ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܫܰܝܢܳܐ ܫܡܰܝܳܢܳܐ ܘܚܘ̣ܒܳܐ ܟܝܳܢܳܝܳܐ: ܕܫ̣ܰܝܶܢ ܒܰܕܡܳܐ ܕܰܙܩܝ̣ܦܶܗ ܡܳܐ ܕܒܰܫܡܰܝܳܐ ܘܡܳܐ ܕܒܰܐܪܥܳܐ: ܫܰܝܶܢ ܫܓܝ̣ܫܘ̣ܬܳܗ̇ ܕܐܰܪܥܳܐ ܘܰܕܥܳܡܘ̣ܪ̈ܶܝܗ̇ ܒܚܰܫܳܟ ܕܥܰܠ ܐܰܦܶܝ̈ܗ̇: ܘܰܒܩܶܛܠܳܟ ܕܡܶܛܽܠܳܬܳܗ̇ ܝܶܫܘ̣ܥ ܐܰܠܳܗܳܐ ܕܚ̣ܰܫ ܥܰܠ ܐܰܦܰܝ̈ ܦܘ̣ܪܩܳܢܰܢ: ܒܰܛܶܠ ܠܚܰܫܰܘ̈ܗ̱ܝ ܕܰܟܝܳܢܰܢ ܕܢ̇ܶܙܡܰܪ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܡܶܠܬܳܐ ܐܰܠܳܗܳܐ ܕܰܚܠܳܦܰܝܢ ܚܳܫܘ̣̈ܫܶܐ ܘܡܳܝܘ̣̈ܬܶܐ: ܒܶܣܪܳܐ ܚܳܫܘ̣ܫܳܐ ܘܡܳܝܘ̣ܬܳܐ ܗ̣ܘܳܐ ܐܰܘܟܝ̣ܬ ܠܒ̣ܶܫ: ܕܠܰܢ ܠܳܐ ܚܳܫܘ̣ܫܘ̣ܬܳܐ ܘܠܳܐ ܡܳܝܘ̣ܬܘ̣ܬܳܐ ܒܚܰܫܶܗ ܘܡܰܘܬܶܗ ܨܶܒܝܳܢܳܝܳܐ ܢ̣ܶܬܶܠ: ܗܰܘ̇ ܕܝܰܘܡܳܢܳܐ ܓܠ̣ܳܐ ܐ̱ܪܳܙܳܐ ܕܚܰܫܶܗ ܐܰܘܟܝ̣ܬ ܡܶܫ̣ܬܰܠܡܳܢܘ̣ܬܶܗ ܠܓܘ̣ܕܳܐ ܕܰܫܠܝ̣̈ܚܰܘܗ̱ܝ ܘܐܰܥܝ̣ܩ ܐܶܢܽܘܢ: ܘܰܕܡܶܢ ܝ̣ܺܗܘ̣ܕܳܐ ܡܰܪܳܚܳܐ ܗܰܘ̇ ܕܰܩܛܰܠ ܠܰܐܒܘ̣ܗ̱ܝ ܥܬܝ̣ܕ ܠܡܶܫ̣ܬܰܠܳܡܘ̣: ܘܥܰܠ ܢܘ̣ܚܳܡܶܗ ܕܠܰܬܠܳܬܳܐ ܝܰܘܡܝ̣̈ܢ: ܒ̣ܰܕܶܩ ܠܗܽܘܢ ܘܠܰܒ̣ܶܒ ܐܶܢܽܘܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܘܡܰܠܟܳܐ ܘܡܳܪܳܐ ܕܰܫܡܰܝ̈ܳܢܶܐ ܘܕܐܰܪ̈ܥܳܢܳܝܶܐ: ܕܰܒܪܶܚ̣ܡܰܬ݀ ܐ̱ܢܳܫܘ̣ܬܳܟ ܠܒܶܣܪܳܐ ܕܝ̣ܠܰܢ ܐܶܬ̣ܚܰܝܰܕܬ ܕܠܳܐ ܦܘ̣ܠܳܓܳܐ ܘܰܚܠܳܦܰܝܢ ܘܡܶܛܽܠܳܬܰܢ ܨܒ̣ܰܝܬ ܕܬܶܚ̣ܰܫ ܒܰܒܣܰܪ: ܐܰܝܟܰܢܳܐ ܕܠܰܢ ܡܶܢ ܚܰܫ̈ܶܐ ܚܛܝ̣̈ܬܳܢܳܝܶܐ ܘܡܶܢ ܥܰܒܕܘ̣ܬܳܐ ܣܳܛܳܢܳܝܬܳܐ ܘܡܶܢ ܚܒܳܠܳܐ ܘܐܰܒܕܳܢܳܐ ܕܰܦܣܳܩ ܣܰܒܪܳܐ ܕܚܰܝ̈ܶܐ ܕܝ̣ܠܰܢ ܬܚ̣ܰܪܰܪ ܒܛܰܝܒܘ̣ܬܳܟ: ܗܰܘ̇ ܕܝܰܘܡܳܢܳܐ ܨܒ̣ܰܝܬ ܕܬ̣ܶܓܠܶܐ ܠܣܶܕܪܳܐ ܪܚܝ̣ܡܳܐ ܕܰܬܪܶܥܣܰܪ: ܕܚܰܕ ܡܶܢܟܽܘܢ ܐܝ̣ܬܰܘܗ̱ܝ ܗܰܘ ܕܰܡܛܰܝܰܒ ܠܡܰܫܠܡܳܢܘ̣ܬܳܟ ܠܝܘ̣̈ܕܳܝܶܐ: ܝܰܘܡܳܢܳܐ ܓܶܝܪ ܐܶܬܟܰܢ̣ܰܫܘ̱ ܪ̈ܝ̣ܫܰܝ ܟܳܗ̈ܢܶܐ ܕܙܺܐܦܳܐ ܘܣܳܦܪ̈ܶܐ ܘܰܦܪ̈ܝ̣ܫܶܐ ܘܐܶܬܡܰܠ̣ܰܟܘ̱ ܥܠܰܝܟ ܒܝ̣̈ܫܳܬܳܐ: ܗܰܘ̇ ܕܰܠܟܽܠܢܳܫ ܡܫܰܟܶܢ ܐܰܢ̱ܬ ܘܣܳܟܳܐ ܠܗܽܘܢ ܝܰܬܝ̣ܪܳܐ: ܝܰܘܡܳܢܳܐ ܝ̣ܗܘ̣ܕܳܐ ܣܟܰܪܝܘ̣ܛܳܐ ܗܘ̣ ܒܚܺܐܪܘ̣ܬܶܗ ܘܓܘ̣ܪܳܓܶܗ ܕܣܳܛܳܢܳܐ ܐܙ̣ܰܠ ܠܘܳܬ ܟܳܗ̈ܢܰܝ ܙܺܐܦܳܐ ܕܰܠܗܽܘܢ ܢܰܫ̣ܠܡܳܟ ܠܡܶܬ̣ܩܛܳܠܘ̣: ܠܳܟ ܚܰܝ̈ܶܐ ܕܟܽܠܶܗ ܓܶܢܣܳܐ ܕܰܒܢܰܝ̈ܢܳܫܳܐ ܘܠܰܡܡܳܬ ܚܠܳܦ ܟܽܠܢܳܫ ܐܶܬ̣ܰܝܬ: ܝܰܘܡܳܢܳܐ ܬܰܠܡܝ̣ܕ ܙܺܐܦܳܐ ܕܠܳܐ ܥܶܠܬܳܐ ܐܰܢܰܢܩܳܝܬܳܐ ܐܶܬ̣ܡܰܠܰܟ ܥܰܡ ܓܘ̣ܕܳܐ ܕܣܳܐܢܰܝ̈ܟ ܠܰܡ̣ܙܰܒܳܢܘ̣ ܠܳܟ: ܕܐܶܬ̣ܰܝܬ ܠܡܶܙܒܰܢ ܠܟܽܠܶܗ ܥܳܠܡܳܐ ܒܰܕܡܳܐ ܕܰܩܢܘ̣ܡܳܟ: ܝܰܘܡܳܢܳܐ ܩ̣ܰܨܘ̱ ܛܝ̣̈ܡܰܝܟ ܡܳܪܳܐ ܕܟܽܠ ܥܰܒ̈ܕܶܐ ܒܝ̣̈ܫܶܐ ܘܡܳܪ̈ܘ̣ܕܶܐ ܬܠܳܬܝ̣ܢ ܕܟܶܣܦܳܐ ܐܝܟ ܕܰܟܬܝ̣ܒ ܒܰܢܒܺܝܳܐ: ܝܰܘܡܳܢܳܐ ܚ̣ܕܝ̣ ܐܳܟܶܠܩܰܪܨܳܐ ܥܰܡ ܟܢܘ̣ܫܬܳܐ ܕܒܝ̣̈ܫܶܐ ܒܶܐܡܪܳܐ ܕܰܗ̣ܘܳܐ ܕܺܐܒܳܐ ܘܰܣܳܥ̣ܐ ܥܠܰܝܟ ܪܳܥܝܳܐ ܛܳܒܳܐ ܘܐܶܡܪܳܐ ܕܠܳܐ ܡܘ̣ܡܳܐ: ܗܰܘ ܕܡܶܛܽܠ ܥܶܪܒܳܐ ܕܰܛܳܥ̣ܐ ܡܶܢ ܛܝܳܪܳܟ ܐܶܬ̣ܰܝܬ: ܕܰܒܕܶܒܚܳܟ ܡܶܢ ܦܘ̣ܡܶܗ ܕܕܺܐܒܳܐ ܣܳܪܘ̣ܚܳܐ ܬ̣ܫܰܘܙܒܝ̣ܘܗ̱ܝ: ܝܰܘܡܳܢܳܐ ܝ̣ܗܘ̣ܕܳܐ ܒܰܬܠܳܬܝ̣ܢ ܕܝ̣ܢܳܪ̈ܶܐ ܙܰܒ̣ܢܳܟ ܒܰܠܚܘ̣ܕ: ܘܐܰܢ̱ܬܬܳܐ ܙܳܢܝ̣ܬܳܐ ܒܡܶܫܚܳܐ ܙܶܒܢ̣ܰܬ݀ ܒܰܬܠܳܬܡܳܐܐ ܕܝ̣ܢܳܪ̈ܝ̣ܢ ܐܶܬܩܰܪܒ̣ܰܬ݀ ܠܘܳܬܳܟ ܘܰܡܫܰܚ̣ܬܳܟ: ܠܳܟ ܡܘ̣ܪܽܘܢ ܐܰܠܳܗܳܝܳܐ ܕܠܰܝܬ ܠܶܗ ܕܡܰܝ̈ܳܐ: ܝܰܘܡܳܢܳܐ ܝ̣ܗܘ̣ܕܳܐ ܢܦ̣ܰܩ ܡܶܢ ܒܰܝܬܳܝܘ̣ܬܳܐ ܕܝ̣ܠܳܟ ܐܰܠܗܳܝ̇ܬܳܐ: ܘܚܰܛܳܝ̇ܬܳܐ ܒܕܶܡ̈ܥܶܐ ܕܥܰܝ̈ܢܶܝܗ̇ ܩܢ̣ܳܬ݀ ܫܰܘܬܳܦܘ̣ܬܳܐ ܕܥܰܡܳܟ ܒܚܘ̣ܒܳܐ ܕܠܳܐ ܢܶܟܠܳܐ: ܝܰܘܡܳܢܳܐ ܟܢܘ̣ܫܬܳܐ ܕܦܰܩܪ̈ܶܐ ܕܳܝ̇ܨܳܐ ܕܐܶܫܟ̣ܚܰܬ݀ ܢܳܟܘ̣ܠܳܐ ܠܰܡ̣ܫܰܠܳܡܘ̣ ܨܶܒܝܳܢܳܗ̇: ܘܓܘ̣ܕܳܐ ܐܰܘܟܝ̣ܬ ܥܺܕܬܳܐ ܫܠܝ̣ܚܳܝ̇ܬܳܐ ܐܶܬܟܰܡ̣ܪܰܬ݀ ܒܚܰܫܳܟ ܘܰܒܬܰܠܡܝ̣ܕܳܐ ܢܟܝ̣ܠܳܐ ܕܰܦ̣ܪܰܫ ܡܶܢ ܘܰܥܕܳܗ̇: ܝܰܘܡܳܢܳܐ ܝܰܡܝ̣ܢܳܐ ܟܡܝ̣ܪܳܐ ܥܰܠ ܒܰܪ ܚܺܐܪ̈ܶܐ ܕܫܰܢܝ̣ ܡܶܢܳܗ̇: ܘܣܶܡܳܠܳܐ ܚܳܕܝܳܐ ܕܰܠܒܰܪ ܝܰܡܝ̣ܢܳܐ ܡܶܢ ܓܶܢ̱ܒ ܝܰܡܝ̣ܢܳܐ ܚܶܛܦ̣ܰܬ݀ ܒܓܘ̣ܪܳܓܳܗ̇: ܝܰܘܡܳܢܳܐ ܪܶܚ̣ܡܰܬ݀ ܟܶܣܦܳܐ ܥܶܩܳܪܳܐ ܕܟܽܠܗܶܝܢ ܒܝ̣̈ܫܳܬܳܐ: ܠܝ̣ܗܘ̣ܕܳܐ ܪܚܘ̣ܡܳܗ̇ ܡܶܢ ܕܰܪܓܳܐ ܕܰܫܠܝ̣̈ܚܶܐ ܚܰܒܪ̈ܶܐ ܕܝ̣ܠܶܗ ܕܰܢܦ̣ܰܠ: ܘܡܰܚܢܘ̣ܩܝ̣ܬܳܐ ܠܶܗ ܐܰܘܪܬܰܬ݀ : ܡܰܢܘ̣ ܡܣܰܝܶܟ ܡܳܪܝ̱ ܠܛܳܒܘ̣ܬܳܟ ܕܰܠܗܰܘ̇ ܕܢܰܟ̣ܠܳܟ ܐܰܓܰܪܬ ܪܘ̣ܚܳܐ ܥܕܰܡܳܐ ܕܗܘ̣ ܠܶܗ ܐܰܘܒܶܕ ܒܰܦܣܳܩܣܰܒܪܳܐ: ܡܰܢܘ̣ ܐܰܟܘܳܬܳܟ ܒܰܣܝ̣ܡܳܐ ܘܢܝ̣ܚܳܐ: ܕܰܠܗܰܘ̇ ܕܙܰܒܢ̣ܳܟ ܘܚܰܠܦ̣ܳܟ ܒܟܶܣܦܳܐ ܙܥܘ̣ܪܳܐ ܠܳܐ ܓܠ̣ܰܙܬ ܡܶܢ ܡܰܪܬܝܳܢܘ̣ܬܳܐ ܡܰܚܝܳܢܝ̣ܬܳܐ: ܡܰܢܘ̣ ܕܕܳܡܶܐ ܠܳܟ ܪܳܡܳܐ ܕܐܶܬ̣ܡܰܟܰܟ ܕܰܠܗܰܘ̇ ܕܐܰܪܝ̣ܡ ܥܠܰܝܟ ܥܶܩܒܳܐ ܐܰܫܝ̣ܓܬ ܐܰܝܟ ܕܰܠܟܺܐܦܳܐ: ܡܰܢܘ̣ ܕܦܳܚܶܡ ܠܳܟ ܠܰܚܡܳܐ ܕܚܰܝ̈ܶܐ ܕܰܢܚ̣ܶܬ ܡܶܢ ܪܰܘܡܳܐ: ܕܰܠܗܰܘ̇ ܕܐܰܡ̣ܪܰܚ ܘܰܨܒ̣ܰܥ ܥܰܡܳܟ ܐܝ̣ܕܶܗ ܒܠܰܓܬܳܐ ܡܶܢ ܠܰܚܡܳܐ ܕܩܘ̣ܪܒܳܢܳܐ ܠܳܐ ܓܠ̣ܰܙܬ: ܒܪܰܡ ܟܰܕ ܨܒܝ̣ܥ ܒܡܰܝ̈ܳܐ ܝܰܗ̣ܒܬܳܝܗ̱ܝ ܠܶܗ ܕܰܠܗܳܢܳܐ ܫܳܘܶܐ ܗ̱ܘܳܐ: ܡܶܛܽܠ ܐܰܟܬܳܐ ܘܢܶܟܠܳܐ ܘܙܺܐܦܳܐ ܕܰܒܠܶܒܶܗ ܐܝ̣ܩܝ̣ ܥܠܰܝܟ ܐܰܚܝ̣ܕ ܗ̱ܘܳܐ: ܚܢܰܢ ܕܶܝܢ ܡܳܪܝ̱ ܙܒܝ̣̈ܢܰܝ ܒܰܕܡܳܟ ܦܪ̈ܝ̣ܩܰܝ ܒܰܨܠܝ̣ܒܳܟ: ܘܰܚܬܝ̣ܪ̈ܰܝ ܒܰܫܡܳܟ ܘܡܶܫܬܰܒܗܪ̈ܰܝ ܒܚܰܫܰܝ̈ܟ ܦܳܪ̈ܘ̣ܩܳܝܶܐ ܕܰܚܠܳܦܰܝܢ: ܒܳܥܶܝܢܰܢ ܡܶܢܳܟ ܒܚܰܫܳܐ ܘܒܰܚܦܝ̣ܛܘ̣ܬܳܐ ܕܠܶܒܳܐ: ܐܰܝܟܰܢܳܐ ܕܡܶܢ ܪܶܚܡܰܬ݀ ܟܶܣܦܳܐ ܐܶܡܳܐ ܕܟܽܠܗܶܝܢ ܒܝ̣̈ܫܳܬܳܐ ܬ̣ܰܪܚܶܩ ܠܰܢ: ܘܡܶܢ ܐܰܟܬܳܐ ܘܰܪܓܝ̣ܙܘ̣ܬܳܐ ܬ̣ܕܰܟܶܐ ܠܰܢ: ܘܡܶܢ ܚܣܳܡܳܐ ܘܰܢܟܝ̣ܠܘ̣ܬܳܐ ܬܢ̣ܰܟܪܶܐ ܠܰܢ: ܘܡܶܢ ܪܳܡܘ̣ܬܳܐ ܘܚܳܪܥܘ̣ܬܳܐ ܬ̣ܶܡܪܘ̣ܩ ܠܰܢ: ܘܡܶܢ ܟܽܠܗܶܝܢ ܠܳܐ ܢܳܡܘ̣̈ܣܳܝܘܳܬܳܐ ܬ̣ܥܰܠܶܐ ܠܰܢ: ܘܡܶܢ ܦܣܳܩܣܰܒܪܳܐ ܡܰܘܒܕܳܢܳܐ ܬ̣ܫܰܘܙܶܒ ܠܰܢ: ܘܰܚܠܳܦ ܗܳܠܶܝܢ ܡܳܪܝ̱ ܡܠܝ̣ ܠܰܢ ܗܰܝܡܳܢܘ̣ܬܳܐ ܘܣܰܒܪܳܐ ܘܚܘ̣ܒܳܐܓܡܝ̣ܪܳܐ ܘܫܰܝܢܳܐ ܘܰܫܠܳܡܳܐ: ܢܝ̣ܚܘ̣ܬܳܐ ܒܰܣܝ̣ܡܘ̣ܬܳܐ ܬܰܡܝ̣ܡܘ̣ܬܳܐ ܘܰܬܪܝ̣ܨܘ̣ܬܳܐ: ܡܰܟܝ̣ܟܘ̣ܬܳܐ ܘܕܰܟܝܘ̣ܬܳܐ: ܘܚܰܕܘ̣ܬܳܐ ܘܰܦܨܝ̣ܚܘ̣ܬܳܐ: ܘܟܽܠ ܕܘ̣ܒܳܪܳܐ ܫܰܦܝ̣ܪܳܐ ܕܠܳܟ ܪܚܝ̣ܡ: ܐܰܝܟܰܢܳܐ ܕܢܶܫ̇ܬܘܶܐ ܠܰܢܣܝ̣ܒܘ̣ܬܳܐ ܕܦܰܓܪܳܟ ܘܰܕܡܳܟ ܡܰܚܝܳܢܳܐ ܒܕܘ̣ܡܝܳܐ ܕܰܫܠܝ̣̈ܚܰܝܟ ܕܟܰܝ̈ܳܐ: ܘܰܕܢ̇ܶܚܰܫ ܥܰܡܳܟ ܒܚܰܫ̈ܶܐ ܕܝ̣ܠܳܟ ܘܢܶܚ̇ܕܶܐ ܒܰܩܝܳܡܬܳܟ: ܘܢ̇ܶܪܘܰܙ ܒܓܶܠܝܳܢܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܢܗܰܪ ܡܳܪܝ̱ ܠܗܰܘ̈ܢܰܝܢ ܒܢܘ̣ܗܪܳܐ ܕܓܶܠܝܳܢܳܟ: ܘܣܰܬܶܬ ܠܢܰܦ̈ܫܳܬܰܢ ܒܚܘ̣ܒܳܐ ܕܰܨܠܝ̣ܒܳܟ: ܘܙܰܝܶܢ ܠܦܰܓܪ̈ܰܝܢ ܒܠܳܐ ܚܳܫܘ̣ܫܘ̣ܬܶܗ ܕܚܰܫܳܟ ܘܛܰܪ ܠܡܰܚ̈ܫܒܳܬܰܢ ܒܛܘ̣ܒܬܳܢܘ̣ܬܳܐ ܕܛܰܝܒܘ̣ܬܳܟ: ܘܐܰܥܝ̣ܪ ܠܠܶܒܰܘ̈ܳܬܰܢ ܠܘܳܬ ܡܡܰܠܠܘ̣ܬ ܬܶܫܒ̈ܚܳܬܳܟ: ܘܐܰܥܛܰܪ ܒܰܢ ܪܝ̣ܚܳܐ ܚܰܠܝܳܐ ܕܕܘ̣ܒܳܪ̈ܶܐ ܕܰܡܪܰܥܶܝܢ ܠܳܟ: ܘܩܰܒܶܠ ܦܝ̣ܪܡܰܢ ܠܬܰܪܥܘ̣ܬܳܐ ܕܰܡܪܰܚܡܳܢܘ̣ܬܳܟ: ܘܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀