ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܪܰܒܳܐ ܕܩܽܘܫܬܳܐ ܘܕܰܫܪܳܪܳܐ ܕܐܰܠܶܦ ܠܗܶܕܝܽܘ̈ܛܶܐ ܚܶܟܡܬܳܐ: ܕܠܐܴ ܦܳܐܕܳܐ: ܘܰܐܩܢܺܝ ܠܰܦܫܺܝ̈ܛܶܐ ܝܺܕܰܥܬܳܐ ܕܠܐܴ ܥܳܒ̇ܪܳܐ ܘܰܐܥܬܰܪ ܠܡܶܣ̈ܟܺܢܶܐ ܒܥܽܘܬܪܳܐ ܕܠܐܴ ܡܰܘܦܶܐ: ܘܚܰܕܺܝ ܠܥܺܕܬܳܐ ܩܰܕܺܝܫܬܳܐ ܒܕܽܘܟܪ̈ܳܢܰܝܗܽܘܢ: ܘܰܐܦܨܰܚ ܠܰܫܡܰܝ̈ܳܢܶܐ ܘܠܐܱܪ̈ܥܳܢܳܝܶܐ ܒܝܰܘܡܳܐ ܕܥܰܕܥܺܐܕܰܝ̈ܗܽܘܢ: ܘܗܳܐ ܥܺܕܰܬ݀ ܩܽܘܕܫܳܐ ܡܗܰܝܡܰܢܬܳܐ ܛܳܦܣܳܐ ܒܓܰܪ̈ܡܰܝܗܽܘܢ ܘܫܳܐܠܐܴ ܪ̈ܰܚܡܶܐ ܘܰܚܢܳܢܳܐ ܘܫܽܘܒܩܳܢܳܐ ܕܢܶܗܘܶܐ ܠܝܰܠܕܶܝ̈ܗ̇ ܒܺܐܝܕܰܝ̈ܗܽܘܢ: ܕܠܶܗ ܠܡܳܪܝܳܐ ܕܰܓܒ̣ܳܐ ܐܶܢܽܘܢ ܫܽܘܒܚܳܐ ܡܰܣܩܺܝܢܰܢ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܗܰܘ ܡܝܰܬܰܪ ܒܟܽܠ: ܗܰܘ ܕܰܐܢ̱ܬ ܒܰܠܚܽܘܕܰܝܟ ܐܝ̣ܬܝܟ ܚܰܣܝܳܐ ܕܰܚܣܰܝ̈ܳܐ: ܠܗܳܢܘܢ̇ ܕܥܰܠ ܐܰܪܥܳܐ ܐܶܬܚܰܣܺܝܘ: ܒܰܐܪܥܳܐ ܘܒܰܫܡܰܝܳܐ ܚܰܣܝܳܐܝ̣ܬ ܡܚܰܣܶܐ ܐܰܢ̱ܬ ܘܰܡܩܰܕܶܫ ܐܰܢ̱ܬ: ܗܰܘ ܕܣܽܘܟܳܝܳܐ ܕܪ̈ܺܝܫܰܝ ܟܳܗ̈ܢܶܐ ܘܪܽܘܫܡܳܐ ܕܰܢܒܺܝ̈ܶܐ: ܫܪܳܪܳܐ ܕܰܫܠܺܝ̈ܚܶܐ ܟܳܪܽܘܙܽܘܬܳܐ ܦܐܝ̣ܬܐ ܕܰܡܣܰܒܪ̈ܳܢܶܐ ܡܚܰܡܣܢܳܢܽܘܬܳܐ ܕܥܳܢ̈ܘܳܝܶܐ ܟܺܐܢ̈ܶܐ: ܓܰܢ̱ܒܳܪܽܘܬܳܐ ܠܐܴ ܥܡܺܝܠܬܳܐ ܕܣܳܗ̈ܕܶܐ ܘܡܰܘ̈ܕܝܳܢܶܐ ܡܰܠܦܳܢܽܘܬܳܐ ܠܐܴ ܛܳܥܽܘܫܬܳܐ ܕܡܰܠܦܳܢ̈ܶܐ: ܫܰܟܶܢ ܠܰܢ ܠܥܰܒ̣ܕܰܝ̈ܟ ܕܰܒܟܽܠܙܒܰܢ ܢܫܰܡܠܐܷ ܕܽܘܟܪ̈ܳܢܰܝܗܽܘܢ ܠܐܴ ܣܰܒܥܳܐܝ̣ܬ: ܠܐܴ ܒܰܒ̈ܢܳܬ ܩ̈ܳܠܐܷ ܣܦܺܝ̣̈ܩܳܬܳܐ ܐܶܠܐܴ ܒܰܥܒܳܕ̈ܶܐ ܕܙܰܕܺܝܩܽܘܬܳܐ: ܠܐܴ ܪܶܚܡܰܬ݀ ܪܓܺܝܓܳܐܝ̣ܬ ܐܶܠܳܐ ܪܶܚܡܰܬ݀ ܐܰܠܳܗܳܐܝ̣ܬ: ܠܳܐ ܥܳܠܡܳܢܳܐܝ̣ܬ ܐܶܠܐܴ ܠܥܶܠ ܡܶܢ ܥܳܠܡܳܐ: ܠܐܴ ܒܟܽܘܠܳܠܐܴ ܕܰܩܕܳܡ ܬܰܪ̈ܥܶܐ: ܐܶܠܐܴ ܒܦܺܐܪ̈ܶܐ ܕܬܰܘܕܺܝܬܳܐ ܗܳܝ ܡܩܰܒܰܠܬܳܐ: ܠܐܴ ܒܰܪ̈ܦܳܣܶܐ ܙܰܠܺܝ̣̈ܠܐܷ ܘܰܙܢܰܝ̈ܳܐ ܠܐܴ ܡܛܰܟ̈ܣܶܐ ܐܶܠܐܴ ܒܙܰܘ̈ܥܶܐ ܟܢܺܝ̣̈ܟܶܐ ܘܩܽܘܝ̈ܳܙܶܐ ܡܶܬܝܰܕ̈ܥܳܢܶܐ ܘܗܽܘ̈ܠܳܠܐܷ ܗܳܢܘܢ̇ ܕܒܰܐܠܳܗܳܐ: ܠܐܴ ܒܰܡܦܰܬܟܽܘܬܳܐ ܕܰܠܒܽܘ̈ܫܶܐ ܪ̈ܰܟܺܝܟܶܐ ܐܶܠܐܴ ܒܣܳܥܽܘܪܽܘܬܳܐ ܕܰܥܒܳܕ̈ܶܐ ܛܳܒ̈ܶܐ: ܠܐܴ ܒܦܽܘ̈ܢܳܩܶܐ ܘܰܒܪܶܓܰܬ݀ ܟܰܪܣܳܐ ܐܶܠܐܴ ܝܰܬܺܝܪܳܐܝ̣ܬ ܒܚܽܘܕܳܬܳܐ ܕܢܰܦܫܳܐ ܕܰܒܗܳܠܶܝܢ ܕܒܰܐܠܳܗܳܐ ܡܶܬܦܰܛܡܳܐ: ܡܶܢ ܐܰܦܣܽܘ̈ܢܝܳܬܳܐ ܕܪܽܘܚܳܐ ܩܰܕܺܝܫܳܐ ܡܶܬܬܰܪܣܝܳܐ: ܐܺܝܢ ܐܰܠܳܗܳܐ ܕܺܝܠܰܢ ܗܰܘ ܕܰܡܫܰܟܶܢ ܐܰܢ̱ܬ ܠܩܰܕܺܝ̈ܫܰܝܟ ܡܚܰܡܣܢܳܢܽܘܬܳܐ ܠܐܴ ܡܶܙܕܰܥܙܥܳܢܺܝܬܳܐ ܐܳܦ ܦܰܪܶܗܣܺܝܳܝܬܳܐ ܘܢܳܡܽܘܣܳܝܬܳܐ ܘܰܡܥܰܙܝܳܢܽܘܬܳܐ ܕܰܠܘܳܬ ܩܰܘܡܳܐ ܕܫܺܐܕ̈ܶܐ ܘܫܽܘܢܳܩܳܐ ܕܕܰܝ̈ܘܶܐ ܚܰܝܠܬܳܢܳܐܝ̣ܬ ܘܠܐܴ ܡܶܬܢܰܦܠܳܢܳܐܝ̣ܬ ܢܰܥܕܽܘܢ ܟܠܺܝܠܐܴܝ̣ܬ: ܘܰܐܓܽܘܢܳܐ ܗܳܢܳܐ ܫܰܦܺܝܪܳܐ ܢܶܬܟܰܬܫܽܘܢ ܘܪܶܗܛܳܐ ܠܐܴ ܥܕܺܝܠܐܴ ܢܫܰܡܠܽܘܢ ܘܰܠܗܰܝܡܳܢܽܘܬܳܐ ܕܠܐܴ ܡܽܘܡܳܐ ܢܶܛܪܽܘܢ: ܘܰܐܫܘܳܐ ܠܰܢ ܠܡܶܣ̈ܟܺܢܶܐ ܥܰܒ̣ܕܰܝ̈ܟ ܒܟܽܠܙܒܰܢ ܕܰܒܚܺܐܪܽܘܬܳܐ ܕܬܺܐܪܬܳܐ ܢܰܨܺܝܚܬܳܐ ܒܚܺܝ̣ܪ̈ܶܐ ܢܶܗܘܶܐ: ܘܰܒܗܳܕܶܐ ܢܶܙܟܶܐ ܠܟܽܠ ܨܢܺܝܥܽܘܬܳܐ ܫܺܐܕܳܢܳܝܬܳܐ ܘܰܠܦܰܢܛܰܣܺܝܰܐ ܥܳܠܡܳܢܳܝܬܳܐ: ܘܠܰܫܟܺܝܪܽܘܬ ܕܶܚܠܬܳܐ ܚܰܢܦܳܝܬܳܐ ܠܰܙܥܽܘܪܽܘܬ ܡܶܠܬܳܐ ܝܽܘܕܳܝܬܳܐ: ܠܦܽܘܩܳܩܳܐ ܐܶܪܶܝܛܺܝܩܳܝܳܐ: ܠܚܶܡܬܳܐ ܒܰܥܪܺܝܪܳܝܬܳܐ: ܠܗܰܢܺܝܐܘܽܬܳܐ ܡܪܰܦܝܳܢܺܝܬܳܐ ܠܰܣܪܺܝܩܽܘܬ ܬܶܫܒܽܘܚܬܳܐ ܕܢܳܦܚܳܐ ܠܰܚܣܳܡܳܐ: ܠܥܽܘܠܐܴ ܕܰܡܕܰܝܰܒ ܠܟܰܪܣܳܐ ܐܳܣܽܘܛܬܳܐ ܘܰܕܠܐܴ ܣܳܒܥܳܐ: ܘܰܠܟܽܠܗܽܘܢ ܚܰܫ̈ܶܐ ܥܕܺܝ̣̈ܠܐܷ ܕܫܰܪܟܳܐ ܕܶܝܢ ܗܰܒ ܠܰܢ ܡܳܪܝܳܐ ܕܰܒܫܰܦܺܝܪܽܘܬ ܙܰܒܢܳܐ ܟܰܕ ܡܶܬܩܪܶܝܢܰܢ ܠܣܳܗܕܽܘܬܳܐ ܕܰܚܠܳܦ ܗܰܝܡܳܢܽܘܬܳܐ ܬܪܺܝܨܬܳܐ ܕܒܳܟ: ܕܫܰܦܺܝܪܽܘܬ ܠܒܺܝܒܽܘܬܳܐ ܬܪܺܝܨܬܳܐ ܕܰܢܚܰܘܶܐ ܩܕܳܡ ܥܰܡ̱̈ܡܶܐ ܘܡܰܠܟ̈ܶܐ ܘܰܒܢܰܝ̈ܳܐ ܕܺܐܝܣܪܳܐܶܝܠ: ܟܰܕ ܠܐܴ ܟܳܘܙܺܝܢܰܢ ܡܶܢ ܓܙܳܡ̈ܶܐ ܐ̱ܢܳܫܳܝ̈ܳܐ ܘܒܺܝ̈ܫܳܬܳܐ ܗܳܠܶܝܢ ܕܰܬܢܳܢ ܣܥ̣ܰܪܢܰܢ: ܡܶܫܬܰܕܠܺܝܢܰܢ ܕܶܝܢ ܒܰܪ̈ܓܺܝܓܳܬܳܐ ܕܰܡܠܐܷ ܙܰܒܢܳܐ ܘܥܳܒܽܘܪ̈ܝܳܬܳܐ: ܘܰܒܕܶܡ̈ܘܳܬܳܐ ܕܝܽܘܪܳܩܳܐ ܕܥܶܣܒܳܐ ܕܒܰܥܓܰܠ ܝܳܩܕܺܝܢ ܘܰܒܩܶܢܝ̈ܳܢܶܐ ܘܡܰܪ̈ܗܳܛܶܐ ܕܗܳܪܟܳܐ ܦܳܝܫܺܝܢ ܢܶܐܚܽܘܕ ܟܽܠܰܢ ܝܰܬܺܝܪܳܐܝ̣ܬ ܡܶܢ ܟܽܠܳܗ̇ ܢܰܦܫܰܢ: ܒܰܡܫܰܠܡܳܢܽܘܬܳܐ ܕܚܰܒܺܝ̈ܒܰܝܟ ܘܰܡܢܺܝ̣̈ܚܳܢܶܐ ܕܡܳܪܽܘܬܳܟ: ܗܳܢܘܢ̇ ܕܫܳܘ̈ܝܰܝ ܠܡܶܬܩܰܒܳܠܽܘ ܐܝ̣ܬܝܗܽܘܢ ܠܳܟ: ܐܺܝܙ̈ܓܰܕܶܐ ܡܦܺܝ̣̈ܣܳܢܶܐ ܠܳܟ ܡܩܰܪܒܺܝܢܰܢ ܚܠܳܦ ܟܽܠܗܶܝܢ ܐܰܝܠܶܝܢ ܕܰܥܠܰܝܡܳܐܝ̣ܬ ܚܛܰܝܢܰܢ ܠܳܟ: ܐܰܝܟܰܢܳܐ ܕܒܰܨܠܰܘ̈ܳܬܳܐ ܘܰܒܒܳܥ̈ܘܳܬܳܐ ܕܺܝܠܗܽܘܢ ܝܺܕܺܝܥܳܐܝ̣ܬ ܕܶܝܢ ܕܰܐܒܳܗ̈ܳܬܳܐ ܩܰܕܺܝ̈ܫܶܐ ܟܳܪ̈ܽܘܙܶܐ ܕܕܶܚܠܰܬ ܐܰܠܳܗܳܐ ܢܰܗܺܝܪ̈ܶܐ ܫܒܺܝ̈ܚܶܐ ܕܥܺܕܬܳܐ: ܗܳܢܘܢ̇ ܕܰܚܠܳܦܶܝܗ̇ ܐܰܓܽܘ̈ܢܶܐ ܪܰܘܪ̈ܒܶܐ ܣܒ̣ܰܠܘ̱ ܘܣܰܝܒ̣ܰܪܘ̱: ܩܝܳܡܬܳܐ ܕܰܡܝܰܬܪܽܘܬܳܐ ܗ̱ܘܰܘ ܘܰܕܫܰܦܺܝܪܽܘܬ ܚܰܫ̈ܶܐ ܗ̣ܶܢܽܘܢ ܠܗܽܘܢ ܫܒ̣ܰܩܘ̱: ܬܽܘܒ ܡܦܺܝܣܺܝܢܰܢ ܠܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ ܕܰܬܫܰܟܶܢ ܠܰܢ ܘܰܠܟܽܠܗܽܘܢ ܐܰܚܰܝ̈ܢ ܕܰܒܟܽܠ ܐܰܬܰܪ ܘܕܽܘܟ ܩܳܪܶܝܢ ܠܰܫܡܳܟ ܩܰܕܺܝܫܳܐ: ܝܺܕܺܝܥܳܐܝ̣ܬ ܠܗܳܢܘܢ̇ ܕܫܶܐܠܘ̱ ܨܠܰܘ̈ܳܬܳܐ ܕܰܒܨܺܝܪܽܘܬܰܢ ܘܶܐܫܬܰܘܬܰܦܘ̱ ܒܰܣܢܺܝܩܽܘܬܰܢ ܘܒܰܣܢܺܝܩܽܘܬܳܐ ܕܡܶܣ̈ܟܺܢܶܐ ܟܢܰܘ̈ܳܬܰܢ: ܓܗܳܝܬܳܐ ܕܡܶܢ ܟܽܠ ܒܺܝ̣̈ܫܳܢ ܘܒܽܘܣܳܡܳܐ ܕܰܒܟܽܠ ܛܳܒ̈ܳܢ: ܘܟܰܕ ܡܡܰܪ̈ܝܳܢܶܐ ܕܰܡܝܰܬܪܽܘܬܳܐ ܕܩܰܕܺܝ̈ܫܰܝܟ ܥܳܒܶܕ ܐܰܢ̱ܬ ܠܰܢ: ܘܒܰܟܠܺܝ̣̈ܠܰܝܗܽܘܢ ܫܰܘܬܶܦ ܠܰܢ: ܘܰܒܛܳܒ̈ܳܬܳܐ ܗܳܠܶܝܢ ܕܰܠܥܳܠܰܡ: ܘܰܒܡܰܠܟܽܘܬܳܐ ܕܰܫܡܰܝܳܐ: ܐܰܝܟܰܢܳܐ ܕܥܰܡܗܽܘܢ ܐܰܟܚܕܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܣܶܓܕܬܳܐ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀