ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ ܠܗܰܘ̇ ܝܺܚܝܕܳܝܳܐ ܘܡܶܠܬܳܐ ܡܬܘ̣ܡܳܝܳܐ: ܠܗܰܘ̇ ܩܰܕܝ̣ܫܳܐ ܘܰܡܩܰܕܫܳܢܳܐ ܘܠܳܐ ܡܶܣܬܰܝܟܳܢܳܐ: ܠܗܰܘ̇ ܛܳܒܳܐ ܕܶܐܬ̣ܬܰܚܬܝ̣ ܠܣܘ̣ܪܳܩܳܐ ܨܶܒܝܳܢܳܝܳܐ: ܠܗܰܘ̇ ܚܰܝܠܳܐ ܚܰܝܠܬܳܢܳܐ ܘܠܳܐ ܡܶܬܟܰܒܫܳܢܳܐ: ܠܗܰܘ̇ ܕܚܝ̣ܠܳܐ ܕܡ̣ܶܢ ܚܰܝ̈ܠܰܘܳܬܳܐ ܥܶܠܳܝ̈ܶܐ ܡܶܫܬܰܒܰܚ ܒܕܶܚܠܬܳܐ: ܘܡ̣ܶܢ ܛܠܳܝ̈ܶܐ ܘܫܰܒܪ̈ܶܐ ܡܶܬܩܰܠܰܣ ܒܪܶܚܡܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܰܠܟܳܐ ܕܬܶܫܒܘ̣ܚܬܳܐ ܡܳܪܝܳܐ ܝܳܕܘ̣ܥܳܐ ܘܚܰܙܳܝܳܐ ܕܟܽܠ: ܟܰܕ ܨܒ̣ܳܐ ܒܝܰܘܡܳܐ ܐ̱ܚܪܳܝܳܐ ܒܙܰܒܢܳܐ ܕܣܘ̣ܪܳܩܳܐ ܨܶܒܝܳܢܳܝܳܐ: ܐܶܡܰܬܝ̱ ܕܫܰܡ̣ܠܝ̣ ܚܰܝ̈ܠܶܐ ܘܰܣܥ̣ܰܪ ܬܶܕܡܪ̈ܳܬܳܐ ܘܫܰܟ̣ܶܢ ܥܘ̣ܕܪ̈ܳܢܶܐ: ܘܠܐܘ̣ܪܫܠܶܡ ܡܕܝ̣ܢ̱ܬܳܐ ܩܰܕܝ̣ܫܬܳܐ ܢ̣ܶܬܪܘ̣ܨ ܐܘ̣ܪܚܳܐ ܕܡܰܪܕܝ̣ܬܳܐ ܕܝ̣ܠܶܗ: ܐܰܝܟܰܢܳܐ ܕܰܠܚܰܫܳܐ ܦܳܪܘ̣ܩܳܝܳܐ ܕܰܚܠܳܦܰܝܢ ܢ̣ܶܣܒܘ̣ܠ ܠܰܬܪܶܝܢ ܛܒܝ̣̈ܒܶܐ ܡ̣ܶܢ ܬܰܠܡܝ̣̈ܕܰܘܗ̱ܝ ܠܰܩܪܝ̣ܬܳܐ ܣܰܩܘ̣ܒܠܳܝܬܳܐ ܕܠܘ̣ܩܒܰܠܗܽܘܢ ܠܗܽܘܢ ܫ̣ܰܕܰܪ ܕܰܠܥܝ̣ܠܳܐ ܠܳܐ ܡܟܰܒܫܳܐ ܢ̣ܰܝܬܽܘܢ ܕܰܥܠܰܘܗ̱ܝ ܢ̣ܶܪܟܰܒ ܘܢ̣ܶܥܘ̣ܠ ܠܳܗ̇: ܪܟܘ̣ܒܳܐ ܫܝ̣ܛܳܐ ܘܒܰܣܝܳܐ ܗܰܘ̇ ܕܰܠܥܰܡܳܐ ܚܰܕܬܳܐ ܕܡ̣ܶܢ ܥܰܡ̱̈ܡܶܐ ܡܫܰܘܕܰܥ ܗ̱ܘܳܐ: ܘܰܒܝܰܕ ܡܰܘܬܒܳܐ ܕܝ̣ܠܶܗ ܕܰܥܠܰܘܗ̱ܝ ܚܰܘܝ̣ ܕܰܡܣܰܝܟ݂ܰܐ ܗ̱ܘ̇ ܒܰܒܣܰܪ: ܘܠܳܐ ܡܶܣܬܰܝܟܳܢܰܐ ܗ̱ܘ̇ ܒܰܐܠܳܗܘ̣ܬܶܗ: ܘܰܕܢ̣ܶܫܬܰܪܰܪ ܠܡܶܠܬܶܗ ܕܰܢܒܺܝܳܐ ܕܶܐܡ̣ܰܪ: ܚܕܳܝ ܛܳܒ ܒܰܪ̱ܬ ܨܶܗܝܽܘܢ ܐܰܟܪܶܙܝ̱ ܒܰܪ̱ܬ݀ ܐܘ̣ܪܫܠܶܡ: ܕܗܳܐ ܡܰܠܟܶܟܝ̱ ܐܳܬܶܐ ܠܶܟܝ̱ ܙܰܕܝ̣ܩܳܐ ܘܡܰܟܝ̣ܟܳܐ ܘܰܪܟܝ̣ܒ ܥܰܠ ܚܡܳܪܳܐ ܘܥܰܠ ܥܝ̣ܠܳܐ ܒܰܪ ܐܰܬܳܢܳܐ ܘܚܰܕܬܳܐ: ܟܶܢ̈ܫܶܐ ܕܶܝܢ ܐܰܝܠܶܝܢ ܕܡ̣ܶܢ ܩܕܳܡܰܘܗ̱ܝ ܘܡ̣ܶܢ ܒܶܣܬܶܪܗ ܣܰܘ̈ܟܶܐ ܡ̣ܶܢ ܐܝ̣ܠ̈ܳܢܶܐ ܦܳܣܩܝ̣ܢ ܗ̱ܘܰܘ ܘܫܳܕܶܝܢ ܒܐܘ̣ܪܚܳܐ ܟܰܕ ܐܳܬܳܐ ܕܙܳܟܘ̣ܬܳܐ ܘܰܕܪܘ̣ܡܪܳܡܳܐ ܒܗܳܕܶܐ ܡܫܰܘܕܥܝ̣ܢ ܗ̱ܘܰܘ: ܡܳܐܢ̈ܶܐ ܬܘ̣ܒ ܘܡܰܪ̈ܛܘ̣ܛܶܐ ܕܥܰܠ ܥܝ̣ܠܳܐ ܘܥܰܠ ܐܰܪܥܳܐ ܬܰܠܡܝ̣̈ܕܶܐ ܡܫܰܘܶܝܢ ܗ̱ܘܰܘ: ܐܰܝܟܰܢܳܐ ܕܢ̣ܰܘܕܥܽܘܢ ܕܰܐܝܠܶܝܢ ܕܗܰܝܡ̣ܶܢܘ̱ ܒܶܗ ܕܠܳܐ ܗ̱ܘܳܐ ܢܰܚ̈ܬܰܝܗܽܘܢ ܢ̣ܶܫܕܽܘܢ ܡܶܢܗܽܘܢ ܐܶܠܳܐ ܐܳܦ ܗܘ̣ ܒܶܣܪܗܽܘܢ ܡܶܛܽܠ ܚܘ̣ܒܶܗ ܐܶܢ ܗܳܕܶܐ ܬ̣ܶܬܒܥܶܐ: ܛܰܪ̈ܦܶܐ ܓܶܝܪ ܕܕܶܩ̈ܠܶܐ ܕܒܺܐܝ̈ܕܰܝܗܽܘܢ ܛܥܝ̣ܢܝ̣ܢ ܗ̱ܘܰܘ: ܠܰܡܥܰܠܝܘ̣ܬܳܐ ܕܚܰܝ̈ܶܐ ܒܰܐܠܳܗܳܐ ܩܳܕܡܝ̣ܢ ܘܪܳܫܡܝ̣ܢ ܘܰܡܛܰܦܣܝ̣ܢ ܘܡܰܐ̱ܪܙܝ̣ܢ ܗ̱ܘܰܘ: ܛܠܳܝ̈ܶܐ ܬܘ̣ܒ ܘܝܳܢܘ̣ܣ̈ܩܶܐ ܙܥܘ̣ܪ̈ܰܝ ܒܩܰܘܡܬܳܐ ܫܪܳܪܳܐ ܕܰܢܒܺܝܽܘ̣ܬܳܐ ܡܒܰܕܩܝ̣ܢ ܗ̱ܘܰܘ: ܗܳܝ ܕܡܳܪܝܳܐ ܡܳܪܰܢ ܡܳܐ ܬܡܝ̣ܗ ܫܡܳܟ ܒܟܽܠܳܗ̇ ܐܰܪܥܳܐ: ܐܶܬ̣ܪܰܡܪܡܰܬ݀ ܪܰܒܘ̣ܬܳܟ ܠܥܶܠ ܡ̣ܶܢ ܫܡܰܝܳܐ: ܡ̣ܶܢ ܦܘ̣ܡܳܐ ܕܝܰܠ̈ܘ̣ܕܶܐ ܘܰܕܫܰܒܪ̈ܶܐ ܬܰܩܶܢ̣ܬ ܬܶܫܒܘ̣ܚܬܳܟ ܗܳܐ ܡܶܛܽܠ ܒܥܶܠ̈ܕܒܳܒܰܝܟ ܠܡܶܫܪܳܐ ܒܥܶܠܕܒܳܒܳܐ ܡܶܬܢܰܩܡܳܢܳܐ: ܟܰܕ ܠܳܥܙܝ̣ܢ ܬܶܫܒܘ̣ܚܬܳܐ ܡܫܰܡܠܰܝܬܳܐ ܒܠܶܫܳܢܳܐ ܡܫܰܡܠܝܳܐ: ܐܘ̣ܫܰܥܢܳܐ ܒܰܡܪ̈ܰܘܡܶܐ ܡܒܰܪܟܳܐ ܓܶܝܪ ܐܝ̣ܬܰܘܗ̱ܝ ܗܰܘ̇ ܕܶܐܬ̣ܳܐ ܘܳܐܬܶܐ ܒܚܰܪܬܳܐ ܘܫܘ̣ܠܳܡܳܐ ܕܙܰܒ̈ܢܶܐ ܠܳܐ ܡܶܟܝ̣ܠ ܡܰܢ ܒܒܶܣܪܳܐ: ܐܘ̣ܫܰܥܢܳܐ ܠܰܒܪܶܗ ܕܕܰܘܝ̣ܕ ܘܐܰܠܳܗܳܐ ܡܪܰܝܡܳܐ ܫܰܪܝ̣ܪܳܐܝ̣ܬ: ܗܽܘ̣ ܓܶܝܪ ܒܰܟܝܳܢܳܐ ܐܝ̣ܬܰܘܗ̱ܝ ܒܪܶܗ ܕܐܰܠܳܗܳܐ ܗܰܘ̇ ܠܳܐ ܡܶܫܬܰܚܠܦܳܢܳܐ ܘܰܕܠܳܐ ܒܘ̣ܠܒܳܠܳܐ: ܗ̣ܘܳܐ ܒܪܳܐ ܠܕܰܘܝ̣ܕ ܒܝܰܕ ܒܶܣܪܳܐ ܡܢܰܦܫܳܐ ܘܰܡܡܰܕܥܳܐ ܕܚܰܝܶܕ ܠܶܗ ܡܶܢܰܢ: ܘܚܰܘܝ̣ܬ ܕܩܰܠܝ̣ܠܳܐ ܒܥܰܝ̈ܢܰܝܟ ܕܐܶܠܘ̣ ܫܬܶܩ̣ܘ̱ ܗ̱ܘܰܘ ܗܳܠܶܝܢ ܡ̣ܶܢ ܫܘ̣ܒܚܳܐ ܐܰܝܟ ܫܶܐܠܬܳܐ ܕܣܳܒ̈ܶܐ ܣܰܟ̈ܠܶܐ ܕܥܰܡܳܐ ܟܺܐܦ̈ܶܐ ܦܳܪ̈ܥܳܢ ܗ̱ܘܰܝ̈ ܬܶܫܒܘ̣ܚܬܳܐ: ܘܟܰܕ ܥܰܠ̣ܬ ܠܗܰܝܟܠܶܗ ܕܰܐܒܘ̣ܟ ܟܐܰܝܬ ܒܗܳܢܽܘܢ ܕܥܰܒ̣ܕܘ̣ܗ̱ܝ ܒܶܝܬ ܬܶܓܘ̣ܪܬܳܐ: ܘܫܰܘܕܰܥ̣ܬ ܕܒܰܝܬܳܐ ܕܝ̣ܠܳܟ ܐܝ̣ܬܰܘܗ̱ܝ ܒܰܛܢܳܢܳܐ ܕܰܐܟ̣ܠܳܟ ܘܕܰܫܘܶܝܬ ܒܐܘ̣ܣܺܝܰܐ ܠܗܰܘ̇ ܕܥܰܒ̣ܕܶܗ ܒܶܝܬ ܨܠܘ̣ܬܳܐ: ܘܗܳܫܳܐ ܡܳܪܝܳܐ ܒܳܥܶܝܢܰܢ ܡܶܢܳܟ ܗܰܘ̇ ܕܗܳܠܶܝܢ ܟܽܠܗܶܝܢ ܠܦܘ̣ܪܩܳܢܰܢ ܐܶܬ̣ܬܰܓܰܪܬ: ܕܰܚܠܳܦ ܡܰܥܰܠܬܳܐ ܕܠܐܘ̣ܪܫܠܶܡ ܗܳܕܶܐ ܐܰܪܥܳܢܳܝܬܳܐ ܬ̣ܰܫܘܶܐ ܠܰܢ ܠܡܰܥܠܬܳܐ ܕܠܐܘ̣ܪܫܠܶܡ ܗܳܝ ܚܺܐܪܬܳܐ ܘܶܐܡܰܢ ܩܰܕܡܳܝܬܳܐ ܘܰܕܒܰܐܠܳܗܳܐ ܡܶܬܥܰܠܡܳܐ: ܚܠܳܦ ܕܶܝܢ ܥܝ̣ܠܳܐ ܠܳܐ ܡܟܰܒܫܳܐ ܘܰܕܠܳܐ ܡܶܠܬܳܐ ܪܟܘ̣ܒܳܐ ܡܝܰܩܪܳܐ: ܕܬܶܐܘܳܪܺܝܰܐ ܕܣܳܥܘ̣ܪܘ̣ܬܳܐ ܕܝ̣ܠܳܟ ܬ̣ܶܥܒܶܕ ܠܰܢ ܕܰܥܠܰܘܗ̱ܝ ܬ̣ܶܬܢܝ̣ܚ ܘܬ̣ܶܫܪܶܐ ܐܰܠܳܗܽܘ̣ܬܳܟ ܐܰܝܟ ܕܥܰܠ ܚܰܨܳܐ ܕܰܟܪ̈ܘ̣ܒܶܐ: ܚܠܳܦ ܣܰܘ̈ܟܶܐ ܕܶܝܢ ܕܙܰܝ̈ܬܶܐ ܫܰܦܝ̣ܪܘ̣ܬ ܦܺܐܪ̈ܶܐ ܕܰܡܪܰܚܡܳܢܘ̣ܬܳܐ ܬ̣ܚܰܘܶܐ: ܚܠܳܦ ܕܶܝܢ ܕܶܩ̈ܠܶܐ ܪ̈ܳܡܶܐ ܕܝ̣ܕܰܥܬܳܐ ܕܒܳܟ ܢ̇ܶܡܛܶܐ: ܚܠܳܦ ܢܰܚ̈ܬܶܐ ܘܡܰܪ̈ܛܘ̣ܛܶܐ ܕܶܝܢ ܚܘ̣ܫ̈ܳܒܶܐ ܠܳܐ ܡܦܰܬ̈ܟܶܐ ܕܪܰܚܝ̣ܩܝ̣ܢ ܡ̣ܶܢ ܙܩܘ̣ܪܳܐ ܘܰܪܟܘ̣ܒܳܐ ܕܨܶܒ̈ܬܶܐ ܥܳܠ̈ܡܳܢܳܝܶܐ ܢܰܦܪܶܐ: ܚܠܳܦ ܗܳܝ ܕܰܒܐܘ̣ܫܰܥܢ̈ܶܐ ܟܝ̣ܬ ܐܶܫܬܰܒܰܚ̣ܬ ܡ̣ܶܢ ܫܰܒܪ̈ܶܐ ܙܥܘ̣ܪ̈ܰܝ ܩܰܘܡܬܳܐ ܬܶܫܒܘ̣ܚܬܳܐ ܓܡܝ̣ܪܬܳܐ ܘܰܕܠܳܐ ܡܳܛܝܳܐ ܠܚܰܕ ܡ̣ܶܢ ܓܰܒ̈ܶܐ ܢ̇ܶܦܪܘ̣ܥ: ܘܰܡܦܝ̣ܣܝ̣ܢܰܢ ܠܳܟ ܕܰܬ̣ܕܰܟܶܐ ܠܰܢ ܡ̣ܶܢ ܚܘ̣ܫ̈ܳܒܶܐ ܠܳܐ ܕܟܰܝ̈ܳܐ ܘܰܡܥܰܪ̈ܦܳܢܶܐ ܕܥܰܘܠܳܐ ܕܰܚܛܝ̣ܬܳܐ: ܘܡ̣ܶܢ ܡܰܣܒܳܐ ܘܡܰܬܠܳܐ ܕܗܳܢܽܘܢ ܕܙܳܒܢܝ̣ܢ ܘܰܡܙܰܒܢܝ̣ܢ ܒܗܰܝܟܠܳܐ ܘܡܶܬܬܰܓܪܝ̣ܢ: ܘܰܕܠܳܐ ܗ̱ܘܳܐ ܕܢ̇ܶܬܛܪܶܕ ܒܰܦܪ̈ܳܓܶܠܶܐ ܕܡ̣ܶܢ ܚܰܒܠܳܐ ܡ̣ܶܢ ܡܰܥܡܪܳܐ ܕܩܘ̣ܕ̈ܫܰܝܟ ܐܶܠܳܐ ܨܶܒܝܳܢܳܐܝ̣ܬ ܢ̇ܶܬܕܰܡܶܐ ܠܡܶܫܬܡܳܥܘ̣ ܠܦܘ̣̈ܩܕܳܢܰܝܟ ܕܰܚܠܶܝܢ ܡ̣ܶܢ ܟܰܟܳܪܝ̣ܬܳܐ: ܘܬ̣ܶܥܒܶܕ ܠܰܢ ܒܗܰܝܟܠܳܟ ܢܶܨܒܬܳܐ ܛܥܝ̣̈ܢܳܬ݀ ܦܺܐܪ̈ܶܐ ܘܠܳܐ ܗ̱ܘܳܐ ܬܺܬܳܐ ܓܠܝ̣ܙܰܬ݀ ܡ̣ܶܢ ܦܺܐܪ̈ܶܐ ܕܰܥ̈ܒܳܕܶܐ ܫܰܦܝ̣ܪ̈ܶܐ: ܘܰܐܫܘܳܐ ܠܰܢ ܘܰܠܥܰܢܝ̣̈ܕܰܝܢ ܡܗܰܝ̈ܡܢܶܐ ܕܢ̇ܶܐܪܘ̣ܥ ܐܰܦ̈ܰܝܟ ܦܨܝ̣ܚܳܐܝ̣ܬ ܐܶܡܰܬܝ̱ ܕܳܐܬܶܐ ܐܰܢ̱ܬ ܠܚܰܪܬܳܐ ܕܰܠܟܽܠ ܐ̱ܢܳܫ ܬ̣ܶܬܶܠ ܦܘ̣ܪܥܳܢܳܐ: ܟܰܕ ܚܳܕܶܝܢܰܢ ܘܪܳܦܣܝ̣ܢܰܢ ܩܕܳܡܰܝܟ ܒܐܘ̣ܫܰܥܢ̈ܶܐ ܠܳܐ ܡܰܬܡܰܠ̈ܠܳܢܳܝܳܬܳܐ ܘܣܰܘ̈ܟܶܐ ܠܳܐ ܥܳܒܘ̣ܪ̈ܝܳܬܳܐ ܕܦܘ̣ܪܩܳܢܰܢ ܘܥܰܡ ܫܘ̣ܒܚܳܐ ܢܺܐܡܰܪ: ܒܪܝ̣ܟ ܗ̱ܘ̣ ܕܶܐܬ̣ܳܐ ܒܰܫܡܶܗ ܕܡܳܪܝܳܐ ܐܘ̣ܫܰܥܢܳܐ ܒܰܡܪ̈ܰܘܡܶܐ: ܫܘ̣ܒܚܳܐ ܠܳܟ ܡܰܠܟܳܐ ܕܺܐܝܣܪܳܐܝܶܠ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀