ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܓܠܺܝ̣ ܡܳܪܝ̱ ܬܰܚܦܝ̣ܬܳܐ ܡܰܚܫܟܳܢܝ̣ܬܳܐ ܕܚܰܫ̈ܶܐ ܫܟܝ̣ܪ̈ܶܐ ܕܰܚܛܝ̣ܬܳܐ: ܡܶܢ ܠܶܒܰܘ̈ܳܬܳܐ ܘܡܰܕ̈ܥܶܐ ܕܣܳܓܘ̣̈ܕܰܝܟ ܒܝܰܕ ܥܘ̣ܕܪ̈ܳܢܶܐ ܕܚܰܫܰܝ̈ܟ ܡܫܝ̣ܚܳܐ ܐܰܠܳܗܰܢ: ܘܐܰܫܘܳܐ ܠܰܢ ܕܟܰܕ ܚܳܐܫܝ̣ܢܰܢ ܒܚܰܫܳܟ: ܘܥܰܡܳܟ ܢܶܚ̇ܕܶܐ ܒܝܰܘܡܳܐ ܕܰܩܝܳܡܬܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܕܐܶܬܢܰܚ̣ܰܬ ܡܶܛܽܠܳܬܰܢ ܘܒܰܡܥܰܠܝܘ̣ܬܶܗ ܩܰܘܝ̣: ܠܗܰܘ ܡܰܠܝܳܐ ܕܐܶܣ̣ܬܰܪܰܩ ܚܠܳܦ ܦܘ̣ܪܩܳܢܰܢ ܘܡܶܢ ܡܰܠܝܘ̣ܬܶܗ ܠܳܐ ܫܰܢܝ̣: ܠܗܰܘ ܦܫܝ̣ܛܳܐ ܕܐܶܬ̣ܪܰܟܰܒ ܘܰܒܪܘ̣ܚܳܢܘ̣ܬܶܗ ܟܰܬܰܪ ܟܰܕ ܡܪܰܟܒܳܐ ܐܶܬܚܙܝ̣: ܠܗܰܘ ܐܰܠܳܗܳܐ ܕܐܶܬܒ̣ܰܪܢܰܫ ܘܒܰܐܠܳܗܘ̣ܬܶܗ ܦܳܫ̣: ܟܰܕ ܒܰܪܢܳܫܳܐ ܐܶܬ̣ܚܰܘܝ̣ ܠܗܰܘ ܚܰܝܳܐ ܕܐܶܨܛܠ̣ܶܒ ܒܰܒܣܰܪ ܘܡ̣ܶܢ ܝܳܬܶܗ ܠܳܐ ܫܰܢܝ̣: ܠܗܰܘ ܠܳܐ ܡܳܝܘ̣ܬܳܐ ܕܡܝ̣ܬ ܒܰܦܓܰܪ ܘܡܶܢ ܫܘ̣ܒܚܶܗ ܠܳܐ ܐܶܬ̣ܢܰܟܪܝ̣: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ ܕܰܡܥܰܠܰܝ ܡܶܢ ܚܰܫ̈ܶܐ ܒܐܝ̣ܬܘ̣ܬܶܗ ܡܥܰܠܰܝܬܳܐ: ܗܰܘ ܝܳܕܘ̣ܥܳܐ ܕܟܰܣ̈ܝܳܬܳܐ ܘܕܰܝܳܢܳܐ ܕܓܰܠ̈ܝܳܬܳܐ: ܗܰܘ ܕܰܩܕܳܡ ܚܰܫܳܐ ܕܝ̣ܠܶܗ ܦܳܪܘ̣ܩܳܝܳܐ ܘܡܰܥܒܶܕ ܚܰܝ̈ܶܐ ܫ̣ܰܘܕܰܥ ܠܬܰܠ̈ܡܝ̣ܕܰܘܗ̱ܝ ܩܰܕܝ̣̈ܫܶܐ ܡܶܛܽܠ ܐ̱ܪܳܙܳܐ ܕܚܰܫܶܗ ܡܰܚܝܳܢܳܐ ܟܰܕ ܐܳܡܰܪ ܠܗܽܘܢ: ܕܗܳܐ ܣܳܠ̇ܩܝ̣ܢܰܢ ܠܐܘ̣ܪܫܠܶܡ ܘܰܒܪܶܗ ܕܐ̱ܢܳܫܳܐ ܡܶܫܬ̣ܠܶܡ ܒܐܝ̣̈ܕܰܝ ܒܢܰܝ̈ܢܳܫܳܐ ܥܰܘ̈ܳܠܶܐ: ܘܰܢ̣ܢܰܓܕܘ̣ܢܳܝܗ̱ܝ ܘܢ̣ܶܙܩܦܘ̣ܢܳܝܗ̱ܝ ܘܰܠܝܰܘܡܳܐ ܕܰܬܠܳܬܳܐ ܢ̣ܩܘ̣ܡ: ܒܰܕܓܽܘܢ ܠܳܟ ܝܳܕܥܝ̣ܢܰܢ ܐܰܠܳܗܳܐ ܗܰܘ ܕܐܝ̣ܬܰܝܟ ܠܳܐ ܚܳܫܘ̣ܫܳܐ ܒܰܟܝܳܢܳܟ: ܕܚܰܫ̣ܬ ܚܠܳܦܰܝܢ ܒܰܒܣܰܪ ܕܬ̣ܶܦܪܘ̣ܩ ܠܰܢ ܡܶܢ ܟܽܠ ܚܰܫ̈ܶܐ ܕܰܚܛܝ̣ܬܳܐ: ܘܒܰܒ̈ܢܳܬ ܩ̈ܳܠܶܐ ܪ̈ܘ̣ܚܳܢܝܳܬܳܐ ܠܳܟ ܣܳܓ̇ܕܝ̣ܢܰܢ ܘܡܰܘ̇ܕܶܝܢܰܢ ܘܐܳܡ̇ܪܝ̣ܢܰܢ: ܕܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ ܕܚ̣ܰܘܝ̣ ܠܰܐܒܪܳܗܳܡ ܝܘ̣ܡ ܚܰܫܶܗ ܘܫܘ̣ܒܚܳܐ ܕܰܩܝܳܡܬܶܗ: ܦܫܝ̣ܛܳܐ ܕܐܶܬܠܒ̣ܶܟ ܡܶܛܽܠ ܕܐܶܬ̣ܪܰܟܰܒ ܘܐܶܨܛܰܥ̣ܰܪ ܡ̣ܶܢ ܒܝ̣̈ܫܶܐ ܡܶܛܽܠ ܕܐܶܬ̣ܓܰܫܰܡ: ܢܘ̣ܗܪܳܐ ܕܢܰܗܝ̣ܪ̈ܶܐ ܕܐܶܬܟ̣ܰܬܰܫܘ̱ ܥܰܡܶܗ ܛܶܠܴ̈ܠܶܐ ܡܶܛܽܠ ܕܐܶܬܡ̣ܰܟܰܟ: ܘܐܶܬܚ̣ܒܶܫ ܡܶܛܽܠ ܕܐܶܬ̣ܢܰܚܰܬ: ܫܰܦܝ̣ܪܳܐ ܕܐܰܫܠ̣ܚܘ̣ܗ̱ܝ ܒܝ̣̈ܫܶܐ ܘܠܳܐ ܐܶܬ̣ܦܰܪܣܝ̣ ܘܒܰܫܠܳܚ ܒܶܣܪܶܗ ܦ̣ܰܪܣܝ̣ ܠܐܪܟܘܳܢܳܐ ܕܥܰܘܠܳܐ ܘܠܳܐ ܐܙܕܰܠ̣ܰܠ: ܬܰܩܝ̣ܦܳܐ ܕܰܛܥܝ̣ܢ ܒܶܪ̈ܝܳܬܳܐ ܒܪܶܡܙܶܗ ܥܰܠ ܕܐܝ̣ܬܰܘܗ̱ܝ ܐܰܠܳܗܳܐ: ܘܰܛܥܝ̣ܢ ܙܩܝ̣ܦܶܗ ܘܐܰܚ̣ܶܫ ܠܚܰܫܳܐ ܒܚܰܫܶܗ ܥܰܠ ܕܠܳܐ ܐܫܬܰܚ̣ܠܰܦ: ܚܰܝܳܐ ܕܐܶܫ̣ܬܝ̣ ܟܳܣܶܗ ܕܡܰܘܬܳܐ ܥܰܠ ܕܰܗ̣ܘܳܐ ܡܶܢܰܢ: ܘܐܰܡܝ̣ܬ ܠܡܰܘܬܳܐ ܒܡܰܘܬܶܗ ܥܰܠ ܕܰܫ̇ܘܶܐ̣ ܥܰܡ ܐܰܒܘ̣ܗ̱ܝ: ܪܳܡܳܐ ܕܰܢܚ̣ܶܬ ܠܰܫܝܘ̣ܠ ܐܰܝܟ ܡܝ̣ܬܳܐ ܘܰܥܩ̣ܰܪ ܐܶܢܽܘܢ ܠܫܘ̣ܪ̈ܶܝܗ̇ ܐܰܝܟ ܚܰܝܳܐ: ܠܳܟ ܐܰܠܳܗܳܐ ܕܰܒܚܘ̣ܒܳܟ ܠܳܐ ܡܶܬ̣ܕܰܪܟܳܢܳܐ ܠܗܳܢܳܐ ܡܘ̣ܟܳܟܳܐ ܐܶܬ̣ܪܟܶܢ̣ܬ: ܡܩܰܪܒܝ̣ܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ: ܐܶܠܳܐ ܨܒܝ̣ ܒܪܶܚܡܰܬ݀ ܐ̱ܢܳܫܘ̣ܬܳܟ ܘܩܰܒܶܠܳܝܗ̱ܝ ܡܶܢ ܐܝ̣̈ܕܰܝܢ ܚܰܠܳܫ̈ܳܬܳܐ: ܘܚܰܝܶܠ ܠܰܢ ܕܢ̇ܶܛܰܪ ܠܦܘ̣̈ܩܕܳܢܰܝܟ: ܘܰܕܢ̇ܶܛܪܘ̣ܕ ܠܟܽܠ ܬܰܪܥܝ̣ܬܳܐ ܪܳܡܬܳܐ ܘܰܕܠܘ̣ܩܒܰܠ ܫܪܳܪܳܐ ܩܳܝ̇ܡܳܐ ܒܝܰܕ ܫܡܳܐ ܗܰܘ̇ ܕܐܶܬܟܬ̣ܶܒ ܠܓܰܘ ܡܶܢ ܐܰܦܰܝ̈ ܬܰܪܥܳܐ ܕܩܘ̣ܕܫܳܐ ܕܝ̣ܠܳܟ: ܠܗܰܘ̇ ܟܰܕ ܫܳܡ̇ܥܳܐ ܫܝܘ̣ܠ ܡܶܬ̣ܬܰܘܗܳܐ: ܬܗܘ̣̈ܡܶܐ ܡܶܣ̣ܬܰܕܩܝ̣ܢ: ܒܥܶܠܕܒܳܒܳܐ ܡܶܬ̣ܬܕܝ̣ܫ: ܪ̈ܘ̣ܚܶܐ ܒܝ̣̈ܫܳܬܳܐ ܡܶܬ̣ܛܰܪ̈ܕܳܢ: ܘܐܰܫܘܳܐ ܠܰܢ ܕܰܒܗܰܝܡܳܢܘ̣ܬܳܐ ܢܶܪܕܘ̣ܦ ܠܠܳܐ ܡܶܬܬܦܝ̣ܣܳܢܘ̣ܬܳܐ: ܘܰܠܪܘ̣ܓܙܳܐ ܢ̇ܶܥܛܶܐ: ܘܰܠܪܳܡܘ̣ܬܳܐ ܢܡܰܟܶܟ: ܘܰܠܟܽܠ ܟܝܳܢܳܐ ܡܰܘܠܶܕ ܒܝ̣̈ܫܳܬܳܐ ܢܶܣ̇ܬܘ̣ܪ ܘܗܰܘܢܳܐ ܕܰܟܝܳܐ ܘܠܳܐ ܡܶܨܛܰܠܝܳܢܳܐ ܢܶܩ̇ܢܶܐ: ܘܥܰܡ ܕܘ̣ܒܳܪ̈ܶܐ ܡܝܰܬܪ̈ܶܐ ܢ̇ܡܰܢܰܥ ܠܘܳܬ ܫܘ̣ܠܳܡܳܐ ܗܰܘ̇ ܛܘ̣ܒܬܳܢܳܐ ܕܫܳܦܰܪ ܠܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܦܝ̣ܪܡܳܐ ܕܥܺܕܬܳܟ ܦܪܝ̣ܩܰܬ݀ ܒܚܰܫܳܟ: ܘܐܶܬܪܰܥܳܐ ܒܥܶܛܪܳܐ ܕܡܰܪܥܝ̣ܬܳܟ ܙܒܝ̣ܢܰܬ݀ ܒܰܕܡܳܟ: ܘܨܘ̣ܬ ܠܬܰܟܫ̈ܦܳܬܳܐ ܕܥܳܢܳܟ ܕܰܚܬܝ̣ܪܳܐ ܒܩܶܛܠܳܟ: ܘܰܫܡܰܥ ܨܠܰܘ̈ܳܬܳܐ ܕܰܡܟܝ̣ܪܬܳܟ ܡܥܰܦܩܰܬ݀ ܫܘ̣̈ܡܳܬܳܟ: ܘܢܰܛܰܪ ܠܝܳܪܬܘ̣ܬܳܟ ܒܰܨܠܝ̣ܒܳܟ: ܡ̣ܶܢ ܟܽܠ ܚܰܫܳܐ ܕܡܰܪܚܶܩ ܡܶܢܳܟ: ܐܰܝܟܰܢܳܐ ܕܬܶܚ̣ܰܫܝ̱ ܒܚܰܫܳܟ: ܘܬ̣ܶܫܬܰܒܰܚܝ̱ ܒܫܘ̣ܒܚܳܐ ܘܬܶܚ̣ܕܶܐ ܘܬܶܪܘܰܙܝ̱ ܐܰܟܚܕܳܐ ܒܝܰܘܡܳܐ ܕܰܩܝܳܡܬܳܟ: ܘܬܰܣܶܩܝ̱ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀