ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܡܫܰܒܚܳܐ ܒܥܘ̣ܫܢܳܐ ܕܪܰܒܘ̣ܬܶܗ: ܘܰܣܓܝ̣ܕܳܐ ܒܣܘ̣ܓܳܐܐ ܕܡܘ̣ܟܳܟܶܗ: ܠܗܰܘ ܕܪܳܡ ܡܶܢ ܟܽܠ ܒܫܘ̣ܒܚܶܗ ܘܐܶܬܡ̣ܰܟܰܟ ܡܶܢ ܟܽܠ ܒܚܘ̣ܒܶܗ: ܠܗܰܘ ܡܫܰܡܠܝܳܐ ܒܦܘ̣ܪܩܳܢܶܗ: ܘܗܘ̣ ܟܰܕ ܗܘ̣ ܝ̣ܚܝ̣ܕܳܝܳܐ ܒܪܘ̣ܡܪܳܡܶܗ: ܠܗܰܘ ܕܐܰܚܝ̣ܕ ܟܽܠ ܒܚܰܝܠܳܐ ܕܡܶܠܬܶܗ: ܕܐܶܬ̣ܬܚܶܕ ܡܶܛܽܠ ܕܰܨܒ̣ܳܐ ܒܰܚܢܳܢܶܗ: ܠܗܰܘ ܓܰܐܝܳܐ ܕܐܰܦ̣ܨܰܚ ܠܟܽܠ ܒܕܶܢܚܶܗ ܘܐܰܒ̣ܶܠ ܠܟܽܠ ܒܚܰܫܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܫܰܡ̣ܠܝ̣ ܟܽܠ ܐ̱ܪ̈ܳܙܝ̣ܢ ܒܰܩܢܘ̣ܡܶܗ: ܘܫܰܚ̣ܠܶܦ ܠܚܰܬܝ̣ܬܘ̣ܬܳܐ ܠܗܳܠܶܝܢ ܕܐܶܬ̣ܶܐܡܰܪ̈ܝ̱ ܒܠܶܫܳܢ ܢܳܡܘ̣ܣܳܐ ܘܫܰܢܝ̣ ܠܰܟܬܳܒܳܐ ܥܰܬܝ̣ܩܳܐ: ܫܰܝܢܳܐ ܪܰܒܳܐ ܕܢ̣ܶܫܪܶܐ ܣܝܳܓܳܐ ܕܒܰܡܨܰܥܬܳܐ ܘܒܰܛܠ ܒܢܳܡܘ̣ܣܶܗ ܒܥܶܠܕܒܳܒܘ̣ܬܳܐ ܕܦܘ̣̈ܩܕܳܢܶܐ ܘܐܰܝܬܝ̣ ܠܰܓܡܝ̣ܪܘ̣ܬܳܐ ܠܚܰܕ ܒܰܪܢܳܫܳܐ ܚ̣ܰܕܬܳܐ: ܠܗܳܠܶܝܢ ܡܶܢ ܓܙܘ̣ܪܬܳܐ: ܘܰܠܗܳܠܶܝܢ ܕܰܠܒܰܪ ܡܶܢ ܢܳܡܘ̣ܣܳܐ: ܢܰܓܝ̣ܪ ܪܘ̣ܚܳܐ ܕܐܶܫ̣ܬܓܶܫ ܥܠܰܘܗ̱ܝ ܝܰܡܳܐ ܕܠܝ̣ܚܳܐ ܕܣܳܦܪ̈ܶܐ ܟܰܕ ܡܶܬ̣ܥܰܙܰܙ ܥܠܰܘܗ̱ܝ ܡܳܡܘ̣ܠܳܐ ܕܟܳܗ̈ܢܶܐ: ܡܰܒܘ̣ܥܳܐ ܕܐܶܬ̣ܬܰܪܥܰܬ݀ ܥܠܰܘܗ̱ܝ ܡܶܪܬܳܐ ܕܬܰܢܝ̣ܢܳܐ ܡܶܬܝܰܕܥܳܢܳܐ ܕܢ̣ܶܬܬܨܝ̣ܕ ܒܰܚܣܳܡܳܐ: ܟܰܕ ܗܘ̣ ܥܬܝ̣ܕ ܗ̱ܘܳܐ ܕܰܢ̣ܪܰܨܶܨ ܠܚܰܪܡܳܢܳܐ ܒܥܶܩܒܳܐ ܕܰܙܩܝ̣ܦܶܗ: ܬܰܩܝ̣ܦܳܐ ܕܝܰܗ̣ܒ ܢܰܦܫܶܗ ܘܐܶܬ̣ܠܒܶܟ ܘܐܰܪܟ̣ܶܢ ܪܰܘܡܶܗ ܘܐܶܬ̣ܬܚܶܕ ܘܥܰܠ ܕܰܨܒ̣ܳܐ ܘܐܶܬ̣ܓܰܫܰܡ ܘܐܶܬ̣ܚܒܶܫ: ܘܥܰܠ ܕܰܢܚ̣ܶܬ ܐܶܬ̣ܒܰܣܰܪ ܐܶܬܢ̣ܓܶܕ: ܪܰܒܳܐ ܕܡܶܛܽܠ ܕܝ̣ܠܶܕܬܶܗ ܟܰܪܣܳܐ ܩܰܒܶܠ̣ܬܶܗ ܓܳܓܘ̣ܠܬܳܐ: ܘܥܰܠ ܕܰܣܦ̣ܰܩ ܠܶܗ ܡܰܪܒܥܳܐ ܐܶܬ̣ܦܬܰܚ ܠܶܗ ܩܰܒܪܳܐ: ܚܰܢܳܢܳܐ ܕܩܰܒ̣ܶܠ ܐܶܢܽܘܢ ܠܚܰܫ̈ܶܐ ܕܰܚܠܳܦܰܝܢ ܕܠܳܐ ܪܶܛܢܳܐ ܘܣܰܝܒ̣ܰܪ ܙܩܝ̣ܦܳܐ ܕܠܳܐ ܪܘ̣ܥܳܡܳܐ: ܚܰܝܳܐ ܕܐܶܫܟ̣ܰܚ ܕܰܢ̣ܡܘ̣ܬ ܥܰܠ ܕܰܨܒ̣ܳܐ ܘܐܶܬ̣ܒܰܣܰܪ ܘܐܶܬ̣ܩܒܰܪ ܥܰܠ ܕܰܗ̣ܘܳܐ ܐܰܟܘܳܬܰܢ: ܡܢܰܚܡܳܢܳܐ ܕܡܝ̣̈ܬܶܐ ܕܰܗ̣ܘܳܐ ܐܰܝܟ ܚܰܕ ܡܶܢ ܡܝ̣̈ܬܶܐ ܒܰܚܢܳܢܶܗ: ܟܰܕ ܢܛܝ̣ܪܝ̣ܢ ܒܶܗ ܚܰܝ̈ܶܐ ܕܰܩܢܘ̣ܡܶܗ: ܡܰܠܝܳܐ ܕܚܰܦܝ̣ ܥܘ̣ܬܪܶܗ ܒܡܶܣܟܺܢܘ̣ܬܳܐ ܘܟܰܣܝ̣ ܐܰܠܳܗܘ̣ܬܶܗ ܒܐ̱ܢܳܫܘ̣ܬܶܗ: ܕܘ̣ܡܳܪܳܐ ܕܰܚـܼܙܰܐܘܽܘ̣ܗ̱ܝ ܫܰܠܝ̣̈ܛܳܢܶܐ ܘܠܳܐ ܝܰܕܥܘ̣ܗ̱ܝ: ܘܐܰܒܗ̣ܶܬ ܒܡܘ̣ܟܳܟܶܗ ܠܫ̈ܺܐܕܶܐ: ܘܦܰܪܣܝ̣ ܒܟܘ̣ܪܗܳܢܶܗ ܠܰܐܪ̈ܟܘܳܢܶܐ: ܘܒܰܛܠ ܒܫܝ̣ܛܘ̣ܬܶܗ ܠܚܰܟܝ̣̈ܡܶܐ: ܘܢܶܦ̣ܠܰܬ݀ ܒܥܳܬܶܗ ܒܶܝܬ ܕܳܪ̈ܘ̣ܫܶܐ: ܘܐܶܬ̣ܬܚܶܕܘ̱ ܒܶܗ ܚܰܟܝ̣̈ܡܶܐ ܘܒܳܥܶܝܢ ܕܰܢ̣ܦܰܫܩܘ̣ܢܳܝܗ̱ܝ ܘܠܳܐ ܡܶܬܦܰܫܰܩ ܘܣܳܒܟܝ̣ܢ ܕܰܢ̣ܥܰܩܒܘ̣ܢܳܝܗ̱ܝ ܘܠܳܐ ܡܶܬܥܰܩܰܒ: ܠܳܟ ܐܰܠܳܗܳܐ ܠܳܐ ܡܶܬܕܰܪܟܳܢܳܐ ܡܩܰܪܒܝ̣ܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܬ̣ܶܣܥܘ̣ܪ ܒܰܒܛܝ̣ܠܘ̣ܬܳܐ ܕܪܶܚܡܰܬ݀ ܐ̱ܢܳܫܘ̣ܬܳܟ ܠܥܺܕܬܳܟ ܩܰܕܝ̣ܫܬܳܐ ܦܪܝ̣ܩܰܬ݀ ܒܰܕܡܳܟ ܡܰܚܝܳܢܳܐ: ܘܒܰܛܶܠ ܡܶܢܳܗ̇ ܣܶܕ̈ܩܶܐ ܘܚܶܪ̈ܝܳܢܶܐ: ܘܕܰܥܶܟ ܫܘ̣ܒܗܳܪܳܐ ܕܥܰܡ̱̈ܡܶܐ ܛܳܥܰܝ̈ܳܐ: ܠܩܰܘ̈ܡܶܐ ܕܐܶܪ̈ܶܣܝ̣ܣ ܒܰܥܓܰܠ ܣܬܘ̣ܪ: ܘܡܶܬܢܰܩܡܳܢܳܐ ܗܘܝ̣ ܚܠܳܦ ܝܳܪܬܘ̣ܬܳܐ ܕܝ̣ܠܳܟ ܕܒܰܕܡܳܟ ܩܰܕܝ̣ܫܳܐ ܦܪܰܩ̣ܬܳܗ̇: ܘܗܰܝܡܳܢܘ̣ܬܳܐ ܫܰܪܝ̣ܪܬܳܐ ܒܟܽܠܗܶܝܢ ܥܺـܕ̈ܳܬܳܐ ܘܕܰܝܪ̈ܳܬܳܐ ܣܰܬܶܬ: ܘܰܠܟܽܠܰܢ ܐܰܫܘܳܐ ܠܡܰܠܟܘ̣ܬܳܟ ܘܰܒܢܰܝ̈ܳܐ ܕܝ̣ܠܳܟ ܕܢܘ̣ܗܪܳܐ ܚܰܘܳܐ: ܡܶܛܽܠ ܕܰܡܪܰܚܡܳܢܳܐ ܘܣܰܓܝ̣ ܛܰܝܒܘ̣ܬܳܐ ܐܝ̣ܬܰܝܟ: ܘܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܡܰܣܩܝ̣ܢܰܢ ܒܐܝ̣̈ܕܰܝܟ ܘܥܰܡܳܟ ܘܠܰܐܒܘ̣ܟ ܘܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܶܡܪܳܐ ܚܰܝܳܐ ܕܐܰܠܳܗܳܐ ܘܪܝ̣ܫ ܟܘ̣ܡܪ̈ܶܐ ܕܬܰܘܕܝ̣ܬܰܢ ܝܶܫܘ̣ܥ ܡܫܝ̣ܚܳܐ: ܕܢܰܦܫܳܟ ܣܰܪܶܩ̣ܬ ܘܰܕܡܘ̣ܬܳܐ ܕܥܰܒܕܳܐ ܢܣܰܒ̣ܬ ܘܒܰܪܢܳܫܳܐ ܫܰܪܝ̣ܪܳܐ ܗ̣ܘܰܝܬ: ܘܟܰܕ ܠܳܐ ܣܳܟ ܐܶܫܬܰܚ̣ܠܰܦܬ ܡܶܢ ܗܳܝ̇ ܕܐܝ̣ܬܰܝܟ ܐܰܠܳܗܳܐ: ܘܫܰܟܶܢ ܠܰܢ ܡܳܪܝ̱ ܒܪ̈ܰܚܡܰܝܟ ܣܰܓ̈ܺܝܶܐܐ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒ̣ܢܰܢ ܩܕܳܡܰܝܟ ܕܢ̇ܶܗܘܶܐ ܚܳܫܘ̣̈ܫܶܐ ܒܚܰܫܳܟ: ܘܰܡܕܰܡ̈ܝܳܢܶܐ ܒܡܘ̣ܟܳܟܳܟ: ܐܰܝܟܰܢܳܐ ܕܐܳܦ ܥܰܡܳܟ ܢܶܫ̇ܬܰܒܰܚ: ܘܡܰܢܰܥ ܠܰܢ ܠܝܰܘܡܳܐ ܕܰܩܝܳܡܬܳܟ ܒܚܰܕܘ̣ܬܳܐ: ܘܢܶܚ̇ܕܶܐ ܒܡܰܠܟܘ̣ܬܳܟ ܫܡܰܝܳܢܝ̣ܬܳܐ: ܥܰܡ ܟܽܠܗܽܘܢ ܩܰܕܝ̣̈ܫܰܝܟ: ܡܫܝ̣ܚܳܐ ܡܳܪܰܢ ܘܐܰܠܗܰܢ ܠܥܳܠܡܝ̣ܢ܀