ܨܠܽܘܬܳܐ ܕܫܽܘܪܳܝܳܐ

ܡܳܪܝܳܐ ܐܰܠܳܗܳܐ ܕܺܝܠܰܢ ܗܰܘ ܕܰܠܗܳܢܘܢ̇ ܕܰܒܝܰܕ ܦܽܘܠܚܳܢ ܫܺܐܕ̈ܶܐ ܠܰܦܬܰܟܪ̈ܶܐ ܣܳܓܽܘ̈ܕܶܐ ܗܘܰܝܢܰܢ: ܐܰܫܘܳܐ ܠܰܢ ܕܢܶܗܘܶܐ ܣܳܓܽܘ̈ܕܶܐ ܫܰܪܺܝܪ̈ܶܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܘܫܰܘܝܰܬ݀ ܒܽܐܘܣܺܝܰܐ: ܡܰܦܪܓܺܝܢܰܢ ܒܚܰܓܳܐ ܪܽܘܚܳܢܳܝܳܐ ܕܰܩܝܳܡܬܳܐ ܕܺܝܠܳܟ ܡܫܰܒܰܚܬܳܐ ܘܰܢܕܽܘܨ ܥܰܡ ܢܶܫ̈ܶܐ ܩܰܕܺܝ̈ܫܳܬܐ ܕܶܐܬܘܰܥܰܕ̈ܝ̱ ܠܩܰܒܪܳܟ ܡܰܥܒܶܕ ܚܰܝ̈ܶܐ: ܡܫܺܝܚܳܐ ܐܰܠܳܗܳܐ ܕܺܝܠܰܢ: ܗܳܫܳܐ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܘܽܐܘܣܺܝܰܐ ܡܥܰܠܰܝܬܳܐ ܘܠܐܴ ܡܶܬܕܰܪܟܳܢܺܝܬܳܐ ܕܚܰܕ ܟܝܳܢܳܐ ܐܝ̣ܬܝܗ̇: ܘܒܰܬܠܳܬܳܐ ܩܢܽܘ̈ܡܶܐ ܡܶܣܬܰܓܕܳܐ: ܐܰܒܳܐ ܕܟܰܕ ܠܐܴ ܝܺܠܺܝܕ ܐܰܘܠܶܕ: ܘܰܒܪܳܐ ܕܠܐܴ ܗ̱ܘܳܐ ܐܰܒܳܐ ܠܝܰܠܕܳܐ: ܐܳܦ ܪܽܘܚܳܐ ܩܰܕܺܝܫܳܐ ܕܢܳܦܶܩ ܡܶܢ ܐܰܒܳܐ ܘܢܳܣܶܒ ܡܶܢ ܒܪܳܐ ܘܠܐܴ ܡܶܬܥܰܩܰܒ ܡܶܢ ܚܽܘ̈ܫܳܒܶܐ ܕܰܡܠܺܝ̈ܠܐܷ: ܘܠܐܴ ܡܶܬܕܪܶܟ ܡܶܢ ܗܰܘ̈ܢܶܐ ܕܰܥܒܺܝ̈ܕܶܐ: ܘܚܰܕ ܐܰܠܳܗܳܐ ܡܶܬܬܰܘܕܶܐ ܒܰܬܠܳܬܳܐ ܩܢܽܘ̈ܡܶܐ: ܘܚܰܕ ܡܳܪܝܳܐ ܡܶܬܺܝܕܰܥ ܒܰܬܠܳܬܳܐ ܫܡܳܗ̈ܶܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܰܠܳܗܳܐ ܫܰܪܺܝܪܳܐ: ܕܠܶܗ ܝܳܐܶܐ ܫܽܘܒܚܳܐ܀

ܣܶܕܪܳܐ

ܟܰܕ ܠܥܺܐܕܳܐ ܚܰܕܬܳܐ ܘܰܫܒܺܝܚܳܐ ܘܰܕܢܺܝܚܳܐ ܗܰܘ ܕܡܶܬܬܰܨܡܚܳܢܽܘܬܳܐ ܕܡܶܢ ܩܰܒܪܳܐ ܒܫܽܘܒܚܳܐ ܪܰܒܳܐ ܙܰܡܢܰܬ݀ ܠܰܢ ܛܰܝܒܽܘܬܳܟ ܐܰܠܳܗܳܐ ܐܰܒܳܐ ܘܰܠܝܰܘܡܳܐ ܫܒܺܝܚܳܐ ܘܢܰܨܺܝܚܳܐ ܕܒܶܗ ܠܥܺܕܬܳܐ ܩܰܕܺܝܫܬܳܐ ܐܰܢܗܪܰܬ݀ ܒܫܽܘ̈ܟܳܢܶܐ ܡܥܰܠܰܝ̈ܳܐ ܕܰܡܕܰܒܪܳܢܽܘܬܳܟ ܟܰܕ ܡܰܢܰܥܬ ܠܰܢ ܒܰܚܢܳܢܳܟ ܠܗܳܢܳܐ ܝܰܘܡܳܐ ܡܠܐܷ ܛܽܘ̈ܒܶܐ ܥܺܐܕܳܐ ܡܠܐܷ ܚܰܕ̈ܘܳܬܳܐ ܚܰܓܳܐ ܕܰܦܨܺܝܚ̈ܘܳܬܳܐ: ܢܽܘܗܪܳܐ ܕܰܩܝܳܡܬܳܟ ܦܰܐܝܰܬ݀ ܠܐܱܠܳܗܳܐ ܫܰܟܶܢܬ ܠܰܢ ܒܪܶܚܡܰܬ݀ ܐ̱ܢܳܫܽܘܬܳܟ: ܗܳܝ ܕܒܳܗ̇ ܫܠܺܝ̈ܚܶܐ ܩܰܕܺܝ̈ܫܶܐ ܥܬܰܪܘ̱ ܒܡܰܘܗ̈ܒܳܬܳܐ ܐܰܠܳܗܳܝ̈ܳܬܳܐ ܘܒܰܣܒܰܪܬܳܐ ܕܝ̣ܠܳܟ ܥܰܡ̱̈ܡܶܐ ܘܐܰܬܪ̈ܰܘܳܬܳܐ ܘܐܶܡ̈ܘܳܬܳܐ ܐܶܬܦܢܺܝܘ ܡܶܢ ܬܰܘܫܳܐ ܕܰܚܛܺܝܬܳܐ: ܘܰܗܘܰܘ ܝܳܪ̈ܬܶܐ ܫܰܪܺܝܪ̈ܶܐ ܕܡܰܠܟܽܘܬܳܐ ܫܡܰܝܳܢܺܝܬܳܐ: ܘܒܳܗ̇ ܟܽܠ ܦܶܢ̈ܝܳܢ ܝܰܘܡܳܢܳܐ ܪ̈ܳܥܡܳܢ ܘܚܳܕ̈ܝܳܢ ܘܰܡܫܰܒ̈ܚܳܢ ܘܕܳܝ̈ܨܳܢ ܒܰܩܝܳܡܬܳܟ ܡܫܰܒܰܚܬܳܐ: ܬܶܫܒ̈ܚܳܬܳܐ ܘܗܽܘ̈ܠܳܠܐܷ ܘܙܽܘܡܳܪ̈ܶܐ ܚܠܰܝ̈ܳܐ ܡܩܰܪܒܺܝܢܰܢ ܠܳܟ: ܘܒܶܗ ܒܝܰܘܡܳܐ ܕܰܩܝܳܡܬܳܟ ܓܳܠܦܺܝܢܰܢ ܠܢܶܥ̈ܡܳܬܳܐ ܕܺܝܠܰܢ ܘܰܢܩܰܢܩܶܢ ܓܰܓܪ̈ܳܬܰܢ ܘܰܠܩܳܠܳܐ ܕܡܶܬܬܙܝ̣ܥ ܠܫܘ̣ܒܚܳܟ ܠܐܴ ܡܶܬܡܰܠܠܳـܢܳܐ ܐܰܠܳܗܳܐ ܪܳܚܶܡ ܒܢܰܝ̈ܢܳܫܳܐ ܢܨܰܝܶܒ ܟܰܕ ܚܳܝܪܺܝܢܰܢ: ܟܰܕ ܒܰܠܒܽܘ̈ܫܶܐ ܚܶܘܳܪ̈ܶܐ ܘܒܰܠܒܽܘ̈ܫܶܐ ܢܰܩ̈ܕܶܐ ܘܬܺܐܪ̈ܳܬܳܐ ܨܠܺܝ̈ܠܳܬܳܐ ܘܕܰܟܝ̈ܳܬܳܐ ܙܳܕܶܩ ܕܰܢܥܰܕܥܶܕ ܘܰܢܝܰܩܰܪ ܠܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ: ܗܳܢܳܐ ܕܒܶܗ ܕܰܘܺܝܕ ܢܒܺܝܳܐ ܐܰܠܳܗܳܝܳܐ ܡܣܰܓܶܐ ܗ̱ܘܳܐ ܘܳܐܡܰܪ: ܕܰܐܝܟ ܓܰܒܪܳܐ ܕܢܳܦܶܩ ܡܶܢ ܒܶܝܬ ܓܢܽܘܢܳܐ ܗܳܟܰܢܳܐ ܨܡܰܚܬ ܒܫܽܘܒܚܳܐ ܡܶܢ ܩܰܒܪܳܐ: ܘܗܳܝ ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ: ܘܰܡܚܳܐ ܘܒܰܕܰܪ ܠܟܽܠܗܽܘܢ ܒܥܶܠܕ̈ܒܳܒܰܘܗ̱ܝ ܘܒܶܗܬܬܳܐ ܘܰܩܠܳܠܐܴ ܥܒܰܕ ܐܶܢܽܘܢ ܒܰܩܝܳܡܬܶܗ: ܟܰܕ ܠܟܽܠ ܥܰܡ̱̈ܡܝ̣ܢ ܐܰܠܶܦ ܘܶܐܡܰܪ ܕܗܳܢܰܘ ܝܰܘܡܳܐ ܕܰܥܒܰܕ ܡܳܪܝܳܐ ܬܰܘ ܢܕܽܘܨ ܘܢܶܚܕܶܐ ܒܶܗ: ܗܳܢܰܘ ܝܰܘܡܳܐ ܕܠܐܴ ܗ̱ܘܳܐ ܩܕܳܡܰܘܗ̱ܝ ܐܰܟܘܳܬܶܗ: ܐܳܦܠܐܴ ܒܳܬܪܶܗ ܐ̱ܚܪܺܢܳܐ ܕܕܳܡܶܐ ܠܶܗ ܐܰܘ ܕܰܫܒܺܝܚ ܡܶܢܶܗ: ܗܳܢܰܘ ܥܰܕܥܺܐܕܶܗ ܕܰܐܠܳܗܰܢ ܕܒܶܗ ܪܽܘܚܳܐ ܩܰܕܺܝܫܳܐ ܙܳܐܰܚ ܘܢܳܚܶܬ ܡܶܢ ܪ̈ܰܘܡܶܐ ܥܶܠܳܝ̈ܶܐ: ܕܢܰܫܦܰܥ ܒܽܘܪ̈ܟܳܬܳܐ ܥܰܠ ܡܗܰܝ̈ܡܢܶܐ: ܗܳܢܰܘ ܝܰܘܡܳܐ ܩܰܕܺܝܫܳܐ ܕܒܶܗ ܡܶܫܬܰܕܪܺܝܢ ܪ̈ܰܚܡܶܐ ܥܰܠ ܟܶܢܫܳܐ ܙܰܗܝܳܐ ܕܰܠܗܽܘܢ ܫܳܘܶܐ ܘܡܶܬܩܰܕܰܫ ܒܶܗ ܦܰܓܪܳܐ ܩܰܕܺܝܫܳܐ ܘܰܕܡܳܐ ܡܚܰܣܝܳܢܳܐ ܕܐܰܠܳܗܳܐ ܕܺܝܠܰܢ: ܗܰܘ ܕܰܢܣܰܒ ܡܶܢ ܝܳܠܕܰܬ݀ ܐܰܠܳܗܳܐ ܡܰܪܝܰܡ ܫܰܪܺܝܪܳܐܝ̣ܬ: ܘܒܶܗ ܐܳܬܶܐ ܠܚܰܪܬܳܐ ܘܫܽܘܠܳܡܳܐ ܕܙܰܒ̈ܢܶܐ ܥܰܠ ܥܢܳܢ̈ܰܝ ܬܶܫܒܽܘܚܬܳܐ: ܘܒܶܗ ܥܳܒܰܪ ܥܳܠܡܳܐ ܗܳܢܳܐ: ܘܒܶܗ ܥܳܒܶܕ ܕܺܝܢܳܐ ܘܰܢܩܰܡܬܳܐ ܘܰܬܒܰܥܬܳܐ ܘܦܽܘܪܥܳܢܽܘܬܳܐ: ܘܒܶܗ ܦܳܪܶܫ ܠܛܳܒ̈ܶܐ ܡܶܢ ܒܺܝ̈ܫܶܐ: ܘܰܡܩܺܝܡ ܠܰܓܒܰܝ̈ܳܐ ܕܺܝܠܶܗ ܡܶܢ ܝܰܡܺܝܢܶܗ ܘܡܰܣܡܶܟ ܠܗܽܘܢ ܒܰܣܡܳܟܳܐ ܕܠܐܴ ܦܳܛܰܪ: ܘܒܶܗ ܡܶܬܥܰܙܰܙ ܘܡܶܬܩܰܫܶܐ ܥܰܠ ܟܳܦܪ̈ܰܝ ܒܰܐܠܳܗܽܘܬܶܗ ܘܰܒܐ̱ܢܳܫܽܘܬܶܗ ܠܐܴ ܗܰܝܡܶܢܘ̱ ܘܥܰܠ ܐܰܝܠܶܝܢ ܕܰܐܒܣܺܝܘ ܘܠܐܴ ܝܰܩܰܪܘ̱ ܗ̱ܘܰܘ ܠܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ: ܘܡܰܫܠܶܛ ܥܠܰܝܗܽܘܢ ܡܰܠܐܱܟ̈ܶܐ ܕܪܽܘܓܙܳܐ ܕܰܢܢܰܓܕܽܘܢ ܐܶܢܽܘܢ ܕܠܐܴ ܪ̈ܰܚܡܶܐ: ܘܰܠܓܺܗܰܢܳܐ ܕܢܽܘܪܳܐ ܫܳܕܶܐ ܠܗܽܘܢ ܘܠܐܴ ܡܶܬܪܰܚܰܡ ܥܠܰܝܗܽܘܢ: ܒܗܰܘ ܝܰܘܡܳܐ ܡܳܪܰܢ ܠܐܴ ܬܶܬܥܰܙܰܙ ܥܰܠ ܥܰܒܕܰܝ̈ܟ ܐܰܝܠܶܝܢ ܕܰܐܘܕܺܝܘ ܘܗܰܝܡܶܢܘ̱ ܒܳܟ ܘܰܒܡܶܬܒܰܪܢܫܳܢܽܘܬܳܟ: ܘܡܰܘܕܶܝܢ ܒܳܟ ܘܒܰܐܠܳܗܽܘܬܳܟ ܟܰܕ ܣܳܓܕܺܝܢ ܘܰܡܫܰܒܚܺܝܢ ܠܰܩܝܳܡܬܳܟ ܬܠܺܝܬܳܝܰܬ݀ ܝܰܘ̈ܡܶܐ ܕܡܶܢ ܒܶܝܬ ܡܺܝ̈ܬܶܐ: ܘܡܰܘܕܶܝܢ ܕܺܐܝܬܰܝܟ ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ: ܘܡܶܛܽܠ ܨܰܠܡܳܟ ܕܶܐܬܚܰܒܰܠ ܘܰܓܒܺܝܠܬܳܐ ܕܺܝܠܳܟ ܦܰܓܪܳܐ ܠܒܶܫܬ ܕܬܰܥܕܺܝܘܗ̱ܝ ܡܶܢ ܐܺܝ̈ܕܰܝ ܒܺܝܫܳܐ ܡܳܪܽܘܕܳܐ ܕܡܰܗܶܠ ܗ̱ܘܳܐ ܘܰܡܒܰܙܰܚ ܒܶܗ ܢܚܶܬܬ ܠܒܶܝܬ ܡܺܝ̈ܬܶܐ ܠܘܳܬܶܗ ܡܶܛܽܠ ܪܶܚܡܰܬ݀ ܐ̱ܢܳܫܽܘܬܳܟ ܕܨܶܝܕܰܘܗ̱ܝ: ܘܰܢܓܰܕܬ ܘܰܐܣܶܩܬ ܠܨܰܠܡܳܟ ܠܐܱܬܪܳܐ ܕܪ̈ܽܘܚܳܢܶܐ: ܐܰܘܬܶܒܬܳܝܗ̱ܝ ܒܫܽܘܒܚܳܐ ܪܰܒܳܐ ܕܠܐܴ ܡܶܬܡܰܠܠܳـܢܳܐ: ܘܗܳܐ ܝܰܘܡܳܢܳܐ ܟܽܠܗܶܝܢ ܒܶܪ̈ܝܳܬܳܐ ܚܳܕ̈ܝܳܢ ܘܕܳܝ̈ܨܳܢ ܘܰܡܫܰܒ̈ܚܳܢ ܘܡܰܘܕ̈ܝܳܢ ܠܳܟ ܥܰܠ ܦܽܘܪ̈ܢܳܣܰܝܟ ܠܐܴ ܡܶܬܕܰܪ̈ܟܳܢܶܐ ܕܰܠܘܳܬܰܢ: ܡܦܺܝܣܺܝܢܰܢ ܠܳܟ ܕܰܠܥܺܕܬܳܟ ܩܰܕܺܝܫܬܳܐ ܕܰܓܒܰܝܬ ܘܰܐܬܩܶܢܬ ܘܫܰܪܪܰܬ: ܕܬܰܫܰܪ ܫܽܘܘܕܳܝܰܝ̈ܟ ܠܘܳܬܳܗ̇ ܘܰܬܢܰܛܪܺܝܗ̇ ܡܶܢ ܟܽܠ ܐܶܪ̈ܶܣܺܝܣ ܡܙܰܝ̈ܦܳܬܳܐ ܘܰܡܚܰܒ̈ܠܳܬܳܐ ܘܰܬܪܺܝܡ ܩܰܪܢܳܗ̇ ܥܰܠ ܒܥܶܠܕ̈ܒܳܒܶܝܗ̇ ܐܰܝܠܶܝܢ ܕܡܶܫܬܰܩܠܺܝܢ ܒܥܽܘܫܢܳܐ ܥܰܠ ܥܰܡܳܟ ܡܗܰܝܡܢܳܐ: ܘܢܶܬܬܰܒܪ̈ܳܢ ܩܰܪ̈ܢܳܬܗܽܘܢ ܩܕܳܡܶܝܗ̇ ܘܨܰܘܪܳܐ ܕܺܝܠܗܽܘܢ ܢܶܬܡܰܟܰܟ: ܘܢܶܗܘܽܘܢ ܠܬܰܗܠܰܠܬܳܐ ܘܰܠܣܽܘܠܐܴܢܽܘܬܳܐ: ܘܰܐܢ̱ܬ ܡܳܪܝܳܐ ܡܶܢ ܟܽܠ ܥܰܡ̱̈ܡܝ̣ܢ ܬܶܣܬܓܶܕ ܘܬܶܫܬܰܒܰܚ: ܘܥܺܕܬܳܟ ܩܰܕܺܝܫܬܳܐ ܬܶܬܩܰܝܰܡ: ܘܰܐܢܺܝܚ ܠܥܰܢܺܝ̈ܕܳܐ ܡܗܰܝܡ̈ܢܶܐ ܐܰܝܠܶܝܢ ܕܰܥܢܰܕܘ̱ ܡܶܢܳܗ̇ ܒܰܬܪܺܝܨܽܘܬܳܐ ܕܫܽܘܒܚܳܐ: ܘܰܡܣܰܟܶܝܢ ܠܓܶܠܝܳܢܳܟ ܕܡܶܢ ܫܡܰܝܳܐ: ܕܒܶܗ ܪܰܒܽܘܬܳܟ ܡܰܒܪܩܳܐ ܘܓܰܐܝܽܘܬܳܟ ܡܶܙܕܰܝܚܳܐ: ܢܶܦܓܰܥ ܒܳܟ ܒܰܐܦ̈ܶܐ ܓܰܠܝ̈ܳܬܳܐ: ܗ̣ܶܢܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܥܰܡܗܽܘܢ ܚܢܰܢ ܟܰܕ ܡܰܣܩܺܝܢܰܢ ܠܳܟ ܫܽܘܒܚܳܐ ܘܬܰܘܕܺܝܬܳܐ: ܠܳܟ ܐܰܠܳܗܳܐ ܡܢܰܚܡܳܢܰܢ ܡܶܢ ܓܰܘ ܫܝܽܘܠ ܘܰܡܚܰܕܬܳܢܰܢ ܡܶܢ ܥܰܦܪܳܐ: ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܛܰܝܒܽܘܬܳܐ ܡܫܰܡܠܰܝܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ: ܡܠܰܝܬ ܠܠܶܒܰܘ̈ܳܬܳܐ ܕܺܝܠܰܢ ܡܳܪܝܳܐ ܒܝܰܕ ܙܰܠܓ̈ܶܐ ܢܰܨܺܝ̈ܚܶܐ ܕܰܩܝܳܡܬܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ: ܘܶܐܨܛܒܰܝ ܡܳܪܝܳܐ ܕܢܶܬܩܰܒܰܠ ܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܚܰܕ ܒܫܰܒܳܐ ܕܰܩܝܳܡܬܳܟ ܘܰܒܥܶܕܳܢܳܐ ܕܨܰܦܪܳܐ: ܐܰܝܟܰܢܳܐ ܕܒܶܗ ܢܶܬܚܰܠܰܠ ܘܢܶܬܡܪܶܩ ܡܶܢ ܟܽܠ ܒܺܝ̈ܫܳܬܳܐ ܘܰܚܛܺܝܬܳܐ: ܘܰܒܙܽܘܦܳܐ ܡܚܰܘܪܳܢܳܐ ܕܰܚܢܳܢܳܟ ܢܶܬܕܰܟܶܐ ܘܢܶܬܚܰܪܰܪ ܘܢܶܨܛܰܠܰܠ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

ܚܽܘܬܳܡܳܐ

ܩܰܒܶܠ ܠܰܢ ܡܳܪܝܳܐ ܐܰܠܳܗܳܐ ܕܺܝܠܰܢ ܕܡܶܬܩܰܪܒܺܝܢܰܢ ܠܰܩܕܳܡ ܟܽܘܪܣܝܳܐ ܕܺܐܝܩܳܪܳܟ: ܘܰܐܢܗܰܪ ܘܩܰܕܶܫ ܠܢܰܦ̈ܫܳܬܰܢ ܒܢܽܘܗܪܳܐ ܕܬܶܐܘܳܠܳܘܓܺܝܰܐ ܘܰܒܨܶܡ̈ܚܶܐ ܕܰܩܝܳܡܬܳܟ ܕܰܢܛܰܚܘ̱ ܥܠܰܝܢ: ܡܶܢ ܨܶܡܚ̈ܶܐ ܘܙܰܗܪܺܝܪ̈ܶܐ ܕܺܝܠܶܗ: ܘܰܐܒܪܶܩ ܠܡܰܕ̈ܥܰܝܢ ܕܰܒܢܽܘܗܪܳܐ ܕܦܽܘܩܕܳܢܰܝ̈ܟ ܢܶܪܕܶܐ: ܘܢܶܬܗܰܓܶܐ ܒܢܳܡܽܘ̈ܣܰܝܟ ܐܺܝܡܳܡܳܐ ܘܠܺܠܝܳܐ: ܘܛܽܘܒܬܳܢܳܐܝ̣ܬ ܢܫܰܒܚܳܟ ܡܳܪܰܢ ܘܰܐܠܳܗܰܢ܀