ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܪܰܒ ܟܘ̣ܡܪ̈ܶܐ ܩܰܕܝ̣ܫܳܐ ܕܰܩܢܘ̣ܡܶܗ ܩ̣ܰܪܶܒ ܚܠܳܦ ܫܘ̣ܒܩܳܢܳܐ ܕܰܚܛܳܗܰܝ̈ܢ: ܘܰܒܚܰܫܳܐ ܕܡܘ̣ܟܳܟܶܗ ܦܰܪܩ̣ܰܢ: ܘܠܰܡܚܘ̣ܬܳܐ ܕܩܰܝܣܳܐ ܒܩܰܝܣܳܐ ܕܰܙܩܝ̣ܦܘ̣ܬܳܐ ܐܰܚܠܶܡ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܠܳܬܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ ܕܡܶܛܽܠ ܪ̈ܰܚܡܰܝܟ ܘܥܘ̣ܬܪܳܐ ܕܰܚܢܳܢܳܟ ܚܠܳܦ ܐܳܕܳܡ ܚܰܝܳܒܳܐ ܐܶܬ̣ܰܝܬ ܠܚܰܫܳܐ ܘܰܠܡܘ̣ܟܳܟܳܐ ܨܶܒܝܳܢܳܝܳܐ: ܐܰܝܟܰܢܳܐ ܕܰܬ̣ܚܰܪܪܝ̣ܘܗ̱ܝ ܡܶܢ ܓܙܳܪܕܝ̣ܢܳܐ ܕܡܰܘܬܳܐ ܘܕܰܥܒܳܪ ܦܘ̣ܩܕܳܢܳܐ: ܘܫܰܡܠܝ̣ܬ ܒܰܩܢܘ̣ܡܳܟ ܠܨܘ̣ܪܬܳܐ ܗܳܝ̇ ܕܡܶܢ ܡܘ̣ܫܶܐ ܥܰܒܕܳܟ ܒܡܶܨܪܶܝܢ ܩܰܕܡ̣ܰܬ݀ ܐܶܬܪܰܫܡ̣ܰܬ݀ ܒܪܰܡܫܳܐ ܗܰܘ̇ ܕܦܘ̣ܪܩܳܢܳܐ: ܟܰܕ ܩܕܳܡ ܓܘ̣ܕܳܐ ܗܳܝ̇ ܕܰܫܠ̈ܝ̣ܚܶܐ: ܠܗܳܕܶܐ ܫܰܡܠܝ̣ܬ ܒܥܶܠܝ̣ܬܳܐ ܗܳܝ̇ ܡܰܠ̣ܝܰܬ݀ ܐ̱ܪ̈ܳܙܶܐ ܘܫܘ̣̈ܘܕܳܥܶܐ ܡܰܚ̈ܝܳܢܶܐ ܕܥܺܕܬܳܐ ܩܰܕܝ̣ܫܬܳܐ: ܟܰܕ ܓܶܝܪ ܠܥܰܬܝ̣ܩܬܳܐ ܒܶܐܡܪܳܐ ܚܰܬܶܡ̣ܬ: ܘܒܰܚ̇ܕܰܬܳܐ ܒܠܰܚܡܳܐ ܫܰܪܝ̣ܬ: ܘܦܰܓܪܳܟ ܘܰܕܡܳܟ ܝܰܗ̣ܒܬ ܠܰܢ ܒܰܚܫܳܡܝ̣ܬܳܐ ܗܳܝ̇ ܐ̱ܪܳܙܳܢܳܝ̇ܬܳܐ: ܡܶܬܰܐܟܠܳܢܳܐ ܘܡܶܫܬܰܬܝܳܢܳܐ ܗ̣ܘܰܝܬ ܠܰܢ: ܠܚܘ̣ܣܳܝܳܐ ܐܪܟܶܢ̣ܬ ܪܝ̣ܫܳܟ ܠܢܘ̣ܫܰܩܬܳܐ ܕܢܶܟܠܳܐ: ܐܶܬܠܒܶܟ݂ܬ ܡܶܢ ܥܰܡܳܐ ܠܝ̣ܛܳܐ ܕܝܘ̣̈ܕܳܝܶܐ: ܐܶܬ̣ܰܝܬ ܠܨܰܥܪܳܐ ܕܰܙܩܝ̣ܦܳܐ: ܩܳܡ̣ܬ ܒܶܝܬ ܕܝ̣ܢܳܐ ܒܝܰܘܡܳܐ ܕܚܰܫܳܐ: ܒܠܰܥ̣ܬ ܥܰܠ ܦܰܟܳܟ ܡܶܢ ܥܰܒܕܳܐ ܡܰܪܳܚܳܐ ܕܠܰܢ ܬܚ̣ܰܪܰܪ ܡܶܢ ܚܘ̣ܝܳܒܳܗ̇ ܕܰܚܛܝ̣ܬܳܐ: ܩܳܡ̣ܬ ܒܶܝܬ ܕܝ̣ܢܳܐ ܐܝܟ ܓܰܒܪܳܐ ܡܰܣܟܠܳܢܳܐ: ܘܰܒܝܰܕ ܪܘ̣ܩܳܐ ܗܰܘ̇ ܕܩܰܒ̣ܶܠ ܦܰܪܨܘ̣ܦܳܟ ܡܶܢ ܛܰܡ̈ܶܐܐ ܐܰܥܒ̣ܰܪܬ ܚܶܣܕܳܐ ܕܒܶܗܬܬܳܐ ܪܰܒܬܳܐ ܡܶܢ ܐܰܦ̈ܶܐ ܕܟܽܠܰܢ ܗܳܝ̇ ܕܰܒܝܰܕ ܥܒܳܪ ܦܘ̣ܩܕܳܢܳܐ ܐܰܡܠ̣ܟܰܬ݀ ܥܠܰܝܢ: ܠܒܶܫ̣ܬ ܡ̈ܳܐܢܶܐ ܕܩܘ̣ܕܫܳܐ ܒܝܰܕ ܒܶܙܚܳܐ ܡܡܰܝܩܳܢܳܐ ܕܝܘ̣̈ܕܳܝܶܐ ܕܠܰܢ ܬܰܠ̣ܒܶܫ ܪܘ̣ܚܳܐ ܩܰܕܝ̣ܫܳܐ: ܗܰܘ ܕܡܶܢܶܗ ܐܶܫܬܰܠܰܚ̣ܢܰܢ ܒܶܝܬ ܐܝ̣̈ܠܳܢܶܐ ܒܰܚܣܳܡܶܗ ܕܒܝ̣ܫܳܐ ܘܚܶܘܝܳܐ ܚܰܪܡܳܢܳܐ: ܘܰܒܟܘ̣̈ܒܰܘܗ̱ܝ ܕܰܟܠܝ̣ܠܳܟ ܥܩ̣ܰܪܬ ܠܰܚܛܝ̣ܬܳܐ ܕܰܙܪܰܥ ܡܰܘܬܳܐ ܒܗܰܕܳܡܰܝ̈ܢ: ܘܰܒܩܰܢܝܳܐ ܕܒܶܙܚܳܐ ܕܩܰܦܚܘ̣ܟ ܣܳܦܪ̈ܰܝ ܥܰܡܳܐ ܟܬܰܒ̣ܬ ܠܰܫ̈ܡܳܗܶܐ ܕܝ̣ܠܰܢ ܒܣܶܦܪܳܐ ܕܚܰܝ̈ܶܐ: ܐܶܬܬܠܝ̣ܬ ܥܰܪܛܶܠܳܐܝ̣ܬ ܥܰܠ ܪܝ̣ܫ ܩܰܝܣܳܐ ܘܒܰܫܠܳܚ ܒܶܣܪܳܟ ܦܰܪܣܝ̣ܬ ܠܰܐܪܟܘܳܢܳܐ ܕܐܳܐܰܪ ܗܰܘ̇ ܪܝ̣ܫܳܐ ܕܒܝ̣̈ܫܳܬܳܐ: ܘܐܰܒܳܐ ܕܕܰܓܳܠܘ̣ܬܳܐ: ܐܶܫܬܝ̣ܬ ܚܰܠܳܐ ܘܰܡܪܳܪ̈ܶܐ ܚܠܳܦ ܐܳܕܳܡ ܕܐܶܟ̣ܰܠ ܡܶܢ ܦܺܐܪܳܐ ܗܰܘ̇ ܩܳܛܘ̣ܠܳܐ ܕܐܝ̣ܠܳܢܳܐ: ܘܡܶܛܽܠ ܐܝ̣ܕܳܐ ܗܳܝ̇ ܕܓܶܢ̣ܒܰܬ݀ ܡܶܐܟܘ̣ܠܬܳܐ ܘܐܰܥܠ̣ܰܬ݀ ܡܰܘܬܳܐ ܥܰܠ ܟܽܠ ܕܳܪ̈ܝ̣ܢ: ܝܰܗ̣ܒܬ ܐܝ̣̈ܕܰܝܟ ܠܨܶܨ̈ܐ ܘܪ̈ܶܓܠܰܝܟ ܠܰܐܣܘ̣ܪ̈ܶܐ ܕܦܰܪܙܠܳܐ: ܕܰܓܡ̣ܰܪܬ ܒܰܩܢܘ̣ܡܳܟ ܠܟܽܠܗܽܘܢ ܐ̱ܪ̈ܳܙܶܐ ܕܨܳܪܘ̱ ܠܳܟ ܢܒܺܝܰܘ̈ܗ̱ܝ ܕܐܰܒܘ̣ܟ ܡܶܢ ܩܕܝ̣ܡ: ܘܐܶܡ̣ܰܪܬ ܕܗܳܐ ܡܫܰܠܰܡ ܟܽܠܡܶܕܶܡ: ܐܝ̣ܢ ܡܳܪܝܳܐ: ܟܰܕ ܡܶܬ̣ܕܟܰܪ ܐܰܢ̱ܬ ܠܡܘ̣ܟܳܟܳܟ ܗܰܘ̇ ܕܰܠܥܶܠ ܡ̣ܶܢ ܡܶܠܬܳܐ ܘܰܠܚܰܫ̈ܶܐ ܕܝ̣ܠܳܟ ܨܶܒܝ̈ܳܢܳܝܶܐ ܘܠܳܐ ܥܕܝ̣̈ܠܶܐ: ܢܰܛܰܪ ܠܥܺܕܬܳܟ ܩܰܕܝ̣ܫܬܳܐ ܩܰܬܘ̣ܠܝ̣ܩܝ̣ ܫܠܝ̣ܚܳܝ̇ܬܳܐ ܕܗܳܪܟܳܐ ܘܕܰܒܟܽܠ ܐܰܬܰܪ ܕܥܰܡ ܗܰܝܡܳܢܘ̣ܬܳܐ ܠܳܐ ܥܕܝ̣ܠܬܳܐ ܣܳܓ̇ܕܳܐ ܠܚܰܫܰܝ̈ܟ: ܘܡܰܘ̇ܕܝܳܐ ܒܐ̱ܢܳܫܝ̈ܳܬܳܐ ܕܝ̣ܠܳܟ: ܘܝܳܕ̇ܥܳܐ ܠܳܟ ܕܐܝ̣ܬܰܝܟ ܐܰܠܳܗܳܐ ܕܥܰܠ ܟܽܠ ܫܰܪܝ̣ܪܳܐܝ̣ܬ: ܘܠܳܟ ܡܶܬܟܰܫܦܳܐ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܡܶܢܰܢ ܡܚܝ̣̈ܠܶܐ ܘܕܳܘܰܝ̈ܳܐ ܡܶܬܩܰܪܰܒ ܠܳܟ: ܒܥܶܕܳܢܳܐ ܗܳܢܳܐ ܕܒܶܗ ܥ̱ܘ̣ܗܕܳܢܳܐ ܕܚܰܫܰܝ̈ܟ ܡܫܰܡܠܝ̣ܢܰܢ: ܗܳܢܽܘܢ ܕܰܒܗܽܘܢ ܐܶܬ̣ܬܰܠܚܰܬ݀ ܣܰܟܠܘ̣ܬܳܐ ܕܓܶܢܣܳܐ ܕܝ̣ܠܰܢ: ܬ̣ܫܰܟܶܢ ܠܰܢ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚ̈ܛܳܗܶܐ: ܠܰܢ ܟܝ̣ܬ ܘܰܠܟܽܠܗܽܘܢ ܐܰܚܰܝ̈ܢ ܡܗܰܝ̈ܡܢܶܐ: ܕܫܶܐܠ̣ܘ̱ ܘܫܳܐܠܝ̣ܢ ܨܠܰܘ̈ܳܬܰܢ: ܘܬܶܥ̣ܒܶܕ ܕܘ̣ܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܕܰܫܟ݂ܶܒܘ̱ ܥܰܠ ܣܰܒܪܳܟ: ܟܰܕ ܡܰܥܒܰܪ ܐܰܢ̱ܬ ܠܟܽܠܗܶܝܢ ܫܳܪ̈ܥܳܬܳܐ ܕܝ̣ܠܰܢ ܘܕܝ̣ܠܗܽܘܢ ܨܶܒܝܳܢܝ̈ܳܬܳܐ ܟܝ̣ܬ ܘܠܳܐ ܨܶܒܝ̈ܳܢܳܝܳܬܳܐ ܕܒܝ̣ܕܰܥܬܳܐ ܘܠܳܐ ܒܝ̣ܕܰܥܬܳܐ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢܩܘ̣ܡ ܡܶܢ ܝܰܡܝ̣ܢܳܟ ܘܢܶܚ̇ܙܶܐ ܚܢܳܢܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܡܳܪܝ̱ ܦܝ̣ܪܡܳܐ ܕܥܺܕܬܳܟ ܦܪܝ̣ܩܰܬ݀ ܒܰܨܠܝ̣ܒܳܟ: ܘܐܶܬܪܰܥܳܐ ܒܥܶܛܪܳܐ ܕܡܰܪܥܝ̣ܬܳܟ ܙܒܝ̣ܢܰܬ݀ ܒܰܕܡܳܟ: ܘܨܘ̣ܬ ܠܬܰܟܫ̈ܦܳܬܳܐ ܕܥܳܢܳܟ ܕܰܚܬܝ̣ܪܳܐ ܒܩܶܛܠܳܟ: ܘܰܫܡܰܥ ܨܠܰܘ̈ܳܬܳܐ ܕܰܡܟܝ̣ܪܬܳܟ ܡܥܰܦܩܰܬ݀ ܫܘ̣̈ܡܳܬܳܟ: ܘܢܰܛܰܪ ܠܝܳܪܬܘ̣ܬܳܟ ܒܰܨܠܝ̣ܒܳܟ ܡܶܢ ܟܽܠ ܚܰܫܳܐ ܕܡܰܪܚܶܩ ܡܶܢܳܟ: ܐܰܝܟܰܢܳܐ ܕܬܶܚ̣ܰܫܝ̱ ܒܚܰܫܳܟ ܘܬܶܫ̣ܬܰܒܰܚܝ̱ ܒܫܘ̣ܒܚܳܟ: ܘܬܶܚ̣ܕܶܐ ܘܬ̣ܶܪܘܰܙܝ̱ ܐܰܟܚܕܳܐ ܒܝܰܘܡܳܐ ܕܰܩܝܳܡܬܳܟ: ܘܬ̣ܰܣܶܩܝ̱ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀