ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܠܳܗܳܐ ܡܶܠܬܳܐ ܡܪܰܝܡܳܐ: ܚܰܝܠܳܐ ܘܚܶܟܡܬܳܐ ܕܰܐܒܳܐ: ܕܠܰܡܫܰܪܝܳܐ ܕܰܪܡܶܐ ܒܥܰܪܣܳܐ ܕܟܘ̣ܪ̈ܗܳܢܶܐ ܫܢܰܝ̈ܳܐ ܬܠܳܬܝ̣ܢ ܘܰܬܡܳܢܶܐ: ܐܰܣܝ̣ܬ ܘܰܐܚܠܶܡ̣ܬ ܡܫܰܪܝܽܘ̣ܬܳܐ ܕܢܰܦܫܶܗ ܥܰܡ ܦܰܓܪܶܗ: ܒܗܳܝ ܕܰܫܒܝ̣ܩܝ̣ܢ ܠܳܟ ܚܛܳܗ̈ܰܝܟ ܐܶܡ̣ܰܪܬ ܠܶܗ: ܘܰܠܥܰܪܣܶܗ ܦܰܩ̣ܶܕܬ ܠܶܗ ܕܢ̣ܶܛܥܰܢ: ܐܰܢ̱ܬ ܡܳܪܝ̱ ܐܰܣܳܐ ܘܰܐܚܠܶܡ ܠܰܡܫܰܪܝܽܘ̣ܬܳܐ ܕܢܰܦܫ̈ܳܬܰܢ ܘܰܕܦܰܓܪ̈ܰܝܢ: ܘܚܰܘܒ̈ܰܝܢ ܘܰܚܛܳܗ̈ܰܝܢ ܫܒܘ̣ܩ ܕܩܰܕܝ̣ܫܳܐܝ̣ܬ ܢ̇ܫܰܒܚܳܟ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܳܣܝܳܐ ܫܡܰܝܳܢܳܐ ܕܶܐܬ̣ܳܐ ܨܶܝܕ ܟܪ̈ܝ̣ܗܶܐ ܘܰܐܣܝ̣ ܐܶܢܽܘܢ: ܠܗܰܘ̇ ܩܰܕܝ̣ܫܳܐ ܕܰܥܡ̣ܰܪ ܥܰܡ ܛܰܡ̈ܶܐܐ ܘܩ̣ܰܕܶܫ ܐܶܢܽܘܢ: ܠܗܰܘ̇ ܪܳܡܳܐ ܕܶܐܬ̣ܬܰܚܬܝ̣ ܨܶܝܕ ܐܰܪ̈ܥܳܢܶܐ ܘܪܰܡܪܶܡ ܐܶܢܽܘܢ: ܠܗܰܘ̇ ܝܰܡܳܐ ܕܰܚܢܳܢܳܐ ܕܚܰܢ̣ܶܗ ܠܓܶܢܣܰܢ ܐ̱ܢܳܫܳܝܳܐ ܘܦܰܪܩܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܫܘ̣ܒܚܳܐ ܠܳܟ ܐܳܣܝܳܐ ܫܡܰܝܳܢܳܐ ܕܶܐܫ̣ܬܰܕܰܪ ܠܰܢ ܡܶܢ ܥܘ̣ܒܶܗ ܕܰܐܒܳܐ ܚܘ̣ܒܳܢܳܐܝ̣ܬ ܕܢ̣ܰܐܣܶܐ ܟܺܐܒ̈ܶܐ ܘܟܘ̣ܪ̈ܗܳܢܶܐ ܕܓܶܢܣܳܐ ܕܝ̣ܠܰܢ ܡܕܰܒܪܳܢܳܐܝ̣ܬ: ܐܰܢ̱ܬ ܡܳܪܝ̱ ܒܣܰܓܺܝܽܐܘ̣ܬ ܪ̈ܰܚܡܰܝܟ ܠܘܳܬܰܢ ܐܶܬܪܟܶܢ̣ܬ ܘܢܰܦܫܳܟ ܣܰܪܶܩ̣ܬ: ܘܰܕܡܘ̣ܬܳܐ ܕܥܰܒܕܳܐ ܢܣܰܒ̣ܬ ܐ̱ܢܳܫܳܐܝ̣ܬ: ܘܟܰܕ ܐܝ̣ܬܰܝܟ ܐܰܠܳܗܳܐ ܗ̣ܘܰܝܬ ܒܰܪܢܳܫܳܐ ܐܰܟܘܳܬܰܢ ܣܛܰܪ ܡܶܢ ܚܛܝ̣ܬܳܐ ܠܳܐ ܡܶܫܬܰܚܠܦܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܒܩܳܛܢܶܐ ܡܕܝ̣ܢ̱ܬܳܐ ܕܰܓܠܝ̣ܠܳܐ ܡܰܝ̈ܳܐ ܠܚܰܡܪܳܐ ܛܳܒܳܐ ܫܰܚ̣ܠܶܦܬ ܐܰܠܳܗܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܓܰܪܒܳܐ ܛܰܡܳܐܐ ܢܕܝ̣ܕܳܐ ܕܰܟܝ̣ܬ ܨܶܒܝܳܢܳܐܝ̣ܬ: ܘܠܰܡܫܰܪܝܳܐ ܕܡܶܢ ܢܘ̣ܓܪܳܐ ܪܡܶܐ ܗ̱ܘܳܐ ܘܡܶܬܢܰܘܰܠ ܒܥܰܪܣܳܐ ܕܟܺܐܒ̈ܶܐ ܐܰܚܠܶܡ̣ܬ ܡܫܰܡܠܝܳܐܝ̣ܬ: ܘܠܰܚܡܳܬܶܗ ܕܦܶܛܪܽܘܣ ܕܪܰܡܝܳܐ ܗ̱ܘܳܬ݀ ܒܶܐܫܳܬܳܐ ܐܶܚ̣ܰܕܬ ܒܐܝ̣ܕܳܗ̇ ܘܰܐܩܝ̣ܡܬܳܗ̇ ܚܠܝ̣ܡܳܐܝ̣ܬ: ܐܰܢ̱ܬ ܗ̱ܘ̣ ܕܰܠܛܰܠܝܶܗ ܕܩܶܢܛܪܘ̣ܢܳܐ ܗܰܘ̇ ܣܰܓܝ̣ ܗܰܝܡܳܢܘ̣ܬܳܐ ܒܡܶܠܬܳܟ ܐܰܣܝ̣ܬ ܩܰܠܝ̣ܠܳܐܝ̣ܬ: ܘܠܰܡܡܰܚܰܝܬܳܐ ܕܩܶܪܒ̣ܰܬ݀ ܠܟܶܢܦܳܐ ܕܡܰܪܛܘ̣ܛܳܟ ܐܰܪܕܝ̣ܬ ܠܳܗ̇ ܥܘ̣ܕܪܳܢܳܐ ܕܝ̣ܠܳܟ ܟܰܣܝܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܒܰܪܬܶܗ ܕܝܽܘܐܳܪܳܫ ܕܡܰܝܺـܝ̣ـܬܳܐ ܗ̱ܘܳܬ݀ ܢܰܚܶܡ̣ܬ ܐܰܝܟ ܐܰܠܳܗܳܐ ܫܰܪܝ̣ܪܳܐܝ̣ܬ: ܘܰܠܠܶܓܝܽܘܢ ܕܫܺܐܕ̈ܶܐ ܡܳܪ̈ܘ̣ܕܶܐ ܛܪܰܕܬ ܘܰܐܦܶܩ̣ܬ ܡܶܢ ܓܒܝ̣ܠܬܳܟ ܡܳܪܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܟܢܰܥܢܳܝܬܳܐ ܕܰܒܥ̣ܳܬ݀ ܡܶܢܳܟ ܡܶܛܽܠ ܒܰܪܬܳܗ̇ ܚܰܪܰܪܬܳܗ̇ ܡܶܢ ܡܰܥܒܕܳܢܘ̣ܬܶܗ ܕܫܺܐܕܳܐ ܚܰܝܽܘ̣ܣܬܳܢܳܐܝ̣ܬ: ܠܶܐܠܦܳܐ ܕܡܶܬܢܰܘܠܳܐ ܗ̱ܘܳܬ݀ ܡܶܢ ܥܰܙܝ̣ܙܘ̣ܬ ܪ̈ܘ̣ܚܶܐ ܘܩܰܫܝܽܘ̣ܬ ܓܰܠ̱̈ـܠܶܐ ܝܰܡ̱ܡ̈ܳܝܶܐ ܚܰܝܠܳܟ ܚܰܘܝ̣ܬ ܚܰܝܠܬܳܢܳܐܝ̣ܬ: ܘܠܳܟ ܫܡܰܥ̣ܘ̱ ܪ̈ܘ̣ܚܶܐ ܘܝܰܡܳܐ ܥܰܒܕܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܬܪܶܝܢ ܣܡܰܝ̈ܳܐ ܕܰܒܥ̣ܰܘ ܡܶܢܳܟ ܦܰܬܰܚ̣ܬ ܠܗܽܘܢ ܥܰܝ̈ܢܰܝܗܽܘܢ ܘܰܚ̣ܙܰܘ ܢܘ̣ܗܪܳܐ ܦܨܝ̣ܚܳܐܝ̣ܬ: ܘܠܐܝ̣ܕܳܐ ܕܝܰܒܝ̣ܫܳܐ ܦܫ̣ܰܛܬ ܐܰܝܟ ܚܒܰܪܬܳܗ̇ ܬܰܩܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܥܠܰܝܡܳܐ ܒܪܳܗ̇ ܕܰܐܪܡܰܠܬܳܐ ܐܰܚܝ̣ܬܳܝܗ̱ܝ ܐܰܝܟ ܥܳܒܘ̣ܕܳܐ ܕܟܽܠ ܚܰܝܠܬܳܢܳܐܝ̣ܬ: ܘܰܠܗܰܘ̇ ܕܶܐܬ̣ܡܰܚܝ̣ ܡܶܢ ܓܰܝ̈ܳܣܶܐ ܡܶܬܝܰܕ̈ܥܳܢܶܐ ܚܰܢ̣ܬܳܝܗ̱ܝ ܘܰܥܨܰܒ̣ܬ ܡܰܚ̈ܘܳܬܶܗ ܘܰܠܥܺܕܬܳܐ ܕܐܝ̣ܬܶܝܗ̇ ܦܘ̣ܬܩܳܐ ܐܰܫܠܶܡ̣ܬܳܝܗ̱ܝ ܒܛܝ̣ܠܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܙܳܢܝ̣ܬܳܐ ܡܰܣܠܰܝܬܳܐ ܒܝܰܕ ܒܶܟܝܳܐ ܘܕܶܡ̈ܥܶܐ ܘܡܶܬܬܰܘܝܳܢܘ̣ܬܳܐ ܚܰܣܝ̣ܬܳܗ̇ ܡܪܰܚܡܳܢܳܐܝ̣ܬ: ܘܰܠܣܰܡܝܳܐ ܕܡܖܢ ܟܪܶܣ ܐܶܡܶܗ ܒܳܒ̈ܳܬܳܐ ܕܥܰܝ̈ܢܰܘܗ̱ܝ ܬܰܩܶܢ̣ܬ: ܘܢܘ̣ܗܪܳܐ ܫܰܟܶܢܬ ܠܶܗ ܬܗܝ̣ܪܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܪܳܚܡܳܟ ܠܳܥܳܙܳܪ ܡܶܢ ܒܳܬܰܪ ܕܰܣܪܝ̣ ܒܩܳܠܳܟ ܐܰܩܝ̣ܡܬܳܝܗ̱ܝ ܦܳܩܘ̣ܕܳܐܝ̣ܬ: ܘܚܰܘܝ̣ܬ ܒܝܰܕ ܗܳܕܶܐ ܕܰܐܢ̱ܬ ܐܝ̣ܬܰܝܟ ܩܝܳܡܬܳܐ ܘܢܘ̣ܚܳܡܳܐ ܘܚܰܝ̈ܶܐ ܫܰܪܝ̣ܪܳܐܝ̣ܬ: ܡܶܛܽܠ ܗܳܕܶܐ ܒܳܥܶܝܢܰܢ ܘܰܡܦܝ̣ܣܝ̣ܢܰܢ ܠܪܶܚܡܰܬ݀ ܐ̱ܢܳܫܘ̣ܬܳܟ ܡܶܬܟܰܫܦܳܢܳܐܝ̣ܬ: ܕܬܰܪܟܶܢ ܐܶܕܢܳܟ ܘܰܬܩܰܒܶܠ ܨܠܰܘ̈ܳܬܳܐ ܘܒܳܥܘ̈ܳܬܳܐ ܕܡܰܪܥܝ̣ܬܳܟ ܕܰܡܩܰܪܒܳܐ ܠܳܟ ܚܢܝ̣ܓܳܐܝ̣ܬ: ܘܠܳܐ ܬܚܘ̣ܪ ܒܚܰܘܒ̈ܰܝܢ ܘܰܚܛܳܗ̈ܰܝܢ ܚܰܬܝ̣ܬܳܐܝ̣ܬ: ܘܠܳܐ ܢ̣ܶܬܬܥܝ̣ܪ ܘܠܳܐ ܢ̣ܶܬܠܰܚܰܡ ܥܠܰܝܢ ܪܘ̣ܓܙܳܐ ܬܳܒܘ̣ܥܳܐܝ̣ܬ: ܐܶܠܳܐ ܦܬܰܚ ܠܰܢ ܬܰܪܥܳܐ ܕܪ̈ܰܚܡܰܝܟ ܒܰܣܝ̣ܡܳܐܝ̣ܬ: ܘܰܐܥܒܰܪ ܡܶܢܰܢ ܢܶܣ̈ܝܽܘ̣ܢܶܐ ܘܡܰܚ̈ܘܳܬܳܐ ܕܡܶܢ ܥܶܠܰܬ݀ ܚܛܳܗ̈ܰܝܢ ܡܶܬܬܰܝ̈ܬܝܳܢ ܥܠܰܝܢ ܙܶܕܩܳܐܝ̣ܬ: ܘܰܬܚܶܝܬ ܟܶܢܦ̈ܶܐ ܕܛܰܝܒܘ̣ܬܳܟ ܣܰܬܩܪ ܠܩܢ ܐܰܡܝ̣ܢܳܐܝ̣ܬ: ܡܶܛܽܠ ܕܰܐܢ̱ܬ ܐܝ̣ܬܰܝܟ ܥܳܨܽܘ̣ܒܳܐ ܕܰܐܝܠܶܝܢ ܕܰܬܒܝ̣ܪܝ̣ܢ ܒܝ̣ܫܳܐܝ̣ܬ: ܘܡܶܫܟܚܳܢܳܐ ܕܰܐܝܠܶܝܢ ܕܰܐܒܝ̣ܕܝ̣ܢ ܕܳܘܝܳܐܝ̣ܬ: ܘܥܰܠ ܐܰܦܰܝ̈ ܗܳܠܶܝܢ ܬܶܫܒܘ̣ܚܬܳܐ ܡܰܣܩܝ̣ܢܰܢ ܠܳܟ ܠܳܐ ܣܰܒܥܳܐܝ̣ܬ: ܘܠܰܐܒܘ̣ܟ ܕܫܰܠܚ̣ܳܟ ܠܦܘ̣ܪܩܳܢܰܢ ܠܘܐ ܫܰܠܘܳܐܝ̣ܬ: ܘܰܠܪܘ̣ܚܳܟ ܩܰܕܝ̣ܫܳܐ ܘܡܰܥܒܶܕ ܚܰܝ̈ܶܐ ܫܰܘܝܳܐܝ̣ܬ ܡܰܣܩܝ̣ܢܰܢ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܫܝ̣ܚܳܐ ܦܝ̣ܪܡܳܐ ܕܬܰܪܥܽܘ̣ܬܳܐ: ܗܰܘ̇ ܕܚܰܣܝ̣ ܒܰܚܢܳܢܶܗ ܟܘ̣ܬܡ̈ܳܬܳܐ ܕܒܶܝܬ ܐܳܕܳܡ: ܘܒܰܡܕܰܒܪܳܢܘ̣ܬܶܗ ܕܒܰܒܣܰܪ ܕܰܟܝ̣ ܓܰܪ̈ܒܶܐ ܘܫ̣ܰܪܰܪ ܠܰܡܫܰܪ̈ܰܝܳܐ: ܘܰܦ̣ܬܰܚ ܠܰܣ̈ܡܰܝܳܐ: ܘܰܐܫܡ̣ܰܥ ܠܕܘ̣ܓ̈ܶܐ ܘܢܰܚ̣ܶܡ ܡܝ̣̈ܬܶܐ: ܘܚܰܘܝ̣ ܕܐܝ̣ܬܰܘܗ̱ܝ ܦܳܪܘ̣ܩܶܗ ܕܥܳܠܡܳܐ ܘܢܘ̣ܗܪܳܐ ܕܰܡܗܰܝܡ̈ܢܶܐ: ܩܰܒܶܠ ܦܝ̣ܪܡܰܢ ܘܶܐܬܬܢܝ̣ܚ ܒܒܳܥ̈ܘܳܬܰܢ: ܘܚܰܣܳܐ ܚܛܳܗ̈ܰܝܢ ܘܰܕܥܰܢܝ̣̈ܕܰܝܢ ܘܰܐܫܘܳܐ ܠܰܢ ܘܰܠܗܽܘܢ ܠܫܘ̣ܒܩܳܢܳܐ ܕܣܰܟܠ̈ܘܳܬܰܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀