ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܩܰܕܺܝܫ ܒܟܽܠ ܘܰܡܩܰܕܶܫ ܟܽܠ ܒܩܰܕܺܝܫܽܘܬܳܐ ܕܡܶܢܶܗ: ܠܗܰܘ ܕܡܶܬܩܰܕܰܫ ܒܩܽܘ̈ܕܳܫܶܐ ܬܠܺܝܬܳܝ̈ܶܐ ܡܶܢ ܚܰܝܠܰܘ̈ܳܬܳܐ ܩܰܕܺܝ̈ܫܶܐ: ܘܰܡܩܰܕܶܫ ܩܰܕܺܝܫܳܐܝ̣ܬ ܠܐܱܝܠܶܝܢ ܕܰܚ̣ܝܰܘ ܒܕܽܘܒܳܪ̈ܶܐ ܩܰܕܺܝ̈ܫܶܐ: ܘܰܒܩܰܕܺܝܫܽܘܬܳܐ ܓܳܡܰܪ ܠܐܱܝܠܶܝܢ ܕܰܠܕܽܘܟܪܳܢܳܐ ܕܩܰܕܺܝ̈ܫܰܘܗ̱ܝ ܩܰܕܺܝܫܳܐܝ̣ܬ ܡܫܰܡܠܺܝܢܰܢ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܳܐ ܕܺܝܠܰܢ: ܗܰܘ ܕܰܐܢ̱ܬ ܒܰܠܚܽܘܕܰܝܟ ܥܰܫܺܝܢܳܐ ܘܚܰܝܠܬܳܢܳܐ: ܗܰܘ ܕܒܰܩܪܳܝܬܳܐ ܩܰܕܺܝܫܬܳܐ ܩ̣ܪܰܝܬ ܠܟܽܠܗܽܘܢ ܩܰܕܺܝ̈ܫܰܝܟ ܘܡܶܨܥܳܝ̈ܶܐ ܘܺܐܝܙ̈ܓܰܕܶܐ ܠܰܢ ܫܰܟܶܢܬ ܐܶܢܽܘܢ: ܐܰܝܟܰܢܳܐ ܕܒܰܨܠܰܘ̈ܳܬܳܐ ܕܺܝܠܗܽܘܢ ܢܶܫܬܘܶܐ ܠܰܡܫܰܝܢܽܘܬܳܐ ܘܢܺܝܚܽܘܬܳܐ ܘܒܰܣܺܝܡܽܘܬܳܐ ܠܚܰܘܣܳܢܰܝ̈ܟ: ܗܰܘ ܕܰܒܙܰܝܢܳܐ ܠܐܴ ܡܶܙܕܰܟܝܳܢܳܐ ܕܪܽܘܚܳܐ ܩܰܕܺܝܫܳܐ ܙܰܝܶܢ̣ܬ ܐܶܢܽܘܢ ܠܥܰܒ̣ܕܰܝ̈ܟ ܕܰܢܕܽܘܫܽܘܢ ܥܰܠ ܫܶܢ̈ܕܶܐ ܘܰܢܒܰܣܪܽܘܢ ܥܰܠ ܟܽܠ ܐܽܘܠ̈ܨܳܢܝ̣ܢ: ܘܪܶܗܛܗܽܘܢ ܕܥܰܠ ܡܰܘܬܳܐ ܘܰܡܣܰܝܒܪܳܢܽܘܬܳܐ ܗܳܝ ܕܰܥܕܰܡܳܐ ܠܰܕܡܳܐ ܫܰܟܶܢ̣ܬ ܠܗܽܘܢ: ܐܶܬܕܰܟܪ ܐܳܦ ܠܰܢ ܡܳܪܝܳܐ ܡܪܰܚܡܳܢܳܐ ܒܡܶܨܛܰܒܝܳܢܽܘܬܳܐ ܕܥܰܡܳܟ: ܣܥܽܘܪ ܠܰܢ ܒܦܽܘܪܩܳܢܳܟ: ܘܫܰܟܶܢ ܠܰܢ ܕܢܶܬܥ̱ܰܗܰܕ ܠܩܰܕܺܝ̈ܫܰܝܟ ܘܰܕܢܶܫܬܰܘܬܰܦ ܠܚܰܫܰܝ̈ܟ: ܐܰܢ̱ܬ ܓܶܝܪ ܐܝ̣ܬܝܟ ܡܗܰܝܡܢܳܐ ܒܡܶܠܰܝ̈ܟ ܘܠܐܴ ܕܰܓܳܠܐܴ ܒܫܽܘ̣̈ܘܕܳܝܰܝܟ: ܗܰܘ ܕܫܰܟܶܢ̣ܬ ܠܰܡܢܺܝ̣̈ܚܳܢܰܝܟ ܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ ܘܟܽܠܗܽܘܢ ܡܪ̈ܰܥܝܳܢܰܝܟ: ܕܒܰܡܣܰܝܒܪܳܢܽܘܬܳܐ ܕܺܝܠܗܽܘܢ ܐܰܓܽܘܢܳܐ ܫܰܦܺܝܪܳܐ ܢܶܬܟܰܬܫܽܘܢ ܘܪܶܗܛܳܐ ܠܐܴ ܥܕܺܝܠܐܴ ܢܫܰܡܠܽܘܢ: ܘܗܰܝܡܳܢܽܘܬܳܐ ܕܠܐܴ ܡܽܘܡܳܐ ܢܶܛܪܽܘܢ: ܘܰܡܦܺܝܣܺܝܢܰܢ ܠܛܳܒܽܘܬܳܟ ܡܳܪܝܳܐ ܕܳܐܦ ܠܰܢ ܠܥܰܒ̣ܕܰܝ̈ܟ ܡܳܪܝܳܐ ܫܰܟܶܢ ܠܰܢ ܛܢܳܢܗܽܘܢ ܐܰܠܳܗܳܝܳܐ ܘܢܳܡܽܘܣܳܝܳܐ ܘܗܰܝܡܳܢܽܘܬܗܽܘܢ ܠܐܴ ܡܶܙܕܰܥܙܳܢܺܝܬܳܐ: ܘܰܚܘܺܝܚܽܘܬܗܽܘܢ ܡܫܰܪܰܪܬܳܐ: ܘܰܥܒܶܕ ܠܰܢ ܫܰܘ̈ܬܳܦܶܐ ܠܚܰܫܰܝ̈ܗܽܘܢ: ܘܰܠܘܳܬ ܣܰܒܪܳܟ ܒܝܰܕ ܡܶܨܥܳܝܽܘܬܗܽܘܢ ܪܳܗܛܺܝܢܳܢ: ܘܰܠܥܽܘܕܪ̈ܳܢܰܝܟ ܡܣܰܟܶܝܢܰܢ ܘܡܶܬܟܰܫܦܺܝܢܰܢ ܠܛܰܝܒܽܘܬܳܟ: ܕܠܐܴ ܬܚܽܘܪ ܒܣܰܢ̈ܝܳܬܰܢ: ܐܶܠܐܴ ܚܽܘܪ ܒܰܢ ܡܳܪܝܳܐ ܒܥܰܝܢܳܐ ܕܪ̈ܰܚܡܶܐ ܘܰܗܘܺܝ ܠܰܢ ܒܰܡܥܺܝ̣̈ܩܳܢܳܝܳܬܳܐ ܡܥܰܕܪܳܢܳܐ: ܘܒܽܐܘ̈ܠܨܳܢܶܐ ܡܰܪܘ̣ܚܳܢܳܐ: ܘܡܶܢ ܢܶܟܝ̈ܳܢܶܐ ܡܣܰܬܪܳܢܳܐ: ܘܡܶܢ ܪ̈ܕܽܘܦܝܶܐ ܒܶܝܬ ܓܰܘܣܳܐ: ܘܦܳܪܽܘܩܳܐ ܡܶܢ ܩܺܝܢܕܽܘ̈ܢܽܘܣ: ܘܰܗܘܺܝ ܠܰܢ ܡܳܪܝܳܐ ܐܳܣܝܳܐ ܕܚܰܫ̈ܶܐ: ܘܙܳܝܽܘܢܳܐ ܕܣܽܘ̈ܢܩܳܢܶܐ: ܘܦܰܨܳܐ ܠܰܢ ܡܶܢ ܟܽܠ ܢܶܣܝܽܘ̈ܢܶܐ ܘܬܰܟܬܽܘ̈ܫܶܐ: ܘܗܰܒ ܠܰܢ ܕܰܒܟܽܠ ܫܳܥ ܩܕܳܡܰܝܟ ܢܶܬܬܰܪܣܶܐ ܡܶܢ ܡܶܠܰܝ̈ ܟܬܳܒ̈ܶܐ ܩܰܕܺܝ̈ܫܶܐ: ܘܟܰܕ ܒܦܽܘܩ̈ܕܳܢܰܝܟ ܢܗܰܠܶܟ ܘܰܒܣܳܗ̈ܕܘܳܬܳܐ ܕܺܝܠܳܟ ܢܶܬܕܰܪܰܫ: ܘܰܒܥܶܩ̈ܒܳܬܳܐ ܕܺܝܠܗܽܘܢ ܕܩܰܕܺܝ̈ܫܰܝܟ ܢܶܪܕܶܐ: ܘܢܶܬܦܰܨܶܐ ܒܣܶܬܳܪܗܽܘܢ ܡܶܢ ܟܽܠ ܒܺܝ̈ܫܳܬܳܐ: ܘܢܶܫܬܘܶܐ ܠܰܟܠܺܝܠܐܴ ܕܰܩܪܳܝܬܗܽܘܢ: ܡܶܛܽܠ ܕܰܐܢ̱ܬ ܗ̣ܽܘ ܒܶܝܬ ܓܰܘܣܳܐ ܕܰܐܝܠܶܝܢ ܕܩܳܪܶܝܢ ܠܳܟ: ܘܠܳܟ ܫܽܘܒܚܳܐ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀