ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܢܽܘܗܪܳܐ ܫܒܺܝܚܳܐ ܕܰܕܢܰܚ ܠܰܫܟܺܝ̈ܒܶܐ: ܠܗܰܘ ܫܶܡܫܳܐ ܕܙܰܕܺܝܩܽܘܬܳܐ ܕܐܶܬܚܒܶܫ ܒܶܝܬ ܡܺܝ̈ܬܶܐ: ܠܗܰܘ ܨܶܡܚܳܐ ܕܰܐܒܳܐ ܓܢܺܝܙܳܐ ܕܶܐܬܡܢܺܝ ܥܰܡ ܥܰܢܺܝ̈ܕܶܐ: ܠܗܰܘ ܚܰܝܳܐ ܕܰܒܡܰܘܬܶܗ ܐܰܚܺܝ ܠܡܳܝܽܘ̈ܬܶܐ: ܘܢܽܘܚܳܡܶܗ ܐܰܒܗܶܬ ܠܢܳܛܽܘܪ̈ܶܐ: ܘܰܩܝܳܡܬܶܗ ܐܰܦܨܚܰܬ݀ ܠܰܫܠܺܝ̈ܚܶܐ: ܘܗܳܐ ܡܠܶܝܢ ܫܽܘܒܚܶܗ ܫܡܰܝܳܐ ܘܰܐܪܥܳܐ: ܘܰܛܥܺܝܢܺܝܢ ܠܳܗ̇ ܠܣܰܒܪܶܗ ܟܽܠ ܣܰܘ̈ܦܺܝܢ ܘܡܶܬܒܰܣܡܺܝܢ ܒܰܫܠܳܡܶܗ ܟܽܠ ܥܰܡ̱̈ܡܺܝܢ: ܘܚܳܕܶܝܢ ܒܦܰܓܪܶܗ ܟܽܠ ܦܽܘ̈ܡܺܝܢ: ܘܒܳܣܡܺܝܢ ܒܰܕܡܶܗ ܟܽܠ ܠܶܫܳܢܺܝ̈ܢ: ܘܪܳܘܙܺܝܢ ܒܥܺܐܕܶܗ ܟܽܠ ܬܶܓܡܺܝ̈ܢ: ܘܙܳܡܪܺܝܢ ܬܶܫܒܽܘܚܬܶܗ ܒܟܽܠ ܩܳܠܺܝ̈ܢ: ܕܠܶܗ ܝܳܐܶܐ ܫܽܘܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܡܫܺܝܚܳܐ ܢܽܘܗܪܳܐ ܡܬܽܘܡܳܝܳܐ ܕܰܐܢܗܰܪ ܥܰܠ ܥܰܡ̱̈ܡܶܐ ܒܓܶܠܝܳܢܶܗ: ܨܶܡܚܳܐ ܐܝ̣ܬܝܳܝܳܐ ܕܰܦܪܰܩ ܠܐܷܡܘ̈ܳܬܳܐ ܒܡܶܐܬܺܝܬܶܗ: ܟܰܣܝܳܐ ܘܰܓܢܺܝܙܳܐ ܕܶܐܬܳܐ ܕܢܶܦܪܽܘܩ ܠܰܢ ܒܰܩܢܽܘܡܶܗ ܠܐܴ ܡܶܬܚܰܙܝܳܢܳܐ ܕܶܐܬܚܙܺܝ ܒܰܒܣܰܪ ܕܢܰܚܶܝܢ ܒܛܰܝܒܽܘܬܶܗ ܪܳܡܳܐ ܘܰܡܥܰܠܝܳܐ ܕܶܐܬܬܰܚܬܺܝ ܘܥܰܠ ܝܰܕ ܝܰܡܳܐ ܕܰܓܠܺܝܠܐܴ ܗܰܠܶܟ ܘܰܠܫܶܡܥܽܘܢ ܘܠܐܱܢܕܪܶܐܘܳܣ ܐܰܚ̈ܶܐ ܡܶܢ ܨܰܝܕܳܐ ܕܢܽܘ̈ܢܳܐ ܨܳܕ: ܘܨܰܝܳܕ̈ܰܝ ܐ̱ܢܳܫ̈ܳܐ ܠܚ̈ܰܝܶܐ ܣܳܡ ܐܶܢܽܘܢ: ܒܪܳܐ ܕܐܰܠܳܗܳܐ ܚܰܝܳܐ ܫܶܡܥܽܘܢ ܐܰܘܕܝܶܗ: ܘܛܽܘ̈ܒܐ ܠܶܗ ܝܰܗܒ ܘܶܐܡܰܪ ܛܽܘܒܰܝܟ ܫܶܡܥܽܘܢ ܒܰܪ ܝܳܘܢܰܐ ܕܳܐܒܝ̱ ܓܠܐܴ ܠܳܟ ܗܳܠܶܝܢ: ܟܺܐܦܳܐ ܐܰܢ̱ܬ ܘܥܰܠ ܗܳܕܶܐ ܟܺܐܦܳܐ ܐܶܒܢܶܝܗ̇ ܠܥܺܕܬܝ̱: ܘܡܽܘ̈ܟܠܐܷ ܕܰܫܝܽܘܠ ܠܐܴ ܢܶܚܣܢܽܘܢܳܗ̇ ܘܟܽܠ ܕܬܶܐܣܽܘܪ ܘܬܶܫܪܶܐ ܒܰܐܪܥܳܐ ܢܗܶܐ ܐܰܣܺܝܪ ܘܰܫܪܶܐ ܒܰܫܡܰܝܳܐ: ܩܶܛܠܶܗ ܡܰܚܝܳܢܳܐ ܕܡܶܢ ܪ̈ܰܒܰܝ ܟܳܗ̈ܢܶܐ: ܘܢܽܘܚܳܡܶܗ ܬܠܺܝ̈ܬܳܝ ܝܰܘ̈ܡܶܐ ܓܠܐܴ ܠܶܗ: ܘܰܕܢܰܪܡܶܐ ܒܰܠܽܘܥܳܐ ܒܝܰܡܳܐ ܘܢܶܬܶܠ ܐܶܣܬܺܝܪܳܐ ܡܰܟܣܳܐ ܦܰܩܕܶܗ: ܠܝܰܡܳܐ ܐܰܝܟ ܡܳܪܳܐ ܦܩܰܕ ܕܰܢܛܰܒܥܶܗ ܕܰܚܙܳܐ ܠܰܦܠܺܝܓܽܘܬ ܪܶܥܝܳܢܶܗ: ܘܰܕܫܶܐܠ ܦܽܘܪܩܳܢܶܗ ܛܰܥܢܶܗ ܘܰܠܘܳܬܶܗ ܕܥܳܒܽܘܕܳܐ ܕܠܐܴ ܢܶܟ̈ܝܳܢ ܐܰܡܛܝܶܗ: ܟܽܠ ܚܰܝܠܺܝ̈ܢ ܘܟܽܠ ܬܶܗܪ̈ܺܝܢ ܕܥܳܒܽܘܕܽܘܬܶܗ ܚܰܘܝܶܗ: ܘܡܶܢ ܟܽܠ ܨܳܐܝܽܘܬܳܐ ܡܰܪܩܶܗ: ܘܰܒܦܰܓܪܶܗ ܘܰܕܡܶܗ ܫܰܘܬܦܶܗ: ܘܥܰܠ ܟܦܽܘܪܝܶܗ ܐܰܘܕܥܶܗ: ܘܒܰܬܝܳܒܽܘܬܳܐ ܗܳܝ ܪܚܺܝܡܬܳܐ ܕܩܰܪܶܒ ܩܰܒܠܶܗ: ܥܰܡ ܝܽܘܚܰܢܳܢ ܠܩܰܒܪܳܐ ܩܰܕܺܝܫܳܐ ܡܰܢܥܶܗ: ܘܒܰܚܙܳܬܶܗ ܕܟܶܬܳܢ̈ܶܐ ܘܰܕܣܽܘܕܳܪܳܐ ܕܰܟܪܺܝܟܺܝܢ ܘܣܺܝܡܺܝܢ ܟܽܠ ܚܰܕ ܠܰܣܛܰܪ ܢܽܘܚܳܡܶܗ ܫܒܺܝܚܳܐ ܐܰܪܙܶܗ: ܘܰܒܡܶܐܙܰܠܬܶܗ ܕܬܰܪܬܶܝܢ ܕܰܠܩܰܒܪܳܐ ܦܓܰܥ ܒܶܗ: ܘܥܰܡ ܦܽܘܩܳܕܳܐ ܕܰܠܓܽܘܕܳܐ ܕܢܶܫ̈ܶܐ ܕܢܺܐܙ̈ܳܠ̱ܢ: ܘܰܠܫܶܡܥܽܘܢ ܘܠܰܫܠܺܝ̈ܚܰܘܗ̱ܝ ܢܣܰܒܪ̈ܳܢ ܩܝܳܡܬܳܐ ܘܡܰܣܰܩܬܳܐ ܕܠܰܓܠܺܝܠܐܴ ܘܫܽܘܪܳܪܳܐ ܕܡܶܬܦܰܢܝܳܢܽܘܬܶܗ ܘܒܽܘܝܳܐܳܐ ܐܰܩܢܝܶܗ: ܥܰܠ ܫܶܬܶܐܣܬܳܐ ܗܳܝ ܩܰܕܡܳܝܬܳܐ ܕܪܰܒܽܘܬܳܐ ܘܰܕܪܺܝܫܳܢܽܘܬ ܬܰܠܡܺܝܕܽܘܬܳܐ ܐܰܩܺܝܡܶܗ: ܘܥܰܠ ܐܶܡܪ̈ܶܐ ܘܥܶܪ̈ܒܶܐ ܘܰܢܩܰܘ̈ܳܬܳܐ ܕܥܳܢ̈ܶܗ ܐܰܫܠܛܶܗ: ܘܡܶܢ ܟܦܘ̣ܪܝܳܐ ܠܳܐ ܘܳܠܝܳܝܳܐ ܚܰܪܪܶܗ: ܕܽܘܡܝܳܐ ܠܟܽܠ ܬܰܝ̈ܳܒܶܐ ܥܰܒܕܶܗ: ܘܰܒܕܰܪܳܐ ܕܠܽܘܩܒܰܠ ܣܳܛܳܢܳܐ ܙܰܟܝܶܗ: ܘܡܶܢ ܒܶܝܬ ܚܒܽܘܫܝܳܐ ܝܽܘܕܳܝܳܐ ܦܰܠܛܶܗ: ܩܕܳܡ ܫܳܡܪ̈ܳܝܶܐ ܠܣܺܝܡܽܘܢ ܚܰܪܫܳܐ ܡܶܢ ܒܶܝܬ ܐܺܝ̈ܕܰܘܗ̱ܝ ܒܒܶܗܬܬܳܐ ܐܰܩܺܝܡܶܗ: ܘܰܒܪܽܘܡܺܝ ܒܶܙܚܳܐ ܘܡܽܘܝܳܩܳܐ ܘܬܰܗܠܰܠܬܳܐ ܥܰܒܕܶܗ: ܘܡܶܢ ܪ̈ܰܘܡܶܐ ܥܶܠܳܝ̈ܶܐ ܐܰܝܟ ܪܰܒܶܗ ܐܰܪܡܝܶܗ: ܘܰܒܗܳܕܶܐ ܩܕܳܡ ܟܽܠܳܗ̇ ܪܽܘܡܺܝ ܐܰܣܓܺܝ ܩܰܠܣܶܗ: ܠܡܰܟܪܳܙܘ̣ ܠܥܰܡܳܐ ܘܰܠܥܰܡ̱̈ܡܶܐ ܥܰܬܕܶܗ: ܘܠܰܡܫܰܪܝܳܐ ܐܰܢܺܝܶܐܐ ܒܰܫܡܶܗ ܕܰܡܫܺܝܚܳܐ ܐܰܚܠܡܶܗ ܘܡܶܢ ܐܰܣܽܘܪܝܳܐ ܕܰܐܓܪܺܝܦܳܘܣ ܡܰܠܟܶܗ ܫܰܘܙܒܶܗ: ܘܰܕܠܐܴ ܕܶܚܠܐܴ ܠܒܰܝܬܶܗ ܬܰܪܨܶܗ: ܠܟܽܠ ܐܰܝܢܳܐ ܕܰܡܬܰܠܡܶܕ ܗ̱ܘܳܐ ܡܫܰܪܰܪ ܗ̱ܘܳܐ ܓܰܠܝܳܐܝ̣ܬ ܩܝܳܡܬܶܗ: ܠܥܰܡܳܐ ܕܝܽܘܕܳܝ̈ܶܐ ܨܰܠܒܶܗ: ܘܰܒܩܰܒܪܳܐ ܕܰܬܠܳܬ ܐܰܡܺܝ̈ܢ ܚܰܒܫܶܗ: ܘܰܕܠܐܴ ܢܶܚܙܶܐ ܚܒܳܠܐܴ ܐܰܩܺܝܡ ܠܦܰܓܪܶܗ: ܘܰܠܟܽܠ ܥܰܡ̱̈ܡܺܝܢ ܫܳܠܰܚ ܗ̱ܘܳܐ ܒܶܐܓܪ̈ܳܬܶܗ ܕܰܡܫܺܝܚܳܐ ܚܕܳܐ ܙܒܰܢ ܡܺܝܬ ܘܩܰܪܒܰܢ ܠܝܳܠܽܘܕܶܗ: ܘܰܢܚܶܬ ܠܰܫܝܽܘܠ ܘܰܫܪܳܐ ܫܽܘܠܛܳܢ ܚܶܫܽܘܟܳܐ ܘܰܦܪܰܩ ܠܰܓܒܺܝܠܬܶܗ: ܩܳܡ ܘܰܐܩܺܝܡܰܢ ܥܰܡܶܗ: ܘܠܰܒܥܶܠܕܒܳܒܳܐ ܕܰܐܛܥܺܝ ܒܶܗ ܫܰܦܠܶܗ: ܘܡܶܢ ܨܰܘܪܶܗ ܕܟܽܠ ܫܪܳܐ ܫܽܘܠܛܳܢܶܗ: ܘܒܰܐܪܥܳܐ ܣܰܚܦܶܗ ܘܰܫܕܳܐ ܠܬܳܓܶܗ: ܚܢܰܢ ܗܳܟܺܝܠ ܡܳܪܝܳܐ ܕܠܰܣܒܰܪܬܳܐ ܕܚܰܝ̈ܶܐ ܒܝܰܕ ܟܳܪܽܘܙܽܘܬܶܗ ܩܰܒܶܠܢܰܢ ܘܒܰܓܙܳܪܳܐ ܗܰܘ ܕܡܶܬܬܰܓܥܠܳܢܽܘܬܶܗ ܕܟܽܠܰܢ ܐܶܬܡܢܰܝܢܰܢ ܥܰܡܶܗ ܠܳܟ ܒܪܳܐ ܚܰܝܳܐ ܕܐܰܠܳܗܳܐ ܡܰܘܕܶܝܢܰܢ ܘܥܰܡܶܗ ܠܩܰܒܪܳܟ ܡܰܥܒܶܕ ܚܰܝ̈ܶܐ ܪܽܘܚܳܢܳܐܝ̣ܬ ܪܳܗܛܺܝܢܰܢ: ܘܰܒܢܽܘܚܳܡܶܗ ܕܠܐܴ ܚܒܳܠܐܴ ܡܶܫܬܰܪܪܺܝܢܰܢ: ܘܕܰܐܢ̱ܬ ܗ̣ܽܘ ܚܰܝ̈ܶܐ ܕܟܽܠ ܒܣܰܪ ܝܳܕܥܺܝܢܰܢ: ܥܰܡܶܗ ܥܶܛܪ̈ܶܐ ܕܟܰܝ̈ܳܐ ܘܰܕܠܐܴ ܡܽܘܡ ܕܣܳܠܩܺܝܢ ܡܶܢ ܓܰܘ ܠܶܒܳܐ ܒܗܳܢܳܐ ܝܰܘܡܳܐ ܕܰܩܝܳܡܬܳܟ ܡܫܺܝܚܳܐ ܐܰܠܳܗܳܐ ܡܰܥܛܪܺܝܢܰܢ: ܟܰܕ ܫܳܐܠܺܝܢܰܢ ܡܶܢܳܟ ܕܬܰܫܘܶܐ ܠܰܢ ܕܰܠܩܽܘܫܬܳܐ ܘܰܫܪܳܪܳܐ ܕܰܩܝܳܡܬܳܟ ܢܶܪܚܰܡ: ܘܒܳܬܰܪ ܢܽܘܗܪܳܐ ܘܚܰܝ̈ܶܐ ܕܢܽܘܚܳܡܳܟ ܢܶܪܗܰܛ: ܘܰܟܠܺܝܠ ܩܽܘܠܳܣ̈ܶܐ ܠܰܡܥܰܠܝܽܘܬܳܟ ܢܶܓܕܽܘܠ: ܘܫܽܘܒܚܳܐ ܘܢܰܚ̈ܬܶܐ ܫܒܺܝ̈ܚܶܐ ܘܰܡܦܰܬܟ̈ܶܐ ܠܡܶܫܬܽܘܬܳܟ ܢܥܰܬܶܕ: ܘܠܰܚܬܺܝܪܽܘܬܳܐ ܐܶܡܳܐ ܡܚܰܒܠܳܢܺܝܬܳܐ ܢܶܒܣܽܘܪ: ܘܠܰܚܣܳܡܳܐ ܘܡܶܐܟܰܠܩܰܪܨܳܐ ܒܦܰܓܪܳܟ ܩܰܕܺܝܫܳܐ ܢܶܙܟܶܐ: ܘܠܰܛܢܳܢܳܐ ܒܺܝܫܳܐ ܘܡܰܘܠܕܳܢܳܐ ܕܚܶܪ̈ܝܳܢܶܐ ܢܶܕܚܽܘܩ ܘܠܰܪ̈ܓܺܝܓܳܬܳܐ ܫܓܺܝܪ̈ܶܐ ܢ̇ܕܽܘ̣ܫ ܘܰܢ̇ܛܰܠܶܩ: ܘܰܠܚܽܘ̈ܫܳܒܶܐ ܒܺܝ̈ܫܶܐ ܘܰܡܨܰܥܪ̈ܶܐ ܢܩܰܦܰܚ: ܘܰܠܡܶܐܬܺܝܬܳܟ ܕܬܰܪܬܶܝܢ ܢܣܰܟܶܐ: ܘܠܰܓܢܽܘܢܳܐ ܕܢܽܘܗܪܳܐ ܥܰܡܳܟ ܢܶܥܘܽܠ ܘܡܶܢ ܝܰܡܺܝܢܳܟ ܒܚܰܕܽܘܬܳܐ ܢܕܰܝܶܨ: ܘܰܚܢܰܢ ܘܥܰܢܺܝ̈ܕܰܝܢ ܢܰܣܶܩ ܫܽܘܒܚܳܐ: ܘܢܶܬܶܠ ܬܰܘܕܺܝܬܳܐ ܠܳܟ ܡܳܪܝ̱ ܘܒܺܐܝ̈ܕܰܝܟ ܥܰܡܶܗ ܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܰܡܥܳܠܡܝ̣ܢ ܐܰܡܝ̣ܢ܀