ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܪܰܒ ܟܘ̣ܡܪ̈ܶܐ: ܡܪܰܝܡܳܐ ܕܰܩܢܘ̣ܡܶܗ ܕܶܒܚܳܐ ܩܰܕܝ̣ܫܳܐ ܩܰܪܶܒ ܚܠܳܦ ܫܘ̣ܒܩܳܢܳܐ ܕܰܚܛܳܗܰܝ̈ܢ: ܘܰܒܚܰܫܳܐ ܕܡܘ̣ܟܳܟܳܐ ܕܝ̣ܠܶܗ ܬܡܝ̣ܗܳܐ ܦܰܪܩܰܢ: ܘܠܰܡܚܘ̣ܬܳܐ ܩܰܕܡܳܝܬܳܐ ܕܩܰܝܣܳܐ ܕܰܥܒܳܪ ܦܘ̣ܩܕܳܢܳܐ ܒܝܰܕ ܩܰܝܣܳܐ ܕܰܙܩܝ̣ܦܳܐ ܐܰܚܠ̣ܶܡ: ܘܰܛܥܳܡܬܳܐ ܚܠܝ̣ܬܳܐ ܘܡܰܚܝܳܢܝ̣ܬܳܐ ܚܠܳܦ ܛܥܳܡܬܳܐ ܡܰܪܝ̣ܪܬܳܐ ܘܩܳܛܘ̣ܠܬܳܐ ܝܰܗ̣ܒ ܘܫܰܟ̣ܶܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܦܶܠܓܶܗ ܕܝܰܘܡܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܘܥܳܒܘ̣ܕܳܐ ܘܒܳܪܘ̣ܝܳܐ ܕܟܽܠ ܗܰܘ ܕܰܩ̇ܢܶܐ ܐܰܢ̱ܬ ܠܳܐ ܡܳܝܘ̣ܬܘ̣ܬܳܐ: ܘܡܶܛܽܠ ܦܘ̣ܪܩܳܢܳܐ ܕܝ̣ܠܰܢ ܒܚܘ̣ܒܳܟ ܣܰܓܺܝܳܐܐ ܘܰܒܨܶܒܝܳܢܳܟ ܛܳܒܳܐ ܠܚܰܫܳܐ ܘܡܰܘܬܳܐ ܐܶܬ̣ܰܝܬ: ܐܰܝܟܰܢܳܐ ܕܰܠܚܰܫܰܝ̈ܢ ܬ̣ܒܰܛܶܠ ܒܚܰܫܳܟ: ܘܰܠܡܰܘܬܰܢ ܬ̣ܡܝ̣ܬ ܒܡܰܘܬܳܟ: ܘܡܶܢ ܥܰܡܳܐ ܕܝܘ̣̈ܕܳܝܶܐ ܨܰܥܪܳܐ ܘܒܶܙܚܳܐ ܘܡܘ̣ܝܳܩܳܐ ܣܰܝܒ̣ܰܪܬ: ܘܟܰܕ ܐܝ̣ܬܰܝܟ ܕܰܝܳܢܳܐ ܕܟܽܠ ܩܕܳܡ ܦܝ̣ܠܰܛܘ̣ܣ ܐܺܝ̣ܓܡܘ̣ܢܳܐ ܩܳܡ̣ܬ ܘܐܶܫܬܰܐܰܠ̣ܬ ܐܰܝܟ ܚܰܝܳܒܳܐ: ܘܐܶܫܬܠܶܡ̣ܬ ܠܡܰܘܬܳܐ ܐܰܝܟ ܥܳܒܶܕ ܒܝ̣̈ܫܳܬܳܐ: ܘܟܰܕ ܥܰܠ ܚܰܨܳܐ ܕܰܟܪ̈ܘ̣ܒܶܐ ܒܰܡܪ̈ܰܘܡܶܐ ܡܶܬܒܰܪܰܟ ܐܰܢ̱ܬ ܘܝܳܬܶܒ: ܥܰܠ ܨܠܝ̣ܒܳܐ ܦܳܪܘ̣ܩܳܝܳܐ ܒܨܶܒܝܳܢܳܟ ܐܶܬ̣ܬܠܝ̣ܬ ܘܟܰܕ ܡܰܠܰܐܟ̈ܶܐ ܡܚܰܦܶܝܢ ܐܰܦܰܝ̈ܗܽܘܢ ܡ̣ܶܢ ܓܰܘܙܰܠܬܳܟ ܥܰܪܛܶܠܳܐܝ̣ܬ ܒܰܙܩܝ̣ܦܳܐ ܐܶܬܩܒ̣ܰܥܬ: ܘܫܶܡܫܳܐ ܒܬܶܗܪܳܐ ܐܚܫ̣ܶܟ݂ܬ ܘܒܰܦܫܳܛܳܐ ܕܐܝ̣̈ܕܰܝܟ ܠܳܐܪܰ ܩܰܕܶܫ̣ܬ: ܘܰܠܟܽܠ ܠܣܶܓܕܬܳܐ ܕܝ̣ܠܳܟ ܘܕܐܰܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ ܢܓܰܕܬ: ܘܠܳܐܐܰܪ ܕܰܒܙܰܗܡܘ̣ܬܳܐ ܕܰܥܠܰܘ̈ܳܬܳܐ ܣܪܝ̣ ܗ̱ܘܳܐ ܒܪܝ̣ܚܳܟ ܚܰܠܝܳܐ ܒܰܣܶܡ̣ܬ: ܘܒܰܩܥܳܬܳܐ ܕܥܰܠ ܩܰܝܣܳܐ ܐܦܰܝ̈ ܬܰܪܥܳܐ ܕܗܰܝܟܠܳܐ ܣܰܕܶܩ̣ܬ: ܘܐܰܪܥܳܐ ܐܰܪܥܶܠ̣ܬ ܘܫܘ̣̈ܥܶܐ ܨܰܪܝ̣ܬ: ܘܩܰܒܪ̈ܶܐ ܦܰܬܰܚ̣ܬ: ܘܰܠܣܳܛܳܢܳܐ ܩܛܰܠ̣ܬ: ܘܐܰܟ̣ܪܶܙܬ ܠܰܩܒܝ̣ܪ̈ܶܐ ܚܰܝ̈ܶܐ ܒܠܳܐ ܡܶܬܚܰܒܠܳܢܘ̣ܬܳܐ ܘܡ̣ܶܢ ܩܰܒܪ̈ܰܝܗܽܘܢ ܩܳܡ̣ܘ̱: ܘܰܠܫܘ̣ܪܳܪܳܐ ܕܰܩܝܳܡܬܳܟ ܚܰܘܝ̣ܘ: ܘܒܰܕܓܽܘܢ ܡܦܝ̣ܣܝ̣ܢܰܢ ܠܛܳܒܘ̣ܬܳܟ ܘܰܠܪ̈ܰܚܡܰܝܟ ܡܬܘ̣̈ܡܳܝܶܐ ܗܳܢܽܘܢ ܕܰܐܫܦܰܥ̣ܬ ܥܰܠ ܓܶܢܣܳܐ ܕܝ̣ܠܰܢ ܡܚܝ̣ܠܳܐ ܘܬܰܚܘ̣ܒܳܐ ܒܝܰܘܡܳܐ ܗܳܢܳܐ ܕܥ̱ܘ̣ܗܕܳܢܳܐ ܕܚܰܫܳܟ: ܕܠܰܢ ܬܶܥ̣ܒܶܕ ܠܳܐ ܚܳܫܘ̣̈ܫܶܐ ܘܠܳܐ ܡܶܬܢܰܟܝ̈ܳܢܶܐ: ܘܰܬ̣ܚܰܪܰܪ ܠܰܢ ܡ̣ܶܢ ܟܽܠܗܽܘܢ ܚܰܫ̈ܶܐ ܡܨܰܥܪ̈ܶܐ ܘܰܢܕܝ̣̈ܕܶܐ: ܘܰܒܚܰܝܠܳܟ ܐܰܠܳܗܳܝܳܐ ܬ̣ܙܰܝܶܢ ܠܰܢ ܕܢ̇ܶܬܡܨܶܐ ܕܰܢ̇ܩܘ̣ܡ ܠܘ̣ܩܒܰܠ ܟܽܠܗܽܘܢ ܓܶܐܪ̈ܰܘܗ̱ܝ ܝܳܩ̈ܕܶܐ ܕܒܝ̣ܫܳܐ ܘܢܶܫ̈ܒܶܐ ܕܰܚܛܝ̣ܬܳܐ: ܘܒܳܟ ܢ̇ܶܙܟܶܐ ܠܟܽܠ ܙܢܳܐ ܕܡܰܥܒ̈ܕܳܢܘܳܬܶܗ ܕܗܰܘ̇ ܕܰܠܩܘ̣ܒܠܳܐ: ܘܰܒܢܝ̣ܫܶܗ ܚܰܝܳܐ ܕܰܨܠܝ̣ܒܳܟ ܢܰܛܰܪ ܠܰܢ ܘܰܬܚܶܝܬ ܟܶܢܦܰܘ̈ܗ̱ܝ ܣܰܬܰܪ ܠܰܢ: ܘܰܒܝܰܘܡܳܐ ܐ̱ܚܪܳܝܳܐ ܕܡܶܐܬܝ̣ܬܳܐ ܕܝ̣ܠܳܟ ܠܳܐ ܢ̇ܶܒܗܰܬ ܥܰܡ ܗܳܢܽܘܢ ܕܰܟܦ̣ܰܪܘ̱ ܒܳܟ ܘܒܰܙܰܚ̣ܘ̱ ܒܰܡܕܰܒܪܳܢܘ̣ܬܳܟ: ܘܠܳܐ ܢܶܫ̇ܬܰܢܰܩ ܥܰܡ ܗܳܢܽܘܢ ܕܡܰܝܶܩ̣ܘ̱ ܒܚܰܫܰܝ̈ܟ ܠܳܐ ܥܕܝ̣̈ܠܶܐ: ܠܳܐ ܢ̇ܶܬܛܰܠܰܩ ܒܢܘ̣ܪܳܐ ܥܰܡ ܗܳܢܽܘܢ ܕܨܰܠܒܘ̣ܟ ܡܰܪܳܚܳܐܝ̣ܬ ܥܰܠ ܩܰܝܣܳܐ: ܠܳܐ ܢ̇ܡܘ̣ܫ ܒܚܶܫܘ̣ܟܳܐ ܥܰܡ ܗܳܢܽܘܢ ܕܪܰܩ̣ܘ̱ ܠܳܟ ܒܰܐܦܰܝ̈ܟ ܘܰܒܩܰܢܝܳܐ ܩܰܦ̣ܚܘ̣ܟ: ܠܳܐ ܢ̇ܶܬܶܠ ܘܳܝܳܐ ܠܰܩܢܘ̣̈ܡܰܝܢ ܥܰܡ ܗܳܢܽܘܢ ܕܓܰܕܶܦ̣ܘ̱ ܥܠܰܝܟ ܟܰܕ ܐܳܡ̇ܪܝ̣ܢ: ܕܐܶܢ ܒܪܶܗ ܐܰܢ̱ܬ ܕܐܰܠܳܗܳܐ ܚܘ̣ܬ ܡ̣ܶܢ ܙܩܝ̣ܦܳܐ ܘܰܢ̇ܗܰܝܡܶܢ ܒܳܟ: ܠܳܐ ܢܶܫ̇ܬܠܶܡ ܠܒܶܟܝܳܐ ܘܰܠܚܘ̣ܪܳܩ ܫܢ̈ܶܐ ܥܰܡ ܗܳܢܽܘܢ ܕܐܰܦ̣ܛܰܪܘ̱ ܒܣܶܦ̈ܘܳܬܗܽܘܢ ܘܐܰܢܝ̣ܕܘ̱ ܪ̈ܝ̣ܫܰܝܗܽܘܢ ܘܐܶܡ̣ܰܪܘ̱ ܐܶܗܶܐ ܐܗܶܐ ܚ̣ܙܳܬ݀ ܒܶܗ ܥܰܝܢܰܢ: ܐܶܠܳܐ ܐܰܢ̱ܬ ܐܝ̣ܬܰܝܟ ܡܳܪܝ̱ ܚܘ̣ܣ ܘܪܰܚܶܡ ܥܠܰܝܢ ܒܗܳܝ̇ ܫܳܥܬܳܐ ܡܰܠ̣ܝܰܬ݀ ܩܶܢܛܳܐ: ܘܫܰܘܙܶܒ ܠܟܽܠܰܢ ܥܰܒܕܰܝ̈ܟ ܕܡܶܬܓܰܪܓܚܝ̣ܢܰܢ ܗܳܫܳܐ ܩܕܳܡܰܝܟ: ܘܰܡܰܝܰܩܪܝ̣ܢܰܢ ܠܚܰܫܰܝ̈ܟ ܡܰܥܒ̈ܕܰܝ ܚܰܝ̈ܶܐ ܘܡܶܫܬܰܒܗܪܝ̣ܢܰܢ ܒܰܨܠܝ̣ܒܳܟ ܘܰܡܥܰܦܩܝ̣ܢܰܢ ܘܰܡܢܰܫܩܝ̣ܢܰܢ ܠܫܘ̣̈ܡܳܬܳܟ: ܘܰܚܬܝ̣ܪܝ̣ܢܰܢ ܒܦܘ̣ܪܩܳܢܳܐ ܕܝ̣ܠܳܟ: ܘܰܠܚܝ̣ ܠܟܽܠܗܶܝܢ ܠܳܐ ܢܳܡܘ̣̈ܣܳܝܘܳܬܰܢ: ܘܰܒܛܶܠܳܠܶܗ ܕܰܨܠܝ̣ܒܳܟ ܣܰܬܰܪ ܠܰܢ: ܘܥܰܡܳܟ ܚܰܬܢܳܐ ܫܡܰܝܳܢܳܐ ܠܡܰܠܟܘ̣ܬܳܟ ܗܳܝ̇ ܡܬܘ̣ܡܳܝܬܳܐ ܐܰܥܶܠ ܠܰܢ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀