ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܒܨܰܘܡܳܐ ܙܰܗܝܳܐ ܠܢܰܦܫ̈ܳܬܰܢ ܢ̇ܕܰܟܶܐ: ܘܒܰܨܠܰܘ̈ܳܬܳܐ ܕܰܟܝ̈ܳܬܳܐ ܠܦܰܓܪ̈ܰܝܢ ܢ̇ܟܰܒܶܫ: ܘܰܒܫܰܗܪܳܐ ܥܝ̣ܪܳܐ ܠܪ̈ܶܥܝܳܢܰܝܢ ܢ̇ܙܰܗܶܐ: ܘܰܒܫܘ̣ܒܚܳܐ ܫܰܦܝܳܐ ܠܠܶܫܳܢ̈ܰܝܢ ܢܩܰܕܶܫ: ܘܠܳܐܟܶܠܩܰܪܨܳܐ ܒܬܰܟܬܘ̣ܫܳܐ ܢ̇ܶܙܟܶܐ: ܘܡܶܢ ܒܝ̣̈ܫܳܬܳܐ ܒܥܘ̣ܕܪ̈ܳܢܰܝܟ ܢ̇ܶܬܦܰܨܶܐ: ܐܰܝܟܰܢܳܐ ܕܫܘ̣ܒܚܳܐ ܒܙܳܟܘ̣ܬܳܐ ܢ̇ܰܣܶܩ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܰܡ ܥܳܠܡܝ̣ܢ ܐܰܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܫܶܡܫܳܐ ܕܙܰܕܝ̣ܩܘ̣ܬܳܐ: ܘܢܘ̣ܗܪܳܐ ܫܰܪܝ̣ܪܳܐ ܠܳܐ ܡܶܫܬܰܪܝܳܢܳܐ: ܗܰܘ̇ ܡܰܢܗܪܳܢܳܐ ܕܒܶܪ̈ܝܳܬܳܐ: ܘܝܳܗܘ̣ܒܳܐ ܕܢܘ̣ܗܪܳܐ ܐܝ̣ܡܳܡܳܝܳܐ: ܗܰܘ̇ ܕܰܒܢܘ̣ܗܪܳܐ ܠܳܐ ܡܶܬܩܰܪܒܳܢܳܐ ܥܳܡܰܪ: ܘܡܶܢ ܡܫܰܡ̈ܫܳܢܶܐ ܕܢܘ̣ܪܳܐ ܘܰܕܪܘ̣ܚܳܐ ܡܶܫܬܰܒܰܚ ܘܡܶܣܬܓܶܕ: ܗܰܘ̇ ܕܰܒܪܶܡܙܳܐ ܕܝ̣ܠܶܗ ܡܰܦܨܰܚ ܠܒܶܪ̈ܝܳܬܳܐ: ܕܰܒܨܶܒܝܳܢܶܗ ܡܚܰܕܶܐ ܠܰܐܪܥܳܐ ܒܙܰܠܝ̣̈ܩܰܘܗ̱ܝ ܕܫܶܡܫܳܐ: ܒܗܳܢܳܐ ܡܳܪܝ̱ ܥܶܕܳܢܳܐ ܕܫܘ̣ܠܛܳܢܶܗ ܕܠܺܠܝܳܐ ܐܶܬ̣ܩܦܶܠ ܡܶܢܰܢ: ܘܙܰܠܝ̣̈ܩܶܐ ܨܰܦܪ̈ܳܝܶܐ ܐܶܬ̣ܚܙܝ̣ܘ ܙܰܠܓ̈ܶܐ ܕܛܰܝܒܘ̣ܬܳܐ ܕܝ̣ܠܳܟ ܢܰܙܠܓܽܘܢ ܒܢܰܦܫ̈ܳܬܳܐ ܕܝ̣ܠܰܢ: ܘܡܶܢ ܢܶܟܝ̈ܳܢܶܐ ܕܚܘ̣ܡܳܐ ܘܝܰܩܕܳܢܳܐ ܘܫܰܘܒܳܐ ܢ̇ܶܫܬܰܘܙܰܒ: ܐܰܝܟܰܢܳܐ ܕܟܰܕ ܠܡܺܐܢܳܐ ܠܚܰܒܪܶܗ ܕܠܳܐ ܢܶܟܝܳܢܳܐ ܢ̣ܶܬܢܛܰܪ: ܘܰܠܘܳܬܳܟ ܒܚܰܕܘ̣ܬܳܐ ܗܳܝ ܕܫܰܪܝ̣ܪܘ̣ܬܳܐ ܢܰܦܫܳܢܳܝܬܳܐ ܢ̇ܡܰܢܰܥ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܒܰܪܟܳܐ ܘܰܡܗܰܕܪܳܐ ܐܝ̣ܬܰܝܟ ܡܳܪܝܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܒܐܝ̣̈ܕܰܝܟ ܐܶܬܒܪܝ̣ ܢܘ̣ܗܪܳܐ: ܘܣܳܦ̣ܘ̱ ܘܶܐܬܛܰܠܰܩܘ̱ ܚܶܫܘ̣̈ܟܶܐ: ܗܰܘ̇ ܕܟܰܕ ܡܶܢ ܫܶܢܬܳܐ ܕܛܳܥܝܽܘ̣ܬܳܐ ܐܰܩܝ̣ܡܬ ܠܰܢ: ܝܰܗ̣ܒܬ ܠܰܢ ܕܰܒܨܰܦܪܳܟ ܢ̇ܶܬܒܰܣܰܡ: ܘܰܕܢ̇ܶܚܙܶܐ ܠܢܘ̣ܗܪܳܐ ܡܶܬܝܰܕܥܳܢܳܐ ܕܒܳܪܘ̣ܝܽܘ̣ܬܳܟ: ܘܰܠܪܰܒܘ̣ܬ ܦܰܐܝܽܘ̣ܬܳܐ ܕܚܶܟܡܬܳܐ ܕܝ̣ܠܳܟ ܗܳܝ̇ ܕܒܳܗ̇ ܥܒ̣ܰܕܬ ܠܰܫܡܰܝܳܐ ܘܰܪܩܰܥ̣ܬ ܐܰܪܥܳܐ ܥܰܠ ܡܰܝ̈ܳܐ: ܘܰܛܥܝ̣ܢ ܐܰܢ̱ܬ ܠܗܽܘܢ ܒܪܶܡܙܳܐ ܕܦܘ̣ܩܕܳܢܳܟ: ܠܗܳܕܶܐ ܡܰܢ ܨܰܒ̣ܶܬܬܳܗ̇ ܒܟܽܠ ܓܶܢ̈ܣܶܐ ܘܳܐܕ̈ܫܶܐ ܡܫܰܚܠ̈ܦܶܐ: ܘܰܒܫܘ̣ܦܪܳܐ ܕܨܶܒ̈ܬܶܐ ܪ̈ܓܝ̣ܓܶܐ: ܘܕܰܒܡܰܫ̈ܒܶܐ ܨܰܦܪ̈ܳܝܶܐ ܡܰܦܪܓܝ̣ܢ: ܦܳܪܰܚܬܳܐ ܕܶܝܢ ܕܰܒܠܶܥ̈ܙܶܐ ܗܰܢܺܝ̈ܶܐܐ ܘܪܰܘܪ̈ܒܶܐ ܘܩ̈ܳܠܶܐ ܚܠܰܝ̈ܳܐ ܡܫܰܕܪܳܐ ܠܘܰܥܕܶܗ ܕܢܘ̣ܗܪܳܐ: ܒܥܝ̣ܪܳܐ ܕܒܰܓܥܳܬܳܐ ܪܰܥܘ̣ܡܬܳܐ ܘܰܚܢܝ̣ܓܬܳܐ ܡܫܰܒܚܳܐ ܡܶܛܽܠ ܩܘ̣ܝܳܡܳܐ ܘܰܫܟܳܚܬܳܐ ܕܬܘ̣ܪܣܳܝܳܗ̇ ܙܰܒܢܳܝܳܐ: ܢܰܗܪ̈ܰܘܳܬܳܐ ܘܡܰܒܘ̣̈ܥܶܐ ܫܰܦܝ̣ܪ̈ܰܝ ܪ̈ܶܕܝܶܐ ܕܰܒܩܳܠܰܝ̈ܗܽܘܢ ܡܪܝ̣ܒܝ̣ܢ ܘܰܒܡܰܪܕܝ̣ܬܗܽܘܢ ܡܰܠܦܝ̣ܢ: ܘܚܶܟܡܬܳܐ ܠܒܰܪܢܳܫܳܐ ܡܰܠܟܳܐ ܘܫܰܠܝ̣ܛܳܐ ܕܬܺܒܶܝܠ: ܫܡܰܝܳܐ ܕܶܝܢ ܕܬܰܠܝܳܐ ܘܰܡܬܝ̣ܚܳܐ ܥܰܠ ܟܽܠ ܣܰܘ̈ܦܝ̣ܢ ܘܰܡܗܰܕܪܳܐ ܒܡܰܘܙܰܠܬܳܐ ܕܢܰܗܝ̣ܪ̈ܶܐ: ܫܶܡܫܳܐ ܕܰܒܙܰܠܝ̣̈ܩܰܘܗ̱ܝ ܡܶܬܪܕܶܦ ܚܶܫܘ̣ܟܳܐ ܘܰܠܘܰܥܕܶܗ ܪܳܗܶܛ ܪܳܘܙܝ̣ܢ ܟܽܠܗܽܘܢ ܟܝ̈ܳܢܶܐ ܡܶܬܪ̈ܰܓܫܳܢܶܐ: ܟܰܕ ܒܓܝ̣ܓ̈ܠܶܐ ܡܶܬܟܰܪ̈ܟܳܢܝܳܬܳܐ ܡܶܬܡܰܬܚܝ̣ܢ ܙܰܠܝ̣̈ܩܶܐ ܕܝ̣ܠܶܗ: ܘܰܠܟܽܠ ܢܳܓܶܕ ܠܘܳܬ ܢܘ̣ܗܪܳܐ ܕܕܶܢܚܳܐ ܕܝ̣ܠܶܗ: ܣܰܗܪܳܐ ܘܟܰܘܟ̈ܒܶܐ ܚܰܪ̈ܝ̣ܦܰܝ ܨܶܡ̈ܚܶܐ ܘܰܡܝܰܒܠܝ̣ܢ ܘܕܳܚܩܝ̣ܢ ܠܡܰܛܪ̈ܳܬܳܐ ܠܺܠܝܳـܝ̈ܳܬܳܐ: ܘܒܰܟܪܘ̣ܟܝܳܐ ܕܝ̣ܠܗܽܘܢ ܡܰܝܬܶܝܢ ܠܨܰܦܪܳܐ ܐܳܐܰܪ ܕܰܡܦܰܬܰܟ ܒܪ̈ܝ̣ܚܳܢܶܐ ܒܰܣܝ̣̈ܡܶܐ: ܘܡܳܠܶܐ ܡܶܢ ܗܰܢܺܝܽܐܘ̣ܬܶܗ ܠܣܰܘܩܳܐ ܕܟܽܠ: ܥܰܠ ܗܳܠܶܝܢ ܡܳܪܝ̱ ܕܡܶܬܚ̈ܰܙܝܳܢ ܡܰܘܕܶܝܢܰܢ ܘܰܡܫܰܒܚܝ̣ܢܰܢ: ܘܰܐܝܟ ܕܰܒܒܶܨܪܳܐ ܙܥܘ̣ܪܳܐ ܒܣܘ̣ܟܳܠܳܐ ܢܳܣܒܝ̣ܢܰܢ: ܠܗܳܠܶܝܢ ܕܥܳܠܡܳܐ ܠܳܐ ܗܘ̣ܠܳܢܳܝܳܐ ܘܕܰܒܪܝ̣ܬܳܐ ܠܳܐ ܡܶܬܚܰܙܝܳܢܝ̣ܬܳܐ: ܘܚܳܙܶܝܢܰܢ ܠܳܟ ܫܶܡܫܳܐ ܕܙܰܕܝ̣ܩܘ̣ܬܳܐ ܗܰܘ̇ ܕܰܒܕܶܢܚܳܐ ܕܝ̣ܠܳܟ ܐܶܬܪܕܶܦ ܚܶܫܘ̣ܟܳܐ: ܘܰܒܙܰܠ̈ܓܶܐ ܕܝ̣ܠܳܟ ܛܘ̣ܒ̈ܬܳܢܶܐ ܡܶܬܒܰܣܡܝ̣ܢ ܟܽܠܗܽܘܢ ܟܶܢ̈ܫܶܐ ܕܢܰܨܺܝ̈ܚܶܐ: ܠܘܰܥܕܳܟ ܕܶܝܢ ܪ̈ܳܘܙܳܢ ܪ̈ܘ̣ܚܳܬܳܐ ܕܰܫܠܝ̣̈ܚܶܐ ܟܰܘܟ̈ܒܶܐ ܚܰܪ̈ܝ̣ܦܰܝ ܨܶܡ̈ܚܶܐ ܗܳܢܽܘܢ ܕܒܰܟܪܘ̣ܟܝܳܐ ܕܡܰܠܦܳܢܘ̣ܬܗܽܘܢ ܝܰܒ̣ܶܠܘ̱ ܘܕܰܚܩܘ̣ܗ̇ ܠܥܰܪܦܶܠܳܐ ܕܛܳܥܝܽܘ̣ܬܳܐ: ܘܰܢܓ̣ܰܕܘ̱ ܘܰܐܝܬܝ̣ܘ ܠܰܢ ܣܒܰܪܬܳܐ ܕܚܰܝ̈ܶܐ ܘܰܕܢܘ̣ܗܪܳܐ ܕܬܰܡܳܢ: ܘܪ̈ܶܕܝܶܐ ܡܶܬܗܰܘ̈ܢܳܢܶܐ ܕܬܶܫܒ̈ܚܳܬܳܐ ܡܰܠܰܐܟܳܝ̈ܳܬܳܐ: ܗܳܢܽܘܢ ܕܒܰܕܡܘ̣ܬ ܡܥܝ̣̈ܢܶܐ ܙܳܠܚܝ̣ܢ ܩܘ̣̈ܕܳܫܶܐ ܠܰܐܬܪܳܐ ܕܰܫܟܝ̣ܢܬܳܟ ܗܳܢܽܘܢ ܕܥܰܡܗܽܘܢ ܘܰܚܢܰܢ ܡܦܝ̣ܣܝ̣ܢܰܢ ܠܳܟ ܕܰܬ̣ܚܰܝܶܕ ܠܬܶܫܒܘ̣ܚܬܳܐ ܗܳܕܶܐ ܕܝ̣ܠܰܢ ܕܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܠܘܳܬ ܢܘ̣ܗܪܳܐ ܕܝ̣ܠܳܟ ܡܫܰܕܪܝ̣ܢܰܢ ܟܰܕ ܡܶܬܚܰܢܢܝ̣ܢܰܢ ܕܠܳܐ ܬܶܫܒܘ̣ܩ ܠܰܢ ܕܰܠܘܳܬ ܚܶܫܘ̣ܟܘ̣ܬܳܐ ܕܰܚܛܝ̣ܬܳܐ ܢ̇ܶܬܦܢܶܐ: ܐܰܘ ܗܝ̣ ܬܶܟܡܰܢܝ̱ ܠܰܢ ܒܣܶܬܪܳܐ: ܘܰܬܒܰܣܒܶܣܝ̱ ܡܝܰܬܪ̈ܳܬܰܢ ܐܶܠܳܐ ܐܰܢܗܰܪ ܠܢܰܦܫ̈ܳܬܰܢ ܒܙܰܗܪ̈ܝ̣ܪܶܐ ܕܚܘ̣ܒܳܐ ܕܝ̣ܠܳܟ: ܘܰܒܢܘ̣ܗܪܳܐ ܕܕܶܢܚܳܟ ܫܒܝ̣ܚܳܐ ܐܰܝܟܰܢܳܐ ܕܰܒܨܰܦܪܳܐ ܗܰܘ̇ ܪܰܒܳܐ ܘܠܳܐ ܡܶܫܬܰܪܝܳܢܳܐ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܡܫܝ̣ܚܳܐ ܢܘ̣ܗܪܳܐ ܫܰܪܝ̣ܪܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܝ̣ܪܡܳܐ

ܐܰܢ̱ܬ ܗ̱ܘ̣ ܡܳܪܝ̱ ܐܰܒܳܐ ܕܢܘ̣ܗܪܳܐ ܕܠܳܐ ܡܶܣܬܰܝܰܟ: ܘܰܒܪܳܐ ܕܡܶܢܳܟ ܨܶܡܚܳܐ ܫܒܝ̣ܚܳܐ ܕܠܳܐ ܡܶܬܕܪܶܟ: ܘܪܘ̣ܚܳܐ ܩܰܕܝ̣ܫܳܐ ܕܡܰܢܗܰܪ ܠܟܽܠ ܒܥܰܙܝ̣ܙܘ̣ܬܳܐ ܕܕܶܢܚܶܗ: ܠܳܟ ܡܳܪܝ̱ ܣܳܓܕܝ̣ܢ ܨܰܦܪ̈ܶܐ ܒܕܶܢܚܰܝ̈ܗܽܘܢ: ܘܠܳܟ ܡܰܟܪܙܝ̣ܢ ܐܝ̣ܡܳܡ̈ܶܐ ܒܪ̈ܶܗܛܰܝܗܽܘܢ: ܕܝ̣ܠܳܟ ܗ̱ܘ̣ ܡܳܪܝ̱ ܢܘ̣ܗܪܳܐ ܘܨܰܦܪܳܐ ܘܐܝ̣ܡܳܡܳܐ: ܐܰܢܗܰܪ ܠܰܢ ܒܢܘ̣ܗܪܳܟ ܘܚܰܕܳܐ ܠܰܢ ܒܨܰܦܪܳܐ ܕܝ̣ܠܳܟ ܘܰܥܒܶܕ ܪ̈ܰܚܡܰܝܟ ܥܰܠ ܟܽܠܰܢ ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܠܥܳܠܰܡ ܥܳܠܡܝ̣ܢ ܐܰܡܝ̣ܢ܀