ܨܠܽܘܬܳܐ ܕܫܽܘܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܥܰܠ ܟܽܠ: ܕܰܒܚܰܕܽܘܬܳܐ ܕܠܶܒܳܐ ܘܰܒܕܰܟܝܽܘܬܳܐ ܕܢܰܦܫܳܐ: ܘܰܒܩܰܕܺܝܫܽܘܬܳܐ ܕܦܰܓܪܳܐ: ܢܚܰܓܶܐ ܘܰܢܥܰܕܥܶܕ ܠܝܰܘܡܳܐ ܗܳܢܳܐ ܩܰܕܺܝܫܳܐ: ܐܰܘܟܺܝܬ ܥ̱ܽܘܗܕܳܢܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܕܡ̣ܶܢ ܥܳܠܰܡ: ܗܳܢܽܘܢ̇ ܕܣܰܟܺܝܘ ܠܡܶܐܬܺܝܬܳܟ ܘܰܕܚܰܙܳܝ̈ܶܐ ܕܒܰܕܶܩܘ̱ ܥܰܠ ܓܶܠܝܳܢܳܟ: ܘܕܰܫܠܺܝ̈ܚܶܐ ܕܰܚܙܰܐܘܽܘܟ ܘܰܐܟܪܶܙܘ̱ ܟܽܠܳܗ̇ ܡܕܰܒܪܳܢܽܘܬܳܟ: ܘܰܕܣܳܗ̈ܕܶܐ ܘܡܰܘܕܝ̈ܳܢܶܐ ܕܶܐܬܩܛܶܠܘ̱ ܡܶܛܽܠ ܚܽܘܒܳܟ: ܘܰܐܘܕܺܝܘ ܒܰܙܩܺܝܦܽܘܬܳܟ: ܘܰܕܩܰܕܺܝ̈ܫܶܐ ܕܩܳܡܘ ܡ̣ܶܢ ܩܰܒܪ̈ܰܝܗܽܘܢ ܒܥܶܕܳܢ ܚܰܫܳܟ: ܥܰܠܘ ܥܰܡܳܟ ܠܐܘ̣ܪܫܠܶܡ ܒܰܩܝܳܡܬܳܟ: ܘܰܠܣܰܓܺܝ̈ܶܐܐ ܐܰܟܪܶܙܘ̱ ܢܽܘܚܳܡܳܟ ܘܓܰܢ̱ܒܳܪܽܘܬܳܟ: ܐܰܝܟܰܢܳܐ ܕܢܶܬܥܰܕܰܪ ܒܰܨܠܰܘ̈ܳܬܗܽܘܢ: ܘܥܰܡܗܽܘܢ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܡܳܪܳܐ ܕܥܳܠܡ̈ܶܐ: ܕܶܐܬܳܐ ܠܘܳܬܰܢ ܒܚܽܘܒܶܗ: ܘܰܠܒܶܫ ܦܰܓܪܳܐ ܕܐ̱ܢܳܫܽܘܬܰܢ ܒܛܰܝܒܽܘܬܶܗ: ܘܰܗ̣ܘܳܐ ܒܰܪܢܳܫܳܐ ܐܰܟܘܳܬܰܢ: ܟܰܕ ܐܝ̣ܬܘܗ̱ܝ ܐܰܠܳܗܳܐ ܒܰܟܝܳܢܶܗ: ܘܣܰܝܒܰܪ ܚܰܫ̈ܶܐ ܘܰܙܩܺܝܦܳܐ ܡܶܛܽܠܳܬܰܢ ܒܨܶܒܝܳܢܶܗ: ܟܰܕ ܗ̣ܽܘ ܪܳܡ ܘܰܡܥܰܠܰܝ ܒܰܚܢܳܢܶܗ: ܘܣܰܒܰܪ ܚܰܝ̈ܶܐ ܘܰܩܝܳܡܬܳܐ ܠܐܴܕܳܡ ܘܰܠܝܰܠܕ̈ܰܘܗ̱ܝ ܒܪܶܚܡܰܬ݀ ܐ̱ܢܳܫܽܘܬܶܗ: ܘܩܳܡ ܒܫܽܘܒܚܳܐ ܘܰܐܩܺܝܡ ܠܟܽܠܶܗ ܓܶܢܣܰܢ ܕܢܰܦܺܝܠ ܗ̱ܘܳܐ ܒܗܰܘܬܳܐ ܕܰܫܝܽܘܠ ܘܰܚܛܺܝܬܳܐ ܒܬܽܘܩܦܳܐ ܕܰܕܪܳܥܶܗ: ܘܰܡܠܰܟ ܛܽܘ̈ܒܶܐ ܘܡܰܠܟܽܘܬܳܐ ܠܟܽܠܗܽܘܢ ܥܰܡ̱̈ܡܶܐ ܕܗܰܝܡܶܢܘ̱ ܒܶܗ: ܘܰܚܠܳܦ ܚܽܘܒܶܗ ܟܽܠ ܡܰܘ̈ܬܺܝܢ ܣܳܒܠܺܝܢ ܡ̣ܶܢ ܥܰܘ̈ܳܠܐܷ ܒܰܫܪܳܪܶܗ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܪܰܒܳܐ ܘܦܳܪܽܘܩܳܐ: ܗܰܘ ܕܶܐܬܢܰܚܰܬ݀ ܒܨܶܒܝܳܢܶܗ ܠܘܳܬ ܡܶܣܟܺܢܽܘܬܰܢ ܟܰܕ ܥܰܬܺܝܪܰܐ ܗ̱ܘ ܒܰܟܝܳܢܶܗ ܕܠܰܢ ܨܒܳܐ ܕܢܰܥܬܰܪ: ܘܛܽܘ̈ܒܶܐ ܘܒܽܘ̈ܣܳܡܶܐ ܕܡܰܠܟܽܘܬܶܗ ܠܰܢ ܢܫܰܟܶܢ ܒܪ̈ܰܚܡܰܘܗ̱ܝ: ܗܰܘ ܕܟܰܕ ܗܘܰܝܬ ܒܰܪܢܳܫܳܐ ܡ̣ܶܢ ܐܶܡܳܐ ܠܐܴ ܡܛܰܘܫܰܬ݀ ܒܙܘ̣ܘܳܓܳܐ ܩܢܘ̣ܡܳܐܝ̣ܬ ܘܰܟܝܳܢܳܐܝ̣ܬ ܕܠܳܐ ܒܘ̣ܠܒܳܠܳܐ ܘܫܽܘܓܢܳܝܳܐ: ܘܰܡܕܰܒܪܳܢܳܐܝ̣ܬ ܗܰܠܶܟܬ ܒܥܳܠܡܳܐ: ܐܰܟܘܳܬܰܢ ܕܠܐܴ ܥܶܕܠܳܝ: ܘܟܽܠܗܶܝܢ ܡܳܟ̈ܳܬܳܐ ܕܺܝܠܰܢ ܫܩܰܠܬ ܒܰܩܢܽܘܡܳܟ ܣܛܰܪ ܡܶܢ ܚܛܝ̣ܬܳܐ: ܘܗܳܠܶܝܢ ܪ̈ܳܡܳܬܳܐ ܕܺܝܠܳܟ ܝܰܗܒܬ ܠܦܰܓܪܳܐ ܕܺܝܠܳܟ ܗܰܘ ܕܡܶܢܰܢ ܢܣܰܒܬ: ܘܒܶܗ ܟܰܕ ܒܶܗ ܒܦܰܓܪܳܐ ܒܰܪ ܟܝܳܢܰܢ ܐܰܥܒܰܪܬ ܐܰܠܳܗܳܝ̈ܳܬܳܐ ܟܺܝܬ ܘܐ̱ܢܳܫܳܝ̈ܳܬܳܐ: ܒܰܚܕܳܝܽܘܬܳܐ ܠܐܴ ܡܶܬܦܰܫܩܳܢܺܝܬܳܐ ܘܠܐܴ ܡܶܬܦܰܠܓܳܢܺܝܬܳܐ: ܘܟܰܕ ܠܗܳܠܶܝܢ ܕܗܰܝܡܶܢܘ̱ ܒܳܟ ܡܰܠܟܘ̣ܬܳܐ ܕܰܫܡܰܝܳܐ ܡܠܰܟܬ ܠܗܘܢ̇ ܘܚܰܝ̈ܶܐ ܚܰܕ̈ܬܶܐ: ܘܠܰܟܝܳܢܰܢ ܕܚܰܝܳܒ ܗ̱ܘܳܐ ܩܰܒܶܠܬ ܥܠܰܝܟ: ܨܰܥܪܳܐ ܘܒܶܙܚܳܐ ܘܫܺܝܛܽܘܬܳܐ: ܘܚܰܫܳܐ ܘܰܙܩܺܝܦܳܐ ܘܡܰܘܬܳܐ: ܘܰܩܒܽܘܪܬܳܐ ܘܰܩܝܳܡܬܳܐ ܬܠܺܝܬܳܝܰܬ݀ ܝܰܘ̈ܡܶܐ: ܘܰܒܝܰܕ ܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ ܠܰܙܒܰܢ̱ܬܳܐ ܕܥܳܩܬܳܐ ܘܰܕܟܰܪܝܽܘܬܳܐ: ܒܗܳܝ ܥܪܽܘܒܬܳܐ ܕܥܶܒܪܰܬ: ܠܚܰܕܽܘܬܳܐ ܘܠܰܪܘܳܙܳܐ ܕܠܐܴ ܡܶܬܡܰܠܰܠ ܫܰܚܠܶܦܬ: ܕܒܰܥܪܽܘܒܬܳܐ ܡܰܢ ܕܥܶܒܪܰܬ݀ ܐܰܝܟ ܐܶܡܪܳܐ ܠܢܶܟܣܬܳܐ ܐܶܬܕܒܰܪܬ: ܪܳܥܝܳܐ ܛܳܒܳܐ ܘܫܰܪܺܝܪܳܐ ܕܶܐܬܰܝܬ ܕܬܶܒܥܶܐ ܐܰܒܺܝܕܽܘܬܰܢ: ܘܒܰܥܪܽܘܒܬܳܐ ܕܶܝܢ ܕܝܰܘܡܳܢ: ܩܳܡܬ ܐܰܝܟ ܓܰܢ̱ܒܳܪܳܐ ܘܰܐܝܟ ܐܰܪܝܳܐ ܕܢܳܗܶܡ ܘܟܰܢܶܫܬ ܠܥܳܢ̈ܳܟ ܕܰܡܒܰܕܪܳܐ ܠܰܚܕܳܐ ܐܰܘܝܽܘܬܳܐ: ܒܰܥܪܽܘܒܬܳܐ ܕܥܶܒܪܰܬ݀ ܩܳܡܬ ܒܶܝܬ ܕܺܝܢܳܐ ܐܰܝܟ ܚܰܝܳܒܳܐ ܥܰܡ ܥܰܘ̈ܳܠܶܐ ܘܠܳܐ ܢܡܘ̣̈ܣܳܝܶܐ ܐܶܬܚܫܶܒܬ: ܘܰܒܠܰܥܬ ܦܰܟܳܐ ܐܰܝܟ ܥܰܒܕܳܐ: ܘܒܰܥܪܽܘܒܬܳܐ ܕܝܰܘܡܳܢ ܩܳܡܬ ܡ̣ܶܢ ܩܰܒܪܳܐ ܒܟܶܢ̈ܫܶܐ ܕܡܰܠܐܱܟ̈ܶܐ ܐܰܝܟ ܕܰܝܳܢܳܐ: ܘܠܐܱܝܠܶܝܢ ܕܕܳܢܽܘܟ ܘܚܰܝܒܽܘܟ ܠܡܰܘܬܳܐ: ܒܕܺܝܢܳܐ ܕܟܺܐܢܽܘܬܳܐ ܒܟܽܠ ܥܰܡ̱̈ܡܺܝܢ ܒܰܕܰܪܬ: ܒܰܥܪܽܘܒܬܳܐ ܕܥܶܒܪܰܬ݀ ܐܶܫܬܠܰܚܬ ܡ̣ܶܢ ܢܰܚ̈ܬܰܝܟ ܘܶܐܬܥܰܠܺܝܬ ܠܰܨܠܺܝܒܳܐ ܥܰܡ ܥܰܘ̈ܳܠܐܷ: ܘܒܰܥܪܽܘܒܬܳܐ ܕܝܰܘܡܳܢ ܠܟܶܬܳܢ̈ܶܐ ܕܰܒܗܽܘܢ ܡܰܟܪܰܟ ܗ̱ܘܰܝܬ ܒܩܰܒܪܳܐ ܫܒܰܩܬ: ܘܙܺܝܘܳܐ ܘܫܽܘܒܚܳܐ ܕܠܐܴ ܡܶܬܡܰܠܰܠ ܐܶܬܥܰܛܰܦܬ: ܒܰܥܪܽܘܒܬܳܐ ܕܥܶܒܪܰܬ݀ ܨܳܠܽܘ̈ܒܶܐ ܚܰܠܐܴ ܘܰܡܪ̈ܳܪܶܐ ܐܰܘܫܶܛܘ̱ ܠܳܟ: ܘܒܰܥܪܽܘܒܬܳܐ ܕܝܰܘܡܳܢ ܟܰܟܳܪܺܝܬܳܐ ܕܕܶܒܫܳܐ ܐܰܘܫܶܛܘ̱ ܠܳܟ ܬܰܠܡܺܝ̈ܕܰܝܟ ܘܐܶܟܰܠܬ ܒܚܰܕܽܘܬܳܐ: ܒܰܥܪܽܘܒܬܳܐ ܕܥܶܒܪܰܬ݀ ܓܽܘܫܡܳܟ ܠܡܰܚ̈ܘܳܬܳܐ ܘܢܶܓ̈ܕܶܐ ܒܺܐܝܕܳܐ ܕܡܰܪ̈ܳܚܶܐ ܐܰܫܠܶܡܬ: ܘܒܰܥܪܽܘܒܬܳܐ ܕܝܰܘܡܳܢ ܐܺܝܕܰܝ̈ܟ ܘܪ̈ܶܓܠܰܝܟ ܕܶܐܣܬܰܟܰܟ̈ܝ̱ ܒܨ̈ܶܨܶܐ ܒܺܐܝ̈ܕܰܝ ܪ̈ܳܚܡܰܝܟ ܣܳܡܬ ܠܡܶܒܨܳܐ ܒܰܪܘܳܙܳܐ: ܒܰܥܪܽܘܒܬܳܐ ܕܥܶܒܪܰܬ݀ ܕܰܦܢܳܟ ܒܠܽܘܟܳܝܬܳܐ ܐܶܬܬܰܪܥܰܬ݀ ܘܡܶܢܳܗ̇ ܕܡܳܐ ܘܡܰܝ̈ܳܐ ܪܕܰܘ ܒܬܶܕܡܽܘܪܬܳܐ: ܘܒܰܥܪܽܘܒܬܳܐ ܕܝܰܘܡܳܢ ܣܶܛܪܳܟ ܗܰܘ ܕܶܐܬܬܪܰܥ ܒܠܽܘܟܳܝܬܳܐ: ܐܰܫܶܐܠܬ ܠܬܳܐܘܡܰܐ ܬܰܠܡܺܝܕܳܟ: ܕܰܒܨܶܒܥܶܗ ܢܓܽܘܫܺܝܘܗ̱ܝ: ܘܰܢܗܰܝܡܶܢ ܕܰܐܢ̱ܬ ܐܝ̣ܬܝܟ ܗܰܘ ܕܚܰܫܬ ܘܶܐܬܩܒܰܪܬ ܘܩܳܡܬ ܫܰܪܺܝܪܳܐܝ̣ܬ ܐܰܝܟ ܐܰܠܳܗܳܐ: ܒܰܥܪܽܘܒܬܳܐ ܗܳܝ ܕܥܶܒܪܰܬ݀ ܚܶܫܽܘܟܳܐ ܐܰܡܠܶܟ ܥܰܠ ܬܺܒܶܝܠ ܬܠܳܬ ܫܳܥܺܝ̈ܢ: ܒܰܥܪܽܘܒܬܳܐ ܕܶܝܢ ܕܝܰܘܡܳܢ ܢܽܘܗܪܳܐ ܫܰܪܺܝܪܳܐ ܐܰܡܠܶܟ ܥܰܠ ܬܺܒܶܝܠ ܕܠܐܴ ܥܳܪܶܒ: ܒܰܥܪܽܘܒܬܳܐ ܗܳܝ ܕܥܶܒܪܰܬ݀ ܟܰܪܝܽܘܬܳܐ ܘܥܳܩܬܳܐ ܨܶܦܚܰܬ݀ ܠܬܰܠܡܺܝ̈ܕܶܐ ܒܡܰܘܬܳܟ ܘܰܠܨܳܠܽܘ̈ܒܶܐ ܚܰܕܽܘܬܳܐ: ܒܰܥܪܽܘܒܬܳܐ ܕܶܝܢ ܕܝܰܘܡܳܢ ܐܶܬܟܰܪܟܰܬ݀ ܓܺܝܓܠܐܴ ܕܚܰܫ̈ܶܐ ܒܰܩܝܳܡܬܳܟ ܘܰܠܬܰܠܡܺܝ̈ܕܶܐ ܡܠܳܬ݀ ܚܰܕܽܘܬܳܐ ܘܒܽܘܝܳܐܳܐ: ܠܨܳܠܽܘ̈ܒܶܐ ܒܶܗܬܬܳܐ ܘܰܟܡܺܝܪܽܘܬܳܐ: ܒܰܥܪܽܘܒܬܳܐ ܗܳܝ ܕܥܶܒܪܰܬ݀ ܡ̣ܶܢ ܩܳܠܐܴ ܕܰܩܥܰܝܬ ܥܰܠ ܩܰܝܣܳܐ ܫܽܘ̈ܥܶܐ ܐܶܨܛܰܪܺܝܘ: ܘܩܰܒܪ̈ܶܐ ܐܶܬܦܰܬܰܚܘ̱: ܘܦܰܓܪ̈ܶܐ ܣܰܓܺܝ̈ܶܐܐ ܕܩܰܕܺܝ̈ܫܶܐ ܐܶܬܢܰܚܰܡܘ̱ ܘܩܳܡܘ̱: ܒܰܥܪܽܘܒܬܳܐ ܕܶܝܢ ܕܝܰܘܡܳܢ: ܠܐܱܝܠܶܝܢ ܕܰܐܩܺܝܡܬ ܒܚܰܫܳܟ ܘܰܠܗܳܠܶܝܢ ܕܰܐܦܶܩܬ ܡ̣ܶܢ ܫܝܽܘܠ ܥܰܡܳܟ ܠܰܡܕܺܝܢܰܬ݀ ܩܽܘ̈ܕܳܫܶܐ ܐܰܥܶܠܬ ܘܰܣܒܰܪܬܳܟ ܐܰܟܪܶܙܘ̱ ܐܰܘܟܺܝܬ ܩܝܳܡܬܳܟ ܘܬܽܘܒ ܠܦܰܪܕܰܝܣܳܐ ܐܰܦܢܺܝܬ: ܒܰܥܪܽܘܒܬܳܐ ܗܳܝ ܕܥܶܒܪܰܬ݀ ܣܳܗ̈ܕܶܐ ܘܡܰܘ̈ܕܝܳܢܶܐ ܥܰܠ ܓܳܓܽܘܠܬܳܐ ܚܙܰܐܘܽܘܟ ܒܰܝܢܳܬ ܓܰܝ̈ܳܣܶܐ ܟܰܕ ܬܠܶܝܬ ܥܰܪܛܶܠܐܝ̣ܬ: ܘܗܶܢܽܘܢ̇ ܒܚܽܘܒܳܟ ܐܶܬܓܰܘܙܰܠܘ̱ ܘܰܒܪܶܚܡܬܳܟ ܒܠܰܥܘ̱: ܘܰܚܠܳܦܰܝܟ ܣܰܝܒܰܪܘ̱ ܟܽܠ ܐܽܘ̣ܠܨܳܢܺܝ̈ܢ ܘܫܶܢ̈ܕܺܝܢ ܚܘܺܝܚܳܐܝ̣ܬ: ܟܰܕ ܐܰܣܠܺܝܘ ܘܫܳܛܘ̱ ܠܥܳܠܡܳܐ ܘܰܠܟܽܠ ܡܳܐ ܕܺܐܝ̣ܬ ܒܶܗ: ܘܰܟܦܰܪܘ̱ ܒܚܰܝ̈ܶܐ ܙܰܒܢܳܝ̈ܶܐ: ܘܰܒܓܶܢܣܳܐ ܘܛܽܘܗܡܳܐ ܘܠܳܟ ܢܩܶܦܘ̱ ܒܡܰܘܬܳܐ: ܒܰܥܪܽܘܒܬܳܐ ܕܶܝܢ ܗܳܕܶܐ: ܚܢܰܢ ܡܗܰܝ̈ܡܢܶܐ ܡܰܘܕ̈ܝܰܝ ܒܰܫܡܳܟ ܘܰܦܪ̈ܺܝܩܰܝ ܒܰܕܡܳܟ: ܘܰܪ̈ܫܺܝܡܰܝ ܒܰܨܠܺܝܒܳܟ ܝܰܩܺܝܪܳܐ: ܥ̱ܽܘܗܕܳܢܳܐ ܕܗܳܠܶܝܢ ܥܰܡ ܟܽܠܗܽܘܢ ܩܰܕܺܝ̈ܫܶܐ: ܕܡ̣ܶܢ ܥܳܠܰܡ ܫܦܰܪܘ̱ ܠܳܟ ܥܳܒܕܺܝܢܰܢ: ܘܰܠܚܰܫܰܝ̈ܗܽܘܢ ܥܰܡ ܥ̱ܽܘܗܕܳܢܳܐ ܕܚܰܫܰܝ̈ܟ ܣܓܺܝ̈ܕܶܐ ܡܫܰܡܠܶܝܢܰܢ ܘܰܠܥܺܐܕܗܘܢ̇ ܥܰܡ ܕܽܘܟܪܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܡܙܰܝܚܺܝܢܰܢ: ܐܰܝܟܰܢܳܐ ܕܢܶܫܬܘܶܐ ܥܰܡܗܽܘܢ ܠܰܟܠܺܝ̈ܠܐܷ ܡܰܠܝ̈ܰܝ ܙܳܟܽܘܬܳܐ ܕܰܢܛܺܝܪܺܝܢ ܠܗܽܘܢ: ܟܰܕ ܠܽܘܩܒܰܠ ܟܽܠ ܚܰܫܳܐ ܩܳܛܽܘܠܐܴ ܐܰܓܽܘܢܳܐ ܥܳܒܕܺܝܢܰܢ: ܘܙܳܟܽܘܬܳܐ ܥܠܰܝܗܽܘܢ ܡܶܢܳܟ ܘܒܳܟ ܢܳܣܒܺܝܢܰܢ: ܡܰܘܕܝ̈ܳܢܶܐ ܢܶܬܚܙܶܐ ܕܶܝܢ ܩܕܳܡܰܝܟ: ܘܰܐܬܠܺܝ̈ܛܶܐ ܦܰܐܝ̈ܰܝ ܢܶܨܚ̈ܳܢܶܐ: ܘܰܕܫܳܘܶܝܢ ܠܡܰܠܟܽܘܬܳܐ ܕܰܫܡܰܝܳܐ: ܘܥܰܡܗܽܘܢ ܕܡܰܘܕ̈ܝܳܢܶܐ ܢܶܫܡܰܥ ܡܶܢܳܟ ܒܰܪ̱ܬ ܩܳܠܐܴ ܗܳܝ ܕܰܩܕܳܡ ܐܰܒܽܘܟ ܘܡܰܠܐܱܟܰܝ̈ܟ ܩܰܕܺܝ̈ܫܶܐ ܡܰܘܕܶܐ ܐܰܢ̱ܬ ܒܰܢ: ܘܰܠܡܰܥܠܬܳܐ ܕܠܰܓܢܽܘܢܳܟ ܐܰܫܘܳܐ ܠܰܢ: ܘܬܰܡܳܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀

ܥܶܛܪܳܐ

ܟܽܠ ܬܰܘܕܺܝܬܳܐ ܘܫܽܘܒܚܳܐ ܠܐܴ ܡܶܬܦܰܣܩܳܢܳܐ ܢܶܣܰܩ ܠܳܟ ܡܳܪܝ̱ ܒܝܰܘܡܳܐ ܗܳܢܳܐ ܕܰܥܪܽܘܒܬܳܐ: ܕܒܶܗ ܥܶܪܒܰܬ݀ ܫܶܡܫܶܗ ܕܥܰܡܳܐ ܛܳܠܽܘܡܳܐ: ܕܰܚܠܳܦ ܛܳܒ̈ܳܬܳܐ ܦܰܪܥܳܟ ܒܺܝ̈ܫܳܬܳܐ: ܘܒܶܗ ܥܒܰܕܬ ܦܽܘܪܩܳܢܳܐ ܠܥܺܕܬܳܟ ܥܶܛܪܳܐ ܗܰܢܺܝܳܐܐ ܢܶܬܩܰܪܰܒ ܠܡܳܪܽܘܬܳܟ ܒܥܶܕܳܢܳܐ ܗܳܢܳܐ ܕܥ̱ܽܘܗܕܳܢܳܐ ܕܝܳܠܶܕܬܳܟ ܡܒܰܪܰܟܬܳܐ ܘܛܽܘܒܳܢܺܝܬܳܐ ܡܰܪܝܰܡ: ܘܕܰܢܒܺܝ̈ܶܐ ܘܕܰܫܠܺܝ̈ܚܶܐ ܘܰܕܣܳܗ̈ܕܶܐ ܘܰܕܡܰܘܕܝ̈ܳܢܶܐ ܘܰܕܟܳܗ̈ܢܶܐ ܘܰܕܙܰܕܺܝ̈ܩܶܐ ܡܶܫܬܰܡܰܫ: ܩܰܒܶܠ ܐܶܢܽܘܢ ܡܶܢܰܢ ܚܰܛܳܝ̈ܶܐ ܥܰܒܕܰܝ̈ܟ: ܘܢܶܗܘܽܘܢ ܠܰܢܝܳܚܳܐ ܕܪ̈ܰܚܡܰܝܟ: ܘܰܠܚܽܘܣܳܝܳܐ ܕܚܰܘ̈ܒܰܝܢ ܘܰܠܬܰܪܥܽܘܬܳܐ ܕܡܳܪܽܘܬܳܟ: ܘܰܠܫܽܘܒܩܳܢܳܐ ܕܰܚܛܳܗܰܝ̈ܢ: ܘܰܠܕܽܘܟܪܳܢܳܐ ܕܟܽܠܗܽܘܢ ܗܳܢܽܘܢ̇ ܕܒܳܟ ܫܟܶܒܘ̱: ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܘܰܐܫܘܳܐ ܠܰܢ ܘܰܠܗܽܘܢ ܠܰܐܘ̈ܘܳܢܶܐ ܒܪ̈ܺܝܟܶܐ ܕܕܳܚܠܰܝ̈ܟ ܘܰܡܪ̈ܰܥܝܳܢܰܝܟ: ܕܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܚܽܘܬܳܡܳܐ

ܝܰܡܝ̣ܢܳܟ ܚܰܝܠܬܳܢܝ̣ܬܳܐ ܡܳܪܝܳܐ: ܗܳܝ ܕܚܰܝܠܰܬ݀ ܠܣܳܗ̈ܕܶܐ ܩܰܕܝ̣̈ܫܶܐ ܘܰܠܡܰܘ̈ܕܝܳܢܶܐ ܒܰܐܓܘ̈ܢܰܝܗܘܢ̇: ܘܓܰܢ̱ܒܳܪܳܐܝ̣ܬ ܐܶܬܟܰܬܰܫܘ̱ ܠܘ̣ܩܒܰܠ ܒܝ̣ܫܳܐ ܘܰܫܩܰܠܘ̱ ܟܠܝ̣̈ܠܶܐ ܕܙܳܟܘ̣ܬܳܐ: ܗܝ̣ ܬܚܰܝܶܠ ܠܰܢ ܠܘ̣ܩܒܰܠ ܟܡܺܐܢܰܘ̈ܗ̱ܝ ܕܐܳܟܶܠܩܰܪܨܳܐ ܘܰܬܣܰܝܰܥ ܠܰܢ ܒܟܽܠ ܥܶܕܳܢܝ̣̈ܢ: ܐܰܝܟܰܢܳܐ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܢܫܰܒܚܳܟ ܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀