ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܓܰܘܙܶܠ ܠܰܢ ܒܢܘ̣ܪܳܐ ܡܶܫܬܰܠܗܒܳܢܝ̣ܬܳܐ ܕܚܘ̣ܒܳܟ ܡܳܪܝܳܐ: ܘܢܰܒܪܶܫ ܠܰܢ ܒܪܶܚܡܬܳܐ ܕܝ̣ܠܳܟ ܐܰܠܳܗܳܝ̇ܬܳܐ: ܐܰܝܟܰܢܳܐ ܕܕܰܟܝܳܐܝ̣ܬ ܘܦܰܐܝܘ̣ܬ ܩܰܕܝ̣ܫܳܐܝ̣ܬ ܢ̇ܫܰܡܠܶܐ ܥܺܐܕܳܐ ܘܢ̇ܶܥܒܶܕ ܥ̱ܘ̣ܗܕܳܢܳܐ ܕܝܳܠܶܕܬܳܟ ܒܬܘ̣ܠܬܳܐ ܩܰܕܝ̣ܫܬܳܐ ܡܰܪܝܰܡ: ܘܰܕܟܽܠܗܽܘܢ ܩܰܕܝ̣̈ܫܶܐ ܕܡ̣ܶܢ ܥܳܠܰܡ ܫܦ̣ܰܪܘ̱ ܠܳܟ: ܘܰܐܫܘܳܐ ܠܰܢ ܕܥܰܡܗܽܘܢ ܢ̇ܶܬܒܰܣܰܡ ܒܰܚܙܳܬܳܐ ܕܦܰܪܨܘ̣ܦܳܟ ܗܰܘ̇ ܠܳܐ ܡܶܣܬܰܒܥܳܢܳܐ ܒܡܰܠܟܘ̣ܬܳܐ ܕܝ̣ܠܳܟ ܫܡܰܝܳܢܝ̣ܬܳܐ: ܒܢܰܨܝ̣ܚܘ̣ܬܳܐ ܕܗܳܢܽܘܢ ܕܰܡܥܰܕܥܕܝ̣ܢ ܘܚܳܕܶܝܢ ܒܳܟ: ܚܢܰܢ ܘܥܰܢܝ̣̈ܕܰܝܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܝ̣ܬܝܳܐ ܡܬܘ̣ܡܳܝܳܐ ܕܶܐܬܝ̣ܠܶܕ ܡ̣ܶܢ ܐܶܡܳܐ ܒܬܘ̣ܠܬܳܐ ܡܰܪܝܰܡ ܡܶܛܽܠ ܦܘ̣ܪܩܳܢܳܐ ܕܝ̣ܠܰܢ: ܘܡܰܠܝ̣ ܢܒܺܝܰܘ̈ܳܬܳܐ ܕܰܢܒܺܝ̈ܶܐ ܒܕܶܢܚܶܗ ܘܫܰܡ̣ܠܝ̣ ܠܰܫܠܝ̣̈ܚܶܐ ܒܟܳܪܘ̣ܙܘ̣ܬܳܐ ܕܰܣܒܰܪܬܳܐ ܕܝ̣ܠܶܗ: ܘܢܰܨܰܚ ܠܣܳܗ̈ܕܶܐ ܒܚܰܫ̈ܶܐ ܕܡܶܛܽܠܳܬܶܗ: ܘܰܐܘܪܶܒ ܠܩܰܕܝ̣̈ܫܶܐ ܒܐܘ̣ܠ̈ܨܳܢܶܐ ܕܣܰܝܒ̣ܰܪܘ̱ ܡܶܛܽܠ ܫܡܶܗ: ܘܝܰܩ̣ܰܪ ܠܟܺܐܢ̈ܶܐ ܕܣܰܟܝ̣ܘ ܠܓܶܠܝܳܢܶܗ: ܘܠܰܐܝܠܶܝܢ ܕܰܫܟ̣ܶܒܘ̱ ܥܰܠ ܣܰܒܪܶܗ ܐܶܫܬ̣ܰܘܕܝ̣ ܢܘ̣ܚܳܡܳܐ ܘܒܘ̣ܣܳܡܳܐ ܒܡܰܠܟܘ̣ܬܶܗ: ܕܠܶܗ ܢ̇ܫܰܒܰܚ ܕܠܳܐ ܫܶܠܝܳܐ ܘܠܶܗ ܢ̇ܶܣܓܘ̣ܕ ܘܠܶܗ ܢ̇ܰܘܕܶܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܐܺܝ̣ܢ ܡܳܪܝܳܐ ܐܰܠܳܗܳܐ ܘܦܳܪܘ̣ܩܳܐ ܕܝ̣ܠܰܢ ܝܶܫܘ̣ܥ ܡܫܝ̣ܚܳܐ: ܒܳܥܶܝܢܰܢ ܘܡܶܬܟܰܫܦܝ̣ܢܰܢ ܠܳܟ ܒܫܘ̣ܒܚ̈ܶܐ ܫܦܰܝ̈ܳܐ ܕܡܰܠܰܐܟ̈ܶܐ: ܒܗܘ̣̈ܠܳܠܶܐ ܗܕܝ̣ܪ̈ܶܐ ܕܪ̈ܝ̣ܫܰܝ ܡܰܠܰܐܟ̈ܶܐ: ܒܩܝ̣̈ܢܳܬܳܐ ܬܰܩ̈ܢܶܐ ܕܪ̈ܝ̣ܫܳܢܘ̈ܳܬܳܐ: ܒܫܰܘܝܽܘ̣ܬܳܐ ܫܒܝ̣ܚܬܳܐ ܕܫܘ̣ܠ̈ܛܳܢܶܐ: ܒܰܩܒܝ̣ܥܘ̣ܬܳܐ ܡܫܰܪܰܪܬܳܐ ܕܡܰܘ̈ܬܒܶܐ: ܒܐܝ̣ܩܳܪܳܐ ܪܰܒܳܐ ܕܡܳܪ̈ܰܘܳܬܳܐ: ܒܙܰܘܚܳܐ ܕܚܝ̣ܠܳܐ ܕܚܰܝ̈ܠܰܘܳܬܳܐ: ܒܝܘ̣ܒܳܒܳܐ ܡܥܰܠܝܳܐ ܕܦܳܠܰܚ̈ܘܳܬܳܐ: ܒܒܘ̣ܪ̈ܟܳܬܳܐ ܪܰܘܪ̈ܒܳܬܳܐ ܕܰܟܪ̈ܘ̣ܒܶܐ ܒܩܘ̣̈ܕܳܫܶܐ ܫܦܰܝ̈ܳܐ ܕܰܣܪ̈ܳܦܶܐ: ܒܐ̱ܪ̈ܳܙܶܐ ܬܗܝ̣ܪ̈ܶܐ ܕܰܓܡܝ̣ܪ̈ܶܐ: ܒܛܘ̣̈ܦܣܶܐ ܘܦܶܠ̈ܐܴܬܳܐ ܕܟܺܐܢ̈ܶܐ: ܒܚܘ̣ܒܳܐ ܪܰܒܳܐ ܕܰܢܒܺܝ̈ܶܐ: ܒܫܪܳܪܳܐ ܡܥܰܠܝܳܐ ܕܰܫܠܝ̣̈ܚܶܐ: ܒܰܐܓܘ̣ܢܳܐ ܢܰܨܝ̣ܚܳܐ ܕܣܳܗ̈ܕܶܐ: ܒܰܕܡܳܐ ܙܰܟܳܝܳܐ ܕܡܰܘܕ̈ܝܳܢܶܐ: ܒܡܷ̈ܠܶܐ ܐܰܠܳܗܳܝ̈ܳܬܳܐ ܕܡܰܠ̈ܦܳܢܶܐ: ܒܩ̈ܳܠܶܐ ܥܰܙܝ̣̈ܙܶܐ ܕܟܳܪ̈ܘ̣ܙܶܐ: ܒܚܰܝܠܳܐ ܪܰܒܳܐ ܕܰܡܣܰܒܪ̈ܳܢܶܐ: ܒܕܰܟܝܽܘ̣ܬܳܐ ܡܨܰܠܰܠܬܳܐ ܕܰܒܬܘ̣̈ܠܶܐ: ܒܨܰܘܡܳܐ ܐܰܡܝ̣ܢܳܐ ܕܥܳܢܘ̈ܳܝܶܐ: ܒܕܶܡ̈ܥܶܐ ܚܢܝ̣̈ܓܳܬܳܐ ܕܬܰܝ̈ܳܒܶܐ: ܒܟܽܠܶܗ ܕܘ̣ܒܳܪܳܐ ܕܟܰܫܝ̣ܪ̈ܶܐ: ܒܰܦܝܳܣܳܐ ܒܰܣܝ̣ܡܳܐ ܕܰܢܙܝ̣ܪ̈ܶܐ: ܒܬܰܟܫ̈ܦܳܬܳܐ ܣܒܝ̣̈ܣܳܬܳܐ ܕܶܐܡܳܐ ܕܝ̣ܠܶܕܬܳܟ: ܒܒܳܥܘ̣ܬܳܐ ܪܰܒܬܳܐ ܕܝܽܘܚܰܢܳܢ ܡܰܥܡܕܳܢܳܟ: ܕܶܐܣܛܶܦܰܢܳܘܣ ܡܫܰܡܫܳܢܳܟ: ܘܟܽܠܳܗ̇ ܐܝ̣ܦܳܘܠܳܘܛܺܝܰܐ ܕܩܰܕܝ̣̈ܫܰܝܟ ܐܰܝܠܶܝܢ ܕܥ̱ܘ̣ܗܕܳܢܗܽܘܢ ܒܦܘ̣ܡܰܝ̈ܢ ܐܝ̣ܬܰܘܗ̱ܝ: ܘܒܰܨܠ̈ܰܘܳܬܗܽܘܢ ܕܩܰܕܝ̣̈ܫܰܝܟ ܐܶܬܪܰܥܳܐ ܠܰܢ: ܒܚܘ̣ܒܗܽܘܢ ܐܰܥܬܰܪ ܠܰܢ: ܘܰܕܢ̇ܶܪܕܶܐ ܒܥܶܩ̈ܒܳܬܗܽܘܢ ܗܰܒ ܠܰܢ: ܘܰܕܢ̇ܶܬܕܰܡܶܐ ܒܰܚܠܝ̣ܨܘ̣ܬܗܽܘܢ ܣܰܝܰܥ ܠܰܢ: ܘܰܕܢ̇ܶܫܦܰܪ ܠܨܶܒܝܳܢܳܟ ܐܰܟܘܳܬܗܽܘܢ ܫܰܟܶܢ ܠܰܢ: ܘܰܠܥܰܢܝ̣̈ܕܰܝܢ ܡܗܰܝ̈ܡܢܶܐ ܕܰܫܟ̣ܶܒܘ̱ ܘܰܦܛܰܪܘ̱ ܘܫܰܢܝ̣ܘ ܥܰܠ ܣܰܒܪܳܟ: ܒܣܶܕܪ̈ܝܗܽܘܢ ܕܗܳܠܶܝܢ ܚܠܘ̣ܛ ܠܰܢ: ܘܰܒܓܘ̣ܕܰܝ̈ܗܽܘܢ ܛܰܟܶܣ ܠܰܢ: ܘܒܰܡܛܰܠܝ̈ܗܽܘܢ ܚܰܕܳܐ ܠܰܢ: ܘܰܒܢܘ̣ܗܪܗܽܘܢ ܐܰܢܗܰܪ ܠܰܢ: ܘܰܒܫܘ̣ܒܚܗܽܘܢ ܐܰܦܨܰܚ ܠܰܢ: ܐܰܝܟܰܢܳܐ ܕܥܰܡܗܽܘܢ ܘܰܒܓܘ̣ܕܰܝ̈ܗܽܘܢ ܢܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܰܡ ܥܳܠܡܝ̣ܢ ܐܰܡܝ̣ܢ܀