ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܢ̇ܶܚܰܫ ܒܚܰܫܳܟ ܕܰܚܠܳܦܰܝܢ: ܘܰܕܢ̇ܶܬܕܰܡܶܐ ܒܡܘ̣ܟܳܟܳܟ ܕܡܶܛܽܠܳܬܰܢ: ܘܰܕܢܶܫ̇ܬܰܒܗܰܪ ܒܰܙܩܝ̣ܦܳܟ ܕܥܰܠ ܐܰܦܰܝ̈ܢ: ܘܰܕܢ̇ܶܬܰܐܣܶܐ ܒܫܘ̣̈ܡܳܬܳܟ ܕܰܚܠܳܦ ܦܘ̣ܪܩܳܢܰܢ: ܘܰܕܢ̇ܺܚܶܐ ܒܡܰܘܬܳܟ ܡܢܰܚܡܳܢܳܐ ܕܡܝ̣ܬܘ̣ܬܰܢ: ܐܰܝܟܰܢܳܐ ܕܥܰܡܳܟ ܢܶܚ̇ܕܶܐ ܘܰܢ̇ܕܽܘ̣ܨ ܘܢ̇ܶܬܒܰܣܰܡ ܒܰܩܝܳܡܬܳܟ ܡܰܦܨܚܳܢܝ̣ܬܳܐ ܕܰܟܡܝ̣ܪܘ̣ܬܰܢ: ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܠܳܐ ܚܳܫܘ̣ܫܳܐ ܒܐܝ̣ܬܘ̣ܬܶܗ ܕܐܶܬ̣ܳܐ ܠܚܰܫܳܐ ܨܶܒܝܳܢܳܝܳܐ ܕܡܶܬܒܰܪܢܫܳܢܘ̣ܬܶܗ: ܕܠܰܢ ܢܶܥ̣ܒܶܕ ܠܳܐ ܚܳܫܘ̣̈ܫܶܐ ܘܠܳܐ ܡܳܝܘ̣̈ܬܶܐ: ܘܰܒܝܰܕ ܚܰܫܳܐ ܕܝ̣ܠܶܗ ܣ̣ܰܕܶܩ ܠܶܐܫܛܳܪ ܚܰܘ̈ܒܳܬܰܢ: ܘܠܳܐ ܚܳܫܘ̣ܫܘ̣ܬܳܐ ܙܰܡ̣ܶܢ ܠܓܶܢܣܳܐ ܕܝ̣ܠܰܢ ܚܳܫܘ̣ܫܳܐ ܘܫ̣ܰܝܶܢ ܠܥܶܠܳܝ̈ܶܐ ܥܰܡ ܬܰܚ̈ܬܳܝܶܐ ܒܝܰܕ ܚܰܫܰܘ̈ܗ̱ܝ ܩܰܕܝ̣̈ܫܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܡܪܰܚܡܳܢܳܐ ܘܣܰܓܝ̣ ܛܰܝܒܘ̣ܬܳܐ ܘܩܘ̣ܫܬܳܐ: ܚܰܢܳܢܳܐ ܕܶܝܢ ܘܚܰܝܘ̣ܣܬܳܢܳܐ ܘܢܰܓܝ̣ܪ ܪܘ̣ܚܳܐ ܘܪܳܚܶܡ ܒܢܰܝ̈ܢܳܫܳܐ: ܗܰܘ̇ ܕܚܝ̣ܠܳܐ ܕܐܶܬܗ̣ܰܦܰܟ ܥܰܡ ܒܢܰܝ̈ܢܳܫܳܐ ܡܕܰܒܪܳܢܳܐܝ̣ܬ ܘܚ̣ܰܫ ܒܰܒܣܰܪ ܒܨܶܒܝܳܢܶܗ ܡܶܛܽܠ ܦܘ̣ܪܩܳܢܰܢ: ܟܰܕ ܒܰܟܝܳܢܶܗ ܠܳܐ ܚܳܫܘ̣ܫܳܐ ܐܝ̣ܬܰܘܗ̱ܝ ܘܰܡܥܰܠܝܳܐ ܡ̣ܶܢ ܚܰܫ̈ܶܐ: ܘܐܰܠ̣ܶܦ ܠܰܢ ܕܰܠܚܰܫ̈ܶܐ ܕܰܚܛܝ̣ܬܳܐ ܢ̇ܕܰܟܶܐ ܘܢܶܡ̇ܪܘ̣ܩ ܡ̣ܶܢ ܢܰܦ̈ܫܳܬܰܢ ܘܠܳܐ ܢܶܫ̇ܬܰܥܒܰܕ ܠܚܰܫ̈ܶܐ ܕܰܚܛܝ̣ܬܳܐ: ܘܡܶܛܽܠ ܕܰܒܚܰܫܰܘ̈ܗ̱ܝ ܐܶܬܦܪܶܩ̣ܢܰܢ ܘܰܒܡܰܚ̈ܘܳܬܶܗ ܐܶܬܰܐܣܝ̣ܢܰܢ ܘܰܒܫܘ̣̈ܡܳܬܶܗ ܐܶܬܚ̣ܰܪܰܪܢܰܢ: ܣܳܓ̇ܕܝܢܰܢ ܘܡܰܘ̇ܕܶܝܢܰܢ ܠܶܗ ܘܠܐܘ̣ܪܥܳܐ ܕܝ̣ܠܶܗ ܣܳܘ̇ܚܝ̣ܢܰܢ: ܘܒܰܦܨܝ̣ܚܘ̣ܬܳܐ ܡܰܙܥܩܝ̣ܢܰܢ ܘܐܳܡ̇ܪܝ̣ܢܰܢ: ܬܳܐ ܒܰܫܠܳܡܳܐ ܚܰܫܳܐ ܦܳܪܘ̣ܩܳܝܳܐ ܕܐܰܢ̱ܬ ܫܰܘܙܶܒ̣ܬ ܠܰܢ ܡ̣ܶܢ ܚܰܫ̈ܶܐ ܫܟܝ̣ܪ̈ܶܐ ܕܰܚܛܝ̣ܬܳܐ: ܬܳܐ ܒܰܫܠܳܡܳܐ ܚܰܫܳܐ ܦܳܪܘ̣ܩܳܝܳܐ ܕܐܰܠܳܗܰܢ: ܕܒܳܟ ܐܶܫܟܰܚ̣ܢܰܢ ܚܰܝ̈ܶܐ ܚ̣ܰܕ̈ܬܶܐ ܕܠܳܐ ܣܳܐܒܝ̣ܢ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܕܐܰܠܳܗܰܢ: ܕܓܰܙܳܐ ܕܟܽܠ ܛܘ̣ܒܝ̣̈ܢ ܪ̈ܘ̣ܚܳܢܳܝܶܐ ܦܬܰܚܬ ܠܰܢ ܩܕܳܡܰܝܢ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ ܕܐܰܠܳܗܰܢ: ܕܕܘ̣ܟܳܝܳܐ ܕܡ̣ܶܢ ܙܰܗܡܘ̣ܬܳܐ ܕܰܫܟܝ̣ܪ̈ܳܬܳܐ ܐܰܩܢܝ̣ܬ ܠܰܢ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ ܕܐܰܠܳܗܰܢ ܕܰܗ̣ܘܰܝܬ ܠܰܢ ܐܘ̣ܪܚܳܐ ܘܰܫܒܝ̣ܠܳܐ ܕܡܰܘ̇ܒܶܠ ܠܡܰܠܟܘ̣ܬܳܐ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ ܕܐܰܠܳܗܰܢ: ܕܘܰܥܕܳܐ ܕܟܽܠܗܶܝܢ ܛܳܒ̈ܳܬܳܐ ܒܳܟ ܐܶܬܘܰܥ̣ܰܕ ܠܰܢ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ ܕܰܡܫܝ̣ܚܳܐ ܕܙܰܝܢܳܐ ܕܦܘ̣ܪܩܳܢܳܐ ܕܦܝ̣ܪܡܳܐ ܡܪܰܥܝܳܢܳܐ ܗ̣ܘܰܝܬ ܠܰܢ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ ܘܡܰܥܒܶܕ ܚܰܝ̈ܶܐ ܕܚܰܘܒܬܳܐ ܕܚܳܒ̣ܢܰܢ ܒܰܥܒܳܪ ܦܘ̣ܩܕܳܢܳܐ ܒܳܟ ܐܶܬܦ̣ܰܪܥܰܬ݀ : ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ ܕܐܰܠܳܗܰܢ ܕܛܘ̣ܥܝܰܝ ܕܣܳܛܳܢܳܐ ܒܳܟ ܐܶܣܬܰܚ̣ܦܰܬ݀: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ ܕܰܡܫܝ̣ܚܳܐ ܕܝܰܘܡܳܢܳܐ ܒܟܽܠ ܦܶܢܝ̈ܳܢ ܐܰܝܟ ܡܰܠܟܳܐ ܡܶܙܕܰܝܰܚ ܐܰܢ̱ܬ ܡ̣ܶܢ ܟܽܠܗܽܘܢ ܥܰܡ̱̈ܡܶܐ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܡܰܥܒܶܕ ܚܰܝ̈ܶܐ ܕܐܰܠܳܗܰܢ ܕܟܺܐܒ̈ܶܐ ܘܟܘ̣ܪ̈ܗܳܢܶܐ ܕܐ̱ܢܳܫܘ̣ܬܰܢ ܒܳܟ ܐܶܬܰܐܣܝ̣ܘ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ: ܕܰܠܡܺܐܢܳܐ ܕܫܰܝܢܳܐ ܗ̣ܘܰܝܬ ܠܰܢ ܡ̣ܶܢ ܓܰܠ̱̈ـܠܶܐ ܘܟܺܐܡܘ̣̈ܢܶܐ ܕܰܚܛܝ̣ܬܳܐ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܡܰܥܒܶܕ ܚܰܝ̈ܶܐ ܕܡܘ̣ܡܰܝ̈ܢ ܘܣܘ̣ܪ̈ܚܳܢܰܝܢ ܒܳܟ ܐܶܬ̣ܕܰܟܝ̣ܘ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ ܕܣܘ̣̈ܛܡܶܐ ܘܦܳܣܶܩ̈ܝܳܬܳܐ ܕܰܚ̈ܛܳܗܶܐ ܕܰܥܠܰܝܢ ܒܳܟ ܐܶܬܦܰܣ̣ܰܩܘ̱: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ ܕܥܘ̣ܕܪ̈ܳܢܶܐ ܕܟܽܠ ܫܘ̣ܚ̈ܠܳܦܝ̣ܢ ܡܶܢܳܟ ܐܶܫ̣ܬܰܟܰܢܘ̱ ܠܰܢ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ: ܕܦܝ̣ܪܡܳܐ ܡܪܰܥܝܳܢܳܐ ܗ̣ܘܰܝܬ ܠܰܐܒܳܐ ܡܶܛܽܠܳܬܰܢ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ: ܕܨܰܠܡܶܗ ܕܐܳܕܳܡ ܒܳܟ ܩܢ̣ܐ ܚܘ̣ܕܳܬܳܐ ܡܶـܼܢܕܪܝ̣ܫ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ: ܕܥܘ̣ܕܪ̈ܳܢܶܐ ܕܟܽܠ ܩܰܕܝ̣̈ܫܶܐ ܐܶܬܰܝ̈ ܠܰܢ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ: ܕܩܰܕܝ̣ܫܘ̣ܬܳܐ ܘܙܰܕܝ̣ܩܘ̣ܬܳܐ ܒܳܟ ܩܢ̣ܰܝܢܰܢ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ: ܕܪܘ̣ܡܪܳܡܳܐ ܕܡ̣ܶܢ ܐܰܪܥܳܐ ܠܰܫܡܰܝܳܐ ܒܳܟ ܐܶܬܝ̣ܗܶܒ ܠܰܢ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ: ܕܫܰܝܢܳܐ ܥܰܡ ܫܡܰܝ̈ܳܢܶܐ ܒܳܟ ܗ̣ܘܳܐ ܠܰܢ: ܬܳܐ ܒܰܫܠܳܡܳܐ ܚܰܫܳܐ ܩܰܕܝ̣ܫܳܐ ܘܦܳܪܘ̣ܩܳܝܳܐ: ܕܬܰܪܥܳܐ ܗܰܘ̇ ܕܐܶܚ̣ܰܕ ܐܳܕܳܡ ܒܰܥܒܳܪ ܦܘ̣ܩܕܳܢܳܐ ܒܳܟ ܐܶܬܦ̣ܬܰܚ ܠܰܢ: ܘܗܳܫܳܐ ܒܳܥܶܝܢܰܢ ܘܡܶܬ̣ܟܰܫܦܝ̣ܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܠܳܟ ܡܫܝ̣ܚܳܐ ܐܰܠܳܗܰܢ ܕܚܰܫ̣ܬ ܚܠܳܦܰܝܢ ܒܰܒܣܰܪ ܨܶܒܝܳܢܳܐܝ̣ܬ: ܕܬܰܫ̣ܘܶܐ ܠܰܢ ܕܢܶܠ̇ܒܫܝ̣ܘܗ̱ܝ ܠܚܰܫܳܟ ܘܢ̇ܶܛܥܢܝ̣ܘܗ̱ܝ ܠܨܰܥܪܳܟ ܘܢ̇ܶܬܕܰܡܶܐ ܒܡܘ̣ܟܳܟܳܟ: ܘܢܶܫ̇ܬܰܒܗܰܪ ܒܰܙܩܝ̣ܦܳܟ: ܘܢ̣ܶܬܚܰܣ̈ܝܳܢ ܢܰܦ̈ܫܳܬܰܢ ܒܰܚܢܳܢܳܟ: ܘܢ̇ܶܗܘܶܐ ܙܡܝ̣̈ܢܶܐ ܒܰܚܠܘ̣ܠܳܟ: ܘܰܚܕܘ̣̈ܓܶܐ ܒܡܶܫܬܘ̣ܬܳܟ: ܘܰܚܢܰܢ ܘܥܰܢܝ̣̈ܕܰܝܢ ܢ̇ܩܘ̣ܡ ܡ̣ܶܢ ܝܰܡܝ̣ܢܳܟ ܘܢܶܚ̇ܙܶܐ ܚܢܳܢܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܒܰܪܶܟܡܳܪܝ̱܀

ܥܶܛܪܳܐ

ܩܰܒܶܠ ܡܳܪܝ̱ ܒܰܚܢܳܢܳܟ ܦܝ̣ܪܡܳܐ ܕܥܺܕܬܳܟ ܩܰܕܝ̣ܫܬܳܐ: ܘܐܶܬܪܰܥܳܐ ܒܬܰܟܫ̈ܦܳܬܳܐ ܕܥܳܢ̈ܳܟ ܡܠܝ̣ܠܬܳܐ ܕܰܠܚܰܫܰܝ̈ܟ ܣܳܓ̇ܕܳܐ ܘܰܡܫܰܒܚܳܐ: ܘܰܠܫܘ̣̈ܡܳܬܳܟ ܡܚܰܒܒܳܐ ܘܰܡܥܰܦܩܳܐ ܘܒܰܨܠܝ̣ܒܳܟ ܚܳܕܝܳܐ ܘܡܶܫ̣ܬܰܒܗܪܳܐ: ܪܰܡܪܶܡ ܩܰܪܢܳܗ̇ ܒܟܽܠ ܦܶܢܝ̈ܳܢ ܕܐܰܡܝ̣ܢܳܐܝ̣ܬ ܬܩ̣ܰܪܶܒܝ̱ ܠܳܟ ܦܺܐܪ̈ܶܐ ܚܠ̈ܰܝܳܐ ܕܬܰܘܕܝ̣ܬܳܐ ܚܠܳܦ ܚܰܪ̈ܘ̣ܒܶܐ ܕܟܳܦܘ̣ܪܘ̣ܬܳܐ ܕܐܰܘܫ̣ܛܰܬ݀ ܗܳܝ̇ ܛܳܠܘ̣ܡܬܳܐ ܠܳܟ ܒܪܳܐ ܣܓܝ̣ܕܳܐ ܘܝܳܪܬܳܐ ܕܰܫܪܳܪܳܐ: ܕܥܰܡ ܐܰܒܳܐ ܘܪܘ̣ܚܳܐ ܩܰܕܝ̣ܫܳܐ ܡܶܣܬܓܶܕ ܐܰܢ̱ܬ ܘܡܶܫ̣ܬܰܒܰܚ ܐܰܢ̱ܬ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀