ܨܠܽܘ̣ܬܳܐ ܕܫܘ̣ܪܳܝܳܐ

ܠܳܟ ܣܳܓ̇ܕܝ̣ܢ ܥܶܠܳܝ̈ܶܐ ܕܰܒ̣ܪܰܝܬ ܣܓܝ̣ܕܳܐ ܘܰܡܫܰܒܚܳܐ: ܠܳܟ ܡܰܘܕ̈ܝܳܢ ܒܶܪ̈ܝܳܬܳܐ ܕܐܰܬ̣ܩܶܢܬ ܡܪܰܝܡܳܐ ܘܰܡܥܰܠܝܳܐ: ܥܶܠܳܝ̈ܶܐ ܥܰܡ ܬܰܚ̈ܬܳܝܶܐ ܣܳܓ̇ܕܝ̣ܢ ܘܰܡܪܰܡܪܡܝ̣ܢ ܠܐܝ̣ܩܳܪܳܟ: ܚܰܝ̈ܶܐ ܘܡܝ̣̈ܬܶܐ ܡܣܰܟܶܝܢ ܠܣܰܒܪܳܟ: ܐܳܦ ܠܦܘ̣ܪܩܳܢܳܟ ܚܳܝܪ̈ܳܢ ܥܰܝ̈ܢܰܝܢ: ܕܐܰܢ̱ܬ ܗ̱ܘ̣ ܥܳܒܽܘܕܳܐ ܕܟܽܠ ܒܶܪ̈ܝܳܢ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܫܘ̣ܒܚܳܐ ܠܳܟ ܐܰܒܳܐ ܕܫܰܝܢܳܐ ܕܰܫܡܰܝ̈ܳܢܶܐ: ܘܬܰܘܕܝ̣ܬܳܐ ܠܳܟ ܒܪܳܐ ܫܠܳܡܳܐ ܕܐܰܪ̈ܥܳܢܳܝܶܐ: ܣܓܝ̣ܕ ܐܰܢ̱ܬ ܪܘ̣ܚܳܐ ܩܰܕܝ̣ܫܳܐ ܓܳܡܽܘ̣ܪܳܐ ܕܫܘ̣̈ܟܳܢܶܐ ܐܰܠܳܗ̈ܳܝܶܐ: ܐܰܒܐ ܕܝܰܗ̣ܒ ܠܝ̣ܚܝ̣ܕܶܗ ܠܡܰܘܬܳܐ ܡܶܛܽܠ ܦܘ̣ܪܩܳܢܰܢ: ܒܪܳܐ ܕܰܥ̣ܨܳܝܗ̱ܝ ܚܘ̣ܒܶܗ ܘܡܝ̣ܬ ܡܶܛܽܠܳܬܰܢ: ܪܘ̣ܚܳܐ ܩܰܕܝ̣ܫܳܐ ܕܚܳܕܶܐ ܒܛܳܒ̈ܳܬܰܢ ܘܒܶܗ ܡܶܬܝܰܗ̈ܒܳܢ ܫܶܐܠܴ̈ܬܰܢ: ܐܰܢ̱ܬ ܬܠܝ̣ܬܳܝܳܐ ܘܰܠܚܘ̣ܕܳܝܳܐ ܕܚܰܕ ܐܝ̣ܬܰܝܟ ܐܘ̣ܣܺܝܳܐܝ̣ܬ: ܘܒܰܬܠܳܬܳܐ ܩܢܘ̣̈ܡܝ̣ܢ ܣܓܝ̣ܕ ܐܰܢ̱ܬ ܡܫܰܒܚܳܐܝ̣ܬ: ܘܗܰܒ ܠܰܢ ܡܳܪܝ̱ ܕܰܫܠܳܡܳܐ ܢ̇ܶܬܶܠ ܠܰܚ̈ܕܳܕܶܐ ܫܰܦܝܳܐܝ̣ܬ: ܘܒܶܗ ܛܰܪ ܠܟܽܠܰܢ ܒܰܐܘܝܽܘ̣ܬܳܐ ܕܥܰܡܳܟ ܐܰܠܳܗܳܐܝ̣ܬ: ܘܒܰܚܙܳܩܳܐ ܕܪܶܚܡܬܳܟ ܠܳܐ ܡܶܫܬܰܪܝܳܢܳܐܝ̣ܬ ܕܰܢ̇ܫܰܒܚܳܟ ܒܝܰܘܡܳܐ ܦܨܺܝ̣ܚܳܐ ܕܰܩܝܳܡܬܳܟ ܡܫܰܒܰܚܬܳܐ ܬܗܝ̣ܪܳܐܝ̣ܬ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܺܝܠܰܢ: ܗܰܘ̇ ܫܰܝܢܳܐ ܐܰܡܝ̣ܢܳܐ ܕܒܶܪ̈ܝܳܬܳܐ: ܘܰܫܠܳܡܳܐ ܫܰܪܝ̣ܪܳܐ ܕܟܽܠܗܽܘܢ ܣܰܘ̈ܦܶܐ ܘܦܶܢܝ̈ܳܬܳܐ: ܗܰܘ̇ ܕܟܰܕ ܚܘ̣ܒܳܐ ܐܺܝܬܰܝܟ: ܘܚܘ̣ܒܳܐ ܡܶܬܩܪܶܐ ܐܰܢ̱ܬ: ܘܰܒܗܳܢܳܐ ܫܡܳܐ ܛܳܒ ܡ̣ܶܢ ܟܽܠܗܘܢ ܫܡܳܗܝ̣̈ܢ ܚܳܕܶܐ ܐܰܢ̱ܬ ܕܒܶܗ ܪܳܚܶܡ ܐ̱ܢܳܫܳܐ ܡܶܬܝ̣ܕܰܥ ܐܰܢ̱ܬ: ܘܠܰܐܝܠܶܝܢ ܕܒܶܗ ܐܰܚܝ̣ܕܝ̣ܢ ܡܝܰܩܰܪ ܐܰܢ̱ܬ: ܘܒܶܗ ܒܚܘ̣ܒܳܐ ܐܶܬ̣ܩ̣ܰܪܰܒܬ ܚܠܳܦܰܝܢ ܩܘ̣ܪܒܳܢܳܐ ܡܩܰܒܠܳܐ: ܘܪܘ̣ܚܳܐ ܗܰܢܺܝܳܐܐ ܟܰܕ ܒܰܙܩܝ̣ܦܳܟ ܬܪܰܥ̣ܬ ܠܰܣܝܳܓܳܐ ܕܰܒܥܶܠܕܒܳܒܘ̣ܬܳܐ: ܘܒܰܕܡܳܐ ܕܰܩܢܘܡܳܟ ܫܰܝܶܢ̣ܬ ܡܳܐ ܕܒܰܫܡܰܝܳܐ ܘܡܳܐ ܕܒܰܐܪܥܳܐ ܘܰܐܪܺܝ̣ܡܬ ܪܓܝ̣ܙܽܘܬܳܐ ܡ̣ܶܢ ܡܨܰܥܬܳܐ: ܟܰܕ ܥܒ̣ܰܕܬ ܠܬܰܪ̈ܬܰܝܗܶܝܢ ܚܕܳܐ: ܒܝܰܕ ܚܕܳܝܘܬܳܐ ܠܳܐ ܡܶܬܦܰܠܓܳܢܝ̣ܬܳܐ ܕܰܐܠܳܗܘ̣ܬܳܟ ܐܝ̣ܬܝ̣ܳܝ̣ܬܳܐ: ܘܐ̱ܢܳܫܘܬܳܟ ܙܰܒܢܳܝ̇ܬܳܐ ܕܒܳܗ̇ ܩ̣ܪܰܝܬ ܠܪ̈ܰܚܝ̣ܩܶܐ ܘܰܠܩܰܪ̈ܝ̣ܒܶܐ: ܘܶܐܣ̣ܰܪܬ ܐܶܢܽܘܢ ܒܰܐܘܝܽܘܬܳܐ ܕܪܶܚܡܬܳܟ ܐܰܠܳܗܳܝܬܳܐ ܘܰܒܒܰܝܬܳܝܽܘܬܳܐ ܕܡܰܠܟܘ̣ܬܳܟ ܡܬܽܘܡܳܝܬܳܐ: ܘܣܰܒ̣ܰܪܬ ܫܠܳܡܳܐ ܘܫܰܝܢܳܐ ܠܥܳܠܡܳܐ: ܟܰܕ ܒܰܫܠܳܡܳܐ ܕܪܝ̣ܫ ܡܰܠܰܐܟ̈ܶܐ ܣܰܒ̣ܰܪܬ ܒܰܛܢܳܟ ܠܶܐܡܳܟ ܒܬܘ̣ܠܬܳܐ: ܘܒܰܫܠܳܡܳܐ ܦܶܓܥܰܬ݀ ܐܶܡܳܟ ܒܶܐܠܝ̣ܫܒܰܥ ܐܶܡܶܗ ܕܝܽܘܚܰܢܳܢ ܟܳܪܘ̣ܙܳܟ: ܘܰܒܚܰܕܘܬܶܗ ܕܰܫܠܳܡܳܟ ܪܗ̣ܶܛ ܘܕܳܨ ܩܘ̣ܕܡܰܝܟ ܐܰܝܟ ܥܰܒܕܳܐ ܩܕܳܡ ܡܳܪܶܗ: ܘܰܒܡܰܘܠܳܕܳܟ ܫܠܳܡܳܐ ܣܰܒ̣ܰܪܘ̱ ܥܝ̣ܪ̈ܶܐ ܠܪ̈ܳܥܰܘܳܬܳܐ ܘܰܫܠܳܡܳܐ ܝܰܗ̣ܒܬ ܠܢܶܫ̈ܶܐ ܕܣܰܒ̣ܰܪ̈ܝ̱ ܥܰܠ ܩܝܳܡܬܳܟ ܡܫܰܒܰܚܬܳܐ: ܘܒܰܫܠܳܡܳܐ ܥܰܠ̣ܬ ܠܥܶܠܝ̣ܬܳܐ ܕܒܳܗ̇ ܟܢܝ̣ܫܺܝܢ ܗ̱ܘܰܘ ܬܰܠܡܝ̣̈ܕܶܐ ܕܝ̣ܠܳܟ ܩܰܕܝ̣̈ܫܶܐ: ܘܫ̣ܰܪܰܪܬ ܐܶܢܽܘܢ ܥܰܠ ܢܘ̣ܚܳܡܳܟ: ܫܠܳܡܳܐ ܝܰܗ̣ܒܬ ܠܫܠܝ̣̈ܚܰܝܟ ܩܰܕܝ̣̈ܫܶܐ ܟܰܕ ܐܶܬ̣ܥܰܠܝ̣ܬ ܨܶܝܕ ܫܳܠܘ̣ܚܳܟ ܘܐܶܡ̣ܰܪܬ ܠܗܘܢ: ܫܠܳܡܳܐ ܕܝ̣ܠܝ̱ ܫܳܒܶܩ ܐ̱ܢܳܐ ܠܟܘܢ: ܘܠܳܐ ܗ̱ܘܳܐ ܐܰܝܟܢܳܐ ܕܝܳܗܶܒ ܥܳܠܡܳܐ ܝܳܗܶܒ ܐ̱ܢܳܐ ܠܟܘܢ: ܗܳܢܰܘ ܦܘ̣ܩܕܳܢܝ̱ ܕܬ̣ܰܚܒܽܘܢ ܚܰܕ ܠܚܰܕ ܐܰܝܟܢܳܐ ܕܶܐܢܳܐ ܐܰܚܶܒ̇ܬܟܽܘܢ: ܠܗܢܳܐ ܚܘ̣ܒܳܐ ܛܰܪ ܠܰܢ ܦܳܪܘ̣ܩܰܢ: ܘܒܶܗ ܫܰܪܰܪ ܠܪ̈ܶܥܝܳܢܰܝܢ: ܒܚܘ̣ܒܳܟ ܢ̇ܶܬܶܐܣܰܪ ܥܰܡ ܚܕ̈ܳܕܶܐ: ܚܘ̣ܒܳܟ ܢ̇ܶܛܪܘ̣ܕ ܡ̣ܶܢ ܒܰܝܢܳܬܰܢ ܠܣܶܕ̈ܩܶܐ ܘܚܶܪ̈ܝܳܢܶܐ: ܚܘ̣ܒܳܟ ܢ̣ܶܥܒܶܕ ܠܰܢ ܢܳܛܘ̣ܪ̈ܶܐ ܕܦܘ̣ܩܕܳܢܰܝ̈ܟ ܡܰܚܝ̈ܳܢܶܐ: ܒܚܘ̣ܒܳܟ ܙܓܘ̣ܪ ܡ̣ܶܢܢ ܐܘ̣ܠܨܳܢ̈ܶܐ ܘܕܽܘܘ̈ܳܢܶܐ: ܒܚܘ̣ܒܳܟ ܢ̇ܶܗܘܶܐ ܒܢܰܝ̈ܳܐ ܕܫܰܝܢܳܐ ܘܕܰܫܠܳܡܳܐ: ܒܰܫܠܳܡܳܐ ܐܰܘܳܐ ܠܪ̈ܳܥܰܘܳܬܳܐ ܘܰܓܙܳܪ̈ܰܝܗܽܘܢ: ܒܰܫܠܳܡܳܟ ܒܰܣܶܡ ܠܟܗ̈ܢܶܐ ܒܐ̱ܪ̈ܳܙܰܝܗܘܢ: ܒܰܫܠܳܡܳܟ ܓܡܽܘ̣ܪ ܠܥܺܕܬܳܟ ܘܰܠܝܰܠܕܶܝ̈ܗ̇: ܒܰܫܠܳܡܳܟ ܕܰܒܰܪܶܝܗ̇: ܘܰܒܫܰܝܢܳܟ ܨܰܒܶܬܝ̣ܗ̇: ܒܰܫܠܳܡܳܟ ܗܰܕܳܐ ܠܟܢ̈ܫܶܝܗ̇: ܘܰܒܫܰܝܢܳܐ ܚܰܕܳܐ ܠܰܒܢܶܝ̈ܗ̇: ܒܰܫܠܳܡܳܐ ܘܰܥܶܕ ܠܪ̈ܰܚܝ̣ܩܶܝܗ̇: ܘܰܒܫܰܝܢܳܐ ܛܰܪ ܠܩܰܪ̈ܝ̣ܒܶܝܗ̇: ܒܰܫܠܳܡܳܐ ܙܰܗܳܐ ܠܰܡܫܰܡ̈ܫܳܢܶܝܗ̇: ܘܰܒܫܰܝܢܳܐ ܚܰܝܶܕ ܠܰܡܕܰܒܪ̈ܳܢܶܝܗ̇: ܒܰܫܠܳܡܳܐ ܛܰܟܶܣ ܬܶܓ̈ܡܶܝܗ̇: ܘܰܒܫܰܝܢܳܐ ܝܰܒܶܠ ܥܰܕܥܺܐܕ̈ܶܝܗ̇: ܒܰܫܠܳܡܳܐ ܟܰܢܶܫ ܠܰܪ̈ܓܺܝܙܶܐ: ܘܰܒܫܰܝܢܳܐ ܠܰܚܶܡ ܠܰܣܕܺܝ̈ܩܶܐ: ܒܰܫܠܳܡܳܐ ܡܠܝ̣ ܚܰܕܘ̣ܬܳܐ ܠܰܡܪܺܝܪ̈ܰܝ ܢܰܦܫܳܐ: ܘܰܒܫܰܝܢܳܐ ܢܰܛܰܪ ܠܡܰܪܥܝ̣ܬܳܟ: ܒܰܫܠܳܡܳܐ ܣܰܬܶܬ ܠܪ̈ܶܥܝܳܢܶܐ ܦܠܺܝ̈ܓܶܐ: ܘܰܒܫܰܝܢܳܐ ܥܒܶܕ ܠܚܽܘ̣̈ܫܳܒܰܝܢ ܕܟܰܝ̈ܳܐ: ܒܰܫܠܳܡܳܐ ܦܪܘ̣ܩ ܠܰܢ ܡ̣ܶܢ ܡܳܪ̈ܰܝܳܐ ܠܳܐ ܡܪ̈ܰܚܡܳܢܶܐ ܘܡܰܪܝ̣ܪ̈ܶܐ: ܘܰܒܫܰܝܢܳܐ ܨܰܒܶܬ ܠܰܢ ܒܟܽܠܗܽܘܢ ܥܰܕܥܺܐܕܰܝ̈ܟ: ܒܰܫܠܳܡܳܐ ܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ: ܘܰܒܫܰܝܢܳܐ ܪ̈ܰܚܡܶܐ ܘܫܘ̣ܒܩܳܢܳܐ ܫܰܟܶܢ ܠܰܢ: ܒܰܫܠܳܡܳܐ ܫܪܝ̣ ܡ̣ܶܢܢ ܩܶܛܪ̈ܶܐ ܕܥܰܘܠܳܐ: ܘܰܒܫܰܝܢܳܐ ܬܒܽܘܪ ܡ̣ܶܢܢ ܢܝ̣ܪܶܗ ܕܰܒܥܶܠܕܒܳܒܳܐ: ܫܠܳܡܳܟ ܢ̣ܶܗܘܶܐ ܥܰܡܢ: ܘܫܰܝܢܳܟ ܢ̣ܰܡܠܶܟ ܒܰܝܢܳܬܰܢ: ܚܘ̣ܒܳܟ ܐܰܣܶܢ ܒܬܰܪ̈ܥܝܳܬܰܢ: ܘܪܶܚܡܬܳܟ ܩܒܽܘܥ ܒܠܶܒܰܘ̈ܳܬܰܢ: ܕܢ̇ܰܘܕܶܐ ܠܟ ܡܳܪܶܗ ܕܫܰܝܢܳܐ: ܘܠܰܐܒܘ̣ܟ ܝܳܗܘ̣ܒܶܗ ܕܰܫܠܳܡܳܐ: ܘܰܠܪܘ̣ܚܳܟ ܩܰܕܝ̣ܫܳܐ ܓܳܡܘ̣ܪܶܗ ܕܚܘ̣ܒܳܐ ܫܰܪܝ̣ܪܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀