ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܪܳܡܳܐ ܘܰܡܥܰܠܝܳܐ ܒܐܝ̣ܬܘ̣ܬܶܗ ܕܡܶܢ ܚܝ̈ܠܰܘܳܬܳܐ ܥܶܠܳܝ̈ܶܐ ܠܥܶܠ ܡ̣ܶܙܕܰܝܰܚ: ܘܡܶܢ ܝܘ̣̈ܕܳܝܶܐ ܛܳܠܡ̈ܰܝ ܛܰܝܒܘ̣ܬܳܐ ܠܬܰܚܬ ܡܶܬ̣ܬܫܝ̣ܛ ܘܡܶܬ̣ܒܰܙܰܚ: ܠܗܰܘ ܒܪܝ̣ܟܳܐ ܘܰܡܒܰܪܟܳܐ ܕܡܶܢ ܟܪ̈ܘ̣ܒܶܐ ܒܓܝ̣̈ܓܠܶܐ ܡܰـܠܳـܠܴ̈ܬܳܐ ܡܶܬ̣ܒܰܪܰܟ: ܘܡܶܢ ܟܳܗ̈ܢܶܐ ܕܥܰܡܳܐ ܥܰܘܳܠܳܐܝ̣ܬ ܡܶܬ̣ܩܰܛܪܰܓ: ܠܗܰܘ ܩܰܕܝ̣ܫܳܐ ܕܰܡܩܰܕܶܫ ܠܟܽܠ ܕܡܶܢ ܣܳܦܪ̈ܶܐ ܘܰܦܪ̈ܝ̣ܫܶܐ ܒܪܘ̣ܫܥܳܐ ܓܘ̣ܡܕܳܢܳܐܝ̣ܬ ܡܶܬ̣ܓܰܕܰܦ: ܘܡܶܢ ܣܪ̈ܳܦܶܐ ܩܰܕܝ̣̈ܫܶܐ ܬܠܝ̣ܬܳܐܝ̣ܬ ܡܶܬ̣ܩܰܕܰܫ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܪܒܝ̣ܥܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܳܐ ܛܳܒܳܐ ܕܐܶܬ̣ܳܐ ܘܫܰܡܠܝ̣ ܛܘ̣̈ܦܣܶܐ ܕܨܳܪܘ̱ ܠܶܗ ܢܒܺܝܰܘ̈ܗ̱ܝ ܒܰܩܢܘ̣ܡܶܗ: ܘܰܗ̣ܘܳܐ ܕܶܒܚܳܐ ܘܚܰܣܝ̣ ܠܥܳܠܡܳܐ ܒܫܘ̣ܦܳܥ ܕܡܶܗ ܡܰܚܝܳܢܳܐ: ܦܳܪܘ̣ܩܳܐ ܕܗܘ̣ ܠܶܗ ܚܠܳܦܰܝܢ ܩ̣ܰܪܶܒ ܕܶܒܚܳܐ ܠܝܳܠܘ̣ܕܶܗ: ܘܐܶܫܟ̣ܰܚ ܠܰܢ ܦܘ̣ܪܩܳܢܳܐ ܒܰܚܢܳܢܶܗ: ܡܪܰܝܡܳܐ ܕܒܶܐܡܪܳܐ ܗܰܘ ܕܡܶܢ ܐܝ̣ܠܳܢܳܐ ܚܠܳܦ ܐܝ̣ܣܚܳܩ ܠܕܶܒܚܳܐ ܐܶܬ̣ܩܰܪܰܒ: ܘܨܳܪ ܡܰܘܠܳܕܶܗ ܘܩܶܛܠܶܗ: ܘܰܒܗܳܠܶܝܢ ܕܬܰܡܳܢ ܐܶܣ̣ܬܥܰܪ̈ܝ̱ ܚܰܘܝ̣ ܠܰܐܒܪܳܗܳܡ ܝܘ̣ܡ ܚܰܫܶܗ ܘܫܘ̣ܒܚܳܐ ܕܰܩܝܳܡܬܶܗ: ܦܫܝ̣ܛܳܐ ܕܐܶܬܠܒ̣ܶܟ ܡܶܛܽܠ ܕܐܶܬ̣ܪܰܟܰܒ: ܘܐܶܨܛܰܥ̣ܰܪ ܡ̣ܶܢ ܒܝ̣̈ܫܶܐ ܡܶܛܽܠ ܗܰܘ̇ ܕܗܰܝܡ̣ܶܢ ܒܶܗ ܓܰܝܳܣܳܐ ܝܰܡܝ̣ܢܳܝܳܐ: ܗܳܢܰܘ ܐܶܡܪܶܗ ܕܐܰܠܳܗܳܐ: ܗܰܘ̇ ܕܘܰܥܕܳܐ ܕܚܰܝ̈ܶܐ ܫܰܟ̣ܶܢ ܠܥܺܕܬܶܗ: ܗܳܢܰܘ ܐܶܡܪܶܗ ܕܰܐܠܳܗܳܐ: ܗܰܘ̇ ܕܙܳܥ̣ܰܬ݀ ܐܰܪܥܳܐ ܘܪܶܥܠ̣ܰܬ݀ ܒܥܶܕܳܢܳܐ ܕܚܰܫܶܗ: ܗܳܢܰܘ ܐܶܡܪܶܗ ܕܰܐܠܳܗܳܐ: ܗܰܘ̇ ܕܰܚܫ̣ܶܟ ܫܶܡܫܳܐ ܟܰܕ ܚ̣ܙܳܝܗ̱ܝ ܕܰܡܦܰܪܣܰܝ: ܗܳܢܰܘ ܐܶܡܪܶܗ ܕܰܐܠܳܗܳܐ: ܗܰܘ̇ ܕܛܘ̣ܪ̈ܶܐ ܘܪ̈ܳܡܳܬܳܐ ܘܫܘ̣̈ܥܶܐ ܐܶܬܦܩ̣ܰܥܘ̱ ܒܥܶܕܳܢܳܐ ܕܰܙܩܝ̣ܦܘ̣ܬܶܗ: ܗܳܢܰܘ ܐܶܡܪܶܗ ܕܰܐܠܳܗܳܐ: ܗܰܘ̇ ܕܝܰܗ̣ܒܘ̱ ܒܡܶܐܟܘ̣ܠܬܶܗ ܡܪܳܪ̈ܶܐ ܘܰܠܨܶܗܝܶܗ ܚܰܠܳܐ ܐܰܫܩܝ̣ܘ ܥܰܘ̈ܳܠܶܐ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܰܟܠܝ̣ܠܳܐ ܕܟܘ̣̈ܒܶܐ ܣܳܡܘ̱ ܒܪܝ̣ܫܶܗ ܡܰܪ̈ܳܚܶܐ ܟܰܕ ܡܒܰܙܚܝ̣ܢ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܠܰܐܰܢ̱ܬܬܶܗ ܕܦܝ̣ܠܰܛܳܘܣ ܒܝܰܕ ܚܶܠܡܳܐ ܫ̣ܰܪܰܪ ܕܗܘ̣ܝܘ̣ ܐܰܠܳܗܳܐ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܡܘ̣ܝܳܩܳܐ ܘܚܶܣܕܳܐ ܣܰܝܒ̣ܰܪ ܚܠܳܦ ܐܳܕܳܡ ܚܰܝܳܒܳܐ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܣܰܝܒ̣ܰܪ ܙܩܝ̣ܦܳܐ ܡܶܛܽܠ ܓܶܢܣܳܐ ܐ̱ܢܳܫܳܝܳܐ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܚܰܣܝ̣ ܠܚܰܝ̈ܳܒܶܐ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܰܣܒ̣ܰܠ ܚܠܳܦܰܝܢ ܨܰܥܪܳܐ ܘܒܶܙܚ̈ܶܐ ܡ̣ܶܢ ܥܰܡܳܐ ܛܳܠܘ̣ܡܳܐ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܢ̣ܳܕܰܬ݀ ܘܪܶܥܠ̣ܰܬ݀ ܐܰܪܥܳܐ ܒܥܶܕܳܢܳܐ ܕܩܶܛܠܶܗ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܣܳܡ̣ܘ̱ ܒܪܝ̣ܫܶܗ ܟܠܝ̣ܠܳܐ ܕܟܘ̣̈ܒܶܐ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܥܰܒܕܶܗ ܕܪܰܒ ܟܳܗ̈ܢܶܐ ܡܚ̣ܳܝܗ̱ܝ ܡܰܪܳܚܳܐܝ̣ܬ ܥܰܠ ܦܰܟܶܗ: ܗܳܢܰܘ ܐܶܡܪܶܗ ܕܰܐܠܳܗܳܐ: ܗܰܘ ܕܦܰܪܨܘ̣ܦܶܗ ܠܳܐ ܐܗܦ̣ܶܟ ܡܶܢ ܒܶܗܬܬܳܐ ܘܪܘ̣ܩܳܐ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܨܶܨ̈ܶܐ ܒܐܝ̣ܕܰܘ̈ܗ̱ܝ ܘܰܒܪ̈ܶܓܠܰܘܗ̱ܝ ܐܶܬܩܰܒ̣ܰܥܘ̱ ܡܶܢ ܟܳܗ̈ܢܶܐ ܙܺܐܦܳܢ̈ܶܐ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܪܘ̣ܚܶܗ ܐܰܫܠ̣ܶܡ ܘܣܳܡ̣ܳܗ̇ ܒܐܝ̣̈ܕܰܝ ܐܰܒܘ̣ܗ̱ܝ ܡܫܰܒܚܳܐ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܰܩܥ̣ܳܐ ܐܝ̣ܠ ܐܝ̣ܠ ܥܰܠ ܩܰܝܣܳܐ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܕܰܫܟܝ̣̈ܒܶܐ ܐܶܬ̣ܬܥܝ̣ܪܘ̱ ܒܩܳܠܶܗ ܘܰܣ̣ܓܶܕܘ̱ ܠܶܗ: ܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ: ܗܰܘ̇ ܕܬܰܒ̣ܰܪ ܬܰܪ̈ܥܶܐ ܕܰܢܚܳܫܳܐ ܟܰܕ ܥ̣ܰܠ ܠܰܫܝܘ̣ܠ ܘܐܰܦ̣ܨܰܚ ܠܟܺܐܢ̈ܶܐ ܕܰܣܥ̣ܰܪ ܐܶܢܽܘܢ ܒܰܐܘܘܳܢܰܝ̈ܗܽܘܢ: ܘܡܶܛܽܠ ܗܳܕܶܐ ܒܳܥܶܝܢܰܢ ܘܡܶܬܟܰܫܦܝ̣ܢܰܢ ܠܛܳܒܘ̣ܬܳܐ ܕܝ̣ܠܳܟ ܡܳܪܝܳܐ ܡܪܰܚܡܳܢܳܐ: ܒܝܰܕ ܚܰܫܰܝ̈ܟ ܦܳܪ̈ܘ̣ܩܳܝܶܐ ܕܣܰܝܒ̣ܰܪܬ ܚܠܳܦܰܝܢ ܚܘ̣ܣ ܥܠܰܝܢ ܕܩܳܪܶܝܢܰܢ ܠܳܟ: ܐܶܬܪܰܚܰܡܥܠܰܝܢ ܕܫܳܐܠܝ̣ܢܰܢ ܪ̈ܰܚܡܰܝܟ: ܘܰܗܘܝ̣ ܠܰܢ ܡܥܰܕܪܳܢܳܐ ܘܒܶܝܬ ܓܰܘܣܳܐ: ܘܐܰܫܘܳܐ ܠܰܢ ܘܰܠܥܰܢܝ̣̈ܕܰܝܢ ܕܗܰܝܡܶܢ̣ܢܰܢ ܒܚܰܫܰܝ̈ܟ: ܘܐܰܘܕܝ̣ܢܰܢ ܒܰܨܠܝ̣ܒܳܟ ܕܰܢ̇ܩܘ̣ܡ ܡܶܢ ܝܰܡܝ̣ܢܳܟ ܘܢܶܚ̇ܙܶܐ ܚܢܳܢܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܘ̣ܪܽܘܢ ܡܣܰܦܩܳܐ ܘܢܰܪܕܝ̣ܢ ܪܝ̣ܫܳܝܳܐ ܕܰܠܣܰܪܝܘ̣ܬܳܐ ܥܳܠܡܳܢܳܝܬܳܐ ܛܰܠ̣ܶܩ ܒܰܕܒܝ̣ܚܘ̣ܬܶܗ ܡܰܥ̣ܒܕܰܬ݀ ܚܰܝ̈ܶܐ ܕܥܰܠ ܪܰܘܡܶܗ ܕܰܙܩܝ̣ܦܳܐ: ܘܐܰܥ̣ܛܰܪ ܒܬܺܒܶܝܠ ܪܝ̣ܚܳܐ ܗܰܢܺܝܳܐܐ ܕܒܰܣܝ̣ܡܘ̣ܬܶܗ: ܐܰܢ̱ܬ ܐܳܘ ܦܰܪܕܺܝܣܦܳܢܳܐ (ܓܰܢܳܢܳܐ) ܚܰܟܝ̣ܡܳܐ ܐܨܛܒܰܝ ܒܥܶܛܪܳܐ ܗܳܢܳܐ ܕܒܐܝ̣̈ܕܰܝܳܐ ܚܰܠܳܫ̈ܳܬܳܐ ܕܝ̣ܠܰܢ ܡܶܬ̣ܬܰܥܛܰܪ ܠܘܰܥܕܳܐ ܕܰܫܟܝ̣ܢܬܳܟ: ܘܩܰܒܶܠܳܝܗ̱ܝ ܥܰܡ ܗܰܢܺܝܐܘ̣ܬܳܐ: ܘܚܰܣܳܐ ܒܶܗ ܠܥܺܕ̈ܳܬܳܐ ܕܝ̣ܠܳܟ ܕܰܒܟܽܠܳܗ̇ ܐܰܪܥܳܐ: ܘܫܰܟܶܢ ܒܶܗ ܚܘ̣ܣܳܝܳܐ ܠܟܽܠܗܽܘܢ ܩܳܪ̈ܝܰܝ ܫܡܳܟ ܡܥܰܠܰܝ ܒܪܰܒܘ̣ܬܳܐ: ܘܕܐܰܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀