ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܗܰܒܠܰܢ ܡܳܪܝ̱ ܪܰܡܫܳܐ ܕܫܰܝܢܳܐ ܘܠܶܠܝܳܐ ܕܰܢܝܳܚܳܐ: ܕܨܶܒܝܳܢܳܐ ܕܝ̣ܠܳܟ ܡܫܝ̣ܚܳܐ ܦܳܪܘ̣ܩܰܢ: ܘܥܝ̣ܪܘ̣ܬܳܐ ܕܙܰܕܝ̣ܩܘ̣ܬܳܐ ܘܐܝ̣ܡܳܡܳܐ ܕܰܥܒ̈ܳܕܶܐ ܛܳܒ̈ܶܐ ܗܰܒܠܰܢ ܒܰܚܢܳܢܳܟ ܕܰܒܫܶܢܬܰܢ ܘܰܒܥܝ̣ܪܘ̣ܬܰܢ ܢ̇ܶܬܢܛܰܪ ܡܶܢ ܟܽܠ ܢܶܟܝ̈ܳܢܝ̣ܢ ܕܢܰܦܫܳܐ ܘܰܕܦܰܓܪܳܐ ܘܰܕܪܘ̣ܚܳܐ ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܫܘ̣ܒܚܳܐ ܘܪܘ̣ܡܪܳܡܳܐ ܘܩܘ̣ܠܳܣܳܐ ܠܳܗ̇ ܠܐܘ̣ܣܺܝܰܐ ܚܰܝܬܳܐ ܘܰܣܓܝ̣ܕܬܳܐ ܘܡܰܥܒܕܰܬ݀ ܚܰܝ̈ܶܐ: ܘܰܓܢܝ̣ܙܬܳܐ ܘܠܳܐ ܡܶܬܕܰܪܟܳܢܝ̣ܬܳܐ ܘܠܳܐ ܡܶܬܡܰܠܠܳܢܝ̣ܬܳܐ: ܘܠܳܐ ܒܪܝ̣ܬܳܐ ܘܫܰܘܝܰܬ݀ ܒܚܰܝܠܳܐ: ܘܒܐܝ̣ܬܘ̣ܬܳܐ ܘܰܕܚܰܕ ܫܘ̣ܠܛܳܢܳܐ ܘܡܰܠܟܘ̣ܬܳܐ ܘܨܶܒܝܳܢܳܐ ܚܰܕ ܟܝܳܢܳܐܝ̣ܬ ܩܰܢܝܳܐ: ܘܐܝ̣ܬ ܠܳܗ̇ ܐܝ̣ܩܳܪܳܐ ܘܡܳܪܘ̣ܬܳܐ ܘܰܐܠܳܗܘ̣ܬܳܐ ܘܰܟܝܳܢܳܐ ܚܕܳܐ ܡܰܥܒܕܳܢܘ̣ܬܳܐ : ܩܢܘ̣̈ܡܶܐ ܕܶܝܢ ܬܠܳܬܳܐ ܘܰܫܡ̈ܳܗܶܐ ܣܓܝ̣̈ܕܶܐ ܬܠܳܬܳܐ: ܕܰܐܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܰܐܠܒ̣ܶܫܬ ܠܰܢ ܙܰܝܢܳܐ ܕܙܰܕܝ̣ܩܘ̣ܬܳܐ ܠܘ̣ܩܒܰܠ ܚܛܝ̣ܬܳܐ ܒܝܰܕ ܥܡܳܕܳܐ ܐܰܠܳܗܳܝܳܐ: ܘܬܰܚܶܡ̣ܬ ܠܰܢ ܨܰܘܡܳܐ ܩܰܕܝ̣ܫܳܐ ܠܘ̣ܩܒܰܠ ܝܰܥܢܘ̣ܬܳܐ ܒܝܰܕ ܨܰܘܡܳܟ ܦܳܪܘ̣ܩܳܝܳܐ: ܘܝܰܗ̣ܒܬ ܠܰܢ ܒܝܰܕ ܗܳܠܶܝܢ ܣܰܡܳܐ ܡܰܘܬܪܳܢܳܐ ܕܚܳܫܰܚ ܠܡܰܚ̈ܘܳܬܰܢ: ܘܰܥܨܳܒܳܐ ܡܥܰܕܪܳܢܳܐ ܕܡܰܚܠܶܡ ܠܫܘ̣̈ܡܳܬܰܢ: ܘܙܘ̣ܦܳܐ ܡܚܰܠܠܳܢܳܐ ܕܰܡܚܰܘܰܪ ܠܟܘ̣ܬܡ̈ܳܬܰܢ: ܘܰܪܣܳܣܳܐ ܡܕܰܟܝܳܢܳܐ ܕܰܡܩܰܕܶܫ ܠܢܰܦܫ̈ܳܬܰܢ: ܘܰܐܠܶܦܬ ܠܰܢ ܕܰܠܚܰܫܰܘ̈ܗ̱ܝ ܕܒܶܣܪܳܐ ܒܝܰܕ ܢܙܝ̣ܪܘ̣ܬܳܐ ܢ̇ܶܦܣܘ̣ܩ: ܘܰܠܚܺܐܦܰܘ̈ܗ̱ܝ ܕܦܰܓܪܳܐ ܒܝܰܕ ܥܳܢܘܳܝܽܘ̣ܬܳܐ ܢ̇ܶܟܒܘ̣ܫ: ܘܠܰܡܝܰܬܪ̈ܳܬܳܗ̇ ܕܢܰܦܫܳܐ ܒܝܰܕ ܨܰܘܡܳܐ ܘܰܨܠܘ̣ܬܳܐ ܢ̇ܶܐܚܘ̣ܕ: ܘܰܪܫܰܡ̣ܬ ܠܰܢ ܦܘ̣ܩ̈ܕܳܢܰܝܟ ܕܢ̇ܶܥܒܶܕ ܐܶܢܽܘܢ ܘܢ̇ܶܬܥܰܕܰܪ ܒܗܽܘܢ: ܘܬܰܚܶܡ̣ܬ ܠܰܢ ܢܳܡܘ̈ܣܰܝܟ ܕܢ̇ܶܛܰܪ ܐܶܢܽܘܢ ܘܢ̣ܶܬܢܰܛܪܘܢ ܠܰܢ ܡܶܢ ܟܽܠ ܢܶܟܝ̈ܳܢܝ̣ܢ: ܘܝܰܗ̣ܒܬ ܠܰܢ ܫܽܘܘ̣̈ܕܳܝܰܝܟ ܕܢ̇ܶܬܚܰܝܰܠ ܒܗܽܘܢ: ܘܰܓܠ̣ܰܝܬ ܠܰܢ ܥܰܠ ܡܘ̣ܠ̈ܟܳܢܰܝܟ ܕܢ̇ܶܬܪܰܓܪܰܓ ܠܗܽܘܢ: ܘܚܰܘܝ̣ܬ ܠܰܢ ܚܘ̣ܒܳܟ ܕܢ̇ܶܬܩܰܪܰܒ ܠܳܟ: ܘܰܐܕܢܰܚ̣ܬ ܠܰܢ ܪܶܚܡܬܳܟ ܕܢ̇ܺܐܬܶܐ ܘܢ̇ܶܪܗܰܛ ܠܒܶܝܬ ܘܰܥܕܳܟ: ܐܳܦ ܗܳܫܳܐ ܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܕܬ̣ܰܫܘܶܐ ܠܰܢ ܕܰܠܦܰܪ̈ܨܽܘ̣ܦܰܝܢ ܡܶܬܗܰܘ̈ܢܳܢܶܐ ܒܡܰܝ̈ܳܐ ܪ̈ܘ̣ܚܳܢܶܐ ܐܰܝܟ ܡܰܠܦܳܢܘ̣ܬܳܟ ܢ̇ܫܝ̣ܓ: ܘܰܠܪ̈ܝ̣ܫܰܝܢ ܡܶܬܝܰܕ̈ܥܳܢܶܐ ܒܰܦܨܝ̣ܚܘ̣ܬܳܐ ܕܰܥܒ̈ܳܕܶܐ ܛܳܒ̈ܶܐ ܐܰܝܟ ܡܰܪܬܝܳܢܘ̣ܬܳܟ ܢ̇ܶܡܫܘ̣ܚ: ܘܰܒܟܽܠ ܚܰܕ ܡܶܢ ܪ̈ܶܓܫܶܐ ܕܝ̣ܠܰܢ ܘܰܠܢܳܡܘ̣̈ܣܰܝܟ ܡܰܚ̈ܝܳܢܶܐ ܐܰܝܟ ܨܶܒܝܳܢܳܟ ܢ̇ܶܟܬܘ̣ܒ: ܘܰܠܟܽܠܶܗ ܒܰܪܢܳܫܰܢ ܓܰܘܳܝܳܐ ܘܒܰܪܳܝܳܐ ܬܚܶܝܬ ܢܝ̣ܪܳܐ ܒܰܣܝ̣ܡܳܐ ܕܦܘ̣ܩ̈ܕܳܢܰܝܟ ܩܰܕܝ̣̈ܫܶܐ ܢ̇ܫܰܥܒܶܕ: ܘܰܒܦܘ̣ܠܚܳܢܳܐ ܕܛܳܒ̈ܳܬܳܐ ܚܦܝ̣ܛܳܐܝ̣ܬ ܢ̇ܶܬܶܐܡܶܢ: ܘܦܳܥ̈ܠܶܐ ܕܠܳܐ ܒܶܗܬܬܳܐ ܕܝܰܬܝ̣ܪ ܡܶܬܟܰܫܪܝ̣ܢ ܒܙܰܕܝ̣ܩܘ̣ܬܳܐ ܒܝܰܘܡ̈ܳܬܳܐ ܗܳܠܶܝܢ ܩܰܕܝ̣̈ܫܶܐ ܩܕܳܡܰܝܟ ܢ̇ܶܬܚܙܶܐ: ܐܰܝܟܰܢܳܐ ܕܟܰܕ ܠܳܟ ܒܰܠܚܘ̣ܕܰܝܟ ܩܳܢܶܝܢܰܢ ܗܰܕܳܝܳܐ ܘܰܡܕܰܒܪܳܢܳܐ ܘܡܰܠܦܳܢܳܐ ܒܐܘ̣ܪܚܳܐ ܡܥܰܠܰܝܬܳܐ ܕܨܰܘܡܳܐ ܩܰܕܝ̣ܫܳܐ: ܘܡܶܬܟܰܫܦܝ̣ܢܰܢ ܠܳܟ ܕܒܰܓܡܝ̣ܪܘ̣ܬܳܐ ܕܦܘ̣ܩ̈ܕܳܢܰܝܟ ܥܰܡ ܛܰܝܒܘ̣ܬܳܐ ܢ̇ܶܫܬܘܶܐ ܕܢܶܬܒܰܣܰܡ: ܒܓܰܘ ܓܢܘ̣ܢܳܐ ܩܰܕܝ̣ܫܳܐ ܘܰܫܒܝ̣ܚܳܐ: ܟܰܕ ܢܰܚ̈ܬܶܐ ܕܟܰܝ̈ܳܐ ܕܢܰܟܦܘ̣ܬܳܐ ܟܒܝ̣ܢܝ̣ܢܰܢ: ܘܰܠܒܘ̣̈ܫܶܐ ܢܰܩ̈ܕܶܐ ܕܙܰܕܝ̣ܩܘ̣ܬܳܐ ܥܛܝ̣ܦܝ̣ܢܰܢ: ܘܗܳܟܰܢܳܐ ܥܰܡ ܦܰܪܶܗܣܺܝܰܐ ܕܦܰܐܝܳܐ ܠܨܰܝ̈ܳܡܶܐ ܕܰܫܪܳܪܳܐ: ܠܦܳܬܘ̣ܪܳܐ ܗܰܘ̇ ܐ̱ܪܳܙܳܢܳܝܳܐ ܘܰܕܚܝ̣ܠܳܐ ܢ̇ܶܬܩܰܪܰܒ: ܘܰܒܗܰܢܺܝܽܐܘ̣ܬܳܐ ܕܦܶܨܚܳܟ ܢ̇ܶܬܒܰܣܰܡ: ܘܫܘ̣ܒܚܳܐ ܕܠܳܐ ܫܶܠܝܳܐ ܕܰܟܝܳܐܝ̣ܬ ܢ̇ܝܰܒܶܒ: ܘܬܰܘܕܝ̣ܬܳܐ ܕܠܳܐ ܡܘ̣ܡ ܩܰܕܝ̣ܫܳܐܝ̣ܬ ܢ̇ܩܰܪܶܒ ܠܳܟ ܡܳܪܝܳܐ: ܘܒܐܝ̣̈ܕܰܝܟ ܘܥܰܡܳܟ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܕܨܳܒܶܐ ܒܦܘ̣ܢܳܝܰܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܡܳܪܝ̱ ܒܪܶܚܡܰܬ݀ ܐ̱ܢܳܫܘ̣ܬܳܟ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܩܕܳܡܰܝܟ ܒܥܶܕܳܢܳܐ ܗܳܢܳܐ: ܘܰܢ̣ܒܰܣܡܽܘܢ ܠܳܟ ܗܘ̣ܦܳܟ̈ܰܝܢ ܐܰܝܟ ܪܝ̣ܚܳܐ ܒܰܣܝ̣ܡܳܐ ܘܨܰܘܡܰܢ ܘܰܨܠܰܘ̈ܳܬܰܢ ܐܰܝܟ ܦܝ̣ܪܡܳܐ ܓܰܒܝܳܐ: ܘܩܰܘܡܰܢ ܘܬܶܫܡ̈ܫܳܬܰܢ ܐܰܝܟ ܗܶܪ̈ܘ̣ܡܶܐ ܚܠܰܝ̈ܳܐ: ܘܗܰܒ ܘܫܰܟܶܢ ܠܰܢ ܕܩܰܕܝ̣ܫܳܐܝ̣ܬ ܢ̇ܫܰܡܠܶܐ ܠܨܰܘܡܳܐ ܗܳܢܳܐ ܩܰܕܝ̣ܫܳܐ: ܘܰܠܟܽܠܶܗ ܫܰܪܟܳܢܳܐ ܕܚܰܝܰܝ̈ܢ ܘܠܰܩܝܳܡܬܳܐ ܕܡܶܣܬܰܟܝܳܐ ܒܚܰܕܘ̣ܬܳܐ ܡܰܢܰܥ ܠܰܢ: ܘܰܠܛܳܒ̈ܳܬܳܐ ܕܰܠܥܳܠܰܡ ܒܛܰܝܒܘ̣ܬܳܟ ܫܰܘܬܶܦ ܠܰܢ: ܘܬܰܡܳܢ ܣܒܝ̣ܣܳܐܝ̣ܬ ܘܠܳܐ ܡܶܬܦܰܣܩܳܢܳܐܝ̣ܬ: ܘܢ̇ܰܣܶܩ ܠܳܟ ܬܶܫܒ̈ܚܳܬܳܐ ܦܰܐܝ̈ܳܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܰܡ ܥܳܠܡܝ̣ܢ ܐܰܡܝ̣ܢ܀