܒܶܐ ܦܪܰܩ ܘܚܰܪܰܪ: ܠܐܝ̣ܣܚܳܩ ܒܰܬܠܳܬܳܐ ܝܰܘܡ̈ܝ̣ܢ ܥܒܰܕ ܦܘ̣ܪܩܳܢܳܐ: ܘܰܠܝܰܥܩܽܘܒ ܒܰܬܠܝ̣ܬܳܝܽܘ̣ܬ ܓܶܠܝ̈ܳܢܶܐ ܘܒܰܬܠܳܬܳܐ ܩܪ̈ܳܒܝ̣ܢ ܝܰܗܒ ܢܶܨܚܳܢܳܐ: ܐܰܝܟ ܗܳܝ ܕܒܰܬܠܳܬܳܐ ܝܰܘܡ̈ܝ̣ܢ ܩܳܡ ܡܶܢ ܩܰܒܪܳܐ ܘܰܙܟܳܐ ܠܰܡܢܰܣܝܳܢܳܐ: ܒܚܶܫܘ̣ܟܳܐ ܬܠܝ̣ܬܳܝ ܝܰܘܡ̈ܶܐ ܫܰܢܶܩ ܠܡܶܨܪ̈ܳܝܶܐ ܕܐܶܠܰܨܘ̱ ܠܥܶܒܪ̈ܳܝܶܐ ܘܦܰܨܝ̣ ܐܶܢܽܘܢ̇: ܘܰܒܚܶܫܘ̣ܟܳܐ ܬܠܝ̣ܬܳܝ ܫܳܥ̈ܶܐ ܕܐܰܡܠܶܟ ܥܰܠ ܟܽܠܳܗ̇ ܐܰܪܥܳܐ ܒܰܙܩܝ̣ܦܘ̣ܬܶܗ: ܟܰܐܰܪ ܠܝܘ̣ܕ̈ܳܝܶܐ ܘܚܰܪܰܪ ܠܰܓܒܝ̣ܠܬܶܗ: ܬܠܳܬ ܙܰܒܢܝ̣̈ܢ ܠܡܽܘܫܶܐ ܐܶܬܚܙܝ̣ ܒܝ̣ܗܝ̣ܒܘ̣ܬ ܦܘ̣ܩ̈ܕܳܢܶܐ ܥܶܣܪܳܐ: ܘܬܰܪܬܶܝܢ ܠܘ̣ܚ̈ܶܐ ܘܰܒܬܘ̣ܒܳܪ ܥܶܓܠܳܐ: ܐܰܝܟ ܗܳܝ ܕܰܬܠܝ̣ܬܳܐܝ̣ܬ ܐܶܬܚܙܝ̣ ܒܢܘ̣ܚܳܡܶܗ ܠܥܶܣܪܳܐ ܫܠܝ̣ܚ̈ܶܐ ܒܥܶܠܝ̣ܬܳܐ ܘܠܰܕܒܶܝܬ ܩܠܶܝܽܘ̣ܦܰܐ ܘܰܠܫܶܡܥܽܘܢ: ܠܰܬܠܳܬܳܐ ܥܶܕ̈ܳܢܶܐ ܕܰܡܨܰܠܶܐ ܗ̱ܘܳܐ ܕܳܢܺܝܐܝܶܠ ܒܟܽܠ ܝܰܘܡܳܐ ܪܰܡܫܳܐ ܘܨܰܦܪܳܐ ܘܛܰܗܪܳܐ ܫܡܰܥ: ܟܰܕ ܫܳܐܶܠ ܕܠܳܐ ܢܶܬܡܢܶܐ ܥܰܡ ܐܰܝܠܶܝܢ ܕܐܰܚܕܘ̣ܗ̱ܝ ܘܰܠܕܝ̣ܢܳܐ ܩܰܪܒܘ̣ܗ̱ܝ ܘܕܳܢܘ̣ܗ̱ܝ ܘܠܰܥܠܳܬܳܐ ܕܰܙܩܝ̣ܦܳܐ ܐܰܣܩܘ̣ܗ̱ܝ: ܠܫܶܒ̈ܝܶܐ ܬܠܝ̣̈ܬܳܝܶܐ ܕܓܳܠܘ̣ܬܳܐ ܒܰܕܶܩ: ܫܰܒܳܝܳܐ ܒܳܒܠܳܝܳܐ ܢܰܒܽܘܟܰܕܢܰܨܰܪ ܘܡܶܨܪܳܝܳܐ ܦ݂ܰܛܠܶܡܳܘܣ ܘܪܘ̣ܡܳܝܳܐ ܛܝ̣ܛܳܘܣ ܒܰܪ ܐܶܣܦܶܣܝܰܢܘ̣ܣ: ܠܙܺܐܦܳܐ ܦܪܝ̣ܫܳܝܳܐ ܡܕܰܡܰܝ ܒܢܶܟܠܳܐ ܬܰܥܠܳܢܳܝܳܐ ܬܠܝ̣ܬܳܐܝ̣ܬ ܓܠܳܐ ܕܝܰܘܡܳܢܳܐ ܘܰܡܚܳܪ ܚܰܝ̈ܠܶܐ ܥܳܒܶܕ ܐ̱ܢܳܐ ܘܒܰܬܠܝ̣ܬܳܝܳܐ ܐܳܙܶܠ ܐ̱ܢܳܐ ܘܡܶܫܬܰܡܠܶܐ ܐ̱ܢܳܐ: ܠܰܫܢ̈ܰܝܳܐ ܕܣܳܥܘ̣ܪܘ̣ܬ ܬܠܝ̣ܬܳܐܝ̣ܬ ܢܰܗܰܪ: ܝܰܘܡܳܐ ܠܫܰܢ̱ܬܳܐ ܩܰܕܡܳܝܬܳܐ ܕܒܳܗ̇ ܥܒܰܕ ܬܶܕܡܪ̈ܳܬܳܐ: ܘܰܬܪܰܝܳܢܳܐ ܠܰܬܪܰܝܳܢܝ̣ܬܳܐ: ܘܰܬܠܝ̣ܬܳܝܳܐ ܠܫܰܢ̱ܬܳܐ ܕܒܳܗ̇ ܚܰܫ ܘܡܝ̣ܬ ܘܩܳܡ ܘܰܣܠܶܩ ܠܰܫܡܰܝܳܐ: ܠܢܘ̣ܚܳܡܶܗ ܒܰܬܠܳܬܳܐ ܝܰܘܡ̈ܝ̣ܢ ܓܠܳܐ ܘܚܰܘܝܳܗ ܐܰܝܟ ܗܳܝ ܕܢܶܗܘܶܐ ܒܪܶܗ ܕܐ̱ܢܳܫܳܐ ܒܠܶܒܳܗ̇ ܕܐܰܪܥܳܐ ܬܠܳܬܳܐ ܐܝ̣ܡ̈ܳܡܶܐ ܘܰܬܠܳܬܳܐ ܠܰܝܠ̈ܰܘܳܬܳܐ: ܐܰܟܡܳܐ ܕܰܗܘܳܐ ܝܰܘܢܳܢ ܒܟܰܪܣܶܗ ܕܩܝ̣ܛܘ̣ܣ ܬܠܳܬܳܐ ܐܝ̣ܡ̈ܳܡܶܐ ܘܰܬܠܳܬܳܐ ܠܰܝܠ̈ܰܘܳܬܳܐ: ܘܗܳܝ ܕܐܶܡܰܪ ܠܥܰܡܳܐ ܠܝ̣ܛܳܐ ܕܝܽܘܕ̈ܳܝܶܐ ܟܰܕ ܡܰܠܶܦ ܠܗܘܢ̇ ܒܗܰܝܟܠܳܐ ܕܰܫܪܰܘ ܗܰܝܟܠܳܐ ܗܳܢܳܐ ܘܒܰܬܠܳܬܳܐ ܝܰܘܡ̈ܝ̣ܢ ܡܩܝ̣ܡ ܐ̱ܢܳܐ ܠܶܗ: ܗܘ̣ ܕܶܝܢ ܐܶܡܰܪ ܗ̱ܘܳܐ ܠܗܘܢ̇ ܥܰܠ ܗܰܝܟܠܳܐ ܕܦܰܓܪܶܗ ܕܒܰܬܠܳܬܳܐ ܝܰܘܡ̈ܝ̣ܢ ܩܳܐܶܡ ܘܡܶܬܢܰܚܰܡ: ܠܰܬܠܳܬ ܡܰܘܗ̈ܒܳܢ ܐܰܘܒܶܕ ܡܶܢ ܝܘ̣ܕ̈ܳܝܶܐ ܡܰܠܟܘ̣ܬܳܐ ܘܟܳܗܢܘ̣ܬܳܐ ܘܰܢܒܺܝܽܘ̣ܬܳܐ: ܘܰܢܣܰܒ ܐܶܢܶܝܢ ܡܶܢܗܘܢ̇ ܩܰܕܡܳܐܝ̣ܬ ܟܰܕ ܨܰܪܝ̣ ܩܰܝܳܦܳܐ ܢܰܚ̈ܬܰܘܗ̱ܝ: ܒܰܥܛܝ̣ܦܘ̣ܬ ܡܳܐܢܳܐ ܕܐܰܪܓܘܳܢܳܐ: ܘܐ̱ܰܚܪܺܢܳܐ ܟܰܕ ܐܶܨܛܰܪܺܝ̣ ܐܰܦܰܝ̈ ܬܰܪܥܳܐ ܕܗܰܝܟܠܳܐ: ܠܓܘ̣ܕܳܐ ܕܬܰܠ̈ܡܝ̣ܕܰܘܗ̱ܝ ܕܐܰܒܝ̣ܠܝ̣ܢ ܗ̱ܘܰܘ ܥܰܠ ܡܰܘܬܶܗ ܚܰܕܝ̣ ܒܢܘ̣ܚܳܡܶܗ: ܘܰܠܢܶܫ̈ܶܐ ܐܰܦܨܰܚ ܒܰܚܙܳܬܶܗ: ܘܠܰܫܠܝ̣ܚ̈ܶܐ ܚܰܕܝ̣ ܒܰܫܠܳܡܶܗ: ܘܠܰܡܣܰܒܪ̈ܳܢܶܐ ܡܰܠܶܠ ܠܗܘܢ̇ ܒܐܘ̣ܪܚܳܐ ܕܥܶܡܰܐܘܳܣ ܒܫܘ̣ܐܳܠܶܗ: ܝܰܘܡ̈ܶܐ ܬܠܳܬܳܐ ܩܰܘܺܝ̣ ܒܰܫܝܽܘܠ̇ ܘܰܠܟܽܠܗܘܢ̇ ܟܺܐܢ̈ܶܐ ܘܙܰܕܝ̣̈ܩܶܐ ܕܰܚܒܝ̣ܫܝ̣ܢ ܗ̱ܘܰܘ ܒܳܗ̇ ܠܳܐܕܳܡ ܘܚܰܘܳܐ ܘܰܠܟܽܠܳܗ̇ ܣܝ̣ܣܰܪܬܳܐ ܢܓܰܕ ܘܐܰܣܶܩ: ܠܰܬܠܳܬ ܕܘ̣̈ܟܝܳܬܳܐ ܕܡܰܚ̈ܘܳܬܳܐ ܕܰܒܠܰܥ ܫܰܪܝ̣ܪܳܐܝ̣ܬ ܚܰܘܺܝ̣ ܐܝ̣ܕܰܘ̈ܗ̱ܝ ܘܪ̈ܶܓܠܰܘܗ̱ܝ ܕܰܒܨ̈ܶܨܶܐ ܐܶܣܬܰܟܰܟ̈ܝ̱: ܘܕܰܦܢܶܗ ܕܰܒܠܘ̣ܟܳܝܬܳܐ ܐܶܬܬܰܪܥܰܬ݀ : ܘܓܰܫܘ̣ܗ̇ ܘܰܚܙܰܐܘܽܘ̣ܗ̇ ܬܰܠܡ̈ܝ̣ܕܶܐ ܐܰܝܟܰܢܳܐ ܕܠܳܐ ܢܶܬܟܰܫܠܘܢ̇ ܒܳܗ̇ ܒܳܬܰܪ ܩܝܳܡܬܶܗ: ܐܶܠܳܐ ܕܢܶܕܥܘܢ̇ ܠܰܡ ܫܰܪܝ̣ܪܳܐܝ̣ܬ ܕܗܘ̣ ܐܝ̣ܬܰܘܗ̱ܝ ܗܰܘ ܕܢܺܐܬܶܐ ܠܚܰܪܬܳܐ ܘܦܳܪܰܥ ܠܟܽܠܢܳܫ ܐܰܝܟ ܥܒܳܕܰܘ̈ܗ̱ܝ: ܘܡܶܢ ܒܳܬܰܪ ܩܝܳܡܬܶܗ ܕܡܶܢ ܩܰܒܪܳܐ ܐܰܪܒܥܝ̣ܢ ܝܰܘܡ̈ܝ̣ܢ ܩܰܘܝ̣ ܥܰܠ ܐܰܪܥܳܐ ܘܐܶܟܰܠ ܘܐܶܫܬܝ̣ ܠܥܺܢܰܝ̈ܗܘܢ̇ ܐܳܦ ܫܰܪܰܪ ܐܶܢܘܢ̇ ܘܰܣܠܶܩ ܠܰܫܡܰܝܳܐ ܒܫܘ̣ܒܚܳܐ ܘܙܳܟܘ̣ܬܳܐ: ܘܬܘ̣ܒ ܐܳܬܶܐ ܠܚܰܪܬܳܐ ܒܫܘ̣ܒܚܳܐ ܕܠܳܐ ܡܶܬܡܰܠܰܠ ܥܰܡ ܙܰܘܚܳܐ ܪܰܒܳܐ ܕܡܰܠܰܐܟ̈ܶܐ ܕܝ̣ܠܶܗ: ܘܟܽܠܰܢ ܥܰܒܕܰܘ̈ܗ̱ܝ ܡܦܝ̣ܣܝ̣ܢܰܢ ܘܒܳܥܶܝܢܰܢ ܠܰܚܢܳܢܶܗ ܕܠܳܐ ܢܰܗܦܶܟ ܐܰܦܰܘ̈ܗ̱ܝ ܡܶܢܰܢ: ܐܶܠܳܐ ܢܶܬܪܰܚܰܡ ܥܠܰܝܢ ܘܥܰܠ ܢܰܦܫ̈ܳܬܳܐ ܕܥܰܢܝ̣̈ܕܰܝܢ ܒܛܰܝܒܘ̣ܬܶܗ ܘܕܐܰܒܘ̣ܗ̱ܝ ܘܰܕܪܘ̣ܚܶܗ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀