ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܩܰܒܠܳܢܳܐ ܕܨܰܝ̈ܳܡܶܐ: ܕܨܳܡ̣ ܚܠܳܦܰܝܢ ܘܦܰܪܩ̣ܰܢ ܡ̣ܶܢ ܫܘ̣ܥܒܳܕܳܐ ܕܰܚܛܝ̣ܬܳܐ: ܠܗܰܘ̇ ܡܚܰܣܝܳܢܳܐ ܕܚܰܛܳܝ̈ܶܐ ܕܢܳܩ̇ܫܝ̣ܢ ܒܬܰܪܥܳܐ ܕܰܚܢܳܢܶܗ: ܕܥܰܡ ܡܳܟ̈ܣܶܐ ܘܚܰܛܳܝ̈ܶܐ ܐܶܬ̣ܗ̣ܰܦܰܟ: ܕܰܠܚܰܛܳܝ̈ܶܐ ܢ̣ܰܦܢܶܐ ܠܐܘ̣ܪܚܳܐ ܕܰܫܪܳܪܳܐ: ܗܰܘ̇ ܡܩܰܒܠܳܢܳܐ ܕܰܨܠܰܘ̈ܳܬܳܐ ܘܒܳܥ̈ܘܳܬܳܐ: ܕܨܰܠܝ̣ ܚܠܳܦܰܝܢ ܘܰܐܠ̣ܶܦ ܠܰܢ ܕܰܢ̇ܨܰܠܶܐ ܘܢ̇ܶܒܥܶܐ ܪ̈ܰܚܡܶܐ ܕܛܰܝܒܘ̣ܬܶܗ: ܕܠܶܗ ܦܰܐܝܳܐ ܬܶܫܒܘ̣ܚܬܳܐ ܘܡ̣ܶܬܬܚܝ̣ܒܳܐ ܣܶܓ݂ܕܬܳܐ ܡ̣ܶܢ ܟܽܠܗܶܝܢ ܒܶܪ̈ܝܳܬܳܐ ܕܰܫܡ̈ܰܝܳܢܶܐ ܘܕܰܐܪ̈ܥܳܢܳܝܶܐ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܕܒܨܰܘ̈ܡܶܐ ܗܳܢܽܘܢ ܚܰܝܠ̈ܬܳܢܶܐ: ܘܒܰܨܠܰܘ̈ܳܬܳܐ ܪܳܚܡܰܬ݀ ܥܰܡ̈ܠܶܐ ܒܫܰܦܝ̣ܪܘ̣ܬ ܕܶܚܠܬܳܐ ܟܝ̣ܬ ܘܰܒܕܘ̣ܒܳܪ̈ܶܐ ܕܟܰܝ̈ܳܐ ܘܰܡܥܰܠ̈ܰܝܳܐ: ܠܡܽܘܫܶܐ ܡ̇ܰܢ ܗܰܘ̇ ܡܢܝ̣ܚܳܢܳܐ ܕܰܐܠܳܗܘ̣ܬܳܟ ܠܰܚܙܳܬܳܟ ܘܥܶܢܝܳܢܳܟ ܐܰܫܘܺܝ̣ܬ: ܘܠܘ̣̈ܚܶܐ ܟܬܝ̣̈ܒܳܬ ܐܰܠܳܗܳܐܝ̣ܬ ܕܣܳܝܽܘ̣ܡܘ̣ܬ ܢܳܡܘ̣ܣܳܐ ܘܦܘ̣ܩ̈ܕܳܢܶܐ ܫܰܪܝ̣ܪ̈ܶܐ ܠܶܗ ܗܰܝܡܶܢ̣ܬ: ܠܺܐܠܺܝܳܐ ܕܶܝܢ ܗܰܘ̇ ܛܒܝ̣ܒܳܐ ܒܰܢܒܺܝ̈ܶܐ ܕܝ̣ܠܳܟ ܒܡܰܪܟܰܒܬܳܐ ܕܢܘ̣ܪܳܐ ܐܰܝܟ ܕܠܰܫܡܰܝܳܐ ܚܛܰܦ̣ܬ: ܠܗܳܢܽܘܢ ܕܶܝܢ ܕܒܶܝܬ ܚܰܢܰܢܝܳܐ ܩܰܕܝ̣̈ܫܶܐ ܕܝ̣ܠܳܟ: ܐܳܦ ܒܳܗ̇ ܒܩܰܘܡܬܳܐ ܫܰܒܪܳܝܬܳܐ ܚܰܟܝ̣ܡܬܳܐ ܝܰܬܝ̣ܪ ܡ̣ܶܢ ܟܽܠ ܐ̱ܢܳܫ ܚܰܘܺܝ̣ܬ: ܒܐܝ̣ܕܰܝ̈ܗܽܘܢ ܠܦܘ̣ܩܕܳܢܳܐ ܓܘ̣ܡܕܳܢܳܐ ܘܚܰܪܡܳܢܳܐ ܕܰܛܪܘ̣ܢܳܐ ܗܰܘ̇ ܕܚܝ̣ܠܳܐ ܒܰܛܶܠ̣ܬ: ܘܰܠܚܰܟܝ̣̈ܡܶܐ ܕܒܳܒܶܝܠ ܡ̣ܶܢ ܡܰܘܬܳܐ ܡܰܪܝ̣ܪܳܐ ܫܰܘܙܶܒ̣ܬ: ܐܰܫܘܳܐ ܐܳܦ ܠܰܢ ܡܶܣ̈ܟܺܢܶܐ ܘܚܰܛܳܝ̈ܶܐ ܥܰܒ̈ܕܰܝܟ: ܕܰܒܝܰܕ ܡܚܰܡܣܢܳܢܘ̣ܬܳܐ ܕܡ̣ܶܢ ܒܝ̣̈ܫܳܬܳܐ ܘܣܳܥܘ̣ܪ̈ܘܳܬܳܐ ܕܛܳܒ̈ܳܬܳܐ ܡܕܰܡ̈ܝܳܢܶܐ ܕܩܰܕܝ̣̈ܫܶܐ ܕܝ̣ܠܳܟ ܢ̇ܶܗܘܶܐ: ܘܗܰܒܠܰܢ ܡܳܪܝܳܐ ܕܰܢ̇ܨܽܘ̣ܡ: ܠܳܐ ܗ̱ܘܳܐ ܝܘ̣ܕܳܐܝ̣ܬ ܠܚܶܪ̈ܝܳܢܶܐ ܘܰܠܡܰܨ̈ܘܳܬܳܐ ܘܰܠܡܶܐܠܰܨ ܠܡܶܣ̈ܟܺܢܶܐ: ܘܠܰܡܩܰܦܳܚܽܘ̣ ܘܰܠܡܰܥܘܳܠܽܘ̣ ܒܩܰܪ̈ܝ̣ܒܶܐ: ܐܳܦܠܳܐ ܕܡܶܬܚܰܙܽܘ̣ܙܝܳܢܳܐܝ̣ܬ ܢ̇ܩܰܦܰܚ ܡܰܢ ܠܦܰܓܪܳܐ: ܒܰܚܣܝ̣ܠܘ̣ܬܳܐ ܕܡ̣ܶܢ ܬܘ̣ܪ̈ܣܳܝܶܐ ܢ̇ܰܘܩܰܪ ܕܶܝܢ ܘܢ̇ܰܥܒܝ̣ܗ̇ ܠܰܢܦܫܳܐ: ܒܠܳܐ ܢܳܡܘ̣̈ܣܳܝܘܳܬܳܐ ܘܰܠܬܺܐܪܬܳܐ ܕܰܐܚ̈ܶܐ ܘܰܒܢܰܝ̈ ܓܶܢܣܳܐ ܢ̇ܡܰܚܶܐ: ܐܶܠܳܐ ܕܰܢ̇ܨܽܘ̣ܡ ܦܰܐܝܘ̣ܬ ܟܪܝ̣ܣܛܝܳܢܳܐܝ̣ܬ ܘܪܶܚܡܰܬ݀ ܐܰܠܳܗܳܐܝ̣ܬ: ܟܰܕ ܫܳܪܶܝܢܰܢ ܩܶܛܪ̈ܶܐ ܕܥܰܘܠܳܐ ܘܰܡܦܰܣܩܝ̣ܢܰܢ ܡܶܐܣܰܪ̈ܝܳܬܳܐ ܕܢܶܟܠܳܐ ܘܰܟܒܝ̣ܫܳܐ ܠܚܺܐܪܘ̣ܬܳܐ ܡܫܰܕܪܝ̣ܢܰܢ: ܘܟܽܠ ܟܬܳܒܳܐ ܕܢܶܟܠܳܐ ܡܣܰܕܩܝ̣ܢܰܢ: ܒܙܶܕ̈ܩܳܬܳܐ ܟܝ̣ܬ ܒܫܰܦܝ̣ܪܘ̣ܬ ܣܳܥܘ̣ܪ̈ܘܳܬܳܐ ܡܪܰܥܶܝܢܰܢ: ܘܰܡܫܰܝܢܝ̣ܢܰܢ ܠܪܰܒܘ̣ܬܳܐ ܕܝ̣ܠܳܟ: ܘܗܰܒ ܠܰܢ ܕܰܒܝܰܕ ܙܘ̣̈ܦܶܐ ܡܚܰܠ̈ܠܳܢܶܐ ܕܰܐܝܟ ܗܳܠܶܝܢ ܢ̇ܶܡܪܘ̣ܩ ܥܰܝ̈ܢܶܐ ܕܬܰܪ̈ܥܝܳܬܰܢ: ܐܰܝܟܰܢܳܐ ܕܢ̇ܶܬܡܨܶܐ ܕܰܒܠܶܒܳܐ ܕܰܟܝܳܐ ܡܶܬܝܰܕܥܳܢܳܐܝ̣ܬ: ܘܦܰܐܝܘ̣ܬ ܐܰܠܳܗܳܐܝ̣ܬ ܢ̇ܶܚܙܶܝܟ ܘܗܳܟܰܢܳܐ ܒܪܘ̣ܚܳܐ ܢ̇ܶܥܬܰܪ: ܒܢܰܦܫܳܐ ܢ̇ܰܙܠܶܓ: ܒܦܰܪܨܽܘ̣ܦܳܐ ܢ̇ܶܙܕܰܗܶܐ: ܒܗܰܘܢܳܐ ܢ̇ܶܬܕܰܟܶܐ: ܘܰܒܚܰܝܠܬܳܢܘ̣ܬܳܐ ܕܠܘ̣ܩܒܰܠ ܥܰܡ̱̈ܡܶܐ ܡܶܬܝܰܕ̈ܥܳܢܶܐ: ܘܳܐܡܘ̣ܪ̈ܳܝܶܐ ܠܳܐ ܡܬܚܰܙ̈ܝܳܢܶܐ ܢ̇ܶܩܢܶܐ: ܛܢܳܢܳܐ ܗܰܘ̇ ܕܒܝ̣ܕܰܥܬܳܐ ܠܳܟ ܡܳܪܝܳܐ ܢ̇ܶܛܰܢ: ܘܐܘ̣ܚܕܳܢܳܐ ܢ̇ܶܗܘܶܐ ܐܝ̣ܬ ܠܰܢ ܠܘ̣ܩܒܰܠ ܟܳܗ̈ܢܶܐ ܕܛܘ̣ܥܝܰܝ ܘܰܢܒܺܝ̈ܶܐ ܕܒܶܗܬܬܳܐ: ܐܰܘܟܝ̣ܬ ܪ̈ܘ̣ܚܶܐ ܗܳܠܶܝܢ ܒܝ̣̈ܫܳܬܳܐ: ܠܡܶܕܰܥ ܕܶܝܢ ܚܰܝܠܳܐ ܕܐ̱ܪ̈ܳܙܶܐ ܐܰܠܳܗܳܝ̈ܶܐ: ܘܝ̣ܕܰܥܬܳܐ ܕܣܝ̣̈ܡܳܬܳܐ ܐܰܝܠܶܝܢ ܕܰܡܛܰܫ̈ܝܳܢ ܗ̱ܘܰܝ̈ ܒܡܶܐܟܘ̣ܠܬܳܐ ܐ̱ܪܳܙܳܢܳܝܬܳܐ: ܢ̇ܶܩܛܘ̣ܠ ܠܬܰܢܝ̣ܢܳܐ ܗܰܘ̇ ܡܳܪܘ̣ܕܳܐ ܘܣܰܩܘ̣ܒܠܳܝ ܐܰܠܳܗܳܐ: ܠܒܝ̣ܠ ܗܰܘ̇ ܡܶܬܝܰܕܥܳܢܳܐ ܢ̇ܶܣܚܘ̣ܦ ܘܢ̇ܰܟܶܣ: ܘܰܢ̇ܦܰܪܢܶܣ ܠܟܽܠܗܽܘܢ ܢܶܣ̈ܝܽܘ̣ܢܶܐ ܡܦܰܬܟ̈ܶܐ ܕܒܥܶܠܕܒܳܒܳܐ ܒܚܰܝܠܳܐ ܕܝ̣ܠܳܟ ܢ̇ܶܙܟܶܐ: ܝܰܬܝ̣ܪܳܐܝ̣ܬ ܕܶܝܢ ܠܗܳܠܶܝܢ ܬܠܳܬܳܐ ܡܰܩܪ̈ܒܳܢܘܳܬܳܐ ܓܶܢܣ̈ܳܢܳܝܳܬܳܐ ܗܳܠܶܝܢ ܕܒܺܐܝ̣ܕܰܝ̈ܗܶܝܢ ܟܰܕ ܥܰܡ ܐܰܒܽܘܢ ܐܳܕܳܡ ܐܶܬ̣ܟܰܬܰܫ ܒܡܰܦܘ̣ܠܬܳܐ ܗܳܝ ܡܶܬܚܰܢܳܢܝ̣ܬܳܐ ܫ̣ܕܳܝܗ̱ܝ: ܒܝܰܕ ܕܶܝܢ ܐܳܕܳܡ ܗܰܘ̇ ܚܰܕܬܳܐ: ܘܐܰܠܳܗܳܐ ܗܰܘ̇ ܠܳܐ ܚܳܫܘ̣ܫܳܐ ܒܰܚܛܝ̣ܬܳܐ: ܟܰܕ ܦ̣ܓܰܥ ܐܰܝܟ ܕܫܳܘܶܐ ܡܰܦܘ̣ܠܬܳܐ ܛܒܝ̣ܒܬܳܐ ܢܦ̣ܰܠ: ܘܒܶܗܬܬܳܐ ܕܰܠܥܳܠܰܡ ܚ̣ܳܒ: ܘܶܐܢܗܘ̣ ܕܰܠܟܺܐܦ̈ܶܐ ܠܰܢ ܢ̣ܩܰܪܶܒ ܕܰܣܢܝ̣ܩܘ̣ܬܳܐ ܕܝ̣ܠܰܢ: ܘܠܰܚܡܳܐ ܠܗܳܠܶܝܢ ܢ̇ܶܫܰܐܠ: ܟܰܕ ܠܘܳܬ ܪܶܚܡܰܬ݀ ܟܰܪܣܳܐ ܡܚܰܬܚܶܬ ܚܰܝܶܠ ܠܰܢ ܕܢ̇ܺܐܡܰܪ ܠܘܳܬܶܗ ܐܰܝܟ ܡܰܠܦܳܢܘ̣ܬܳܐ ܕܝ̣ܠܳܟ ܚܰܟܝ̣ܡܰܬ݀ ܒܟܽܠ: ܕܠܰܘ ܒܠܰܚܡܳܐ ܒܰܠܚܘ̣ܕ ܚܳܝܶܐ ܒܰܪܢܳܫܳܐ ܐܶܠܳܐ ܒܟܽܠ ܦܶܬܓܳܡܳܐ ܕܢܳܦܶܩ ܡ̣ܶܢ ܦܘ̣ܡܶܗ ܕܐܰܠܳܗܳܐ: ܘܐܶܢ ܒܟܘ̣ܪܗܳܢܳܐ ܗܰܘ̇ ܕܪܶܚܡܰܬ݀ ܟܶܣܦܳܐ ܢܶܣ̣ܥܶܐ ܕܢܰܣ̣ܶܦ ܒܰܢ ܚܰܟܶܡ ܠܰܢ ܕܢ̇ܺܐܡܰܪ ܠܘܳܬܶܗ: ܗܳܝ ܕܙܶܠ ܠܳܟ ܠܒܶܣܬܰܪܝ̱ ܣܳܛܳܢܳܐ ܟܬܝ̣ܒ ܓܶܝܪ ܕܰܠܡܳܪܝܳܐ ܐܰܠܳܗܳܟ ܬ̣ܶܣܓܘ̣ܕ ܘܠܶܗ ܒܰܠܚܘ̣ܕܰܘܗ̱ܝ ܬ̣ܶܦܠܘ̣ܚ: ܫܟܝ̣ܪܘ̣ܬܳܐ ܕܶܝܢ ܕܫܘ̣ܒܚܳܐ ܣܪܝ̣ܩܳܐ ܐܶܢܗܘ̣ ܕܢ݂ܰܡ̣ܪܚ ܘܢ̣ܶܙܪܘ̣ܥ ܒܰܢ: ܘܗܰܒܠܰܢ ܡܳܪܝܳܐ ܕܢ̇ܰܒܗܬܝ̣ܘܗ̱ܝ ܟܰܕ ܐܳܡ̇ܪܝ̣ܢܰܢ ܠܘܳܬܶܗ: ܕܠܳܐ ܬ̣ܢܰܣܶܐ ܠܡܳܪܝܳܐ ܐܰܠܳܗܳܟ: ܘܠܳܐ ܬ̣ܶܫܒܘ̣ܩ ܠܰܢ ܕܢ̇ܶܬܥܠܶܒ ܡ̣ܶܢ ܒܝ̣ܫܘ̣ܬܶܗ ܕܗܰܘ̇ ܣܰܩܘ̣ܒܠܳܝܳܐ ܐܳܦܠܳܐ ܬܰܪܦܝ̣ܘܗ̱ܝ ܕܦܰܚܳܐ ܢ̣ܶܛܡܘ̣ܪ ܠܰܢ ܒܐܘ̣ܪܚܳܐ ܕܝ̣ܠܳܟ: ܗܳܝ ܨܳܒܶܝܢܰܢ ܠܰܡܗܰܠܳܟܽܘ̣ ܐܰܠܳܗܳܐܝ̣ܬ ܢ̇ܶܬܬܙܝ̣ܥ ܠܰܛܥܳܡܬܳܐ: ܘܰܐܫܘܳܐ ܠܰܢ ܕܥܰܡ ܩܰܕܝ̣̈ܫܰܝܟ: ܘܥܰܡܗܽܘܢ ܘܒܰܝܢܳܬܗܽܘܢ ܕܢ̇ܰܣܶܩ ܠܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܘܰܠܗܳܢܳܐ ܪܰܡܫܳܐ ܕܝܶܗ̣ܒܰܬ݀ ܠܰܢ ܛܰܝܒܘ̣ܬܳܟ: ܠܰܢܝܳܚܬܳܐ ܘܠܰܓܗܳܝܬܳܐ ܕܡ̣ܶܢ ܫܚ̈ܳܩܶܐ ܘܛܘ̣ܪ̈ܳܦܶܐ ܥܳܠ̈ܡܳܢܳܝܶܐ ܥܒܶܕ ܕܢ̣ܶܗܘܶܐ ܠܰܢ ܡܳܪܝܳܐ: ܘܰܠܫܶܠܝܳܐ ܘܠܰܒܗܝ̣ܠܘ̣ܬܳܐ ܘܰܠܥܶܢܝܳܢܳܐ ܫܰܦܝ̣ܪܳܐ: ܕܰܒܬܶܫܒ̈ܚܳܬܳܐ ܕܝ̣ܠܳܟ ܐܰܠܳܗܳܝ̈ܳܬܳܐ: ܐܰܝܟܰܢܳܐ ܕܰܒܝܰܕ ܗܳܠܶܝܢ ܘܰܒܕܰܐܝܟ ܗܳܠܶܝܢ ܠܒܘ̣ܣܳܡܳܐ ܕܰܒܥܶܢܝܳܢܳܐ ܕܡܳܪܘ̣ܬܳܟ ܢܶܫ̇ܬܘܶܐ ܟܽܠܰܢ ܥܰܒ̈ܕܰܝܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀