ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܗܰܒܠܰܢ ܡܳܪܝܳܐ ܐܰܠܳܗܳܐ ܕܢ̇ܶܬܟܰܫܰܪ ܒܦܘ̣ܠܚܳܢ ܨܰܘܡܳܐ ܩܰܕܝ̣ܫܳܐ: ܥܰܡ ܕܰܟܝܘ̣ܬܳܐ ܕܢܰܦܫܳܐ ܘܰܕܦܰܓܪܳܐ ܘܩܰܕܝ̣ܫܘ̣ܬܳܐ ܕܚܘ̣̈ܫܳܒܶܐ: ܘܰܒܬܶܫܒ̈ܚܳܬܳܐ ܕܝ̣ܠܳܟ ܢ̇ܶܬܶܐܡܶܢ: ܘܢܶܫ̇ܬܘܶܐ ܠܰܐܓܪܳܐ ܡܫܰܡܠܝܳܐ: ܥܰܡ ܗܳܢܽܘܢ ܕܦܰܠ̣ܚܘ̣ܟ ܙܰܗܝܳܐܝ̣ܬ: ܘܰܐܘܕܝ̣ܘ ܒܰܐܠܳܗܘ̣ܬܳܟ ܬܪܝ̣ܨܳܐܝ̣ܬ: ܘܫܰܡ̣ܶܫܘ̱ ܐ̱ܪ̈ܳܙܰܝܟ ܕܰܟܝܳܐܝ̣ܬ: ܫܰܢܝ̣ܘ ܠܡܰܠܟܘ̣ܬܳܟ ܓܡܝ̣ܪܳܐܝ̣ܬ: ܕܥܰܡܗܽܘܢ ܐܰܫܘܳܐ ܠܰܢ ܕܰܢ̇ܫܰܒܚܳܟ ܐܰܡܝ̣ܢܳܐܝ̣ܬ ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝܫܳܐ ܚܰܕ ܐܰܠܳܗܳܐ ܫܰܪܝ̣ܪܳܐ ܐܰܡܝ̣ܢ܀

ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܫܶܡܫܳܐ ܕܙܰܕܝ̣ܩܘ̣ܬܳܐ ܕܰܕܢܰܚ̣ ܒܶܝܬ ܚܶܫܘ̣̈ܟܶܐ ܘܰܐܢܗ̣ܰܪ ܐܶܢܽܘܢ ܘܗܰܠ̣ܶܟ ܥܰܡ ܡܶܣ̈ܟܺܢܶܐ ܘܫܰܚ̣ܠܶܦ ܐܶܢܽܘܢ: ܘܡ̣ܶܢ ܡܡܰܚܰܝ̈ܳܐ ܐܶܬ̣ܠܒܶܟ ܘܰܐܚܠ̣ܶܡ ܐܶܢܽܘܢ: ܘܐܶܬ̣ܗܰܦܰܟ ܥܰܡ ܚܰܛܳܝ̈ܶܐ ܘܛܰܡ̈ܶܐܐ ܘܩ̣ܰܕܶܫ ܐܶܢܽܘܢ: ܠܗܰܘ̇ ܙܳܝܘ̣ܢܳܐ ܕܥܳܠ̈ܡܶܐ ܕܡ̣ܶܢ ܠܰܚ̈ܡܶܐ ܙܥܘ̣ܪ̈ܶܐ ܐܰܠܦ̈ܶܐ ܣܰܓܺܝ̈ܶܐܐ ܣܰܒ̣ܰܥ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰ‌ܠܳܗܳܐ ܗܰܘ̇ ܡܪܰܚܡܳܢܳܐ ܘܰܡܪܰܚܦܳܢܳܐ ܢܓܝ̣ܪ ܪܘ̣ܚܳܐ ܘܣܰܓܝ̣ ܛܰܝܒܘ̣ܬܳܐ ܘܩܘ̣ܫܬܳܐ: ܗܰܘ̇ ܕܠܳܐ ܨܳܒܶܐ ܐܰܢ̱ܬ ܒܡܰܘܬܶܗ ܕܚܰܛܳܝܳܐ ܐܰܝܟ ܗܳܝ ܕܰܢ̣ܬܘܽܒ ܘܢ̣ܺܚܶܐ: ܐܰܒܳܐ ܡܪܰܚܡܳܢܳܐ ܕܰܫܒܰܩ̣ܬ ܠܥܰܡ̱̈ܡܶܐ ܚܛܳܗܰܝ̈ܗܽܘܢ: ܘܶܐܬܪܰܚܰܡ̣ܬ ܥܰܠ ܡܰܪܝܰܡ ܚܳܬܶܗ ܕܡܘ̣ܫܶܐ ܘܦܰܨܝ̣ܬ ܠܪܳܚܳܒ ܕܛܰܫ̣ܝܰܬ݀ ܠܓܳܫܘ̣̈ܫܶܐ: ܘܰܦܪܰܩ̣ܬ ܠܰܡܢܰܫܶܐ ܕܰܒܥ̣ܳܐ ܡܶܢܳܟ ܘܰܫܒܰܩ̣ܬ ܠܕܰܘܝ̣ܕ ܡܰܠܟܳܐ ܕܰܐܘܕܝ̣ ܒܣܰܟܠܘ̣ܬܶܗ: ܪܳܥܝܳܐ ܕܰܢܦ̣ܰܩ ܒܰܒܥܳܬܶܗ ܕܥܶܪܒܳܐ ܛܳܥܝܳܐ: ܐܰ‌ܠܳܗܳܐ ܕܰܐܪܟܢܘ̣ܗ̱ܝ ܪ̈ܰܚܡܰܘܗ̱ܝ ܡܶܛܽܠ ܡܰܪ̈ܳܚܶܐ: ܡܪܰܝܡܳܐ ܕܶܐܬ̣ܬܰܚܬܝ̣ ܡ̣ܶܢ ܡܪ̈ܰܘܡܶܐ ܥܶܠܳܝ̈ܶܐ ܒܳܬܰܪ ܓܒܝ̣ܠܬܶܗ ܕܠܳܐ ܬ̣ܶܛܒܰܥܝ̱: ܒܰܣܝ̣ܡܳܐ ܕܶܐܬܳܐ ܕܢ̣ܶܩܪܶܐ ܠܚܰܛܳܝ̈ܶܐ ܠܰܬܝܳܒܘ̣ܬܳܐ: ܛܳܒܳܐ ܕܝܰܗ̣ܒ ܫܘ̣ܒܩܳܢܳܐ ܠܙܰܟܰܝ ܡܳܟܣܳܐ ܘܰܠܙܳܢܝ̣ܬܳܐ ܘܰܠܓܰܝܳܣܳܐ ܒܥܶܕܳܢܳܐ ܙܥܘ̣ܪܳܐ ܕܰܒܥ̣ܰܘ ܡܶܢܳܟ: ܘܰܫܒܰܩ̣ܬ ܠܚܰܛܳܝܬܳܐ ܛܰܡܰܐܬܳܐ ܕܶܐܬ̣ܩܰܪܒܰܬ݀ ܠܳܟ: ܠܰܐܝܢܳܐ ܕܠܳܐ ܡܰܡܪܚܝ̣ܢ ܟܪ̈ܘ̣ܒܶܐ ܐܳܦܠܳܐ ܣܪ̈ܳܦܶܐ ܕܢ̣ܶܬܩܰܪܒܽܘܢ ܠܶܗ: ܘܰܫܒ̣ܰܩ ܠܳܗ̇ ܝܰܡܳܐ ܕܰܚܛܳܗ̈ܶܐ: ܐܝ̣ܢ ܡܳܪܰܢ ܠܳܐ ܢ̣ܶܙܟܽܘܢ ܚܰܘ̈ܒܰܝܢ ܠܪ̈ܰܚܡܰܝܟ ܡܶܛܽܠ ܕܰܚܢܰܢ ܚ̣ܛܰܝܢܰܢ ܐܰܝܟ ܒܢܰܝ̈ܢܳܫܳܐ ܘܰܐܪܫܰܥ̣ܢܰܢ ܐܰܝܟ ܥܰܦܪ̈ܳܢܶܐ ܘܶܐܫ̣ܬܰܥܠܝ̣ܢܰܢ ܐܰܝܟ ܓܒܝ̣̈ܠܶܐ: ܫܒܘ̣ܩ ܐܰܢ̱ܬ ܐܰܝܟ ܐܰ‌ܠܳܗܳܐ: ܚܰܣܳܐ ܠܰܢ ܐܰܝܟ ܪܘ̣ܚܳܢܳܐ ܩܰܕܶܫ ܠܰܢ ܐܰܝܟ ܫܡܰܝܳܢܳܐ ܚܽܘܢ ܠܰܢ ܐܰܝܟ ܥܳܒܘ̣ܕܳܐ ܘܰܒܥܝ̣ ܠܰܢ ܐܰܝܟ ܪܳܥܝܳܐ ܛܳܒܳܐ: ܡܳܪܰܢ ܐܶܬ̣ܪܰܚܰܡܥܠܰܝܢ ܚ̣ܛܰܝܢܰܢ ܒܰܫܡܰܝܳܐ ܘܰܩܕܳܡܰܝܟ ܘܠܳܐ ܫܳܘܶܝܢܰܢ ܕܰܒ̈ܢܰܝܳܐ ܕܝ̣ܠܳܟ ܢ̇ܶܬܩܪܶܐ ܘܰܐܪܓ̣ܶܙܢܳܟ ܒܣܘ̣ܥܪ̈ܳܢܰܝܢ ܒܝ̣̈ܫܶܐ: ܫܰܪܝ̣ܪܳܐܝ̣ܬ ܚ̣ܛܰܝܢܰܢ ܘܠܳܐ ܐܰܗܢܝ̣ܢ ܠܢܰܦܫܰܢ ܡܶܕܶܡ ܢܦܰܠ̣ܢܰܢ ܡ̣ܶܢ ܕܰܪܓܳܐ ܕܺܐܝܩܳܪܳܐ ܘܰܐܘܒ̣ܶܕܢܰܢ ܟܠܝ̣ܠܳܐ ܕܬܶܫܒܘ̣ܚܬܳܐ: ܢܦ̣ܰܠ ܥܠܰܝܢ ܚܶܘܝܳܐ ܢܟܝ̣ܠܳܐ ܘܰܐܫܠ̣ܰܚ ܠܰܢ ܢܰܚ̈ܬܶܐ ܕܟܳܗܢܘ̣ܬܳܐ ܘܥܰܒ̣ܕܰܢ ܚܶܣܕܳܐ ܘܡܘ̣ܝܳܩܳܐ: ܠܳܐ ܬ̣ܶܟܦܘ̣ܪ ܒܰܢ ܐܰ‌ܠܳܗܳܐ ܘܠܳܐ ܬܶܣܚܘ̣ܦ ܠܰܢ ܠܥܳܠܰܡ: ܠܳܐ ܬ̣ܶܕܚܘ̣ܩ ܠܰܢ ܡܳܪܝܳܐ܇ ܘܠܳܐ ܢ̣ܶܫܬܡܰܥ ܡܶܢܰܢ ܒܶܟܝܳܐ ܘܚܘ̣ܪܳܩ ܫܶܢ̈ܶܐ ܐܶܠܳܐ ܐܰܫܘܳܐ ܠܰܢ ܕܡ̣ܶܢ ܣܶܡܳܠܳܐ ܨܶܝܕ ܝܰܡܝ̣ܢܳܐ ܢ̇ܶܫܬܰܘܫܰܛ: ܘܥܰܡ ܚܰܛܳܝ̈ܶܐ ܕܬܳܒ̣ܘ̱ ܘܡܳܟ̈ܣܶܐ ܕܶܐܙܕܰܕܰܩ̣ܘ̱ ܘܓܰܝܳܣܳܐ ܕܰܐܘܕܝ̣ ܒܳܟ ܘܗܰܝܡ̣ܶܢ ܘܰܠܦܰܪܕܰܝܣܳܐ ܫ̣ܘܳܐ: ܐܳܦ ܠܥܰܒ̈ܕܰܝܟ ܕܰܪܟܝ̣ܢܝ̣ܢ ܩܕܳܡܰܝܟ ܐܰܫܘܳܐ ܐܶܢܽܘܢ ܕܰܢ̣ܩܰܒܠܽܘܢ ܫܘ̣ܒܩܳܢܳܐ ܕܰܚܛܳܗ̈ܶܐ ܘܚܘ̣ܣܳܝܳܐ ܕܚܰܘ̈ܒܶܐ: ܘܪ̈ܰܚܡܶܐ ܫܦܝ̣̈ܥܶܐ ܕܛܰܝܒܘ̣ܬܳܟ ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܒܟܽܠܙܒܰܢ ܠܥܳܠܡܝܺܢ܀

ܥܶܛܪܳܐ

ܒܳܪܽܘ̣ܝܶܗ ܕܨܰܦܪܳܐ: ܘܰܡܛܰܠܩܳܢܶܗ ܕܚܶܫܘ̣ܟܳܐ ܘܡܰܢܗܪܳܢܳܐ ܘܡܰܦܨܚܳܢܳܐ ܕܒܶܪ̈ܝܳܬܳܐ: ܒܪܝ̣ ܒܰܢ ܡܳܪܝ̱ ܕܘ̣ܒܳܪ̈ܶܐ ܕܢܘ̣ܗܪܳܐ ܘܛܰܠܶܩ ܡ̣ܶܢ ܢܰܦ̈ܫܳܬܰܢ ܠܚܶܫܘ̣ܟܘ̣ܬܳܐ ܕܰܚܛܝ̣ܬܳܐ: ܘܰܐܢܗܰܪ ܘܰܐܦܨܰܚ ܠܰܢ ܒܙܰܠܝ̣̈ܩܶܐ ܫܒܝ̣̈ܚܶܐ ܕܛܰܝܒܘ̣ܬܳܟ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀