ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܡܫܰܟܢܳܢܳܐ ܕܥܘ̣ܕܪ̈ܳܢܶܐ ܐܰܠܳܗ̈ܳܝܶܐ ܠܓܶܢܣܰܢ: ܘܝܳܗܘ̣ܒܳܐ ܕܫܘ̣̈ܟܳܢܶܐ ܫܡܰܝ̈ܳܢܶܐ ܠܛܘ̣ܗܡܰܢ: ܠܗܰܘ̇ ܛܳܒܳܐ ܘܟܺܐܢܳܐ ܕܒܺܐܪܳܐ ܚܕܰܬܳܐ ܢܩܝ̣ܪܰܬ݀ ܒܪܘ̣ܡܚܳܐ ܥܰܠ ܓܳܓܘ̣ܠܬܳܐ ܬܪܰܥ ܠܰܢ: ܘܰܡܥܝ̣ܢܳܐ ܐ̱ܪܳܙܳܢܳܝ̇ܬܳܐ ܡܶܢ ܕܰܦܢܶܗ ܡܳܪܳܢܳܝܬܳܐ ܒܰܙܩܝ̣ܦܶܗ ܦ̣ܬܰܚ ܠܰܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܠܝ̣ܬܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܗܰܘ̇ ܥܳܒܘ̣ܕܳܐ ܘܒܳܪܘ̣ܝܳܐ ܕܟܽܠ: ܘܦܳܪܘ̣ܩܳܐ ܘܰܡܫܰܘܙܒܳܢܳܐ ܕܟܽܠ ܗܰܘ ܕܰܒܪܶܚܡܰܬ݀ ܐ̱ܢܳܫܘ̣ܬܳܟ ܘܰܒܛܰܝܒܘ̣ܬܳܟ: ܘܒܰܫܦܝ̣ܥܘ̣ܬ ܣܘ̣ܓܳܐܐ ܕܰܚܢܳܢܳܟ ܝܰܬܝ̣ܪ ܦܰܐܝܳܐܝ̣ܬ ܐܶܬ̣ܬܰܝܬܝ̣ܢܰܢ ܒܰܗܘܳܝܰܢ: ܘܡܶܛܽܠ ܕܒܰܥܒܳܪ ܦܘ̣ܩܕܳܢܳܐ ܘܠܳܐ ܢܳܡܘ̣ܣܳܝ̈ܘܳܬܳܐ ܕܝ̣ܠܰܢ ܠܰܫܪܳܝܳܐ ܕܪܘ̣ܟܳܒܰܢ ܘܦܘ̣ܠܗܳܕܳܐ ܕܰܡܢܰܘ̈ܳܬܰܢ ܢܚ̣ܶܬܢ: ܚܘ̣ܕܳܬܳܐ ܕܝܰܬܝ̣ܪ ܡܥܰܠܰܝ ܠܥܰܬܝ̣ܩܘ̣ܬܰܢ ܒܪܶܚܡܰܬ݀ ܐ̱ܢܳܫܘ̣ܬܳܟ ܘܰܒܪ̈ܰܚܡܰܝܟ ܣܰܓܺܝ̈ܶܐܐ ܐܶܬܦܰܪܢܰܣ̣ܬ: ܘܡܰܚܫܰܒܬܳܐ ܕܰܡܥܰܠܝܳܐ ܒܚܰܘ̈ܣܳܢܰܝܟ ܠܳܐ ܡܶܬܬܟܝ̣̈ܠܳܢܶܐ ܡܶܛܽܠܳܬܰܢ ܐܶܬܚܰܫ̣ܰܒܬ: ܘܡܶܢ ܗܳܝܕܶܝܢ ܒܰܡܢܰܘ̈ܳܬܳܐ ܘܕܶܡ̈ܘܳܬܳܐ ܕܚܶـ̈ܙܘܳܢܶܐ ܒܝܰܕ ܢܒܺܝܰܝ̈ܟ ܡܰܠܶܠܬ ܥܰܡܰܢ: ܐܰܟܡܰܢ ܕܰܒܗܶܝܢ ܠܗܳܝ̇ ܕܰܒܚܰܪܬܳܐ ܥܬܝ̣ܕܳܐ ܕܬ̣ܶܬܓܠܶܐ ܒܥܳܠܡܳܐ ܒܡܶܬܒܰܪܢܫܳܢܘ̣ܬܳܟ ܬ̣ܰܘܕܰܥ ܠܰܢ: ܘܰܠܗܳܕܶܐ ܬܘ̣ܒ ܚܰܬܝ̣ܬܳܐܝ̣ܬ ܩ̣ܰܕܶܡ ܨܳܐܰܪ ܗ̱ܘܳܐ ܗܰܘ̇ ܪܝ̣ܫ ܐܰܒܳܗ̈ܳܬܳܐ ܝܰܥܩܘ̣ܒ ܒܰܙܢܰܝ̈ ܗܘ̣ܦܳܟܰܘ̈ܗ̱ܝ ܬܪ̈ܝ̣ܨܶܐ: ܥܛܝ̣̈ܦܰܝ ܐ̱ܪ̈ܳܙܰܝܟ ܡܰܚ̈ܝܳܢܶܐ: ܟܰܕ ܓܶܝܪ ܡܶܢ ܒܶܝܬ ܐܰܒܘ̣ܗ̱ܝ ܢܦ̣ܰܩ ܘܠܰܐܬܪܳܐ ܕܐܳܪܳܡ ܠܡܶܣܰܒ ܐܰܢ̱ܬܬܳܐ ܠܡܺܐܙܰܠ ܐܰܦܰܘ̈ܗ̱ܝ ܣ̣ܳܡ: ܠܡܰܚܰܬܬܳܟ ܠܳܐ ܡܶܬܡܰܠܠܳܢܝ̣ܬܳܐ ܕܰܠܘܳܬܰܢ ܘܠܰܡܟܝ̣ܪܘ̣ܬܳܐ ܕܟܰܠܰܬ݀ ܢܘ̣ܗܪܳܐ ܒܰܪ̱ܬ ܐܰܪ̈ܡܳܝܶܐ ܪܳܫܶܡ ܗ̱ܘܳܐ: ܟܰܕ ܕܶܝܢ ܠܒܺܐܪܳܐ ܕܐ̱ܪ̈ܳܙܶܐ ܡܰܢ̣ܰܥ ܘܰܠܟܺܐܦܳܐ ܗܳܝ̇ ܠܳܐ ܡܶܬܬܪܝ̣ܡܳܢܝ̣ܬܳܐ ܡܶܢ ܦܘ̣ܡܳܗ̇ ܚܰܝܠܬܳܢܳܐܝ̣ܬ ܥܰܓܶܠ ܐܰܝܟ ܕܰܠܫܶܩܝܳܐ ܕܰܓܙܳܪ̈ܶܐ ܕܬܰܡܳܢ ܪܰܒܝ̣ܥܝ̣ܢ ܗ̱ܘܰܘ: ܠܡܶܬܥܰܠܝܳܢܘ̣ܬܳܐ ܕܬܰܚܦܝ̣ܬܳܐ ܢܳܡܘ̣ܣܳܝ̇ܬܳܐ ܕܬ̣ܶܬܓܠܶܐ ܣܒܰܪܬܳܟ ܕܚܰܝ̈ܶܐ ܨܳܐܰܪ ܗ̱ܘܳܐ: ܗܳܝ̇ ܕܒܳܗ̇ ܛܳܒ ܚܰܬܝ̣ܬܳܐܝ̣ܬ ܠܠܶܒܳܐ ܕܟܺܐܦܳܐ ܕܥܰܡ̱̈ܡܶܐ ܐܰܥܒ̣ܰܪܬ: ܘܠܶܒܳܐ ܒܶܣܪܳܢܳܝܳܐ ܠܗܽܘܢ ܐܰܩ̣ܢܝ̣ܬ ܐܰܝܟ ܡܶܠܬܳܐ ܢܒܺܝܳܝܬܳܐ: ܕܠܳܗ̇ ܠܗܳܕܶܐ ܡܫܰܪܰܪ ܡܰܥܡܕܳܢܳܟ: ܕܡܶܢ ܟܺܐܦ̈ܶܐ ܗܳܠܶܝܢ ܡ̇ܨܶܐ̣ ܐܰܠܳܗܳܐ ܠܰܐܒܪܳܗܳܡ ܒܢܰܝ̈ܳܐ ܠܡܶܥ̣ܒܰܕ: ܒܰܪܒܝ̣ܥܳܝܘ̣ܬ ܢܶܫܰܘ̈ܗ̱ܝ ܕܶܝܢ ܚܺܐܪ̈ܳܬܳܐ ܘܰܕܪ̈ܘ̣ܟܳܬܳܐ ܠܰܡܫܰܡ̈ܫܳܢܶܐ ܕܐܶܘܰܢܓܶܠܝܽܘܢ ܕܡܶܢ ܫܠܝ̣̈ܚܶܐ ܩܰܕ̈ܡܳܝܶܐ ܒܰܡܥܰܠܝܘ̣ܬܳܐ: ܘܡܶܢ ܡܣܰܒ̈ܪܳܢܶܐ ܬܪ̈ܰܝܳܢܶܐ ܒܟܳܪܘ̣ܙܘ̣ܬܳܐ ܡܚܰܘܶܐ ܗ̱ܘܳܐ: ܒܰܬܪܰܥܣܝ̣ܪܳܝܘ̣ܬ ܕܶܝܢ ܒܢܰܘ̈ܗ̱ܝ ܠܰܬܪܶܥܣܰܪ ܢܰܗܪ̈ܰܘܳܬܳܐ ܡܶܬܝܰܕ̈ܥܳܢܶܐ ܫܠܝ̣̈ܚܶܐ ܩܕ̈ܝ̣ܫܶܐ ܕܡܶܢܳܟ ܟܺܐܦܳܐ ܕܰܫܪܳܪܳܐ ܠܫܶܩܝܶܗ ܕܐܝ̣ܣܪܳܐܝܶܠ ܚ̣ܰܕܬܳܐ ܪܳܕܶܝܢ ܡܰܘܕܰܥ ܗ̱ܘܳܐ: ܒܝܰܕ ܡܰܘܠܳܕܳܐ ܕܶܝܢ ܬܡܝ̣ܗܳܐ ܕܥܳܢ̈ܳܐ ܗܳܢܶܝ̈ܢ ܕܥܰܠ ܙܶܩ̈ܬܶܐ (ܚܘ̣ܛܪ̈ܶܐ،ܫܰܒ̈ܛܶܐ) ܩܠܝ̣̈ܦܳܬܳܐ ܚܳܡ̈ܳܢ ܕܰܒܪ̈ܶܗܛܶܐ ܕܡܰܝ̈ܳܐ ܕܫܳܩܰܘ̈ܳܬܗܶܝܢ ܠܘ̣ܩܒܰܠܗܶܝܢ ܕܳܥܶܨ ܗ̱ܘܳܐ: ܠܚܶܟܡܬܳܐ ܡܥܰܠܰܝܬܳܐ ܒܰܓܢܝ̣ܙܘ̣ܬܳܐ ܕܡܰܘܠܳܕܳܐ ܪܘ̣ܚܳܢܳܝܳܐ ܕܡܰܥܡܘ̣ܕܝ̣ܬܳܐ ܡܣܰܟܶܠ ܗ̱ܘܳܐ: ܗܳܢܳܐ ܕܒܰܨܠܝ̣ܒܳܐ ܦܳܪܘ̣ܩܳܝܳܐ ܡܶܫܬܰܡܠܶܐ: ܗܰܘ ܕܰܬܪܶܝܢ ܓܰܘ̈ܢܝ̣ܢ ܫܰܦܝ̣ܪ̈ܶܐ ܫܟܝ̣ܚܝ̣ܢ ܒܶܗ: ܕܡܳܐ ܘܡܰܝ̈ܳܐ: ܚܰܝܘ̣ܬܳܐ ܘܡܝ̣ܬܘ̣ܬܳܐ: ܐܰܠܗܘ̣ܬܳܐ ܘܐ̱ܢܳܫܘ̣ܬܳܐ: ܘܚܰܕ ܗܽܘ̣ ܟܰܕ ܗܽܘ̣ ܒܬܰܪ̈ܬܰܝܗܶܝܢ: ܐܰܝܟܰܢܳܐ ܕܗܳܢܽܘܢ ܕܡܶܬܝܰܠܕܝ̣ܢ ܗܳܟܰܢܳܐ ܢ̣ܺܐܬܽܘܢ ܪܘ̣ܚܳܢܳܐܝ̣ܬ: ܘܟܰܕ ܒܶܣܪ̈ܳܢܶܐ ܐܢܽܘܢ ܢ̣ܶܬܗܰܦܟܽܘܢ ܘܐܰܠܳܗ̈ܳܝܶܐ ܒܛܰܝܒܘ̣ܬܳܐ ܢ̣ܶܗܘܽܘܢ: ܒܗܳܝ̇ ܕܶܝܢ ܕܰܢܟܝ̣ܠܳܐܝ̣ܬ ܘܰܣܛܰܪ ܡܶܢ ܝ̣ܕܰܥܬܳܐ ܕܩܰܢܝܳܐ ܥܳܢ̈ܳܐ ܠܣܘ̣ܥܪܳܢܳܐ ܗܳܢܳܐ ܣܥ̣ܳܐ ܠܡܶܓܡܰܪ: ܥܰܠ ܡܰܛܥܝܳܢܘ̣ܬܳܐ ܕܐܳܟܶܠܩܰܪܨܳܐ ܐܰܚܝ̣ܕ ܥܳܠܡܳܐ ܓܡ̣ܰܪܬ ܒܰܨܠܘ̣ܬܳܐ ܕܡܶܫܬܰܐܠܳܢܘ̣ܬܳܐ ܕܡܶܢ ܡܰܘܬܳܐ ܪܳܡܶܙ ܗ̱ܘܰܝܬ: ܟܰܕ ܕܶܝܢ ܨܒ̣ܰܝܬ ܦܳܪܘ̣ܩܰܢ ܘܥܰܠ ܐܰܪܥܳܐ ܒܰܒܣܰܪ ܐܶܬ̣ܚܙܰܝܬ: ܠܟܽܠܗܶܝܢ ܗܳܠܶܝܢ ܒܰܩܢܘ̣ܡܳܟ ܣܘ̣ܥܪܳܢܳܐܝ̣ܬ ܫܰܡ̣ܠܝ̣ܬ: ܘܰܒܗܶܝܢ ܠܣܳܛܳܢܳܐ ܚܠܳܦ ܕܐܰܛܥܝ̣ ܠܰܕܒܶܝܬ ܐܳܕܳܡ: ܐܰܛܥܝ̣ܬܳܝܗ̱ܝ ܓܶܝܪ ܒܐ̱ܢܳܫܘ̣ܬܳܟ ܚܠܳܦ ܕܐܰܛܥܝ̣ ܐܶܢܽܘܢ ܒܣܰܒܪܳܐ ܕܐܰܠܳܗܘ̣ܬܳܐ: ܒܟܰܦܢܳܟ ܢܟܰܠ̣ܬܳܝܗ̱ܝ ܥܰܠ ܕܰܒܡܶܐܟܘ̣ܠܬܳܐ ܢܟ̣ܠ ܐܶܢܽܘܢ: ܒܡܰܘܬܳܟ ܣܚ̣ܰܦܬܳܝܗ̱ܝ ܚܰܟܝ̣ܡܳܐܝ̣ܬ ܡܶܛܽܠ ܕܠܳܐ ܡܡܳܬ ܬ̣ܡܘ̣ܬܽܘܢ ܚܳܪܥܳܐܝ̣ܬ ܐܰܘܟ̣ܶܠ ܐܶܢܽܘܢ: ܒܰܡܚܘ̣ܬܳܐ ܕܰܡܚܳܐ ܐܢܽܘܢ ܡܚ̣ܰܝܬܳܝܗ̱ܝ: ܘܰܒܩܶܛܠܳܐ ܕܰܩܛܠ ܐܶܢܽܘܢ ܩܛܰܠ̣ܬܳܝܗ̱ܝ: ܠܳܟ ܓܶܝܪ ܨܳܐܰܪ ܗ̱ܘܳܐ ܚܰܪܡܳܢܳܐ ܕܡܘ̣ܫܶܐ: ܕܥܰܠ ܩܰܝܣܳܐ ܒܡܰܫܪܝ̣ܬܳܐ ܬ̇ܠܶܐ̣ ܗ̱ܘܳܐ ܐܰܝܟ ܕܠܳܐܣܝܘ̣ܬܳܐ ܕܗܳܢܽܘܢ ܕܡܶܢܶܗ ܒܝ̣ܫܳܐܝ̣ܬ ܡܶܬܢܰܟܠܝ̣ܢ: ܠܘܳܬܳܟ ܒܰܨܠܝ̣ܒܘ̣ܬܳܟ ܚܳܝ̇ܪܝ̣ܢ ܚܦܝ̣ܛܳܐܝ̣ܬ: ܗ̣ܘܰܝܬ ܓܶܝܪ ܚܶܘܝܳܐ ܕܰܙܩܝ̣ܦ ܠܘ̣ܩܒܰܠܗܽܘܢ ܘܡܶܪܬܳܐ ܩܳܛܘ̣ܠܬܳܐ ܥܠܰܘܗ̱ܝ ܐܶܫ̣ܰܕܬ: ܒܰܕܡܳܐ ܘܡܰܝ̈ܳܐ ܕܡܶܢ ܕܰܦܢܳܟ ܒܰܙܩܝ̣ܦܳܐ ܪܕܰܘ: ܕܰܒܗܽܘܢ ܟܳܣܳܐ ܕܚܰܝ̈ܶܐ ܘܰܡܥܝ̣ܢܳܐ ܐ̱ܪܳܙܳܢܳܝܬܳܐ ܕܡܰܥܡܘ̣ܕܝ̣ܬܳܐ ܠܰܢ ܐܶܬ̣ܬܰܩܢܰܬ݀ ܕܒܳܗ̇ ܨܠܝ̣ܒܳܐ ܩܒܝ̣ܥ ܐܰܝܟ ܙܶܩ̈ܬܶܐ (ܚܘ̣ܛܪ̈ܶܐ): ܘܰܒܗܳܕܶܐ ܠܥܢ̈ܳܟ ܒܙܝ̣ܙܬܳܐ ܡܶܢܶܗ ܐܰܥܕܝ̣ܬ: ܗܳܝ̇ ܕܰܒܥܰܘܠܳܐ ܠܳܐ ܢܳܡܘ̣ܣܳܐܝ̣ܬ ܚܰܛܦܳܗ̇: ܘܕܝ̣ܠܶܗ ܓܘ̣ܡܕܳܢܳܐܝ̣ܬ ܣܳܡ̣ܳܗ̇: ܐܰܗܦ̣ܶܟ݂ܬ ܓܶܝܪ ܠܰܫܒܝ̣ܬܳܟ ܡܶܢ ܩܛܝ̣ܪܶܗ ܘܰܫ̣ܪܰܝܬܳܗ̇ ܡܶܢ ܢܝ̣ܪܶܗ: ܘܰܒܡܰܝ̈ܳܐ ܕܰܥܡܳܕܳܐ ܚ̣ܰܠܶܠܬ ܘܰܡܪܰܩ̣ܬܳܗ̇ ܘܰܒܚ̣ܰܪܬܳܗ̇ ܘܰܒܩ̣ܰܝܬܳܗ̇: ܘܰܓܒܝ̣ܠܬܳܐ ܕܡܶܢ ܕܪܝ̣ܫ ܬܡܝ̣ܗܳܐܝ̣ܬ ܓܒܰܠ̣ܬܳܗ̇: ܘܰܗܘܳܝܳܐ ܕܛܳܒ ܦ̇ܐܶܐ̣ ܘܰܡܥܰܠܰܝ ܡܶܢ ܗܰܘ̇ ܩܰܕܡܳܝܳܐ ܒܡܰܘܠܳܕܳܐ ܬܪܰܝܳܢܳܐ ܗ̣ܘܳܬ: ܐܶܬ̣ܚܰܘܪܰܬ݀ ܐܘ̣ܟܳܡܘ̣ܬܳܗ̇ ܗܳܝ̇ ܕܝܳܐܝ̣ܬܳܐ ܡܶܢ ܩܕܝ̣ܡ: ܘܰܗ̣ܘܳܬ݀ ܡܰܥܡܪܳܐ ܠܪܘ̣ܚܳܐ ܩܰܕܝ̣ܫܳܐ ܚܠܳܦ ܪܘ̣ܚܳܐ ܕܫܳܝ̇ܕܳܐ ܒܛܰܗܪܳܐ: ܘܡܶܛܽܠܗܳܕܶܐ ܡܦܝ̣ܣܝ̣ܢܰܢ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܕܰܬ̣ܫܰܘܙܶܒ ܠܰܢ ܡܶܢ ܢܶܣܝܘ̣̈ܢܶܐ ܚܰܣܝ̣̈ܢܶܐ ܘܰܩܪ̈ܳܒܶܐ ܬܰܩܝ̣̈ܦܶܐ ܕܐܳܟܶܠܩܰܪܨܳܐ: ܘܠܰܐܠ̈ܦܶܐ ܡܶܬܝܰܕ̈ܥܳܢܝܳܬܳܐ ܡܶܢ ܣܶܛܪܰܢ ܬܰܪܡܶܐ: ܘܰܠܪ̈ܶܒܘܳܬܳܐ ܡܶܢ ܝܰܡܝ̣ܢܰܢ: ܘܰܠܘܳܬܰܢ ܣܳܟ ܠܳܐ ܢ̣ܶܬܩܰܪܒܽܘܢ ܐܶܠܳܐ ܒܦܘ̣ܪܥܳܢܗܽܘܢ ܒܰܠܚܘ̣ܕ ܕܪ̈ܰܫܝ̣ܥܶܐ ܢܶܚ̣ܙܶܐ: ܗܰܒܠܰܢ ܡܳܪܝܳܐ ܒܛܰܝܒܘ̣ܬܳܟ ܕܘ̣ܒܳܪ̈ܶܐ ܕܰܦ̇ܐܶܝܢ̣ ܠܡܰܘܠܳܕܳܐ ܕܐܰܝܟ ܗܳܢܳܐ ܢ̇ܶܬܕܰܒܰܪ ܩܕܳܡܰܝܟ ܟܽܠܗܽܘܢ ܝܰܘ̈ܡܳܬܰܢ: ܐܰܝܟܰܢܳܐ ܕܰܠܒܘ̣ܣܳܡܳܐ ܗܰܘ̇ ܛܘ̣ܒܬܳܢܳܐ ܕܰܡܠܺܝ̣ܟ ܠܥܳܒ̈ܕܰܝ ܨܶܒܝܳܢܳܟ ܢ̇ܶܫܬܘܶܐ: ܒܛܰܝܒܘ̣ܬܳܐ ܕܝ̣ܠܳܟ ܘܰܒܫܰܦܝ̣ܪܘ̣ܬ ܨܶܒܝܳܢܳܐ ܕܐܰܒܘ̣ܟ ܡܒܰܪܟܳܐ ܘܰܒܡܰܥܒܕܳܢܘ̣ܬܳܐ ܕܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܛܰܝܶܒ ܠܰܢ ܡܳܪܝܳܐ ܐܰܠܳܗܳܐ: ܕܢܶܗ̇ܘܶܐ ܙܡܝ̣̈ܢܶܐ ܘܰܡܛܰܝ̈ܒܶܐ ܠܡܶܫܬܘ̣ܬܳܐ ܕܰܩܝܳܡܬܳܟ ܡܰܠܝܰܬ݀ ܚܰܝ̈ܶܐ: ܘܰܕܚܰܫ̣ܢܰܢ ܗܳܪܟܳܐ ܒܚܰܫܰܝ̈ܟ ܘܥܰܕܥ̣ܶܕܢܰܢ ܠܰܙܩܝ̣ܦܘ̣ܬܳܟ: ܘܰܚܬܝ̣ܪܝ̣ܢܰܢ ܒܫܘ̣̈ܩܳܦܰܝܟ: ܘܡܶܫܬܰܒܗܪܝ̣ܢܰܢ ܒܢܶܓܕܰܝ̈ܟ: ܬܰܡܳܢ ܐܰܫܘܳܐ ܠܰܢ ܕܢܶܚ̇ܕܶܐ ܘܰܢܕܘ̣ܨ ܒܳܟ ܘܰܢܫܰܒܚܳܟ: ܘܠܰܐܒܘ̣ܟ ܘܰܠܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀