ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܰܬܠܝ̣ܬܳܝܽܘ̣ܬܳܐ ܡܪܰܝܰܡܬܳܐ ܕܐܝ̣ܬܶܝܗ̇ ܚܕܳܐ ܐܰܠܳܗܘ̣ܬܳܐ ܠܳܐ ܡܶܬܦܰܠܓܳܢܝ̣ܬܳܐ ܕܰܒܛܰܝܒܘ̣ܬܶܗ ܠܳܐ ܡܶܬܡܰܠܠܳܢܝ̣ܬܳܐ: ܝܰܩ̣ܰܪܬ ܠܶܐܡܳܐ ܡܒܰܪܰܟܬܳܐ ܛܘ̣ܒܳܢܝ̣ܬܳܐ ܡܰܪܝܰܡ: ܗܳܝ̇ ܕܰܗ̣ܘܳܬ݀ ܡܥܝ̣ܢܳܐ ܕܛܳܒ̈ܳܬܳܐ ܘܰܕܒܘ̣ܪ̈ܟܳܬܳܐ: ܕܰܢܒܺܝ̈ܶܐ ܒܐ̱ܪ̈ܳܙܰܝܗܽܘܢ ܨܳܪܽܘ̣ܗ̇: ܘܰܫܠܝ̣̈ܚܶܐ ܒܣܳܥܘ̣ܪ̈ܘܳܬܗܽܘܢ ܝܰܩܪܽܘ̣ܗ̇: ܘܣܳܗ̈ܕܶܐ ܒܢܶܨܚܳܢܰܝ̈ܗܽܘܢ ܩܰܠܣܽܘ̣ܗ̇: ܗܳܝ̇ ܕܰܒܦܰܪܶܗܣܺܝܰܐ ܕܐܝ̣ܬ ܠܳܗ̇ ܡܗܰܝ̈ܡܢܶܐ ܛܳܦܣܝ̣ܢ: ܘܚܰܛܳܝ̈ܶܐ ܡܶܬܓܰܘܣܝ̣ܢ: ܘܚܰܝ̈ܳܒܶܐ ܚܢܳܢܳܐ ܘܪ̈ܰܚܡܶܐ ܫܳܐܠܝ̣ܢ: ܕܰܒܕܘ̣ܟܪܳܢܳܗ̇ ܚܰܣܝܳܐ ܘܰܕܟܽܠܗܽܘܢ ܩܰܕܝ̣̈ܫܶܐ ܘܐܰܒܳܗ̈ܳܬܳܐ ܓܒܰܝ̈ܳܐ ܘܪ̈ܳܥܰܘܳܬܳܐ ܛܘ̣ܒ̈ܬܳܢܶܐ ܘܰܡܕܰܒܪ̈ܳܢܶܐ ܕܥܺܕܬܳܐ ܩܰܕܝ̣ܫܬܳܐ ܢ̣ܶܗܘܶܐ ܕܘ̣ܟܪܳܢܗܽܘܢ ܠܒܘ̣ܪܟܬܳܐ: ܘܢ̣ܶܬܦܰܢܝ̈ܳܢ ܠܰܢ ܒܒܳܥܘ̈ܳܬܗܽܘܢ ܫܶܐܠ̈ܳܬܐ ܟܺܐܢ̈ܳܬܳܐ: ܘܥܰܢܝ̣̈ܕܶܐ ܡܗܰܝ̈ܡܢܶܐ ܢܶܫܬܘܽܘܢ ܠܚܘ̣ܣܳܝܳܐ ܕܚܰܘ̈ܒܶܐ ܘܰܠܫܘ̣ܒܩܳܢܳܐ ܕܟܽܠܗܶܝܢ ܡܶܬܥܰܒܪ̈ܳܢܘܳܬܳܐ ܕܝ̣ܠܗܽܘܢ: ܘܰܚܢܰܢ ܘܗܶܢܽܘܢ ܢ̇ܡܰܢܰܥ ܠܰܩܝܳܡܬܳܐ ܡܝܰܬܰܪܬܳܐ: ܘܰܠܩܰܘܡܳܐ ܝܰܡܝ̣ܢܳܝܳܐ ܘܒܘ̣ܣܳܡܳܐ ܫܡܰܝܳܢܳܐ: ܒܗܳܢܳܐ ܥܶܕܳܢܳܐ ܕܦܶܠܓܶܗ ܕܝܰܘܡܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܥ̱ܘ̣ܗܕܳܢܳܐ ܕܚܰܣܝܘ̣ܬܳܐ ܡܫܰܡܠܝ̣ܢܰܢ ܝܰܘܡܳܢܳܐ ܩܕܳܡܰܝܟ ܐܳܘ ܡܶܠܬܳܐ ܐܰܠܳܗܳܐ ܕܝ̣ܠܰܢ: ܕܟܽܠܗܽܘܢ ܗܳܠܶܝܢ ܕܡ̣ܶܢ ܥܳܠܰܡ ܗ̣ܘܰܘ ܡܢܝ̣̈ܚܳܢܶܐ ܕܝ̣ܠܳܟ: ܪ̈ܝ̣ܫܰܝ ܐܰܒܳܗ̈ܳܬܳܐ ܘܰܐܒܗ̈ܳܬܳܐ: ܢܒܺܝ̈ܶܐ ܩܰܕܝ̣̈ܫܶܐ ܘܩܰܕܝ̣̈ܫܳܬܳܐ: ܘܩܰܕܝ̣ܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܘܕܰܫܠܝ̣ܚ̈ܶܐ ܘܰܕܣܳܗ̈ܕܶܐ ܘܰܕܡܰܘܕ̈ܝܳܢܶܐ ܫܰܪ̈ܝ̣ܪܶܐ: ܕܡܰܠ̈ܦܳܢܶܐ ܒܚܝ̣ܪ̈ܶܐ: ܘܪ̈ܝ̣ܫܰܝ ܟܳܗ̈ܢܶܐ ܘܪ̈ܳܥܰܘܳܬܳܐ ܚܣܰܝ̈ܳܐ ܙܗܰܝ̈ܳܐ: ܗܳܢܽܘܢ ܕܰܒܥܰܡ̈ܠܶܐ ܕܥܳܢܘܳܝܘ̣ܬܳܐ ܐܶܫܬܰܡ̣ܠܝ̣ܘ: ܐܰܢ̱ܬ ܗ̱ܘ̣ ܡܳܪܝܳܐ ܕܟܽܠܗܽܘܢ ܡܥܰܕܪܳܢܳܐ ܘܰܡܟܰܠܠܳܢܳܐ ܒܰܐܓܘ̣ܢܳܐ ܘܰܒܕܰܪܳܐ ܕܝ̣ܠܗܽܘܢ ܗ̣ܘܰܝܬ: ܠܪ̈ܝ̣ܫܰܝ ܐܰܒܳܗ̈ܳܬܳܐ: ܘܐܰܒܳܗ̈ܳܬܳܐ ܡܕܰܒܪܳܢܳܐ ܘܰܡܢܰܛܪܳܢܳܐ: ܠܰܢܒܺܝ̈ܶܐ ܡܚܰܝܠܳܢܳܐ: ܠܰܒܬܘ̣ܠܰܬ݀ ܒܟܽܠܙܒܰܢ ܡܰܪܝܰܡ ܡܕܰܟܝܳܢܳܐ ܘܰܡܢܰܟܦܳܢܳܐ: ܠܰܫܠܝ̣̈ܚܶܐ ܡܓܰܢ̱ܒܪܳܢܳܐ: ܠܣܳܗ̈ܕܶܐ ܡܢܰܨܚܳܢܳܐ: ܠܡܰܘ̈ܕܝܳܢܶܐ ܡܠܰܒܒܳܢܳܐ: ܠܡܰܠ̈ܦܳܢܶܐ ܫܰܪ̈ܝ̣ܪܶܐ ܡܚܰܟܡܳܢܳܐ ܘܰܡܣܰܝܥܳܢܳܐ: ܠܪ̈ܝ̣ܫܰܝ ܟܳܗ̈ܢܶܐ ܘܪ̈ܳܥܰܘܳܬܳܐ ܘܩܳܝܘ̣̈ܡܶܐ ܕܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ ܚܘ̣ܛܪܳܐ ܪܳܥܝܳܝܳܐ ܗܘܝ̣: ܠܗܳܢܽܘܢ ܕܰܒܥܰܡ̈ܠܶܐ ܕܥܳܢܘܳܝܘ̣ܬܳܐ ܡܣܰܝܒܪ̈ܳܢܶܐ ܘܰܡܚܰܡܣ̈ܢܳܢܶܐ ܕܟܽܠܗܽܘܢ ܗܳܠܶܝܢ ܚܣ̈ܰܝܳܐ ܕܝ̣ܠܳܟ: ܘܝ̣ܕܝ̣ܥܳܐܝ̣ܬ ܕܗܳܠܶܝܢ ܕܝܰܘܡܳܐ ܗܳܢܳܐ ܩܰܪܝܳܐ ܘܩܰܕܝ̣ܫܳܐ ܐܝ̣ܬܰܘܗ̱ܝ ܕܘ̣ܟܪܳܢܗܽܘܢ: ܟܰܕ ܥܰܠ ܡܰܕܒܚܳܐ ܥܳܒܶܕ ܐܰܢ̱ܬ ܥ̱ܘܗܕܳܢܳܐ ܕܝ̣ܠܗܽܘܢ: ܘܰܒܬܶܓܡܳܐ ܡܰܠܰܐܟܳܝܳܐ ܡܛܰܟܶܣ ܐܰܢ̱ܬ ܡܦܝ̣ܣܝ̣ܢܰܢ ܠܒܰܣܝ̣ܡܘ̣ܬܳܟ: ܕܠܰܢ ܒܨܝ̣ܪ̈ܶܐ ܕܶܐܫ̣ܬܘܺܝ̣ܢܰܢ ܕܰܢ̇ܥܰܕܥܶܕ ܠܳܟ ܥܺܐܕܳܐ ܗܳܢܳܐ ܕܰܪ̈ܚܘ̣ܡܰܝܟ ܫܰܟܶܢ ܠܰܢ ܚܘ̣ܣܳܝܳܐ ܕܚܰܘ̈ܒܶܐ ܘܕܰܚܛܳܗ̈ܶܐ: ܘܫܘ̣ܒܩܳܢܳܐ ܘܕܘ̣ܟܳܝܳܐ ܕܫܘ̣ܪ̈ܥܳܬܳܐ ܘܡܶܬܥܰܒܪ̈ܳܢܘܳܬܳܐ ܕܝ̣ܠܰܢ: ܘܫܽܘܘ̣ܙܳܒܳܐ ܘܢܘ̣ܛܳܪܳܐ ܕܡ̣ܶܢ ܟܽܠ ܡܦܰܬܟ̈ܳܬܳܐ: ܕܛܳܥܝܽܘ̣ܬܳܐ ܚܰܢܦܳܝܬܳܐ ܘܶܐܪܶܛܝ̣ܩܳܝܬܳܐ: ܘܰܕܟܽܠ ܙܢܰܝ̈ܳܐ ܘܡܘ̣̈ܡܶܐ ܕܟܽܠܡܳܐ ܕܰܚ̣ܛܰܝܢܰܢ ܡܫܰܡܠܝܳܐܝ̣ܬ ܫܰܟܶܢ ܠܰܢ: ܕܘ̣ܟܳܝܳܐ ܘܨܘ̣ܠܳܠܳܐ ܕܢܰܦܫܳܐ ܘܦܰܓܪܳܐ ܘܰܕܗܰܘܢܳܐ ܘܩܰܕܝ̣ܫܘ̣ܬܳܐ ܕܪܘ̣ܚܳܐ: ܘܙܰܝܢܳܐ ܠܳܐ ܡܶܙܕܰܟܝܳܢܳܐ ܠܘ̣ܩܒܰܠ ܟܽܠܶܗ ܚܰܝܠܳܐ ܕܰܒܥܶܠ̈ܕܒܳܒܶܐ ܡܶܬܝܰܕ̈ܥܳܢܶܐ ܘܡܶܬܚ̈ܰܙܝܳܢܶܐ: ܘܰܕܢ̇ܶܗܘܶܐ ܡܕܰܡ̈ܝܳܢܶܐ ܡܫܰܡ̈ܠܝܶܐ ܕܗܳܢܽܘܢ ܕܕܘ̣ܟܪܳܢܗܽܘܢ ܝܰܘܡܳܢܳܐ ܡܥܰܕܥܕܝ̣ܢܰܢ: ܫܘ̣ܠܳܡܳܐ ܕܡ̣ܶܢ ܢܶܣܝ̈ܽܘܢܶܐ: ܦܘ̣ܪܩܳܢܳܐ ܕܡ̣ܶܢ ܡܣܳܡܒܪܝ̣ܫܳܐ ܘܡܰܪ̈ܕܘܳܬܳܐ ܩܰܫܝ̈ܳܬܳܐ ܘܠܳܐ ܡܶܣܬܰܝܒܪ̈ܳܢܝܳܬܳܐ: ܚܘ̣ܪܳܪܳܐ ܕܡ̣ܶܢ ܐܘ̣ܠ̈ܨܳܢܶܐ ܥܰܣ̈ܩܶܐ ܘܡܰܪ̈ܕܘܳܬܳܐ: ܘܡ̣ܶܢ ܡܰܪܕܘ̣ܬܳܐ ܗܳܕܶܐ ܕܣܝ̣ܡܳܐ: ܘܟܽܠܗܶܝܢ ܒܝ̣̈ܫܳܬܳܐ ܕܥܳܠܡܳܐ ܗܳܢܳܐ: ܡܰܥܡܪܳܐ ܒܗܝ̣ܠܳܐ ܘܰܡܫܰܝܢܳܐ: ܘܗܰܒܠܰܢ ܡܰܦܩܳܢܳܐ ܡܫܰܝܢܳܐ ܕܡ̣ܶܢ ܗܳܪܟܳܐ: ܕܠܳܐ ܡܶܬܚܣܶܢ ܡ̣ܶܢ ܚܰܝ̈ܠܶܐ ܕܪ̈ܘ̣ܚܶܐ ܒܝ̣̈ܫܳܬܳܐ: ܥܘ̣ܕܪܳܢܳܐ ܡܫܰܡܠܝܳܐ ܘܣܘ̣ܝܳܥܳܐ ܕܚܰܝ̈ܠܰܘܳܬܳܐ ܡܰܠܰܐܟܳܝ̈ܶܐ: ܐܘ̣ܪܳܥܳܐ ܘܦܶܓܥܳܐ ܡܚܰܕܝܳܢܳܐ ܘܰܡܫܰܝܢܳܐ ܕܒܳܟ: ܒܶܝܬ ܡܰܫܪܝܳܐ ܕܒܰܐܬܪ̈ܰܘܳܬܳܐ ܕܰܦܨܝ̣ܚܘ̣ܬܳܐ ܘܰܕܢܘ̣ܗܪܳܐ: ܩܝܳܡܬܳܐ ܡܥܰܠܰܝܬܳܐ: ܘܰܪܘܳܙܳܐ ܘܕܰܘܨܳܐ ܕܥܰܡ ܬܶܓ̈ܡܶܐ ܩܰܕܝ̣̈ܫܶܐ ܕܝ̣ܠܳܟ ܗܳܢܽܘܢ ܕܠܐܘ̣ܪܥܳܐ ܕܡܶܐܬܝ̣ܬܳܟ ܕܬܰܪܬܶܝܢ ܕܡ̣ܶܢ ܫܡܰܝܳܐ ܦܳܪܚܝ̣ܢ: ܘܰܠܡܰܥܰܠܬܳܐ ܕܥܰܡܗܽܘܢ ܠܝܳܪܬܘ̣ܬܳܐ ܛܘ̣ܒܬܳܢܝ̣ܬܳܐ ܕܒܰܐܘ̈ܘܳܢܶܐ ܕܝ̣ܠܗܽܘܢ: ܬܘ̣ܒ ܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܕܰܬ̣ܫܰܟܶܢ ܫܰܝܢܳܐ ܠܥܺܕܬܳܐ ܕܝ̣ܠܳܟ: ܘܢܘ̣ܛܳܪܳܐ ܠܝܰܠ̈ܕܶܝܗ̇: ܘܩܳܝܽܘ̣ܡܘ̣ܬܳܐ ܕܪ̈ܳܥܰܘܳܬܳܐ ܕܝ̣ܠܳܗ̇ ܒܫܰܦܝ̣ܪܘ̣ܬ ܕܶܚܠܬܳܐ ܘܕܘ̣ܒܳܪܳܐ: ܫܰܝܢܳܐ ܕܒܰܝܢܳܬ ܡܰܠ̈ܟܘܳܬܳܐ: ܫܘ̣ܠܳܡܳܐ ܕܗܳܢܳܐ ܪܘ̣ܓܙܳܐ ܕܣܝ̣ܡ: ܣܳܥܘ̣ܪܘ̣ܬܳܐ ܕܰܟܪ̈ܝ̣ܗܶܐ: ܦܘ̣ܪܩܳܢܳܐ ܕܰܫܒܰܝ̈ܳܐ: ܡܘ̣ܠܳܝܳܐ ܕܰܣܢܝ̣̈ܩܶܐ: ܐܳܐܰܪ̈ܰܐܣ ܡܡܰܙܓ̈ܶܐ: ܡܫܰܪܬܚܘ̣ܬ ܥܰܠ̈ܠܳܬܳܐ ܕܦܺܐܪ̈ܶܐ: ܘܫܽܘܘ̣ܙܳܒܳܐ ܕܡ̣ܶܢ ܟܽܠܗܽܘܢ ܡܰܚ̈ܫܘ̣ܠܶܐ ܘܓܰܠ̱̈ـܠܶܐ ܘܟܺܐܡܘ̣̈ܢܶܐ ܕܣܝ̣ܡܝ̣ܢ ܥܰܠ ܥܳܠܡܳܐ: ܘܡ̣ܶܢ ܗܳܠܶܝܢ ܕܰܥܬܝ̣̈ܕܳܢ ܠܟܽܠܢܳܫ ܗܰܒ ܒܘ̣ܝܳܐܳܐ ܘܠܘ̣ܒܳܒܳܐ: ܘܰܡܣܰܝܒܪܳܢܘ̣ܬܳܐ ܘܰܡܚܰܡܣܢܳܢܘ̣ܬܳܐ ܕܰܒܚ̈ܰܫܶܐ ܘܥܳܩ̈ܳܬܳܐ ܒܬܰܪܥܝ̣ܬܳܐ ܛܳܒܬܳܐ ܘܡܰܠܝܰܬ݀ ܡܰܘܕܝܳܢܘ̣ܬܳܐ ܗܳܝ̇ ܕܥܳܕܪܳܐ ܘܦܳܩܚܳܐ ܠܚܰܝ̈ܶܐ ܕܰܠܥܳܠܰܡ: ܐܰܝܟܰܢܳܐ ܕܰܒܝܰܕ ܟܽܠܗܽܘܢ ܥܘ̣ܕܪ̈ܳܢܶܐ ܕܰܒܝܰܕ ܩܰܕܝ̣̈ܫܶܐ ܕܝ̣ܠܳܟ: ܕܠܰܢ ܘܰܠܟܽܠܶܗ ܥܳܠܡܳܐ ܡܫܰܟܶܢ ܐܰܢ̱ܬ: ܝܰܬܝ̣ܪܳܐܝ̣ܬ ܒܗܳܢܳܐ ܥܺܐܕܳܐ ܦܨܝ̣ܚܳܐ ܕܩܰܕܝ̣̈ܫܶܐ ܕܝ̣ܠܳܟ: ܘܡ̣ܶܢ ܟܽܠ ܬܶܬ̣ܩܰܠܰܣ ܘܬܶܬ̣ܗܰܕܰܪ ܘܬܶܬ̣ܪܰܡܪܰܡ ܥܰܡ ܐܰܒܳܐ ܕܪ̈ܰܚܡܶܐ: ܐܰܠܳܗܳܐ ܕܟܽܠܶܗ ܒܘ̣ܝܳܐܳܐ: ܘܪܘ̣ܚܳܐ ܕܝ̣ܠܳܟ ܩܰܕܝ̣ܫ ܒܟܽܠ: ܛܳܒܳܐ ܘܰܣܓܝ̣ܕܳܐ ܘܡܰܥܒܶܕ ܚܝ̈ܶܐ ܘܰܫ̇ܘܶܐ̣ ܠܳܟ ܒܐܘ̣ܣܺܝܰܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܡܳܪܝ̱ ܒܰܚܢܳܢܳܟ ܦܝ̣ܪܡܳܐ ܕܥܰܒܕܰܝ̈ܟ: ܕܩܰܪܶܒ̣ܢܰܢ ܩܕܳܡܰܝܟ ܒܝܘ̣ܡ ܥ̱ܘܗܕܳܢܳܐ ܕܝܳܠܶܕܬܳܟ: ܘܶܐܬܪܰܥܳܐ ܠܰܢ ܒܶܗ ܒܒܳܥ̈ܘܳܬܳܐ ܕܰܢܒܺܝ̈ܶܐ ܘܕܰܫܠܝ̣̈ܚܶܐ ܡܫܰܡ̈ܫܳܢܶܐ ܕܐ̱ܪ̈ܳܙܰܝܟ: ܘܶܐܫܬܰܝܰܢ ܠܰܢ ܒܰܨܠܘ̣ܬܳܐ ܕܣܳܗ̈ܕܶܐ ܘܰܕܡܰܘܕܝ̈ܳܢܶܐ: ܕܚܰܫ̣ܘ̱ ܡܶܛܽܠ ܫܡܳܟ ܩܰܕܝ̣ܫܳܐ: ܘܰܐܫܦܰܥ ܥܠܰܝܢ ܒܘ̣ܪ̈ܟܳܬܳܟ ܒܰܦܝܳܣܳܐ ܕܟܺܐܢ̈ܶܐ ܘܙܰܕܝ̣̈ܩܶܐ ܕܰܒܟܽܠ ܕܳܪ̈ܝ̣ܢ ܫܦ̣ܰܪܘ̱ ܠܳܟ: ܘܚܰܣܳܐ ܠܢܰܦ̈ܫܳܬܳܐ ܘܪ̈ܘ̣ܚܳܬܳܐ ܕܥܰܢܝ̣̈ܕܶܐ ܡܗܰܝܡ̈ܢܶܐ ܕܰܫܟ̣ܶܒܘ̱ ܥܰܠ ܣܰܒܪܳܟ: ܘܕܰܐܒܳܗ̈ܰܝܢ ܘܰܐܚܰܝ̈ܢ ܘܪ̈ܰܒܳܢܰܝܢ ܕܫܰܢܝ̣ܘ ܠܘܳܬܳܟ: ܘܰܐܢܝ̣ܚ ܐܶܢܽܘܢ ܒܰܡܛܰܠ̈ـܠܶܐ ܕܝ̣ܠܳܟ ܕܢܘ̣ܗܪܳܐ ܥܰܡ ܩܰܕܝ̣̈ܫܶܐ ܕܰܥܒ̣ܰܕܘ̱ ܨܶܒܝܳܢܳܟ ܕܰܐܟܚܕܳܐ ܫܰܘܝܳܐܝ̣ܬ ܢ̇ܫܰܒܚܳܟ ܘܰܢ̇ܪܰܡܪܡܳܟ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀