ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܡܰܒܘ̣ܥܳܐ ܕܚܰܝ̈ܶܐ ܘܢܶܒܥܳܐ ܕܥܘ̣ܕܪ̈ܳܢܶܐ: ܕܶܐܫ̣ܬܝ̣ܘ ܡܶܢܶܗ ܢܒܺܝ̈ܶܐ ܘܶܐܙܕܰܗܝ̣ܘ: ܘܰܫܠܝ̣̈ܚܶܐ ܘܶܐܬ̣ܢܰܗܰܪܘ̱: ܘܣܳܗ̈ܕܶܐ ܘܶܐܬ̣ܢܰܨܰܚܘ̱: ܘܡܰܘܕ̈ܝܳܢܶܐ ܐܶܙܕܰܗܝ̣ܘ: ܘܡܰܠ̈ܦܳܢܶܐ ܐܶܬ̣ܚܰܟܰܡܘ̱: ܬܪܘ̣ܥ ܠܰܢ ܡܳܪܝ̱ ܫܶܩܝܳܐ ܕܝܘ̣ܠ̈ܦܳܢܰܝܟ ܡܰܚ̈ܝܳܢܶܐ: ܘܰܐܫܦܰܥ ܠܰܢ ܡܥܝ̣ܢܳܐ ܕܦܘ̣ܩ̈ܕܳܢܰܝܟ ܦܳܪ̈ܘ̣ܩܳܝܶܐ ܕܢ̇ܶܬܢܰܗܰܪ ܒܡܶܠܬܳܟ: ܘܢ̇ܶܙܕܰܗܶܐ ܒܝܘ̣ܠ̈ܦܳܢܰܝܟ: ܘܢ̇ܶܓܡܘ̣ܪ ܘܰܢ̇ܫܰܡܠܶܐ ܨܶܒܝܳܢܳܟ: ܘܢ̇ܶܫܬܘܶܐ ܠܪ̈ܰܚܡܶܐ ܘܠܰܚܢܳܢܳܐ ܕܡܶܢܳܟ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܳܡܳܐ ܘܰܡܥܰܠܝܳܐ: ܕܰܠܥܰܕܥܺܐܕܳܐ ܕܝܳܠܶܕܬܶܗ ܪܰܡ̣ܪܶܡ: ܘܕܘ̣ܟܪܳܢܳܐ ܕܩܰܕܝ̣̈ܫܰܘܗ̱ܝ ܫܰܡ̣ܠܝ̣: ܠܗܰܘ̇ ܡܳܪܳܐ ܕܩܰܕܝ̣̈ܫܶܐ ܕܥ̱ܘ̣ܗܕܳܢܳܐ ܕܰܐܬܠܝ̣̈ܛܰܘܗ̱ܝ ܐܰܘܪܶܒ: ܘܰܚܠܘ̣ܠܳܐ ܕܰܫܠܝ̣̈ܚܰܘܗ̱ܝ ܢ̣ܰܨܰܚ: ܘܒܘ̣ܣܳܡܳܐ ܕܣܳܗ̈ܕܰܘܗ̱ܝ ܐܰܣ̣ܓܝ̣: ܠܗܰܘ̇ ܒܪܳܐ ܩܰܕܝ̣ܫܳܐ ܕܠܰܐܒܳܗ̈ܳܬܳܐ ܒܚܝ̣ܪ̈ܶܐ ܘܡܰܠ̈ܦܳܢܶܐ ܚܣܰܝ̈ܳܐ ܪܰܡ̣ܪܶܡ ܘܫ̣ܰܪܰܪ: ܘܰܢܝܳܚܬܳܐ ܕܥܰܢܝ̣̈ܕܶܐ ܡܗܰܝܡ̈ܢܶܐ ܒܐ̱ܪ̈ܳܙܶܐ ܡܰܚ̈ܝܳܢܶܐ ܫܰܡ̣ܠܝ̣: ܛܳܒܳܐ ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ ܘܠܶܗ ܢ̇ܰܘܕܶܐ ܘܠܶܗ ܢ̇ܶܣܓܘ̣ܕ: ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܪܳܥܝܳܐ ܕܚܰܝ̈ܠܰܘܳܬܳܐ ܫܡܰܝ̈ܳܢܶܐ: ܕܰܫܒ̣ܰܩ ܒܰܡܪ̈ܰܘܡܶܐ ܥܶܠܳܝ̈ܶܐ ܠܥܳܢ̈ܳܐ ܠܳܐ ܛܳܥܝ̣ܬܳܐ: ܘܰܠܘܳܬ ܫܟܳܚܬܳܐ ܕܝ̣ܠܶܗ ܕܥܶܪܒܳܐ ܐܰܒܝ̣ܕܳܐ ܒܪܶܚܡܰܬ݀ ܐ̱ܢܳܫܘ̣ܬܶܗ ܐܶܬ̣ܳܐ: ܘܟܰܕ ܐܶܫܟ̣ܚܶܗ ܛܰܥܢ̣ܶܗ ܥܰܠ ܟܰܬܦ̈ܳܬܶܗ ܩܰܕܝ̣̈ܫܳܬܳܐ ܘܠܰܛܝܳܪܶܗ ܐܰܦܢ̣ܝܶܗ: ܘܰܩ̣ܪܳܐ ܠܚܰܝ̈ܠܰܘܳܬܳܐ ܥܶܠܳܝ̈ܶܐ ܕܰܪܚܝ̣ܡܝ̣ܢ ܠܶܗ: ܘܚܰܕܘ̣ܬܳܐ ܥܕܶܝܢܳܝܬܳܐ ܥܒ̣ܰܕ: ܨܒܝ̣ ܒܰܢ ܡܳܪܝܳܐ ܒܪ̈ܰܚܡܰܝܟ ܘܩܰܒܶܠ ܡ̣ܶܢ ܐܝ̣̈ܕܰܝܳܐ ܕܝ̣ܠܰܢ ܒܨܺܝ̣ܪ̈ܶܐ ܘܚܰܛܳܝ̈ܶܐ ܥܰܒ̈ܕܰܝܟ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܡܩܰܪܒܝ̣ܢܰܢ ܩܕܳܡܰܝܟ: ܘܟܽܠ ܚܛܳܗ̈ܶܐ ܡܳܪܝ̱ ܘܣܰܟܠ̈ܘܳܬܳܐ ܕܰܐܝܟ ܠܒܝ̣̈ܫܰܝ ܒܶܣܪܳܐ ܐܶܬܬܰܥܒ̣ܰܪܢܰܢ ܩܕܳܡܰܝܟ ܒܨܶܒܝܳܢܳܐ ܘܰܕܠܳܐ ܒܨܶܒܝܳܢܳܐ ܕܒܝ̣ܕܰܥܬܳܐ ܘܰܕܠܳܐ ܒܝ̣ܕܰܥܬܳܐ: ܫܒܘ̣ܩ ܘܚܰܣܳܐ ܘܰܐܥܒܰܪ ܒܒܳܥܘ̈ܳܬܳܐ ܕܗܳܢܽܘܢ ܕܡ̣ܶܢ ܥܳܠܰܡ ܫܦ̣ܰܪܘ̱ ܠܳܟ: ܐܰܒܳܗ̈ܳܬܳܐ ܩܰܕܝ̣̈ܫܶܐ ܘܪ̈ܝ̣ܫܰܝ ܐܰܒܳܗ̈ܳܬܳܐ: ܕܰܢܒܺܝ̈ܶܐ ܘܕܰܫܠܝ̣̈ܚܶܐ: ܕܟܳܪ̈ܘ̣ܙܶܐ ܘܕܶܐܘܰܢܓܶܠܝ̣̈ܣܛܶܐ: ܕܣܳܗ̈ܕܶܐ ܘܰܕܡܰܘܕ̈ܝܳܢܶܐ: ܘܰܕܡܰܠ̈ܦܳܢܶܐ ܬܪ̈ܝ̣ܨܰܝ ܫܘ̣ܒܚܳܐ: ܝ̣ܕܝ̣ܥܳܐܝ̣ܬ ܕܶܝܢ ܠܩܰܕܝ̣ܫܬܳܐ ܘܰܡܫܰܒܰܚܬܳܐ ܘܰܒܬܘ̣ܠܰܬ݀ ܒܟܽܠܙܒܰܢ: ܛܘ̣ܒܳܢܝ̣ܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܘܰܕܟܽܠ ܓܰܒܪܳܐ ܙܰܕܝ̣ܩܳܐ ܕܰܒܗܰܝܡܳܢܘ̣ܬܳܐ ܕܰܫܪܳܪܳܐ ܐܶܫ̣ܬܰܡܠܝ̣ ܘܶܐܬ̣ܓܡܰܪ: ܕܒܰܨܠܰܘ̈ܳܬܗܽܘܢ ܘܰܒܝܰܕ ܬܰܟܫ̈ܦܳܬܗܽܘܢ ܫܰܟܶܢ ܫܰܝܢܳܐ ܘܰܫܠܳܡܳܐ ܠܥܳܠܡܳܐ ܟܽܠܶܗ ܘܰܠܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ ܒܡܰܘܗ̈ܒܳܬܳܐ ܕܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܨܰܒܶܬ ܘܗܰܕܰܪ: ܨܘ̣ܒ ܒܳܗ̇ ܡܳܪܝ̱ ܫܪܳܪܳܐ ܕܗܰܝܡܳܢܘ̣ܬܳܐ ܡܰܠ̈ܦܳܢܶܐ ܒܚܝ̣ܪ̈ܶܐ ܘܡܰܐ̱ܪ̈ܙܳܢܶܐ ܬܪ̈ܝ̣ܨܶܐ: ܕܦܳܣ̇ܩܝ̣ܢ ܬܪܝ̣ܨܳܐܝ̣ܬ ܠܡܶܠܬܳܐ ܕܰܫܪܳܪܳܐ: ܠܩܰܫܝ̣̈ܫܶܐ ܘܠܰܡܫܰܡ̈ܫܳܢܶܐ ܡܠܝ̣ ܡ̣ܶܢ ܣܘ̣ܟܳܠܳܐ ܘܬܰܪܥܝ̣ܬܳܐ: ܘܫܰܟܶܢ ܠܗܽܘܢ ܚܰܝ̈ܶܐ ܕܰܦ̇ܐ̣ܶܝܢ ܠܟܳܗܢܘ̣ܬܳܐ ܠܡܶܬܩܰܪܳܒܘ̣ ܨܶܝܕ ܐ̱ܪ̈ܳܙܰܝܟ ܐܰܠܳܗ̈ܳܝܶܐ: ܠܡܰܠ̈ܟܶܐ ܘܕܰܝ̈ܳܢܶܐ ܘܪ̈ܝ̣ܫܳܢܶܐ ܕܐܝ̣ܬ ܒܥܳܠܡܳܐ ܗܳܢܳܐ ܐܰܪܟܶܢ ܠܘܳܬ ܢܳܛܘ̣ܪܘ̣ܬܳܐ ܕܦܘ̣ܩ̈ܕܳܢܶܐ ܕܝ̣ܠܳܟ ܡܰܥܒ̈ܕܰܝ ܚܰܝ̈ܶܐ: ܠܣܳܒ̈ܶܐ ܣܰܡܶܟ ܘܥܰܕܰܪ ܒܚܰܝܠܳܐ ܕܡܶܢܳܟ: ܘܠܰܥܠܰܝ̈ܡܶܐ ܚܰܝܠܬܳܢܘ̣ܬܳܐ ܘܓܰܢ̱ܒܳܪܘ̣ܬܳܐ ܕܠܘ̣ܩܒܰܠ ܟܽܠ ܚܰܫ̈ܶܐ ܫܟܝ̣ܪ̈ܶܐ ܘܰܪܟܝ̣ܢܘ̣ܬ ܨܰܘܪܳܐ ܕܬܰܪܥܝ̣ܬܳܐ ܫܰܟܶܢ: ܠܰܛܠܳܝ̈ܶܐ ܬܰܪܰܐܐ ܒܝ̣ܕܰܥܬܳܐ ܘܰܒܕܘ̣ܒܳܪ̈ܶܐ ܕܰܡܝܰܬܪܘ̣ܬܳܐ: ܠܝܰܬܡ̈ܶܐ ܘܠܰܐܪ̈ܡܠܳܬܳܐ ܩܘ̣ܡ ܘܥܰܕܰܪ ܒܚܰܘܣ̈ܳܢܰܝܟ ܣܰܓܺܝ̈ܶܐܐ: ܠܰܛܠܝ̣̈ܡܶܐ ܘܠܰܥܠܝ̣̈ܒܶܐ ܘܠܰܐܝܠܶܝܢ ܕܡܶܬܕܰܒܪܝ̣ܢ ܒܰܩܛܝ̣ܪܳܐ ܕܥܰܘܠܳܐ ܫܰܘܙܶܒ ܘܦܰܨܳܐ ܒܝܰܕ ܟܺܐܢܘ̣ܬܳܐ ܕܕܝ̣ܢܰܝ̈ܟ: ܠܰܟܪ̈ܝ̣ܗܶܐ ܘܠܰܐܝܠܶܝܢ ܕܡܶܬܢܰܣܶܝܢ ܡ̣ܶܢ ܪ̈ܘ̣ܚܶܐ ܒܝ̣̈ܫܳܬܳܐ ܚܘ̣ܪܳܪܳܐ ܘܰܓܗܳܝܬܳܐ ܕܡ̣ܶܢ ܟܘ̣ܪ̈ܗܳܢܰܝܗܽܘܢ ܫܰܟܶܢ: ܠܰܐܣܝ̣ܪ̈ܶܐ ܫܪܝ̣ ܒܚܰܝܠܳܟ: ܠܛܳܥܰܝ̈ܳܐ ܩܪܝ̣ ܘܰܐܗܦܶܟ ܠܘܳܬܳܟ: ܠܰܐܝܠܶܝܢ ܕܰܫ̣ܪܰܥܘ̱ ܘܰܢܦ̣ܰܠܘ̱ ܒܦܰܚ̈ܶܐ ܕܰܚܛܝ̣ܬܳܐ ܕܰܠܳܐ ܘܰܐܩܝ̣ܡ ܐܶܢܽܘܢ ܒܣܘ̣ܓܳܐܐ ܪܰܒܳܐ ܕܰܡܪܰܚܡܳܢܘ̣ܬܳܟ: ܠܕܰܝܪ̈ܳܝܶܐ ܘܰܒܬܘ̣̈ܠܶܐ ܘܰܒܬܘ̣̈ܠܳܬܳܐ ܕܢܝ̣ܪܳܐ ܕܝ̣ܠܳܟ ܛܥܝ̣ܢܝ̣ܢ ܗܰܒ ܠܗܽܘܢ ܠܒܝ̣ܒܘ̣ܬܳܐ ܘܰܡܚܰܡܣܢܳܢܘ̣ܬܳܐ ܗܳܝ ܕܰܥܕܰܡܳܐ ܠܰܕܡܳܐ ܠܰܟܠܝ̣ܠܳܐ ܕܫܰܢ̱ܬܳܐ ܒܰܪܶܟ ܒܛܰܝܒܘ̣ܬܳܟ: ܫܦܝ̣ܥܘ̣ܬܳܐ ܕܦܺܐܪ̈ܶܐ ܫܰܪܬܰܚ ܒܒܰܣܝ̣ܡܘ̣ܬܳܟ ܡܶܛܽܠ ܒܳܝ̈ܫܶܐ ܘܡܶܣ̈ܟܺܢܶܐ ܕܥܰܡܳܟ: ܥܰܠ ܟܽܠ ܚܘ̣ܣ: ܥܰܠ ܟܽܠ ܪܰܚܶܡ: ܘܰܠܟܽܠ ܩܪܝ̣ ܘܰܐܝܬܳܐ ܠܐܘ̣ܪܚܳܐ ܕܦܘ̣ܩ̈ܕܳܢܰܝܟ ܩܰܕܝ̣̈ܫܶܐ ܘܡܰܥܒ̈ܕܰܝ ܚܰܝ̈ܶܐ: ܘܰܐܢܝ̣ܚ ܠܥܰܢܝ̣̈ܕܶܐ ܡܗܰܝ̈ܡܢܶܐ ܒܰܐܘ̈ܘܳܢܶܐ ܕܝ̣ܠܳܟ ܡܫܰܒ̈ܚܶܐ ܘܰܫܡܰܝ̈ܳܢܶܐ: ܡܶܛܽܠ ܕܡܳܪܳܐ ܕܚܰܝ̈ܶܐ ܘܰܕܡܝ̣̈ܬܶܐ ܐܝ̣ܬܰܝܟ: ܘܰܦܐܶܐ̣ ܠܳܟ ܫܘ̣ܒܚܳܐ ܘܐܝ̣ܩܳܪܳܐ ܘܐܘ̣ܚܕܳܢܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܺܝ̣ܪܡܳܐ

ܡܙܰܝܚܳܐ ܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ ܡܫܝ̣ܚܳܐ ܦܳܪܘ̣ܩܰܢ ܒܚܰܕܘ̣ܬܳܐ ܘܰܕܝܳܨܳܐ: ܠܕܘ̣ܟܪܳܢܳܐ ܛܳܒܳܐ ܕܝܳܠܶܕܬܳܟ ܒܬܘ̣ܠܬܳܐ ܡܰܪܝܰܡ: ܘܰܡܝܰܩܪܳܐ ܒܰܦܨܝܚܘ̣ܬܳܐ ܠܥ̱ܘ̣ܗܕܳܢܳܐ ܕܰܫܠܝ̣̈ܚܰܝܟ: ܘܪܳܘܙܳܐ ܒܥܰܕܥܺܐܕ̈ܰܝܗܽܘܢ ܕܣܳܗ̈ܕܰܝܟ ܘܰܡܪܰܡܪܡܳܐ ܠܝܰܘܡܳܐ ܕܢܶܨܚܳܢܰܝ̈ܗܽܘܢ ܕܩܰܕܝ̣̈ܫܰܝܟ: ܕܥܰܡܗܽܘܢ ܒܰܓܢܘ̣ܢܳܟ ܪܘ̣ܚܳܢܳܝܳܐ ܢ̇ܶܬܒܰܣܰܡ: ܘܬܰܡܳܢ ܬܶܙܡܰܪܝ̱ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܘܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀