ܨܠܽܘܬܳܐ ܕܫܽܘܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܒܛܰܝܒܽܘܬܳܟ: ܘܒܰܫܦܺܝܥܽܘܬ ܪ̈ܰܚܡܶܐ ܕܺܐܝܬܽܘܬܳܟ: ܕܰܒܫܰܝܢܳܐ ܢܰܓܺܝܪܳܐ ܕܥܺܕܬܳܐ ܕܺܝܠܳܟ: ܘܒܰܫܠܳܡܳܐ ܢܰܓܺܝܪܳܐ ܕܥܺܕܬܳܐ ܕܺܝܠܳܟ: ܘܒܰܫܠܳܡܳܐ ܐܰܡܺܝܢܳܐ ܕܡܰܪܥܺܝܬܳܟ: ܢܫܰܡܠܐܷ ܕܽܘܟܪܳܢܳܐ ܕܝܳܠܶܕܬܳܟ ܘܰܕܟܽܠܗܽܘܢ ܩܰܕܺܝ̈ܫܰܝܟ: ܘܗܰܒܠܰܢ ܕܰܒܫܰܗܪ̈ܶܐ ܥܺܝܪ̈ܶܐ ܘܢܰܨܺܝ̈ܚܶܐ: ܘܰܒܕܽܘܒܳܪ̈ܶܐ ܕܟܰܝ̈ܳܐ ܘܩܰܕܺܝ̈ܫܶܐ ܢܥܰܕܥܶܕ ܐܰܡܺܝܢܳܐܝ̣ܬ ܠܥ̱ܽܘܗܕܳܢܳܐ ܕܶܐܡܳܟ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ ܘܢܶܫܬܘܶܐ ܠܰܨܠܰܘ̈ܳܬܳܐ ܡܩܰܒ̈ܠܳܬܳܐ ܕܩܰܕܺܝ̈ܫܰܝܟ: ܘܰܢܝܰܒܶܒ ܠܳܟ ܫܽܘܒܚܳܐ ܘܬܰܘܕܺܝܬܳܐ ܗܳܫܳܐ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܰܢܝܳܚܳܐ ܕܰܐܠܳܗܽܘܬܳܟ ܘܰܠܨܶܒܝܳܢܳܐ ܒܪܺܝܟܳܐ ܕܡܳܪܽܘܬܳܟ ܘܰܠܬܰܪܥܽܘܬܳܐ ܕܰܡܪܰܚܡܳܢܽܘܬܳܟ: ܘܰܠܡܰܦܰܩ ܒܪܽܘܚܳܐ ܕܰܩܕܳܡ ܕܚܺܝܠܽܘܬܳܟ: ܘܰܠܡܶܓܠܐܴ ܐܰܦ̈ܶܐ ܕܰܩܕܳܡ ܟܺܐܢܽܘܬܳܟ: ܠܚܽܘܣܳܝܳܐ ܕܚܰܘ̈ܒܰܝܢ ܘܰܠܫܽܘܒܩܳܢܳܐ ܕܰܚܛܳܗܰܝ̈ܢ ܥܰܡ ܕܽܘܟܪܳܢܳܐ ܕܺܝܠܳܗ̇ ܕܗܳܝ ܕܫܳܘܝܰܬ݀ ܠܛܽܘ̈ܒܶܐ ܘܰܫܒܺܝܚܰܬ݀ ܡܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܘܥܰܡܳܗ̇ ܕܰܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ ܘܡܰܘ̈ܕܝܳܢܶܐ ܘܟܺܐܢ̈ܶܐ ܘܟܳܗ̈ܢܶܐ ܘܰܐܒܳܗ̈ܳܬܳܐ ܩܰܕܺܝ̈ܫܶܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ: ܥܰܡ ܕܰܐܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܟܽܠܗܽܘܢ ܥܰܢܺܝ̈ܕܶܐ: ܬܽܘܒ ܕܶܝܢ ܘܰܠܚܽܘܠܡܳܢܳܐ ܕܰܟܪ̈ܺܝܗܶܐ ܘܰܠܢܽܘܛܳܪܳܐ ܕܟܽܠܗܽܘܢ ܥܽܘܡܪ̈ܶܐ ܕܳܐܪ̈ܬܳܘܕܽܘܟܣܽܘ: ܘܠܐܱܝܠܶܝܢ ܕܪܰܚܺܝܩܺܝܢ ܘܩܰܪܺܝܒܺܝܢ ܢܶܗܘܶܐ ܦܺܝܪܡܳܐ ܕܰܡܩܰܪܒܳܐ ܒܨܺܝܪܽܘܬܰܢ ܩܕܳܡܰܝܟ ܡܳܪܝܳܐ: ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܒܟܽܘܢ ܛܳܦܣܺܝܢܰܢ ܘܡܶܬܓܰܘܣܺܝܢܰܢ ܐܳܘ ܪ̈ܰܒܰܝ ܒ̈ܳܬܶܐ: ܛܽܘ̈ܒܬܳܢܶܐ ܘܓܺܝܙܰܒܪ̈ܶܐ (ܣܢܺܐܓܪ̈ܶܐ) ܡܗܺܝܪ̈ܶܐ ܘܫܽܘܪ̈ܶܐ ܠܐܴ ܡܶܙܕܰܥܙ̈ܥܳܢܶܐ: ܐܳܘ ܡܕܰܒܪ̈ܳܢܶܐ ܘܝܳܨܽܘ̈ܦܶܐ ܘܰܐܒܳܗ̈ܳܬܳܐ ܬܪ̈ܺܝܨܶܐ ܐܳܘ ܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠܦܳܢ̈ܶܐ ܒܚܺܝܪ̈ܶܐ: ܐܳܘ ܡܰܐܪ̈ܙܳܢܶܐ ܣܦܺܝܪ̈ܶܐ ܕܰܐܘܨܪ̈ܶܐ ܕܥܽܘܕܪ̈ܳܢܶܐ ܐܳܘ ܐܳܣܰܘ̈ܳܬܳܐ ܡܗܺܝܪ̈ܶܐ ܘܡܰܚܠܡܳܢ̈ܶܐ ܕܢܰܦ̈ܫܳܬܳܐ ܟܪ̈ܺܝܗܳܬܳܐ: ܐܳܘ ܡܰܠܝ̈ܰܝ ܝܰܕ̈ܥܳܬܳܐ ܠܐܴ ܚܶܫܽܘ̈ܟܳܬܳܐ ܘܟܰܡܗ̈ܳܬܳܐ ܕܒܰܩܠܶܦܣܺܝܣ (ܚܶܫܟܳܐ ܕܥܶܕܳܢܳܐ) ܕܫܶܡܫܳܐ ܘܣܰܗܪܳܐ ܐܰܘܟܺܝܬ ܥܰܡܠܐܴ ܕܡܰܐܪ̈ܙܳܢܘܳܬܳܐ ܓܢܺܝ̣̈ܙܳܬܳܐ ܩܰܐܛܶܣܛܰܣܺܝܣ (ܝܰܡ̈ܡܶܐ) ܕܚܶܟ̈ܡܳܬܳܐ: ܦܽܘܪ̈ܩܳܣܶܐ (ܡܰܓܕ̈ܠܶܐ،ܒܘ̣ܪ̈ܓܶܐ) ܠܐܴ ܡܶܬܚܰܠܨ̈ܳܢܶܐ ܕܕܰܟܝܽܘܬܳܐ: ܘܡܰܓܕ̈ܠܐܷ ܠܐܴ ܡܶܬܚܰܣ̈ܢܳܢܶܐ ܕܩܰܕܺܝܫܽܘܬܳܐ: ܐܳܘ ܡܶܬܟܰܬܫ̈ܳܢܶܐ ܒܚܺܝܪ̈ܶܐ ܘܰܩܪ̈ܰܒܬܳܢܶܐ ܣܒܺܝ̣̈ܣܰܝ ܙܳܟܘ̈ܳܬܳܐ: ܘܰܐܬܠܺܝ̈ܛܶܐ ܙܪ̈ܺܝܙܰܝ ܢܰܨܺܝ̣̈ܚܘܳܬܳܐ: ܐܳܘ ܚܠܺܝ̣̈ܨܶܐ ܒܰܐܠܽܘܡܦ݂ܰܐ ܘܢܰܚܫܺܝܪ̈ܬܳܢܶܐ ܒܰܐܣܛܪܰܐܛܰܣܺܝܣ (ܒܦܳܠܚܘ̣ܬܳܐ،ܒܰܩܪܳܒܳܐ) ܐܳܘ ܐܰܓܽܘ̈ܢܺܝܣܛܶܐ ܚܰܝܠܬܳܢ̈ܶܐ ܘܓܰܢ̱ܒܳܪ̈ܶܐ ܕܰܐܩܪܝܒܘܢ ܘܢܶܣܠܳܝ ܡܶܢ ܙܺܝܡܝܰܐܐ (ܕܰܦܪܝ̣ܫܝ̣ܢ ܡܶܢ ܢܶܟܝܳܢܳܐ) : ܐܳܘ ܕܰܘܩܰܘ̈ܗ̱ܝ ܕܺܐܝܣܪܳܐܝܶܠ ܡܶܬܝܰܕܥܳܢܳܐ: ܘܢܳܛܽܘܪ̈ܶܐ ܕܟܰܪܡܳܐ ܪܽܘܚܳܢܳܐ ܘܰܡܠܺܝܠܐܴ: ܐܳܘ ܟܳܪ̈ܽܘܙܶܐ ܕܫܰܝܢܳܐ ܘܰܡܣܰܒܪ̈ܳܢܶܐ ܕܰܫܠܳܡܳܐ: ܐܳܘ ܢܰܗܺܝܪ̈ܶܐ ܘܡܰܢܗܪ̈ܳܢܶܐ ܕܥܰܝ̈ܢܶܐ ܕܬܰܪ̈ܥܝܳܬܳܐ ܚܶܫܽܘ̈ܟܳܬܳܐ: ܘܡܰܨܡܚ̈ܳܢܶܐ ܕܫܰܪܺܝܪܽܘܬ ܡܰܠܦܳܢܽܘܬܳܐ: ܐܳܘ ܙܰܠܺܝ̈ܩܶܐ ܬܗܺܝܪ̈ܶܐ ܕܢܽܘܗܪܳܐ ܕܠܐܴ ܕܳܥܶܟ: ܘܨܶܡܚ̈ܶܐ ܫܒܺܝ̈ܚܶܐ ܕܫܶܡܫܳܐ ܕܠܐܴ ܥܳܪܶܒ: ܐܳܘ ܢܽܘܗܪ̈ܶܐ ܕܡܺܝܪ̈ܶܐ ܕܥܳܠܡܳܐ ܕܠܐܴ ܦܳܛܰܪ ܘܰܡܩܰܕ̈ܫܳܢܶܐ ܘܡܰܘܕ̈ܝܳܢܶܐ ܒܥܳܠܡܳܐ ܚܰܕܬܳܐ ܕܠܐܴ ܥܳܒܰܪ: ܐܳܘ ܡܰܠܟ̈ܶܐ ܘܽܐܘܛܽܘܩܪܰܛܺܝܣ (ܘܫܰܠܝ̣̈ܛܳܢܶܐ) ܕܚܰܝܠܰܘ̈ܳܬܳܐ ܕܶܐܬܟܰܢܰܫܘ̱: ܘܫܽܘܦܪܶܗ ܕܒܶܝܬ ܪܽܘܚܳܢܳܐ ܡܦܰܠܓܺܝܢ ܒܶܙܬܳܐ ܒܡܰܘ̈ܗܒܳܬܳܐ ܕܟܺܐܢܽܘܬܳܐ ܘܰܕܙܰܕܺܝܩܽܘܬܳܐ: ܐܳܘ ܪ̈ܚܽܘܡܰܘܗ̱ܝ ܕܡܳܪܗܽܘܢ ܘܚܰܒܺܝ̣̈ܒܰܝ ܒܳܪܽܘܝܗܽܘܢ: ܐܳܘ ܚܕܽܘ̈ܓܰܝ ܥܳܒܽܘܕܗܽܘܢ: ܘܒܰܝ̈ܬܳܝܶܐ ܕܦܳܪܽܘܩܗܽܘܢ ܗܘܰܘ ܗܳܟܺܝܠ ܡܦܺܝ̣̈ܣܳܢܶܐ ܚܠܳܦܰܝܢ ܘܡܶܬܟܰܫ̈ܦܳܢܶܐ ܥܰܠ ܐܰܦܰܝ̈ܢ: ܠܗܰܘ ܕܙܰܕܺܝܩܽܘܬܳܐ ܪܳܚܶܡ ܡܶܛܽܠ ܕܙܰܕܺܝܩܰܐ ܗ̱ܘ ܘܰܬܪܺܝܨܽܘܬܳܐ ܚܳܙ̈ܝܳܢ ܐܰܦܰܘ̈ܗ̱ܝ ܕܰܢܫܰܟܶܢ ܠܰܢ ܒܺܐܝܕܰܝ̈ܟܽܘܢ ܚܰܣ̈ܝܳܬܳܐ ܚܽܘܠܳܠܐܴ ܕܡܶܢܟܽܠ ܨܳܐܘ̈ܳܬܳܐ: ܘܚܽܘܣܳܝܳܐ ܓܡܺܝܪܳܐ ܕܟܽܠܗܶܝܢ ܚܰܘ̈ܒܳܬܰܢ ܘܫܽܘܒܩܳܢܳܐ ܕܟܽܠܗܶܝܢ ܣܰܟܠܘ̈ܳܬܰܢ ܘܕܽܘܠܳܝܳܐ ܕܡܶܢ ܟܽܠ ܫܥܺܝ̣̈ܢܶܐ ܐܰܢܛܺܝܽܘ̈ܦܳܝܶܐ (ܣܝ̈ܳܢܶܐ ܕܰܠܩܘ̈ܒܠܳܝܶܐ): ܘܥܽܘܠܳܝܳܐ ܕܡܶܢ ܦܶܚ̈ܬܶܐ (ܓܘ̣̈ܒܶܐ،ܓܘ̣̈ܡܳܨܶܐ) ܢܕܺܝ̣̈ܕܶܐ ܘܰܫܟܺܝܪ̈ܶܐ: ܚܽܘܡ̈ܣܳܢܶܐ ܕܨܶܒܝܳܢܳܐ: ܟܽܘܒܳܫܳܐ ܕܝܰܨܪܳܐ ܒܺܝܫܳܐ: ܚܽܘܒܳܐ ܠܐܴ ܢܟܺܝܠܐܴ: ܘܪܶܚܡܬܳܐ ܠܐܴ ܐܰܫܺܝܕܬܳܐ: ܚܽܘܝܳܠܐܴ ܕܰܡܚܺܝ̣̈ܠܐܷ: ܥܽܘܕܪܳܢܳܐ ܕܰܣܢܺܝ̣̈ܩܶܐ ܚܽܘܒܳܒܳܐ ܕܝܰܬܡ̈ܶܐ ܝܰܨܺܝܦܽܘܬܳܐ ܕܰܐܪ̈ܡܠܳܬܳܐ: ܪܘܳܚܬܳܐ ܕܰܐܠܺܝ̣̈ܨܶܐ ܢܝܳܚܬܳܐ ܕܰܡܛܰܪ̈ܦܶܐ ܣܳܥܽܘܪܽܘܬܳܐ ܕܡܰܪ̈ܥܶܐ ܬܶܫܡܶܫܬܳܐ ܕܰܟܪ̈ܺܝܗܶܐ ܥ̱ܽܘܗܕܳܢܳܐ ܛܳܒܳܐ ܕܚܰܣܝܽܘܬܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܒܩܽܘܪ̈ܒܳܢܶܐ ܘܰܨܠܰܘ̈ܳܬܳܐ ܘܫܰܗܪ̈ܶܐ ܡܬܺܝ̣̈ܚܶܐ ܘܫܽܘܠܳܡܳܐ ܦܰܪܶܗܣܺܝܳܝܳܐ: ܘܡܰܦܩܳܢܳܐ ܠܐܴ ܡܰܒܗܬܳܢܳܐ ܘܦܺܝܠܽܘܪܽܘܦܽܘܪܺܝܰܐ (ܓܰܠܝܘ̣ܬ ܐܰܦ̈ܶܐ) ܕܰܩܕܳܡܰܘܗ̱ܝ ܕܠܐܴ ܬܰܚܡܶܨܬܳܐ ܘܟܽܘܐܳܪܳܐ ܘܰܥܢܶܝܢܳܣܳܝ̈ܶܐ (ܘܰܙܡܝ̣̈ܢܶܐ) ܦܨܺܝ̈ܚܶܐ ܕܥܰܡܶܗ: ܘܒܽܘܣܳܡܳܐ ܘܰܒܡܰܠܟܽܘܬܶܗ ܘܟܽܠܰܢ ܐܰܟܚܕܳܐ ܢܰܣܶܩ ܠܶܗ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܗܝ ܘܰܠܪܽܘܚܶܗ ܩܰܕܺܝܫܳܐ܀

ܥܶܛܪܳܐ

ܪܺܝܚܳܐ ܚܰܠܝܳܐ ܘܥܶܛܪܳܐ ܓܰܒܝܳܐ ܕܰܩܕܳܡܰܝܟ ܐܰܡܺܝܢܳܐܝ̣ܬ ܦܳܐܰܚ ܡܶܢ ܓܰܪ̈ܡܰܝܗܽܘܢ ܕܰܡܢܺܝ̣̈ܚܳܢܰܝܟ ܡܳܪܝܳܐ: ܢܶܗܘܶܐ ܡܦܺܝܣܳܢܳܐ ܠܐܱܠܳܗܽܘܬܳܟ: ܚܠܳܦ ܚܰܛܳܝ̈ܶܐ ܘܡܰܣܟܠܳܢ̈ܶܐ ܚܠܳܦ ܛܳܥܰܝ̈ܳܐ ܘܰܐܒܺܝ̈ܕܶܐ: ܚܠܳܦ ܟܠܺܝܠܐܴ ܕܫܰܢ̱ܬܳܐ ܕܢܶܬܒܰܪܰܟ ܒܛܰܝܒܽܘܬܳܟ: ܘܰܚܠܳܦ ܕܽܘܟܪܳܢܳܐ ܛܳܒܳܐ ܕܝ̇ܳܠܶܕܬܳܟ ܘܰܕܩܰܕܺܝ̈ܫܰܝܟ: ܘܰܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ̱ ܥܰܠ ܣܰܒܪܳܟ ܡܳܪܰܢ ܘܰܐܠܳܗܰܢ܀