ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ: ܕܥܰܡ ܨܰܘܡܳܐ ܕܡ̣ܶܢ ܠܰܚܡܳܐ ܢ̇ܨܽܘܡ ܦܘ̣ܡܰܢ ܡ̣ܶܢ ܡܰܡܠ̱ܠܳܐ ܣܰܢܝܳܐ: ܘܠܶܫܳܢܰܢ ܡ̣ܶܢ ܕܰܓܳܠܘ̣ܬܳܐ: ܘܠܶܒܰܢ ܡ̣ܶܢ ܚܘ̣ܫ̈ܳܒܶܐ ܒܝ̣̈ܫܶܐ: ܘܢ̇ܶܫܦܰܪ ܠܳܟ ܒܟܰܣ̈ܝܳܬܰܢ ܘܰܒܓܰܠ̈ܝܳܬܰܢ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܡܰܠܦܳܢܳܐ ܕܩܰܕܝ̣ܫܘ̣ܬܳܐ: ܘܝܳܗܽܘ̇ܒܳܐ ܕܕܰܟܝܘ̣ܬܳܐ: ܠܗܰܘ̇ ܡܚܰܣܝܳܢܳܐ ܕܥܳܢܘܳܝܽܘܬܳܐ: ܘܰܡܗܰܕܝܳܢܳܐ ܕܰܠܘܳܬ ܛܘ̣ܦܣܳܐ ܕܛܘ̣ܒܬܳܢܘ̣ܬܳܐ: ܠܗܰܘ̇ ܕܰܒܨܰܘܡܳܐ ܢ̣ܰܨܰܚ ܠܟ̈ܺܐܢܶܐ ܒܕܳܪ̈ܶܐ ܩܰܕ̈ܡܶܐ: ܘܒܶܗ ܐܰܥ̣ܬܰܪ ܠܰܢܒܺܝ̈ܶܐ ܩܰܕܝ̣̈ܫܶܐ ܒܓܶܠܝ̈ܳܢܶܐ: ܘܒܶܗ ܟܰܠ̣ܶܠ ܠܦܰܠܳܚ̈ܶܐ ܟܰܫܝ̣ܪ̈ܶܐ ܒܰܐܓ̈ܘ̣ܢܶܐ: ܘܒܶܗ ܙܰܗܝ̣ ܠܰܒܬܘ̣̈ܠܳܐ ܓܡܝ̣ܪ̈ܶܐ: ܘܥ̣ܰܠܝ̣ ܐܶܢܽܘܢ ܠܰܡܪ̈ܰܘܡܶܐ: ܘܒܶܗ ܒ̣ܰܛܶܠ ܠܰܓ̈ܙܳܡܶܐ ܡܰܪܝ̣ܪ̈ܶܐ ܡ̣ܶܢ ܬܰܝ̈ܳܒܶܐ ܫܰܪܝ̣ܪ̈ܶܐ: ܘܒܶܗ ܝܰܗ̣ܒ ܟܠܝ̣̈ܠܶܐ ܠܣܳܗ̈ܕܶܐ ܢܰܨܝ̣̈ܚܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܪܳܥܝܳܐ ܫܰܪܝ̣ܪܳܐ ܕܰܠܥܳܢ̈ܳܐ ܕܝ̣ܠܶܗ ܒܡܰܪ̈ܓܶܐ ܗܰܢܺܝ̈ܶܐܐ ܪܳܥܶܐ ܘܰܡܕܰܒܰܪ: ܘܰܠܘܳܬ ܡܥܝ̣ܢܳܐ ܕܡܰܝ̈ܳܐ ܚܰܝ̈ܶܐ ܡܰܫܪܶܐ: ܘܰܒܕܘ̣ܒܳܪ̈ܶܐ ܥܕ̈ܶܢܳܝܶܐ ܡܒܰܣܶܡ: ܘܰܒܬܰܨܒ̈ܝܳܬܳܐ ܦܰܐܝ̈ܳܬܳܐ ܡܨܰܒܶܬ: ܘܡ̣ܶܢ ܟܽܠ ܬܘ̣ܩ̈ܠܳܬܳܐ ܘܟܘ̣̈ܒܶܐ ܘܝܰܥܪܳܐ ܡܫܰܘܙܶܒ: ܗܰܘ̇ ܕܟܰܕ ܚ̣ܙܳܐ ܠܰܐܓܘ̣ܢܳܐ ܫܒܝ̣ܚܳܐ ܕܨܰܘܡܳܐ ܘܝܰܘܡ̈ܳܬܳܐ ܒܪ̈ܝ̣ܟܶܐ ܕܰܢܙܝ̣ܪܘ̣ܬܳܐ: ܕܫܰܦܝ̣ܪ ܐܰܓܥ̣ܠܶܗ ܠܰܢ ܕܢ̇ܶܬܕܰܪܰܫ ܒܰܫܪܳܪܶܗ: ܘܢ̇ܶܬܬܦܝ̣ܣ ܠܦܘ̣ܩܕܳܢܶܗ ܘܢ̇ܶܥܒܶܕ ܨܶܒܝܳܢܶܗ ܘܢ̇ܶܛܰܪ ܦܘ̣ܩܕܳܢܶܗ: ܟܰܕ ܠܘܳܬ ܘܰܥܕܶܗ ܢܰܗܝ̣ܪܳܐܝ̣ܬ ܐܶܬ̣ܝܢܰܢ: ܘܠܰܠܡܺܐܢܶܗ ܦܨܝ̣ܚܳܐܝ̣ܬ ܐܶܬ̣ܩܰܪܰܒܢܰܢ ܒܚܰܕܘ̣ܬܳܐ ܥܰܡ ܕܰܟܝܘ̣ܬܳܐ ܘܩܰܕܝ̣ܫܘ̣ܬܳܐ ܐܳܡܪܝ̣ܢܰܢ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ ܕܰܐܪܒܥܝ̣ܢ: ܦܳܥܠܳܐ ܟܰܫܝ̣ܪܳܐ ܕܰܦܠ̣ܰܚ ܒܰܐܪܥܳܐ ܕܚܰܝ̈ܶܐ ܘܛܳܒܬܳܐ ܙܪܰܥ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ ܕܰܐܪܒܥܝ̣ܢ: ܐܘ̣ܡܳܢܳܐ ܡܗܝ̣ܪܳܐ ܕܳܐܣܝܳܐ ܕܟܽܠ ܟܺܐܒܝ̣̈ܢ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ ܕܰܐܪܒܥܝ̣ܢ: ܩܘ̣ܒܰܪܢܝ̣ܛܝ̣ ܚܰܟܝ̣ܡܳܐ ܕܒܳܢܶܐ ܠܰܢ ܫܶܬܶܐܣܬܳܐ ܛܳܒܬܳܐ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ ܕܰܐܪܒܥܝ̣ܢ: ܥܳܩܽܘ̣ܪܳܐ ܕܣܰܢܝ̈ܳܬܳܐ ܕܰܒܢܰܦܫܳܐ ܘܕܳܚܽܘ̣ܩܳܐ ܕܒܝ̣̈ܫܳܬܳܐ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ ܕܰܐܪܒܥܝ̣ܢ: ܐܘ̣ܪܚܳܐ ܬܡܝ̣ܗܬܳܐ ܕܡܰܣ̇ܩܳܐ ܠܰܫܡܰܝܳܐ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ ܕܰܐܪܒܥܝ̣ܢ: ܡܰܠܦܳܢܳܐ ܘܰܡܚܰܟܡܳܢܳܐ ܕܢܰܗܝ̣ܪ̈ܶܐ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ: ܡܡܰܟܟ݂ܳܢܳܐ ܕܢܰܦܫ̈ܳܬܳܐ ܠܘܳܬ ܝ̣ܕܰܥܬܳܐ ܕܰܫܪܳܪܳܐ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ: ܡܥܰܕܪܳܢܳܐ ܕܦܰܠܳܚ̈ܰܘܗ̱ܝ ܥܰܠ ܛܳܒ̈ܳܬܳܐ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ: ܕܒܶܗ ܟܺܐܢ̈ܶܐ ܩܰܕ̈ܡܳܝܶܐ ܐܶܬ̣ܢܰܨܰܚܘ̱: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ: ܕܒܶܗ ܐܺܠܺܝܳܐ ܢܒܺܝܳܐ ܐܶܬ̣ܚܛܶܦ ܒܰܥܢܳܢܳܐ ܠܰܫܡܰܝܳܐ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ ܡܚܰܘܝܳܢܳܐ ܕܰܬܡܝ̣̈ܗܳܬܳܐ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ ܡܫܰܝܢܳܢܳܐ ܕܰܪܓܝ̣ܙܘ̣ܬܳܐ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ: ܡܫܰܗܝܳܢܳܐ ܕܰܪ̈ܓܝ̣ܓܳܬܳܐ: ܬܳܐ ܒܰܫܠܳܡܳܐ ܨܰܘܡܳܐ ܩܰܕܝ̣ܫܳܐ ܡܩܰܒܠܳܢܳܐ ܕܐܰܝܠܶܝܢ ܕܨܳܝ̇ܡܝ̣ܢ ܠܶܗ ܒܚܘ̣ܒܳܐ ܘܰܒܗܰܝܡܳܢܘ̣ܬܳܐ ܘܩܰܕܝ̣ܫܘ̣ܬܳܐ: ܘܗܳܫܳܐ ܡܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ ܠܳܟ ܕܰܬ̣ܩܰܒܠܝ̣ܘܗ̱ܝ ܠܨܰܘܡܳܐ ܩܰܕܝ̣ܫܳܐ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ: ܘܢ̇ܶܫܡܥܝ̣ܘܗ̱ܝ ܡ̣ܶܢܟ ܘܢܶܥ̇ܒܶܕ ܒܶܗ ܨܶܒܝܳܢܳܟ ܘܰܢ̇ܫܰܡܠܶܐ ܡܶܢܝܳܢܳܐ ܕܨܰܘܡܳܐ ܕܝ̣ܠܳܟ ܩܰܕܝ̣ܫܳܐ: ܘܰܒܦܶܨܚܳܐ ܩܰܕܝ̣ܫܳܐ ܥܰܡ ܙܘ̈ܳܕܶܐ ܛܳܒ̈ܶܐ ܟܽܠܰܢ ܫܰܘܝܳܐܝ̣ܬ: ܘܢܶܚ̇ܕܶܐ ܒܝܰܘܡܳܐ ܪܰܒܳܐ ܕܰܩܝܳܡܬܳܟ ܟܢܝ̣ܫܳܐܝ̣ܬ ܘܥܰܡ ܓܡܝ̣ܪ̈ܶܐ ܘܨܰܝ̈ܳܡܶܐ ܘܢܰܨܝ̣̈ܚܶܐ ܕܰܫܦ̣ܰܪܘ̱ ܠܳܟ: ܢ̇ܫܰܒܚܳܟ ܘܰܢ̇ܗܰܕܪܳܟ ܘܰܢ̇ܩܰܠܣܳܟ ܘܰܢ̇ܪܰܡܪܡܳܟ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀