ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܘܰܥܶܕ ܘܟܰܢܶܫ ܠܰܢ ܡܳܪܝܳܐ ܠܝܳܪܬܘ̣ܬܳܐ ܕܝ̣ܠܳܟ ܥܺܕܬܳܐ ܩܰܕܝ̣ܫܬܳܐ: ܘܗܰܒܠܰܢ ܕܰܒܕܰܟܝܽܘ̣ܬܳܐ ܘܩܰܕܝ̣ܫܘ̣ܬܳܐ ܢ̇ܝܰܩܰܪ ܠܕܘ̣ܟܪ̈ܳܢܰܝܗܽܘܢ ܕܩܰܕܝ̣̈ܫܰܝܟ: ܢܒܺܝ̈ܶܐ ܕܰܐܟ̣ܪܙܘ̣ܟ ܒܐ̱ܪ̈ܳܙܰܝܗܽܘܢ: ܫܠܝ̣ܚ̈ܶܐ ܕܣܰܒ̣ܪܘ̣ܟ ܒܩܳܠܰܝ̈ܗܽܘܢ: ܡܰܘܕ̈ܝܳܢܶܐ ܕܰܐܘܕܝ̣ܘ ܒܳܟ ܒܚܰܫܰܝ̈ܗܽܘܢ: ܘܩܰܕܝ̣̈ܫܶܐ ܕܰܫܦ̣ܰܪܘ̱ ܠܳܟ ܒܕܘ̣ܒܳܪ̈ܰܝܗܽܘܢ: ܘܗܳܝ̇ ܡܰܪܝܰܡ ܐܶܡܳܟ ܕܐܝ̣ܬܶܝܗ̇ ܨܶܒܬܳܐ ܕܫܘ̣ܦܪ̈ܰܝܗܽܘܢ: ܘܒܰܨ̈ܠܰܘܳܬܳܗ̇ ܕܶܐܡܳܟ ܒܬܘ̣ܠܬܳܐ ܩܰܕܝ̣ܫܬܳܐ: ܘܰܕܕܝ̣ܠܗܽܘܢ ܢ̇ܶܫܬܘܶܐ ܠܰܟܠܝ̣̈ܠܰܝܗܽܘܢ ܘܰܢ̇ܡܰܢܰܥ ܠܰܐܘ̈ܘܳܢܰܝܗܽܘܢ: ܘܢ̇ܶܙܡܰܪ ܠܳܟ ܫܘ̣ܒܚܳܐ ܒܣܶܕܪ̈ܰܝܗܽܘܢ: ܠܥܳܠܰܡ ܥܳܠܡܝ̣ܢ ܐܰܡܝ̣ܢ܀

ܦܪܽܘ̣ܡܝܽܘܢ

ܠܬܶܫܒܘ̣ܚܬܳܐ ܕܪܰܒܘ̣ܬܳܟ ܘܰܠܬܰܘܕܝ̣ܬܳܐ ܕܡܳܪܘ̣ܬܳܟ: ܠܗܶܕܪܳܐ ܕܐܝ̣ܬܘ̣ܬܳܟ ܘܰܠܪܘ̣ܡܪܳܡܳܐ ܕܰܐܠܳܗܘ̣ܬܳܟ: ܠܒܶܢܝܳܢܳܐ ܕܥܺܕܬܳܟ ܘܰܠܩܰܘܡܳܐ ܕܡܰܪܥܝ̣ܬܳܟ: ܠܚܘ̣ܣܳܝܳܐ ܕܥܰܡܳܟ: ܘܰܠܫܘ̣ܒܩܳܢܳܐ ܕܝܳܪܬܘ̣ܬܳܟ: ܠܕܘ̣ܟܪܳܢܳܐ ܪܚܝ̣ܡܳܐ ܕܝܳܠܶܕܬܳܟ: ܘܰܕܟܽܠܶܗ ܚܘ̣ܕܪܳܐ ܕܰܡܢܝ̣̈ܚܳܢܶܐ ܕܝ̣ܠܳܟ: ܢܒܺܝ̈ܶܐ ܘܚܰܙܳܝ̈ܶܐ ܕܒܰܕܶܩܘ̱ ܡܶܐܬܝ̣ܬܳܟ: ܫܠܝ̣ܚ̈ܶܐ ܘܰܡܣܰܒܪ̈ܳܢܶܐ ܕܰܐܟ̣ܪܶܙܘ̱ ܓܶܠܝܳܢܳܟ: ܣܳܗ̈ܕܶܐ ܘܡܰܘܕ̈ܝܳܢܶܐ ܕܶܐܬܩܰܛܰܠܘ̱ ܡܶܛܽܠܳܬܳܟ ܐܰܒܳܗ̈ܳܬܳܐ ܘܡܰܠ̈ܦܳܢܶܐ ܕܰܢܩܶܦ̣ܘ̱ ܠܰܫܪܳܪܳܐ ܕܝ̣ܠܳܟ: ܟܺܐܢ̈ܶܐ ܘܟܳܗ̈ܢܶܐ ܕܰܥܒ̣ܰܕܘ̱ ܨܶܒܝܳܢܳܟ: ܝ̣ܚܝ̣̈ܕܳܝܶܐ ܘܕܰܝܪ̈ܳܝܶܐ ܕܶܐܬܡ̣ܟܰܪܘ̱ ܠܰܙܩܝ̣ܦܳܟ: ܢܙܝ̣ܪ̈ܶܐ ܘܥܳܢܘ̈ܳܝܶܐ ܕܶܐܬ̣ܥܰܛܰܦܘ̱ ܐܶܒܠܳܟ: ܥܰܢܝ̣̈ܕܶܐ ܡܗܰܝ̈ܡܢܶܐ ܕܰܫܟܶܒ̣ܘ̱ ܥܰܠ ܣܰܒܪܳܟ: ܘܰܠܢܘ̣ܛܳܪܳܐ ܕܚܰܝܰܝ̈ܢ ܘܰܠܥ̱ܘ̣ܗܕܳܢܳܐ ܕܰܡܚܝ̣ܠܘ̣ܬܰܢ: ܢ̣ܶܗܘܶܐ ܦܝ̣ܪܡܳܐ ܗܳܢܳܐ ܕܰܡܩܰܪܒܳܐ ܒܨܝ̣ܪܘ̣ܬܰܢ ܘܚܰܛܳܝܘ̣ܬܰܢ ܩܕܳܡܰܝܟ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܢܦܝ̣ܣܘ̣ܢܳܟ ܕܶܝܢ ܥܰܡܰܢ ܘܰܚܠܳܦܰܝܢ ܘܡܶܛܽܠܳܬܰܢ ܒܥܶܕܳܢܳܐ ܗܳܢܳܐ: ܟܽܠܗܽܘܢ ܟܰܫܝ̣ܪ̈ܶܐ ܕܰܦܠ̣ܰܚܘ̱ ܒܟܰܪܡܳܟ ܡܶܢ ܨܰܦܪܳܐ ܘܰܥܕܰܡܳܐ ܠܪܰܡܫܳܐ: ܘܰܠܐܝ̣ܘ ܩܕܳܡ ܪܰܒܘ̣ܬܳܟ ܡܶܢ ܫܘ̣ܪܳܝܳܐ ܠܫܘ̣ܠܳܡܳܐ: ܐܳܕܳܡ ܪܝ̣ܫܳܐ ܕܫܰܪ̈ܒܳܬܳܐ: ܗܳܒܝ̣ܠ ܕܰܩܛܝ̣ܠ ܥܰܠ ܣܰܒܪܳܟ: ܚܢܽܘ̣ܟ ܕܰܫܦ̣ܰܪ ܠܰܐܠܳܗܘ̣ܬܳܟ: ܢܽܘ̣ܚ ܕܰܪܫܰܡ ܐ̱ܪܳܙܳܐ ܕܥܺܕܬܳܟ: ܡܰܠܟܝ̣ܙܕܶܩ ܟܘ̣ܡܪܳܐ ܪܰܒܳܐ ܕܨܳܪ ܐ̱ܪܳܙܳܐ ܕܦܰܓܪܳܐ ܕܝ̣ܠܳܟ ܘܰܕܡܳܟ: ܐܰܒܪܳܗܳܡ ܕܰܫܡ̣ܰܥ ܩܳܠܳܟ: ܐܝ̣ܣܚܳܩ ܕܰܚ̣ܙܳܟ ܒܰܦܟܳܪ̈ܰܘܗ̱ܝ: ܝܰܥܩܽܘ̣ܒ ܕܰܪܓ̣ܶܫ ܒܰܙܩܝ̣ܦܳܟ: ܐܺܝܽܘ̣ܒ ܕܣܰܝܒ̣ܰܪ ܢܶܣ̈ܝܽܘ̣ܢܶܐ: ܡܽܘ̣ܫܶܐ ܪܝ̣ܫܳܐ ܕܰܢܒܺܝ̈ܶܐ: ܘܰܐܗܪܽܘܢ ܟܳܗܢܳܐ ܠܶܘܳܝܳܐ: ܐܶܫܰܥܝܳܐ ܕܰܐܟ̣ܪܶܙ ܒܰܛܢܳܟ: ܡܝ̣ܟܳܐ ܕܒ̣ܰܕܶܩ ܥܰܠ ܝܰܠܕܳܟ: ܙܟܰܪܝܳܐ ܕܰܐܘܕܰܥ ܥܰܠ ܕܶܢܚܳܟ: ܕܰܘܝ̣ܕ ܕܙܰܡ̣ܰܪ ܗܘ̣ܠܳܠܰܝ̈ܟ: ܫܡܘ̣ܐܝܶܠ ܕܰܥܒ̣ܰܕ ܨܶܒܝܳܢܳܟ: ܚܰܙܩܺܝ̣ܐܝܶܠ ܕܰܚ̣ܙܳܐ ܡܰܪܟܰܒܬܳܟ: ܕܳܢܺܝ̣ܐܝܶܠ ܕܫܰܘܕܰܥ ܥܰܠ ܩܶܛܠܳܟ: ܢܒܺܝ̈ܶܐ ܕܡܰܠܶܠܘ̱ ܟܰܕ ܠܳܐܝܶܢ: ܫܠܝ̣ܚ̈ܶܐ ܕܰܐܟ̣ܪܶܙܘ̱ ܠܰܣܒܰܪܬܳܟ: ܣܳܗ̈ܕܶܐ ܕܝܰܩ̣ܰܪܘ̱ ܟܰܕ ܚܳܕܶܝܢ: ܘܡܰܘܕ̈ܝܳܢܶܐ ܕܰܢܨܰܚ̣ܘ̱ ܟܰܕ ܗܰܝܡ̣ܶܢܘ̱: ܟܺܐܢ̈ܶܐ ܕܰܥܡ̣ܰܠܘ̱ ܟܰܕ ܕܳܝܨܝ̣ܢ: ܙܰܕܝ̣̈ܩܶܐ ܕܰܦܠ̣ܰܚܘ̱ ܟܰܕ ܦܨܝ̣ܚܝ̣ܢ: ܡܰܠ̈ܦܳܢܶܐ ܕܰܪܥܶܡ̣ܘ̱ ܩܘ̣ܫܬܳܐ: ܡܣܰܒܪ̈ܳܢܶܐ ܕܰܐܟ̣ܪܶܙܘ̱ ܫܪܳܪܳܐ: ܕܟܰܝ̈ܳܐ ܕܶܐܬܟܰܠܰܠܘ̱ ܒܫܘ̣ܦܪܳܐ: ܒܬܘ̣̈ܠܶܐ ܕܰܢܛܰܪܘ̱ ܙܰܗܝܽܘ̣ܬܳܐ: ܐܰܒܝ̣̈ܠܶܐ ܕܚܰܡܣ̣ܶܢܘ̱ ܒܢܰܟܦܘ̣ܬܳܐ: ܢܙܝ̣ܪ̈ܶܐ ܕܶܐܙܕܰܗܝ̣ܘ ܒܨܰܘܡ̈ܶܐ: ܚܠܝ̣̈ܨܶܐ ܕܶܐܙܕܰܝܰܢܘ̱ ܒܰܨܠܘ̣ܬܳܐ: ܙܗܰܝ̈ܳܐ ܕܶܐܬ̣ܥܰܫܰܢܘ̱ ܒܫܰܗܪ̈ܶܐ: ܓܡܝ̣ܪ̈ܶܐ ܕܶܐܬ̣ܓܰܢ̱ܒܰܪܘ̱ ܒܩܰܘ̈ܡܶܐ: ܥܳܢܘ̈ܳܝܶܐ ܕܶܐܬ̣ܟܰܫܰܪܘ̱ ܒܪܶܗܛܳܐ: ܘܥܰܡ ܗܳܠܶܝܢ ܕܶܝܢ ܬܘ̣ܒ ܗܳܝ̇ ܕܐܝ̣ܬܶܝܗ̇ ܫܳܘܝܰܬ݀ ܠܛܘ̣̈ܒܶܐ ܡܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܒܬܘ̣ܠܬܳܐ ܩܰܕܝ̣ܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܗܳܝ̇ ܕܡܶܢܳܗ̇ ܫܦ̣ܰܪ ܠܳܟ ܕܬ̣ܶܬܒܰܣܰܪ ܡܶܛܽܠ ܦܘ̣ܪܩܳܢܳܐ ܕܝ̣ܠܰܢ: ܕܒܰܨܠܰܘ̈ܳܬܳܗ̇ ܘܰܕܟܽܠܗܽܘܢ ܡܢܝ̣ܚ̈ܳܢܶܐ ܕܝ̣ܠܳܟ ܐܶܬܪܰܥܳܐ ܠܰܢ: ܘܰܒܝܰܕ ܬܰܟܫ̈ܦܳܬܗܽܘܢ ܫܰܝܶܢ ܠܰܢ: ܘܰܒܒܳܥܘ̈ܳܬܗܽܘܢ ܥܰܕܰܪ ܠܰܢ: ܘܒܰܦܝܳܣܗܽܘܢ ܣܰܝܰܥ ܠܰܢ: ܘܚܰܣܳܐ ܠܟܽܠܗܶܝܢ ܫܘ̣ܪ̈ܥܳܬܰܢ: ܘܰܫܒܘ̣ܩ ܟܽܠܗܶܝܢ ܚܰܘ̈ܒܳܬܰܢ: ܘܩܰܕܶܫ ܠܪ̈ܶܓܫܶܐ ܕܢܰܦܫ̈ܳܬܰܢ: ܘܰܡܪܘ̣ܩ ܨܳܐܝܽܘ̣ܬܳܐ ܕܦܰܓܪ̈ܰܝܢ: ܘܨܰܠܶܠ ܙܰܘ̈ܥܶܐ ܕܪ̈ܶܥܝܳܢܰܝܢ: ܘܰܐܢܗܰܪ ܥܰܝ̈ܢܶܐ ܕܬܰܪ̈ܥܝܳܬܰܢ: ܘܰܦܬܰܚ ܠܶܐܕ̈ܢܶܐ ܕܠܶܒܰܘ̈ܳܬܰܢ: ܘܙܰܗܳܐ ܪܶܬܡܳܐ ܕܣܶܦܘ̈ܳܬܰܢ: ܘܩܰܕܶܫ ܫܘ̣ܒܚܳܐ ܕܠܶܫܳܢܰܝ̈ܢ: ܘܰܡܠܝ̣ ܦܘ̣̈ܡܰܝܢ ܬܶܫܒ̈ܚܳܬܳܐ ܕܝ̣ܠܳܟ: ܘܩܰܒܶܠ ܕܶܒ̈ܚܶܐ ܕܬܰܘܕܝ̣ܬܰܢ: ܘܩܘ̣ܪܒܳܢܳܐ ܕܚܰܠܳܫܘ̣ܬܰܢ ܥܒܶܕܳܝܗ̱ܝ ܠܦܘ̣ܪܩܳܢܳܐ ܘܫܘ̣ܘܙܳܒܳܐ ܕܟܽܠܰܢ: ܘܰܠܕܘ̣ܟܪܳܢܳܐ ܕܥܰܢܝ̣̈ܕܰܝܢ ܘܠܰܢܝܳܚܬܳܐ ܕܟܽܠܗܽܘܢ ܫܟܝ̣̈ܒܰܝܢ: ܘܰܠܬܶܫܒܘ̣ܚܬܳܐ ܕܡܳܪܘ̣ܬܳܟ: ܘܰܠܬܰܘܕܝ̣ܬܳܐ ܕܪܰܒܘ̣ܬܳܟ: ܘܰܠܪܘ̣ܡܪܳܡܳܐ ܕܦܰܐܝܽܘ̣ܬܳܟ: ܘܰܠܣܶܓܕܬܳܐ ܕܓܰܐܝܽܘ̣ܬܳܟ: ܘܰܠܗܶܕܪܳܐ ܕܰܐܠܳܗܘ̣ܬܳܟ: ܘܰܠܩܘ̣ܠܳܣܳܐ ܕܫܳܠܘ̣ܚܳܟ: ܘܰܠܗܘ̣ܠܳܠܳܐ ܕܪܘ̣ܚܳܐ ܕܝ̣ܠܳܟ ܚܰܝܳܐ ܘܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܺܝ̣ܪܡܳܐ

ܩܰܒܶܠ ܡܳܪܝ̱ ܬܶܫܡ̈ܫܳܬܰܢ ܘܒܳܥ̈ܘܳܬܰܢ ܡܚܝ̣̈ܠܳܬܳܐ: ܥܰܡ ܬܶܫܡ̈ܫܳܬܳܐ ܚܰܝܠ̈ܬܳܢܝܳܬܳܐ ܕܡܰܠܰܐܟ̈ܶܐ ܘܰܕܪ̈ܰܒܰܝ ܡܰܠܰܐܟ̈ܶܐ: ܘܰܐܪ̈ܟܰܐܣ ܘܰܕܫܘ̣ܠ̈ܛܳܢܶܐ: ܘܰܕܟܽܠܗܽܘܢ ܣܶܕܪ̈ܶܐ ܘܛܶܟ̈ܣܶܐ ܥܶܠܳܝ̈ܶܐ: ܘܚܰܝ̈ܠܶܐ ܪ̈ܘ̣ܚܳܢܶܐ ܘܝܰܕܘ̣ܥ̈ܬܳܢܶܐ ܒܝܰܕ ܬܰܟܫ̈ܦܳܬܳܐ ܕܩܰܕܝ̣ܫܰܬ݀ ܒܟܽܠ ܝܳܠܕܰܬ݀ ܐܰܠܳܗܳܐ ܡܰܪܝܰܡ܆ ܘܕܰܢܒܺܝ̈ܶܐ ܕܫܰܡ̣ܶܫܘ̱ ܐ̱ܪܳܙܳܐ ܕܡܶܐܬܝ̣ܬܳܟ ܒܟܽܠ ܕܳܪ̈ܝ̣ܢ: ܘܕܰܫܠܝ̣ܚ̈ܶܐ ܕܣܰܒ̣ܰܪܘ̱ ܓܶܠܝܳܢܳܟ ܠܥܰܡ̱̈ܡܶܐ ܕܰܒܥܶܒܪ̈ܶܝܗ̇ ܕܰܐܪܥܳܐ: ܘܰܕܣܳܗ̈ܕܶܐ ܘܰܕܡܰܘܕ̈ܝܳܢܶܐ ܘܰܐܒܳܗ̈ܳܬܳܐ ܩܰܕܝ̣̈ܫܶܐ: ܗܳܢܽܘܢ ܕܶܐܫ̣ܬܰܪܰܪܘ̱ ܗ̱ܘܰܘ ܒܝܘ̣ܠ̈ܦܳܢܰܝܗܽܘܢ ܡܰܚ̈ܝܳܢܶܐ: ܘܩܰܪܶܒ̣ܘ̱ ܦܰܓܪ̈ܰܝܗܽܘܢ ܠܢܶܓ̈ܕܶܐ ܕܰܒܢܰܝ̈ܢܳܫܳܐ: ܡܶܛܽܠ ܚܘ̣ܒܳܟ ܕܨܶܝܕܰܝܗܽܘܢ: ܘܰܥܒܶܕ ܪ̈ܰܚܡܰܝܟ ܥܰܠ ܟܽܠܰܢ ܒܝܰܕ ܬܰܟܫ̈ܦܳܬܗܽܘܢ ܘܰܨܠܰܘ̈ܳܬܗܽܘܢ ܚܰܣ̈ܝܳܬܳܐ ܘܩܰܕܝ̣̈ܫܳܬܳܐ ܘܰܠܥܰܢܝ̣̈ܕܰܝܢ ܡܗܰܝܡ̈ܢܶܐ ܚܰܣܳܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀