ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܡܶܠܬܳܐ ܡܪܰܝܡܳܐ ܕܡܶܢ ܐܰܒܳܐ ܐܫ̣ܬܰܕܰܪ ܕܰܢ̣ܡܰܠܶܐ ܐ̱ܪ̈ܳܙܶܐ ܕܚܰܙܳܝ̈ܶܐ ܒܰܩܢܘ̣ܡܶܗ: ܘܰܢ̣ܫܰܡܠܶܐ ܡܶܠܰܝ̈ܗܽܘܢ ܒܕܶܒܚܬܳܐ ܕܦܰܓܪܶܗ ܡܶܛܽܠ ܦܘ̣ܪܩܳܢ ܓܒܝ̣ܠܬܶܗ: ܒܪܳܐ ܝ̣ܚܝ̣ܕܳܝܳܐ ܕܐܰܠܳܗܳܐ ܕܐܰܒܪܳܗܳܡ ܨܳܪ ܕܶܡ̈ܘܳܬܶܗ ܘܐܝ̣ܣܚܳܩ ܪܫ̣ܰܡ ܕܒܝ̣ܚܘ̣ܬܶܗ ܕܥܰܠ ܩܰܝܣܳܐ: ܘܚ̣ܰܘܝ̣ ܠܗܽܘܢ ܝܰܘܡܶܗ ܘܰܚܕܝ̣ܘ ܒܦܘ̣ܪܩܳܢܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܠܝ̣ܬܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܡܶܠܬܳܐ ܒܪܶܗ ܕܐܰܒܳܐ ܓܢܝ̣ܙܳܐ: ܗܰܘ̇ ܠܳܐ ܥܒܝ̣ܕܳܐ ܘܠܳܐ ܡܶܬܕܰܪܟܳܢܳܐ ܕܡܶܛܽܠ ܦܘ̣ܪܩܳܢܳܐ ܕܰܒܪܝ̣ܬܳܐ ܕܐܰܣܝ̣ܪܳܐ ܗ̱ܘܳܬ ܘܰܦܟܝ̣ܪܳܐ ܒܫܝ̣ܫܰܠܬܳܐ ܕܰܥܒܳܪ ܦܘ̣ܩܕܳܢܳܐ: ܘܥܰܡ ܒܶܣܪܳܐ ܕܝ̣ܠܰܢ ܪܰܟܶܒ̣ܬ ܐܰܢ̱ܬ ܠܳܟ ܩܢܘ̣ܡܳܐܝ̣ܬ ܘܰܟܝܳܢܳܐܝ̣ܬ: ܘܡܶܢ ܒܬܘ̣ܠܬܳܐ ܒܰܪ̱ܬ ܕܰܘܝ̣ܕ ܐܶܬܝ̣ܠܶܕܬ ܦܰܓܪܳܢܳܐܝ̣ܬ: ܟܰܕ ܐܰܢ̱ܬ ܐܰܠܳܗܳܐ ܐܝ̣ܬܰܝܟ ܗ̣ܘܰܝܬ ܒܰܪܢܳܫܳܐ ܠܳܐ ܡܶܫܬܰܚܠܦܳܢܳܐܝ̣ܬ: ܒܪܶܗ ܕܕܰܘܝ̣ܕ ܘܰܒܪܶܗ ܕܐܰܒܪܳܗܳܡ ܐܶܫܬܰܡܰܗ̣ܬ ܐ̱ܢܳܫܳܐܝ̣ܬ: ܘܟܰܕ ܨܒ̣ܰܝܬ ܕܰܬ̣ܚܰܘܶܐ ܠܝܘ̣̈ܕܳܝܶܐ ܕܐܰܢ̱ܬ ܗ̱ܘ̣ ܐܰܠܳܗܶܗ ܕܐܰܒܪܳܗܳܡ ܘܡܳܪܶܗ ܕܕܰܘܝ̣ܕ ܐܶܡ̣ܰܪܬ ܠܘܳܬܗܽܘܢ: ܐܰܒܪܳܗܳܡ ܐܰܒܳܐ ܕܝ̣ܠܟܽܘܢ ܡܣܰܘܰܚ ܗ̱ܘܳܐ ܕܢܶܚ̣ܙܶܐ ܝܰܘܡܳܐ ܕܝ̣ܠܝ̱ ܘܰܚ̣ܙܳܐ ܘܰܚ̣ܕܝ̣: ܘܥܰܕܠܳܐ ܢ̣ܶܗܘܶܐ ܐܒܪܳܗܳܡ ܐܶܢܳܐ ܐܺܝ̇ܬܰܝ: ܘܕܰܘܝ̣ܕ ܐܶܡ̣ܰܪ: ܕܐܶܡ̣ܪ ܡܳܪܝܳܐ ܠܡܳܪܝ̱ ܕܬܶܒ ܠܳܟ ܡܶܢ ܝܰܡܝ̣ܢܝ̱: ܘܐܶܢ ܒܪܶܗ ܐܺܝ̇ܬܰܝ ܐܰܝܟܰܢܳܐ ܒܪܘ̣ܚ ܩܳܪܶܐ ܠܝ̣ ܡܳܪܝܳܐ: ܐܰܢ̱ܬ ܗ̱ܘ̣ ܕܰܒܐ̱ܪܳܙܳܟ ܐܝ̣ܣܚܳܩ ܐܰܝܟ ܐܶܡܪܳܐ ܐܶܬ̣ܕܒܰܪ ܡܶܢ ܐܰܒܘ̣ܗ̱ܝ ܠܢܶܟܣܬܳܐ ܕܰܠܨܶܒܝܳܢܶܗ ܕܐܰܒܳܐ ܕܝ̣ܠܳܟ ܐܶܬ̣ܰܝܬ ܕܰܬ̣ܫܰܡܠܶܐ: ܒܐ̱ܪܳܙܳܟ ܪܟ݂ܶܒ ܐܝ̣ܣܚܳܩ ܥܰܠ ܚܡܳܪܳܐ ܐܟܡܳܐ ܕܐܰܢ̱ܬ ܪܟܶܒ̣ܬ ܥܰܠ ܥܝ̣ܠܳܐ ܟܰܕ ܥܳܐܶܠ ܗ̱ܘܰܝܬ ܠܐܘ̣ܪܫܠܶܡ ܠܡܶܬ̣ܕܒܳܚܘ̣: ܒܐ̱ܪܳܙܳܟ ܛܥ̣ܶܢ ܐܝ̣ܣܚܳܩ ܩܰܝ̈ܣܶܐ ܘܰܣܠ̣ܶܩ ܠܛܘ̣ܪܳܐ ܐܰܝܟ ܕܐܰܢ̱ܬ ܛܥܶܢ̣ܬ ܩܰܝܣܳܐ ܕܰܥܠܰܘܗ̱ܝ ܐܶܨܛܠ̣ܶܒܬ ܘܰܣܠ̣ܶܩܬ ܠܓܳܓܘ̣ܠܬܳܐ: ܒܐ̱ܪܳܙܳܟ ܡܫܰܐܶܠ ܗ̱ܘܳܐ ܐܝ̣ܣܚܳܩ ܠܰܐܒܘ̣ܗ̱ܝ ܕܐܰܝܟܰܐ ܗ̱ܘ̇ ܐܶܡܪܳܐ ܠܰܥܠܳܬܳܐ: ܐܰܝܟ ܕܐܰܢ̱ܬ ܠܰܐܒܘ̣ܟ ܕܐܶܢ ܡܶܫܟܚܳܐ ܢܶܥ̣ܒܪܰܢܝ̱ ܟܳܣܳܐ ܗܳܢܳܐ: ܒܐ̱ܪܳܙܳܟ ܒܢ̣ܳܐ ܥܠܳܬܳܐ ܐܝ̣ܣܚܳܩ ܥܰܡ ܐܰܒܘ̣ܗ̱ܝ ܐܰܝܟ ܕܐܰܢ̱ܬ ܥܰܡ ܐܰܒܘ̣ܟ ܐܰܩܝ̣ܡܬ ܫܶܬܐܣܝ̈ܗ̇ ܕܐܰܪܥܳܐ: ܒܐ̱ܪܳܙܳܟ ܐܶܬ̣ܦܟܰܪ ܐܝ̣ܣܚܳܩ ܟܰܕ ܫܰܬܝ̣ܩ ܘܐܶܬܬܣܝ̣ܡ ܥܰܠ ܩܰܝ̈ܣܶܐ ܐܰܝܟ ܕܐܰܢ̱ܬ ܐܶܣ̣ܬܰܟܰܟ݂ܬ ܥܰܠ ܩܰܝܣܳܐ ܟܰܕ ܫܰܬܝ̣ܩ ܗ̱ܘܰܝܬ: ܒܐ̱ܪܳܙܳܟ ܐܝ̣ܣܚܳܩ ܐܶܡܪܳܐ ܕܡܶܢ ܐܝ̣ܠܳܢܳܐ ܕܰܒܥܶܕܳܢܶܗ ܐܶܬ̣ܚܙܝ̣ ܐܶܬ̣ܕܒܰܚ ܚܠܳܦܰܘܗ̱ܝ ܘܐܶܬ̣ܦܪܶܩ ܐܰܝܟ ܕܐܰܢ̱ܬ ܡܳܪܝ̱ ܕܐܶܡܪܳܐ ܐܶܬ̣ܩܪܺܝ̣ܬ: ܘܕܶܟܪܳܐ ܕܡܶܢ ܢܒܝ̣ܬܳܐ ܐܘܟܝ̣ܬ ܒܬܘ̣ܠܬܳܐ ܒܰܢܒܺܝܘ̣ܬܳܐ ܡܶܛܽܠ ܕܰܠܦܘ̣ܪܩܳܢ ܥܳܠܡܳܐ ܐܶܬ̣ܰܝܬ: ܘܰܚܠܳܦ ܟܽܠܶܗ ܥܳܠܡܳܐ ܐܶܬ̣ܕܒܰܚ̣ܬ: ܘܡܶܢ ܦܟܳܪ̈ܶܐ ܕܛܳܥܝܘ̣ܬܳܐ ܘܕܰܚܛܝ̣ܬܳܐ ܒܚܰܫܳܟ ܘܩܶܛܠܳܟ ܐܶܬ̣ܚܰܪܰܪ: ܘܐܰܝܟܰܢܳܐ ܡܳܪܝ̱ ܕܰܚ̣ܕܝ̣ ܐܰܒܪܳܗܳܡ ܒܐ̱ܪܳܙܳܟ ܘܰܒܦܘ̣ܪܩܳܢܶܗ ܕܐܝ̣ܣܚܳܩ ܘܐܳܦ ܣܰܪܳܐ ܒܰܚܙܳܬܶܗ ܕܰܒܪܳܗ̇: ܗܳܟܰܢܳܐ ܚ̣ܕܝ̣ ܐܰܒܘ̣ܟ ܒܦܘ̣ܪܩܳܢ ܥܳܠܡܳܐ: ܘܝܳܠܶܕܬܳܟ ܒܰܩܝܳܡܬܳܟ: ܘܐܳܦ ܠܰܢ ܡܳܪܝ̱ ܫܪܝ̣ ܘܚܰܪܰܪ ܡܶܢ ܦܟܳܪ̈ܶܐ ܕܰܚܛܝ̣ܬܳܐ ܘܡܶܢ ܡܰܘܬܳܐ ܬܶܢܝܳܢܳܐ: ܚܰܕܳܐ ܠܰܢ ܒܝܰܘܡܳܟ ܪܰܒܳܐ ܘܐܰܦܨܰܚ ܠܰܢ ܒܰܚܙܳܬܳܟ ܐܰܠܳܗܳܝ̇ܬܳܐ: ܘܥܰܠܳܐ ܘܰܐܣܶܩ ܠܰܢ ܠܥܘ̣ܒܶܗ ܕܐܰܒܪܳܗܳܡ ܘܕܐܝ̣ܣܚܳܩ ܘܰܕܝܰܥܩܘ̣ܒ ܘܟܰܕ ܠܰܢ ܘܰܠܥܰܢܝ̣̈ܕܰܝܢ ܡܒܰܣܶܡ ܐܰܢ̱ܬ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܶܠܬܳܐ ܐܰܠܳܗܳܐ ܕܰܒܐ̱ܪܳܙܳܟ ܚ̣ܰܕܝ̣ܬ ܠܰܐܒܪܳܗܳܡ ܘܰܦܪܰܩ̣ܬ ܠܐܝ̣ܣܚܳܩ ܡܶܢ ܩܶܛܠܳܐ ܘܒܰܕܒܝ̣ܚܘ̣ܬܳܟ ܕܥܰܠ ܓܳܓܘ̣ܠܬܳܐ ܠܥܳܠܡܳܐ ܡܶܢ ܡܝ̣ܬܘ̣ܬܳܐ ܘܰܚܒܳܠܳܐ ܕܰܚܛܝ̣ܬܳܐ ܫܰܘܙܶܒ̣ܬ: ܘܪܝ̣ܚܳܐ ܒܰܣܝ̣ܡܳܐ ܚܠܳܦܰܝܢ ܠܰܐܒܘ̣ܟ ܗ̣ܘܰܝܬ ܠܬܰܪܥܘ̣ܬܳܐ: ܐܳܦ ܠܰܢ ܚܰܕܳܐ ܒܛܰܝܒܘ̣ܬܳܟ ܗܳܪܟܳܐ ܒܥܳܠܡܳܐ ܗܳܢܳܐ ܒܦܘ̣ܪܩܳܢܳܐ ܕܡܶܢ ܒܝ̣ܫܳܐ: ܘܰܒܥܳܠܡܳܐ ܕܰܥܬܝ̣ܕ ܒܦܰܪܨܘ̣ܦܳܐ ܡܫܰܝܢܳܐ ܩܰܒܶܠ ܠܰܢ ܒܝܰܘܡܳܐ ܕܰܩܝܳܡܬܳܐ: ܘܥܰܡ ܐܶܡܪ̈ܶܐ ܒܢܰܝ̈ ܝܰܡܝ̣ܢܳܟ ܒܳܣ̇ܡܝ̣ܢ ܒܡܰܠܟܘ̣ܬܳܟ: ܡܫܝ̣ܚܳܐ ܕܚ̣ܰܫ ܒܰܒܣܰܪ ܚܠܳܦܰܝܢ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀