ܦܪܽܘ̣ܡܝܽܘܢ

ܫܽܘ̣ܒܚܳܐ ܠܰܐܒܳܐ ܘܠܰܒܪܳܐ ܘܰܠܪܘ̣ܚܳܐ ܩܰܕܝ̣ܫܳܐ: ܠܗܰܘ̇ ܕܰܒܪܝ̣ܬܳܐ ܟܽܠܳܗ̇ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ ܕܥܶܠܳܝ̈ܶܐ ܘܰܕܬܰܚ̈ܬܳܝܶܐ ܕܪ̈ܘ̣ܚܳܢܶܐ ܘܰܕܥܰܦܪ̈ܳܢܶܐ ܡܫܰܒܚܝ̣ܢ ܘܰܡܩܰܠܣܝ̣ܢ ܘܰܡܒܰܪܟܝ̣ܢ ܘܰܡܗܰܕܪܝ̣ܢ ܘܰܡܪܰܡܪܡܝ̣ܢ ܠܳܟ ܕܠܳܐ ܫܰܠܘܳܐ: ܡܰܠܰܐܟ̈ܶܐ ܒܬܶܫܒܚ̈ܳܬܗܽܘܢ: ܪ̈ܝ̣ܫܰܝ ܡܰܠܰܐܟ̈ܶܐ ܒܝܘ̣ܒܳܒܰܝ̈ܗܽܘܢ: ܡܰܘ̈ܬܒܶܐ ܒܪܘ̣ܡܪ̈ܳܡܰܝܗܽܘܢ: ܡܳܪ̈ܰܘܳܬܳܐ ܒܐܘ̣ܚ̈ܕܳܢܰܝܗܽܘܢ: ܫܘ̣ܠ̈ܛܳܢܶܐ ܒܥܰܙܝ̣ܙܘ̣ܬܗܽܘܢ: ܪ̈ܘ̣ܚܳܢܶܐ ܒܩܘ̣ܠܳܣܰܝ̈ܗܽܘܢ: ܢܘ̣ܪ̈ܳܢܶܐ ܒܗܘ̣ܠܳܠܰܝ̈ܗܽܘܢ: ܟܪ̈ܘ̣ܒܶܐ ܒܩܝ̣̈ܢܳܬܗܽܘܢ: ܣܪ̈ܳܦܶܐ ܒܩܘ̣ܕ̈ܳܫܰܝܗܽܘܢ: ܛܶܟܣܝ̣̈ܣ ܒܣܶܓ̈ܕܳܬܗܽܘܢ: ܫܡܰܝ̈ܳܐ ܘܢܘ̣ܗܪܳܐ ܒܨܶܡܚܰܝ̈ܗܽܘܢ: ܫܶܡܫܳܐ ܘܣܰܗܪܳܐ ܒܕܶܢܚܰܝ̈ܗܽܘܢ: ܟܰܘܟ̈ܒܶܐ ܒܙܰܠܝ̣̈ܩܰܝܗܽܘܢ: ܒܰܪ̈ܩܶܐ ܒܩܰܠܝ̣ܠܘ̣ܬܗܽܘܢ: ܪ̈ܰܥܡܶܐ ܒܩܳܠܰܝ̈ܗܽܘܢ: ܪ̈ܘ̣ܚܶܐ ܘܥܰܠ̈ܥܳܠܶܐ ܒܡܰܫ̈ܒܰܝܗܽܘܢ: ܐܰܪܥܳܐ ܘܳܐܐܰܪ ܒܰܐܫܝ̣ܕܘ̣ܬܗܽܘܢ: ܡܶܛܪ̈ܶܐ ܘܛܱ̈ܠܶܐ ܒܰܪ̈ܣܝ̣ܣܰܝܗܽܘܢ: ܛܘ̣ܪ̈ܶܐ ܘܪ̈ܳܡܳܬܳܐ ܒܪ̈ܰܘܡܰܝܗܽܘܢ: ܬܗܘ̣̈ܡܶܐ ܒܥܘ̣ܡܩܰܝ̈ܗܽܘܢ: ܝܰܡ̱̈ܡܶܐ ܒܓܰܠ̱̈ܠܰܝܗܽܘܢ: ܠܳܟ ܡܫܰܒܚܝ̣ܢ ܢܰܗܪ̈ܰܘܳܬܳܐ ܒܪ̈ܶܕܝܰܝܗܽܘܢ: ܐܝ̣ܠ̈ܳܢܶܐ ܒܦܺܐܪ̈ܰܝܗܽܘܢ: ܬܰܢܝ̣̈ܢܶܐ ܒܰܥܪܝ̣ܡܘ̣ܬܗܽܘܢ: ܒܥܝ̣ܪ̈ܳܐ ܘܪ̈ܰܚܫܳܐ ܒܪ̈ܶܗܛܰܝܗܽܘܢ: ܛܰܝܪܳܐ ܘܦܳܪܰܚܬܳܐ ܟܽܠܗܽܘܢ ܠܳܟ ܗ̱ܘ̣ ܡܩܰܠܣܝ̣ܢ: ܪܰܘܪ̈ܒܳܢܶܐ ܒܫܘ̣ܠ̈ܛܳܢܰܝܗܽܘܢ: ܕܰܝ̈ܳܢܶܐ ܒܐܘ̣ܚ̈ܕܳܢܰܝܗܽܘܢ: ܒܬܘ̣̈ܠܶܐ ܒܕܰܟܝܽܘ̣ܬܗܽܘܢ: ܣܳܒ̈ܶܐ ܒܐܝ̣ܩܳܪ̈ܰܝܗܽܘܢ: ܥܠܰܝ̈ܡܶܐ ܘܓܰܕ̈ܘ̣ܕܶܐ ܒܟܶܢܫܰܝ̈ܗܽܘܢ ܠܳܟ ܡܒܰܪܟܝ̣ܢ: ܐܝ̣̈ܡܳܡܶܐ ܘܠܰܝ̈ܠܰܘܳܬܳܐ ܒܫܘ̣ܚ̈ܠܳܦܰܝܗܽܘܢ: ܩܰܝ̈ܛܶܐ ܘܣܰܬܘ̈ܶܐ ܒܰܥܝܳܕܰܝ̈ܗܽܘܢ: ܙܰܒ̈ܢܶܐ ܘܥܶܕ̈ܳܢܶܐ ܒܰܟܪ̈ܘ̣ܟܝܰܝܗܽܘܢ: ܘܟܽܠܗܽܘܢ ܥܰܡ̱̈ܡܶܐ ܘܶܐܡ̈ܘܳܬܳܐ ܒܰܐܘܝܽܘ̣ܬܗܽܘܢ: ܘܳܐܦ ܠܰܢ ܡܳܪܝܳܐ ܐܰܠܳܗܳܐ ܟܰܢܶܫ ܠܰܢ ܡ̣ܶܢ ܦܶܗܝܳܐ ܕܚܘ̣ܫ̈ܳܒܶܐ ܒܝ̣̈ܫܶܐ ܘܗܰܒܠܰܢ ܕܥܰܡ ܛܶܟ̈ܣܶܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ ܒܰܥܣܝ̣ܪܳܝܽܘܬ ܪ̈ܶܓܫܶܐ ܒܰܚܕܳܐ ܐܰܘܝܽܘ̣ܬܳܐ ܫܦܝ̣ܬܳܐ ܘܰܡܨܰܠܰܠܬܳܐ ܢ̇ܫܰܒܚܳܟ ܘܰܢ̇ܩܰܠܣܳܟ ܘܰܢ̇ܪܰܡܪܡܳܟ ܘܰܢ̇ܗܰܕܪܳܟ ܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܛܰܘܪ̈ܶܐ ܘܝܰܘܡ̈ܳܬܳܐ ܘܡܶܬܚ̈ܶܐ ܘܰܪ̈ܦܳܦܶܐ ܒܝܕ ܥܶܛܪܳܐ ܗܳܢܳܐ ܕܡܰܥܰܠܬܳܟ ܕܠܐܘܪܫܠܡ ܡܰܠܟܳܐ ܕܡܰܠ̈ܟܶܐ ܘܡܳܪܶܐ ܡܳܪ̈ܰܘܳܬܳܐ ܡܚܰܠܠܳܢܳܐ ܘܫܳܒܘ̣ܩܳܐ ܘܠܳܐ ܡܶܬܥ̱ܰܗܕܳܢܳܐ ܗܘܝ̣ ܡܳܪܝܳܐ ܠܰܚܛܳܗ̈ܰܝܢ: ܘܒܰܛܶܠ ܡܰܪ̈ܕܘܳܬܳܐ ܕܪܘ̣ܓܙܳܐ ܡܶܢܰܢ: ܘܶܐܬܕܰܟܰܪ ܒܰܚܢܳܢܳܟ ܠܥܰܢܝ̣̈ܕܶܐ ܡܗܰܝܡ̈ܢܶܐ ܕܥܰܠ ܣܰܒܪܳܟ ܫܟ̣ܶܒܘ̱ ܘܶܐܬ̣ܬܢܝ̣ܚܘ̱: ܘܚܳܝܪܝ̣ܢ ܠܡܶܐܬܝ̣ܬܳܟ ܫܒܝ̣ܚܬܳܐ: ܕܰܚܢܰܢ ܘܗ̣ܶܢܽܘܢ ܢ̇ܶܫܬܘܶܐ ܠܥܺܐܕܳܟ ܪܰܒܳܐ ܘܠܳܐ ܡܶܫܬܰܪܝܳܢܳܐ ܡܰܠܟܳܐ ܪܰܒܳܐ ܕܰܠܥܳܠܡܝ̣ܢ ܘܡܳܪܳܐ ܘܒܳܪܘ̣ܝܳܐ ܘܫܰܠܝ̣ܛܳܐ ܕܰܬܪ̈ܰܝܗܽܘܢ ܥܳܠ̈ܡܶܐ: ܕܠܳܟ ܗ̱ܘ̣ ܙܳܕܩܳܐ ܬܶܫܒܘ̣ܚܬܳܐ ܘܠܳܟ ܦܰܐܝܳܐ ܣܶܓܕܬܳܐ ܡ̣ܶܢ ܟܽܠܗܶܝܢ ܒܶܪ̈ܝܳܬܳܐ ܘܰܥܒܝ̣̈ܕܶܐ ܕܶܐܬ̣ܒܪܝ̣ܘ ܘܶܐܬ̣ܩܰܝܰܡܘ̱ ܠܫܘ̣ܒܚܳܐ ܕܝ̣ܠܳܟ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܬܠܳܬܫܳܥ̈ܝ̣ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܫܽܘ̣ܒܚܳܐ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܕܰܐܘܕܰܥ̣ܬ ܗܰܝܡܳܢܘ̣ܬܳܟ ܚܕܳܪ̈ܰܝܟ ܘܰܐܕܢܰܚ̣ܬ ܪܰܒܘ̣ܬܳܟ ܥܰܠ ܟܽܠ ܐ̱ܢܳܫ ܒܐ̱ܪ̈ܳܙܰܝܟ: ܕܝ̣ܠܳܟ ܐܶܢܽܘܢ ܫܡܰܝ̈ܳܐ ܒܣܰܘ̈ܟܰܝܗܽܘܢ: ܘܕܝ̣ܠܳܟ ܗ̱ܝ̣ ܐܰܪܥܳܐ ܒܰܡܠܳܐܴܗ̇: ܕܝ̣ܠܳܟ ܗ̱ܘ̣ ܥܘ̣ܫܢܳܐ ܘܓܰܐܝܽܘ̣ܬܳܐ: ܘܕܝ̣ܠܳܟ ܗ̱ܘ̣ ܫܘ̣ܒܚܳܐ ܘܡܰܠܟܘ̣ܬܳܐ: ܘܕܝ̣ܠܳܟ ܗ̱ܘ̣ ܬܘ̣ܩܦܳܐ ܘܚܰܝܠܬܳܢܘ̣ܬܳܐ: ܘܕܝ̣ܠܳܟ ܗ̱ܝ ܕܪܳܥܳܐ ܒܫܘ̣ܠܛܳܢܳܗ̇: ܕܝ̣ܠܳܟ ܗ̱ܝ̣ ܓܰܢ̱ܒܳܪܘ̣ܬܳܐ ܒܐܘ̣ܚܕܳܢܳܗ̇: ܕܝ̣ܠܳܟ ܗ̱ܝ̣ ܪܰܒܘ̣ܬܳܐ ܒܰܫܪܳܪܳܐ: ܘܕܝ̣ܠܳܟ ܗ̱ܝ̣ ܦܰܐܝܘ̣ܬܳܐ ܘܐܝ̣ܩܳܪܳܐ: ܕܝ̣ܠܳܟ ܗ̱ܝ̣ ܛܰܝܒܘ̣ܬܳܐ ܕܠܳܐ ܣܳܟܳܐ: ܘܕܝ̣ܠܳܟ ܗ̱ܝ̣ ܡܪܰܚܡܳܢܘ̣ܬܳܐ ܕܠܳܐ ܟܰܝܠܳܐ: ܠܳܟ ܦܰܐܝܳܐ ܬܶܫܒܘ̣ܚܬܳܐ ܕܠܳܐ ܫܰܠܘܳܐ: ܘܠܳܟ ܡܶܬܬܚܝ̣ܒܳܐ ܣܶܓܕܬܳܐ ܘܬܰܘܕܝ̣ܬܳܐ: ܠܳܟ ܡܪܰܡܪܡܝ̣ܢ ܥܶܠܳܝ̈ܶܐ ܒܕܰܪ̈ܓܰܝܗܽܘܢ: ܘܠܳܟ ܡܩܰܠܣܝ̣ܢ ܬܰܚܬܳܝ̈ܶܐ ܒܛܶܟܣܰܝ̈ܗܽܘܢ: ܠܳܟ ܡܫܒܚܝ̣ܢ ܫܡܰܝ̈ ܫܡܰܝ̈ܳܐ ܒܪ̈ܰܘܡܰܝܗܽܘܢ: ܘܠܳܟ ܣܳܓܕܝ̣ܢ ܬܗܘ̣̈ܡܶܐ ܒܥܘ̣ܡܩܰܝ̈ܗܽܘܢ: ܘܠܳܟ ܡܰܟܪܶܙ ܪܩܝ̣ܥܳܐ ܒܬܰܨܒܝ̣ܬܶܗ: ܘܠܳܟ ܡܚܰܘܶܐ ܢܘ̣ܗܪܳܐ ܒܦܰܐܝܘ̣ܬܶܗ: ܠܳܟ ܡܫܰܒܰܚ ܫܶܡܫܳܐ ܒܙܰܠܝ̣̈ܩܰܘܗ̱ܝ: ܘܠܳܟ ܡܗܰܕܰܪ ܣܰܗܪܳܐ ܒܫܘ̣ܚ̈ܠܳܦܰܘܗ̱ܝ: ܠܳܟ ܡܩܰܠܣܝ̣ܢ ܟܰܘܟ̈ܒܶܐ ܒܣܶܕܪ̈ܰܝܗܽܘܢ: ܘܠܳܟ ܡܝܰܩܪܝ̣ܢ ܢܰܗܝ̣ܪ̈ܶܐ ܒܨܶܡܚܰܝ̈ܗܽܘܢ: ܘܠܳܟ ܨܳܝܪܝ̣ܢ ܨܰܦܪ̈ܶܐ ܒܕܶܢܚܰܝ̈ܗܽܘܢ: ܠܳܟ ܡܣܰܒܪܝ̣ܢ ܐܝ̣ܡܳܡ̈ܶܐ ܒܪ̈ܶܗܛܰܝܗܽܘܢ: ܘܒܳܟ ܦܳܣܥܝ̣ܢ ܠܰܝ̈ܠܰܘܳܬܳܐ ܘܙܰܒ̈ܢܶܐ ܘܥܶܕ̈ܳܢܶܐ ܥܰܠ ܫܘ̣ܚ̈ܠܳܦܰܝܗܽܘܢ: ܠܳܟ ܣܳܓܕܝ̣ܢ ܡܰܠ̈ܟܶܐ ܒܬܳܓܰܝ̈ܗܽܘܢ: ܘܠܳܟ ܡܶܬܪܰܟܢܝ̣ܢ ܪ̈ܝ̣ܫܳܢܶܐ ܒܐܘ̣ܚ̈ܕܳܢܰܝܗܽܘܢ: ܠܳܟ ܡܰܘܕܶܝܢ ܡܫܰܡ̈ܫܳܢܶܐ ܒܦܝ̣ܪ̈ܡܰܝܗܽܘܢ: ܠܳܟ ܡܰܟܪܶܙ ܝܰܡܳܐ ܒܪܰܒܘ̣ܬܶܗ: ܘܠܳܟ ܡܰܘܕܶܐ ܬܗܽܘ̣ܡܳܐ ܒܓܰܐܝܘ̣ܬܶܗ: ܘܠܳܟ ܡܝܰܒܶܒ ܪܰܘܡܳܐ ܒܰܡܥܰܠܝܽܘ̣ܬܶܗ: ܘܠܳܟ ܡܫܰܒܚܳܐ ܐܰܪܥܳܐ ܒܦܰܐܝܘ̣ܬܳܗ̇: ܠܳܟ ܣܳܓܕܝ̣ܢ ܐܝ̣ܠܳܢ̈ܶܐ ܒܦܺܐܪ̈ܰܝܗܽܘܢ: ܘܠܳܟ ܡܗܰܕܪܝ̣ܢ ܐܰܪ̈ܙܶܐ ܒܪ̈ܰܘܡܰܝܗܽܘܢ: ܠܳܟ ܡܝܰܩܪܝ̣ܢ ܥܶܩܳܪ̈ܶܐ ܘܘܰܪ̈ܕܶܐ ܒܪ̈ܝ̣ܚܳܢܰܝܗܽܘܢ: ܘܠܳܟ ܡܩܰܠܣܝ̣ܢ ܦܰܩ̈ܚܶܐ ܘܫܘ̣̈ܫܰܢܶܐ ܒܓܰܘܢܰܝ̈ܗܽܘܢ: ܘܠܳܟ ܐܰܟ̣ܪܶܙܘ̱ ܢܒܺܝ̈ܶܐ ܒܐ̱ܪ̈ܳܙܰܝܗܽܘܢ: ܘܠܳܟ ܒܰܕܶܩ̣ܘ̱ ܚܰܙܳܝ̈ܶܐ ܒܨܘ̣ܪ̈ܳܬܗܽܘܢ: ܘܠܳܟ ܐܰܪܶܙܘ̱ ܙܰܕܝ̣̈ܩܶܐ ܒܫܰܪ̈ܒܰܝܗܽܘܢ: ܘܠܳܟ ܫܰܘܕܰܥ̣ܘ̱ ܟܺܐܢ̈ܶܐ ܘܰܐܒܳܗ̈ܳܬܳܐ ܒܦ̈ܶܠܳܐܬܗܽܘܢ: ܘܠܳܟ ܫ̣ܕܰܪܘ̱ ܙܰܝ̈ܬܶܐ ܣܰܘܟܰܝ̈ܗܽܘܢ: ܘܠܳܟ ܩܰܪܶܒ̣ܘ̱ ܕܶܩ̈ܠܶܐ ܛܰܪ̈ܦܰܝܗܽܘܢ: ܠܳܟ ܫܰܒܰܚ̣ܘ̱ ܛܠܳܝ̈ܶܐ ܒܩܳܠܰܝ̈ܗܽܘܢ: ܘܠܳܟ ܩܰܠ̣ܶܣܘ̱ ܥܠܰܝ̈ܡܶܐ ܒܐܘ̣ܫܰܥܢܰܝ̈ܗܽܘܢ: ܘܠܳܟ ܐܰܓܥ̣ܶܠܘ̱ ܬܰܠܡܝ̣̈ܕܶܐ ܠܶܒܰܘ̈ܳܬܗܽܘܢ: ܘܠܳܟ ܫܰܘܝ̣ܘ ܩܕܳܡ ܥܝ̣ܠܳܐ ܡܳܐܢܰܝ̈ܗܽܘܢ: ܘܶܐܬ̣ܬܰܩܢܰܬ݀ ܬܶܫܒܘ̣ܚܬܳܐ ܒܦܘ̣̈ܡܰܝܗܽܘܢ ܕܝܰܠ̈ܘ̣ܕܶܐ ܘܫܰܒܪ̈ܶܐ ܒܫܘ̣ܩܰܝ̈ܗܽܘܢ: ܐܰܢ̱ܬ ܐܰܥܒ̣ܰܪܬ ܡ̣ܶܢ ܝܘ̣ܕ̈ܳܝܶܐ ܡܰܠ̈ܟܰܝܗܽܘܢ: ܘܰܡܒܰܕ̈ܩܳܢܶܐ ܡ̣ܶܢ ܒܶܝܬ ܪ̈ܶܓܠܰܝܗܽܘܢ: ܘܠܳܟ ܕܰܪܟ̣ܶܒܬ ܥܝ̣ܠܳܐ ܒܰܝܢܳܬܗܽܘܢ: ܗܳܐ ܣܳܓܕܝ̣ܢ ܠܳܟ ܥܰܡ̱̈ܡܶܐ ܘܶܐܡ̈ܘܳܬܳܐ ܒܐܘ̣ܚܕܳܢܰܝ̈ܗܽܘܢ: ܘܰܡܫܰܒܚܝ̣ܢ ܠܳܟ ܘܰܡܩܰܠܣܝ̣ܢ ܒܠܶܫܳܢܰܝ̈ܗܽܘܢ: ܕܰܐܢ̱ܬ ܐܝ̣ܬܰܝܟ ܡܳܪܳܐ ܘܦܳܪܘ̣ܩܳܐ ܕܟܽܠܗܽܘܢ ܘܡܰܠܟܳܐ ܒܰܫܪܪܳܐ ܕܰܬܪ̈ܰܝܗܽܘܢ ܥܳܠ̈ܡܶܐ ܘܕܰܝܳܢܗܽܘܢ: ܘܠܳܟ ܐܳܦ ܗܳܫܳܐ ܡܳܪܝܳܐ ܝܰܠ̈ܕܶܝܗ̇ ܕܥܺܕܬܳܐ ܩܰܕܝ̣ܫܬܳܐ ܡܗܰܕܪܝ̣ܢ ܒܐܘ̣ܫܰܥܢܰܝ̈ܗܽܘܢ ܘܡܦܝ̣ܣܝ̣ܢ ܠܛܳܒܘ̣ܬܳܟ: ܐܰܢ̱ܬ ܕܶܝܢ ܚܰܢܳܢܳܐ ܘܛܳܒܳܐ ܠܳܐ ܬ̣ܶܟܠܶܐ ܪ̈ܰܚܡܰܝܟ ܡܶܢܗܽܘܢ: ܐܶܠܳܐ ܒܝܰܕ ܫܘ̣ܘ̈ܟܳܢܶܐ ܫܦܝ̣̈ܥܶܐ ܕܡܰܘܗ̈ܒܳܬܳܟ ܘܰܕܥܘ̣ܕܪ̈ܳܢܰܝܟ ܣܰܓܺܝ̈ܶܐܐ ܐܰܦܨܰܚ ܐܶܢܽܘܢ: ܘܡ̣ܶܢ ܟܽܠ ܣܘ̣ܓ̈ܦܳܢܶܐ ܕܢܰܦܫܳܐ ܘܰܕܦܰܓܪܳܐ ܫܰܘܙܶܒ ܐܶܢܽܘܢ: ܘܕܰܢ̣ܩܰܪܒܽܘܢ ܠܳܟ ܥܰܡ ܛܥܝ̣ܢܘ̣ܬ ܣܰܘܟ̈ܶܐ ܫܘ̣ܒ̈ܚܶܐ ܘܪܘ̣ܡܪ̈ܳܡܶܐ ܚܠܰܝ̈ܳܐ ܘܗܰܢܺܝ̈ܶܐܐ ܕܰܕܟܶܝܢ ܡ̣ܶܢ ܟܽܠ ܛܘ̣ܠܫܳܐ ܕܰܚܛܝ̣ܬܳܐ ܐܰܫܘܳܐ ܐܶܢܽܘܢ: ܘܰܒܟܽܠܳܗ̇ ܡܰܥܒܕܳܢܘ̣ܬܳܐ ܕܛܰܝܒܘ̣ܬܳܟ ܗܰܕܰܪ ܐܶܢܽܘܢ: ܘܰܒܢܰܝ̈ܳܐ ܕܰܫܠܳܡܳܐ ܘܰܕܓܳܡܪܝ̣ܢ ܨܶܒܝܳܢܳܟ ܚܰܘܳܐ ܐܶܢܽܘܢ: ܘܰܒܫܘ̣ܡ̈ܠܳܝܶܐ ܕܫܘ̣ܘ̈ܟܳܢܰܝܟ ܓܡܘ̣ܪ ܐܶܢܽܘܢ: ܘܰܒܬܶܐܘܳܪ̈ܺܝܰܐܣ ܢܰܨܝ̣ܚ̈ܳܬܳܐ ܪ̈ܳܡܳܬ ܡ̣ܶܢ ܥܳܠܡܳܐ ܐܰܥܬܰܪ ܐܶܢܽܘܢ: ܘܰܒܓܘ̣ܕ̈ܶܐ ܕܰܡܫܰܒ̈ܚܳܢܰܝܟ ܫܡܰܝ̈ܳܢܶܐ ܚܰܠܶܛ ܐܶܢܽܘܢ: ܘܰܠܥܰܢܝ̣̈ܕܶܐ ܡܗܰܝܡ̈ܢܶܐ ܒܰܐܘ̈ܘܳܢܶܐ ܫܡܰܝ̈ܳܢܶܐ ܐܰܫܪܳܐ ܐܶܢܽܘܢ: ܘܰܒܡܰܫ̈ܟܢܶܐ ܕܚܰܕ̈ܘܳܬܳܐ ܒܰܣܶܡ ܐܶܢܽܘܢ: ܘܰܕܢ̣ܶܦܩܽܘܢ ܠܐܘ̣ܪܥܳܟ ܒܐܘ̣̈ܫܰܥܢܶܐ ܡܶܬܝܰܕ̈ܥܳܢܶܐ ܒܡܶܐܬܝ̣ܬܳܟ ܕܬܰܪܬܶܝܢ ܕܡ̣ܶܢ ܫܡܰܝܳܐ ܐܰܫܘܳܐ ܐܶܢܽܘܢ: ܘܰܢ̣ܩܘ̣ܡܽܘܢ ܡ̣ܶܢ ܝܰܡܝ̣ܢܳܟ ܛܰܝܶܒ ܐܶܢܽܘܢ: ܘܠܰܢ ܥܰܡܗܽܘܢ ܘܰܚܢܰܢ ܘܗ̣ܶܢܽܘܢ ܢ̇ܶܬܒܰܣܰܡ ܒܰܚܙܳܬܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀