ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܢܝ̣ܚ ܡܳܪܝܳܐ ܐܰܠܳܗܳܐ ܒܥܺܕܬܳܐ ܡܟܰܠܰܠܬܳܐ: ܘܒܰܓܢܘ̣ܢܳܟ ܪܘ̣ܚܳܢܳܝܳܐ ܘܰܡ̇ܠܶܐ̣ ܢܘ̣ܗܪܳܐ: ܘܥܰܠ ܡܰܕܒܚܳܟ ܪܳܡܳܐ ܘܰܡܠܝ̣ܠܳܐ ܗܰܘ̇ ܕܰܠܥܶܠ ܡ̣ܶܢ ܫܡܰܝܳܐ: ܠܦܳܠ̈ܚܶܐ ܕܝ̣ܠܳܟ ܫܰܦܝ̣ܪ̈ܰܝ ܙܳܟܘ̣ܬܳܐ: ܘܡܰܘܕ̈ܝܳܢܶܐ ܒܚܝ̣ܪ̈ܶܐ ܘܰܐܬܠܝ̣̈ܛܶܐ ܢܰܨܝ̣̈ܚܶܐ ܕܕܶܚܠܰܬ݀ ܐܰܠܳܗܳܐ: ܐܰܝܠܶܝܢ ܕܝܰܘܡܳܢܳܐ ܥ̱ܘ̣ܗܕܳܢܳܐ ܘܕܘ̣ܟܪܳܢܳܐ ܕܝ̣ܠܗܽܘܢ ܡܫܰܡܠܶܝܢܰܢ ܥܰܡ ܕܩܰܕܝ̣ܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ: ܘܰܠܟܶܢܫܰܢ ܒܰܪܶܟ ܘܢܰܛܰܪ ܒܝܰܕ ܨܠܰܘ̈ܳܬܳܐ ܚܰܣ̈ܝܳܬܳܐ ܘܩܰܕܝ̣̈ܫܳܬܳܐ: ܘܰܐܢܝ̣ܚ ܠܥܰܢܝ̣̈ܕܶܐ ܡܗܰܝܡ̈ܢܶܐ ܒܰܐܘ̈ܘܳܢܰܝܗܽܘܢ: ܕܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܳܐ ܡܶܬܦܰܣܩܳܢܝ̣ܬܳܐ ܘܬܰܘܕܝ̣ܬܳܐ ܠܳܐ ܡܶܫܬܰܬܩܳܢܝ̣ܬܳܐ: ܘܣܶܓܕܬܳܐ ܡܳܪܳܢܳܝܬܳܐ ܢ̇ܶܫܬܘܶܐ ܕܢ̇ܰܣܶܩ ܠܚܰܕ ܐܰܠܳܗܳܐ ܒܳܪܘ̣ܝܳܐ ܕܟܽܠ ܒܶܪ̈ܝܳܬܳܐ: ܕܰܨܒ̣ܳܐ ܒܚܘ̣ܒܶܗ ܕܢ̣ܶܦܪܘ̣ܩ ܨܰܠܡܶܗ ܡ̣ܶܢ ܐܝ̣̈ܕܰܝ ܣܳܛܳܢܳܐ ܕܳܒܘ̣ܪܶܗ: ܘܫ̣ܰܕܰܪ ܠܰܒܪܶܗ ܘܨܶܡܚܳܐ ܕܐܝ̣ܬܘ̣ܬܶܗ ܘܰܕܢܰܚ̣ ܡ̣ܶܢ ܥܘ̣ܒܳܗ̇ ܕܰܒܬܘ̣ܠܬܳܐ ܡܰܪܝܰܡ: ܘܫ̣ܰܪܰܪ ܠܡ̈ܶܠܶܐ ܕܰܢܒܺܝ̈ܶܐ ܕܶܐܬ̣ܢܰܒܝ̣ܘ ܡܶܛܽܠ ܝܰܘܡܳܐ ܕܡܶܐܬܝ̣ܬܶܗ: ܘܶܐܬܗ̣ܰܦܰܟ ܥܰܡܰܢ ܥܰܠ ܐܰܪܥܳܐ ܐܰܝܟ ܒܰܪܢܳܫܳܐ ܟܰܕ ܠܳܐ ܫܰܢܝ̣ ܡ̣ܶܢ ܬܪܘ̣ܢܘ̣ܣ ܕܐܝ̣ܩܳܪܶܗ: ܘܦܰܪܩ̣ܰܢ ܒܚܰܫ̈ܶܐ ܕܰܩܢܘ̣ܡܶܗ: ܘܩ̣ܳܡ ܡ̣ܶܢ ܩܰܒܪܳܐ ܒܚܝ̣ܠ ܐܰܠܳܗܘ̣ܬܶܗ: ܘܰܣܠ̣ܶܩ ܒܫܘ̣ܒܚܳܐ ܪܰܒܳܐ ܠܘܳܬ ܐܰܒܳܐ ܫܳܠܘ̣ܚܶܗ: ܘܫ̣ܰܕܰܪ ܠܰܫܠܝ̣ܚ̈ܰܘܗ̱ܝ ܠܰܐܪܒܰܥ ܦܶܢܝ̈ܳܢ ܕܰܢ̣ܣܰܒܪܽܘܢ ܥܰܠ ܦܘ̣ܪܩܳܢܶܗ: ܘܰܐܦܢܝ̣ܘ ܥܰܡ̱̈ܡܶܐ ܣܰܓܺܝ̈ܶܐܐ ܠܣܶܓܕܬܳܐ ܕܡܳܪܘ̣ܬܶܗ: ܠܳܟ ܡܳܪܝܳܐ ܡ̇ܠܶܐ̣ ܪ̈ܰܚܡܶܐ ܡܦܝ̣ܣܝ̣ܢܰܢ ܒܥܶܕܳܢܳܐ ܗܳܢܳܐ: ܐܰܝܟܰܢܳܐ ܕܒܰܨܠ̈ܰܘܳܬܳܐ ܕܰܢܒܺܝ̈ܶܐ ܕܶܐܬ̣ܢܰܒܝ̣ܘ ܥܰܠ ܝܰܠܕܳܟ: ܘܕܰܫܠܝ̣ܚ̈ܶܐ ܕܣܰܒ̣ܪܘ̱ ܢܘ̣ܚܳܡܳܟ ܘܰܕܣܳܗ̈ܕܶܐ ܕܶܐܬܩ̣ܰܛܰܠܘ̱ ܡܶܛܽܠ ܚܘ̣ܒܳܟ: ܘܕܶܐܡܳܐ ܒܬܘ̣ܠܬܳܐ ܡܰܪܝܰܡ ܕܝ̣ܠܶܕܬܳܟ ܐܰܫܦܰܥ ܪ̈ܰܚܡܰܝܟ ܥܠܰܝܢ ܘܥܰܠ ܟܽܠܗܽܘܢ ܐܰܝܠܶܝܢ ܕܫ̣ܶܐܠܘ̱ ܘܫܳܐܠܝ̣ܢ ܨܠܰܘ̈ܳܬܳܐ ܕܰܒܨܝ̣ܪܘ̣ܬܰܢ ܕܢ̣ܶܗܘܶܐ ܥ̱ܘ̣ܗܕܳܢܗܽܘܢ ܥܰܠ ܦܝ̣ܪܡܳܐ ܕܰܡܩܰܪܒܳܐ ܒܨܝ̣ܪܘ̣ܬܰܢ ܘܚܰܛܳܝܘ̣ܬܰܢ ܩܕܳܡܰܝܟ: ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܗܰܘ̇ ܕܝܰܩܝ̣ܪ ܒܥܰܝ̈ܢܰܝܟ ܡܰܘܬܳܐ ܕܙܰܕܝ̣̈ܩܰܝܟ: ܘܰܡܫܰܒܰܚ ܠܘܳܬܳܟ ܥ̱ܘ̣ܗܕܳܢܳܐ ܕܰܪ̈ܚܘ̣ܡܰܝܟ ܘܚܳܕܶܐ ܐܰܢ̱ܬ ܒܕܘ̣ܟܪܳܢܳܐ ܕܰܐܬܠܝ̣̈ܛܰܝܟ: ܘܰܪܓܝ̣ܓ ܐܰܢ̱ܬ ܕܰܢ̇ܦܝ̣ܣܳܟ ܒܡܰܘܬܳܐ ܕܰܡܢܝ̣̈ܚܳܢܶܐ ܕܝ̣ܠܳܟ: ܘܡܶܛܽܠ ܗܳܕܶܐ ܡܰܝܬܶܝܢܰܢ ܒܬܰܟܫ̈ܦܳܬܰܢ ܕܰܠܘܳܬܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܥ̱ܘ̣ܗܕܳܢܗܽܘܢ ܡܝܰܬܪܳܐ ܕܩܰܕܝ̣̈ܫܰܝܟ: ܠܶܐܡܳܐ ܡܰܢ ܡܒܰܪܰܟܬܳܐ ܒܬܘ̣ܠܬܳܐ ܩܰܕܝ̣ܫܬܳܐ ܡܰܪܝܰܡ ܗܳܝ̇ ܕܩܰܢܝܳܐ ܦܰܪܶܗܣܺܝܰܐ ܠܘܳܬܳܟ ܛܳܒ ܡ̣ܶܢ ܟܽܠܗܽܘܢ ܝ̣ܠܝ̣̈ܕܶܐ ܘܐܝ̣ܬ ܠܳܗ̇ ܟܝܳܢܳܐܝ̣ܬ ܡܫܰܘܬܳܦܘ̣ܬ ܚܰܫ̈ܶܐ ܡܶܛܽܠ ܕܡܶܢܳܗ̇ ܐܶܬܥ̣ܰܛܰܦܬ ܒܶܣܪܳܐ ܒܰܪ ܟܝܳܢܰܢ: ܡܰܥ̱ܗܕܝ̣ܢܰܢ ܬܘ̣ܒ ܠܟܽܠܗܽܘܢ ܐܰܒܳܗ̈ܳܬܳܐ ܩܰܕܝ̣̈ܫܶܐ ܗܳܢܽܘܢ ܕܶܐܬܪܰܓ̣ܪܰܓܘ̱ ܕܢ̣ܶܚܙܽܘܢ ܡܕܰܒܪܳܢܘ̣ܬܳܟ: ܟܺܐܢ̈ܶܐ ܘܙܰܕܝ̣̈ܩܶܐ ܕܶܐܬܓܡ̣ܰܪܘ̱ ܒܰܫܪܳܪܳܟ ܢܒܺܝ̈ܶܐ ܩܰܕܝ̣̈ܫܶܐ ܕܶܐܬ̣ܢܰܒܝ̣ܘ ܡܶܛܽܠܳܬܳܟ: ܚܰܙܳܝ̈ܶܐ ܬܗܝ̣ܪ̈ܶܐ ܕܒܰܕܶܩ̣ܘ̱ ܓܶܠܝܳܢܳܟ ܫܠܝ̣ܚ̈ܶܐ ܓܒܰܝ̈ܳܐ ܕܰܐܟ̣ܪܶܙܘ̱ ܣܒܰܪܬܳܐ ܕܦܘ̣ܩ̈ܕܳܢܰܝܟ: ܣܳܗ̈ܕܶܐ ܢܰܨܝ̣̈ܚܶܐ ܕܰܐܫܠ̣ܶܡܘ̱ ܦܰܓܪ̈ܰܝܗܽܘܢ ܠܫܶܢܕ̈ܶܐ ܡܫܰܚ̈ܠܦܶܐ ܡܶܛܽܠ ܚܘ̣ܒܳܟ: ܡܰܘܕ̈ܝܳܢܶܐ ܠܒܝ̣̈ܒܶܐ ܕܫܳܛܘ̣ܗ̱ܝ ܠܥܳܠܡܳܐ ܘܠܳܐ ܟܦ̣ܰܪܘ̱ ܒܳܟ ܡܰܠ̈ܦܳܢܶܐ ܒܚܝ̣ܪ̈ܶܐ ܘܩܳܝܘ̣̈ܡܶܐ ܕܥܺܕܬܳܐ ܕܰܐܢܗ̣ܰܪܘ̱ ܠܰܒܪܝ̣ܬܳܐ ܒܝܘ̣ܠ̈ܦܳܢܶܐ ܕܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ: ܝ̣ܚܝ̣̈ܕܳܝܶܐ ܘܥܳܢܘ̈ܳܝܶܐ ܕܰܙܩܰܦ̣ܘ̱ ܦܰܓܪ̈ܰܝܗܽܘܢ ܠܥܳܠܡܳܐ ܘܰܪܕܰܘ ܒܰܫܒܝ̣̈ܠܰܝܟ: ܘܰܢ̣ܛܰܪܘ̱ ܦܘ̣ܩ̈ܕܳܢܰܝܟ: ܒܬܘ̣̈ܠܶܐ ܘܰܢܙܝ̣ܪ̈ܶܐ ܕܗܰܠܶܟ̣ܘ̱ ܒܢܳܡ̈ܘ̣ܣܰܝܟ: ܕܰܝܪ̈ܳܝܶܐ ܓܡܝ̣ܪ̈ܶܐ ܕܰܛܥ̣ܶܢܘ̱ ܢܝ̣ܪܳܟ: ܘܫܰܡ̣ܠܝ̣ܘ ܦܘ̣ܩܕ̈ܳܢܰܝܟ: ܡܗܰܝܡ̈ܢܶܐ ܫܰܪ̈ܝ̣ܪܶܐ ܕܙܰܗܝܳܐܝ̣ܬ ܘܰܠܒܝ̣ܒܳܐܝ̣ܬ ܐܶܬܟܰܫ̣ܰܪܘ̱ ܩܕܳܡܰܝܟ: ܐܰܟܣ̈ܢܳܝܶܐ ܘܰܛܪ̈ܝ̣ܕܶܐ ܕܰܒܟܽܠ ܦܶܢܝ̈ܳܢ ܣܰܒ̣ܰܪܘ̱ ܒܰܫܡܳܟ: ܠܗܳܠܶܝܢ ܐܶܬܕܰܟܰܪ ܐܳܘ ܡܳܪܝܳܐ ܐܰܠܳܗܳܐ ܠܚܰܫܰܝ̈ܗܽܘܢ: ܐܶܬܥ̱ܰܗܰܕ ܐܳܘ ܡܪܰܚܡܳܢܳܐ: ܠܰܚܠܝ̣ܨܘ̣ܬܗܽܘܢ ܘܰܡܣܰܝܒܪܳܢܘ̣ܬܗܽܘܢ ܡܩܰܪܒܝ̣ܢܰܢ ܠܰܦܝܳܣܳܟ: ܒܗܳܝ ܕܰܚܢܰܢ ܕܳܘܝ̈ܳܢ ܘܒܰܗܝ̣̈ܬܳܢ ܐܰܦܰܝ̈ܢ ܡ̣ܶܢ ܪܰܒܘ̣ܬܳܐ ܕܥܰܘ̈ܠܰܝܢ ܕܰܢ̇ܦܝ̣ܣܳܟ: ܘܠܰܝܬ ܚܰܝܠܳܐ ܒܰܨܠܘ̣ܬܰܢ ܕܰܬ̣ܪܰܥܶܝܟ: ܒܰܨܠ̈ܰܘܳܬܳܐ ܕܗܳܠܶܝܢ ܡܶܬܓܰܘܣܝ̣ܢܰܢ: ܘܰܒܬܰܟܫ̈ܦܳܬܗܽܘܢ ܛܳܦܣܝ̣ܢܰܢ: ܘܒܳܥܶܝܢܰܢ ܘܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܕܠܰܢ ܚܰܛܳܝ̈ܶܐ ܫܰܟܶܢ ܪ̈ܰܚܡܶܐ ܘܰܚܢܳܢܳܐ: ܘܰܠܥܰܢܝ̣̈ܕܶܐ ܡܗܰܝܡ̈ܢܶܐ ܕܩܰܕܶܡ̣ܘ̱ ܫܟ̣ܶܒܘ̱ ܥܰܠ ܣܰܒܪܳܟ: ܥܒܶܕ ܠܗܽܘܢ ܥ̱ܘ̣ܗܕܳܢܳܐ ܘܕܘ̣ܟܪܳܢܳܐ ܛܳܒܳܐ ܘܫܰܟܶܢ ܢܝܳܚܳܐ ܘܒܘ̣ܣܳܡܳܐ: ܝ̣ܕܝ̣ܥܳܐܝ̣ܬ ܘܰܡܫܰܡܗܳܐܝ̣ܬ ܠܰܐܝܠܶܝܢ ܕܕܝ̣ܠܳܢܳܐܝ̣ܬ ܥܳܒܕܝ̣ܢܰܢ ܥ̱ܘ̣ܗܕܳܢܳܐ ܕܝ̣ܠܗܽܘܢ ܝܰܘܡܳܢܳܐ: ܗܰܒ ܠܗܽܘܢ ܒܛܰܝܒܘ̣ܬܳܟ ܡܳܪܝܳܐ ܢܝܳܚܬܳܐ ܡܰܠܝܰܬ݀ ܚܰܕ̈ܘܳܬܳܐ ܪ̈ܘ̣ܚܳܢܳܝܳܬܳܐ ܣܒܝ̣̈ܣܳܬ ܒܛܳܒ̈ܳܬܳܐ: ܡܰܪܓܫܳܢܘ̣ܬܳܐ ܒܕܶܒܚܬܳܐ ܚܰܝܬܳܐ ܘܰܡܠܝ̣ܠܬܳܐ ܕܡܶܛܽܠܳܬܗܽܘܢ ܡܶܬܩܰܪܒܳܐ: ܥܺܐܕܳܐ ܕܰܦܨܝ̣ܚܘ̣ܬܳܐ ܚܰܓܳܐ ܕܰܓܡܝ̣ܪ ܒܰܪܘܳܙܳܐ: ܫܳܪܘ̣ܬܳܐ ܪܚܝ̣ܡܬܳܐ ܕܰܒܦܳܬܘ̣ܪ ܡܰܠܟܘ̣ܬܳܐ ܛܘ̣ܒܬܳܢܝ̣ܬܳܐ: ܘܰܒܝܰܘܡܳܐ ܗܰܘ̇ ܕܗܳܘܝܳܐ ܒܶܗ ܡܶܐܬܝ̣ܬܳܟ ܬܪܰܝܳܢܝ̣ܬܳܐ ܢ̣ܶܦܩܽܘܢ ܠܐܘ̣ܪܥܳܟ ܒܰܐܦ̈ܶܐ ܓܰܠܝ̈ܳܬܳܐ: ܚܰܕܳܐ ܐܶܢܽܘܢ ܥܰܡ ܪ̈ܘ̣ܚܳܢܶܐ: ܢ̣ܕܘ̣ܨܽܘܢ ܥܰܡ ܐܶܡܪ̈ܶܐ ܝܰܡܝ̣̈ܢܳܝܶܐ: ܚܰܠܶܛ ܐܶܢܽܘܢ ܥܰܡ ܟܺܐܢ̈ܶܐ: ܛܰܟܶܣ ܐܶܢܽܘܢ ܥܰܡ ܙܰܕܝ̣̈ܩܶܐ: ܣܕܘ̣ܪ ܐܶܢܽܘܢ ܥܰܡ ܓܡܝ̣ܪ̈ܶܐ: ܐܰܠܘܶܬ ܐܶܢܽܘܢ ܥܰܡ ܓܘ̣̈ܕܶܐ ܕܰܢܒܺܝ̈ܶܐ: ܐܰܩܶܦ ܐܶܢܽܘܢ ܠܰܦܠܰܓܳܐ ܕܰܫܠܝ̣ܚ̈ܶܐ: ܐܰܣܡܶܟ ܐܶܢܽܘܢ ܥܰܠ ܦܳܬܘ̣ܪܳܐ ܕܛܘ̣̈ܒܶܐ: ܫܰܘܙܶܒ ܐܶܢܽܘܢ ܡܶܢ ܬܰܫܢܝ̣̈ܩܶܐ ܕܥܰܡ ܒܝ̣̈ܫܶܐ: ܦܰܨܳܐ ܐܶܢܽܘܢ ܡ̣ܶܢ ܢܘ̣ܪܳܐ ܕܰܓܙܝ̣ܡܳܐ ܠܪ̈ܰܫܝ̣ܥܶܐ: ܐܰܥܒܰܪ ܐܶܢܽܘܢ ܡ̣ܶܢ ܐܰܬܪܳܐ ܕܰܡ̇ܠܶܐ̣ ܕܽܘ̣ܘ̈ܳܢܶܐ: ܐܰܫܪܳܐ ܐܶܢܽܘܢ ܒܰܐܬܪܳܐ ܕܰܡܥܰܠܰܝ ܡ̣ܶܢ ܟܺܐܒ̈ܶܐ ܘܟܘ̣ܪ̈ܗܳܢܶܐ ܘܪ̈ܚܝ̣ܩܰܝ ܡ̣ܶܢ ܥܳܩ̈ܳܬܳܐ ܘܬܶܢܚ̈ܳܬܳܐ: ܗܰܒ ܠܗܽܘܢ ܝܘ̣ܪܬܳܢܳܐ ܒܰܐܪܥܳܐ ܕܛܳܒ̈ܳܬܳܐ ܘܰܒܓܰܢܬܳܐ ܗܳܝ̇ ܕܓܶܐܘ̈ܳܬܳܐ: ܕܬܰܡܳܢ ܚܢܰܢ ܘܗܶܢܽܘܢ ܘܟܽܠܗܽܘܢ ܐܰܝܠܶܝܢ ܕܰܐܘܕܝ̣ܘ ܒܚܰܫܰܝ̈ܟ ܡܰܚ̈ܝܳܢܶܐ ܘܰܣܓ̣ܶܕܘ̱ ܠܰܨܠܝ̣ܒܳܟ ܦܳܪܘ̣ܩܳܝܳܐ ܬܶܫܒ̈ܚܳܬܳܐ ܐܰܡܝ̣̈ܢܳܬܳܐ ܘܬܰܘܕ̈ܝܳܬܳܐ ܕܠܳܐ ܫܶܠܝܳܐ ܢ̇ܶܫܬܘܶܐ ܕܢ̇ܰܣܶܩ ܠܳܟ ܘܒܐܝ̣̈ܕܰܝܟ ܘܥܰܡܳܟ ܠܰܐܒܘ̣ܟ ܕܫܰܠܚ̣ܳܟ ܠܦܘ̣ܪܩܳܢܰܢ: ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܺܝ̣ܪܡܳܐ

ܡܳܪܳܐ ܕܩܰܕ̈ܡܳܝܶܐ ܘܣܰܒܪܳܐ ܕܡܶܨ̈ܥܳܝܶܐ ܘܣܘ̣ܟܳܝܳܐ ܕܰܐ̱ܚܪ̈ܳܝܶܐ: ܕܩܰܕܡ̈ܳܝܶܐ ܣܰܟܝ̣ܘ ܠܓܶܠܝܳܢܶܗ ܘܠܳܐ ܚ̣ܙܰܐܘܽܗ̱ܝ: ܘܡܶܨ̈ܥܳܝܶܐ ܣܰܒ̣ܪܘ̣ܗ̱ܝ ܟܰܕ ܠܳܐ ܝܰܕܥܘ̣ܗ̱ܝ: ܘܰܐ̱ܚܪ̈ܳܝܶܐ ܐܰܟ̣ܪܙܘ̣ܗ̱ܝ ܘܰܠܟܽܠܳܗ̇ ܒܪܝ̣ܬܳܐ ܫܰܘܕܥܘ̣ܗ̱ܝ: ܐܰܫܘܳܐ ܠܰܢ ܕܥܰܡ ܪ̈ܝ̣ܫܰܝ ܐܰܒܳܗ̈ܳܬܳܐ ܢ̇ܶܚܙܶܝܟ: ܘܥܰܡ ܢܒܺܝ̈ܶܐ ܩܰܕܝ̣̈ܫܶܐ ܢ̇ܣܰܟܶܐ ܠܓܶܠܝܳܢܳܟ: ܘܥܰܡ ܫܠܝ̣̈ܚܶܐ ܓܒܰܝ̈ܳܐ ܢ̇ܩܰܒܠܳܟ: ܘܥܰܡ ܣܳܗ̈ܕܶܐ ܢܰܨܝ̣̈ܚܶܐ ܢ̇ܰܘܕܶܐ ܒܳܟ: ܘܥܰܡ ܩܰܕܝ̣̈ܫܶܐ ܕܰܫܦ̣ܰܪܘ̱ ܠܳܟ ܢ̇ܶܦܘ̣ܩ ܠܐܘ̣ܪܥܳܟ: ܘܰܒܓܘ̣ܕܰܝ̈ܗܽܘܢ ܢ̇ܶܙܡܰܪ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀