ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܚܰܝܠܳܢܳܐ ܕܰܐܬܠܝ̣̈ܛܶܐ ܫܰܪ̈ܝ̣ܪܶܐ: ܘܰܡܟܰܠܠܳܢܳܐ ܕܰܐܓܘ̣ܢܝ̣̈ܣܛܶܐ ܙܪ̈ܝ̣ܙܶܐ: ܠܗܰܘ̇ ܡܩܰܒܠܳܢܳܐ ܕܰܕܡܳܐ ܙܰܟܳܝܳܐ ܕܣܳܗ̈ܕܶܐ: ܘܡܰܘܪܒܳܢܳܐ ܕܢܰܨܝ̣ܚܘ̣ܬܳܐ ܕܩܰܕܝ̣̈ܫܶܐ: ܠܗܰܘ̇ ܡܫܰܡܠܝܳܢܳܐ ܕܦܘ̣ܠܚܳܢܳܐ ܕܙܰܕܝ̣̈ܩܶܐ: ܘܰܡܟܰܢܫܳܢܳܐ ܕܛܘ̣ܒܬܳܢܘ̣ܬܳܐ ܠܟܽܠܗܽܘܢ ܐܰܝܠܶܝܢ ܕܰܐܚܝ̣ܕܝ̣ܢ ܒܚܘ̣ܒܶܗ: ܐܰܘܪܶܒ ܡܳܪܝ̱ ܕܘ̣ܟܪܳܢܳܐ ܕܝܳܠܶܕܬܳܟ ܒܬܘ̣ܠܬܳܐ ܩܰܕܝ̣ܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܘܕܰܢܒܺܝ̈ܶܐ ܩܰܕܝ̣̈ܫܶܐ: ܘܕܰܫܠܝ̣ܚ̈ܶܐ ܟܳܪ̈ܘ̣ܙܶܐ: ܘܰܕܣܳܗ̈ܕܶܐ ܫܰܦܝ̣ܪ̈ܰܝ ܙܳܟܘ̣ܬܳܐ: ܘܰܐܣܓܳܐ ܪܘ̣ܡܪܳܡܳܐ ܕܩܰܕܝ̣̈ܫܰܝܟ ܘܥܰܡܗܽܘܢ ܢ̇ܰܘܕܶܐ ܠܳܟ ܘܢ̇ܶܣܓܘ̣ܕ ܠܳܟ ܘܰܢ̇ܫܰܒܚܳܟ ܒܗܳܢܳܐ ܥܶܕܳܢܳܐ ܕܦܶܠܓܶܗ ܕܝܰܘܡܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܡܪܰܝܡܳܐ ܕܰܠܥܳܠܰܡ: ܘܰܐܠܳܗܳܐ ܡܫܰܒܚܳܐ ܕܰܠܥܳܠܡܝ̣ܢ: ܗܰܘ̇ ܕܰܡܝܰܩܰܪ ܒܥܰܝ̈ܢܰܝܟ ܡܰܘܬܳܐ ܕܙܰܕܝ̣̈ܩܰܝܟ: ܘܰܡܝܰܬܰܪ ܠܘܳܬܳܟ ܫܘ̣ܢܳܝܳܐ ܕܩܰܕܝ̣̈ܫܰܝܟ: ܘܪܰܒ ܒܥܺܕܬܳܟ ܕܘ̣ܟܪܳܢܳܐ ܕܚܰܒܝ̣̈ܒܰܝܟ: ܘܰܡܙܰܝܰܚ ܠܘܳܬ ܚܘ̣ܒܳܟ ܚܰܓܳܐ ܕܰܐܬܠܝ̣̈ܛܰܝܟ: ܘܰܡܥܰܠܰܝ ܒܗܰܝܟܠܳܟ ܥ̱ܘ̣ܗܕܳܢܳܐ ܕܰܪ̈ܚܘ̣ܡܰܝܟ: ܐܳܦ ܗܳܫܳܐ ܡܳܪܝܳܐ ܫܰܒܰܚ ܒܰܣܝ̣ܡܳܐܝ̣ܬ ܘܰܐܝܬܳܐ ܠܥ̱ܘ̣ܗܕܳܢܳܐ ܛܳܒܳܐ ܘܫܰܦܝ̣ܪ ܒܛܶܟܣܳܐ: ܘܶܐܬܕܰܟ݂ܰܪ ܠܦܝ̣ܪܡܳܐ ܗܳܢܳܐ ܕܰܡܩܰܪܒܳܐ ܒܨܝ̣ܪܘ̣ܬܰܢ ܘܚܰܛܳܝܽܘ̣ܬܰܢ ܩܕܳܡܰܝܟ: ܠܟܽܠܗܽܘܢ ܐܰܒܳܗ̈ܳܬܳܐ ܘܪ̈ܝ̣ܫܰܝ ܐܰܒܳܗ̈ܳܬܳܐ ܕܰܫܦ̣ܰܪܘ̱ ܠܳܟ: ܟܺܐܢ̈ܶܐ ܘܙܰܕܝ̣̈ܩܶܐ ܕܶܐܬ̣ܓܡܰܪܘ̱ ܒܳܟ ܢܒܺܝ̈ܶܐ ܩܰܕܝ̣̈ܫܶܐ ܕܶܐܬ̣ܢܰܒܝ̣ܘ ܡܶܛܽܠܳܬܳܟ: ܚܰܙܳܝ̈ܶܐ ܬܗܝ̣ܪ̈ܶܐ ܕܒܰܕܶܩܘ̱ ܓܶܠܝܳܢܳܟ: ܫܠܝ̣̈ܚܶܐ ܩܰܕܝ̣̈ܫܶܐ ܘܛܘ̣ܒ̈ܬܳܢܶܐ ܕܣܰܒ̣ܰܪܘ̱ ܦܘ̣ܪܩܳܢܳܟ: ܟܳܪ̈ܘ̣ܙܶܐ ܡܩܰܠ̈ܣܶܐ ܕܰܗ̣ܘܰܘ ܠܰܡ̈ܦܺܐܕܶܐ ܢܰܗܝ̣ܪ̈ܶܐ ܠܰܣܒܰܪܬܳܟ: ܣܳܗ̈ܕܶܐ ܩܰܕܝ̣̈ܫܶܐ ܕܝܰܗ̣ܒܘ̱ ܨܰܘܪ̈ܰܝܗܽܘܢ ܠܣܰܝ̈ܦܶܐ ܕܚܝ̣̈ܠܶܐ ܡܶܛܽܠ ܚܰܠܝܘ̣ܬܶܗ ܕܚܘ̣ܒܳܟ: ܡܰܘܕ̈ܝܳܢܶܐ ܢܰܨܝ̣̈ܚܶܐ ܕܣܰܝܒ̣ܰܪܘ̱ ܫܶܢ̈ܕܶܐ ܘܰܣܪ̈ܳܩܶܐ ܥܰܠ ܣܰܒܪܳܟ: ܡܰܠ̈ܦܳܢܶܐ ܬܪ̈ܝ̣ܨܰܝ ܫܘ̣ܒܚܳܐ ܕܰܐܟ̣ܪܶܙܘ̱ ܫܪܳܪܳܟ: ܝ̣ܚܝ̣̈ܕܳܝܶܐ ܘܕܰܝܪ̈ܳܝܶܐ ܕܰܗ̣ܘܰܘ ܪ̈ܳܚܡܶܐ ܘܒܰܝ̈ܬܳܝܶܐ ܠܡܳܪܘ̣ܬܳܟ: ܒܬܘ̣̈ܠܶܐ ܘܰܢܙܝ̣ܪ̈ܶܐ ܘܨܰܝ̈ܳܡܶܐ ܕܰܢܛܰܪܘ̱ ܢܳܡܘ̣̈ܣܰܝܟ: ܕܒܰܨܠܰܘ̈ܳܬܗܽܘܢ ܘܰܒܬܰܟܫ̈ܦܳܬܗܽܘܢ ܥܰܡ ܕܩܰܕܝ̣ܫܬܳܐ ܡܰܪܝܰܡ ܕܝ̣ܠܶܕܬܳܟ: ܫܰܟܶܢ ܠܥܰܢܝ̣̈ܕܶܐ ܡܗܰܝܡ̈ܢܶܐ ܕܩܰܕܶܡ̣ܘ̱ ܫܟ̣ܶܒܘ̱ ܥܰܠ ܣܰܒܪܳܟ: ܘܝܰܬܝ̣ܪܳܐܝ̣ܬ ܠܗܳܠܶܝܢ ܕܝܰܘܡܳܢܳܐ ܥ̱ܘ̣ܗܕܳܢܳܐ ܕܝ̣ܠܗܽܘܢ ܡܫܰܡܠܝ̣ܢܰܢ ܩܕܳܡ ܪܰܒܘ̣ܬܳܟ ܢܝܳܚܬܳܐ ܡܰܠܝܰܬ݀ ܚܰܕ̈ܘܳܬܳܐ: ܪܘܳܚܬܳܐ ܣܒܝ̣ܣܰܬ݀ ܒܛܳܒ̈ܳܬܳܐ: ܘܡܰܪܓܫܳܢܘ̣ܬܳܐ ܓܡܝ̣ܪܰܬ݀ ܒܰܪܘܳܙܳܐ: ܥܺܐܕܳܐ ܕܰܡܠܶܐ ܦܨܝ̣ܚܘ̣ܬܳܐ: ܚܰܓܳܐ ܕܰܓܡܝ̣ܪ ܒܰܕܝܳܨܳܐ: ܫܳܪܘ̣ܬܳܐ ܛܘ̣ܒܬܳܢܝ̣ܬܳܐ: ܘܰܒܝܰܘܡܳܐ ܗܰܘ̇ ܐ̱ܚܪܳܝܳܐ ܕܡܶܐܬܝ̣ܬܳܐ ܬܪܰܝܳܢܝ̣ܬܳܐ ܕܝ̣ܠܳܟ ܦܰܨܳܐ ܐܶܢܽܘܢ ܡܶܢ ܕܝ̣ܢܳܐ ܫܰܘܙܶܒ ܐܶܢܽܘܢ ܡܶܢ ܢܘ̣ܪܳܐ: ܦܪܘ̣ܩ ܐܶܢܽܘܢ ܡܶܢ ܫܘ̣ܢܳܩܳܐ: ܚܣܘ̣ܟ ܐܶܢܽܘܢ ܡܶܢ ܚܘ̣ܝܳܒܳܐ: ܚܠܘ̣ܛ ܐܶܢܽܘܢ ܥܰܡ ܟܺܐܢ̈ܶܐ: ܛܰܟܶܣ ܐܶܢܽܘܢ ܥܰܡ ܙܰܕܝ̣̈ܩܶܐ: ܡܢܝ̣ ܐܶܢܽܘܢ ܥܰܡ ܢܒܺܝ̈ܶܐ: ܫܰܘܬܶܦ ܐܶܢܽܘܢ ܥܰܡ ܫܠܝ̣̈ܚܶܐ: ܣܕܘ̣ܪ ܐܶܢܽܘܢ ܥܰܡ ܟܳܪ̈ܘ̣ܙܶܐ: ܦܪܘ̣ܥ ܐܶܢܽܘܢ ܥܰܡ ܟܰܫܝ̣ܪ̈ܶܐ: ܘܰܐܘܪܶܬ ܐܶܢܽܘܢ ܥܰܡ ܛܳܒ̈ܶܐ: ܘܢ̣ܶܬܚܰܕܽܘܢ ܥܰܡ ܩܰܕܝ̣̈ܫܶܐ: ܘܢ̣ܶܬܦܰܨܚܽܘܢ ܥܰܡ ܒܬܘ̣̈ܠܶܐ: ܘܰܢ̣ܕܘ̣ܨܽܘܢ ܥܰܡ ܪ̈ܘ̣ܚܳܢܶܐ: ܘܢ̣ܶܪܘ̣ܙܽܘܢ ܥܰܡ ܢܘ̣ܪ̈ܳܢܶܐ ܒܰܐܬܪܳܐ ܕܥܶܠܳܝ ܡܶܢ ܩܶܢܛܳܐ ܕܟܺܐܒ̈ܶܐ: ܘܰܡܚܰܪܰܪ ܡܶܢ ܟܘ̣ܪ̈ܗܳܢܶܐ: ܘܪܰܚܝ̣ܩ ܡܶܢ ܬܶܢܚ̈ܳܬܳܐ: ܕܰܡ̇ܠܶܐ̣ ܟܽܠܗܶܝܢ ܛܳܒ̈ܳܬܳܐ: ܘܣܰܓܺܝ̈ܳܐܢ ܒܶܗ ܓܶܐܘ̈ܳܬܳܐ: ܘܰܣܒܝ̣̈ܣܳܢ ܒܶܗ ܚܰܕ̈ܘܳܬܳܐ: ܘܪ̈ܳܥܡܳܢ ܒܶܗ ܟܽܠ ܩܝ̣̈ܢܳܬܳܐ: ܘܙܳܡܪ̈ܳܢ ܒܶܗ ܟܽܠ ܢܶܥܡ̈ܳܬܳܐ: ܘܚܳܕ̈ܝܳܢ ܒܶܗ ܟܽܠ ܪ̈ܘ̣ܚܳܬܳܐ: ܘܡܰܣ̈ܩܳܢ ܠܳܟ ܬܰܘܕ̈ܝܳܬܳܐ: ܘܰܡܩܰܪ̈ܒܳܢ ܠܳܟ ܣܶܓ̈ܕܳܬܳܐ ܬܪ̈ܝ̣ܨܳܬܳܐ: ܘܠܰܐܒܘ̣ܟ ܡܰܠܟܳܐ ܕܬܶܫܒܘ̣ܚܬܳܐ: ܘܰܠܪܘ̣ܚܳܟ ܫ̇ܘܶܐ̣ ܒܐܝ̣ܬܘ̣ܬܳܐ ܘܰܦ̇ܐܶܐ̣ ܒܪܰܒܘ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܡܳܪܝ̱ ܒܰܚܢܳܢܳܟ ܦܝ̣ܪܡܳܐ ܕܥܰܒܕ̈ܰܝܟ: ܘܶܐܬܪܰܥܳܐ ܒܥܶܛܪܳܐ ܕܟܳܗ̈ܢܰܝܟ: ܘܶܐܬܬܢܝ̣ܚ ܒܬܶܫܡ̈ܫܳܬܳܐ ܕܣܳܓ̈ܘ̣ܕܰܝܟ: ܘܰܥܒܶܕ ܒܶܗ ܢܝܳܚܳܐ ܘܕܘ̣ܟܪܳܢܳܐ ܛܳܒܳܐ ܠܝܳܠܶܕܬܳܟ ܘܰܠܩܰܕܝ̣̈ܫܰܝܟ ܘܰܠܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ: ܒܪܳܐ ܡܫܝ̣ܚܳܐ ܕܡܶܣܬܓܶܕ ܘܡܶܫܬܰܒܰܚ ܥܰܡ ܐܰܒܘ̣ܗ̱ܝ ܘܪܘ̣ܚܶܗ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀