ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܶܠܬܳܐ ܡܬܘ̣ܡܳܝܳܐ ܕܐܶܬ̣ܒܰܣܰܪ ܕܠܳܐ ܫܘ̣ܚܠܳܦܳܐ ܒܚܰܪܬܳܐ ܕܝܰܘܡ̈ܳܬܳܐ: ܘܐܶܬ̣ܕܰܡܝ̣ ܠܰܢ ܒܟܽܠ ܡܶܕܶܡ ܣܛܰܪ ܡ̣ܶܢ ܚܛܝ̣ܬܳܐ: ܠܗܰܘ̇ ܦܳܪܽܘ̇ܩܳܐ ܕܚ̣ܰܘܺܝ̣ ܒܰܩܢܘ̣ܡܶܗ ܐܘ̣ܪܚܳܐ ܕܦܘ̣ܪܩܳܢܳܐ ܠܓ݂ܶܢܣܳܐ ܐ̱ܢܳܫܳܝܳܐ: ܘܰܕܪܰܫ ܒܝܰܕ ܢܰܦܫܶܗ ܫܒܝ̣ܠܳܐ ܡܰܚܝܳܢܳܐ ܠܛܘ̣ܗܡܳܐ ܡܳܝܘ̣ܬܳܐ: ܠܗܰܘ ܙܳܝܽܘ̇ܢܳܐ ܕܰܒܨܰܘܡܶܗ ܐܰܣܝ̣ ܠܝܰܥܢܘ̣ܬܳܐ ܕܰܙܟ̣ܳܬ݀ ܠܰܐܒܽܘܢ ܐܳܕܳܡ ܒܦܰܪܕܰܝܣܳܐ: ܘܰܒܕܰܪܶܗ ܙܰܟܝ̣ ܠܚܰܝܳܒܘ̣ܬܳܐ ܕܚܰܘܳܐ ܐܶܡܳܐ ܕܫܰܪ̈ܒܳܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܰܬܠܳܬܫܳܥ̈ܝ̣ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝܠܰܢ: ܗܰܘ̇ ܐܳܣܝܳܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ: ܗܰܘ̇ ܡܪܰܚܡܳܢܳܐ ܕܪܰܚ̣ܶܡ ܥܰܠ ܓܶܢܣܰܢ ܕܳܘܝܳܐ ܘܚܰܠܳܫܳܐ ܕܰܒܡܰܚ̈ܘܳܬܳܐ ܘܫܘ̣̈ܡܳܬܳܐ ܐܶܬ̣ܡ̣ܰܚܝ̣: ܟܰܕ ܒܰܥܨܳܒܰܘ̈ܗ̱ܝ ܐܳܣܝ̈ܳܝܶܐ ܐܰܣܝ̣ ܘܰܐܚܠ̣ܶܡ ܒܡܶܠܬܶܗ ܦܳܩܽܘ̇ܕܬܳܐ ܠܰܡܡܰܚ̈ܰܝܳܐ ܕܰܦ̣ܓܰܥܘ̱ ܒܶܗ ܒܙܰܒܢܳܐ ܕܰܡܕܰܒܪܳܢܘ̣ܬܶܗ ܠܩܳܛܢܶܐ ܡܕܝ̣ܢ̱ܬܳܐ ܕܰܓܠܝ̣ܠܳܐ ܟܰܕ ܐܶܙܕܰܡ̣ܰܢ ܫܰܚ̣ܠܶܦ ܡܰܝ̈ܳܐ ܠܚܰܡܪܳܐ: ܘܚ̣ܰܕܺܝ̣ ܠܚܰܬܢܳܐ ܘܠܰܙܡܝ̣̈ܢܶܐ ܒܡܰܥܒܕܳܢܘ̣ܬܳܐ ܕܰܣܥ̣ܰܪ: ܠܪܳܡܘ̣ܬܳܐ ܘܫܘ̣ܥܠܳܝܳܐ ܕܰܒܥܶܠܕܰܪܳܐ ܒ̣ܰܛܶܠ: ܟܰܕ ܐܰܦܶܩ̣ܬܶܗ ܪܘ̣ܚܳܐ ܠܡܰܕܒܪܳܐ ܕܡ̣ܶܢܗ ܢ̣ܶܬܢܰܣܶܐ ܠܰܫܪܳܪܳܐ ܕܗܰܝܡܳܢܘ̣ܬܶܗ ܕܗܰܘ̇ ܩܶܢܛܪܘ̣ܢܳܐ ܢ̣ܰܨܰܚ ܘܰܠܛܰܠܝܳܐ ܕܝ̣ܠܶܗ ܢܰܚ̣ܶܡ ܐܰܝܟ ܡܢܰܚܡܳܢܳܐ ܕܡܝ̣̈ܬܶܐ ܘܥܳܨܽܘ̣̇ܒܳܐ ܕܰܬܒܝ̣ܪ̈ܰܝ ܠܶܒܳܐ: ܥܰܠ ܗܳܕܶܐ ܡܦܝ̣ܣܝ̣ܢܰܢ ܟܰܕ ܐܳܡܪܝ̣ܢܰܢ: ܐܝ̣ܢ܇ ܡܳܪܝܳܐ ܡܪܰܚܡܳܢܳܐ ܐܰܝܟ ܕܚ̣ܰܕܺܝ̣ܬ ܠܰܙܡܝ̣̈ܢܶܐ ܕܡܶܫܬܘ̣ܬܳܐ ܕܩܳܛܢܶܐ ܒܚܰܡܪܳܐ ܕܡ̣ܶܢ ܡܰܝ̈ܳܐ: ܘܒ̣ܰܝܺܐܝ̣ܬ ܠܓܰܪ̈ܒܶܐ ܒܕܘ̣ܟܳܝ ܦܰܓܪ̈ܰܝܗܽܘܢ: ܘܠܰܡܫܰܪ̈ܰܝܳܐ ܒܫܘ̣ܪܳܪ ܓܘ̣ܫܡܰܝ̈ܗܽܘܢ: ܘܠܰܣ̈ܡܰܝܳܐ ܒܦܘ̣ܬܳܚ ܥܰܝܢܰܝ̈ܗܽܘܢ: ܘܠܰܟܪ̈ܝ̣ܗܶܐ ܒܚܘ̣ܠܡܳܢ ܟܺܐܒܰܝ̈ܗܽܘܢ: ܘܰܠܡܰܟ̈ܰܐܒܶܐ ܒܳܐܣܝܘ̣ܬܳܐ ܕܫܘ̣ܚ̈ܢܰܝܗܽܘܢ: ܘܰܠܙܰܟܰܝ ܡܳܟ݂ܣܳܐ ܒܙܘ̣ܕܳܩܶܗ: ܘܰܐܝܟܰܢܳܐ ܡܳܪܝ̱ ܕܡ̣ܶܢ ܠܰܚܡܳܐ ܙܥܘ̣ܪܳܐ ܠܟܰܦ̈ܢܶܐ ܘܠܰܨܪ̈ܝ̣ܟܶܐ ܣܰܒܰܥ̣ܬ: ܗܳܟܰܢܳܐ ܡܳܪܝ̱ ܠܟܰܦܢܘ̣ܬܳܐ ܕܟܽܠܶܗ ܥܰܡܳܟ ܣܰܒܰܥ ܘܬܰܪܣܳܐ ܡ̣ܶܢ ܛܳܒ̈ܳܬܳܟ: ܘܰܐܝܟܰܢܳܐ ܡܳܪܝ̱ ܕܰܒܝܰܕ ܪܶܡܙܳܐ ܕܝ̣ܠܳܟ ܚܓܝ̣ܪ̈ܶܐ ܩ̣ܰܝܶܙܘ̱ ܐܰܝܟ ܐܰܝ̈ܠܶܐ ܡܶܛܽܠ ܕܪܰܚܡܘ̣ܟ ܘܒܳܟ ܗܰܝܡ̣ܶܢܘ̱: ܗܳܟܰܢܳܐ ܡܳܪܝ̱ ܠܗܰܠ̈ܟܳܬܰܢ ܬܰܪܶܨ ܒܐܘ̣ܪܚܳܐ ܕܩܘ̣ܫܬܳܐ ܘܕܰܫܪܳܪܳܐ ܘܒܰܫܒܝ̣ܠܳܐ ܕܙܰܕܝ̣ܩܘ̣ܬܳܐ: ܠܳܐ ܐܰܗ̣ܡܝ̣ܬ ܡ̣ܶܢ ܦܘ̣ܪܩܳܢܳܐ ܕܝ̣ܠܰܢ: ܐܶܠܳܐ ܫ̣ܰܕܰܪܬ ܠܰܒܪܳܐ ܕܝ̣ܠܳܟ ܚܰܒܝ̣ܒܳܐ ܡܶܛܽܠܳܬܰܢ: ܘܡ̣ܶܢ ܫܡܰܝܳܐ ܢܚ̣ܶܬ ܥܰܡ ܣܒܰܪܬܳܐ ܕܪܝ̣ܫ ܡܰܠܰܐܟ̈ܶܐ ܓܰܒܪܺܐܝܶܠ ܘܰܫ̣ܪܳܐ ܘܰܐܓ̣ܶܢ ܒܰܒܬܘ̣ܠܬܳܐ ܡܰܠܝܰܬ݀ ܛܰܝܒܘ̣ܬܳܐ ܘܩܰܕܝ̣ܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܘܶܐܬ̣ܒܰܣܰܪ ܡ̣ܶܢܗ̇ ܦܰܓܪܳܐ ܢܰܦܫܳܢܳܝܳܐ ܕܠܳܐ ܬܰܘܣܶܦܬܳܐ ܕܰܩܢܘ̣̈ܡܶܐ ܘܶܐܬ̣ܝ̣ܠܶܕ ܒܰܒܣܰܪ ܡ̣ܶܢ ܙܰܪܥܳܐ ܕܒܶܝܬ ܕܰܘܺܝ̣ܕ ܕܠܳܐ ܙܘ̣ܘܳܓ݂ܳܐ: ܘܩܰܒ̣ܶܠ ܥܠܰܘܗ̱ܝ ܡܰܘܠܳܕܳܐ ܬܪܰܝܳܢܳܐ ܥܰܡ ܟܽܠܗܽܘܢ ܚܰܫ̈ܶܐ ܠܳܐ ܥܕܺܝ̣̈ܠܶܐ: ܘܶܐܬ̣ܚܙܝ̣ ܒܥܳܠܡܳܐ ܐ̱ܢܳܫܳܐܝ̣ܬ ܘܐܰܠܳܗܳܐܝ̣ܬ: ܘܡ̣ܰܠܝ̣ ܒܰܩܢܘ̣ܡܶܗ ܙܥܘ̣ܪ̈ܝܳܬܳܐ ܘܪܰܘܪ̈ܒܳܬܳܐ ܘܰܗ̣ܘܰܝ̈ ܟܽܠܗܶܝܢ ܕܝ̣ܠܶܗ ܪ̈ܳܡܳܬܳܐ ܘܡܳܟ̈ܳܬܳܐ: ܫ̣ܰܪܝ̣ ܠܡ̣ܶܥܒܰܕ ܘܰܠܡܰܠܳܦܘ̣ ܕܒܰܥܒܳܕܶܗ ܢ̣ܶܬܝ̣ܕܰܥ ܒܰܪ ܡܰܢܘ̣: ܘܰܒܝܘ̣ܠܦܳܢܶܗ ܢ̣ܰܪܓ݂ܶܫ ܥܳܠܡܳܐ ܕܐܰܠܳܗܰܐ ܗ̱ܘ̇ ܘܒܰܪ ܐܰܠܳܗܳܐ: ܐܶܬ̣ܩܪܝ̣ ܠܰܣܡܳܟܳܐ ܣܢܝ̣ܩܳܐ ܘܰܐܥ̣ܬܰܪ ܒܚܰܡܪܳܐ ܛܳܒܳܐ ܕܰܐܣ̣ܓܝ̣ ܒܶܗ: ܒܳܬܰܪ ܢܦ̣ܰܩ ܠܡܰܕܒܪܳܐ ܕܨܳܡ ܐܰܪܒܥܺܝ̣ܢ ܐܝ̣ܡܳܡܝ̣̈ܢ ܘܠܰܝ̈ܠܰܘܳܢ ܕܡܶܬܢܰܣܶܐ ܗ̱ܘܳܐ ܡ̣ܶܢ ܐܳܟܶܠܩܰܪܨܳܐ ܡܳܪܘ̣ܕܳܐ: ܟܰܕ ܟܦ̣ܶܢ ܡܚܝ̣ܠ ܒܐ̱ܢܳܫܘ̣ܬܳܐ ܦ̣ܓܰܥ ܒܶܗ ܣܳܛܳܢܳܐ ܐܶܡ̣ܰܪ ܠܶܗ: ܕܐܶܢ ܐܰܢ̱ܬ ܒܪܶܗ ܕܐܰܠܳܗܳܐ ܚܰܝܳܐ ܐܝ̣ܬܰܝܟ ܐ̱ܡܰܪ ܠܟܺܐܦ̈ܶܐ ܗܳܠܶܝܢ ܕܢ̣ܶܗ̈ܘܝܳܢ ܠܰܚܡܳܐ: ܟܰܕ ܐܶܡ̣ܰܪ ܠܶܗ: ܠܰܘ ܒܠܰܚܡܳܐ ܚܳܝܶܐ ܒܰܪܢܳܫܳܐ ܐܶܠܳܐ ܒܡܶܠܬܳܐ ܕܐܰܠܳܗܳܐ: ܐܝ̣ܢ܇ ܡܳܪܝܳܐ ܒܳܥܶܝܢܰܢ ܡ̣ܶܢܟ ܗܰܒܠܰܢ: ܐܰܝܟ ܕܡܳܟܣܳܐ ܙܰܕܶܩ ܘܐܰܝܟ ܕܙܰܟܰܝ ܘܰܐܝܟ ܕܡܽܘ̣ܪܕܟܰܝ: ܡܶܛܽܠ ܗܳܕܶܐ ܡܦܝ̣ܣܝ̣ܢܰܢ ܠܶܗ ܠܗܰܘ̇ ܕܗܳܠܶܝܢ ܟܽܠܗܶܝܢ ܪܰܘܪ̈ܒܳܬܳܐ ܘܰܬܡܝ̣̈ܗܳܬܳܐ ܣܥ̣ܰܪ ܠܘܳܬܰܢ: ܟܰܕ ܡܶܬܟܰܫܦܝ̣ܢܰܢ ܩܕܳܡܰܘܗ̱ܝ ܐܳܡܪܝ̣ܢܰܢ: ܐܰܕܢܰܚ ܠܰܢ ܡܳܪܝ̱ ܢܘ̣ܗܪܳܐ ܕܝ̣ܕܰܥܬܳܟ ܒܰܣܶܡ ܠܰܢ ܒܙܝ̣ܘܳܐ ܕܫܘ̣ܒܚܳܟ: ܫܰܝܢܳܐ ܘܰܫܠܳܡܳܟ ܢ̣ܶܣܬܰܬܰܬ ܒܢܰܦ̈ܫܳܬܰܢ: ܬܶܫܒܘ̣ܚܬܳܐ ܘܬܰܘܕܺܝ̣ܬܳܐ ܡܰܣܩܝ̣ܢܰܢ ܠܰܬܠܝ̣ܬܳܝܘ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀