ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܡܳܪܳܗ̇ ܕܬܶܫܒܘ̣ܚܬܳܐ: ܕܚܰܫ̣ ܒܰܒܣܰܪ ܒܨܶܒܝܳܢܶܗ ܟܰܕ ܗܘ̣ ܡܥܰܠܰܝ ܡܶܢ ܚܰܫ̈ܶܐ ܒܰܟܝܳܢܶܗ: ܠܗܰܘ̇ ܕܐܰܝܟ ܚܰܝܳܒܳܐ ܩܳܡ̣ ܩܕܳܡ ܦܝ̣ܠܰܛܘ̣ܣ ܘܕܳܢ̣ܶܗ: ܟܰܕ ܗܘ̣ ܕܳܐܶܢ ܠܕܰܝ̈ܳܢܶܐ ܒܕܝ̣ܢܶܗ: ܠܗܰܘ̇ ܕܐܶܬ̣ܬܠܝ̣ ܒܰܙܩܝ̣ܦܳܐ ܐܰܝܟ ܕܰܫܦ̣ܰܪ ܠܶܗ ܘܦܰܪܣܝ̣ ܠܫܰܠܝ̣̈ܛܳܢܶܐ ܕܚܶܫܘ̣ܟܳܐ ܒܰܫܠܳܚ ܒܶܣܪܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܦܶܠܓܶܗ ܕܝܰܘܡܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܣܳܓ̇ܕܳܐ ܠܳܟ ܡܳܪܝ̱ ܥܺܕܬܳܟ ܦܺܐܪܶܗ ܕܥܶܠܳܝܳܐ: ܡܪܰܡܪܡܳܐ ܡܰܪܥܝ̣ܬܳܟ ܠܚܰܫܰܝ̈ܟ ܡܳܪ̈ܳܢܳܝܶܐ ܘܩܰܕܝ̣̈ܫܶܐ ܝܰܠܕܳܗ̇ ܕܐܰܠܳܗܘ̣ܬܳܐ: ܡܩܰܠܣܳܐ ܟܢܘ̣ܫܬܳܟ ܠܫܘ̣̈ܡܳܬܳܟ ܡܚܰܣ̈ܝܳܢܝܳܬܳܐ ܓܰܢ̱ܒܳܪܳܐ ܕܥܳܠ̈ܡܶܐ: ܐܰܢ̱ܬ ܪܟܶܒ̣ܬ ܩܰܝܣܳܐ ܕܚܶܣܕܳܐ ܚܠܳܦ ܝܰܠܕܰܘ̈ܗ̱ܝ ܕܐܳܕܳܡ ܒܚܘ̣ܒܳܟ ܣܰܓܺܝܳܐܐ: ܐܰܢ̱ܬ ܚܰܣܝ̣ܬ ܥܰܘܠܳܗ̇ ܕܐܰܪܥܳܐ ܒܢܶܟܣܬܳܐ ܕܰܩܢܘ̣ܡܳܟ: ܬܰܘܪܳܐ ܕܦܶܛܡܳܐ ܕܰܕܒܰܚ̣ ܗܘ̣ ܠܶܗ ܒܪܰܘܡܳܗ̇ ܕܓܳܓܘ̣ܠܬܳܐ ܘܫܰܝܶܢ ܠܰܐܪ̈ܥܳܢܶܐ ܥܰܡ ܫܡܰܝ̈ܳܢܶܐ: ܐܶܡܪܳܐ ܕܰܟܝܳܐ ܘܩܰܕܝ̣ܫܳܐ ܕܐܶܬ̣ܕܒܰܚ ܒܨܶܒܝܳܢܶܗ ܘܰܫܩ̣ܰܠ ܚܛܝ̣ܬܶܗ ܕܥܳܠܡܳܐ ܒܰܕܒܝ̣ܚܘ̣ܬܶܗ: ܡܚܰܣܝܳܢܳܐ ܕܟܽܠ ܕܰܗ̣ܘܳܐ ܦܝ̣ܪܡܳܐ ܠܬܰܪܥܘ̣ܬܳܐ ܕܡܰܣ̈ܟܠܳܢܶܐ ܘܪܰܥܝ̣ ܠܰܐܒܘ̣ܗ̱ܝ ܥܰܡ ܒܶܪ̈ܝܳܬܶܗ: ܡܰܘ̇ܕܶܝܢܰܢ ܡܳܪܝ̱ ܠܚܰܫܰܝ̈ܟ: ܘܣܳܓ̇ܕܝ̣ܢܰܢ ܠܰܨܠܝ̣ܒܳܟ ܕܒܶܗ ܐܶܬܥ̣ܰܛܝܰܬ݀ ܚܛܝ̣ܬܰܢ: ܡܚܰܒܒܝ̣ܢܰܢ ܠܫܘ̣̈ܡܳܬܳܟ ܕܰܒܗܶܝܢ ܐܶܬܛܰܠ̣ܰܩܘ̱ ܟܺܐܒܰܝ̈ܢ ܘܐܰܘܦܝ̣ܘ ܥܰܘܠܰܢ: ܡܩܰܠܣܝ̣ܢܰܢ ܠܢܘ̣ܚܳܡܳܟ ܕܒܶܗ ܐܰܥܕܝ̣ܬܳܢ ܡ̣ܶܢ ܦܘ̣ܡܳܗ̇ ܕܰܫܝܘ̣ܠ ܒܳܠܰܥܬܳܐ: ܐܰܢ̱ܬ ܓܶܝܪ ܡܶܛܽܠܳܬܰܢ ܡ̣ܶܢ ܥܰܡܳܐ ܕܨܳܠܘ̣̈ܒܶܐ ܐܶܬܠܒ̣ܶܟ݂ܬ: ܟܰܕ ܐܰܚܝ̣ܕ ܐܰܢ̱ܬ ܠܒܶܪ̈ܝܳܬܳܐ ܐܰܝܟ ܐܰܠܳܗܳܐ: ܘܰܐܝܟ ܐܶܡܪܳܐ ܕܠܳܐ ܡܘ̣ܡܳܐ ܠܢܶܟܣܬܳܐ ܐܳܙܶܠ ܗ̱ܘܰܝܬ: ܟܰܕ ܥܰܠ ܟܰܬܦܳܟ ܠܰܨܠܝ̣ܒܳܐ ܕܚܶܣܕܳܐ ܛܥܝ̣ܢ ܗ̱ܘܰܝܬ: ܡܶܛܽܠ ܕܬܶܦ̣ܪܘ̣ܩ ܠܥܶܪܒܳܐ ܛܳܥܝܳܐ ܐܰܘܟܝ̣ܬ ܟܝܳܢܳܐ ܐ̱ܢܳܫܳܝܳܐ ܕܝ̣ܠܰܢ: ܘܥܰܠ ܟܰܬܦ̈ܳܬܳܟ ܣܳܡ̣ܬܳܝܗ̱ܝ ܠܗܰܘ̇ ܕܐܰܒܝ̣ܕ ܗ̱ܘܳܐ ܘܐܰܝܬܝ̣ܬܳܝܗ̱ܝ ܘܰܠܒܶܝܬ ܐܰܒܘ̣ܟ ܐܰܥܶܠ̣ܬܳܝܗ̱ܝ: ܘܗܳܫܳܐ ܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܕܦܝ̣ܪܡܳܐ ܗܳܢܳܐ ܕܩܰܪܶܒ̣ܢܰܢ ܩܕܳܡܰܝܟ ܢ̣ܶܬܩܰܒܰܠ ܒܐܝ̣̈ܕܰܝܳܐ ܕܝ̣ܠܳܟ ܠܘܳܬ ܫܳܠܘ̣ܚܳܟ: ܐܰܝܟܰܢܳܐ ܕܟܰܕ ܫܶܪܝܳܢܳܐ ܕܗܰܝܡܳܢܘ̣ܬܳܐ ܠܒܝ̣ܫܝ̣ܢܰܢ: ܘܣܰܢܘܰܪܬܳܐ ܕܦܘ̣ܪܩܳܢܳܐ ܣܳܝ̇ܡܝ̣ܢܰܢ: ܘܰܫܪܳܪܳܐ ܕܚܘ̣ܒܳܟ ܡܶܬܥܰܛܦܝ̣ܢܰܢ: ܒܰܚ̣ܙܳܩܳܐ ܕܣܰܒܪܳܐ ܕܚܰܝ̈ܶܐ ܡܫܰܪܪܝ̣ܢܰܢ: ܢܶܫ̇ܬܘܶܐ ܕܰܢ̇ܡܰܢܰܥ ܒܓܰܠܝܘ̣ܬ ܐܰܦ̈ܶܐ ܠܰܩܝܳܡܬܳܟ ܡܫܰܒܰܚܬܳܐ: ܘܢܶܗ̇ܘܶܐ ܚܕܘ̣̈ܓܶܐ ܘܰܙܡܝ̣̈ܢܶܐ ܒܶܝܬ ܡܶܫܬܘ̣ܬܳܟ ܘܝܳܪ̈ܬܶܐ ܚ̣ܰܕ̈ܬܶܐ ܒܡܰܠܟܘ̣ܬܳܟ: ܘܰܚܢܰܢ ܘܟܽܠܗܽܘܢ ܥܰܢܝ̣̈ܕܶܐ ܢ̇ܶܬܒܰܣܰܡ ܒܛܘ̣̈ܒܶܐ ܕܠܳܐ ܡܰܘ̇ܦܶܝܢ ܘܠܳܐ ܦܳܛܪܝ̣ܢ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܡܫܝ̣ܚܳܐ ܕܚܰܫ̣ ܥܰܠ ܐܰܦܰܝ̈ ܦܘ̣ܪܩܳܢܰܢ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܛܳܒܳܐ ܕܰܒܛܰܝܒܘ̣ܬܶܗ ܩܰܒ̣ܶܠ ܥܠܰܘܗ̱ܝ ܕܢ̣ܶܚܰܫ ܒܰܒܣܰܪ: ܘܩܰܘܝ̣ ܒܰܐܠܳܗܘ̣ܬܶܗ ܠܥܶܠ ܡ̣ܶܢ ܚܰܫ̈ܶܐ: ܘܰܦ̣ܪܰܩ ܒܝܰܕ ܚܰܫܰܘ̈ܗ̱ܝ ܡܰܚ̈ܝܳܢܶܐ ܠܗܰܘ̇ ܕܰܒܚܰܫܳܐ ܕܰܚܛܝ̣ܬܳܐ ܡܡܰܚܰܝ ܗ̱ܘܳܐ ܡ̣ܶܢ ܗܰܘ̇ ܡܰܚܫܳܢܳܐ ܡܶܬܝܰܕܥܳܢܳܐ: ܐܰܚܶܫ ܡܳܪܝ̱ ܐܳܦ ܗܳܫܳܐ ܠܶܗ ܠܗܰܘ̇ ܕܐܰܡܝ̣ܢ ܕܢܰܚ̣ܶܫ ܠܰܢ ܒܚܰܫ̈ܶܐ ܕܰܚܛܝ̣ܬܳܐ: ܘܩܰܒܶܠܳܝܗ̱ܝ ܠܦܝ̣ܪܡܳܐ ܗܳܢܳܐ ܕܩܰܪܶܒ̣ܢܰܢ ܩܕܳܡܰܝܟ: ܘܗܰܒܠܰܢ ܕܢ̇ܶܬܗܰܘܢܰܢ ܠܦܘ̣ܪܩܳܢܳܐ ܕܝ̣ܠܳܟ ܗܰܘ̇ ܕܫܰܟܶܢ̣ܬ ܠܰܢ ܒܚܰܫܰܝ̈ܟ ܡܰܥܒ̈ܕܰܝ ܚܰܝ̈ܶܐ ܠܥܳܠܡܝ̣ܢ ܀