ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܠܳܐ ܚܳܫܘ̣ܫܳܐ ܒܐܝ̣ܬܘ̣ܬܶܗ: ܘܕܐܶܬ̣ܳܐ ܠܚܰܫܳܐ ܨܶܒܝܳܢܳܝܳܐ ܒܡܶܬܒܰܪܢܫܳܢܘ̣ܬܶܗ: ܕܠܰܢ ܢܶܥ̣ܒܶܕ ܠܳܐ ܚܳܫܘ̣̈ܫܶܐ ܘܠܳܐ ܡܳܝܘ̣̈ܬܶܐ: ܘܰܒܝܰܕ ܚܰܫ̈ܶܐ ܕܰܩܢܘ̣ܡܶܗ ܣ̣ܰܕܶܩ ܠܶܐܫܛܳܪ ܚܰܘ̈ܒܳܬܰܢ: ܘܠܳܐ ܚܳܫܘ̣ܫܘ̣ܬܳܐ ܫܰܟ̣ܶܢ ܠܓܶܢܣܰܢ ܡܳܝܘ̣ܬܳܐ: ܘܫܰܝܶܢ ܠܥܶܠܳܝ̈ܶܐ ܘܰܠܬܰܚ̈ܬܳܝܶܐ ܒܝܰܕ ܚܰܫܰܘ̈ܗ̱ܝ ܩܰܕܝ̣̈ܫܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܰܬܫܰܥܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܰܢܘ̣ ܗܰܘ̇ ܕܡܶܫ̣ܟܰܚ ܕܐܰܝܟ ܕܙܳܕܶܩ ܢܰܘܕܶܐ ܠܳܟ ܥܰܠ ܐܰܦܰܝ̈ ܛܰܝܒ̈ܘܳܬܳܟ ܕܰܠܘܳܬܰܢ ܐܳܘ ܡܶܠܬܳܐ ܐܰܠܳܗܳܐ: ܗܰܘ̇ ܕܰܗ̣ܘܰܝܬ ܫܰܪܝ̣ܪܳܐܝ̣ܬ ܒܰܪܢܳܫܳܐ ܕܠܰܢ ܬܶܥ̣ܒܶܕ ܒܢܰܝ̈ܳܐ ܕܐܰܠܳܗܳܐ: ܗܰܘ̇ ܕܟܰܕ ܚـܼܙܰܝܬ ܠܓܶܢܣܳܐ ܕܝ̣ܠܰܢ ܕܡ̣ܶܢ ܐܳܟܶܠܩܰܪܨܳܐ ܡܳܪܘ̣ܕܳܐ ܡܰܪܝ̣ܪܳܐܝ̣ܬ ܡܶܫܬ̣ܚܶܩ ܗ̱ܘܳܐ: ܠܚܰܫܳܐ ܘܡܰܘܬܳܐ ܘܰܙܩܝ̣ܦܳܐ ܐܶܬ̣ܰܝܬ ܘܰܦܪܰܩ̣ܬܳܝܗ̱ܝ: ܟܰܕ ܕܶܝܢ ܢܒܺܝ̈ܶܐ ܘܙܰܕܝ̣̈ܩܶܐ ܠܗܳܕܶܐ ܡܶܬܢܰܚܬܳܢܘ̣ܬܳܐ ܕܝ̣ܠܳܟ ܒܥܰܝ̈ܢܶܐ ܕܬܰܪܥܝ̣ܬܳܐ ܕܝ̣ܠܗܽܘܢ ܩܰܕܶܡ̣ܘ̱ ܫܰܘܕܰܥ̣ܘ̱: ܘܰܠܩܶܛܠܳܐ ܕܝ̣ܠܳܟ ܘܠܰܕܒܝ̣ܚܘ̣ܬܳܟ ܗܳܝ̇ ܕܡܶܛܽܠ ܐܳܕܳܡ ܚܰܝܳܒܳܐ ܪܳܫܡܝ̣ܢ ܗ̱ܘܰܘ: ܟܰܕ ܚܰܕ ܡܰܢ ܒܝܰܕ ܕܡܳܐ ܕܝ̣ܠܶܗ ܕܐܶܫ̣ܬܦܰܥ ܠܰܕܡܳܐ ܕܝ̣ܠܳܟ ܕܥܰܠ ܐܰܦܰܝ̈ ܦܘ̣ܪܩܳܢܶܗ ܕܥܳܠܡܳܐ ܡܶܫܬ̣ܦܰܥ ܨܳܐܰܪ ܗ̱ܘܳܐ: ܘܰܐ̱ܚܪܺܢܳܐ ܠܰܒܪܶܗ ܒܰܥܠܳܬܳܐ ܦܳܟܰܪ ܗ̱ܘܳܐ: ܐܰܝܟܰܢܳܐ ܕܠܰܥܠܳܬܳܐ ܕܝ̣ܠܳܟ ܐܰܢ̱ܬ ܕܐܝ̣ܬܰܝܟ ܐܶܡܪܶܗ ܚܰܝܳܐ ܕܐܰܠܳܗܳܐ ܡܛܰܦܶܣ ܗ̱ܘܳܐ: ܚܰܕ ܒܝܰܕ ܡܰܚܰܬܬܶܗ ܕܰܠܡܶܨܪܶܝܢ ܐܘ̣ܪܚܳܐ ܕܝ̣ܠܳܟ ܪܳܫܶܡ ܗ̱ܘܳܐ: ܘܰܐ̱ܚܪܺܢܳܐ ܒܶܐܡܪܳܐ ܗܰܘ̇ ܕܡܶܬ̣ܢܟܶܣ ܗ̱ܘܳܐ ܠܩܶܛܠܳܐ ܕܝ̣ܠܳܟ ܨܳܐܰܪ ܗ̱ܘܳܐ: ܚܰܕ ܒܝܰܕ ܕܶܒܚ̈ܶܐ ܘܢܘ̣̈ܩܳܝܶܐ ܕܰܒܥܰܡܳܐ ܠܰܕܒܝ̣ܚܘ̣ܬܳܟ ܡܚܰܘܶܐ ܗ̱ܘܳܐ: ܘܰܐ̱ܚܪܺܢܳܐ ܕܰܡܫܝ̣ܚܳܐ ܐܳܬܶܐ ܘܡܶܬ̣ܩܛܶܠ ܒܐܘ̣ܪܫܠܶܡ ܘܡܰܚ̇ܪܶܒ ܠܳܗ̇ ܡܶܬ̣ܢܰܒܶܐ ܗ̱ܘܳܐ: ܚܰܕ ܒܶܐܡܪܳܐ ܕܡܶܬ̣ܢܟܶܣ ܗ̱ܘܳܐ ܒܶܝܬ ܪ̈ܰܡܫܶܐ ܠܢܶܟܣܬܳܐ ܕܰܩܢܘ̣ܡܳܟ ܕܰܒܚܰܪܰܬ ܙܰܒܢ̈ܶܐ ܪܳܫܶܡ ܗ̱ܘܳܐ: ܘܰܐ̱ܚܪܺܢܳܐ ܒܙܳܟܘ̣ܬܳܐ ܕܰܢܣ̣ܰܒ ܒܝܰܕ ܣܰܟܝ̣ܢܳܐ (ܢܰܝܙܟܳܐ) ܕܐܰܪܝ̣ܡ ܠܙܳܟܘ̣ܬܶܗ ܕܰܨܠܝ̣ܒܳܟ ܡܝܰܩܪܳܐ ܡܫܰܘ̇ܕܰܥ ܗ̱ܘܳܐ: ܚܰܕ ܕܐܶܢܳܐ ܠܚܰܫܳܐ ܡܛܰܝܰܒ ܐ̱ܢܳܐ: ܥܰܠ ܚܰܫܳܟ ܨܶܒܝܳܢܳܝܳܐ ܕܰܗ̣ܘܳܐ ܚܠܳܦܰܝܢ ܡܶܬ̣ܢܰܒܶܐ ܗ̱ܘܳܐ: ܘܰܐ̱ܚܪܺܢܳܐ ܕܫܰܪܝ̣ܪܳܐܝ̣ܬ ܚܰܫܰܝ̈ܢ ܣܒ̣ܰܠ ܘܟܘ̣ܪ̈ܗܳܢܰܝܢ ܛܥ̣ܶܢ: ܘܰܠܡܳܢܳܐ ܣܘ̣ܡܳܩܝ̣ܢ ܢܰܚ̈ܬܰܝܟ ܘܒܰܕܡܳܐ ܨܒܝ̣ܥܝ̣ܢ ܕܰܩܢܘ̣ܡܳܟ ܡܫܰܐܶܠ ܗ̱ܘܳܐ: ܘܰܐ̱ܚܪܺܢܳܐ ܕܰܫ̣ܕܳܐ ܢܰܦܫܶܗ ܠܡܰܘܬܳܐ ܘܥܰܡ ܥܰܘ̈ܳܠܶܐ ܐܶܬ̣ܡܢܝ̣: ܠܡܰܘܬܳܐ ܕܝ̣ܠܳܟ ܝܳܗܶܒ ܚܰܝ̈ܶܐ ܕܰܒܡܶܨܥܰܬ ܓܰܝ̈ܳܣܶܐ ܡܰܕܟܰܪ ܗ̱ܘܳܐ: ܚܰܕ ܕܓܘ̣ܫܡܝ̱ ܝܶܗ̇ܒܶܬ ܠܡܰܚ̈ܘܳܬܳܐ ܘܐܰܦܰܝ̈ ܠܫܘ̣ܩܳܦܳܐ ܘܦܰܪܨܘ̣ܦܝ̱ ܠܳܐ ܐܰܗ̇ܦܟܶܬ ܡ̣ܶܢ ܒܶܗܬܬܳܐ ܘܪܘ̣ܩܳܐ: ܥܰܠ ܪܘ̣ܩܳܐ ܕܩܰܒ̣ܶܠ ܦܰܪܨܘ̣ܦܳܟ ܡ̣ܶܢ ܥܰܘ̈ܳܠܶܐ ܘܢܶܓ̈ܕܶܐ ܕܒܰܦܪ̈ܳܓܶܠܶܐ ܣܰܝܒ̣ܰܪܬ ܡܰܟܪܶܙ ܗ̱ܘܳܐ: ܘܐ̱ܚܪܺܢܳܐ ܕܒܰܕܡܳܐ ܕܕܺܝܰܬܝ̣ܩܺܝ̣ ܕܝ̣ܠܳܟ ܠܰܐܣܝ̣ܪ̈ܶܐ ܫܳܪܶܐ ܐܰܢ̱ܬ ܡܣܰܒܰܪ ܗ̱ܘܳܐ: ܐܶܫܰܥܝܳܐ ܕܶܝܢ ܗܰܘ̇ ܡܫܰܒܚܳܐ ܒܰܢܒܺܝ̈ܶܐ ܒܝܰܕ ܡܰܬܠܶܗ ܒܰܕܶܩ ܥܰܠ ܛܰܝܒܘ̣ܬܳܟ ܕܥܳܒ̇ܪܳܐ ܠܘܳܬ ܥܰܡܳܟ ܗܰܘ̇ ܕܡ̣ܶܢ ܥܰܡ̱̈ܡܶܐ ܓܒ̣ܰܝܬܳܝܗ̱ܝ: ܐܳܦ ܝܰܘܢܳܢ ܗܝ̣ ܗܳܕܶܐ ܒܰܥܪܘ̣ܩܝܳܐ ܕܡܶܢܳܟ ܡܫܰܘ̇ܕܰܥ ܗ̱ܘܳܐ: ܟܰܕ ܒܡܘ̣ܟܳܟܳܟ ܘܫܶܬܩܳܟ ܩܰܕܶܡ ܗ̱ܘܳܐ ܐܫܰܥܝܳܐ: ܐܰܝܟ ܐܶܡܪܳܐ ܠܢܶܟܣܬܳܐ ܐܶܬ̣ܕܒܰܪ ܘܐܰܝܟ ܢܶܩܝܳܐ ܩܕܳܡ ܓܳܙܘ̣ܙܳܐ ܫܰܬܝ̣ܩ ܗ̱ܘܰܝܬ ܐܳܡܰܪ ܗ̱ܘܳܐ: ܕܰܘܝ̣ܕ ܬܘ̣ܒ ܕܒܰـ̣ܙܰܥܘ̱ ܐܝ̣̈ܕܰܝ ܘܪ̈ܶܓܠܰܝ ܓܰܠܝܳܐܝ̣ܬ ܩܳܥܶܐ ܗ̱ܘܳܐ: ܙܟܰܪܝܳܐ ܕܶܝܢ ܕܢܶܒ̣ܠܰܥ ܪܳܥܝܳܐ ܘܐܶܡܪ̈ܰܘܗ̱ܝ ܢ̣ܶܬܒܰܕܪܽܘܢ ܐܳܡܰܪ ܗ̱ܘܳܐ: ܐܰܢ̱ܬ ܕܶܝܢ ܐܳܘ ܡܳܪܝܳܐ ܠܡ̈ܶܠܶܐ ܕܰܢܒܺܝ̈ܶܐ ܫܰܡܠܝ̣ܬ: ܘܝܘ̣ܩܢܳܐ ܠܘܳܬ ܟܰܪܡܳܐ ܗܰܘ̇ ܕܡ̣ܶܢ ܐܶܫܰܥܝܳܐ ܩܰܕܶܡ ܐܶܬܡܰܠ̣ܰܠ ܕܬܶܒ̣ܥܶܐ ܦܺܐܪ̈ܶܐ ܐܶܬ̣ܰܝܬ: ܩܳܡ̣ܘ̱ ܕܶܝܢ ܦܰܠܳܚ̈ܶܐ ܗܳܢܽܘܢ ܕܠܰܢܒܺܝ̈ܶܐ ܩܰܛܶܠ̣ܘ̱ ܘܨܰܚܝ̣ܘ: ܘܠܳܟ ܕܐܝ̣ܬܰܝܟ ܡܳܪܳܐ ܕܰܢܒܺܝ̈ܶܐ ܘܐܰܠܳܗܳܐ ܕܥܰܠ ܟܽܠ ܠܡܰܘܬܳܐ ܘܠܰܨܠܝ̣ܒܳܐ ܐܫܠ̣ܡܘ̣ܟ: ܘܡܶܛܽܠ ܗܳܕܶܐ ܐܰܝܟ ܡܶܠܬܶܗ ܕܰܢܒܺܝܳܐ ܠܟܰܪܡܳܐ ܡܰܢ ܐܰܚܪܶܒ̣ܬ: ܠܡܰܓܕܠܳܐ ܕܶܝܢ ܗܰܘ̇ ܕܒܶܗ ܥܩ̣ܰܪܬ: ܠܰܣܝܳܓܳܐ ܕܶܝܢ ܬܘ̣ܒ ܬܪܰܥ̣ܬ: ܘܰܠܥܺܕܬܳܐ ܩܰܕܝ̣ܫܬܳܐ ܚܠܳܦ ܨܶܗܝܽܘܢ ܢܨܰܒ̣ܬ: ܟܰܪܡܳܐ ܐܰܝܢܳܐ ܕܥܳܒܶܕ ܦܺܐܪ̈ܶܐ ܩܰܕܝ̣̈ܫܶܐ: ܘܒܰܕܓܽܘܢ ܡܦܝ̣ܣܝ̣ܢܰܢ ܠܳܟ ܚܢܰܢ ܝܰܠ̈ܕܶܝܗ̇ ܕܥܺܕܬܳܐ ܩܰܕܝ̣ܫܬܳܐ ܕܬܶܬ̣ܢܰܛܰܪܝ̱ ܡ̣ܶܢ ܒܝ̣ܫܳܐ ܘܡ̣ܶܢ ܟܽܠܗܽܘܢ ܦܰܚܰܘ̈ܗ̱ܝ ܘܰܪ̈ܓܝ̣ܓܳܬܶܗ: ܘܗܰܒܠܰܢ ܠܝܰܠ̈ܕܝܗ̇ ܕܢ̇ܶܚܰܫ ܒܚܰܫܳܟ: ܘܢ̇ܶܬܒܰܣܰܡ ܒܰܓܢܽܘܢܳܟ ܘܢ̇ܶܫܬܰܒܗܰܪ ܒܰܙܩܝ̣ܦܳܟ: ܘܢܶܚ̇ܕܶܐ ܒܡܰܠܟܘ̣ܬܳܟ: ܘܰܚܠܳܦ ܡܘ̣ܝܳܩܳܐ ܕܥܰܡܳܐ ܕܝܘ̣̈ܕܳܝܶܐ: ܬܶܫܒܘ̣ܚܬܳܐ ܐܰܝ̇ܕܳܐ ܕܫܳܦܪܳܐ ܠܳܟ ܢ̇ܩܰܪܶܒ: ܘܗܰܒ ܠܰܢ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܢܶܦ̇ܠܘ̣ܚ ܒܟܰܪܡܳܐ ܕܝ̣ܠܳܟ ܡܶܬܝܰܕܥܳܢܳܐ: ܘܐܰܣܓܳܐ ܠܰܢ ܫܰܝܢܳܐ ܐܰܡܝ̣ܢܳܐ ܘܰܫܠܳܡܳܐ ܟܰܗܝ̣ܢܳܐ: ܐܰܝܟܰܢܳܐ ܕܢ̣ܺܐܪܰܒ ܒܰܢ ܫܡܳܐ ܕܝ̣ܠܳܟ ܩܰܕܝ̣ܫܳܐ: ܘܐܰܫܘܳܐ ܠܰܢ ܕܕܰܟܝܳܐܝ̣ܬ ܢ̇ܡܰܢܰܥ ܠܥܺܐܕܳܐ ܡܰܦܨܚܳܢܳܐ ܕܰܩܝܳܡܬܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܠܳܐ ܚܳܫܘ̣ܫܳܐ ܕܚ̣ܰܫ ܚܠܳܦܰܝܢ ܒܰܒܣܰܪ: ܘܰܒܪܝ̣ܚܳܐ ܗܰܢܺܝܳܐܐ ܕܚܰܫܰܘ̈ܗ̱ܝ ܠܳܐ ܥܕܝ̣̈ܠܶܐ ܛܰܠܶܩ ܠܪܝ̣ܚܳܐ ܣܰܪܝܳܐ ܕܚܰܫ̈ܶܐ ܕܰܚܛܝ̣ܬܳܐ ܕܟܽܠܶܗ ܥܳܠܡܳܐ: ܛܰܠܶܩ ܗܳܫܳܐ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ ܒܥ̱ܘ̣ܗܕܳܢܳܐ ܕܚܰܫܳܟ ܦܳܪܘ̣ܩܳܝܳܐ ܕܰܚܠܳܦܰܝܢ: ܘܰܠܟܽܠܗܽܘܢ ܚܰܫ̈ܶܐ ܡܣܰܓ̈ܦܳܢܶܐ ܡ̣ܶܢ ܗܰܕܳܡܰܝ̈ܢ ܒܰܛܶܠ: ܘܐܰܩܢܳܐ ܠܢܰܦ̈ܫܳܬܰܢ ܪܝ̣ܚܳܐ ܒܰܣܝ̣ܡܳܐ ܕܕܘ̣ܒܳܪ̈ܶܐ ܢܰܨܝ̣̈ܚܶܐ ܕܰܡܪܰܥܶܝܢ ܠܳܟ: ܕܐܰܢ̱ܬ ܐܝ̣ܬܰܝܟ ܦܝ̣ܪܡܳܐ ܕܚܘ̣ܣܳܝܳܐ ܘܥܶܛܪܳܐ ܕܦܘ̣ܪܩܳܢܳܐ ܘܪܝ̣ܚܳܐ ܒܰܣܝ̣ܡܳܐ ܕܦܳܐܰܚ ܒܢܰܦ̈ܫܳܬܳܐ ܕܣܳܓܘ̣̈ܕܰܘܗ̱ܝ ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀