ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܒܕܰܟܝܽܘ̣ܬܳܐ ܘܩܰܕܝ̣ܫܘ̣ܬܳܐ ܢ̇ܫܰܡܠܶܐ ܠܕܘ̣ܟܪܳܢܳܐ ܕܝܳܠܶܕܬܳܟ ܘܰܕܟܽܠܗܽܘܢ ܩܰܕܝ̣̈ܫܰܝܟ: ܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܒܚܰܕܘ̣ܬܳܐ ܘܒܰܪܘܳܙܳܐ ܪܘܳܚܬܳܐ ܕܢܰܦܫܳܐ ܘܰܕܦܰܓܪܳܐ: ܘܰܡܦܰܨܶܐ ܐܰܢ̱ܬ ܠܰܢ ܡܶܢ ܚܛܳܗ̈ܶܐ ܟܣܰܝ̈ܳܐ ܘܰܓܠܰܝ̈ܳܐ: ܘܝܳܗܶܒ ܐܰܢ̱ܬ ܠܰܢ ܕܠܰܒܬܘ̣ܠܬܳܐ ܕܟܝ̣ܬܳܐ ܘܩܰܕܝ̣ܫܬܳܐ ܒܟܽܠܙܒܰܢ ܢ̇ܫܰܡܠܶܐ ܕܘ̣ܟܪܳܢܳܗ̇ ܕܝܳܠܶܕܬܳܟ ܘܰܕܟܽܠܗܽܘܢ ܩܰܕܝ̣ܫ̈ܰܝܟ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܚܰܕ ܐܰܠܳܗܳܐ ܫܰܪܝ̣ܪܳܐ: ܘܡܰܠܟܳܐ ܕܥܳܠ̈ܡܶܐ ܗܰܘ̇ ܕܒܰܢܒܺܝ̈ܶܐ ܡ̣ܰܠܶܠ: ܘܠܰܫܠܝ̣̈ܚܶܐ ܚ̣ܰܝܶܠ: ܘܰܠܣܳܗ̈ܕܶܐ ܟܰܠ̣ܶܠ: ܘܰܠܡܰܘܕ̈ܝܳܢܶܐ ܙܰܝܶܢ: ܘܰܠܩܰܕܝ̈ܫܶܐ ܢ̣ܰܨܰܚ ܘܰܠܟܺܐܢ̈ܶܐ ܪܰܡ̣ܪܶܡ: ܘܰܠܙܰܕܝ̣̈ܩܶܐ ܝܰܩ̣ܰܪ: ܘܰܒܡܰܟܝ̣̈ܟܶܐ ܥܳܡܰܪ: ܘܰܒܢܝ̣̈ܚܶܐ ܡܕܰܝܰܪ: ܘܰܒܟܽܠ ܕܳܪ̈ܝ̣ܢ ܥ̱ܘ̣ܗܕܳܢܳܐ ܕܝܳܠܶܕܬܶܗ ܐܰܘܪܶܒ: ܘܰܫܡܶܗ ܩܰܕܝ̣ܫܳܐ ܘܰܡܝܰܩܪܳܐ ܡܶܫܬܰܒܰܚ: ܘܚܰܝܠܶܗ ܡܶܣܬܓܶܕ: ܘܫܘ̣ܒܚܶܗ ܒܟܽܠ ܦܘ̣ܡܝ̣̈ܢ ܡܶܬܡܰܠܰܠ: ܕܠܶܗ ܟܽܠ ܒܪܘ̣ܟ ܬ̣ܟܘ̣ܦܝ̱ ܘܟܽܠ ܠܶܫܳܢ ܢ̣ܰܘܕܶܐ: ܕܒܰܫܡܰܝܳܐ ܟܝ̣ܬ ܘܒܰܐܪܥܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܟܰܕ ܠܥ̱ܘ̣ܗܕܳܢܳܐ ܕܗܳܢܽܘܢ ܡܫܰܒ̈ܚܶܐ: ܘܰܡܥܰܠ̈ܝܰܝ ܒܟܽܠ ܢܶܨ̈ܚܳܢܶܐ ܡܳܪ̈ܳܢܳܝܶܐ ܡܰܝܬܶܝܢܰܢ: ܐܰܝܟ ܕܰܠܕܘ̣ܟܪܳܢܳܐ ܘܰܢܝܳܚܳܐ ܕܰܩܕܳܡ ܪܶܚܡܰܬ݀ ܐ̱ܢܳܫܘ̣ܬܳܟ ܡܳܪܝܳܐ: ܗܳܢܽܘܢ ܕܡܶܢ ܪܝ̣ܫ ܓܶܢܣܰܢ ܐܳܕܳܡ ܘܰܥܕܰܡܳܐ ܠܗܳܫܳܐ ܫܦ̣ܰܪܘ̱ ܠܳܟ: ܘܫܘ̣ܠܳܡܳܐ ܗܰܘ̇ ܫܰܦܝ̣ܪ ܕܶܚܠܬܳܐ ܘܠܳܐ ܥܕܝ̣ܠܳܐ ܐܶܫܟܰܚ̣ܘ̱: ܘܰܠܡܰܥܰܠܬܳܐ ܡܰܠܰܐܟܳܝܬܳܐ ܘܫܘ̣ܦܪܳܐ ܩܰܕܡܳܝܳܐ ܕܒܰܟܝܳܢܳܐ ܕܝ̣ܠܗܽܘܢ ܢܣ̣ܰܒܘ̱: ܘܰܕܢ̣ܶܗܘܽܘܢ ܠܳܟ ܚܰܒܝ̣̈ܒܶܐ ܘܒܰܥܳܝ̈ܶܐ ܘܡܶܬܩܰܒ̈ܠܳܢܶܐ ܚܠܳܦ ܢܰܦܫ̈ܳܬܳܐ ܕܝ̣ܠܰܢ ܐܰܫܘܺܝ̣ܬ ܠܰܡܛܰܟܣܘ̣ܬܳܐ ܕܰܐܒܳܗ̈ܳܬܳܐ ܕܰܒܕܳܪ̈ܶܐ ܩܰܕ̈ܡܳܝܶܐ ܘܰܕܥܰܡ̱̈ܡܶܐ ܠܳܐ ܡܗܰܝܡ̈ܢܶܐ ܐܶܬ̣ܚܙܝ̣ܘ: ܘܢܳܡܘ̈ܣܶܐ ܕܝ̣ܠܳܟ ܢ̣ܛܰܪܘ̱ ܟܰܕ ܠܳܐ ܝ̣ܠܶܦܘ̱: ܘܠܰܒܪܝ̣ܪܘ̣ܬܳܐ ܕܥܰܡ̱̈ܡܶܐ ܕܠܳܐ ܐܰܠܳܗ: ܒܝܰܕ ܡܰܟܣܳܢ̈ܘܳܬܳܐ ܘܡܰܪ̈ܬܝܳܢܘܳܬܳܐ ܡܚܰܟ̈ܡܳܢܶܐ ܘܡܰܠ̈ܦܳܢܶܐ ܗ̣ܘܰܘ ܠܰܟܢܘ̣ܫܝܳܐ ܕܰܢܒܺܝ̈ܶܐ ܡܰܐ̱ܪ̈ܙܳܢܶܐ ܕܰܫܪܳܪܳܐ ܕܝ̣ܠܳܟ: ܗܳܢܽܘܢ ܕܰܠܡܶܐܬܝ̣ܬܳܐ ܕܝ̣ܠܳܟ ܦܳܪܘ̣ܩܳܝܬܳܐ ܕܰܥܬܝ̣ܕܳܐ ܗ̱ܘܳܬ ܕܬ̣ܶܗܘܶܐ ܠܥܳܠܡܳܐ ܩ̣ܰܕܶܡܘ̱ ܐܰܟ̣ܪܶܙܘ̱: ܘܰܠܓܶܠ̈ܝܳܢܶܐ ܕܝ̣ܠܳܟ ܒܝܰܕ ܐ̱ܪ̈ܳܙܶܐ ܘܛܘ̣ܦ̈ܣܶܐ ܘܦܶܠ̈ܐܴܬܳܐ ܨܳܝܪܝ̣ܢ ܗ̱ܘܰܘ: ܗܳܢܽܘܢ ܕܰܒܥܰܝܢܳܐ ܕܪܘ̣ܚܳܐ ܟܰܕ ܚ̣ܙܰܘ: ܘܰܫܪܳܪܳܐ ܕܝ̣ܠܳܟ ܘܐ̱ܪ̈ܳܙܶܐ ܕܰܥܠܰܝܟ ܩ̣ܰܕܶܡܘ̱ ܐܶܬ̣ܢܰܒܝ̣ܘ ܥܰܠ ܝܰܘܡܳܐ ܕܝ̣ܠܝ̣ܕܘ̣ܬܳܟ ܘܶܐܬ̣ܪܰܓܪܰܓܘ̱ ܕܢܶܚܙܽܘܢ ܘܠܳܐ ܐܰܕܪܶܟܘ̱: ܠܓܘ̣ܕܳܐ ܕܰܫܠܝ̣̈ܚܶܐ ܒܰܝ̈ܬܳܝܶܐ ܕܝ̣ܠܳܟ ܗܳܢܽܘܢ ܡܣܰܒܪ̈ܳܢܶܐ ܕܰܬܡܝ̣̈ܗܳܬܳܐ ܘܰܓܒܰܪ̈ܘܳܬܳܐ ܘܚܰܝ̈ܠܶܐ ܕܡܶܬܓܰܠܝܳܢܘ̣ܬܳܐ ܕܝ̣ܠܳܟ ܕܒܰܒܣܰܪ ܠܘܳܬܰܢ ܐܶܣ̰ܬܰܥܪܰܬ݀ : ܒܰܝܢܳܬ ܥܰܡ̱̈ܡܶܐ ܕܰܒܟܽܠܳܗ̇ ܬܺܒܶܝܠ ܡܒܰܕܪܝ̣ܢ ܗ̱ܘܰܘ ܐܰܟ̣ܪܶܙܘ̱: ܠܶܐܘܰܢܓܶܠܝ̣̈ܣܛܶܐ ܣܘ̣ܢܰܩܠܝ̣̈ܛܘ̣ ܕܝ̣ܠܳܟ ܗܳܢܽܘܢ ܕܰܠܬܰܚܦܝ̣ܬܳܐ ܗܳܝ̇ ܫܘ̣ܫܶܦܳܝܬܳܐ ܕܰܐܝܟ ܡܽܘܫܶܐ ܗܰܘ̇ ܚܰܒܝ̣ܒܳܐ ܕܝ̣ܠܳܟ ܠܡܶܐܬܝ̣ܬܳܐ ܡܚܰܦܝܳܐ ܗ̱ܘܳܬ݀ ܟܰܕ ܫܩܰܠܘ̱: ܠܟܽܠܳܗ̇ ܡܶܬܥܰܡܪܳܢܝ̣ܬܳܐ ܡܶܢ ܢܘ̣ܗܪܳܐ ܕܝ̣ܠܳܟ ܐܰܠܳܗܳܝܳܐ ܡܠ̣ܰܘ: ܠܣܳܗ̈ܕܶܐ ܩܰܕܝ̣̈ܫܶܐ ܗܳܢܽܘܢ ܚܰܒܝ̣̈ܒܶܐ ܕܝ̣ܠܳܟ ܘܡܰܘܕ̈ܝܳܢܶܐ ܠܰܫܡܳܟ: ܠܚܰܫ̈ܶܐ ܘܐܘ̣ܠ̈ܨܳܢܶܐ ܕܣܰܝܒ̣ܰܪܘ̱: ܘܠܰܪ̈ܕܘ̣ܦܝܶܐ ܘܢܶܓ̈ܕܶܐ ܕܡܶܢ ܥܰܡ̱̈ܡܶܐ ܕܠܳܐ ܐܰܠܳܗ: ܠܦܘ̣ܣܳܩܳܐ ܕܰܡܢܰܘ̈ܳܬܳܐ: ܠܦܘ̣ܫܳܚܳܐ ܕܗܰܕ̈ܳܡܶܐ ܕܡܶܢ ܡܰܚ̈ܘܳܬܳܐ ܘܐܘ̣ܠ̈ܨܳܢܶܐ ܘܫܶܢܕ̈ܶܐ ܩܫܰܝ̈ܳܐ: ܠܰܚܢܘ̣̈ܩܝܶܐ ܕܰܒܡܰܝ̈ܳܐ ܘܰܒܬܶܢ̈ܳܢܶܐ ܘܰܠܝܰܩܕܳܢܳܐ ܕܰܒܢܘ̣ܪܳܐ ܕܰܠܘܳܬܗܽܘܢ ܐܶܣ̣ܬܥܰܪܘ̱: ܠܟܰܦܢܳܐ ܘܰܠܨܶܗܝܳܐ ܘܰܠܛܘ̣ܪ̈ܳܦܶܐ ܕܰܠܘܳܬܗܽܘܢ ܗ̣ܘܰܘ: ܥܰܡܗܽܘܢ ܕܶܝܢ ܐܰܝܟ ܕܰܒܦܝ̣ܢܟܳܐ ܕܕܰܗܒܳܐ ܪܘ̣ܡܝܳܢܳܐ ܡܩܰܪܒܝ̣ܢܰܢ ܩܕܳܡܰܝܟ ܠܰܕܡܳܐ ܝܰܩܝ̣ܪܳܐ ܕܡܶܢ ܨܰܘܪ̈ܰܝܗܽܘܢ ܐܶܫ̣ܬܰܦܰܥ: ܡܩܰܪܒܝ̣ܢܰܢ ܠܳܟ ܬܘ̣ܒ ܡܳܪܝܳܐ ܠܪ̈ܝ̣ܫܰܝ ܐܰܒܳܗ̈ܳܬܳܐ ܘܡܰܠ̈ܦܳܢܶܐ ܕܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ ܗܳܢܽܘܢ ܕܒܰܡܥܰܪ̈ܶܐ ܘܰܒܛܘ̣ܪ̈ܶܐ ܘܰܒܟܽܠ ܕܘ̣ܟܳܐ ܫܰܦܝ̣ܪ ܚ̣ܝܰܘ: ܘܰܠܫܘ̣ܠܳܡܳܐ ܛܳܒܳܐ ܐܶܬ̣ܡܰܢܰܥܘ̱: ܘܰܠܡܰܠܟܘ̣ܬܳܐ ܕܰܫܡܰܝܳܐ ܕܢ̣ܺܐܪܬܘ̣ܢ ܐܶܫ̣ܬܘܺܝ̣ܘ: ܡܰܐܠܽܘܢ ܕܶܝܢ ܗܳܝ ܕܝܰܬܝ̣ܪ ܩܰܕܝ̣ܫܳܐ ܘܝܰܬܝ̣ܪ ܫܳܘܝܳܐ ܠܟܽܠ ܛܘ̣̈ܒܶܐ ܘܩܘ̣ܕ̈ܳܫܶܐ ܩܰܕܝ̣ܫܬܳܐ ܘܰܗܕܝ̣ܪܰܬ݀ ܒܟܽܠ ܕܟܝ̣ܬܳܐ ܘܰܡܫܰܒܚܰܬ݀ ܡܶܢ ܟܽܠ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܫܘ̣ܒܗܳܪܗܽܘܢ ܕܰܢܒܺܝ̈ܶܐ: ܫܪܳܪܗܽܘܢ ܕܡܰܠܰܐܟ̈ܶܐ: ܚܰܕܘܰܬܗܽܘܢ ܕܰܫܠܝ̣ܚ̈ܶܐ: ܡܰܘܕܝܳܢܘ̣ܬܗܽܘܢ ܕܣܳܗ̈ܕܶܐ: ܟܠܝ̣ܠ ܛܘ̣ܒܳܐ ܕܰܡܗܰܝ̈ܡܢܶܐ ܡܳܪܬܳܐ ܕܥܺܕܬܳܐ: ܐܰܡܬܶܗ ܕܰܪܚܘ̣ܡܳܗ̇: ܗܳܝ ܕܝܰܬܝ̣ܪ ܡܶܢ ܡܰܘܬܒܳܐ ܕܝ̣ܠܳܟ ܡܥܰܠܝܳܐ: ܗܳܝ̇ ܕܰܗ̣ܘܳܬ݀ ܓܢܘ̣ܢܳܐ ܘܒܶܝܬ ܡܰܫܪܝܳܐ ܘܰܥܡܘ̣ܪܝܳܐ ܠܡܶܬܒܰܪܢܫܳܢܘ̣ܬܳܟ ܕܡܶܢܳܗ̇: ܒܳܗ̇ ܒܗܳܕܶܐ ܡܒܰܪܰܟܬܳܐ ܐܶܬܦ̣ܰܬܰܚܘ̱ ܬܰܪ̈ܥܶܐ ܕܒܰܝܬܳܐ ܕܝ̣ܠܰܢ ܩܰܕܡܳܝܳܐ ܗܳܢܽܘܢ ܕܡܶܢ ܥܶܠܰܬ݀ ܥܒܳܪ ܦܘ̣ܩܕܳܢܳܐ ܕܶܐܡܳܐ ܕܝ̣ܠܰܢ ܩܰܕܡܳܝܬܳܐ ܐܶܬ̣ܬܚܶܕܘ̱: ܘܗܝ̣ ܕܶܪܫ̣ܰܬ݀ ܠܰܢ ܐܘ̣ܪܚܳܐ ܠܡܰܥܰܠܬܳܐ ܕܦܰܪܕܰܝܣܳܐ ܗܰܘ̇ ܥܕܶܢܳܝܳܐ: ܒܝܰܕ ܚܰܕ̈ܘܳܬܳܐ ܘܛܳܒ̈ܳܬܳܐ ܕܡܶܢܳܗ̇ ܕܗܳܕܶܐ ܐܶܡܳܐ ܕܚܰܝ̈ܶܐ ܕܢܰܚ̣ܘ̱ ܠܰܢ: ܠܳܗ̇ ܠܗܳܕܶܐ ܒܬܘ̣ܠܬܳܐ ܐܶܡܳܐ ܕܝ̣ܠܳܟ ܩܰܕܝ̣ܫܬܳܐ ܘܰܠܟܽܠܗܽܘܢ ܗܳܢܽܘܢ ܕܡܶܢܰܢ ܐܶܬ̣ܶܐܡܰܪܘ̱ ܘܩܰܕܶܡ̣ܘ̱ ܗ̣ܘܰܘ ܡܢܝ̣̈ܚܳܢܶܐ ܕܝ̣ܠܳܟ: ܡܦܝ̣ܣܝ̣ܢ ܠܳܟ ܕܰܨܠܰܘ̈ܳܬܳܐ ܘܒܳܥ̈ܘܳܬܳܐ ܚܠܳܦܰܝܢ ܢ̣ܩܰܪܒܽܘܢ ܠܳܟ: ܩܰܒܶܠ ܐܶܢܽܘܢ ܕܢ̣ܶܗܘܽܘܢ ܒܰܥܳܝ̈ܶܐ ܘܡܶܬܩܰܒ̈ܠܳܢܶܐ ܚܠܳܦ ܢܰܦܫ̈ܳܬܳܐ ܕܟܽܠܰܢ: ܘܰܨܠܘ̣ܬܳܐ ܘܒܳܥܘ̣ܬܳܐ ܕܒܰܚܠܘ̣ܠܰܝ̈ܗܽܘܢ ܡܩܰܪܒܝ̣ܢܰܢ ܠܰܢܝܳܚܳܐ ܘܠܐܝ̣ܩܳܪܳܐ ܕܝ̣ܠܳܟ ܬ̣ܶܗܘܶܐ: ܘܕܶܒܚܳܐ ܗܳܢܳܐ ܕܰܒܥܶܩܳܪ̈ܶܐ ܡܡܰܕܰܟ: ܘܰܒܢܘ̣ܪܳܐ ܗܳܕܶܐ ܡܶܬܒܚܰܪ: ܒܝܽܘ̣ܡ ܥܺܐܕܳܐ ܩܰܕܝ̣ܫܳܐ ܕܥ̱ܘ̣ܗܕܳܢܗܽܘܢ ܐܰܝܟ ܡܽܘܪܽܘܢ ܕܰܟܝܳܐ ܘܗܶܪ̈ܘ̣ܡܶܐ ܩܰܕܝ̣̈ܫܶܐ ܢ̣ܶܒܣܰܡ ܠܳܟ: ܘܬܰܟܫܶܦܬܳܐ ܘܩܘ̣ܪܒܳܢܳܐ ܕܰܒܗܰܝܟܠܳܟ ܩܰܕܝ̣ܫܳܐ ܒܝܰܘܡܳܐ ܕܕܘ̣ܟܪ̈ܳܢܰܝܗܽܘܢ ܡܶܬܕܒܰܚ: ܠܰܢܝܳܚܳܐ ܘܠܐܝ̣ܩܳܪܳܐ ܕܝ̣ܠܳܟ ܢ̣ܶܗܘܶܐ ܘܰܠܫܘ̣ܒܩܳܢܳܐ ܕܚܰܛܳܝ̈ܶܐ ܘܕܰܚ̈ܛܳܗܶܐ ܕܝ̣ܠܰܢ: ܘܰܕܡܳܐ ܕܝ̣ܠܳܟ ܕܣܶܦܘ̈ܳܬܰܢ ܒܶܗ ܡܶܬܡܰܫ̈ܚܳܢ ܝܰܬܝ̣ܪ ܡܶܢ ܕܡܶܗ ܕܶܐܡܪܳܐ ܕܰܒܝܰܕ ܡܽܘܫܶܐ ܠܰܡܚܰܒ̈ܠܳܢܶܐ ܡܶܢ ܥܰܡܶܗ ܟܳܠܶܐ ܗ̱ܘܳܐ: ܟܽܠ ܡܚܰܒܠܳܢܳܐ ܘܰܚܛܝ̣ܬܳܐ ܘܢܶܟܠܳܐ ܡܶܢ ܢܰܦܫ̈ܳܬܰܢ ܟܠܝ̣: ܘܟܽܠ ܪܘ̣ܓܙܳܐ ܘܥܰܘܠܳܐ ܒܰܛܶܠ ܡܶܢܰܢ ܘܡܶܢ ܥܰܡܳܟ ܡܗܰܝܡܢܳܐ: ܘܫܰܝܢܳܐ ܗܰܘ̇ ܕܫܰܦܝ̣ܪ ܩܕܳܡܰܝܟ ܫܰܕܰܪ ܠܰܢ ܡܶܢ ܫܡܰܝܳܐ: ܘܢܰܛܰܪ ܠܥܺܕܬܳܐ ܐܰܡܬܳܐ ܕܝ̣ܠܳܟ: ܘܠܰܨܠܝ̣ܒܳܐ ܕܝ̣ܠܳܟ ܡܝܰܩܪܳܐ ܘܡܰܥܒܶܕ ܚܰܝ̈ܶܐ ܢ̣ܶܗܘܶܐ ܫܘ̣ܪܳܐ ܠܒܰܢܳܝ̈ܶܐ ܕܝ̣ܠܳܗ̇: ܘܰܫܠܳܡܳܐ ܕܝ̣ܠܳܟ ܦܳܪܘ̣ܩܳܝܳܐ ܢ̣ܶܐܚܘ̣ܕ ܫܘ̣ܠܛܳܢܳܐ ܒܰܬܚܘ̣̈ܡܶܝܗ̇: ܫܰܟܶܢ ܕܶܝܢ ܡܳܪܝܳܐ ܠܬܺܒܶܝܠ ܘܰܠܟܽܠܗܽܘܢ ܥܳܡܘ̣ܪ̈ܶܝܗ̇ ܙܰܒ̈ܢܶܐ ܛܳܒ̈ܶܐ ܕܰܡܫܰܪܬܚܝ̣ܢ ܒܟܽܠ ܛܳܒ̈ܳܢ: ܟܰܗܝ̣ܢܘ̣ܬ ܥܰܠ̈ܠܳܬܳܐ: ܘܰܡܫܰܪܬܚܘ̣ܬ ܦܺܐܪ̈ܶܐ: ܘܰܡܡܰܙܓܘ̣ܬ ܐܳܐܰܪ̈ܰܣ ܡܫܰܡܠܝܽܘܬ ܫܰܝܢܳܐ ܒܶܝܬ ܠܰܢ ܘܰܠܥܰܡ̱̈ܡܶܐ ܕܰܒܟܽܠܕܘ̣ܟ ܚܰܕܘ̣ܬܳܐ ܕܛܳܒ̈ܳܬܳܐ ܗܳܝ ܕܥܰܡܳܟ ܐܰܠܳܗܳܐ ܕܝ̣ܠܰܢ: ܘܥܰܡ ܟܽܠܗܽܘܢ ܩܰܕܝ̣̈ܫܰܝܟ: ܠܰܢ ܘܰܠܟܽܠܗܽܘܢ ܐܰܝܠܶܝܢ ܕܐܝ̣ܬܰܝܗܽܘܢ ܒܢܰܝ̈ܳܐ ܕܥܺܕܬܳܐ ܐܰܡܬܳܐ ܕܝ̣ܠܳܟ: ܪܰܒܳܐ ܠܝܰܬܡ̈ܶܐ ܕܥܰܡܳܐ ܕܝ̣ܠܳܟ: ܠܰܐܪ̈ܡܠܳܬܳܐ ܙܽܘܢ: ܠܰܐܣܝ̣ܪ̈ܶܐ ܫܪܝ̣: ܠܕܰܚܒܝ̣ܫܝ̣ܢ ܐܰܦܶܩ: ܠܰܟܪ̈ܝ̣ܗܶܐ ܐܰܚܠܶܡ: ܠܰܕܟܰܪܝܳܐ ܪܘ̣ܚܗܽܘܢ ܠܰܒܶܒ: ܠܰܐܝܠܶܝܢ ܕܰܒܫܶܒ̈ܝܶܐ ܡܰܪ̈ܝ̣ܪܶܐ ܦܪܘ̣ܩ ܠܰܐܝܠܶܝܢ ܕܰܒܫܘ̣̈ܥܒܳܕܶܐ ܥܰܒܕ̈ܳܢܳܝܶܐ ܚܰܪܰܪ: ܠܰܐܝܠܶܝܢ ܕܒܐܘ̣ܪ̈ܚܳܬܳܐ ܪ̈ܰܚܝ̣ܩܳܬܳܐ ܪܳܕܶܝܢ ܐܰܦܢܳܐ: ܠܰܐܝܠܶܝܢ ܕܒܰܐܣܘ̣ܪ̈ܶܐ ܫܺܐܕ̈ܳܢܳܝܶܐ ܡܶܫܬܰܢܩܝ̣ܢ ܫܰܘܙܶܒ: ܠܰܐܝܠܶܝܢ ܕܰܒܗܰܝܡܳܢܘ̣ܬܳܐ ܕܰܫܪܳܪܳܐ ܩܰܕܶܡ̣ܘ̱ ܫܟܶܒ̣ܘ̱ ܒܰܡ̈ܛܰܠ̱ܠܶܐ ܕܢܘ̣ܗܪܳܐ ܐܰܢܝ̣ܚ: ܒܡܰܫ̈ܟܢܶܐ ܗܳܢܽܘܢ ܐܰܒܪ̈ܳܗܳܡܳܝܶܐ ܥܰܠ ܣܡܳܟܳܐ ܕܟܽܠܗܽܘܢ ܩܰܕܝ̣̈ܫܶܐ ܐܰܫܪܳܐ: ܐܰܝܟܰܢܳܐ ܕܡܶܢ ܟܽܠ: ܘܰܒܝܰܕ ܟܽܠ: ܘܡܶܛܽܠ ܟܽܠ: ܫܘ̣ܒܚܳܐ ܘܐܝ̣ܩܳܪܳܐ ܢ̣ܶܣܰܩ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀

ܥܶܛܪܳܐ

ܚܽܘܢ ܡܳܪܝܳܐ ܒܪ̈ܰܚܡܰܝܟ ܠܝܰܠ̈ܕܶܝܗ̇ ܕܥܺܕܬܳܐ ܩܰܕܝ̣ܫܬܳܐ: ܘܥܰܕܰܪ ܒܰܚܢܳܢܳܟ ܠܰܒܢܶܝ̈ܗ̇ ܕܗܰܝܡܳܢܘ̣ܬܳܐ ܬܪܝ̣ܨܬܳܐ: ܒܳܗ̇ ܢܒܺܝ̈ܶܐ ܐܰܟܪܙܘ̣ܟ: ܘܰܫܠܝ̣ܚ̈ܶܐ ܫܰܡܫܘ̣ܟ: ܘܒܳܗ̇ ܟܺܐܢ̈ܶܐ ܐܰܚܒܘ̣ܟ: ܘܡܰܘܕ̈ܝܳܢܶܐ ܫܰܪ̈ܝ̣ܪܶܐ ܒܳܗ̇ ܝܰܩܪܘ̣ܟ: ܘܡܰܠ̈ܦܳܢܶܐ ܕܩܘ̣ܫܬܳܐ ܬܪܝ̣ܨܳܐܝ̣ܬ ܐܰܠܦܘ̣ܟ: ܘܚܰܕ ܐܝ̣ܬܰܝܟ: ܡܶܢ ܐܰܒܳܐ ܘܡܶܢ ܡܰܪܝܰܡ ܝܰܕܥܘ̣ܟ: ܘܗܰܒܠܰܢ ܡܳܪܝ̱ ܕܰܐܟܘܳܬܗܽܘܢ ܢ̇ܰܟܪܙܳܟ: ܘܒܰܕܡܘ̣ܬܗܽܘܢ ܢ̇ܰܘܕܶܐ ܒܳܟ ܘܥܰܡܗܽܘܢ ܢ̇ܫܰܒܚܳܟ ܘܰܢ̇ܩܰܠܣܳܟ ܘܰܢ̇ܪܰܡܪܡܳܟ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀