ܦܪܽܘ̣ܡܝܽܘܢ

ܫܘ̣̈ܒܚܶܐ ܠܳܐ ܡܶܬܡܰܠ̈ܠܳܢܶܐ ܘܗܶܕܪ̈ܶܐ ܠܳܐ ܡܶܬܦܰܣ̈ܩܳܢܶܐ ܢܶܫ̇ܬܘܶܐ ܕܢ̇ܰܣܶܩ: ܠܗܰܘ ܦܳܪܘ̣ܩܳܐ ܕܰܥܒ̣ܰܕ ܠܰܙܩܝ̣ܦܶܗ ܙܰܝܢܳܐ ܚܰܣܝ̣ܢܳܐ ܠܡܰܪܥܝ̣ܬܶܗ: ܘܝܰܗ̣ܒܶܗ ܣܰܒܪܳܐ ܕܦܘ̣ܪܩܳܢܳܐ ܠܝܳܪܬܘ̣ܬܶܗ: ܘܪܰܡ̣ܪܶܡ ܒܶܗ ܩܰܪܢܳܐ ܕܥܺܕܬܶܗ ܘܢ̣ܰܛܰܪ ܒܶܗ ܓܙܳܪܳܐ ܕܡܰܪܥܝ̣ܬܶܗ: ܘܐܰܒܗ̣ܶܬ ܒܶܗ ܠܥܰܡܳܐ ܕܰܟܦ̣ܰܪ ܒܶܗ: ܘܐܰܦ̣ܨܰܚ ܒܶܗ ܠܥܰܡ̱̈ܡܶܐ ܕܗܰܝܡ̣ܶܢܘ̱ ܒܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܒܪܳܐ ܝ̣ܚܝ̣ܕܳܝܳܐ ܡܶܠܬܶܗ ܕܐܰܒܳܐ: ܝܘ̣ܩܢܳܐ ܘܛܰܒܥܳܐ ܠܳܐ ܡܶܫܬܰܚܠܦܳܢܳܐ ܕܝܳܠܘ̣ܕܶܗ: ܗܰܘ ܕܡܶܛܽܠ ܣܰܓܺܝܐܘ̣ܬ ܛܳܒܘ̣ܬܳܐ ܕܝ̣ܠܳܟ ܚܳܣ̣ܬ ܥܰܠ ܓܒܝ̣ܠܬܳܟ ܕܐܶܒ̣ܕܰܬ݀ ܘܐܶܬ̣ܬܰܚܬܝ̣ܬ ܠܦܘ̣ܪܩܳܢܰܢ: ܘܰܒܨܶܒܝܳܢܳܐ ܕܝ̣ܠܳܟ ܠܦܰܓܪܰܢ ܚܳܫܘ̣ܫܳܐ ܐܶܬ̣ܚܰܝܰܕܬ ܡ̣ܶܢ ܡܰܪܒܥܳܐ ܒܬܘ̣ܠܳܝܳܐ: ܘܚܰܫ̣ܬ ܒܚܰܫܰܝ̈ܢ ܥܰܠ ܕܬ̣ܰܚܶܫ ܠܚܰܫܰܝ̈ܢ ܒܚܰܫܳܟ: ܡܝ̣ܬܬ ܡܰܘܬܳܐ ܐܝܟ ܟܽܠܢܳܫ ܘܐܰܚܝ̣ܬ ܒܡܰܘܬܳܟ ܠܟܽܠܰܢ ܐܰܝܟܰܢܳܐ ܕܰܠܥܺܕܬܳܐ ܘܰܒܢܶܝ̈ܗ̇ ܢ̣ܶܗܘܶܐ ܦܘ̣ܪܩܳܢܳܐ: ܘܫܰܚܠ̣ܶܦܬ ܡܰܘܬܳܐ ܠܘܳܬ ܚܰܝ̈ܶܐ ܘܚܰܫ̈ܶܐ ܠܠܳܐ ܚܳܫܘ̣ܫܘ̣ܬܳܐ: ܐܰܢ̱ܬ ܓܶܝܪ ܡܶܛܽܠ ܕܐܰܠܳܗܳܐ ܐܝ̣ܬܰܝܟ ܒܰܟܝܳܢܳܐ: ܘܐܳܦܶܢ ܠܒܶܣܪܳܐ ܕܰܡܚܝ̣ܠܘ̣ܬܳܐ ܐܶܬ̣ܚܰܝܰܕܬ: ܟܰܕ ܠܘܳܬ ܚܰܫܳܐ ܐܶܬܩ̣ܰܪܰܒܬ ܘܰܠܨܰܥܪܳܐ ܕܡܶܢ ܝܘ̣̈ܕܳܝܶܐ ܩܰܒܶܠ̣ܬ: ܐܶܬ̣ܬܙܝ̣ܥܘ̱ ܟܝ̈ܳܢܶܐ ܘܐܶܬܒܰܠ̣ܗܝ̣ܘ ܘܐܶܬ̣ܪܗܶܒܘ̱ ܐܶܣܛܘ̣̈ܟܣܶܐ ܟܰܕ ܠܳܐ ܣܰܝܒ̣ܰܪܘ̱ ܠܫܝ̣ܛܘ̣ܬܳܐ ܕܒܳܪܘ̣ܝܗܽܘܢ: ܘܒܰܕܓܽܘܢ ܫܶܡܫܳܐ ܡܰܢ ܚܰܦܝ̣ ܙܰܠܝ̣ܩܰܘ̈ܗ̱ܝ ܟܰܕ ܚܙ̣ܳܟ ܕܒܰܙܩܝ̣ܦܳܐ ܬ̇ܠܶܐ̣ ܐܰܢ̱ܬ: ܐܰܝܟܰܢܳܐ ܕܠܶܒܳܐ ܩܰܫܝܳܐ ܘܠܳܐ ܡܶܬܬܰܘܝܳܢܳܐ ܕܗܳܢܽܘܢ ܕܨܰܠܒܘ̣ܟ ܢܶܒ̣ܗܰܬ ܕܰܠܡܳܪܗܽܘܢ ܘܦܳܪܘ̣ܩܗܽܘܢ ܠܳܐ ܨܒ̣ܰܘ ܕܢܶܫ̣ܬܰܘܕܥܽܘܢ: ܫܘ̣̈ܥܶܐ ܐܨܛܰܪܝ̣ܘ: ܐܰܦܰܝ̈ ܬܰܪܥܳܐ ܐܣ̣ܬܕܶܩܘ̱: ܐܰܪܥܳܐ ܪܶܥܠ̣ܰܬ݀ : ܝ̣ܗܘ̣ܕܳܐ ܡܶܬ̣ܚܢܶܩ: ܡܝ̣̈ܬܶܐ ܩܳܝܡܝ̣ܢ: ܟܰܕ ܠܰܫܪܳܪܳܗ̇ ܕܰܩܝܳܡܬܳܐ ܩܳܕܡܝ̣ܢ ܗ̱ܘܰܘ ܡܚܰܘܶܝܢ: ܘܕܰܐܠܳܗܳܐ ܫܰܪܝ̣ܪܳܐ ܐܝ̣ܬܰܘܗ̱ܝ ܗܰܘ ܕܰܙܩܝ̣ܦ ܩܳܥܶܝܢ ܗ̱ܘܰܘ: ܩܶܢܛܪܘ̣ܢܳܐ ܡܰـܙܥܶܩ ܕܗܳܢܰܘ ܒܪܶܗ ܕܐܰܠܳܗܳܐ ܫܰܪܝ̣ܪܳܐܝ̣ܬ: ܓܰܝܳܣܳܐ ܬܰܘܕܝ̣ܬܳܐ ܡܩܰܪܶܒ ܗ̱ܘܳܐ: ܘܰܒܝܰܕ ܦܘ̣ܪܫܳܢܳܐ ܕܢܰܦܫܳܟ ܡܶܢ ܦܰܓܪܳܟ: ܠܡܰܘܬܳܐ ܨܶܒܝܳܢܳܝܳܐ ܕܰܚܠܳܦܰܝܢ ܚܰܘܝ̣ܬ: ܟܰܕ ܐܰܠܳܗܘ̣ܬܳܐ ܡܰܢ ܠܳܐ ܡܶܢ ܦܰܓܪܳܐ ܐܰܪܚܩ̣ܰܬ݀ ܐܳܦܠܳܐ ܡܶܢ ܢܰܦܫܳܐ ܐܠܳܐ ܠܰܬܪ̈ܰܝܗܽܘܢ ܡܚܰܝܕܳܐ ܗ̱ܘܳܬ: ܘܡܰܘܬܳܐ ܕܝ̣ܠܰܢ ܘܰܚܠܳܦܰܝܢ ܡܝ̣ܬܬ: ܘܠܳܐ ܕܝ̣ܠܳܟ ܘܰܚܠܳܦܰܝܟ: ܚܳܣ: ܘܢܰܦ̈ܫܳܬܳܐ ܕܟܽܠܰܢ ܐܰܓܥܶܠ̣ܬ ܠܰܐܒܘ̣ܟ ܟܰܕ ܐܶܡ̣ܰܪܬ: ܕܐܳܒܝ̱ ܒܐܝ̣̈ܕܰܝܟ ܡܰܓ̇ܥܶܠ ܐ̱ܢܳܐ ܪܘ̣ܚܝ̱: ܘܰܒܝܰܕ ܡܰܚܰܬܬܳܟ ܕܠܰܫܝܘ̣ܠ ܣܒܰܪܬܳܐ ܠܗܳܢܽܘܢ ܕܬܰܡܳܢ ܚܒܝ̣ܫܝ̣ܢ ܗ̱ܘܰܘ ܘܐܰܣܝ̣ܪܝ̣ܢ ܐܰܟ̣ܪܶܙܬ ܟܰܕ ܐܶܡ̣ܰܪܬ ܠܰܐܣܝ̣ܪ̈ܶܐ ܕܦܘ̣ܩܘ̱: ܘܠܰܐܝܠܶܝܢ ܕܰܚܒܝ̣ܫܝ̣ܢ ܒܚܶܫܘ̣ܟܳܐ ܕܐܶܬܓܠܰܘ ܘܐܶܬܢܰܗܰܪܘ̱: ܒܗܳܠܶܝܢ ܬܶܕܡܪ̈ܳܬܳܐ ܪܘܪ̈ܒܳܬܳܐ ܕܰܣܥ̣ܰܪܬ ܠܘܳܬܰܢ ܘܰܣܒ̣ܰܠܬ ܡܶܛܽܠܳܬܰܢ ܟܰܕ ܡܶܬܒܰܩܶܝܢܰܢ ܐܳܘ ܡܳܪܝܳܐ ܡܫܰܒܚܝ̣ܢܰܢ ܘܐܳܡ̇ܪܝ̣ܢܰܢ: ܕܠܳܐ ܗܳܟܰܢܳܐ ܐܝ̣ܬܶܝܗ̇ ܪܰܒܬܳܐ ܘܰܬܡܝ̣ܗܬܳܐ: ܗܳܝ̇ ܕܠܰܒܪܝ̣ܬܳܐ ܬܶܩܪܶܐ ܘܰܬܩܝ̣ܡ ܐܰܝܟ ܗܳܕܶܐ ܕܒܰܙܩܝ̣ܦܳܐ: ܕܬܶܬ̣ܬܠܶܐ ܘܬܶܫ̣ܬܰܘܬܰܦ ܒܚܰܫܰܝ̈ܢ ܘܥܰܡ ܡܰܘܬܳܐ ܬܶܬ̣ܥܰܪܙܰܠ ܘܬ̣ܶܗܘܶܐ ܠܰܢ ܒܪܝ̣ܬܳܐ ܚܰܬܝ̣ܬܬܳܐ: ܘܰܬܩܝ̣ܡ ܠܰܢ ܠܠܳܐ ܡܶܬܚܰܒܠܘ̣ܬܳܐ ܘܣܰܒܪܳܐ ܕܢܘ̣ܚܳܡܳܐ ܘܕܰܩܝܳܡܬܳܐ ܬ̣ܶܙܪܘ̣ܥ ܒܰܢ: ܡܶܛܽܠ ܗܳܕܶܐ ܡܶܬܟܰܫܦܝ̣ܢܰܢ ܠܳܟ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܬܰܫܘܶܐ ܠܟܽܠܰܢ ܕܢ̇ܶܛܥܰܢ ܙܩܝ̣ܦܳܟ ܘܰܢ̇ܡܰܪܶܐ ܒܚܰܫܰܝ̈ܟ ܟܰܕ ܡܳܝ̇ܬܝ̣ܢܰܢ ܠܟܽܠܗܽܘܢ ܚܰܫ̈ܶܐ ܘܰܪ̈ܓܝ̣ܓܳܬܳܐ ܕܒܶܣܪܳܐ: ܘܥܰܡܳܟ ܢ̇ܶܬܩܒܰܪ ܟܰܕ ܩܳܒ̇ܪܝ̣ܢܰܢ ܘܰܡܥܰܦܶܝܢܰܢ ܠܚܶܡܬܳܐ ܘܰܠܪܶܓܬܳܐ ܡܣܰܓܦܳܢܝ̣ܬܳܐ ܕܒܰܢ: ܘܡܶܢܳܟ ܢܶܩ̇ܢܶܐ ܚܰܝ̈ܶܐ ܕܠܳܐ ܚܒܳܠܳܐ ܘܒܰܡ̈ܛܰܠܠܶܐ ܕܢܘ̣ܗܪܳܐ ܒܚܰܕܘ̣ܬܳܐ ܕܰܩܝܳܡܬܳܐ ܡܳܪܳܢܳܝܬܳܐ ܘܕܰܠܥܳܠܰܡ ܢ̇ܩܰܘܶܐ: ܒܬܶܫܒܘ̣ܚܬܳܐ ܘܪܘ̣ܡܪܳܡܳܐ ܕܝ̣ܠܳܟ ܘܐܰܒܘ̣ܟ ܡܒܰܪܟܳܐ ܘܰܕܪܘ̣ܚܳܟ ܩܰܕܝ̣ܫܳܐ ܛܳܒܳܐ ܘܰܣܓܝ̣ܕܳܐ: ܘܰܫ̇ܘܶܐ̣ ܠܳܟ ܒܐܘ̣ܣܺܝܰܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀