ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܓܰܐܝܳܐ ܘܓܰܢ̱ܒܳܪܳܐ ܕܫܽܘܒܚܳܐ ܘܙܳܟܽܘܬܳܐ ܩܳܡ ܡܶܢ ܩܰܒܪܳܐ ܘܚܰܕܶܬ ܠܰܟܝܳܢܳܐ ܐ̱ܢܳܫܳܝܳܐ: ܠܗܰܘ ܕܰܐܒܗܶܬ ܠܨܳܠܽܘ̈ܒܶܐ ܒܢܽܘܚܳܡܶܗ ܘܚܰܕܺܝ ܠܬܰܠܡܺܝ̈ܕܶܐ ܩܰܕܺܝ̈ܫܶܐ ܒܰܚܙܳܬܶܗ: ܠܗܰܘ ܕܶܐܬܳܐ ܘܰܦܪܰܩ ܠܓܶܢܣܳܐ ܕܒܶܝܬ ܐܳܕܳܡ: ܘܬܽܘܒ ܐܳܬܶܐ ܠܚܰܪܬܳܐ ܒܫܽܘܒܚܳܐ ܪܰܒܳܐ ܠܕܺܝܢܳܐ ܘܠܰܬܒܰܥܬܳܐ ܕܟܳܦܽܘܪ̈ܶܐ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܶܕܪܳܐ

ܟܰܕ ܒܣܽܘ̈ܟܳܠܐܷ ܪ̈ܳܡܰܝ ܡܶܢ ܥܳܠܡܳܐ ܒܰܩܝܳܡܬܳܐ ܕܺܝܠܳܟ ܡܶܬܒܰܩܶܝܢܰܢ ܐܳܘ ܡܶܠܬܳܐ ܐܰܠܳܗܳܐ: ܘܰܠܙܰܗܪܺܝܪ̈ܶܐ ܗܳܢܘܢ̇ ܨܰܡܽܘܚ̈ܬܳܢܶܐ ܕܡܶܢ ܩܰܒܪܳܟ ܐܰܕܺܝܩܘ̱ ܒܥܰܝ̈ܢܶܐ ܕܬܰܪܥܺܝܬܰܢ ܟܰܣܝܳܐܝ̣ܬ ܚܳܙܶܝܢܰܢ: ܘܰܠܒܰܪ̈ܩܶܐ ܢܽܘܪ̈ܳܢܳܝܶܐ ܕܝܰܘܡܳܢ ܐܰܒܪܶܩܘ̱ ܥܰܠ ܢܳܛܽܘܪ̈ܶܐ ܘܥܰܘܰܪܘ̱ ܐܶܢܽܘܢ: ܒܡܰܕ̈ܥܰܝܢ ܪܽܘܚܳܢܳܐܝ̣ܬ ܢܳܣܒܺܝܢܰܢ: ܘܰܠܡܰܠܐܱܟ̈ܶܐ ܩܰܕܺܝ̈ܫܶܐ ܕܒܰܠܒܽܘ̈ܫܶܐ ܚܶܘܳܪ̈ܶܐ ܐܶܬܚܙܺܝܘ: ܘܥܰܡ ܢܶܫ̈ܶܐ ܡܶܣܬܰܘܕܝ̣ܢ ܐܰܟܡܰܢ ܕܰܠܢܰܦ̈ܫܳܬܰܢ ܡܠܰܒܒܺܝܢ ܕܠܐܴ ܬܶܕܚ̈ܠܳܢ ܒܗܰܘ̈ܢܰܝܢ ܫܳܩܠܺܝܢܰܢ: ܘܟܰܕ ܒܟܽܠܗܶܝܢ ܐ̱ܪܳܙܳܢܳܐܝ̣ܬ ܘܪܽܘܚܳܢܳܐܝ̣ܬ ܡܰܦܪܓܺܝܢܰܢ: ܘܰܠܒܽܘ̈ܫܶܐ ܚܶܘܳܪ̈ܶܐ ܘܕܽܘܒܳܪ̈ܶܐ ܪ̈ܽܘܚܳܢܶܐ ܡܶܬܥܰܛܦܺܝܢܰܢ ܘܚܰܕܽܘܬܳܢܳܐܝ̣ܬ ܟܰܕ ܪܳܘܙܺܝܢܰܢ ܡܰܙܥܩܺܝܢܰܢ ܘܳܐܡܪܺܝܢܰܢ: ܝܰܘܡܰܐ ܗ̱ܘ ܕܚܰܕܽܘܬܳܐ ܘܕܰܪܘܳܙܳܐ: ܠܐܴ ܢܶܗܘܶܐ ܒܶܗ ܟܡܺܝܪ̈ܶܐ ܘܰܡܥ̈ܳܩܶܐ: ܝܰܘܡܰܐ ܗ̱ܘ ܕܢܽܘܗܪܳܐ ܨܡܰܚ ܘܰܦܨܺܝܚܽܘܬܳܐ ܐܰܡܠܟܰܬ݀ ܠܐܴ ܢܟܰܬܰܪ ܒܶܗ ܘܢܶܛ̇ܫܶܐ ܒܚܶܫܽܘܟܳܐ: ܝܰܘܡܰܐ ܗ̱ܘ ܕܨܶܡܚ̈ܶܐ ܕܰܩܝܳܡܬܳܐ: ܘܙܰܠܺܝ̈ܩܶܐ ܢܽܘܗܪ̈ܳܢܳܝܶܐ ܠܐܴ ܒܝܰܕ ܥܒܳܕܰܝ̈ܢ ܥܰܡܽܘ̈ܛܶܐ ܒܶܐܣ̈ܶܐ ܘܓܳܘܢܰܘ̈ܳܬܳܐ ܕܰܫܪܰܓܪ̈ܳܓܝܳܬܳܐ ܢܡܽܘܫ: ܝܰܘܡܰܐ ܗ̱ܘ ܕܒܰܪ̈ܩܶܐ ܕܚܰܕ̈ܘܳܬܳܐ: ܘܙܰܠܓ̈ܶܐ ܥܰܠ ܕܫܳܘܶܝܢ ܡܰܙܠܓܺܝܢ: ܠܐܴ ܐܰܝܟ ܦܪ̈ܰܚܕܽܘܕܶܐ ܢܰܚܶܒ ܠܛܽܘܫ̈ܝܳܬܳܐ ܘܰܠܛܶܠ̈ܳܠܐܷ ܠܺܠܝ̈ܳܝܶܐ: ܝܰܘܡܰܐ ܗ̱ܘ ܕܨܶܒ̈ܬܶܐ: ܘܕܰܠܒܽܘ̈ܫܶܐ ܚܶܘܳܪ̈ܶܐ ܕܚܳܫܚܺܝܢ ܠܐܷܡܪ̈ܶܐ ܡܫܺܝ̈ܚܳܝܶܐ: ܠܐܴ ܢܶܬܥܰܛܰܦ ܒܝܰܕ ܣܰܢ̈ܝܳܬܰܢ ܠܒܽܘ̈ܫܶܐ ܐܽܘܟܳܡ̈ܶܐ ܕܰܓܕܰܝ̈ܳܐ ܦܳܥܽܘܝ̈ܶܐ: ܝܰܘܡܰܐ ܗ̱ܘ ܕܰܙܡܺܝܪ̈ܳܬܳܐ ܘܗܽܘ̈ܠܳܠܐܷ ܫܒܺܝ̈ܚܶܐ ܠܐܴ ܢܡܰܠܶܠ ܒܶܗ ܡ̈ܶܠܐܷ ܕܪܶܛܢܳܐ ܘܰܕܡܶܐܟܰܠܩܰܪܨܳܐ ܘܫܽܘܥ̈ܝܳܬܳܐ ܦܰܟܺܝܗ̈ܳܬܳܐ: ܝܰܘܡܰܐ ܗ̱ܘ ܕܰܒܢ̈ܳܬ ܩ̈ܳܠܐܷ ܐܰܠܳܗܳܝ̈ܳܬܳܐ ܡܶܬܠܰܥ̈ܙܳܢ ܒܶܗ: ܕܠܐܴ ܢܰܥܶܠ ܚܠܳܦܰܝܗܶܝܢ ܠܰܘ̈ܛܳܬܳܐ ܘܓܽܘܕܳܦ̈ܶܐ ܡܰܪܺܝܪ̈ܶܐ: ܝܰܘܡܰܐ ܗ̱ܘ ܕܩܺܝ̈ܢܳܬܳܐ ܨܠܺܝ̈ܠܳܬܳܐ ܘܬܶܫܒ̈ܚܳܬܳܐ ܦܪ̈ܺܝܫܳܬܳܐ: ܠܐܴ ܢܶܬܬܰܓܰܪ ܚܠܳܦܰܝܗܶܝܢ ܫܶܢܬܳܐ ܘܰܚܒܰܢܳܢܽܘܬܳܐ ܘܡܰܐܺܝܢܽܘܬܳܐ: ܝܰܘܡܰܐ ܗ̱ܘ ܕܚܽܘܒܳܐ ܘܰܕܪܶܚܡܰܬ݀ ܐ̱ܢܳܫܽܘܬܳܐ ܠܐܴ ܢܚܰܘܶܐ ܒܶܗ ܒܺܝܫܳܐ ܘܕܰܠܩܽܘܒܠܳܝܽܘܬܳܐ: ܝܰܘܡܰܐ ܗ̱ܘ ܕܫܰܦܝܘ̣ܬܳܐ ܘܰܦܫܝ̣ܛܘ̣ܬܳܐ ܠܳܐ ܢܶܬܶܠ ܢܰܦܫܰܢ ܠܣܶܢܶܐܬܳܐ ܘܰܕܠܝ̣ܚܘ̣ܬܳܐ: ܝܰܘܡܰܐ ܗ̱ܘ ܕܰܫܠܳܡܳܐ ܘܰܕܡܰܟܺܝܟܽܘܬܳܐ ܠܐܴ ܢܰܥܒܪܺܝܘܗ̱ܝ ܒܚܶܪ̈ܝܳܢܶܐ ܘܰܢܥܺܝܪ ܒܶܗ ܬܰܟܬܽܘ̈ܫܶܐ ܘܡܰܨ̈ܘܳܬܳܐ ܥܰܠ ܩܰܪ̈ܺܝܒܰܝܢ: ܝܰܘܡܰܐ ܗ̱ܘ ܕܰܡܢܺܝܚ ܠܐܴܚܽܘ̈ܕܰܘܗ̱ܝ ܡܶܢ ܬܥܳܫܳܐ ܣܪܺܝܩܳܐ ܘܦܽܘܠܚܳܢܳܐ ܕܺܐܝܕܰܝ̈ܳܐ : ܘܰܡܚܰܕܶܐ ܠܣܰܟܽܘܠܬܳܢ̈ܶܐ ܒܗܰܘ ܥܳܠܡܳܐ ܡܶܣܬܰܟܝܳܢܳܐ: ܠܳܐ ܢܶܬܥܰܪܩܰܠ ܒܨܶܒܘ̈ܳܬܳܐ ܕܠܳܐ ܡܟܰܬܪ̈ܳܢ ܘܢܶܬܟܕܶܢ ܒܰܬܥܳܫܳܐ ܥܳܠܡܳܢܳܝܳܐ ܕܗ̣ܽܘ ܡܰܘܩܶܕ ܠܰܢ ܗܳܪܟܳܐ ܘܬܰܡܳܢ: ܐܶܠܐܴ ܢܩܽܘܡ ܗܳܪܟܳܐ ܕܰܟܝܳܐܝ̣ܬ ܘܰܢܫܰܡܶܫ ܙܰܗܝܳܐܝ̣ܬ: ܘܰܢܨܰܠܐܷ ܚܦܺܝܛܳܐܝ̣ܬ: ܘܰܢܙܰܡܰܪ ܟܽܠܰܢ ܫܒܺܝܚܳܐܝ̣ܬ: ܘܰܢܫܰܒܰܚ ܩܰܕܺܝܫܳܐܝ̣ܬ ܘܰܢܩܰܠܶܣ ܬܗܺܝܪܳܐܝ̣ܬ: ܘܪܽܘܚܳܢܳܐܝ̣ܬ ܟܽܠܰܢ ܢܶܗܪܽܘܓ ܐܰܡܺܝܢܳܐܝ̣ܬ ܢܶܬܗܰܓܶܐ: ܘܢܳܡܽܘܣܳܐܝ̣ܬ ܢܶܬܚܰܫܰܒ ܘܟܰܕ ܒܥܳܠܡܳܐ ܗܰܘ ܣܰܓܺܝ ܬܶܗܪ̈ܶܐ ܘܰܣܒܺܝܣ ܒܛܽܘ̈ܒܶܐ: ܥܰܝ̈ܢܰܝ ܠܶܒܰܢ ܡܰܩܬܺܝܢܰܢ: ܠܬܰܡܳܢ ܢܣܰܟܶܐ ܠܬܰܡܳܢ ܢܶܚܒܽܘܨ: ܠܬܰܡܳܢ ܢܶܩܪܽܘܒ ܠܬܰܡܳܢ ܢܶܬܠܗܶܩ ܠܒܽܘܣܳܡܳܐ ܡܰܪܘ̣ܙܳܢܳܐ ܠܦܽܘܛܳܡ̈ܶܐ ܘܰܠܦܽܘܢܳܩ̈ܶܐ ܥܕܶܢܳܝ̈ܶܐ: ܠܗܰܘ ܕܠܶܗ ܟܽܠܰܢ ܡܨܰܠܶܝܢܰܢ ܕܢܶܫܬܘܶܐ ܘܰܒܛܰܝܒܽܘܬܶܗ ܕܡܳܪܰܢ ܝܶܫܽܘܥ ܡܫܺܝܚܳܐ: ܘܕܰܐܒܽܘܟ ܥܰܡ ܪܽܘܚܶܗ ܩܰܕܺܝܫܳܐ ܗܳܫܳܐ܀