ܦܪܽܘܡܝܽܘܢ

ܬܶܫܒܘ̣ܚܬܳܐ ܠܗܰܘ ܠܳܐ ܡܒܰܣܪܳܐ ܕܐܶܬܒܰܣܰܪ ܘܠܰܟܝܳܢܰܢ ܐܰܣܶܩ ܥܰܡܶܗ ܠܪ̈ܰܘܡܶܐ ܥܶܠܳܝ̈ܶܐ: ܘܚܰܪܪܶܗ ܡܶܢ ܥܰܒܕܘ̣ܬܶܗ ܕܣܳـܛܳܢܳܐ ܒܝܰܕ ܣܘ̣ܠܳܩܶܗ ܕܠܰܫܡܰܝܳܐ: ܠܗܰܘ ܕܰܠܥܶܠ ܡܶܢ ܛܶܟ̈ܣܶܐ ܘܬܶܓ̈ܡܶܐ ܕܰܟܪ̈ܘ̣ܒܶܐ ܘܕܰܣܪ̈ܳܦܶܐ ܐܶܬܥܰܠܝ̣: ܘܟܽܠ ܚܰܕ ܡܶܢ ܗܰܘ̈ܢܶܐ ܩܰܒܠܶܗ ܘܙܰܝـܚܶܗ ܥܕܰܡܳܐ ܠܰܐܬܪܳܐ ܕܝ̣ܠܶܗ: ܘܦܳܫܘ̱ ܡܶܢܶܗ ܟܰܕ ܬܰܗܝ̣ܪܝ̣ܢ ܘܰܡܫܰܒܚܝ̣ܢ: ܗܰܘ ܕܡܰܠܰܐܟ̈ܶܐ ܚܕܝ̣ܘ ܒܣܘ̣ܠܳܩܶܗ ܒܗܳܝ ܕܐܶܬܚܰܝܰܕ ܠܰܐܪ̈ܥܳܢܶܐ ܘܐܶܫܬܰܝܢܰܬ ܪܓܝ̣ܙܘ̣ܬܳܐ ܕܒܰܡܨܰܥܬܳܐ: ܠܗܰܘ ܕܠܳܐ ܡܠܰܐܟ̈ܶܐ ܘܠܳܐ ܫܘ̣ܠܛܳܢ̈ܶܐ ܘܠܳܐ ܚܰܝ̈ܠܶܐ ܘܠܳܐ ܡܳܪ̈ܰܘܳܬܳܐ ܐܰܪܓܶܫܘ̱ ܒܡܰܚܰܬܬܶܗ: ܒܣܘ̣ܠܳܩܶܗ ܕܶܝܢ ܡܫܰܒܚܝ̣ܢ ܗ̱ܘܰܘ ܟܕ ܐܳܡܪܝ̣ܢ: ܫܰܒܰܚܘ̱ ܠܡܳܪܝܳܐ ܕܚܰܝ̈ܠܰܘܳܬܳܐ ܕܗܘ̣ܝܽܘ̣ ܡܰܠܟܳܐ ܕܬܶܫܒܘ̣ܚܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܐܰܠܳܗܳܐ ܡܶܠܬܳܐ ܕܐܰܒܳܐ ܡܬܘ̣ܡܳܝܳܐ: ܗܰܘ ܕܐܶܬܡܰܠܰܠ ܐ̱ܪܳܙܳܢܳܐܝ̣ܬ ܡܶܢ ܢܒܺܝ̈ܶܐ: ܘܐܶܬܟܪܶܙ ܓܰܠܝܳܐܝ̣ܬ ܡܶܢ ܫܠܝ̣ܚ̈ܶܐ ܩܰܕܝ̣̈ܫܶܐ: ܡܰܠܟܳܐ ܕܡܰܠܰܐܟ̈ܶܐ ܡܫܡܫܝ̣ܢ ܠܐܝ̣ܩܳܪܶܗ ܘܡܳܪܳܐ ܕܡܳܪ̈ܰܘܳܬܳܐ ܡܙܰܝܚܝ̣ܢ ܠܗ: ܗܰܘ ܕܚܰܕܝ̣ ܠܰܐܪ̈ܥܳܢܶܐ ܒܡܰܚܰܬܬܶܗ ܘܐܰܬܗܰܪ ܠܰܫܡܰܝ̈ܳܢܶܐ ܒܡܰܣܰܩܬܶܗ: ܟܰܕ ܠܳܐ ܡܬܘ̣ܡ ܫܒܰܩ ܘܐܰܪܦܝ̣ ܟܘ̣ܪܣܝܳܐ ܕܬܶܫܒܘ̣ܚܬܶܗ: ܗܰܘ ܕܰܒܪ̈ܰܚܡܰܘܗ̱ܝ ܠܳܐ ܡܶܬܡܰܠ̈ܠܳܢܶܐ ܬܰܚܬܝ̣ ܝܳܬܶܗ ܠܦܘ̣ܪܩܳܢܳܐ ܕܰܓܒܝ̣ܠܬܶܗ: ܘܠܰܢ ܗܳܢܘܢ̇ ܕܰܒܚܶܫܘ̣ܟܳܐ ܘܰܒܛܶܠ̈ܳܠܰܝ ܡܰܘܬܐ ܝܳܬܒܝ̣ܢ ܗ̱ܘܰܝܢ ܦܪܰܩ: ܘܢܘ̣ܗܪܳܐ ܪܰܒܳܐ ܕܢܰܚ ܠܰܢ ܒܡܶܐܬܝ̣ܬܶܗ܆ ܘܡܶܢ ܕܰܣܥܰܪ ܟܽܠܳܗ̇ ܡܕܰܒܪܳܢܘ̣ܬܶܗ ܦܰܓܪܳܢܳܐܝ̣ܬ ܐܶܬܥܰܠܝ̣ ܠܘܳܬ ܫܳܠܘ̣ܚܶܗ: ܘܰܠܟܽܠܗܘܢ̇ ܚܰܝ̈ܠܰܘܳܬܳܐ ܥܶܠܳܝ̈ܶܐ ܐܰܬܗܰܪ ܒܡܰܣܰܩܬܶܗ: ܕܰܚܙܰܘ ܠܗܰܘ ܡܶܠܬܳܐ ܐܰܠܳܗܳܐ ܘܐܰܒܳܐ: ܠܗܰܘ ܕܐܳܕܳܡ ܕܰܬܪܶܝܢ ܐܶܬܟܰܢܝ̣: ܠܗܰܘ ܡܳܪܳܗ̇ ܕܬܶܫܒܘ̣ܚܬܳܐ: ܠܗܰܘ ܫ̇ܘܶܐ̣ ܒܽܐܘܣܺܝܰܐ ܠܰܐܠܳܗܳܐ ܐܰܒܳܐ ܕܦܰܓܪܳܢܳܐܝ̣ܬ ܐܶܣܬܰܠܰܩ ܟܰܕ ܚܰܝ̈ܠܰܘܳܬܳܐ ܡܰܢ ܡܰܠܰܐܟ̈ܳܝܶܐ ܡܰܙܥܩܝ̣ܢ ܘܐܳܡܪܝ̣ܢ: ܐܰܪܝ̣ܡܘ̱ ܬܰܪ̈ܥܶܐ ܪ̈ܝ̣ܫܶܐ ܕܝ̣ܠܟܘܢ̇ ܕܢܶܥܘ̣ܠ ܡܰܠܟܳܐ ܕܐܝ̣ܩܳܪ̈ܶܐ: ܡܶܛܽܠ ܗܳܕܶܐ ܒܬܶܗܪܳܐ ܥܝ̣ܪ̈ܶܐ ܡܫܰܐܠܝ̣ܢ ܗ̱ܘܰܘ ܕܡܰܢܘ̣ ܗܳܢܳܐ ܡܰܠܟܳܐ ܕܬܶܫܒܘ̣ܚܬܳܐ: ܢܒܺܝ̈ܶܐ ܕܶܝܢ ܩܳܥܝܢ ܗ̱ܘܰܘ ܕܡܳܪܝܳܐ ܚܰܝܠܬܳܢܳܐ ܘܥܰܫܝ̣ܢܳܐ ܘܰܩܪܰܒܬܳܢܳܐ ܐܝ̣ܬܰܘܗ̱ܝ: ܗܰܘ ܕܰܣܠܶܩ ܠܰܫܡܰܝܳܐ ܒܫܘ̣ܒܚܳܐ ܘܙܰܘܚܳܐ ܕܙܳܟܘ̣ܬܳܐ ܠܰܡܪܰܘܡܳܐ ܘܰܫܒܳܐ ܫܒܝ̣ܬܶܗ ܡܶܢ ܒܥܶܠ̈ܕܒܳܒܰܘܗ̱ܝ ܘܥܰܡܶܗ ܐܰܣܩܳܗ̇ ܠܰܫܡܰܝܳܐ ܘܡܶܢ ܝܰܡܝ̣ܢܳܐ ܕܐܰܒܳܐ ܕܝ̣ܠܶܗ ܐܰܘܬܒܳܗ̇: ܠܳܟ ܗܳܟܝ̣ܠ ܘܰܩܕܳܡܰܝܟ ܡܳܪܝܳܐ ܡܩܰܪܒܝ̣ܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܒܝܰܘܡܳܐ ܗܳܢܳܐ ܩܰܕܝ̣ܫܳܐ ܕܣܘ̣ܠܳܩܳܟ ܫܒܝ̣ܚܳܐ ܘܰܡܠܶܐ ܬܶܗܪܳܐ: ܡܶܛܽܠ ܕܒܰܡܕܰܒܪܳܢܘ̣ܬܳܐ ܕܝ̣ܠܳܟ ܦܪܰܩܬ ܘܫܰܘܙܶܒܬ ܘܚܰܪܰܪܬ ܠܰܢ: ܘܰܒܝܰܕ ܣܘ̣ܠܳܩܳܟ ܬܡܝ̣ܗܳܐ ܐܰܣܶܩܬ ܘܐܰܘܬܶܒܬ ܠܰܢ ܒܫܘ̣ܒܚܳܐ ܥܰܡܳܟ ܡܶܢ ܝܰܡܝ̣ܢܶܗ ܕܐܰܒܘ̣ܟ: ܕܥܰܡܗܘܢ̇ ܕܚܰܝ̈ܠܰܘܳܬܳܐ ܓܢܝ̣̈ܙܶܐ ܘܩܰܕܝ̣̈ܫܶܐ ܕܰܠܥܶܠ: ܘܥܰܡ ܓܘ̣̈ܕܶܐ ܩܰܕܝ̣̈ܫܳܬܳܐ ܕܰܢܒܺܝ̈ܶܐ ܘܕܰܫܠܝ̣ܚ̈ܶܐ ܢܙܰܡܰܪ ܘܢܺܐܡܰܪ: ܕܚܰܝ̈ܶܐ ܡܰܢ ܐܝ̣ܬܰܝܟ ܡܶܛܽܠ ܕܒܳܟ ܚܝܰܝܢܰܢ ܡܶܢ ܡܝ̣ܬܘ̣ܬܳܐ ܕܰܚܛܝ̣ܬܳܐ: ܘܢܘ̣ܗܪܳܐ ܡܰܢ ܐܝ̣ܬܰܝܟ ܡܶܛܽܠ ܕܒܳܟ ܐܶܬܢܰܗܰܪܢܰܢ ܚܢܰܢ ܗܳܢܘܢ̇ ܕܰܒܚܶܫܘ̣ܟܳܐ ܘܰܒܛܶܠܳܠ̈ܰܝ ܡܰܘܬܳܐ ܝܳܬܒܝ̣ܢ ܗ̱ܘܰܝܢ: ܘܐܘ̣ܪܚܳܐ ܡܰܢ ܘܬܰܪܥܳܐ ܐܝ̣ܬܰܝܟ ܡܶܛܽܠ ܕܒܳܟ ܗܦܰܟܢܰܢ ܘܗܰܠܶܟܢܰܢ ܠܘܳܬ ܒܰܝܬܳܝܽܘܬܳܐ ܛܘ̣ܒܬܳܢܝ̣ܬܳܐ ܘܰܫܡܰܝܳܢܝ̣ܬܳܐ ܕܐܰܒܳܐ ܕܝ̣ܠܳܟ ܫܡܰܝܳܢܳܐ: ܘܗܳܫܳܐ ܟܰܕ ܠܚܰܫ̈ܶܐ ܕܝ̣ܠܳܟ ܩܰܕܺܝ̣̈ܫܶܐ ܘܡܰܥܒ̈ܕܰܝ ܚܰܝ̈ܶܐ ܡܰܥ̱ܗܕܝ̣ܢܰܢ ܩܕܳܡܰܝܟ ܡܳܪܰܢ ܣܰܓܝ̣ ܪ̈ܰܚܡܶܐ: ܚܘ̣ܣܳܝܳܐ ܕܚܰܘܒܰܝ̈ܢ ܘܫܘ̣ܒܩܳܢܳܐ ܕܰܚܛܳܗܰܝ̈ܢ ܘܰܕܣܰܟܠ̈ܘܳܬܰܢ ܬܳܒܥܝ̣ܢܰܢ: ܘܰܦܝܳܣܳܐ ܠܛܰܝܒܘ̣ܬܳܟ ܡܩܰܪܒܝ̣ܢܰܢ ܕܠܳܐ ܬܰܗܡܶܐ ܡܶܢ ܫܰܦܝ̣ܪܘ̣ܬ ܣܳܥܘ̣ܪ̈ܘܳܬܳܟ ܕܰܠܘܳܬܰܢ: ܕܡܶܢ ܟܽܠܗܶܝܢ ܐܰܝܠܶܝܢ ܕܰܡܥܰܕܪ̈ܳܢ ܘܰܡܫܰܘ̈ܙܒܳܢ ܠܚܰܝ̈ܶܐ ܕܝ̣ܠܰܢ ܕܳܘ̈ܰܝܳܐ ܕܰܒܥܳܠܡܳܐ ܗܳܢܳܐ ܕܥܳܩ̈ܳܬܳܐ: ܐܶܠܐ ܚܰܝܶܕ ܘܚܰܠܶܛ ܘܫܰܘܬܶܦ ܠܰܟܢܽܘ̣̈ܫܳܬܳܐ ܕܩܰܕܝ̣̈ܫܶܐ ܕܝ̣ܠܳܟ: ܗܳܢܘܢ̇ ܕܪܘ̣ܚܳܢܳܐܝ̣ܬ ܘܩܰܕܝ̣ܫܳܐܝ̣ܬ ܡܥܰܕܥܕܝ̣ܢ ܠܳܟ ܒܥܺܐܕܳܟ ܗܰܘ ܠܳܐ ܡܫܬܰܪܝܳܢܳܐ ܘܰܕܠܳܐ ܦܳܛܰܪ: ܐܰܝܟܳܐ ܕܚܰܕ̈ܘܳܬܳܐ ܠܳܐ ܡܶܬܡܰܠ̈ܠܳܢܝܳܬܳܐ ܫܟܝ̣̈ܚܳܢ ܘܬܶܫܒܚ̈ܳܬܳܐ ܘܬܰܘܕ̈ܝܳܬܳܐ ܕܠܳܐ ܫܰܠܘܳܐ ܡܶܬܩܰܪ̈ܒܳܢ ܠܳܟ: ܐܰܝܟܳܐ ܕܒܘ̣ܣܳܡܳܐ ܠܳܐ ܡܶܣܬܰܒܥܳܢܳܐ ܠܕܳܚ̈ܠܰܝ ܫܡܳܟ ܢܛܝ̣ܪ ܘܰܠܥܳܒ̈ܕܰܝ ܨܶܒܝܳܢܳܟ ܬܡܳܢ ܚܰܕܳܐ ܘܐܰܦܨܰܚ ܠܰܢ: ܒܢܘ̣ܗܪܳܐ ܫܒܝ̣ܚܳܐ ܕܦܰܪܨܽܘ̣ܦܳܟ ܒܡܰܠܟܘ̣ܬܳܟ ܫܡܰܝܳܢܝ̣ܬܳܐ ܒܰܡܕܺܝ̣ܢ̱ܬܳܐ ܕܺܝ̣ܠܳܟ ܗܳܝ ܪܘ̣ܚܳܢܳܝܬܳܐ ܒܥܳܠܡܳܐ ܕܝ̣ܠܳܟ ܗܰܘ ܡܬܘ̣ܡܳܝܳܐ ܘܰܕܠܳܐ ܥܳܒܰܪ: ܐܰܝܟܰܢܳܐ ܕܰܢܫܰܒܰܚ ܘܰܢܙܰܡܰܪ ܠܳܟ ܦܳܪܘ̣ܩܶܗ ܕܓܶܢܣܰܢ ܘܠܰܐܒܘ̣ܟ ܕܨܳܒܶܐ ܒܦܘ̣ܪܩܳܢܰܢ: ܘܰܠܪܘ̣ܚܳܟ ܩܰܕܝ̣ܫܳܐ ܡܚܰܣܝܳܢܳܐ ܕܒܘ̣ܨܳܪ̈ܰܝܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀