ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܣܳܗܕܳܐ ܩܰܕܡܳܝܳܐ ܕܶܐܬܕܒܰܚ ܒܰܙܩܺܝܦܳܐ ܡܶܛܽܠܳܬܰܢ ܘܰܕܪܰܫ ܠܰܢ ܐܽܘܪܚܳܐ ܐܰܝܟܰܢܳܐ ܕܰܢܥܰܠܐܷ ܠܓܶܢܣܳܐ ܕܺܝܠܰܢ ܬܰܚܽܘܒܳܐ ܠܪܰܘܡܳܐ ܕܰܫܡܰܝܳܐ: ܘܢܰܘܬܒܰܢ ܡ̣ܶܢ ܝܰܡܺܝܢ ܐܰܒܽܘܗ̱ܝ ܡܫܰܒܚܳܐ: ܡܳܢܳܐ ܢܶܦܪܽܘܥ ܠܛܰܝܒܽܘܬܶܗ ܥܰܠ ܐܰܦ̈ܰܝ ܟܽܠܗܶܝܢ ܕܰܣܥܰܪ ܠܘܳܬܰܢ ܒܰܡܪܰܚܡܳܢܽܘܬܶܗ: ܠܗܳܢܳܐ ܡܽܘܠܟܳܢܳܐ ܫܡܰܥܘ̱ ܟܽܠܗܽܘܢ ܐܰܒܳܗ̈ܳܬܳܐ ܩܰܕ̈ܡܳܝܶܐ ܥܰܡ ܣܳܗ̈ܕܶܐ ܘܡܰܘܕ̈ܝܳܢܶܐ ܘܨܰܘܪ̈ܰܝܗܽܘܢ ܝܰܗܒܘ̱ ܠܣܰܝܦܳܐ ܘܦܰܓܪ̈ܰܝܗܽܘܢ ܠܡܰܚ̈ܘܳܬܳܐ ܡܶܛܽܠ ܚܽܘܒܶܗ ܕܰܡܫܺܝܚܳܐ: ܘܶܐܫܬܘܺܝܘ ܕܰܢܥܰܕܥܶܕ ܘܰܢܝܰܩܰܪ ܠܝܰܘܡܳܐ ܕܕܽܘܟܪܳܢܗܽܘܢ ܒܰܨܠܰܘ̈ܳܬܗܽܘܢ ܘܰܒܬܰܟܫ̈ܦܳܬܗܽܘܢ ܢܶܫܬܘܶܐ ܠܚܽܘܣܳܝܳܐ ܕܚܰܘ̈ܒܰܝܢ ܘܰܠܫܽܘܒܩܳܢܳܐ ܕܰܚܛܳܗܰܝ̈ܢ ܘܥ̱ܽܘܗܕܳܢܳܐ ܕܟܽܠܗܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܕܩܰܕܶܡܘ̱ ܫܟܶܒܘ̱ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܡܫܺܝܚܳܐ ܡܰܠܟܳܐ ܕܬܶܫܒܽܘܚܬܳܐ ܡܳܪܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܓܳܒܽܘܠܶܗ ܕܳܐܕܳܡ ܡ̣ܶܢ ܥܰܦܪܳܐ ܡܚܰܕܬܳܢܳܐ ܕܨܰܠܡܶܗ ܒܪܽܘܚܳܐ: ܘܰܡܩܺܝܡܳܢܳܐ ܕܓܶܢܣܰܢ ܡ̣ܶܢ ܩܰܒܪܳܐ: ܐܰܝܟ ܒܰܪ̱ܬ݀ ܩܳܠܐܴ ܕܰܫܠܺܝܚܳܐ ܩܰܕܺܝܫܳܐ ܦܰܘܠܘ̣ܣ ܕܥܰܠ ܗܳܕܶܐ ܡܺܝܬ ܘܩܳܡ ܕܢܶܗܘܶܐ ܡܳܪܳܐ ܠܡܺܝ̈ܬܶܐ ܘܰܠܚܰܝ̈ܶܐ: ܒܰܕܓܽܘܢ ܡ̣ܶܢ ܒܳܬܰܪ ܕܚܰܫ ܘܡܺܝܬ ܘܶܐܬܩܒܰܪ ܘܰܚܝܳܐ ܘܩܳܡ: ܘܰܐܚܺܝ ܥܰܡܶܗ ܒܰܩܝܳܡܬܶܗ ܡܫܰܒܰܚܬܳܐ ܠܟܽܠܗܽܘܢ ܐܰܝܠܶܝܢ ܕܰܫܦܰܪܘ̱ ܒܪܽܘܚ ܡ̣ܶܢ ܩܕܺܝܡ ܘܳܐܦ ܡ̣ܶܢ ܕܪܺܝܫ: ܐܰܝܠܶܝܢ ܬܽܘܒ ܕܪܰܥܝܽܘܗ̱ܝ ܠܐܱܠܳܗܳܐ ܒܕܽܘܒܳܪ̈ܰܝܗܽܘܢ: ܟܰܕ ܐܰܝܟ ܕܰܒܝܰܕ ܫܺܝܦܽܘܪܳܐ ܐܶܬܬܰܙܥܰܩ ܕܣܳܦܶܩ ܚܰܕ ܡܰܘܬܳܐ ܡܰܥܒܶܕ ܚܰܝ̈ܶܐ ܕܦܳܪܽܘܩܳܐ ܕܺܝܠܰܢ ܡܫܺܝܚܳܐ: ܕܢܶܫܪܶܐ ܠܐܘ̣ܚܕܳܢܶܗ ܕܡܰܘܬܳܐ ܛܪܽܘܢܳܐ ܕܶܐܬܥܰܫܰܢ ܥܠܰܝܢ: ܘܰܒܝܰܕ ܩܝܳܡܬܶܗ ܡܫܰܒܰܚܬܳܐ ܢܰܢܗܰܪ ܠܥܰܝ̈ܢܶܐ ܕܚܶܫܽܘ̈ܟܳܢ ܗ̱ܘ̈ܰܝ: ܘܰܢܫܰܟܶܢ ܠܐܴ ܡܶܬܚܰܒܠܳܢܽܘܬܳܐ: ܕܰܐܠܳܗܳܐ ܓܶܝܪ ܐܝ̣ܬܝܗ̇ ܗܳܝ ܕܰܚܠܳܦ ܟܽܠܗܽܘܢ ܒܢܰܝ̈ܢܳܫܳܐ ܠܰܕܡܳܐ ܡܝܰܩܪܳܐ ܐܶܫܰܕ: ܡܶܛܽܠ ܕܒܳܐܕܳܡ ܟܽܠܗܽܘܢ ܡܺܝܬܘ̱ ܒܰܡܫܝ̣ܚܳܐ ܟܽܠܗܘܢ̇ ܚܝܰܘ: ܢܝܰܩܰܪ ܗܳܟܺܝܠ ܠܟܽܠܗܽܘܢ ܟܺܐܢ̈ܶܐ ܒܩܽܘ̈ܠܳܣܶܐ ܘܰܒܬܶܫ̈ܒܚܳܬܳܐ ܐܰܠܳܗܳܝ̈ܳܬܳܐ: ܘܢܶܗܘܶܐ ܒܚܽܘܒܳܐ ܒܫܽܘܦܪܳܐ ܘܒܰܡܝܰܬܪܽܘܬܳܐ ܕܟܽܠܗܽܘܢ: ܠܰܢܒܺܝ̈ܶܐ ܢܝܰܩܰܪ ܕܰܗܘܰܘ ܡܳܐܢ̈ܶܐ ܕܟܰܝ̈ܳܐ: ܘܚܰܘܺܝܘ ܒܺܐܝܕܰܝ̈ܗܽܘܢ ܐ̱ܪܳܙܳܐ ܬܡܺܝܗܳܐ ܕܡܶܬܒܰܪܢܫܳܢܽܘܬܳܟ ܐܰܠܳܗܳܝܬܳܐ ܕܡ̣ܶܢ ܒܬܽܘܠܬܳܐ ܕܟܝ̣ܬܳܐ ܩܰܕܺܝܫܬܳܐ ܡܰܪܝܰܡ: ܠܚܰܫܳܟ ܘܡܰܘܬܳܟ ܡܰܥܒܶܕ ܚܰܝ̈ܶܐ: ܠܡܰܚܰܬܬܳܟ ܕܠܰܫܝܽܘܠ ܘܠܰܩܝܳܡܬܳܐ ܫܒܺܝܚܬܳܐ ܠܡܰܘܬܒܳܐ ܕܥܰܠ ܝܰܡܺܝܢܳܐ ܕܰܐܒܳܐ: ܠܰܫܠܺܝ̈ܚܶܐ ܢܝܰܩܰܪ ܕܰܗܘܰܘ ܚܰܙܳܝ̈ܶܐ ܘܰܡܫܰܡ̈ܫܳܢܶܐ ܘܪ̈ܰܒܰܝ ܒ̈ܳܬܶܐ ܚܰܟܺܝ̈ܡܶܐ ܕܰܣܒܰܪܬܳܐ ܦܳܪܽܘܩܳܝܬܳܐ: ܘܰܠܐܪܳܙܳܐ ܕܰܡܟܰܣܰܝ ܗ̱ܘܳܐ ܡ̣ܶܢ ܥܳܠܡ̈ܶܐ ܘܡ̣ܶܢ ܕܳܪ̈ܶܐ: ܠܣܳܗ̈ܕܶܐ ܫܰܦܺܝܪ̈ܰܝ ܙܳܟܽܘܬܳܐ ܢܝܰܩܰܪ ܗܳܢܘܢ̇ ܕܰܒܫܽܘܦܳܥ ܕܶܡܗܽܘܢ ܝܰܩܰܪܘ ܠܰܕܡܳܐ ܐܰܠܳܗܳܝܳܐ ܕܶܐܫܰܕ ܚܠܳܦܰܝܢ ܗܰܘ ܐܶܡܪܶܗ ܕܰܐܠܳܗܳܐ ܚܰܝܳܐ ܕܫܳܩܶܠ ܚܛܺܝܬܶܗ ܕܥܳܠܡܳܐ: ܠܡܰܘܕܝ̈ܳܢܶܐ ܢܝܰܩܰܪ ܕܰܐܘܕܺܝܘ ܒܰܒܪܳܐ ܕܰܐܠܳܗܳܐ ܘܗܰܝܡܶܢܘ̱ ܒܶܗ ܘܰܐܟܪܙܽܘܗ̱ܝ: ܠܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ ܢܝܰܩܰܪ: ܐܰܝܟ ܕܰܠܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܐ̱ܪ̈ܙܳܢܶܐ ܒܚܺܝܪ̈ܶܐ: ܕܰܦܣܰܩܘ̱ ܠܰܢ ܬܪܺܝܨܳܐܝ̣ܬ ܠܡܶܠܬܳܐ ܘܰܣܚܰܦܘ̱ ܠܛܽܘܥܝܰܝ: ܢܝܰܩܰܪ ܕܶܝܢ ܠܰܒܬܽܘܠܰܬ݀ ܒܟܽܠܙܒܰܢ ܛܽܘܒܳܢܺܝܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ ܕܝܶܠܕܰܬ݀ ܠܰܢ ܠܐܱܠܳܗܳܐ ܦܳܪܽܘܩܶܗ ܕܓܶܢܣܰܢ ܐܰܝܟ ܕܠܰܢܒܺܝܬܳܐ ܢܪܰܡܪܡܝ̣ܗ̇: ܘܰܐܝܟ ܕܠܰܫܠܺܝ̈ܚܶܐ ܘܣܳܗ̈ܕܶܐ ܠܗܳܝ ܕܰܡܝܰܩܪ̈ܳܢ ܦܳܠܰܚ̈ܘܳܬܳܐ ܫܡܰܝܳܢ̈ܝܳܬܳܐ ܕܙܰܕܺܝ̈ܩܶܐ ܕܶܐܬܓܡܰܪܘ̱: ܘܰܐܡܺܝܬ ܠܡܰܘܬܳܐ ܘܒܰܛܶܠ ܠܰܚܛܺܝܬܳܐ: ܘܡܶܛܽܠ ܕܛܰܝܒܽܘܬܳܐ ܕܣܺܝܡܰܬ݀ ܒܢܰܝ̈ܳܐ: ܕܩܳܝܡܺܝܢܰܢ ܥܰܡܶܗ ܒܰܩܝܳܡܬܶܗ: ܘܰܐܦܢܺܝ ܠܥܶܪܒܳܐ ܐܰܒܺܝܕܳܐ ܠܒܶܝܬ ܐܰܒܽܘܗ̱ܝ ܡܫܰܒܚܳܐ: ܘܶܐܫܟܚܶܗ ܕܰܒܚܶܫܽܘܟܳܐ ܕܰܚܛܝ̣ܬܳܐ ܘܥܰܠ ܟܰܬܦ̈ܳܬܶܗ ܗܳܠܶܝܢ ܕܰܥܠܰܝܗܶܝܢ ܛܥܺܝܢ ܩܰܝܣܳܐ ܕܰܨܠܺܝܒܶܗ ܙܰܝܚܶܗ: ܥܺܐܕܰܐ ܗ̱ܘ ܓܶܝܪ ܐܰܝܟ ܕܒܰܫܪܳܪܳܐ ܘܚܽܘܕܳܬܳܐ ܪܽܘܚܳܢܳܝܳܐ: ܘܝܰܬܺܝܪܳܐܝ̣ܬ ܥܺܐܕܳܐ ܕܒܘ̣ܣ̈ܳܡܶܐ ܘܥ̱ܽܘܗܕܳܢܳܐ ܪܚܺܝܡܳܐ ܕܐ̱ܢܳܫ̈ܳܐ ܟܺܐܢ̈ܶܐ ܕܠܐܴ ܫܒܰܩܘ̱ ܕܬܶܫܬܰܠܰܛܝ̱ ܚܛܺܝܬܳܐ ܒܦܰܓܪ̈ܰܝܗܽܘܢ: ܘܠܐܴ ܐܶܫܬܰܥܒܰܕܘ̱ ܠܰܪ̈ܓܺܝܓܳܬܳܐ ܒܦܰܓܪ̈ܰܝܗܽܘܢ ܐܶܠܐܴ ܘܰܒܩܺܝܬܳܪܳܐ ܕܰܥܣܰܪ ܡܶܢܺܝ̈ܢ ܢܙܰܡܪܽܘܢ ܠܶܗ: ܘܰܕܢܶܗܘܽܘܢ ܪܺܝܚܳܐ ܒܰܣܺܝܡܳܐ ܒܰܐܝܠܶܝܢ ܕܚܳܐܶܝܢ: ܘܒܰܐܝܠܶܝܢ ܕܳܐܒܕܺܝܢ: ܐܰܝܟܰܢܳܐ ܕܰܒܝܰܕ ܬܰܟܫ̈ܦܳܬܗܽܘܢ ܩܰܕܺܝ̈ܫܳܬܳܐ ܢܶܬܶܠ ܠܰܢ ܡܳܪܰܢ ܘܰܒܕܽܘܒܳܪ̈ܰܝܗܽܘܢ ܢܶܪܕܶܐ: ܐܰܝܟܰܢܳܐ ܕܟܰܕ ܡܡܰܪ̈ܝܳܢܶܐ ܕܒܰܡܝܰܬܪ̈ܳܬܗܽܘܢ ܗܳܘܶܝܢܰܢ: ܘܰܠܫܽܘܠܳܡܳܐ ܛܳܒܳܐ ܡܶܬܡܰܢܥܺܝܢܰܢ ܒܰܡ̈ܛܰܠ̱ܠܐܷ ܕܺܝܠܗܽܘܢ ܢܶܬܩܰܒܰܠ: ܘܥܰܡܗܽܘܢ ܢܥܰܕܥܶܕ ܠܳܟ ܒܥܺܐܕܳܐ ܗܰܘ ܕܠܐܴ ܦܳܛܰܪ: ܘܰܠܥܰܢܺܝ̈ܕܶܐ ܕܰܫܟܶܒܘ̱ ܥܰܠ ܣܰܒܪܶܗ ܒܗܰܝܡܳܢܽܘܬܳܐ ܕܰܫܪܳܪܳܐ: ܢܛܰܟܶܣ ܒܥܽܘ̈ܒܶܐ ܐܰܒܪ̈ܳܗܳܡܳܝܶܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܐܱܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܗܳܫܳܐ܀