ܦܪܽܘܡܝܽܘܢ

ܬܶܫܒܽܘܚܬܳܐ: ܠܰܚܕܳܐ ܐܽܘܣܺܝܰܐ ܠܐܴ ܡܶܬܦܰܠܓܳܢܺܝܬܳܐ ܐܰܒܳܐ ܥܶܠܬܳܐ ܕܥܶܠܬܳܢ̈ܶܐ: ܘܰܒܪܳܐ ܡܶܠܬܳܐ ܕܠܐܴ ܡܶܬܡܰܠܠܐܴ ܒܠܶܫܳܢܳܐ ܕܰܡܠܺܝ̈ܠܐܷ: ܘܪܽܘܚܳܐ ܕܰܫܘܶܐ ܠܐܱܒܳܐ ܘܠܰܒܪܳܐ ܒܟܽܠ ܡܶܕܶܡ: ܘܝܳܗܶܒ ܡܶܠܬܳܐ ܘܚܰܝ̈ܶܐ ܠܥܰܒܕ̈ܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ܀

ܣܶܕܪܳܐ

ܫܽܘܒܚܳܐ ܠܳܟ ܐܰܠܳܗܳܐ ܐܰܒܳܐ ܕܫܰܕܰܪܬ ܠܰܒܪܳܟ ܚܰܒܺܝܒܳܐ ܡܶܛܽܠ ܦܽܘܪܩܳܢܰܢ ܘܰܐܬܕܰܡܺܝ ܠܰܢ ܒܟܽܠܡܶܕܶܡ ܣܛܰܪ ܡܶܢ ܚܛܺܝܬܳܐ: ܘܰܗܘܳܐ ܡܶܢܰܢ ܟܰܕ ܠܐܴ ܫܰܢܺܝ ܐܰܘ ܐܶܫܬܰܚܠܰܦ ܡܶܢ ܐܰܠܳܗܽܘܬܳܐ ܡܪܰܝܰܡܬܳܐ: ܘܡܰܠܺܝ ܟܽܠܳܗ̇ ܡܕܰܒܪܳܢܽܘܬܳܐ ܕܰܚܠܳܦܰܝܢ ܘܰܥܕܰܡܳܐ ܠܚܰܫܳܐ ܘܡܰܘܬܳܐ ܘܰܙܩܺܝܦܳܐ ܩܰܒܶܠ ܥܠܰܘܗ̱ܝ: ܘܩܳܡ ܒܝܰܘܡܳܐ ܬܠܺܝܬܳܝܳܐ: ܘܶܐܬܚܙܺܝ ܠܢܶܫ̈ܶܐ ܢܰܟ̈ܦܳܬܳܐ ܒܰܩܝܳܡܬܶܗ ܘܒܶܗ ܐܶܬܢܰܚܰܡܘ̱ ܩܒܺܝܪ̈ܶܐ ܘܒܶܗ ܐܶܫܬܰܪܰܪܘ̱ ܬܰܠܡܺܝ̈ܕܶܐ ܘܰܐܦܶܩ ܐܶܢܽܘܢ ܠܰܡܣܰܒܳܪܽܘ ܩܝܳܡܬܳܐ ܡܰܠܝܰܬ݀ ܚܰܕ̈ܘܳܬܳܐ: ܕܩܳܡ ܠܶܗ ܡܫܺܝܚܳܐ ܡܶܢ ܩܰܒܪܳܐ: ܚܕܰܘ ܥܰܡ̱̈ܡܶܐ ܘܕܽܘܨܘ̱ ܕܰܗܘܳܐ ܠܟܽܘܢ ܦܽܘܪܩܳܢܳܐ: ܐܶܬܒܰܣܰܡܘ̱ ܥܰܡ̱̈ܡܶܐ ܥܰܡ ܥܰܡܶܗ ܕܰܗܘܳܬ݀ ܠܟܽܘܢ ܚܰܕܽܘܬܳܐ: ܐܶܬܬܥܺܝܪܘ̱ ܕܰܡ̈ܟܶܐ ܘܩܽܘܡܘ̱ ܡܶܢ ܫܶܢܬܳܐ ܕܰܪܡܶܝܢ ܐܢ̱ܬܽܘܢ ܒܳܗ̇: ܕܗܳܐ ܐܶܬܳܐ ܠܶܗ ܥܺܝܪܳܐ ܕܰܡܥܺܝܪ ܕܰܡܟܽܘܬܟܽܘܢ: ܘܰܢܦܰܩܘ̱ ܫܠܺܝ̈ܚܶܐ ܠܰܣܒܰܪܬܳܐ ܘܰܐܟܪܶܙܘ̱ ܠܟܽܠ ܥܰܡ̱̈ܡܝ̣ܢ ܐ̱ܪܳܙܳܐ ܕܰܬܠܺܝܬܳܝܽܘܬܳܐ ܚܕܳܐ ܐܰܠܳܗܽܘܬܳܐ ܕܠܐܴ ܡܶܬܦܰܪܫܳܐ ܘܠܐܴ ܡܶܬܒܰܨܝܳܐ: ܘܒܳܬܰܪ ܐܰܪܒܥܺܝܢ ܝܰܘ̈ܡܺܝܢ ܕܩܳܡ ܡܶܢ ܩܰܒܪܳܐ ܣܠܶܩ ܠܰܫܡܰܝܳܐ ܒܫܽܘܒܚܳܐ ܪܰܒܳܐ ܠܘܳܬ ܐܰܒܘ̣ܗ̱ܝ ܡܫܰܒܚܳܐ: ܘܡܶܢ ܒܳܬܰܪ ܕܦܰܩܶܕ ܠܬܰܠܡܺܝ̈ܕܰܘܗ̱ܝ ܕܰܢܩܰܘܽܘܢ ܠܫܽܘܘܕܳܝܶܗ: ܘܰܢܟܰܬܪܽܘܢ ܐܳܦ ܢܚܽܘܪܽܘܢ ܠܡܽܘܠܟܳܢܳܐ ܗܰܘ ܕܶܐܫܬܰܘܕܺܝ ܠܗܽܘܢ ܕܠܐܴ ܢܶܪܚܩܽܘܢ ܡܶܢ ܐܽܘܪܫܠܶܡ ܥܕܰܡܳܐ ܕܰܡܫܰܕܰܪ ܐ̱ܢܳܐ ܠܗܽܘܢ ܪܽܘܚܳܐ ܩܰܕܺܝܫܳܐ ܦܰܪܰܩܠܺܝܛܳܐ: ܘܫܰܕܰܪ ܥܠܰܝܗܽܘܢ ܘܶܐܬܡܠܺܝܘ ܗ̱ܘܰܘ ܚܰܝܠܐܴ ܕܪܽܘܚܳܐ ܩܰܕܺܝܫܳܐ ܘܰܐܛܺܝܦܘ̱ ܠܟܽܠܳܗ̇ ܒܪܺܝܬܳܐ ܒܳܐܬܘ̈ܳܬܳܐ ܘܬܶܕܡܪ̈ܳܬܳܐ ܘܰܒܚܰܝ̈ܠܐܷ: ܟܰܕ ܠܰܟܪ̈ܺܝܗܶܐ ܡܰܐܣܶܝܢ ܗ̱ܘܰܘ ܘܠܰܡܫܰܪ̈ܰܝܳܐ ܡܩܺܝܡܺܝܢ ܗ̱ܘܰܘ ܘܠܐܱܒܺܝ̣̈ܠܐܷ ܒܽܘܝܳܐܳܐ ܡܳܠܶܝܢ ܗ̱ܘܰܘ: ܘܚܽܘܠܡܳܢܳܐ ܕܟܽܠ ܟܺܐܒ ܘܟܽܠ ܟܽܘܪܗܳܢ ܒܶܝܬ ܐܺܝܕܰܝ̈ܗܽܘܢ ܟܪ̈ܺܝܗܶܐ ܘܰܐܠܺܝ̣̈ܨܶܐ ܩܳܢܶܝܢ ܗ̱ܘܰܘ: ܘܰܠܡܺܝ̈ܬܶܐ ܒܚܰܝܠܐܴ ܕܡܳܪܗܽܘܢ ܡܩܺܝܡܺܝܢ ܗ̱ܘܰܘ ܘܰܠܟܽܠܶܗ ܥܳܠܡܳܐ ܛܶܒܳܐ ܕܰܩܝܳܡܬܶܗ ܕܒܰܪ ܐܰܠܳܗܳܐ ܡܰܟܪܙܺܝܢ ܗ̱ܘܰܘ: ܘܡܶܛܽܠ ܗܳܕܶܐ ܡܶܬܟܰܫܦܺܝܢܰܢ ܠܳܟ ܡܳܪܝܳܐ ܪܳܚܶܡ ܐ̱ܢܳܫܳܐ: ܕܩܳܡܬ ܒܫܽܘܒܚܳܐ ܡܶܢ ܩܰܒܪܳܐ ܒܝܰܘܡܳܐ ܬܠܺܝܬܳܝܳܐ: ܘܰܐܩܺܝܡܬ ܠܰܟܝܳܢܰܢ ܪܰܦܝܳܐ ܕܢܰܦܺܝܠ ܗ̱ܘܳܐ ܒܰܥܒܳܪ ܦܽܘܩܕܳܢܳܐ ܐܰܝܟܰܢܳܐ ܕܫܰܕܰܪܬ ܥܠܰܝܗܽܘܢ ܥܰܠ ܫܠܺܝ̈ܚܶܐ ܪܽܘܚܳܐ ܩܰܕܺܝܫܳܐ: ܗܳܟܰܢܳܐ ܫܰܕܰܪ ܥܠܰܝܢ ܪܽܘܚܳܟ ܩܰܕܺܝܫܳܐ: ܘܢܶܫܬܘܶܐ ܕܢܶܫܬܰܪܰܪ ܒܰܩܝܳܡܬܳܟ ܡܫܰܒܰܚܬܳܐ ܟܰܕ ܥܳܩܰܪ ܐܰܢ̱ܬ ܡܶܢ ܠܶܒܰܢ ܠܝܰܥܪܳܐ ܟܽܘܒܳܢܳܝܳܐ: ܕܢܶܬܢܰܗܪ̈ܳܢ ܢܰܦ̈ܫܳܬܰܢ: ܘܢܶܬܡܰܪ̈ܩܳܢ ܬܺܐܪ̈ܳܬܰܢ: ܘܢܶܬܚܰܣ̈ܝܳܢ ܚܰܘ̈ܒܳܬܰܢ: ܘܢܶܬܥܰܛܝ̈ܳܢ ܣܰܟܠܘ̈ܳܬܰܢ: ܘܢܶܫܬܰܒ̈ܩܳܢ ܡܶܬܥܰܒܪ̈ܳܢܘܳܬܰܢ: ܘܢܶܬܠܰܚ̈ܝܳܢ ܠܐܴ ܢܳܡܽܘܣܳܝ̈ܘܳܬܰܢ: ܘܢܶܬܬܢܺܝܚܽܘܢ ܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ̱ ܥܰܠ ܣܰܒܪܳܟ: ܘܰܡܣܰܟܶܝܢ ܠܡܶܬܓܰܠܝܳܢܽܘܬܳܟ ܕܰܬܢܰܚܶܡ ܘܰܬܩܺܝܡ ܐܶܢܽܘܢ ܒܓܰܒܳܟ ܝܰܡܺܝܢܳܝܳܐ ܘܪܽܘܣ ܥܰܠ ܢܰܦܫ̈ܳܬܰܢ ܛܰܠܳܟ ܡܦܰܝܓܳܢܳܐ: ܐܰܝܟܰܢܳܐ ܕܡܶܢ ܦܽܘ̈ܡܶܐ ܕܟܽܠܰܢ ܫܰܘܝܳܐܝ̣ܬ ܬܶܣܰܩܝ̱ ܠܳܟ ܫܽܘܒܚܳܐ ܘܬܶܫܒܽܘܚܬܳܐ ܠܐܴ ܡܶܬܦܰܠܓܳܢܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀