ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܕܒܰܡܨܰܥܬܳܗ̇ ܕܰܐܪܥܳܐ ܥܒܰܕ ܦܽܘܪܩܳܢܳܐ ܠܓܶܢܣܳܐ ܕܰܒܢܰܝ̈ܢܳܫܳܐ ܠܗܰܘ ܕܩܰܕܶܡ ܒܰܕܶܩ ܠܓܽܘܕܳܐ ܕܬܰܠܡܺܝܕܽܘܬܳܐ: ܥܰܠ ܙܩܺܝܦܽܘܬܶܗ ܘܡܰܘܬܶܗ ܘܰܩܝܳܡܬܶܗ ܕܠܰܬܠܳܬܳܐ ܝܰܘ̈ܡܺܝܢ: ܠܗܰܘ ܕܰܐܪܡܺܝ ܪܗܳܒܬܳܐ ܒܶܝܬ ܡܺܝ̈ܬܶܐ: ܘܓܰܪ̈ܡܶܐ ܝܰܒܺܝ̈ܫܶܐ ܩܢܰܘ ܚܽܘܕܳܬܳܐ: ܠܗܰܘ ܕܰܐܙܥܶܩ ܒܡܰܘܬܳܐ ܘܙܳܥ ܘܰܢܦܰܠ: ܘܰܪ̈ܫܶܠܝ̱ ܐܺܝ̈ܕܰܘܗ̱ܝ: ܘܒܽܘܪ̈ܟܰܘܗ̱ܝ ܪ̈ܥܶܠܝ̱: ܘܦܰܓܪ̈ܶܐ ܣܰܓܺܝ̈ܶܐܐ ܕܩܰܕܺܝ̈ܫܶܐ ܐܶܬܢܰܚܰܡܘ̱ ܘܩܳܡܘ̱ ܘܥܰܠ̣ܘ̱ ܠܐܘ̣ܪܫܠܶܡ: ܘܚܰܘܺܝܘ ܢܰܦܫܗܽܘܢ ܠܣܰܓܺܝ̈ܶܐܐ: ܘܒܰܕܶܩܘ̱ ܐ̱ܪܳܙܳܐ ܕܰܩܝܳܡܬܳܐ ܕܰܥܬܺܝܕܳܐ ܕܬܶܗܘܶܐ ܠܟܽܠܗܽܘܢ ܡܰܘܕ̈ܝܰܝ ܒܰܫܡܶܗ: ܕܠܶܗ ܘܰܚܢܰܢ ܢܩܰܪܶܒ ܫܽܘܒܚܳܐ ܕܙܳܕܶܩ ܠܶܗ: ܘܬܰܘܕܺܝܬܳܐ ܕܝܳܐܝܳܐ ܠܶܗ: ܒܥܽܘܗܕܳܢܳܐ ܕܚܰܫܶܗ ܘܡܰܘܬܶܗ ܘܕܰܩܝܳܡܬܶܗ: ܘܰܒܕܽܘܟܪܳܢܳܐ ܕܶܐܡܳܐ ܕܺܝܠܶܕܬܶܗ: ܘܕܰܢܒܺܝ̈ܶܐ ܘܕܰܫܠܺܝ̈ܚܶܐ: ܘܰܕܣܳܗ̈ܕܶܐ ܘܰܕܡܰܘ̈ܕܝܳܢܶܐ ܩܛܺܝ̈ܠܰܝ ܥܰܠ ܣܰܒܪܶܗ: ܘܰܕܩܰܕܺܝ̈ܫܶܐ ܡܢܺܝ̈ܚܳܢܶܐ ܕܺܝܠܶܗ: ܘܰܕܥܰܢܺܝ̈ܕܶܐ ܡܗܰܝܡ̈ܢܶܐ ܡܣܰܟ̈ܝܰܝ ܠܡܶܐܬܺܝܬܶܗ ܘܰܠܝܰܘܡܳܐ ܕܓܶܠܝܳܢܶܗ: ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܳܐ ܒܨܺܝܪܽܘܬܰܢ ܩܕܳܡ ܪܰܒܽܘܬܶܗ: ܘܰܢܚܰܣܶܐ ܚܰܘ̈ܒܶܐ ܕܺܝܠܰܢ ܘܕܺܝܠܗܽܘܢ ܒܣܰܓܺܝܐܘܽܬ ܚܢܳܢܶܗ: ܘܠܰܢ ܘܰܠܗܽܘܢ ܢܰܫܘܶܐ ܠܩܰܘܡܳܐ ܕܡ̣ܶܢ ܝܰܡܺܝܢܶܗ: ܥܰܡ ܟܽܠܗܽܘܢ ܓܳܡܪ̈ܰܝ ܨܶܒܝܳܢܶܗ: ܕܢܰܘܕܶܐ ܠܶܗ ܘܠܐܱܒܽܘܗ̱ܝ ܘܰܠܪܽܘܚܶܗ ܩܰܕܺܝܫܳܐ: ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ: ܡܫܺܝܚܳܐ ܐܰܠܳܗܳܐ ܕܺܝܠܰܢ ܚܶܟܡܬܳܐ ܟܝܳܢܳܝܬܳܐ ܘܚܰܝܠܐܴ ܬܰܩܺܝܦܳܐ ܕܰܐܒܳܐ ܝܳܠܽܘܕܳܐ: ܨܶܡܚܳܐ ܫܒܺܝܚܳܐ ܘܢܽܘܗܪܳܐ ܒܰܪ ܐܝ̣ܬܘܬܶܗ ܡܥܰܠܝܳܐ ܘܠܐܴ ܡܶܬܕܰܪܟܳܢܳܐ ܘܠܐܴ ܡܶܬܩܰܪܒܳܢܳܐ: ܥܰܡ ܪܽܘܚܳܐ ܩܰܕܺܝܫܳܐ ܒܫܽܘܒܚܳܐ ܕܪܰܒܽܘܬܶܗ: ܗܰܘ ܕܒܶܗ ܘܒܰܐܒܽܘܗ̱ܝ ܘܰܒܪܽܘܚܶܗ ܩܰܕܺܝܫܳܐ ܐܶܬܬܰܝ̈ܬܺܝ ܟܽܠܗܶܝܢ ܒܶܪ̈ܝܳܬܳܐ ܓܫܺܝ̈ܡܳܬܳܐ ܘܠܐܴ ܓܫܺܝ̈ܡܳܬܳܐ ܠܰܗܘܳܝܳܐ: ܘܒܶܠ̈ܥܳܕܰܘܗ̱ܝ ܐܳܦܠܐ ܚܕܳܐ ܗܘܳܬ݀ : ܗܰܘ ܕܰܒܨܶܒܝܳܢܶܗ ܬܠܺܝܬܳܝܳܐ ܘܰܠܚܽܘܕܳܝܳܐ: ܡܶܛܽܠ ܨܰܠܡܳܐ ܩܰܕܡܳܝܳܐ ܕܰܐܫܚܶܬ ܒܰܚܛܺܝܬܳܐ ܒܥܶܠܬܳܐ ܕܰܥܒܳܪ ܦܽܘܩܕܳܢܳܐ ܘܡܶܐܟܽܘܠܬܳܐ ܕܦܺܐܪܳܐ ܡܶܬܝܰܕܥܳܢܳܐ ܘܰܛܪܽܘܕܝܳܐ ܕܡ̣ܶܢ ܛܰܝܪܳܐ ܦܰܪܕܰܝܣܳܝܳܐ ܘܰܕܚܽܘܩܝܳܐ ܢܽܘܓܪܳܝܳܐ ܘܰܐܟܣܽܘܪܺܝܣܬܺܝܢܳܝܳܐ: ܫܪܳܐ ܒܡܰܪܝܰܡ ܒܢܳܨܪܰܬ: ܘܶܐܬܺܝܠܶܕ ܒܒܶܝܬܠܚܶܡ: ܘܰܐܬܪܰܒܺܝ ܒܰܓܠܺܝܠܐܴ: ܘܰܥܪܰܩ ܠܡܶܨܪܶܝܢ ܘܰܥܡܰܕ ܒܝܽܘܪܕܢܳܢ: ܘܨܳܡ ܒܡܰܕܒܪܳܐ: ܘܰܠܥܶܣ ܒܥܶܠܺܝܬܳܐ ܦܶܨܚܳܐ ܒܶܝܬ ܪ̈ܰܡܫܶܐ ܘܫܰܠܶܡ ܠܥܰܬܝ̣ܩܬܳܐ ܘܫܰܪܝ̣ ܒܰܚܕܰܬܳܐ: ܘܐܰܫܝ̣ܓ ܪ̈ܶܓܠܶܐ ܕܬܰܠܡܝ̣̈ܕܶܐ ܘܶܐܙܕܰܒܰܢ ܡ̣ܶܢ ܝܺܗܽܘܕܳܐ ܣܟܰܪܝܽܘܛܳܐ ܘܶܐܫܬܠܶܡ ܠܕܰܝܳܢܳܐ ܘܶܐܬܢܰܓܰܕ ܒܰܦܪ̈ܳܓܶܠܐܷ ܘܶܐܬܓܕܶܠ ܠܶܗ ܟܠܺܝܠܐܴ ܕܟܽܘ̈ܒܶܐ ܘܩܰܒܶܠ ܚܰܫ̈ܶܐ ܘܰܨܠܺܝܒܳܐ: ܘܡܶܬܬܙܺܝܥܳܢܽܘܬܳܐ ܕܶܐܣܛܽܘ̈ܟܣܶܐ ܚܰܘܺܝ ܒܰܟܝܳܢܶܗ ܕܠܐܴ ܒܰܥܝܳܕ: ܒܰܥܪܽܘܒܬܳܐ ܚܰܫ ܦܳܪܽܘܩܰܢ ܚܠܳܦ ܐܳܕܳܡ ܗܰܘ ܕܒܰܥܪܽܘܒܬܳܐ ܒܓܰܢܬܳܐ ܡܶܢܩܕܺܝܡ ܐܶܬܓܒܶܠ: ܒܰܥܪܽܘܒܬܳܐ ܐܶܬܕܩܰܪ ܣܶܛܪܶܗ ܒܠܽܘܟܳܝܬܳܐ ܘܡܶܢܶܗ ܢܒܰܥܘ̱ ܚܰܝ̈ܶܐ ܠܗܰܘ ܕܰܡܡܰܚܰܝ ܗ̱ܘܳܐ ܒܚܰܫ̈ܶܐ: ܘܕܺܝܡܳܘܣ ܕܢܰܦܫܳܐ ܘܰܕܦܰܓܪܳܐ: ܒܰܥܪܽܘܒܬܳܐ ܕܶܝܢ ܐܶܬܟܰܣܺܝ ܒܢܰܚ̈ܬܶܐ ܕܒܶܙܚܳܐ ܘܰܕܡܽܘܝܳܩܳܐ ܕܰܢܪܺܝܡ ܦܽܘܪܣܳܝܶܗ ܕܗܰܘ ܕܶܐܬܟܰܣܺܝ ܛܰܪ̈ܦܶܐ ܕܬܺܐܢ̈ܶܐ ܥܰܠ ܥܰܪܛܶܠܳܝܽܘܬܶܗ: ܒܰܥܪܽܘܒܬܳܐ ܐܶܬܢܰܚܰܬ ܠܒܶܝܬ ܡܺܝ̈ܬܶܐ ܠܐܱܬܪܳܐ ܕܢܽܘܟܪܳܝ ܠܰܟܝܳܢܶܗ: ܕܰܠܗܰܘ ܕܶܐܬܛܪܶܕ ܠܐܱܪܥܳܐ ܢܽܘܟܪܳܝܬܳܐ ܕܡܰܠܝܳܐ ܟܽܘ̈ܒܶܐ ܘܕܰܪܕܪ̈ܶܐ ܢܰܦܢܶܐ ܠܝܳܪܬܽܘܬܶܗ ܕܡ̣ܶܢ ܩܕܺܝܡ: ܒܰܥܪܽܘܒܬܳܐ ܫܶܐܠ ܓܰܝܳܣܳܐ ܒܰܙܩܺܝܦܳܐ ܡܶܬܕܰܟܪܳܢܽܘܬܳܐ ܒܡܶܐܬܺܝܬܳܟ ܬܪܰܝܳܢܺܝܬܳܐ: ܘܶܐܬܦܬܰܚ ܠܶܗ ܥܰܡ ܡܶܠܬܶܗ ܦܰܪܕܰܝܣܳܐ ܥܕܶܢܳܝܳܐ ܗܰܘ ܕܶܐܬܬܚܶܕ ܗܘܳܐ ܡ̣ܶܢ ܩܕܺܝܡ ܩܕܳܡ ܐܳܕܳܡ ܘܚܰܘܳܐ: ܒܰܥܪܽܘܒܬܳܐ ܢܚܶܬ ܡܳܪܰܢ ܠܒܶܝܬ ܡܺܝ̈ܬܶܐ ܘܣܳܩܘ̱ ܪܺܝܚܶܗ ܓܰܪ̈ܡܶܐ ܝܰܒܺܝ̈ܫܶܐ ܘܰܪܦܰܬܘ̱ ܘܶܐܬܬܙܺܝܥܘ̱ ܠܣܶܓܕܬܶܗ: ܣܓܶܕܘ̱ ܠܶܗ ܐܳܕܳܡ ܩܰܕܡܳܝܳܐ ܪܺܝܫ ܛܽܘ̈ܗܡܶܐ ܕܰܒܨܰܠܡܶܗ ܐܶܬܓܒܶܠ: ܘܗܳܒܶܝܠ ܕܰܟܝܳܐ ܕܕܶܒܚܶܗ ܨܳܪ: ܘܫܺܝܬ ܘܰܐܢܽܘܫ ܘܡܰܬܽܘܫܠܰܚ ܥܰܡ ܢܽܘܚ ܚܠܰܦܬܳܐ ܕܥܳܠܡܳܐ ܘܫܺܝܡ ܘܝܰܦܬ: ܣܓܶܕ ܠܶܗ ܡܰܠܟܺܝܙܕܶܩ ܟܽܘܡܪܳܐ ܪܰܒܳܐ ܕܚܰܘܺܝ ܐ̱ܪܳܙ ܦܰܓܪܶܗ ܘܰܕܡܶܗ ܒܠܰܚܡܳܐ ܘܚܰܡܪܳܐ ܕܩܰܪܶܒ: ܘܰܐܒܪܳܗܳܡ ܘܺܐܝܣܚܳܩ ܘܝܰܥܩܽܘܒ ܘܝܰܘܣܶܦ ܘܐܰܚܰܘ̈ܗ̱ܝ ܘܺܐܝܽܘܒ ܙܰܕܝ̣ܩܳܐ: ܣܓܶܕ ܠܶܗ ܡܽܘܫܶܐ ܪܺܝܫܳܐ ܕܰܢܒܺܝܽܘܬܳܐ: ܘܰܐܗܪܽܘܢ ܟܳܗܢܳܐ ܘܶܐܠܺܝܥܳܙܳܪ ܘܦܺܝܢܚܶܣ: ܘܝܶܫܽܘܥ ܒܰܪܢܽܘܢ ܒܥܶܠܫܡܶܗ: ܘܚܽܘܪ ܘܟܳܠܳܒ ܒܰܪ ܝܽܘܦܰܢܳܐ: ܣܓܶܕ ܠܶܗ ܫܡܽܘܐܝܶܠ ܢܕܺܝܪܳܐ: ܘܢܳܬܳܢ ܘܕܰܘܺܝܕ ܘܐܺܠܺܝܳܐ ܘܶܐܠܺܝܫܳܥ ܘܶܐܫܰܥܝܳܐ ܘܶܐܪܰܡܝܳܐ: ܘܚܰܙܩܺܝܶܐܝܠ ܘܕܳܢܺܝܶܐܝܠ: ܣܓܶܕܘ̱ ܠܶܗ ܗܽܘܫܳܥ ܘܝܽܘܐܝܶܠ ܘܥܰܡܽܘܣ ܘܥܽܘܒܰܕܝܳܐ ܘܝܰܘܢܳܢ ܘܰܙܟܰܪܝܳܐ ܘܡܰܠܐܱܟܺܝ ܘܚܰܓܺܝ ܘܡܺܝܟܳܐ ܘܢܰܚܽܘܡ ܘܚܰܒܩܽܘܩ ܘܰܨܦܰܢܝܳܐ: ܣܓܶܕܘ ܠܶܗ ܡܰܠܟ̈ܶܐ ܘܟܳܗ̈ܢܶܐ ܘܰܢܒܺܝ̈ܶܐ: ܘܟܺܐܢ̈ܶܐ ܘܙܰܕܺܝ̈ܩܶܐ ܘܳܐܦ ܒܝܰܘܡܳܐ ܗܳܢܳܐ ܕܰܥܪܽܘܒܬܳܐ ܥ̱ܽܘܗܕܳܢܳܐ ܥܳܒܕܳܐ ܥܺܕܬܳܐ ܘܰܡܫܰܡܠܝܳܐ ܘܡܰܠܽܘܬܳܐ: ܕܽܘܟܪܳܢܳܐ ܕܟܽܠܗܽܘܢ ܐܰܝܠܶܝܢ ܕܰܐܘܕܺܝܘ ܒܰܙܩܺܝܦܽܘܬܳܐ: ܐܰܒܳܗ̈ܳܬܳܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ ܘܰܕܪ̈ܶܒܘܳܬܳܐ ܕܣܳܗ̈ܕܶܐ ܩܰܕܺܝ̈ܫܶܐ ܘܰܕܡܰܘܕ̈ܝܳܢܶܐ ܕܰܚܠܳܦ ܗܰܝܡܳܢܽܘܬܳܐ ܕܒܳܟ ܐܶܬܩܰܛܰܠܘ̱: ܘܕܰܐܝܠܶܝܢ ܕܟܽܠ ܙܢܳܐ ܘܫܶܢ̈ܕܶܐ ܘܽܐܘܠܨ̈ܳܢܶܐ ܘܰܪ̈ܓܽܘܡܝܶܐ ܘܝܰܩܕ̈ܳܢܶܐ ܩܰܒܶܠܘ̱ ܚܠܳܦܰܝܟ: ܘܰܡܚܰܘܝܳܐ ܠܳܟ ܚܰܫܰܝ̈ܗܽܘܢ ܘܡܰܥ̱ܗܕܳܐ ܕܺܝܰܬܺܝܩܺܝ ܕܒܰܕܡܳܟ ܝܰܩܝ̣ܪܳܐ ܐܶܬܟܰܬܒܰܬ݀: ܘܰܡܩܰܪܒܳܐ ܠܳܟ ܥܰܡܗܽܘܢ ܡܦܺܝ̈ܣܳܢܶܐ ܘܰܡܪ̈ܰܥܝܳܢܶܐ ܕܺܝܠܳܟ: ܘܡܶܬܚ̈ܰܢܳܢܶܐ ܚܠܳܦ ܩܽܘܝܳܡܳܐ ܕܝܰܠܕܶܝ̈ܗ̇ ܘܢܽܘܛܳܪܳܐ ܕܰܒܢܶܝ̈ܗ̇: ܫܠܺܝ̈ܚܶܐ ܩܰܕܺܝ̈ܫܶܐ ܚܰܙܳܝ̈ܶܐ ܕܐ̱ܪ̈ܳܙܰܝܟ ܘܡܰܟܪ̈ܙܳܢܶܐ ܕܰܣܒܰܪܬܳܟ: ܩܰܕܡܳܐܝ̣ܬ ܦܶܛܪܽܘܣ ܪܺܝܫܳܐ ܕܣܺܝܣܰܪܬܳܐ ܫܠܺܝܚܳܝܬܳܐ: ܘܫܶܬܶܐܣܬܳܐ ܕܗܰܝܡܳܢܽܘܬܳܐ ܘܰܐܚܺܝܕ ܩܠܺܝ̈ܕܶܐ ܕܡܰܠܟܽܘܬܳܐ ܫܡܰܝܳܢܺܝܬܳܐ: ܘܦܰܘܠܳܘܣ ܡܳܐܢܳܐ ܓܰܒܝܳܐ ܘܐܰܪܕܺܝܟܠܳܐ ܕܥܺܕܬܳܐ ܩܰܕܝ̣ܫܬܳܐ ܘܫܰܪܟܳܐ ܕܟܳܪ̈ܽܘܙܶܐ ܘܰܡܣܰܒܪ̈ܳܢܶܐ ܘܟܽܠܗܽܘܢ ܩܰܕܺܝ̈ܫܶܐ: ܝܰܬܺܝܪܳܐܝ̣ܬ ܕܶܝܢ ܩܰܕܺܝܫܬܳܐ ܘܰܡܫܰܒܰܚܬܳܐ ܘܰܒܬܽܘܠܬܳܐ ܡܒܰܪܰܟܬܳܐ ܡܰܠܝܰܬ݀ ܛܰܝܒܽܘܬܳܐ: ܘܰܡܥܰܠܝܰܬ݀ ܡ̣ܶܢ ܢܶܫ̈ܶܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܘܝܽܘܚܰܢܳܢ ܡܰܥܡܕܳܢܳܐ ܕܰܩܕܳܡܰܝܟ ܕܰܝܶܨ ܘܰܩܕܳܡ ܣܒܰܪܬܳܟ ܪܗܶܛ: ܘܐܶܣܛܶܦܰܢܳܘܣ ܡܫܰܡܫܳܢܳܐ: ܐܰܝܟܰܢܳܐ ܕܰܒܥܶܛܪܳܐ ܕܒܶܣ̈ܡܶܐ ܘܰܡܩܰܪܒܳܐ ܠܳܟ: ܐܰܝܟܰܢܳܐ ܕܬܶܬܚܰܢܰܢ ܒܪ̈ܰܚܡܶܐ ܫܦܺܝ̈ܥܶܐ ܕܺܝܠܳܟ ܥܰܠ ܟܽܠܗܽܘܢ ܝܰܠܕܶܝ̈ܗ̇: ܘܬܶܪܕܽܘܦ ܡܶܢܳܗ̇ ܩܪ̈ܳܒܶܐ ܕܰܒܥܶܠܕ̈ܒܳܒܶܐ ܕܟܰܡܺܝܢܺܝܢ ܠܳܗ̇ ܘܰܬܪܰܚܶܦ ܒܚܽܘܒܳܐ ܕܚܰܕܽܘܬܳܐ ܕܺܝܠܳܟ ܥܰܠ ܟܽܠܗܽܘܢ ܝܰܠܕܶܝ̈ܗ̇: ܢܰܛܰܪܶܝܗ̇ ܡ̣ܶܢ ܪ̈ܰܘܒܶܐ ܡܰܕܠ̈ܚܳܢܶܐ ܕܳܐܟܶܠܩܰܪܨܳܐ: ܣܰܬܰܪܶܝܗ̇ ܡ̣ܶܢ ܟܽܠ ܙܢܳܐ ܕܽܐܘܠܨܳܢ̈ܶܐ ܡܥܺܝ̈ܩܳܢܶܐ ܕܫܺܐܕ̈ܶܐ: ܫܰܘܙܶܒܶܝܗ̇ ܡ̣ܶܢ ܢܶܟ̈ܠܐܷ ܡܰܟܝ̈ܳܢܶܐ ܕܚܰܣ̈ܳܡܶܐ: ܦܰܨܳܗ̇ ܡ̣ܶܢ ܥܫܽܘܩܝܳܐ ܕܣܳܢ̈ܶܐܐ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ: ܣܰܝܰܥܶܝܗ̇ ܒܝܰܡܺܝܢܳܟ ܥܳܒܕܰܬ݀ ܥܳܠܡ̈ܶܐ: ܦܪܽܘܩܶܝܗ̇ ܡ̣ܶܢ ܫܶܚܪ̈ܶܐ ܠܙܺܝ̈ܙܶܐ ܕܥܰܢ̈ܳܬܶܐ: ܨܰܒܰܬܶܝܗ̇ ܒܫܰܝܢܳܐ ܕܡܶܢܳܟ: ܗܰܕܰܪܶܝܗ̇ ܒܰܫܠܳܡܳܐ ܕܡ̣ܶܢ ܠܘܳܬܳܟ: ܗܘܺܝ ܠܳܗ̇ ܫܽܘܪܳܐ ܥܰܫܺܝܢܳܐ ܕܦܽܘܪܩܳܢܳܐ: ܐܰܦܬܳܐ ܬܚܽܘ̈ܡܶܝܗ̇: ܐܰܪܘܰܚ ܣܳܚܪ̈ܳܬܳܗ̇: ܚܰܣܳܐ ܚܛܳܗܶܝ̈ܗ̇: ܫܒܽܘܩ ܚܰܘ̈ܒܶܝܗ̇: ܠܚܺܝ ܒܽܘܨܳܪ̈ܶܝܗ̇ ܥܛܺܝ ܣܰܟܠܘ̈ܳܬܳܗ̇: ܕܰܠܳܗ̇ ܒܰܕܪܳܥܳܟ ܬܰܩܺܝܦܳܐ ܡ̣ܶܢ ܓܽܘܡܳܨܳܐ ܕܰܐܒܕܳܢܳܐ: ܘܰܫܠܺܝܗ̇ ܒܣܽܘܝܳܥܳܐ ܕܝܰܡܺܝܢܳܟ ܡ̣ܶܢ ܓܽܘܡܬܳܐ ܕܰܣܝܳܢܳܐ: ܘܠܐܴ ܬܪܰܦܶܐ ܒܳܗ̇ ܐܺܝܕܳܐ ܕܰܡܪܰܚܡܳܢܽܘܬܳܟ: ܘܠܐܴ ܬܶܫܒܽܘܩܶܝܗ̇ ܕܬܶܗܘܶܐ ܠܚܶܣܕܳܐ ܘܰܠܡܽܘܝܳܩܳܐ: ܘܠܐܴ ܢܶܬܓܰܙ̈ܝܳܢ ܓܽܘܕܶܝ̈ܗ̇ ܡ̣ܶܢ ܬܶܫܒ̈ܚܳܬܳܟ: ܠܐܴ ܢܶܨ̈ܕܝܳܢ ܕܳܪ̈ܳܬܳܗ̇ ܡ̣ܶܢ ܫܽܘܒܚܳܟ: ܠܐܴ ܢܶܒܛܠܽܘܢ ܗܰܝܟ̈ܠܶܝܗ̇ ܡ̣ܶܢ ܗܽܘܠܳܠܰܝ̈ܟ: ܠܐܴ ܢܶܫܬܰܬܩܽܘܢ ܟܳܗ̈ܢܶܝܗ̇ ܡ̣ܶܢ ܪܽܘܡܪܳܡܳܟ: ܠܐܴ ܢܶܬܟܠܐܷ ܡܰܕܒܚܳܗ̇ ܡ̣ܶܢ ܕܶܒܚܰܝ̈ܟ: ܠܐܴ ܢܶܚܣܰܪ ܦܳܬܽܘܪܳܗ̇ ܡ̣ܶܢ ܩܽܘܪ̈ܒܳܢܰܝܟ: ܠܐܴ ܢܪܺܝܡܽܘܢ ܩܳܠܰܝ̈ܗܽܘܢ ܣܳܢ̈ܝܰܝ ܠܰܫܪܳܪܳܟ: ܠܐܴ ܢܢܺܝܕܽܘܢ ܪ̈ܺܝܫܰܝܗܽܘܢ ܒܥܶܠܕ̈ܒܳܒܶܐ ܕܬܰܘܕܺܝܬܳܟ: ܠܐܴ ܢܶܦܛܪܽܘܢ ܘܰܢܦܺܝܛܽܘܢ ܥܠܶܝܗ̇ ܣܶܦܘ̈ܳܬܗܽܘܢ ܘܠܶܫܳܢܰܝ̈ܗܽܘܢ ܥܰܡ̱̈ܡܶܐ ܒܰܪܒܪ̈ܳܝܶܐ ܟܳܦܪ̈ܰܝ ܒܰܙܩܺܝܦܳܟ: ܠܐܴ ܠܨܽܘܚܺܝܬܳܐ ܘܰܠܡܰܫܪܽܘܩܺܝܬܳܐ ܬܶܗܘܶܐ ܥܺܕܬܳܐ ܐܰܡܬܳܐ ܕܺܝܠܳܟ: ܐܶܠܐܴ ܗܰܒ ܠܳܗ̇ ܕܰܒܝܰܕ ܨܠܰܘ̈ܳܬܳܐ ܕܰܫܠܺܝ̈ܚܰܝܟ ܬܶܬܢܰܛܰܪܝ̱: ܘܰܒܬܰܟܫ̈ܦܳܬܳܐ ܕܣܳܗ̈ܕܰܝܟ ܬܶܬܥܰܕܰܪܝ̱: ܘܰܒܒܳܥܘ̈ܳܬܳܐ ܕܟܳܪ̈ܽܘܙܰܝܟ ܬܶܬܚܰܣܰܢܝ̱: ܒܰܦܝܳܣܳܐ ܕܰܡܣܰܒܪ̈ܳܢܰܝܟ ܬܶܫܬܰܪܰܪܝ̱: ܘܰܒܥܰܕܥܺܐܕ̈ܶܐ ܕܩܰܕܺܝ̈ܫܰܝܟ ܬܶܬܒܰܪܰܟܝ̱: ܘܰܒܕܽܘܟܪܳܢܳܐ ܕܰܡܢܺܝ̈ܚܳܢܰܝܟ ܬܶܬܗܰܕܰܪܝ̱: ܘܰܒܥ̱ܽܘܗܕܳܢܳܐ ܕܣܳܗ̈ܕܰܝܟ ܬܶܨܛܰܒܰܬܝ̱: ܒܚܰܫܰܝ̈ܟ ܬܶܫܬܰܒܗܰܪܝ̱: ܒܫܽܘ̈ܡܳܬܳܟ ܬܶܬܚܬܰܪܝ̱: ܒܡܰܘܬܳܟ ܬܶܬܪܰܡܪܰܡܝ̱: ܒܰܩܒܽܘܪܬܳܟ ܬܶܬܢܰܚܰܡܝ̱: ܒܰܩܝܳܡܬܳܟ ܬܩܽܘܡܝ̱: ܘܥܰܡܳܟ ܬܶܫܬܰܒܰܚܝ̱: ܘܰܒܡܰܠܟܽܘܬܳܟ ܬܶܚܕܶܐ: ܘܒܰܓܢܽܘܢܳܟ ܬܶܪܘܰܙܝ̱: ܒܰܣܡܳܟܳܟ ܬܶܬܦܰܛܰܡܝ̱: ܘܥܰܡܳܟ ܒܢܽܘܗܪܳܐ ܘܰܠܥܳܠܰܡ ܬܶܬܒܰܣܰܡܝ̱: ܒܛܰܝܒܽܘܬܳܐ ܕܺܝܠܳܟ ܘܰܒܫܰܦܺܝܪܽܘܬ ܨܶܒܝܳܢܳܐ ܕܰܐܒܽܘܟ ܘܡܰܥܒܕܳܢܽܘܬܶܗ ܕܪܽܘܚܳܟ ܚܰܝܳܐ ܩܰܕܺܝܫܳܐ: ܛܳܒܳܐ ܘܰܣܓܺܝܕܳܐ ܘܰܫܘܶܐ ܠܳܟ ܒܽܐܘܣܺܝܰܐ ܗܳܫܳܐ܀