ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܚܰܝܳܐ ܕܰܛܥܶܡ ܡܰܘܬܳܐ ܒܨܶܒܝܳܢܶܗ: ܕܢܰܚܶܐ ܠܡܳܝܽܘ̈ܬܶܐ ܒܰܚܢܳܢܶܗ: ܘܰܗܘܳܐ ܐܰܝܟ ܚܰܕ ܡܶܢ ܡܺܝ̈ܬܶܐ ܕܢܰܟܪܶܙ ܠܰܩܒܺܝܪ̈ܶܐ ܦܽܘܪܩܳܢܶܗ: ܠܗܰܘ ܥܺܝܪܳܐ ܕܥܺܝܪ̈ܰܝ ܪܰܘܡܳܐ ܥܺܝܪܳܐܝ̣ܬ ܡܥܰܕܥܕܺܝܢ ܠܶܗ: ܘܰܕܡܶܟ ܒܶܝܬ ܥܰܢܺܝ̈ܕܶܐ ܕܰܫܦܰܪ ܠܶܗ: ܘܩܳܡ ܡܶܢ ܩܰܒܪܳܐ ܒܚܰܝܠܬܳܢܽܘܬܶܗ: ܘܰܐܩܺܝܡ ܠܐܴܕܳܡ ܨܰܠܡܳܐ ܕܪܰܒܽܘܬܶܗ ܕܠܶܗ ܝܳܐܶܐ ܫܽܘܒܚܳܐ܀

ܣܶܕܪܳܐ

ܩܕܳܡܰܝܟ ܐܰܠܳܗܳܐ ܡܶܠܬܳܐ ܗܰܘ ܕܡܶܡܬܽܘܡ ܐܝ̣ܬܝܟ ܘܰܠܥܳܠܰܡ ܩܰܝܳܡ ܐܰܢ̱ܬ: ܡܩܰܪܒܺܝܢܰܢ ܨܠܰܘ̈ܳܬܳܐ ܘܬܰܟܫ̈ܦܳܬܳܐ ܒܥܺܐܕܳܐ ܗܳܢܳܐ ܫܒܺܝܚܳܐ ܕܰܩܝܳܡܬܳܟ ܕܡܶܢ ܒܶܝܬ ܡܺܝ̈ܬܶܐ: ܐܰܢ̱ܬ ܗ̱ܘ ܓܶܝܪ ܒܪܳܐ ܝܺܚܺܝܕܳܝܳܐ ܕܨܳܪܽܘܟ ܢܒܺܝ̈ܶܐ ܒܐ̱ܪ̈ܳܙܰܝܗܽܘܢ: ܘܰܐܟܪܙܽܘܟ ܟܺܐܢ̈ܶܐ ܒܦ̈ܶܠܐܴܬܗܽܘܢ: ܘܪܰܫܡܽܘܟ ܙܰܕܺܝ̈ܩܶܐ ܒܫܰܪ̈ܒܰܝܗܽܘܢ: ܘܰܓܠܐܱܘܽܘܟ ܫܠܺܝ̈ܚܶܐ ܒܝܽܘܒܳܠܰܝ̈ܗܽܘܢ: ܘܙܰܝܚܽܘܟ ܥܺܝܪ̈ܶܐ ܘܡܰܠܐܱܟ̈ܶܐ ܒܬܶܫܒ̈ܚܳܬܗܽܘܢ: ܘܰܐܘܕܰܥܬ ܪܰܒܽܘܬܳܟ ܒܩܽܘܠܳܣܰܝ̈ܗܽܘܢ: ܘܰܐܕܢܚܽܘܟ ܒܝܽܘܒܳܒܰܝ̈ܗܽܘܢ ܕܨܶܝܕ ܩܰܒܪܳܐ: ܕܰܐܢ̱ܬ ܐܝ̣ܬܝܟ ܢܽܘܗܪܳܐ ܕܡܶܢ ܢܽܘܗܪܳܐ ܘܨܶܡܚܳܐ ܘܕܶܢܚܳܐ ܕܙܰܕܺܝܩܽܘܬܳܐ: ܗܰܘ ܕܡܶܢ ܐܰܒܳܐ ܕܠܐܴ ܐܶܡܳܐ ܐܶܬܺܝܠܶܕܬ: ܘܡܶܢ ܐܶܡܳܐ ܕܺܝܠܳܟ ܝܳܠܕܰܬ݀ ܐܰܠܳܗܳܐ ܕܢܰܚܬ: ܗܰܘ ܕܟܰܕ ܣܒܰܠܬ ܗܳܠܶܝܢ ܟܽܠܗܶܝܢ ܐ̱ܢܳܫܳܝ̈ܳܬܳܐ: ܒܟܽܠܗܶܝܢ ܐܰܠܳܗܳܝ̈ܳܬܳܐ ܐܶܬܪܰܡܪܰܡܬ: ܟܰܕ ܕܶܝܢ ܨܶܝܕ ܡܺܝ̈ܬܶܐ ܥܰܠܬ ܘܡܶܢ ܩܰܒܪܳܐ ܕܠܐܴ ܚܒܳܠܐܴ ܩܳܡܬ: ܘܒܶܙܬܳܐ ܕܡܶܢ ܕܳܪܕܳܪ̈ܺܝܢ ܚܡܺܝܠܐܴ ܗܘܳܬ݀ ܒܙܳܟܽܘܬܳܐ ܪܰܒܬܳܐ ܐܰܦܶܩܬ: ܘܓܳܠܽܘܬܳܐ ܗܳܝ ܕܰܚܒܰܫ ܗ̱ܘܳܐ ܡܰܘܬܳܐ ܒܚܶܫܽܘܟܳܐ ܥܰܡܳܟ ܠܐܱܬܪܳܐ ܕܚܰܝ̈ܶܐ ܘܰܕܢܽܘܗܪܳܐ ܐܰܦܢܺܝܬ: ܘܰܠܡܰܪܓܳܢܺܝܬܳܐ ܗܳܝ ܝܰܩܺܝܪܰܬ݀ ܕܡܰܝ̈ܳܐ ܨܰܠܡܶܗ ܕܳܐܕܳܡ ܡܶܢ ܥܽܘܒܶܗ ܕܡܰܘܬܳܐ ܐܰܦܶܩܬ ܘܰܐܣܶܩܬ ܘܰܠܫܽܘܪ̈ܶܐ ܕܰܫܝܽܘܠ ܡܫܰܩ̈ܠܐܷ ܒܥܽܘܫܢܳܐ ܕܰܕܪܳܥܳܟ ܣܰܚܶܦܬ: ܘܰܠܟܽܠܗܽܘܢ ܝܰܠܕ̈ܰܘܗ̱ܝ ܕܳܐܕܳܡ ܣܰܒܪܳܐ ܕܰܩܝܳܡܬܳܐ ܡܠܰܝܬ: ܪ̈ܶܒܽܘ ܬܶܕܡܪ̈ܳܬܳܐ ܦܰܐܝܰܬ݀ ܠܐܱܠܳܗܳܐ ܒܶܗ ܒܗܳܢܳܐ ܝܰܘܡܳܐ ܚܰܘܺܝܬ: ܐܰܝܟܰܢܳܐ ܕܬܶܚܙܶܐ ܘܬܶܒܗܰܬܝ̱ ܫܳܛܺܝܬܳܐ ܗܳܝ ܕܟܶܦܪܰܬ݀ ܒܳܟ ܘܦܶܩܪܰܬ ܒܫܳܢܝܽܘܬܳܗ̇ ܥܰܠ ܡܰܘܬܳܟ: ܘܬܶܚܕܶܐ ܘܬܶܪܘܰܙܝ̱ ܥܺܕܬܳܐ ܗܳܝ ܕܰܒܪܽܘܡܪ̈ܳܡܶܐ ܙܰܝܰܚܬܳܟ: ܘܕܐܰܠܳܗܳܐ ܫܰܪܺܝܪܳܐ ܐܝ̣ܬܝܟ ܐܶܫܬܰܘܕܥܰܬ: ܗܳܝ ܕܰܦܪܰܩܬ ܒܚܰܫܳܟ ܘܰܐܚܺܝܬ ܒܡܰܘܬܳܟ: ܘܚܰܪܰܪܬ ܒܩܶܛܠܳܟ: ܘܰܚܬܰܡܬ ܒܰܨܠܺܝܒܳܟ: ܘܐܰܦܨܰܚ̣ܬ ܘܚܰܕܺܝܬܳܗ̇ ܒܰܩܝܳܡܬܳܟ: ܘܗܳܐ ܓܳܥܝܳܐ ܠܘܳܬܳܟ ܒܗܳܢܳܐ ܝܰܘܡܳܐ: ܘܒܳܥܽܘܬܳܐ ܥܰܡ ܥܶܛܪܳܐ ܕܒܶܣ̈ܡܶܐ ܛܽܘ̈ܒܶܐ ܡܫܰܕܪܳܐ ܠܐܱܬܪܳܐ ܕܰܫܟܺܝܢܬܳܟ: ܘܝܳܬܒܳܐ ܥܰܠ ܣܰܒܪܳܐ ܕܺܝܠܳܟ ܘܰܡܣܰܟܝܳܐ ܠܰܚܢܳܢܳܟ: ܘܰܡܚܰܒܒܳܐ ܠܰܒܢܶܝ̈ܗ̇ ܕܺܐܝܬܰܝܗܽܘܢ ܥܠܰܠܬܶܗ ܕܰܙܩܺܝܦܳܟ: ܘܫܳܐܠܐܴ ܪ̈ܰܚܡܶܐ ܒܰܩܝܳܡܬܳܟ ܚܠܳܦ ܟܽܠܗܽܘܢ ܟܶܢ̈ܫܶܝܗ̇: ܐܰܝܟܰܢܳܐ ܕܚܰܛܳܝ̈ܶܐ ܘܡܰܣܟܠܳܢ̈ܶܐ ܒܶܗ ܢܶܙܕܰܕܩܽܘܢ: ܛܳܥܰܝ̈ܳܐ ܘܰܐܒܺܝ̈ܕܶܐ ܒܶܗ ܢܶܫܬܰܟܚܽܘܢ: ܪ̈ܓܺܝܙܶܐ ܘܰܐܟܬܳܢ̈ܶܐ ܒܶܗ ܢܶܫܬܰܦܽܘܢ: ܛܰܡ̈ܶܐܐ ܘܙܰܠܺܝ̈ܠܐܷ ܒܶܗ ܢܶܬܩܰܕܫܽܘܢ: ܡܳܪ̈ܽܘܕܶܐ ܘܒܰܥܪܺܝܪ̈ܳܝܶܐ ܒܶܗ ܢܶܫܬܰܝܢܽܘܢ ܡܥܳܩ̈ܶܐ ܘܰܐܒܺܝ̈ܠܐܷ ܒܶܗ ܢܶܬܦܰܨܚܽܘܢ: ܢܒܺܝ̈ܶܐ ܒܶܗ ܢܶܚܕܽܘܢ: ܫܠܺܝ̈ܚܶܐ ܒܶܗ ܢܶܪܽܘܙܽܘܢ: ܘܣܳܗ̈ܕܶܐ ܒܶܗ ܢܕܽܘܨܽܘܢ: ܐܳܦ ܡܰܘܕ̈ܝܳܢܶܐ ܒܶܗ ܢܶܙܕܰܝܢܽܘܢ: ܘܟܶܢ̈ܫܶܐ ܫܡܰܝ̈ܳܢܶܐ ܒܶܗ ܢܶܬܦܰܨܚܽܘܢ: ܘܰܒܢܰܝ̈ܢܳܫܳܐ ܫܠܳܡܳܐ ܘܚܰܕܽܘܬܳܐ ܢܶܣܬܰܒܪܽܘܢ: ܚܰܝ̈ܶܐ ܒܶܗ ܢܶܬܢܰܛܪܽܘܢ: ܥܰܢܝ̣̈ܕܶܐ ܡܗܰܝܡ̈ܢܶܐ ܒܶܗ ܢܶܬܚܰܣܘܢ̇: ܘܡܶܢ ܟܽܠ ܣܰܘ̈ܦܺܝܢ ܟܢܺܝܫܳܐܝ̣ܬ: ܘܡܶܢ ܟܽܠ ܥܰܡ̱̈ܡܺܝܢ ܫܰܘܝܳܐܝ̣ܬ: ܘܡܶܢ ܟܽܠ ܬܶܓܡܺܝ̈ܢ ܓܡܺܝܪܳܐܝ̣ܬ: ܫܽܘܒܚܳܐ ܘܪܽܘܡܪܳܡܳܐ ܢܰܣܶܩ ܠܳܟ ܘܬܰܘܕܺܝܬܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀