ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܙܓܽܘ̣ܪ ܡܶܢܰܢ ܡܳܪܝܳܐ ܡܳܪܰܢ ܟܽܠ ܚܰܝܠܳܐ ܕܰܚܛܝ̣ܬܳܐ: ܘܰܕܫܺܐܕ̈ܶܐ ܒܥܶܠ̈ܕܒܳܒܶܐ ܕܓܶܢܣܳܐ ܕܝ̣ܠܰܢ: ܘܠܳܐ ܒܺܐܝ̈ܕܰܝܳܐ ܕܝ̣ܠܗܽܘܢ ܥܰܘ̈ܳܠܳܬܳܐ ܢ̣ܶܬܛܰܢܰܦ ܫܡܳܐ ܕܝ̣ܠܳܟ ܩܰܕܝ̣ܫܳܐ ܗܰܘ̇ ܕܶܐܬ̣ܩܪܝ̣ ܥܠܰܝܢ: ܐܰܝܟ ܣܘ̣ܓܳܐܐ ܕܪ̈ܰܚܡܰܝܟ: ܘܰܐܝܟ ܬܗܘ̣ܡܳܐ ܫܦܝ̣ܥܳܐ ܕܰܚܢܳܢܳܟ ܐܰܢ̱ܬ ܓܶܝܪ ܡ̇ܨܶܐ̣ ܐܰܢ̱ܬ ܚܰܝܠܳܐ: ܠܰܡܫܰܘܙܳܒܘ̣ ܠܰܒܪܝ̣ܬܳܐ ܕܝ̣ܠܳܟ ܡ̣ܶܢ ܢܶܟ̈ܝܳܢܶܐ: ܘܠܳܟ ܚܰܝܳܒܳܐ ܕܬ̣ܶܦܠܘ̣ܚ ܥܰܒܕܘ̣ܬܳܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܒܳܪܘ̣ܝܳܐ ܕܟܽܠ ܘܣܳܥܰܪ ܬܶܕܡܪ̈ܳܬܳܐ: ܠܗܰܘ̇ ܛܳܒܳܐ ܘܒܰܣܝ̣ܡ ܒܟܽܠ ܘܰܡܪܰܚܡܳܢ ܘܰܢܓܝ̣ܪ ܪܘ̣ܚܳܐ: ܠܗܰܘ̇ ܐܳܣܝܳܐ ܕܶܐܬ̣ܳܐ ܡܶܛܽܠ ܓܶܢܣܳܐ ܐ̱ܢܳܫܳܝܳܐ ܕܰܟܪܝ̣ܗ ܗ̱ܘܳܐ ܒܡܘ̣̈ܡܶܐ ܘܰܚܒܳܪ̈ܳܬܳܐ ܕܰܚܛܝ̣ܬܳܐ ܘܰܐܣܝ̣ ܘܰܐܚܠ̣ܶܡ ܠܟܺܐܒ̈ܶܐ ܡܫܝ̣̈ܡܳܢܶܐ ܕܰܡܡܰܚ̈ܰܝܳܐ ܠܗܰܘ̇ ܕܰܒܡܶܠܬܳܐ ܕܝ̣ܠܶܗ ܕܰܟܝ̣ ܓܰܪ̈ܒܶܐ ܘܰܒܪܘ̣ܩܳܐ ܕܦܘ̣ܡܶܗ ܦܰܬܰܚ ܠܰܣ̈ܡܰܝܳܐ ܘܰܒܩܳܠܶܗ ܢܰܚ̣ܶܡ ܡܝ̣̈ܬܶܐ ܘܰܒܛܰܝܒܘ̣ܬܶܗ ܚܰܣܝ̣ ܠܚܰܛܳܝ̈ܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܰܢ ܣܳܦܶܩ ܠܰܡܫܰܒܳܚܘ̣ ܠܝܰܡܳܐ ܕܛܰܝܒܘ̣ܬܳܟ ܡܫܝ̣ܚܳܐ ܐܰ‌ܠܳܗܳܐ ܕܝ̣ܠܰܢ: ܘܡܰܢ ܡܰܘܦܶܐ ܠܰܡܩܰܠܳܣܘ̣ ܠܝܰܡܳܐ ܕܰܚܢܳܢܳܟ ܕܰܗ̣ܘܰܝܬ ܒܰܪܢܳܫܳܐ ܒܨܶܒܝܳܢܳܟ ܡܶܛܽܠܳܬܰܢ ܘܶܐܬ̣ܚܙܰܝܬ ܥܰܡܰܢ ܐܰܟܘܳܬܰܢ: ܚܘ̣ܒܳܟ ܪܰܒ ܡ̣ܶܢ ܡܚܝ̣ܠܘ̣ܬܰܢ: ܘܪܶܚܡܬܳܟ ܕܰܠܘܳܬܰܢ ܙܳܟ̥ܝܳܐ ܠܙܰܘ̈ܥܶܐ ܕܬܰܪܥܝ̣ܬܰܢ: ܠܩܳܛܢܶܐ ܙܰܡ̣ܢܘ̣ܟ ܠܡܶܫܬܘ̣ܬܳܐ ܘܰܚܣ̣ܰܪ ܚܰܡܪܳܐ: ܘܠܰܡܫܰܡ̈ܫܳܢܶܐ ܦܰܩ̣ܶܕܬ ܘܰܡܠ̣ܰܘ ܡܰܝ̈ܳܐ ܠܰܐܓܳܢ̈ܶܐ ܘܰܠܚܰܡܪܳܐ ܛܳܒܳܐ ܫܰܚ̣ܠܶܦܬ ܐܶܢܽܘܢ: ܠܓܰܪܒܳܐ ܒܡܶܠܬܳܐ ܕܦܘ̣ܩܳܕܢܳܟ ܘܓܶܫܬܳܐ ܕܺܐܝ̈ܕܰܝܟ ܚܘ̣ܠܡܳܢܳܐ ܫܰܟܶܢ̣ܬ ܠܰܡܫܰܪܝܳܐ ܟܰܕ ܠܝܘܽܕܳܝ̈ܶܐ ܛܳܠܘ̣̈ܡܶܐ ܐܰܟܶܣ̣ܬ: ܠܝܰܡܳܐ ܕܡܶܬܒܰܥܪܰܪ ܗ̱ܘܳܐ ܫܰܬܶܩ̣ܬ ܘܰܠܪ̈ܘ̣ܚܶܐ ܘܓܰܠ̱̈ـܠܶܐ ܒܰܛܶܠ̣ܬ: ܘܠܰܪܗܝ̣ܒܘ̣ܬܳܐ ܕܬܰܠܡ̈ܝ̣ܕܶܐ ܫܰܝܶܢ̣ܬ ܠܩܶܢܛܪܘ̣ܢܳܐ ܕܗܰܝܡ̣ܶܢ ܕܰܐ‌ܠܳܗܳܐ ܐܰܢ̱ܬ ܕܰܐܝܟ ܗܰܝܡܳܢܘ̣ܬܶܗ ܒܶܝܬ ܐܝ̣ܣܪܳܐܝܶܠ ܠܳܐ ܐܶܫ̣ܬܟܰܚ ܐܶܡ̣ܰܪܬ: ܘܰܠܛܰܠܶܝܗ ܐܰܣܝ̣ܬ: ܠܒܰܪ̱ܬ ܝܘ̣ܐܳܪܳܫ ܡ̣ܶܢ ܡܰܘܬܳܐ ܐܰܝܟ ܕܡ̣ܶܢ ܫܶܢܬܳܐ ܢܰܚܶܡ̣ܬ: ܘܰܠܗܳܝ ܕܰܒܡܰܪܕܝ̣ܬܳܐ ܕܰܕܡܳܐ ܫܢܝ̣̈ܢ ܬܰܪܬܰܥܶܣܪܶܐ ܡܶܬܢܰܘܠܳܐ ܒܟܶܢܦܳܐ ܕܡܰܪܛܘ̣ܛܳܟ ܐܰܘܒܶܫ̣ܬ ܘܠܰܟܢܰܥܢܳܝܬܳܐ ܕܒܰܪܬܳܗ̇ ܡ̣ܶܢ ܫܺܐܕܳܐ ܡܶܫܬܰܚܩܳܐ ܗ̱ܘܳܬ݀ ܘܰܒܪܶܗ ܕܕܰܘܝ̣ܕ ܫܰܡܰܗ̣ܬܳܟ ܚܘ̣ܪܳܪܳܐ ܡ̣ܶܢ ܫܘ̣ܠܛܳܢܶܗ ܕܒܝ̣ܫܳܐ ܝܰܗ̣ܒܬ: ܠܟܶܢ̈ܫܶܐ ܣܰܓܺܝ̈ܶܐܐ ܡ̣ܶܢ ܠܰܚܡܳܐ ܙܥܘ̣ܪܳܐ ܬܰܪܣܝ̣ܬ: ܠܠܳܥܳܙܳܪ ܡ̣ܶܢ ܒܳܬܰܪ ܐܰܪܒܥܳܐ ܝܰܘ̈ܡܝ̣ܢ ܐܰܩܝ̣ܡܬ ܘܠܰܐܚ̈ܘܳܬܶܗ ܚܰܕܝ̣ܬ: ܠܰܚܡܳܬܶܗ ܕܦܶܛܪܘ̣ܣ ܡ̣ܶܢ ܐܶܫܳܬܳܐ ܐܰܥܕܝ̣ܬ: ܠܰܒܪܳܗ̇ ܕܰܐܪܡܰܠܬܳܐ ܡ̣ܶܢ ܦܟܳܪ̈ܰܘܗ̱ܝ ܕܡܰܘܬܳܐ ܫ̣ܪܰܝܬ: ܠܫܶܡܥܽܘܢ ܡ̣ܶܢ ܝܰܡܳܐ ܕܰܠܝ̣ܬ: ܠܥܰܝ̈ܢܶܐ ܕܰܣܡܰܝ̈ܳܐ ܦܰܬܰܚ̣ܬ: ܠܠܶܓܝܽܘܢ ܕܫܺܐܕ̈ܶܐ ܕܰܩܥ̣ܰܘ ܠܳܟ܇ ܕܡܳܐ ܠܰܢ ܘܠܳܟ ܝܶܫܘܽܥ ܕܶܐܬ̣ܰܝܬ ܠܡܰܘܒܳܕܘ̣ܬܰܢ ܠܟܽܠܗܽܘܢ ܒܰܬܗܘ̣ܡܳܐ ܛܰܒܰܥ̣ܬ: ܠܛܝ̣ܡܰܝ ܒܰܪ ܛܝ̣ܡܰܝ ܒܛܝ̣ܢܳܐ ܘܪܘ̣ܩܳܐ ܒܳܒ̈ܳܬܳܐ ܬܰܩܶܢ̣ܬ: ܘܒܺܐܝ̣̈ܕܰܘܗ̱ܝ ܠܣܳܦܪ̈ܶܐ ܘܠܰܦܪ̈ܝ̣ܫܶܐ ܐܰܟܶܣ̣ܬ: ܠܚܰܛܳܝ̇ܬܳܐ ܕܶܐܬܦܰܠ̣ܦܠܰܬ݀ ܗ̱ܘܳܬ݀ ܒܦܰܚܙܘ̣ܬܳܐ ܟܰܕ ܐܶܬ̣ܩܰܪܒܰܬ݀ ܠܳܟ ܚܰܘ̈ܒܳܬܳܗ̇ ܚܰܣܝ̣ܬ ܘܰܠܗܰܘ̇ ܕܰܢܦ̣ܰܠܘ̱ ܥܠܰܘܗ̱ܝ ܓܰܝܳܣ̈ܶܐ ܘܶܐܬ̣ܡܰܚܝ̣ ܒܨܘ̣ܠ̈ܦܳܬܳܐ ܒܝܰܕ ܡܶܫܚܳܐ ܘܚܰܡܪܳܐ ܕܰܢܨܰܠ̣ܬ ܥܠܰܘܗ̱ܝ ܐܰܚܠܶܡ̣ܬ: ܗܰܒ ܗܳܫܳܐ ܡܳܪܰܢ ܠܟܽܠܰܢ ܒܛܰܝܒܘ̣ܬܳܟ ܫܘ̣ܒܩܳܢܳܐ: ܘܰܠܟܽܠܰܢ ܥܰܒ̈ܕܰܝܟ ܐܰܠܒܶܫ ܙܰܕܝ̣ܩܘ̣ܬܳܐ ܘܫܰܕܰܪ ܫܘ̣ܒܩܳܢܳܐ ܘܚܘ̣ܠܡܳܢܳܐ ܠܰܟܪ̈ܝ̣ܗܶܐ ܘܰܐܣܳܐ ܐܶܢܽܘܢ: ܫܰܟܶܢ ܚܰܝܠܳܐ ܠܰܡܚܝ̣̈ܠܶܐ ܘܰܣܥܘ̣ܪ ܐܶܢܽܘܢ: ܐܰܦܢܳܐ ܠܚܰܛܳܝ̈ܶܐ ܠܰܬܝܳܒܘ̣ܬܳܐ ܘܙܰܕܶܩ ܐܶܢܽܘܢ: ܦܩܘ̣ܕ ܢܘ̣ܗܪܳܐ ܠܚܶܫܘ̣̈ܟܰܝ ܒܛܳܥܝܘ̣ܬܳܐ ܘܰܐܢܗܰܪ ܐܶܢܽܘܢ: ܢܰܚܶܡ ܡܝ̣̈ܬܶܐ ܒܦܰܪܕܰܝܣܳܐ ܕܛܘ̣̈ܒܶܐ ܒܰܐܬܪܳܐ ܕܢܘ̣ܗܪܳܐ ܒܰܣܶܡ ܐܶܢܽܘܢ: ܘܝܳܪ̈ܘ̣ܬܶܐ ܒܡܰܠܟܘ̣ܬܳܟ ܥܒܶܕ ܐܶܢܽܘܢ: ܐܰܝܟܰܢܳܐ ܕܥܰܠ ܟܽܠܗܶܝܢ ܛܰܝܒ̈ܘܳܬܳܟ ܘܣܳܥܘ̣ܪܘ̣ܬ ܬܶܕܡܪ̈ܳܬܳܟ ܘܡܰܘ̈ܗܒܳܬܳܟ ܐܰ‌ܠܳܗܳܝ̈ܬܳܐ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝܺܢ܀

ܥܶܛܪܳܐ

ܣܳܓ̇ܕܝ̣ܢܰܢ ܠܳܟ ܐܰܠܳܗ ܐܰܠܳܗ̈ܝ̣ܢ ܡܳܪܶܐ ܡܳܪ̈ܰܘܳܢ: ܐܰܒܳܐ ܛܳܒܳܐ ܘܡܳܪܳܐ ܡܪܰܚܡܳܢܳܐ: ܕܒܰܫ̈ܡܰܝ ܫܡܰܝ̈ܳܐ ܡܰܥܡܪܶܗ ܘܫܘ̣ܠܛܳܢܶܗ ܥܰܠ ܐܰܪܥܳܐ ܡܰܡܠܶܟ ܡܰܠܟܳܐ ܕܡܰܠܰܐܟ݂̈ܶܐ ܡܫܰܡܫܝ̣ܢ ܠܶܗ: ܘܰܡܕܰܒܰܪ ܥܳܠܡܳܐ ܒܪܶܡܙܶܐ ܕܨܶܒܝܳܢܶܗ: ܩܕܳܡܰܝܟ ܐܰܪܟܶܢ̣ܘ̱ ܥܰܒ̈ܕܰܝܟ ܪ̈ܝ̣ܫܰܝܗܽܘܢ: ܒܥܶܕܳܢܳܐ ܗܳܢܳܐ ܕܨܰܦܪܳܐ: ܢܰܛܰܪ ܐܶܢܽܘܢ ܒܰܨܠܝ̣ܒܳܟ: ܐܰܦܨܰܚ ܐܶܢܽܘܢ ܒܣܰܒܪܳܟ: ܚܰܕܳܐ ܐܶܢܽܘܢ ܒܡܰܘ̈ܗܒܳܬܳܟ ܩܰܒܶܠ ܒܳܥ̈ܘܳܬܗܘܽܢ ܒܪ̈ܰܚܡܰܝܟ ܘܦܰܢܳܐ ܫܶܐܠ̈ܳܬܗܽܘܢ ܫܰܦܝ̣ܪ̈ܳܬܳܐ ܡ̣ܶܢ ܒܶܝܬ ܓܰܙܳܐ ܕܰܚܢܳܢܳܟ: ܕܰܚܢܰܢ ܘܗ̣ܶܢܽܘܢ ܢܫܰܒܚܳܟ ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀