ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܪܳܥܝܳܐ ܛܳܒܳܐ ܕܐܶܬ̣ܡܚܝ̣ ܒܨܶܒܝܳܢܶܗ ܘܐܶܬܒ̣ܰܕܰܪܘ̱ ܥܶܪ̈ܒܶܐ ܕܡܰܪܥܝ̣ܬܶܗ: ܠܗܰܘ̇ ܐܰܚܝ̣ܕ ܟܽܠ ܕܐܶܬ̣ܬܚܶܕ ܕܰܫܦ̣ܰܪ ܠܶܗ: ܕܠܰܢ ܡ̣ܶܢ ܐܘ̣ܚܕܳܢܳܐ ܕܐܳܟܶܠܩܰܪܨܳܐ ܢܶܫ̣ܪܶܐ: ܠܗܰܘ̇ ܩܰܕܝ̣ܫܳܐ ܕܐܶܨܛܰܥ̣ܰܪ ܡ̣ܶܢ ܛܰܡ̈ܶܐܐ: ܕܠܰܢ ܡܶܢ ܛܰܡܽܐܘ̣ܬܳܐ ܕܰܚܛܝ̣ܬܳܐ ܠܩܰܕܝ̣ܫܘ̣ܬܳܐ ܢ̣ܰܝܬܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܪܒܝ̣ܥܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܰܢܘ̣ ܐܰܝܟ ܕܫܳܘܶܐ ܡܶܫ̣ܟܰܚ ܕܰܢ̣ܫܰܒܰܚ ܐܳܘ ܡܶܠܬܳܐ ܐܰܠܳܗܳܐ: ܠܰܡܕܰܒܪܳܢܘ̣ܬܳܟ ܦܳܪܘ̣ܩܳܝܬܳܐ: ܘܡܰܢܘ̣ ܣܳܦܶܩ ܕܢܶܫ̣ܬܰܥܶܐ ܠܥܘ̣ܡܩܳܐ ܕܪܶܚܡܰܬ݀ ܐ̱ܢܳܫܘ̣ܬܳܟ: ܗܰܘ ܕܰܟܪ̈ܘ̣ܒܶܐ ܕܚܝ̣̈ܠܶܐ ܓܳܗܪܝ̣ܢ ܕܰܢ̣ܚܘ̣ܪܽܘܢ ܠܘܰܥܕܳܟ: ܘܰܣܪ̈ܳܦܶܐ ܡܚܰܦܶܝܢ ܐܰܦܰܝ̈ܗܽܘܢ ܘܪ̈ܶܓܠܰܝܗܽܘܢ ܒܓܶܦܰܝ̈ܗܽܘܢ ܘܰܡܩܰܕܫܝ̣ܢ ܠܡܳܪܘ̣ܬܳܟ: ܘܚܰܫ̈ܶܐ ܡܰܟܝ̣̈ܟܶܐ ܘܨܶܒܝ̈ܳܢܳܝܶܐ ܘܠܳܐ ܥܕܝ̣̈ܠܶܐ ܘܦܳܪ̈ܘ̣ܩܳܝܶܐ ܘܨܰܥܪܳܐ ܘܒܶܙܚܳܐ ܘܡܘ̣ܝܳܩܳܐ ܡܶܢ ܥܰܡܳܐ ܦܰܩܪܳܐ ܘܡܰܪܳܚܳܐ ܕܝܘ̣̈ܕܳܝܶܐ ܣܒܰܠ̣ܬ: ܐܰܢ̱ܬ ܓܶܝܪ ܟܰܕ ܡܳܪܳܐ ܘܥܳܒܘ̣ܕܳܐ ܕܟܽܠ ܐܝ̣ܬܰܝܟ ܒܰܚܫܳܡܝ̣ܬܳܐ ܥܰܒܕܳܢܳܐܝ̣ܬ ܫܰܡܶܫ̣ܬ: ܘܰܠܪܳܡܘ̣ܬܳܐ ܕܕܰܝ̈ܘܶܐ ܣܚܰܦ̣ܬ: ܘܒܘ̣ܪܟܳܐ ܣܳܡ̣ܬ ܘܒܳܥܘ̣ܬܳܐ ܩܕܳܡ ܐܰܒܘ̣ܟ ܩܰܪܶܒ̣ܬ: ܘܠܰܢ ܡܶܢ ܡܰܦܘ̣ܠܬܳܐ ܘܣܶܓܕܬܳܐ ܕܰܦܬܰܟܪ̈ܶܐ ܐܩܝ̣ܡܬ: ܘܟܰܕ ܠܳܐ ܡܶܬܩܰܪܒܳܢܳܐ ܘܥܰܙܝ̣ܙܳܐ ܐܝ̣ܬܰܝܟ ܥܰܡ ܐܰܒܘ̣ܟ: ܘܡܶܢ ܝ̣ܗܘ̣ܕܳܐ ܒܟܶܣܦܳܐ ܐܙܕܰܒܰܢ̣ܬ: ܕܠܰܢ ܗܳܢܽܘܢ ܕܰܡܙܰܒܢܝ̣ܢ ܗ̱ܘܰܝܢ ܠܰܚܛܝ̣ܬܳܐ ܒܰܕܡܳܟ ܬܶܙ̣ܒܶܢ ܡ̣ܶܢ ܡܰܘܬܳܐ ܘܰܚܛܝ̣ܬܳܐ ܘܣܳܛܳܢܳܐ: ܘܡܶܢܶܗ ܒܢܘ̣ܫܰܩܬܳܐ ܐܶܬ̣ܚܰܘܝ̣ܬ ܟܰܕ ܠܳܐ ܡ̣ܶܬܚܰܙܝܳܢܳܐ ܠܚܰܝ̈ܠܰܘܳܬܳܐ ܕܰܠܥܶܠ ܐܝ̣ܬܰܝܟ: ܘܡܶܢ ܛܰܡ̈ܶܐܐ ܟܶܢ̈ܫܶܐ ܕܝܘ̣̈ܕܳܝܶܐ ܐܶܬܠܒ̣ܶܟܬ: ܟܰܕ ܒܰܪ̈ܩܶܐ ܒܪ̈ܶܗܛܶܐ ܠܳܐ ܡܰܕܪܟܝ̣ܢ ܠܳܟ: ܘܗܰܘ̈ܢܶܐ ܒܣܘ̣̈ܟܳܠܶܐ ܠܳܐ ܨܳܝ̇ܪܝ̣ܢ ܠܳܟ: ܗܳܝܕܶܝܢ ܬܰܠ̈ܡܝ̣ܕܶܐ ܪ̈ܳܚܡܶܐ ܘܚܰܒܪ̈ܶܐ ܘܒܰܝ̈ܬܳܝܶܐ ܕܝ̣ܠܳܟ ܫܰܒ̣ܩܘ̣ܟ ܘܰܥ̣ܪܰܩܘ̱: ܘܩܰܪ̈ܝ̣ܒܰܝܟ ܒܪܘ̣ܚܩܳܐ ܠܰܡ̣ܩܳܡ ܐܰܒܥ̣ܶܕܘ̱: ܗܳܝܕܶܝܢ ܠܒܶܝܬ ܕܝ̣ܢܳܐ ܐܰܥܠܘ̣ܟ ܥܰܘ̈ܳܠܶܐ ܠܰܚܒܘ̣ܫܝܳܐ: ܘܒܰܚܒܘ̣ܫܝܳܐ ܕܝ̣ܠܳܟ ܡܶܢ ܫܝܘ̣ܠ ܗܳܝ̇ ܕܐܝ̣ܬܶܝܗ̇ ܒܶܝܬ ܚܒܘ̣ܫܝܳܐ ܟܡܝ̣ܪܳܐ ܕܢܰܦ̈ܫܳܬܳܐ ܐܦܶܩ̣ܬܳܢ: ܘܡܶܢ ܦܝ̣ܠܰܛܳܘܣ ܐܶܨܛܒܰܝܬ ܘܐܶܬ̣ܬܕܝ̣ܢܬ: ܐܰܝܟܰܢܳܐ ܕܠܳܐܕܳܡ ܕܐܶܬ̣ܚܰܝܰܒ ܒܰܓܙܳܪ ܕܝ̣ܢܳܐ ܬܚ̣ܰܪܰܪ: ܒܠܰܥ̣ܬ ܦܰܟܳܐ ܡܶܢ ܥܰܒܕܳܐ ܘܡܶܢ ܥܰܒܕܘ̣ܬܳܐ ܚ̣ܰܪܰܪܬܳܢ: ܘܕܐܶܬ̣ܬܪܶܩܬ ܠܳܟ ܒܰܐܦܰܝ̈ܟ ܠܰܢ ܫܰܘܙܶܒ̣ܬ ܡܶܢ ܒܶܗܬܬܳܐ ܘܚܘ̣ܝܳܒܳܐ ܕܰܠܥܳܠܰܡ: ܟܠܰܐܡܝ̣ܣ ܕܰܙܚܘ̣ܪܝ̣ܬܳܐ ܐܰܠܒ̣ܫܘ̣ܟ: ܘܠܰܢ ܐܶܣܛܰܠ ܬܶܫܒܘ̣ܚܬܳܐ ܕܰܫܠܰܚ̣ܢܰܢ ܒܰܥܒܳܪ ܦܘ̣ܩܕܳܢܳܐ ܐܰܠܒܶܫ̣ܬ: ܘܰܒܗܳܝ̇ ܕܐܶܬ̣ܶܐܣܰܪܬ ܥܰܠ ܐܶܣܛܘ̣ܢܳܐ ܡܶܢ ܦܟܳܪ̈ܶܐ ܕܰܚܛܝ̣ܬܳܐ ܫ̣ܪܰܝܬܳܢ: ܟܠܝ̣ܠܳܐ ܕܟܘ̣̈ܒܶܐ ܣܳܡ̣ܘ̱ ܥܰܠ ܪܝ̣ܫܳܟ ܘܰܠܟܘ̣̈ܒܶܐ ܘܕܰܪܕܪ̈ܶܐ ܡܶܢ ܐܰܪܥܳܐ ܥܩ̣ܰܪܬ: ܐܶܨܛܰܥ̣ܰܪܬ ܘܪܰܡܪܶܡ̣ܬܳܢ: ܚܰܫ̣ܬ ܘܰܦܪܰܩ̣ܬܳܢ: ܘܡܝ̣ܬܬ ܘܐܰܚܝ̣ܬܳܢ: ܘܒܰܕܓܽܘܢ ܟܰܕ ܡܶܬܕܰܡܪܝ̣ܢܰܢ ܒܡܘ̣ܟܳܟܳܟ ܡ̇ܠܶܐ̣ ܬܶܗܪܳܐ ܘܰܒܕܶܚܠܬܳܐ ܘܰܒܬܰܘܕܝ̣ܬܳܐ ܐܳܡ̇ܪܝ̣ܢܰܢ: ܐܳܘ ܠܚܰܫ̈ܶܐ ܦܳܪ̈ܘ̣ܩܳܝܶܐ ܕܒܰܛܶܠ̣ܘ̱ ܠܚܰܫܰܝ̈ܢ: ܐܳܘ ܠܛܘ̣̈ܦܶܐ ܙܥܘ̣ܪ̈ܝܳܬܳܐ ܕܰܕܡܳܐ ܕܰܒܗܶܝܢ ܚܒܳܪ̈ܳܬܰܢ ܐܶܬܰܐܣ̈ܝ̣: ܡܰܘ̇ܕܶܝܢܰܢ ܠܚܰܫܰܝ̈ܟ: ܣܳܓ̇ܕܝ̣ܢܰܢ ܠܰܨܠܝ̣ܒܳܟ: ܡܪܰܡܪܡܝ̣ܢܰܢ ܠܡܘ̣ܟܳܟܳܟ ܕܰܚܠܳܦܰܝܢ: ܡܶܫܬܰܒܗܪܝ̣ܢܰܢ ܒܡܰܘܬܳܟ ܕܥܰܠ ܐܰܦܰܝ̈ܢ: ܪܳܘܙܝ̣ܢܰܢ ܒܰܩܝܳܡܬܳܟ ܕܒܳܗ̇ ܐܰܩܝ̣ܡܬ ܡܰܦܘ̣ܠܬܰܢ: ܘܒܳܥܶܝܢܰܢ ܘܡܶܬܟܰܫܦܝ̣ܢܰܢ ܠܳܟ ܡܫܝ̣ܚܳܐ ܐܰܠܗܰܢ: ܕܰܬ̣ܢܰܛܰܪ ܠܥܺܕܬܳܟ ܦܪܝ̣ܩܰܬ݀ ܒܰܨܠܝ̣ܒܳܟ ܡܶܢ ܢܶܟܝܳܢܰܘ̈ܗ̱ܝ ܕܐܳܟܶܠܩܰܪܨܳܐ: ܘܗܰܒ ܠܳܗ̇ ܕܬ̣ܶܚܰܫܝ̱ ܒܚܰܫܳܟ ܘܬܶܬ̣ܕܰܡܶܐ ܒܡܘ̣ܟܳܟܳܟ: ܟܰܕ ܚܳܕܝܳܐ ܘܪܳܘܙܳܐ ܬܥ̣ܰܦܶܩܝ̱ ܠܫܘ̣̈ܡܳܬܳܟ ܘܬܶܚ̣ܕܶܐ ܒܢܘ̣ܚܳܡܳܟ: ܐܰܝܟܰܢܳܐ ܕܰܒܝܰܘܡܳܐ ܕܕܳܢܰܚ ܐܰܢ̱ܬ ܒܫܘ̣ܒܚܳܐ ܬܶܦܘ̣ܩܝ̱ ܠܐܘ̣ܪܥܳܟ ܒܓܰܠܝܘ̣ܬ ܐܰܦ̈ܶܐ: ܘܬܰܣ̣ܶܩܝ̱ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܬܰܘܪܳܐ ܕܦܶܛܡܳܐ ܕܰܒܢܶܟܣܬܳܐ ܕܰܕܒܝ̣ܚܘ̣ܬܶܗ ܒܰܛܶܠ ܟܽܠ ܕܶܒܚ̈ܝ̣ܢ ܘܢܘ̣̈ܩܳܝܺܝ̣ܢ ܕܰܦܬܰܟܪ̈ܶܐ ܡܶܢ ܐܰܪܥܳܐ ܘܰܒܚܰܫܶܗ ܐܰܡܝ̣ܬ ܠܚܰܫ̈ܶܐ ܡ̣ܶܢ ܓܶܢܣܳܐ ܕܰܒܢܰܝ̈ܢܳܫܳܐ: ܘܒܰܙܩܝ̣ܦܳܐ ܕܝ̣ܠܶܗ ܩܰܛܠ̣ܶܗ ܠܗܰܘ̇ ܕܩܰܛܠ̣ܶܗ ܠܰܐܒܽܘܢ ܐܳܕܳܡ ܒܦܰܪܕܰܝܣܳܐ: ܘܒܰܩܝܳܡܬܶܗ ܐܰܩܝ̣ܡ ܠܰܢ ܡܶܢ ܡܰܦܘ̣ܠܬܳܐ ܕܰܚܛܝ̣ܬܳܐ: ܩܰܒܶܠ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܡܶܢ ܒܨܝ̣ܪܘ̣ܬܰܢ ܕܐܶܬ̣ܩܰܪܰܒ ܠܡܳܪܘ̣ܬܳܟ: ܘܒܰܛܶܠ ܡܶܢܰܢ ܒܥܶܠܕܒܳܒܘ̣ܬܳܐ ܘܐܰܟܬܳܐ ܘܚܶܪܝܳܢܳܐ: ܘܐܰܡܠ̣ܶܟ ܥܠܰܝܢ ܫܰܝܢܳܟ ܘܰܫܠܳܡܳܟ: ܗܰܘ̇ ܕܰܒܟܽܠܙܒܰܢ ܐܝ̣ܬܰܘܗ̱ܝ ܫܰܝܢܳܐ ܠܳܐ ܡܶܣ̣ܬܰܕܩܳܢܳܐ: ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀