ܦܪܽܘܡܝܽܘܢ

ܬܶܫܒܽܘܚܬܳܐ: ܠܚܰܕ ܐܰܠܳܗܳܐ ܫܰܪܺܝܪܳܐ ܕܒܰܬܠܺܝܬܳܝܽܘܬ ܩܽܘ̈ܕܳܫܶܐ ܡܶܢ ܣܪ̈ܳܦܶܐ ܩܰܕܺܝ̈ܫܶܐ ܡܶܬܩܰܕܰܫ: ܘܗ̣ܽܘ ܟܰܕ ܗ̣ܽܘ ܒܰܚܕܳܐ ܠܚܽܘܕܳܝܽܘܬ ܡܳܪܽܘܬܳܐ ܡܶܢ ܟܪ̈ܽܘܒܶܐ ܡܶܬܒܰܪܰܟ: ܗܰܘ ܕܰܒܬܶܗܪܳܐ ܕܪܽܘܡܪ̈ܳܡܰܝܗܽܘܢ ܕܥܶܠܳܝ̈ܶܐ ܡܶܬܪܰܡܪܰܡ: ܘܰܒܩ̈ܳܠܐܷ ܕܟܰܝ̈ܳܐ ܕܦܽܘܡܰܝ̈ܗܽܘܢ ܕܬܰܚܬܳܝ̈ܶܐ ܡܶܬܩܰܠܰܣ: ܘܠܶܗ ܡܫܰܒ̈ܚܳܢ ܪ̈ܽܘܚܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ: ܘܰܐܒ̈ܳܗܳܬܳܐ: ܢܒܺܝ̈ܶܐ: ܘܰܫܠܺܝ̈ܚܶܐ: ܘܰܡܣܰܒܪ̈ܳܢܶܐ: ܘܡܰܘ̈ܕܝܳܢܶܐ: ܘܣܳܗ̈ܕܶܐ: ܘܡܰܠܦܳܢ̈ܶܐ: ܬܪ̈ܺܝܨܰܝ ܫܽܘܒܚܳܐ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܒܳܥܶܝܢܰܢ ܡܶܢܟܽܘܢ ܐܳܘ ܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ ܘܰܐܒܳܗ̈ܳܬܳܐ: ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ: ܡܰܚ̈ܒܳܢܰܘܗ̱ܝ ܕܡܳܪܰܢ: ܪ̈ܰܒܰܝ ܚܰܝܠܰܘ̈ܳܬܶܗ ܕܰܡܫܺܝܚܳܐ ܐܰܚܺܝܕ ܟܽܠ ܡܰܓܕ̈ܠܐܷ ܕܰܫܪܳܪܳܐ ܓܰܒܪ̈ܶܐ ܕܕܶܚܠܰܬ݀ ܐܰܠܳܗܳܐ ܢܳܨܽܘ̈ܒܶܐ ܕܗܰܝܡܳܢܽܘܬܳܐ ܫܰܪܺܝܪܬܳܐ: ܐܰܪ̈ܕܺܝܟܠܐܷ ܕܥܺܕܰܬ݀ ܩܽܘܕܫܳܐ: ܐܳܣܰܘ̈ܳܬܳܐ ܕܫܽܘܚ̈ܢܶܐ ܕܰܚܛܺܝܬܳܐ: ܣܳܦܪ̈ܶܐ ܕܙܰܕܺܝܩܽܘܬܳܐ ܡܰܠܦܳܢ̈ܶܐ ܕܢܰܟܦܽܘܬܳܐ ܥܳܩܽܘܪ̈ܶܐ ܕܛܳܥܝܽܘܬܳܐ: ܡܰܚܒܳܢܰܘ̈ܗ̱ܝ ܕܚܽܘܒܳܐ: ܟܰܘܟ̈ܒܶܐ ܨܰܦܪ̈ܳܝܶܐ ܕܬܳܪܨܺܝܢ ܩܕܳܡܰܝܢ ܒܥܳܠܡܳܐ ܗܳܢܳܐ ܡܰܪܕܺܝܬܳܐ ܕܚܰܝ̈ܶܐ ܠܐܴ ܡܳܝܽܘ̈ܬܷܐ: ܙܰܠܺܝ̈ܩܰܘܗ̱ܝ ܕܫܶܡܫܳܐ ܕܙܰܕܺܝܩܽܘܬܳܐ ܗܳܢܘܢ̇ ܕܡܰܢܗܪܺܝܢ ܥܰܝ̈ܢܶܐ ܕܰܒܢܰܝ̈ܢܳܫܳܐ: ܡܶܠܚܳܐ ܪܽܘܚܳܢܳܝܬܳܐ ܕܰܐܣܝܰܬ݀ ܬܰܡܣܽܘܬܳܗ̇ ܕܚܰܢܦܽܘܬܳܐ ܘܰܕܝܽܘܕܳܝܽܘܬܳܐ ܐܰܝܟ ܡܥܰܕܪ̈ܳܢܶܐ ܕܟܽܠܳܗ̇ ܬܺܐܒܶܝܠ ܕܰܫܩ̣ܰܠܘ̱ ܒܦܰܓܪ̈ܰܝܗܽܘܢ ܚܰܫ̈ܶܐ ܘܟܽܘܬܡ̈ܳܬܶܗ ܕܰܡܫܺܝܚܳܐ: ܗܘܰܘ ܗܳܟܺܝܠ ܒܰܥܳܝ̈ܶܐ ܘܺܐܝ̣ܙܓ̈ܰܕܶܐ ܚܠܳܦܰܝܢ ܐܰܝܟܰܢܳܐ ܕܚܰܘ̈ܒܰܝܢ ܢܶܬܥܛܽܘܢ ܘܰܚܛܳܗ̈ܶܐ ܕܺܝܠܰܢ ܢܶܬܚܰܣܽܘܢ: ܘܣܰܟܠܘ̈ܳܬܰܢ ܢܶܫܬܰܒܩܽܘܢ: ܘܰܒܝܰܕ ܬܰܟܫ̈ܦܳܬܟܽܘܢ ܩܰܕܺܝ̈ܫܳܬܳܐ ܫܒܰܝ̈ܳܐ ܢܶܬܦܰܪܩܽܘܢ: ܚܒܺܝ̈ܫܶܐ ܢܶܬܚܰܪܪܽܘܢ ܐܰܣܺܝܪ̈ܶܐ ܢܶܫܬܪܽܘܢ: ܐܰܒܺܝ̣̈ܠܐܷ ܢܶܬܒܰܝܽܐܘܢ: ܡܥ̈ܳܩܶܐ ܢܶܬܠܰܒܒܽܘܢ: ܪ̈ܰܚܺܝܩܶܐ ܢܶܨܛܰܝܒܽܘܢ: ܩܰܪ̈ܺܝܒܶܐ ܢܶܬܢܰܛܪܽܘܢ: ܐܰܒܺܝ̣̈ܕܶܐ ܢܶܫܬܰܟܚܽܘܢ: ܥܰܬܺܝܪ̈ܶܐ ܘܟܰܗܺܝܢܽܘܬܳܐ ܢܶܬܒܰܪܟܽܘܢ: ܡܶܣܟܺܢ̈ܶܐ ܘܰܣܢܺܝ̣̈ܩܶܐ ܢܶܬܦܰܪܢܣܽܘܢ: ܟܪ̈ܺܝܗܶܐ ܘܐܰܠܺܝ̣̈ܨܶܐ ܢܶܬܚܰܠܡܽܘܢ ܛܳܥܰܝ̈ܳܐ ܢܶܬܦܢܽܘܢ: ܢܶܣܝܽܘ̈ܢܶܐ ܢܶܥܒܪܽܘܢ: ܫܰܒ̈ܛܶܐ ܕܪܽܘܓܙܳܐ ܢܶܬܟܠܽܘܢ: ܘܫܰܝܢܳܐ ܘܰܫܠܳܡܳܐ ܢܰܡܠܟܽܘܢ: ܘܥܺܕܬܳܐ ܘܝܰܠܕ̈ܶܝܗ̇ ܢܶܚܕܽܘܢ: ܟܳܗ̈ܢܶܐ ܒܙܰܗܝܽܘܬܳܐ ܢܫܰܡܫܽܘܢ: ܡܫܰܡ̈ܫܳܢܶܐ ܒܕܰܟܝܽܘܬܳܐ ܢܗܰܠܠܽܘܢ: ܪ̈ܳܥܰܘܳܬܳܐ ܒܪ̈ܰܚܡܶܐ ܘܰܚܢܳܢܳܐ ܢܶܬܢܰܛܪܽܘܢ: ܘܥܰܠ ܟܽܠ ܬܶܓܡܺܝ̣̈ܢ ܕܒܳܗ̇ ܪ̈ܰܚܡܶܐ ܢܶܫܬܰܦܥܽܘܢ: ܘܥܰܢܺܝ̈ܕܶܐ ܡܗܰܝ̈ܡܢܶܐ ܥܰܠ ܡܰܕܒܚܳܐ ܫܡܰܝܳܢܳܐ ܢܶܬܕܰܟܪܽܘܢ: ܘܟܽܠܰܢ ܥܰܡ ܟܽܠܰܢ ܢܶܫܬܘܶܐ ܠܬܰܠܡܺܝܕܽܘܬܟܽܘܢ ܓܡܺܝܪܬܳܐ: ܘܰܠܡܰܠܦܳܢܽܘܬܟܽܘܢ ܕܪܽܘܚ: ܘܰܠܡܽܘܠܟܳܢܟܽܘܢ ܛܽܘܒܬܳܢܳܐ ܒܰܡܫܺܝܚܳܐ ܝܶܫܽܘܥ ܡܳܪܟܽܘܢ ܘܰܡܟܰܠܠܳܢܟܽܘܢ ܒܰܐܓܽܘ̈ܢܰܝܟܽܘܢ: ܗܰܘ ܕܒܺܐܝ̈ܕܰܘܗ̱ܝ ܘܥܰܡܶܗ ܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܗ̱ܝ ܘܰܠܪܽܘܚܶܗ ܩܰܕܺܝܫܳܐ ܗܳܫܳܐ܀