ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܡܰܟܺܝ̣ܟܽܘ̣ܬܳܐ ܘܢܺܝ̣ܚܽܘ̣ܬܳܐ ܘܪ̈ܰܚܡܶܐ ܘܪܘ̣ܚܳܦܳܐ: ܘܟܽܠ ܣܘ̣ܟܳܠܳܐ ܕܪܘ̣ܚ: ܐܰܥܒܶܕ ܒܢܰܦ̈ܫܳܬܰܢ ܒܥܶܕܳܢܳܐ ܗܳܢܳܐ ܕܪܰܡܫܳܐ: ܡܳܪܝܳܐ ܢܓܝ̣ܪ ܪܘ̣ܚܳܐ ܘܝܳܗܘ̣ܒܳܐ ܕܒܰܣܝ̣ܡܘ̣ܬܳܐ: ܘܡܰܢܰܥ ܠܰܢ ܠܨܰܦܪܳܟ ܒܚܰܕܘ̣ܬܳܐ ܕܰܢ̇ܩܰܕܶܡ ܐܰܦ̈ܰܝܟ ܒܬܰܘܕܝ̣ܬܳܐ: ܘܰܢ̇ܙܰܡܰܪ ܠܳܟ ܬܶܫܒ̈ܚܳܬܳܐ ܩܰܕܝ̣̈ܫܳܬܳܐ: ܐܰܒܳܐ ܘܰܒܪܳܐ ܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܪܳܥܝܳܐ ܛܳܒܳܐ ܘܡܶܫܟܚܳܢܳܐ ܕܰܐܒܝ̣̈ܕܶܐ: ܠܗܰܘ̇ ܕܥܳܢܶܐ ܠܥܰܒ̈ܕܰܘܗ̱ܝ ܕܩܳܪܶܝܢ ܠܶܗ ܒܙܰܒ̈ܢܶܐ ܕܐܘ̣ܠܨܳܢܳܐ: ܘܥܰܕܰܪ ܠܰܢ ܒܝܰܘܡܳܐ ܗܳܢܳܐ ܕܩܳܪܶܝܢܰܢ ܠܳܟ: ܘܫܰܕܰܪ ܠܰܢ ܦܘ̣ܪܩܳܢܳܐ ܡܫܰܡܠܝܳܐ ܡ̣ܶܢ ܫܡܰܝܳܐ ܕܩܘ̣̈ܕܫܰܝܟ ܠܫܘ̣ܡܠܳܝܳܐ ܕܨܶܒܝܳܢܳܟ: ܘܠܰܢܝܳܚܳܐ ܕܰܐܠܳܗܘ̣ܬܳܟ: ܘܫܘ̣ܒܚܳܐ ܘܺܐܝܩܳܪܳܐ ܢܰܣܶܩ ܠܳܟ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰ‌ܠܳܗܳܐ ܕܝ̣ܠܰܢ ܚܰܢܳܢܳܐ ܘܣܰܓܝ̣ ܪ̈ܰܚܡܶܐ: ܡܰܠܟܳܐ ܕܰܬܪ̈ܰܝܗܽܘܢ ܥܳܠ̈ܡܶܐ ܓܳܒܘ̣ܠܶܗ ܕܳܐܕܳܡ ܡ̣ܶܢ ܥܰܦܪܳܐ: ܡܫܰܢܝܳܢܶܗ ܕܰܚܢܘ̣ܟ ܡ̣ܶܢ ܡܰܘܬܳܐ ܠܚܰܝ̈ܶܐ: ܡܝܰܩܪܳܢܶܗ ܕܢܘ̣ܚ ܒܟܶܘܶܝܠܳܐ ܐܰ‌ܠܳܗܳܐ ܕܰܐܣ̣ܓܝ̣ ܙܰܪܥܶܗ ܕܰܐܒܪܳܗܳܡ: ܘܚ̣ܰܕܝ̣ ܠܝܰܘܣܶܦ ܒܒܘ̣ܪ̈ܟܳܬܶܗ ܕܝܰܥܩܘ̣ܒ ܡܪܰܒܝܳܢܶܗ ܕܡܘ̣ܫܶܐ: ܡܟܰܠܠܳܢܳܐ ܕܣܳܗ̈ܕܶܐ ܡܥܰܕܪܳܢܳܐ ܕܙܰܕܝ̣̈ܩܶܐ ܝܳܗܘ̣ܒܳܐ ܕܛܳܒ̈ܳܬܳܐ: ܥܛܝ̣ܦ ܙܝ̣ܘܳܐ ܘܥܳܡܰܪ ܒܢܘܽܗܪܳܐ ܬܰܩܝ̣ܦܳܐ ܘܰܡܫܰܒܚܳܐ: ܚܰܢܳܢܳܐ ܘܒܰܣܝ̣ܡܳܐ ܫܳܡܰܥ ܠܰܕܩܳܪܶܝܢ ܠܶܗ: ܚܳܐܶܢ ܠܰܐܝܠܶܝܢ ܕܦܳܢܶܝܢ ܠܘܳܬܶܗ: ܓܥ̣ܳܐ ܠܘܳܬܳܟ ܕܡܶܗ ܕܗܳܒܝ̣ܠ ܡ̣ܶܢ ܐܰܪܥܳܐ ܘܰܥܢ̣ܰܝܬܳܝܗ̱ܝ: ܩ̣ܪܳܟ ܐܝ̣ܣܚܳܩ ܒܰܐܣܘ̣ܪ̈ܰܘܗ̱ܝ ܘܝܰܗ̣ܒܬ ܐܶܡܪܳܐ ܚܠܳܦܰܘܗ̱ܝ: ܩ̣ܪܳܟ ܓܶܕܥܽܘܢ ܒܰܩܪܳܒܳܐ ܘܦ̣ܰܨܝ̣ܬܳܝܗ̱ܝ ܡ̣ܶܢ ܪ̈ܳܕܘ̣ܦܰܘܗ̱ܝ: ܩ̣ܪܳܟ ܐܽܝܘ̣ܒ ܒܟܘ̣ܪ̈ܗܳܢܰܘܗ̱ܝ ܘܩܰܒܶܠ̣ܬ ܒܳܥܘ̣ܬܶܗ: ܩ̣ܪܰܐܘܽܘܟ ܕܒܶܝܬ ܚܰܢܰܢܝܳܐ ܒܰܐܬܘ̣ܢܳܐ ܘܫܰܘܶܙܒ̣ܬ ܐܶܢܽܘܢ ܡ̣ܶܢ ܢܘ̣ܪܳܐ ܝܳܩܶܕܬܳܐ: ܩ̣ܪܳܟ ܦܶܛܪܘ̣ܣ ܘܦܰܘܠܠܳܘܣ ܘܰܫ̣ܪܰܝܬ ܐܶܢܽܘܢ ܡܶܢܗܽܘܢ ܠܫܝ̣̈ܫܠܳܬܳܐ ܕܰܦܟܳܪ̈ܰܝܗܽܘܢ: ܐܰܢ̱ܬ ܗ̱ܘ̣ ܐܰ‌ܠܳܗܳܐ ܕܗܳܠܶܝܢ ܟܽܠܗܶܝܢ ܣܥ̣ܰܪܬ ܘܰܐܡܝ̣ܢܳܐܝ̣ܬ ܥܳܒܶܕ ܐܰܢ̱ܬ : ܐܰܢ̱ܬ ܫܰܚ̣ܠܶܦܬ ܡܰܝ̈ܳܐ ܠܚܰܡܪܳܐ ܛܳܒܳܐ ܘܠܰܙܡܝ̣̈ܢܶܐ ܐܰܦܨܰܚ̣ܬ: ܐܰܢ̱ܬ ܐܰܚܝ̣ܬ ܠܰܒܪܳܗ̇ ܕܰܐܪܡܰܠܬܳܐ ܘܝܰܗ̣ܒܬܳܝܗ̱ܝ ܠܶܐܡܶܗ: ܐܰܢ̱ܬ ܐܰܩܝ̣ܡܬ ܠܠܳܥܳܙܳܪ ܡ̣ܶܢ ܩܰܒܪܳܐ ܐܰܢ̱ܬ ܣܰܝܒ̣ܰܪܬ ܚܰܫ̈ܶܐ ܡܶܛܽܠܳܬܰܢ: ܐܰܢ̱ܬ ܢܚ̣ܶܬܬ ܠܓܰܘ ܩܰܒܪܳܐ ܡܶܛܽܠ ܦܘ̣ܪܩܳܢܰܢ ܘܰܒܝܰܘܡܳܐ ܬܠܝ̣ܬܳܝܳܐ ܩܳܡ̣ܬ: ܘܰܠܘܳܬ ܐܰܒܘ̣ܟ ܣܠܶܩ̣ܬ ܒܬܶܫܒܘ̣ܚܬܳܐ ܘܗܳܐ ܥܺܕܬܳܟ ܓܳܥܝܳܐ ܠܘܳܬܳܟ ܘܡܰܪܥܝ̣ܬܳܟ ܣܳܓܕܳܐ ܩܕܳܡܰܝܟ: ܟܳܗ̈ܢܶܐ ܘܰܡܫܰܡ̈ܫܳܢܶܐ ܡܣܰܟܶܝܢ ܠܣܰܒܪܳܟ ܚܣܰܝ̈ܳܐ ܒܕܘ̣ܒܳܪ̈ܰܝܗܽܘܢ ܡܫܰܘ̈ܬܦܶܐ ܒܩܘ̣ܕܳܫܰܝ̈ܗܽܘܢ: ܒܬܘ̣̈ܠܶܐ ܒܕܰܟܝܘ̣ܬܗܽܘܢ ܘܥܰܬܝ̣ܪ̈ܶܐ ܒܙܶܕ̈ܩܳܬܗܽܘܢ: ܘܰܐܪ̈ܡܠܳܬܳܐ ܒܕܶܡ̈ܥܰܝܗܶܝܢ ܡܶܣ̈ܟܺܢܶܐ ܒܚܰܣܝ̣ܪܘ̣ܬܗܽܘܢ ܚܘ̣ܪ ܒܗܽܘܢ ܚܰܒܝ̣ܒܳܐܝ̣ܬ: ܘܢܰܛܰܪ ܐܶܢܽܘܢ ܡܫܰܡܠܝܳܐܝ̣ܬ ܐܰܦܢܳܐ ܐܶܢܽܘܢ ܠܘܳܬܳܟ ܘܰܐܦܨܰܚ ܠܶܒܰܘ̈ܳܬܗܽܘܢ ܕܰܟܡܝ̣ܪܝ̣ܢ ܗ̱ܘܰܘ: ܠܳܟ ܣܳܓ̇ܕܝ̣ܢ ܚܰܝ̈ܠܰܘܳܬܳܐ ܥܶܠܳܝ̈ܶܐ: ܠܳܟ ܣܳܓ̇ܕܝ̣ܢ ܝܰܠ̈ܕܶܝܗ̇ ܕܰܐܪܥܳܐ ܘܰܒܢܶܝ̈ܗ̇ ܕܥܺܕܬܳܐ ܩܰܕܝ̣ܫܬܳܐ: ܕܝ̣ܠܳܟ ܗ̱ܘ̣ ܐܝ̣ܡܳܡܳܐ ܘܕܝ̣ܠܳܟ ܗ̱ܘ̣ ܠܶܠܝܳܐ ܘܨܰܦܪܳܐ ܦܨܝ̣ܚܳܐ ܕܠܳܐ ܡܰܕܪܶܟ ܠܶܗ ܪܰܡܫܳܐ: ܠܳܟ ܣܓ̣ܶܕ ܝܰܘܢܳܢ ܒܰܡܥ̈ܰܝ ܢܽܘܢܳܐ ܒܠܶܒܶܗ ܕܝܰܡܳܐ ܟܰܕ ܨܠܘ̣ܬܶܗ ܨܘ̣ܪܬܳܐ ܨܳܝ̇ܪܳܐ ܗ̱ܘܳܬ݀ ܕܰܬܠܳܬܳܐ ܐܝ̣ܡܳܡ̈ܝ̣ܢ ܘܰܬܠܳܬܳܐ ܠܰܝ̈ܠܰܘܳܢ: ܟܡܳܐ ܦܰܐܝܳܐ ܨܠܘ̣ܬܳܐ ܕܡ̣ܶܢ ܠܶܒܶܗ ܕܝܰܡܳܐ ܣܳܠ̇ܩܳܐ ܘܡܳܛܝܳܐ ܠܰܫܡܰܝܳܐ: ܠܳܟ ܣܓ̥ܶܕ ܢܘ̣ܚ ܒܓܰܘ ܟܶܐܘܶܝܠܳܐ ܟܰܕ ܐܰܚܝ̣ܕܝ̣ܢ ܬܰܪ̈ܥܶܝܗ̇ ܘܰܡܒܰܠܛܝ̣ܢ ܣܘ̣ܟܪ̈ܶܝܗ̇: ܗܰܘܢܳܐ ܢܦܝ̣ܚ ܡ̣ܶܢ ܐܰ‌ܠܳܗܳܐ ܕܺܐܝܬ ܗ̱ܘܳܐ ܒܶܗ: ܕܦܳܪܶܫ ܨܰܦܪܳܐ ܡ̣ܶܢ ܪܰܡܫܳܐ ܘܝܳܕܰܥ ܗ̱ܘܳܐ ܠܶܠܝܳܐ ܡ̣ܶܢ ܐܝ̣ܡܳܡܳܐ: ܠܳܟ ܣܓܶܕ ܕܳܢܺܝ̣ܐܝܶܠ ܒܓܰܘ ܓܘ̣ܒܳܐ ܕܰܐܪ̈ܝܰܘܳܬܳܐ ܟܰܕ ܐܰܚܝ̣ܕ ܓܘ̣ܒܳܐ ܘܰܛܒܝ̣ܥ ܒܟܺܐܦܳܐ ܩܕܳܡ ܡܰܠܟܳܐ: ܘܶܐܙ̣ܰܠ ܘܰܚ̣ܙܳܐ ܠܰܐܪ̈ܝܰܘܳܬܳܐ ܟܰܕ ܢܳܗܡܝ̣ܢ ܘܰܠܟܺܐܢܳܐ ܟܰܕ ܡܨܰܠܶܐ: ܘܰܩܥ̣ܳܐ ܘܶܐܡ̣ܰܪ ܕܪܰܒ ܐܰܠܳܗܳܟ ܕܳܢܺܝ̣ܐܝܶܠ ܛܘ̣ܒܰܘܗ̱ܝ ܠܰܐܝܢܳܐ ܕܣܳܓܶܕ ܠܶܗ: ܠܳܟ ܣܓ݂ܶܕ ܝܘ̣ܚܰܢܳܢ ܒܟܰܪܣܳܗ̇ ܕܶܐܠܝ̣ܫܒܰܥ ܐܶܡܶܗ ܕܰܚ̣ܙܳܬ݀ ܠܡܰܪܝܰܡ ܐܶܡܳܟ ܕܰܛܥܝ̣ܢܳܐ ܠܳܟ ܐܰܢ̱ܬ ܕܰܛܥܝ̣ܢ ܐܰܢ̱ܬ ܠܟܽܠܗܶܝܢ ܒܶܪ̈ܝܳܬܳܐ: ܐܳܘ ܠܢܶܩܝܳܐ ܕܰܓܥ̣ܳܐ ܒܳܗ̇ ܓܘ̣ܪܝܳܐ ܕܰܐܪܝܳܐ ܘܠܳܐ ܕܳܚܠܳܐ: ܐܳܘ ܠܶܐܠܦܳܐ ܕܰܫ̣ܪܳܐ ܒܳܗ̇ ܝܰܡܳܐ ܕܫܰܠܗܶܒܝ̣ܬܳܐ ܘܠܳܐ ܡܰܘܩܶܕ ܠܳܗ̇: ܫܡܰܝܳܐ ܟܘ̣ܪܣܝܳܟ ܘܟܽܠܳܗ̇ ܒܪܝ̣ܬܳܐ ܕܝ̣ܠܳܟ ܐܝ̣ܬܶܝܗ̇ ܐܰܙܥ̣ܰܪܬ ܢܰܦܫܳܟ ܘܰܫ̣ܪܰܝܬ ܒܟܰܪܣܳܗ̇ ܕܰܒܬܘ̣ܠܬܳܐ ܐܰܝܟܰܢܳܐ ܕܰܬ̣ܚܰܪܰܪ ܠܓܶܢܣܰܢ ܡ̣ܶܢ ܚܒܳܠܳܐ: ܕܒܳܥܘ̣ܬܳܐ ܡܩܰܪܒܝ̣ܢܰܢ ܕܰܬ̣ܦܰܨܶܐ ܠܰܢ ܡ̣ܶܢ ܚܛܝ̣ܬܳܐ: ܐܳܦ ܚܢܰܢ ܡܳܪܝܳܐ ܙܒܝ̣̈ܢܰܝ ܒܰܕܡܳܟ ܘܰܛܒܝ̣̈ܥܰܝ ܒܪܘ̣ܫܡܶܗ ܕܰܨܠܝ̣ܒܳܟ ܙܰܟܳܝܳܐ ܒܳܥܘ̣ܬܳܐ ܘܬܰܟܫܶܦܬܳܐ: ܘܥܶܛܪܳܐ ܒܰܣܝ̣ܡܳܐ ܡܩܰܪܒܝ̣ܢܰܢ ܠܳܟ ܐܰܝܟܰܢܳܐ ܕܬܶܬ̣ܦܢܶܐ ܘܰܬ̣ܪܰܚܶܡ ܥܠܰܝܢ ܘܥܰܠ ܦܰܓܪ̈ܶܐ ܘܢܰܦ̈ܫܳܬܳܐ ܕܥܰܒ̈ܕܰܝܟ ܘܕܰܐܡܗ̈ܳܬܳܟ ܕܩܳܝܡܝ̣ܢ ܩܕܳܡܰܝܟ ܒܗܳܢܳܐ ܥܶܕܳܢܳܐ ܘܰܒܟܽܠ̈ܥܶܕܳܢܝ̣ܢ: ܘܰܬܢܝ̣ܚ ܠܢܰܦ̈ܫܳܬܳܐ ܕܥܰܢܝ̣̈ܕܶܐ ܡܗܰܝܡ̈ܢܶܐ ܘܬ̣ܶܟܬܘ̣ܒ ܫܡܳܗܰܝ̈ܗܽܘܢ ܘܕܝ̣ܠܰܢ ܒܣܶܦܪܳܐ ܕܝ̣ܠܳܟ ܕܚܰܝ̈ܶܐ ܘܰܐܫܘܳܐ ܠܰܢ ܘܰܠܗܽܘܢ ܠܗܳܝ ܩܝܳܡܬܳܐ ܡܒܰܪܰܟܬܳܐ ܒܓܰܠܝܘ̣ܬ ܐܰܦ̈ܶܐ ܕܰܚܢܰܢ ܘܗ̣ܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝܺܢ܀

ܥܶܛܪܳܐ

ܙܰܝܢܳܐ ܠܳܐ ܡܶܙܕܰܟܝܳܢܳܐ ܗܰܘ̇ ܕܒܶܗ ܙܰܝܶܢ̣ܬ ܠܺܐܠܺܝܳܐ ܢܒܺܝܳܐ: ܘܰܒܚܰܝ̈ܠܶܐ ܘܰܒܓܶܠܝ̈ܳܢܶܐ ܐܰܠܳܗ̈ܳܝܶܐ ܓܰܡ̣ܰܪܬܳܝܗ̱ܝ: ܐܰܢ̱ܬ ܡܳܪܝܳܐ ܙܰܝܶܢ ܠܢܰܦ̈ܫܳܬܰܢ ܠܳܐ ܡܶܨܛܰܠܝܳܢܳܐܝ̣ܬ ܘܰܢ̣ܩܰܕܶܫ ܠܦܰܓܪ̈ܰܝܢ ܠܳܐ ܡܶܙܕܰܟܝܳܢܳܐܝ̣ܬ ܐܰܝܟܰܢܳܐ ܕܟܰܕ ܒܕܰܟܝܘܽܬܳܐ ܘܩܰܕܝ̣ܫܘ̣ܬܳܐ ܒܝܰܘ̈ܡܳܬܳܐ ܗܳܠܶܝܢ ܩܰܕܝ̣̈ܫܶܐ ܡܶܬܓܰܡܪܝ̣ܢܰܢ ܢܰܨ̇ܡܰܚ ܒܓܰܒܳܐ ܗܰܘ̇ ܝܰܡܝ̣ܢܳܝܳܐ: ܒܨܰܦܪܳܐ ܕܰܩܝܳܡܬܳܐ ܥܰܡ ܚܕܘ̣̈ܓܶܐ ܕܠܳܟ ܪܚܝ̣ܡܝ̣ܢ ܡܳܪܰܢ ܠܥܳܠܡܝ̣ܢ܀