ܨܠܽܘܬܳܐ ܕܫܽܘܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܕܶܒܚ̈ܶܐ ܕܫܽܘܒܚܳܐ ܘܩܽܘܪ̈ܒܳܢܶܐ ܡܩܰܒ̈ܠܐܷ ܘܰܕܟܰܝ̈ܳܐ ܢܩܰܪܶܒ ܠܳܟ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܦܳܪܽܘܩܳܝܬܳܐ ܕܟܰܕ ܙܳܓܰܪ ܐܰܢ̱ܬ ܘܰܡܒܰܛܶܠ ܡܶܢܰܢ ܩܪ̈ܳܒܶܐ ܘܬܰܟܬܽܘ̈ܫܶܐ ܒܺܝ̣̈ܫܶܐ ܘܥܰܣ̈ܩܶܐ ܕܰܒܥܶܠܕܰܪܰܢ ܐܰܝܟܰܢܳܐ ܕܕܰܟܝܳܐܝ̣ܬ ܘܩܰܕܺܝܫܳܐܝ̣ܬ ܢܥܰܕܥܶܕ ܠܳܟ ܘܰܢܫܰܒܚܳܟ ܐܰܡܺܝܢܳܐܝ̣ܬ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܦܪܽܘܡܝܽܘܢ

ܫܽܘܒܚܳܐ ܦܰܐܝܳܐ ܘܰܗܕܺܝܪܳܐ ܘܪܽܘܡܪܳܡܳܐ ܕܢܺܝܚܳܐ ܘܩܽܘܠܳܣܳܐ ܪܓܺܝܓܳܐ ܘܢܰܨܺܝܚܳܐ: ܘܗܶܕܪܳܐ ܬܡܺܝܗܳܐ ܘܰܡܦܰܬܟܳܐ ܢܶܫܬܘܶܐ ܕܰܢܩܰܪܶܒ ܠܗܰܘ ܫܶܡܫܳܐ ܘܝܰܠܕܳܐ ܕܰܐܒܳܐ ܡܬܽܘܡܳܝܳܐ: ܠܗܰܘ ܚܰܝܠܐܴ ܘܺܐܝܬܝܳܐ ܩܰܕܡܳܝܳܐ: ܠܗܳܝ ܛܳܒܽܘܬܳܐ ܕܝܰܡܺܝܢܳܐ ܠܐܴ ܡܶܫܬܰܪܝܳܢܺܝܬܳܐ: ܠܗܰܘ ܬܰܪܥܺܝܬܳܐ ܕܰܐܒܳܐ ܗܰܘ ܠܐܴ ܡܶܫܬܰܠܡܳܢܳܐ: ܠܗܰܘ ܡܰܠܟܳܐ ܕܡܰܠܟ̈ܶܐ ܘܩܳܛܰܪ ܬܳܓ̈ܶܐ ܠܫܰܠܺܝܛܳܢ̈ܶܐ: ܠܗܰܘ ܡܶܠܬܳܐ ܡܬܽܘܡܳܝܳܐ ܘܡܰܚܫܰܒܬܳܐ ܠܐܴ ܡܶܬܒܰܨܝܳܢܺܝܬܳܐ ܠܗܰܘ ܕܡܶܢ ܥܺܝܪ̈ܶܐ ܕܢܽܘܪܳܐ ܕܠܐܴ ܫܶܠܝܳܐ ܡܶܫܬܰܒܰܚ: ܘܡܶܢ ܟܪ̈ܽܘܒܶܐ ܕܠܐܴ ܫܶܬܩܳܐ ܦܰܐܝܽܘܬ ܐܰܠܳܗܳܐܝ̣ܬ ܡܶܬܒܰܪܰܟ ܘܡܶܢ ܣܪ̈ܳܦܶܐ ܩܰܕܺܝ̈ܫܶܐ ܠܐܴ ܡܰܘܦܝܳܢܳܐܝ̣ܬ ܡܶܬܩܰܕܰܫ: ܠܗܰܘ ܕܰܒܡܽܘܟܳܟܶܗ ܪܰܡܪܶܡ ܠܡܰܟܺܝ̈ܟܶܐ: ܘܰܒܡܰܘܬܶܗ ܐܰܚܺܝ ܠܡܳܝܽܘ̈ܬܶܐ: ܘܒܰܩܝܳܡܬܶܗ ܐܰܩܺܝܡ ܠܢܰܦ̈ܠܐܷ ܘܰܒܢܽܘܚܳܡܶܗ ܚܰܕܺܝ ܘܰܐܦܨܰܚ ܠܰܟܡܺܝܪ̈ܶܐ: ܒܗܳܢܳܐ ܝܰܘܡܳܐ ܕܥ̱ܽܘܗܕܳܢܳܐ ܕܰܩܝܳܡܬܳܟ ܕܡܶܢ ܩܰܒܪܳܐ ܠܳܟ ܣܳܓܕܺܝܢܰܢ ܘܰܡܫܰܒܚܺܝܢܰܢ ܒܗܳܢܳܐ܀

ܣܶܕܪܳܐ

ܐܰܠܳܗܳܐ ܒܳܪܽܘܝܳܐ ܥܳܒܽܘܕܳܐ ܘܰܡܬܰܩܢܳܢܳܐ ܕܟܽܠܳܗ̇ ܒܪܺܝܬܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ: ܗܰܘ ܕܥܰܠ ܡܰܪܟܰܒܬܳܐ ܗܳܝ ܕܰܟܪ̈ܽܘܒܶܐ ܒܕܶܚܠܐܴ ܡܶܙܕܰܝܰܚ ܐܰܢ̱ܬ: ܘܡܶܢ ܟܶܢ̈ܫܶܐ ܕܰܣܪ̈ܳܦܶܐ ܡܶܬܩܰܕܰܫ ܐܰܢ̱ܬ ܗܰܘ ܕܺܐܝܬܰܝܟ ܠܥܶܠ ܡܶܢ ܡܶܠܬܳܐ ܕܟܽܠ ܡܠܺܝ̈ܠܐܷ: ܘܰܠܥܶܠ ܡܶܢ ܬܶܓܡ̈ܶܐ ܠܐܴ ܗܽܘܠܳܢܳܝ̈ܶܐ ܐܝ̣ܬܰܘܗ̱ܝ ܡܰܥܡܪܳܟ: ܐܰܝܟܳܐ ܕܠܰܝܬ ܐܰܬܪܳܐ ܠܡܶܬܚܰܫܳܒܽܘ ܐܰܝܟܳܐ ܕܟܽܠܗܽܘܢ ܟܝܳܢ̈ܶܐ ܥܶܠܳܝ̈ܶܐ ܙܳܝܥܺܝܢ ܡܶܢܳܟ ܕܰܢܚܽܘܪܽܘܢ ܒܳܟ: ܗܰܘ ܕܨܶܒܝܳܢܳܐܝ̣ܬ ܕܒܰܚ̣ܬ ܢܰܦܫܳܟ ܥܰܠ ܓܳܓܽܘܠܬܳܐ ܘܰܗܘܰܝܬ ܐܳܕܳܡ ܬܪܰܝܳܢܳܐ: ܘܟܰܕ ܣܳܡܬ ܐܰܦܰܝ̈ܟ ܕܬܶܥܽܘܠ ܠܓܰܘ ܩܰܒܪܳܐ ܘܬܶܗܘܶܐ ܡܰܢܝܳܐ ܒܰܩܒܺܝܪ̈ܶܐ: ܘܟܰܕ ܥܰܠ ܥܰܦܪܶܗ ܕܳܐܕܳܡ ܡܬܰܚܬ ܢܰܦܫܳܟ ܘܰܓܠܰܝܬ ܡܶܢ ܐܰܦܰܘ̈ܗ̱ܝ ܠܬܰܚܦܺܝܬܳܐ ܚܶܫܽܘܟܬܳܐ ܕܡܰܘܬܳܐ: ܘܟܰܕ ܡܠܰܝܬܳܝܗ̱ܝ ܣܰܒܪܳܐ ܪܰܒܳܐ ܘܢܽܘܚܳܡܳܐ: ܘܟܰܕ ܩܳܡܬ ܡܶܢ ܩܰܒܪܳܐ ܒܝܰܘܡܳܐ ܬܠܺܝܬܳܝܳܐ ܘܰܙܟܰܝܬܳܝܗ̱ܝ ܠܡܰܘܬܳܐ ܝܰܥܢܳܐ ܒܡܰܘܬܳܟ: ܘܰܕܒܰܪܬ ܥܰܡܳܟ ܠܰܫܒܺܝܬܳܐ ܕܺܝܠܶܗ: ܗܳܢܰܘ ܕܶܝܢ ܠܨܰܠܡܳܐ ܕܺܝܠܳܟ ܠܓܶܢܣܳܐ ܕܺܝܠܰܢ ܐ̱ܢܳܫܳܝܳܐ: ܘܥܰܡ ܙܳܟܽܘܬܳܐ ܪܰܒܬܳܐ ܘܢܰܨܺܝܚܬܳܐ ܢܦܰܩܬ ܡܶܢ ܩܰܒܪܳܐ ܘܶܐܬܬܰܒܰܪ ܠܶܒܳܐ ܕܰܛܪ̈ܽܘܢܶܐ ܒܥܶܠܕ̈ܒܳܒܶܐ: ܘܡܶܟܺܝܠ ܟܰܕ ܒܢܽܘܗܪܳܐ ܕܺܝܠܳܟ ܐܶܬܒܰܐܻܝܘ ܟܺܐܢ̈ܶܐ ܩܰܕ̈ܡܳܝܶܐ ܒܓܰܘ ܩܰܒܪ̈ܰܝܗܽܘܢ: ܘܒܰܩܝܳܡܬܳܐ ܕܺܝܠܳܟ ܡܶܢ ܕܰܚܺܝܚܳܐ ܐܶܬܢܰܦܰܨܘ̱: ܩܳܠܰܝ̈ ܫܽܘܒܚܳܐ ܡܰܙܥܩܺܝܢ ܗ̱ܘܰܘ ܠܳܟ ܟܰܕ ܐܳܡܪܺܝܢ ܒܚܰܕܽܘܬܳܐ ܘܒܰܪܘܳܙܳܐ ܕܡܶܢ ܠܶܒܗܽܘܢ: ܒܪܺܝܟ ܗ̱ܘ̣ ܐܺܝܩܳܪܶܗ ܕܡܳܪܝܳܐ ܡܶܢ ܐܰܬܪܶܗ ܠܥܳܠܡܺܝܢ: ܒܪܺܝܟ ܗ̱ܘ̣ ܕܶܐܬܬܰܚܬܺܝ ܡܶܛܽܠܳܬܰܢ ܘܦܰܪܩܰܢ ܒܚܰܫܳܐ ܕܰܩܢܽܘܡܶܗ: ܒܪܺܝܟ ܗ̣ܽܘ ܐܝ̣ܬܝܳܐ ܡܬܽܘܡܳܝܳܐ ܕܡܶܢ ܐܰܒܳܐ ܕܒܰܩܝܳܡܬܶܗ ܐܰܩܺܝܡ ܠܰܢ ܡܶܢ ܡܰܦܽܘܠܬܳܐ ܕܰܚܛܺܝܬܳܐ ܕܰܪܡܶܝܢ ܗ̱ܘܰܝܢ ܒܳܗ̇: ܒܪܺܝܟ ܝܳܗܽܘܒܳܐ ܕܚܰܝ̈ܶܐ ܕܰܗܘܳܐ ܡܺܝܬܳܐ ܟܰܕ ܢܛܺܝܪܺܝܢ ܚܰܝ̈ܶܐ ܒܰܩܢܽܘܡܶܗ: ܒܪܝܺܟ ܗ̱ܘ̣ ܕܰܫܒܰܩ ܡܰܪܟܰܒܬܳܐ ܕܰܟܪ̈ܽܘܒܶܐ ܕܰܕܠܐܴ ܫܶܠܝܳܐ ܡܒܰܪܟܺܝܢ ܠܶܗ ܘܰܢܚܶܬ ܕܡ̣ܶܟ ܒܓܰܘ ܩܰܒܪܳܐ ܥܰܠ ܥܰܦܪܶܗ ܕܳܐܕܳܡ: ܒܪܺܝܟ ܕܒܰܩܝܳܡܬܶܗ ܐܰܩܺܝܡ ܠܰܢ ܥܰܡܶܗ ܘܰܐܘܬܶܒ ܠܰܢ ܡܶܢ ܝܰܡܺܝܢܶܗ ܕܰܐܒܳܐ ܡܫܰܒܚܳܐ: ܒܪܺܝܟ ܗ̱ܘ̣ ܕܰܥܡܰܕ ܒܰܫܝܽܘܠ ܐܰܝܟ ܣܰܚܳܝܳܐ ܘܰܐܦܶܩ ܠܥܰܢܺܝ̈ܕܶܐ ܕܰܒܓܰܘܳܗ̇ ܚܡܺܝܠܺܝܢ ܗ̱ܘܰܘ: ܒܪܺܝܟ ܗ̱ܘ̣ ܕܙܰܝܚܽܘܗ̱ܝ ܥܺܝܪ̈ܶܐ ܘܡܰܠܐܱܟ̈ܶܐ ܒܰܩܝܳܡܬܶܗ: ܘܝܰܩܪܽܘܗ̱ܝ ܬܰܠܡܺܝ̈ܕܶܐ ܘܬܰܠܡܺܝ̈ܕܳܬܳܐ ܒܢܽܘܚܳܡܶܗ: ܒܪܺܝܟ ܗ̱ܘ̣ ܕܰܢܩܰܫ ܒܰܫܝܽܘܠ ܡܺܝ̣̈ܠܐܷ ܕܫܰܝܢܳܐ ܘܕܰܫܠܳܡܳܐ ܘܰܙܠܰܚ ܒܳܗ̇ ܣܰܒܪܳܐ ܘܦܽܘܪܩܳܢܳܐ: ܒܪܺܝܟ ܗ̱ܘ̣ ܕܰܩܪܳܝܗ̱ܝ ܠܐܴܕܳܡ ܘܰܐܥܺܝܪܶܗ ܡܶܢ ܫܶܢܬܶܗ ܘܰܐܥܒܰܪ ܡܶܢܶܗ ܓܙܳܪ ܕܺܝܢܳܐ ܕܰܥܒܳܪ ܦܽܘܩܕܳܢܳܐ ܘܦܰܢܝܶܗ ܠܰܥܕܶܝܢ ܝܳܪܬܽܘܬܶܗ: ܒܪܺܝܟ ܗ̱ܘ̣ ܕܰܐܦܢܺܝ ܛܪ̈ܺܝܕܶܐ ܠܰܥܕܶܝܢ ܝܳܪܬܽܘܬܗܽܘܢ ܘܚܰܕܺܝ ܠܥܺܝܪ̈ܶܐ ܘܡܰܠܐܱܟ̈ܶܐ ܒܦܽܘܢܳܝܗܽܘܢ: ܒܪܺܝܟ ܗ̱ܘ̣ ܕܫܰܟܶܢ ܠܰܓܒܺܝܠܬܶܗ ܕܒܶܝܬ ܐܳܕܳܡ ܟܽܠܗܝܢ ܬܡܺܝ̈ܗܳܬܳܐ ܘܣܰܒܰܥ ܣܢܺܝ̈ܩܶܐ ܡܶܢ ܡܰܘܗ̈ܒܳܬܶܗ: ܘܡܶܛܽܠ ܗܳܕܶܐ ܚܢܰܢ ܦܪ̈ܝ̣ܩܰܝ ܒܰܨܠܺܝܒܶܗ ܘܰܡܚܰܪܪ̈ܰܝ ܡܶܢ ܚܰܫ̈ܶܐ ܒܚܰܫܶܗ: ܘܰܡܫܰܘܙ̈ܒܰܝ ܡܶܢ ܡܺܝܬܽܘܬܳܐ ܒܡܰܘܬܶܗ: ܚܳܕܶܝܢܰܢ ܘܕܳܝܨܺܝܢܰܢ ܒܙܳܟܽܘܬܶܗ ܟܰܕ ܪܳܘܙܺܝܢܰܢ ܡܰܙܥܩܺܝܢܰܢ ܘܳܐܡܪܺܝܢܰܢ: ܕܩ̣ܳܡ ܐܰܠܳܗܳܐ ܡܶܢ ܩܰܒܪܳܐ ܘܰܐܩܺܝܡ ܥܰܡܶܗ ܠܓܶܢܣܰܢ ܚܰܠܳܫܳܐ ܡܶܢ ܡܰܦܽܘܠܬܳܐ ܕܰܚܛܺܝܬܳܐ: ܗܳܝ ܕܰܒܝܰܕ ܥܒܳܪ ܦܽܘܩܕܳܢܳܐ ܠܥܽܘܡܩܳܐ ܐܶܫܬܰܪܓܰܠܢܰܢ. ܘܡܶܛܽܠܗܳܕܶܐ ܬܰܟܫܶܦܬܳܐ ܠܳܟ ܡܩܰܪܒܺܝܢܰܢ: ܒܗܳܢܳܐ ܝܰܘܡܳܐ ܩܰܕܺܝܫܳܐ ܕܰܩܝܳܡܬܳܟ ܕܡܶܢ ܒܶܝܬ ܡܺܝ̈ܬܶܐ: ܕܰܬܫܰܟܶܢ ܚܰܕܽܘܬܳܐ ܠܐܴ ܡܶܫܬܰܪܝܳܢܺܝܬܳܐ ܠܥܺܕܬܳܟ ܗܳܝ ܕܰܦܪܰܩܬܳܗ̇ ܒܚܰܫ̈ܶܐ ܕܰܩܢܽܘܡܳܟ: ܒܰܪܶܟ ܠܰܒܢܶܝ̈ܗ̇ ܒܝܰܡܺܝܢܳܟ ܚܰܝܠܬܳܢܺܝܬܳܐ ܒܰܕܪܳܥܳܟ ܥܰܫܺܝܢܳܐ: ܐܰܪܺܝܡ ܩܪ̈ܳܒܶܐ ܡܶܢ ܥܰܡܳܟ: ܘܒܰܛܶܠ ܪܽܘܓܙܳܐ ܡܶܢ ܡܰܪܥܺܝܬܳܟ: ܚܬܽܘܡ ܠܥܺܕܬܳܟ ܒܢܺܝܫܶܗ ܕܰܨܠܺܝܒܳܟ ܘܢܰܛܰܪ ܠܝܰܠܕܶܝ̈ܗ̇ ܡܶܢ ܦܰܚܰܘ̈ܗ̱ܝ ܘܨܶܢܥܳـ̈ܬܶܗ ܕܰܢܟܺܝܠܐܴ: ܘܢܶܬܚ̈ܰܠܛܳܢ ܙܡܺܝܪ̈ܳܬܳܐ ܕܺܝܠܗܽܘܢ ܥܰܡ ܓܽܘ̈ܕܶܐ ܘܣܶܕܪ̈ܶܐ ܕܺܝܠܳܟ ܢܰܨܺܝ̈ܚܶܐ: ܢܶܬܥܰܛܦܽܘܢ ܪ̈ܳܥܰܘܳܬܳܐ ܬܰܨܒܺܝܬܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ: ܘܰܢܗܰܕܽܘܢ ܘܢܶܪܥܽܘܢ ܠܡܰܪ̈ܥܝܳܬܳܐ ܕܺܝܠܗܽܘܢ ܥܰܠ ܡܰܪ̈ܓܶܐ ܥܰܫܺܝ̈ܢܶܐ ܘܗܰܢܺܝ̈ܶܐܐ ܕܬܶܐܘܳܪ̈ܺܝܰܐܣ ܕܺܝܠܳܟ ܐܰܠܳܗܳܝ̈ܳܬܳܐ: ܘܥܰܠ ܟܽܠ ܬܶܓܡܺܝ̈ܢ ܕܰܡܗܰܝ̈ܡܢܶܐ ܕܒܳܗ̇ ܫܰܝܢܳܐ ܘܰܫܠܳܡܳܐ ܕܡܶܢܳܟ ܢܰܡܠܶܟ: ܐܰܝܟܰܢܳܐ ܕܡܶܢ ܚܰܝܷ̈ܐ ܕܰܦ̣ܪܰܩܬ ܒܰܨܠܺܝܒܳܟ: ܘܡܶܢ ܡܺܝ̈ܬܶܐ ܕܰܐܚܺܝܬ ܒܡܰܘܬܳܟ: ܘܡܶܢ ܥܓܺܝ̈ܢܶܐ ܕܚܰܪܰܪܬ ܒܢܽܘܚܳܡܳܟ: ܬܶܫܒܽܘܚܬܳܐ ܘܬܰܘܕܺܝܬܳܐ ܬܶܣܰܩ ܠܳܟ ܡܳܪܝ̱ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܡܝ̣ܢ܀

ܥܶܛܪܳܐ

ܣܳܓܕܺܝܢܰܢ ܠܳܟ ܐܰܠܳܗܳܐ ܡܳܪܰܢ ܝܶܫܽܘܥ ܡܫܺܝܚܳܐ ܚܰܝ̈ܶܐ ܫܰܪܺܝܪ̈ܶܐ ܘܠܐܴ ܡܶܬܚܰܒܠܳܢ̈ܶܐ ܕܰܒܝܰܕ ܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ ܪܺܝܚܳܐ ܒܰܣܺܝܡܳܐ ܕܠܐܴ ܡܳܝܽܘܬܽܘܬܳܐ ܙܪܰܥܬ ܒܰܢ: ܘܟܰܕ ܠܰܩܝܳܡܬܳܟ ܣܳܓܕܺܝܢܰܢ ܘܰܡܫܰܒܚܺܝܢܰܢ: ܩܰܒܶܠ ܐܳܦ ܗܳܫܳܐ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܡܶܢ ܡܚܺܝܠܽܘܬܰܢ ܐܶܬܩܰܪܰܒ ܠܳܟ: ܒܝܽܘܡ ܥ̱ܽܘܗܕܳܢܳܐ ܪܚܺܝܡܳܐ ܕܰܩܝܳܡܬܳܟ: ܟܰܕ ܝܳܗܶܒ ܐܰܢ̱ܬ ܠܰܢ ܓܰܠܝܽܘܬ ܐܰܦ̈ܶܐ ܫܰܪܺܝܪܬܳܐ: ܘܚܽܘܣܳܝܳܐ ܕܟܽܠܗܶܝܢ ܣܰܢ̈ܝܳܬܰܢ: ܐܰܝܟܰܢܳܐ ܕܕܰܟܝܳܐܝ̣ܬ ܢܥܰܕܥܶܕ ܠܰܩܝܳܡܬܳܟ: ܘܰܢܫܰܒܰܚ ܠܐܱܠܳܗܽܘܬܳܟ ܠܥܳܠܡܝ̣ܢ܀

ܚܽܘܬܳܡܳܐ

ܬܰܪܥܳܐ ܕܚܰܝ̈ܶܐ ܕܒܶܗ ܥܶܠܰܬ݀ ܥܳܢ̈ܳܐ ܛܳܥܺܝܬܳܐ ܠܐܱܬܪܳܐ ܕܚܰܝ̈ܶܐ: ܘܒܶܗ ܐܶܬܦܰܢܝܰܬ݀ ܓܳܠܽܘܬܳܐ ܕܥܰܡ̱̈ܡܶܐ ܠܰܠܡܺܐܢܳܐ ܕܫܰܝܢܳܐ ܘܕܰܫܠܳܡܳܐ: ܒܳܟ ܢܶܫܬܘܶܐ ܠܰܩܝܳܡܬܳܐ ܦܨܺܝܚܬܳܐ ܕܡܶܢ ܒܶܝܬ ܡܺܝ̈ܬܶܐ: ܘܒܳܟ ܢܶܬܦܢܶܐ ܠܐܱܬܪܳܐ ܕܺܝܠܰܢ ܩܰܕܡܳܝܳܐ ܕܰܐܢ̱ܬ ܐܝ̣ܬܝܟ ܕܰܐܩܺܝܡܬ ܡܰܦܽܘܠܬܰܢ ܒܰܩܝܳܡܬܳܟ: ܘܬܰܪܶܨܬܳܗ̇ ܠܰܟܦܺܝܦܽܘܬܰܢ ܒܢܽܘܚܳܡܳܟ: ܘܠܳܟ ܫܽܘܒܚܳܐ ܡܰܣܩܺܝܢܰܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀