ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܙܳܝܽܘ̣ܢܳܐ ܕܥܳܠܡܳܐ ܘܰܡܬܰܪܣܝܳܢܳܐ ܕܨܰܘܡܳܐ ܩܰܒܶܠ ܥܠܰܘܗ̱ܝ ܡܶܛܽܠܳܬܰܢ: ܘܰܒܕܰܪܶܗ ܕܥܰܡ ܣܳܛܳܢܳܐ ܙܰܟܝ̣ ܠܰܟܝܳܢܰܢ ܡܚܝ̣ܠܳܐ: ܠܗܰܘ̇ ܕܰܒܝܰܕ ܨܰܘܡܳܐ ܕܟܺܐܢ̈ܶܐ ܡܶܬܪܰܥܶܐ: ܘܒܰܨܠܘ̣ܬܳܐ ܕܕܙܰܕܝ̣̈ܩܶܐ ܡܶܬܬܢܝ̣ܚ: ܘܰܒܡܶܬܟܰܫܦܳܢܘ̣ܬܳܐ ܕܬܰܝ̈ܳܒܶܐ ܠܚܶܡܬܶܗ ܩܫܝ̣ܬܳܐ ܢ̣ܫܰܗܶܐ: ܕܠܶܗ ܠܗܳܢܳܐ ܡܳܪܳܐ ܡܪܰܚܡܳܢܳܐ ܢ̇ܦܝ̣ܣ ܘܢ̇ܶܬܟܰܫܰܦ ܕܰܒܨܰܘܡܰܢ ܘܒܰܨܠ̈ܰܘܳܬܰܢ ܢ̣ܶܫܬܰܝܰܢ: ܘܰܒܪ̈ܰܚܡܰܘܗ̱ܝ ܠܣܰܟܠ̈ܘܳܬܢ ܢ̣ܶܥܛܶܐ: ܘܡܶܢ ܓܶܐܪ̈ܶܐ ܕܒܝ̣ܫܳܐ ܢ̣ܫܰܘܙܶܒ ܠܰܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܩܰܕܝ̣ܫܳܐ ܘܝܳܗܘ̣ܒܳܐ ܕܟܽܠܳܗ̇ ܩܰܕܝ̣ܫܘ̣ܬܳܐ: ܗܰܘ̇ ܕܰܠܩܰܕܝ̣̈ܫܶܐ ܕܝ̣ܠܳܟ ܐܰܒܳܗ̈ܳܬܳܐ ܘܪ̈ܝ̣ܫܰܝ ܐܰܒܳܗ̈ܳܬܳܐ ܒܝܰܕ ܨܰܘ̈ܡܶܐ ܘܥܰܡ̈ܠܶܐ ܘܕܘ̣ܥ̈ܬܶܐ ܐܰܡܝ̣̈ܢܶܐ ܐܰܘܪܶܒܬ ܐܶܢܽܘܢ: ܘܝܰܗ̣ܒܬ ܠܗܽܘܢ ܙܳܟܘ̣ܬܳܐ ܥܰܠ ܒܥܶܠ̈ܕܒܳܒܰܝܗܽܘܢ: ܘܡܶܢ ܒܝ̣̈ܫܳܬܳܐ ܘܢܶܣܝܽܘ̈ܢܶܐ ܕܥܳܠܡܳܐ ܗܳܢܳܐ ܫܰܘܙܶܒ̣ܬ ܐܶܢܽܘܢ: ܘܰܒܛܳܒ̈ܳܬܳܐ ܘܠܳܐ ܡܶܬܡܰܠ̈ܠܳܢܝܳܬܳܐ ܘܠܳܐ ܥܳܒܘ̣ܪ̈ܝܳܬܳܐ ܐܰܥܬܰܪܬ ܐܶܢܽܘܢ: ܚܢܰܢ ܕܶܝܢ ܗܳܫܳܐ ܐܳܘ ܡܳܪܝܳܐ ܗܰܘ̇ ܕܰܒܝܰܕ ܒܪܳܐ ܕܝ̣ܠܳܟ ܚܰܒܝ̣ܒܳܐ ܐܰܠܶܦ̣ܬ ܠܰܢ ܕܰܒܨܰܘ̈ܡܶܐ ܘܒܰܨܠܰܘ̈ܳܬܳܐ ܠܘܳܬܳܟ ܢ̇ܶܬܩܰܪܰܒ ܘܡܶܢ ܨܶܢܥ̈ܳܬܶܗ ܕܡܳܪܘ̣ܕܳܐ ܢ̇ܶܫܬܰܘܙܰܒ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܒܝܰܘ̈ܡܳܬܳܐ ܗܳܠܶܝܢ ܩܰܕܝ̣̈ܫܶܐ ܕܰܒܝܰܕ ܨܰܘܡܳܐ ܘܰܨܠܘ̣ܬܳܐ ܘܕܘ̣ܒܳܪ̈ܶܐ ܕܟܺܐܢܘ̣ܬܳܐ ܘܰܥܒܳܕ̈ܶܐ ܫܰܦܝ̣ܪ̈ܶܐ ܩܕܳܡܰܝܟ ܢ̇ܺܚܶܐ: ܘܥܰܡ ܕܰܟܝܽܘ̣ܬܳܐ ܘܩܰܕܝ̣ܫܘ̣ܬܳܐ ܫܽܘܘ̣ܙܳܒܳܐ ܫܰܦܝ̣ܪܳܐ ܢ̇ܶܫܟܰܚ: ܘܰܒܚܘ̣ܒܳܐ ܥܰܡ ܚܕ̈ܳܕܶܐ ܐܰܡܝ̣ܢܳܐܝ̣ܬ ܠܳܟ ܢ̇ܶܦܠܘ̣ܚ: ܟܰܕ ܕܳܚܶܩ ܐܰܢ̱ܬ ܡܶܢܰܢ ܠܟܽܠܳܗ̇ ܡܰܪܝ̣ܪܘ̣ܬܳܐ ܘܒܝ̣ܫܘ̣ܬܳܐ: ܘܰܠܟܽܠܳܗ̇ ܢܟܝ̣ܠܘ̣ܬܳܐ ܘܟܰܕܳܒܘ̣ܬܳܐ: ܘܰܡܩܰܕܶܫ ܐܰܢ̱ܬ ܠܢܰܦܫ̈ܳܬܳܐ ܕܝ̣ܠܰܢ: ܘܰܡܙܰܗܶܐ ܐܰܢ̱ܬ ܠܦܰܓܪ̈ܰܝܢ: ܐܰܝܟܰܢܳܐ ܕܒܰܟܢܘ̣ܫܝܳܐ ܚܰܕ ܦ̇ܐܶܐ̣ ܠܰܫܡܳܟ ܩܰܕܝ̣ܫܳܐ ܩܕܳܡܰܝܟ ܢ̇ܩܘ̣ܡ ܟܽܠܰܢ ܒܢܰܝ̈ܳܐ ܕܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ ܐܰܡܬܳܐ ܕܝ̣ܠܳܟ: ܪ̈ܳܥܰܘܳܬܳܐ ܒܩܰܘܡܰܝ̈ܗܽܘܢ: ܟܳܗ̈ܢܶܐ ܒܦܝܪ̈ܡܰܝܗܽܘܢ: ܘܰܡܫܰܡ̈ܫܳܢܶܐ ܒܗܘ̣ܠܳܠܰܝ̈ܗܽܘܢ: ܚܰܛܳܝ̈ܶܐ ܒܡܶܬܦܰܢܝܳܢܘ̣ܬܗܽܘܢ: ܘܬܰܝ̈ܳܒܶܐ ܒܰܓܡܝ̣ܪܘ̣ܬܗܽܘܢ: ܘܰܡܙܰܘܓ̈ܶܐ ܒܕܰܟܝܽܘܬܗܽܘܢ: ܘܣܳܒ̈ܶܐ ܒܨܰܘܡܰܝ̈ܗܽܘܢ: ܘܰܥܠܰܝ̈ܡܶܐ ܒܡܶܬܟܰܫܦܳܢܘ̣ܬܗܽܘܢ: ܛܠܳܝ̈ܶܐ ܒܰܡܨܰܠܠܘ̣ܬܗܽܘܢ: ܘܓܰܕܽܘ̣̈ܕܶܐ ܒܰܙܡܝ̣ܪ̈ܳܬܗܽܘܢ: ܥܰܬܝ̣ܪ̈ܶܐ ܒܙܶܕܩ̈ܳܬܗܽܘܢ: ܘܡܶܣ̈ܟܺܢܶܐ ܒܰܡܣܰܝܒܪܳܢܘ̣ܬܗܽܘܢ: ܐܰܝܟܰܢܳܐ ܕܡܶܢ ܟܽܠ ܦܘ̣ܡܝ̣̈ܢ ܫܰܘܝܳܐܝ̣ܬ ܫܘ̣ܒܚܳܐ ܕܠܳܐ ܫܶܠܝܳܐ ܠܳܟ ܡܩܰܪܒܝ̣ܢܰܢ ܟܰܕ ܡܦܝ̣ܣܝ̣ܢܰܢ ܘܒܳܥܶܝܢܰܢ ܡܶܢܳܟ: ܕܰܒܝܰܘܡܳܐ ܗܰܘ̇ ܐ̱ܚܪܳܝܳܐ ܕܒܶܗ ܕܳܢܰܚ ܒܪܳܐ ܝ̣ܚܝ̣ܕܳܝܳܐ ܕܝ̣ܠܳܟ ܢ̇ܶܫܬܘܶܐ ܕܰܩܕܳܡܰܘܗ̱ܝ ܢ̇ܩܘ̣ܡ ܒܰܠܒܘ̣̈ܫܶܐ ܚܶܘܳܪ̈ܶܐ ܘܒܰܟܠܝ̣̈ܠܶܐ ܡܰܦܪ̈ܓܶܐ: ܘܥܰܡ ܒܬܘ̣̈ܠܳܬܳܐ ܚܰܟܝ̣̈ܡܳܬܳܐ ܒܠܰܡ̈ܦܺܐܕܶܐ ܢܰܗܝ̣ܪ̈ܶܐ ܢ̇ܶܥܘ̣ܠ ܠܰܓܢܘ̣ܢܳܐ ܗܰܘ̇ ܡܠܶܐ ܚܰܕ̈ܘܳܬܳܐ: ܘܬܰܡܳܢ ܢ̇ܙܰܡܰܪ ܠܳܟ ܬܶܫܒ̈ܚܳܬܳܐ ܦܰܐܝ̈ܳܬܳܐ ܘܠܶܗ ܠܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ ܘܰܠܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀