ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ ܠܗܰܘ̇ ܬܰܩܝ̣ܦܳܐ ܒܥܘ̣ܫܢܳܐ: ܘܓܰܢ̱ܒܳܪܳܐ ܒܚܰܝܠܬܳܢܘ̣ܬܳܐ: ܠܗܰܘ̇ ܠܳܐ ܡܶܬܕܰܪܟܳܢܳܐ ܠܝܰܕ̈ܥܳܬܳܐ ܡܰܠܰܐܟܳܝ̈ܳܬܳܐ: ܘܠܳܐ ܡܶܬܒܰܨܝܳܢܳܐ ܠܚܶܟܡܬܳܐ ܐ̱ܢܳܫܳܝܬܳܐ ܠܗܰܘ̇ ܕܡ̣ܶܢ ܫܰܒܪ̈ܶܐ ܘܝܰܠ̈ܘ̣ܕܶܐ ܐܶܬ̣ܩܰܠܰܣ ܒܣܰܘ̈ܟܶܐ ܕܙܰܝ̈ܬܶܐ ܘܰܕܕܶܩ̈ܠܶܐ ܘܳܐܦ ܒܬܶܫܒ̈ܚܳܬܳܐ ܟܰܕ ܨܒ̣ܳܐ ܕܥܰܠ ܥܝ̣ܠܳܐ ܫܝ̣ܛܳܐ ܢ̣ܶܥܘ̣ܠ ܠܰܡܕܝ̣ܢ̱ܬܳܐ ܕܨܳܠ̈ܘ̣ܒܶܐ ܐܘ̣ܪܫܠܶܡ: ܛܳܒܳܐ ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ ܘܠܶܗ ܢܶܣ̇ܓܘ̣ܕ: ܒܗܳܢܳܐ ܥܶܕܳܢܳܐ ܩܰܘܡܳܐ ܕܰܬܪܶܝܢ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܓܰܢ̱ܒܳܪܳܐ ܥܰܫܺܝ̣ܢ ܒܚܰܝܶܠܬܳܢܽܘ̣ܬܳܐ ܘܰܗܕܝ̣ܪ ܒܗܘ̣̈ܠܳܠܶܐ ܘܰܡܕܰܟܝܳܢܳܐ ܘܣܳܥܰܪ ܚܰܝ̈ܠܶܐ: ܗܰܘ̇ ܕܟܽܠܶܗ ܕܘ̣ܡܳܪܳܐ ܐܝ̣ܬܰܘܗ̱ܝ ܗܰܘ̇ ܕܰܒܢܰܝ̈ܢܳܫܳܐ ܠܳܐ ܡܨܶܝܢ ܕܰܢ̣ܡܰܠܠܘ̣ܢܳܝܗ̱ܝ: ܘܠܳܐ ܐܝ̣ܬ ܒܗܽܘܢ ܚܰܝܠܳܐ ܕܰܢ̣ܦܰܫܩܽܘ̣ܢܳܝܗ̱ܝ ܗܰܘ̇ ܕܒܰܫܡܰܝܳܐ ܩܒܝ̣ܥ ܗ̱ܘܳܐ ܟܘ̣ܪܣܶܝܗ ܘܥܰܠ ܥܢܳܢ̈ܰܝ ܪܘ̣ܚܳܐ ܡܫܰܬܰܐܣ ܡܰܘܬܒܶܗ ܘܥܰܠ ܛܽܘ̈ܢܒܰܝ ܪܩܝ̣ܥܳܐ: ܡܶܬܓܰܝܶܐ ܐܰܠܳܗܳܐܝ̣ܬ: ܗܰܘ̇ ܕܡܶܬܡܰܚܠܳܐ ܡܶܠܬܳܐ ܕܚܰܟܝ̣̈ܡܶܐ ܡܶܢܶܗ ܘܬܳܝܟܳܐ ܪܗܺܝ̣ܛܪܘ̣ܬܳܐ ܕܐܶܣܟܘ̣ܠܝ̣ܣ̈ܛܝ̣ܩܶܐ ܡ̣ܶܢ ܘܰܥܕܳܐ ܕܰܡܫܰܩܠܘ̣ܬܳܐ ܘܰܓܙܳܡܳܐ ܕܕܳܪ̈ܘ̣ܫܶܐ ܣܰܟ̈ܠܶܐ ܘܰܡܥܰܩ̈ܒܰܝ ܠܝ̣ܕܰܥܬܶܗ: ܗܳܦܶܟ ܟܰܕ ܣܛܝ̣ܡ ܘܰܒܠܝ̣ܡ ܫܶܬܩܳܢܳܐܝ̣ܬ: ܗܰܘ̇ ܕܰܩܕܳܡ ܒܶܪ̈ܝܳܬܳܐ ܡ̣ܶܢ ܝܳܬܶܗ ܡܶܫܬܰܒܰܚ ܗܳܢܳܐ ܐܰܠܳܗܳܐ ܥܰܡ ܐܰܒܘ̣ܗ̱ܝ ܘܪܘ̣ܚܳܐ ܩܰܕܝ̣ܫܳܐ ܫܰܘܝܳܐܝ̣ܬ: ܗܰܘ̇ ܕܡ̣ܶܢ ܟܢܘ̣ܫܝܳܐ ܟܪܘ̣ܒܳܝܳܐ ܡܶܬܒܰܪܰܟ ܡܬܘ̣ܡܳܐܝ̣ܬ: ܘܡ̣ܶܢ ܩܘ̣ܕܳܫܳܐ ܣܪܳܦܳܝܳܐ ܡܶܬܪܰܡܪܰܡ ܐܝ̣ܬܝܳܐܝ̣ܬ: ܘܡ̣ܶܢ ܬܶܓܡ̈ܶܐ ܕܪ̈ܝ̣ܫܳܢܘܳܬܳܐ ܡܶܬܩܰܠܰܣ ܙܰܗܝܳܐܝ̣ܬ ܘܡ̣ܶܢ ܠܶܓ̈ܝܽܘ̣ܢܶܐ ܕܚܰܝ̈ܠܰܘܳܬܳܐ ܡܶܬܗܰܕܰܪ ܠܳܐ ܗܘ̣ܠܳܢܳܐܝ̣ܬ: ܘܡ̣ܶܢ ܡܰܙܠܓܘ̣ܬܳܐ ܕܡܳܪ̈ܰܘܳܬܳܐ ܘܫܘ̣ܠ̈ܛܳܢܶܐ ܡܶܙܕܰܡܪܳܐ ܠܶܗ ܬܶܫܒܘ̣ܚܬܳܐ ܚܠܝ̣ܬܳܐ: ܒܩܝ̣ܢܬܳܐ ܠܳܐ ܫܰܠܘܳܢܝ̣ܬܳܐ ܘܠܳܐ ܡܶܬܢܰܦܠܳܢܝ̣ܬܳܐ ܬܗܝ̣ܪܳܐܝ̣ܬ ܘܡ̣ܶܢ ܡܰܘ̈ܬܒܶܐ ܘܪ̈ܝ̣ܫܰܝ ܡܰܠܰܐܟ̈ܶܐ ܡܶܫܬܰܒܰܚ ܦܰܐܝܘ̣ܬ ܐܰܠܳܗܳܐܝ̣ܬ: ܘܡ̣ܶܢ ܡܰܠܰܐܟ̈ܶܐ ܡܶܬܝܰܩܰܪ ܙܳܕܩܳܐܝ̣ܬ: ܠܳܟ ܡܫܝ̣ܚܳܐ ܐܰܠܳܗܳܐ ܕܫܶܦ̣ܪܰܬ݀ ܠܳܟ ܕܡ̣ܶܢ ܝܰܠ̈ܘ̣ܕܶܐ ܬ̣ܶܫܬܰܒܰܚ ܣܳܓ̇ܕܝ̣ܢܰܢ ܟܰܕ ܡܶܬܕܰܡܪܝ̣ܢܰܢ: ܕܡ̣ܶܢ ܐܰܝܢܳܐ ܪܰܘܡܳܐ ܡܥܰܠܝܳܐ ܠܰܐܝ̇ܕܳܐ ܡܰܟܝ̣ܟܘ̣ܬܳܐ ܐܶܬ̣ܬܰܚܬܝ̣ܬ: ܘܡ̣ܶܢ ܗܳܪܟܳܐ ܫܘ̣ܒܚܳܐ ܠܪܰܒܘ̣ܬܳܟ ܙܳܡܪܝ̣ܢܰܢ ܟܰܕ ܐܳܡܪܝ̣ܢܰܢ: ܫܘ̣ܒܚܳܐ ܠܺܐܝܬܝܳܐ ܡܬܘ̣ܡܳܝܳܐ ܕܗܽܘ̣ ܒܨܶܒܝܳܢܶܗ ܐܶܬܥ̣ܰܛܰܦ ܦܰܓܪܰܢ: ܘܶܐܬ̣ܡܰܟܰܟ ܨܶܝܕ ܡܚܝ̣ܠܘ̣ܬܰܢ ܕܢ̣ܰܠܶܦ ܠܰܢ ܐܘ̣ܪܚܳܐ ܡܥܰܠܰܝܬܳܐ ܕܙܰܕܝ̣ܩܘ̣ܬܳܐ: ܬܶܫܒܘ̣ܚܬܳܐ ܠܰܒܪܳܐ ܕܩܰܫܝ̣ܫ ܡ̣ܶܢ ܕܳܪ̈ܶܐ ܕܶܐܬ̣ܝ̣ܠܶܕ ܡ̣ܶܢ ܒܰܪܬܶܗ ܕܝܽܘܢܳܟܝ̣ܪ ܦܰܓܪܳܢܳܐܝ̣ܬ: ܘܫܰܦܶܦ ܐܰܝܟ ܝܳܢܘ̣ܩܳܐ ܒܓܰܘ ܢܳܨܪܰܬ ܡܕܝ̣ܢ̱ܬܳܐ ܕܒܳܗ̇ ܫܩ̣ܰܠ ܬܰܪܒܝ̣ܬܳܐ ܓܘ̣ܫܡܳܢܳܝܬܳܐ: ܫܘ̣ܒܚܳܐ ܠܓܘ̣ܪܝܳܐ ܕܰܐܪܝܳܐ ܕܶܐܬ̣ܝܰܩܰܪ ܡ̣ܶܢ ܩܰܘ̈ܡܳܬܳܐ ܫܰܒܪ̈ܳܝܳܬܳܐ: ܗܳܠܶܝܢ ܕܰܒ̣ܪܳܐ ܐܶܢܶܝܢ ܥܰܡ ܐܰܒܘ̣ܗ̱ܝ ܡܫܰܒܚܳܐ ܘܥܰܡ ܪܘ̣ܚܶܗ ܩܰܕܝ̣ܫܳܐ: ܬܶܫܒܘ̣ܚܬܳܐ ܠܰܕܚܝ̣ܠܳܐ ܥܰܠ ܟܪ̈ܘ̣ܒܶܐ ܕܰܗ̣ܘܳܐ ܫܝ̣ܛܳܐ ܥܰܠ ܐܰܪܥܳܐ ܐܰܝܟܰܢܳܐ ܕܢ̣ܶܦܪܘ̣ܩ ܠܗܰܘ̇ ܨܰܠܡܳܐ ܕܝ̣ܠܶܗ ܡܰܠܟܳܝܳܐ ܡ̣ܶܢ ܡܶܐܣܰܪ̈ܝܳܬܳܐ ܕܢܶܟ̈ܠܶܐ ܘܥܰܘ̈ܠܶܐ ܘܚܰܘ̈ܒܳܬܳܐ ܘܣܰܟ̈ܠܘܳܬܳܐ ܕܒܝ̣ܫܳܐ ܕܰܙ̣ܪܰܥ ܐܶܢܶܝܢ: ܫܘ̣ܒܚܳܐ ܠܗܰܘ̇ ܥܰܬܝ̣ܪܳܐ ܕܰܡܣ̣ܟܶܢ ܗܽܘ̣ ܠܶܗ ܘܣ̣ܰܪܶܩ ܢܰܦܫܶܗ ܡܶܛܽܠܳܬܰܢ ܕܢ̣ܶܥܒܶܕ ܠܰܢ ܒܢܰܝ̈ܳܐ ܠܰܐܒܘ̣ܗ̱ܝ ܘܰܐܚ̈ܶܐ ܠܰܚܢܳܢܶܗ: ܬܶܫܒܘ̣ܚܬܳܐ ܠܘܰܥܕܳܐ ܕܘܰܥ̣ܶܕ ܠܫܰܒܪ̈ܶܐ ܕܰܢ̣ܫܰܒܚܽܘܢܳܝܗ̱ܝ ܒܐܘ̣ܫܰܥܢ̈ܶܐ ܒܣܰܘ̈ܟܶܐ ܕܙܰܝ̈ܬܶܐ ܟܰܕ ܗܘ̣ ܫܒܝ̣ܚ ܒܓܰܐܝܘ̣ܬܳܐ ܘܰܗܕܝ̣ܪ ܒܩܘ̣̈ܠܳܣܶܐ ܕܡ̣ܶܢ ܡܫܰܡ̈ܫܳܢܰܝ ܢܘ̣ܪܳܐ ܡܶܙܕܰܝܰܚ ܒܰܪܬܝ̣ܬܳܐ: ܫܘ̣ܒܚܳܐ ܠܙܰܕܝ̣ܩܳܐ ܘܟܺܐܢܳܐ ܘܰܬܪܝ̣ܨܳܐ ܕܡܶܢܶܗ ܡܶܬܝܰܗܒܳܐ ܩܰܕܝ̣ܫܘ̣ܬܳܐ ܠܩܰܕܝ̣̈ܫܶܐ: ܘܕܰܟܝܽܘ̣ܬܳܐ ܠܰܒ̈ܬܘ̣ܠܶܐ ܘܰܡܨܰܠܠܘ̣ܬܳܐ ܠܰܢܙܝ̣ܪ̈ܶܐ: ܬܶܫܒܘ̣ܚܬܳܐ ܠܚܰܝܠܳܐ ܛܥܝ̣ܢ ܒܶܪ̈ܝܳܬܳܐ ܕܛܰܥ̣ܢܶܗ ܪܟܘ̣ܒܳܐ ܒܰܣܝܳܐ ܒܐܘ̣ܪܫܠܶܡ ܡܕܝ̣ܢ̱ܬܳܐ ܕܰܢܒܺܝ̈ܶܐ ܕܰܐܒܘ̣ܗ̱ܝ ܫܘ̣ܒܚܳܐ ܠܛܘ̣ܒܬܳܢ ܒܟܽܠ ܘܩܰܕܝ̣ܫ ܒܟܽܠ ܕܡܶܢܶܗ ܟܽܠ ܗ̣ܘܳܐ: ܘܒܶܗ ܐܰܬ̣ܬܰܩܰܢ ܟܽܠ ܕܡܶܬܚܙܶܐ ܘܰܕܠܳܐ ܡܶܬܚܙܶܐ: ܟܽܠ ܕܰܠܥܶܠ ܘܕܰܠܬܰܚܬ: ܬܶܫܒܘ̣ܚܬܳܐ ܠܝܳܕܘ̣ܥܳܐ ܕܟܰܣ̈ܝܳܬܳܐ: ܘܒܳܨܘ̣ܝܳܐ ܕܡܰܚ̈ܫܒܳܬܳܐ ܕܠܳܐ ܡܶܬܕܰܪܟܳܐ ܡܩܰܕܡܘ̣ܬ ܝܺܕܰܥܬܶܗ: ܘܠܳܐ ܡܶܣܬܰܝܟܳܐ ܐܰܠܳܗܘ̣ܬܶܗ: ܘܠܳܐ ܡܶܬܬܓܝ̣ܫܳܐ ܢܘ̣ܪܳܢܳܝܘ̣ܬܶܗ ܕܰܨܒ̣ܳܐ ܘܶܐܬ̣ܠܒܶܟ ܡ̣ܶܢ ܒܢܰܝ̈ܢܳܫܳܐ ܚܰܛܳܝ̈ܶܐ ܦܰܓܪܳܢܳܐܝ̣ܬ: ܫܘ̣ܒܚܳܐ ܠܟܘ̣ܡܪܳܐ ܩܰܕܝ̣ܫܳܐ ܘܝܳܗܶܒ ܩܘ̣ܕܫܳܐ ܠܰܣܪ̈ܳܦܶܐ ܕܰܡܫܰܡܫܝ̣ܢ ܠܶܗ: ܘܙܳܠܰܚ ܢܘ̣ܗܪܳܐ ܥܰܠ ܚܰܝ̈ܠܰܘܳܬܳܐ ܟܽܠܗܽܘܢ ܕܰܗ̈ܘܰܝܳܐ ܕܡܶܢܶܗ ܢ̣ܶܬܒܰܣܡܽܘܢ: ܬܶܫܒܘ̣ܚܬܳܐ ܠܠܳܐ ܡܶܬܕܰܪܟܳܢܳܐ ܘܠܳܐ ܡܶܬܥܰܪܝܳܢܳܐ ܕܶܐܬ̣ܥܰܪܝ̣ ܒܦܰܓܪܳܐ ܐ̱ܢܳܫܳܝܳܐ ܡܶܛܽܠ ܫܘ̣ܘܙܳܒܰܢ: ܘܶܐܣ̣ܬܰܝܰܟ ܐ̱ܢܳܫܳܐܝ̣ܬ ܟܰܕ ܦ̣ܳܫ ܒܰܐܠܳܗܘ̣ܬܶܗ ܠܳܐ ܡܶܣܬܰܝܟܳܢܳܐ: ܫܘ̣ܒܚܳܐ ܠܡܰܘܠܶܕ ܛܘ̣ܗ̈ܡܶܐ ܘܫܰܪ̈ܒܳܬܳܐ ܕܶܐܬ̣ܝ̣ܠܶܕ ܒܚܰܪܰܬ݀ ܙܰܒ̈ܢܶܐ ܡ̣ܶܢ ܒܬܘ̣ܠܬܳܐ ܠܳܐ ܡܢܰܣܝܰܬ݀ ܒܙܘ̣ܘܳܓܳܐ: ܬܶܫܒܘ̣ܚܬܳܐ ܠܢܳܛܰܪ ܓܰܢܬܳܐ ܥܕܶܝܢܳܝܬܳܐ ܕܰܒܥ̣ܳܐ ܒܡܶܬܢܰܚܬܳܢܘ̣ܬܶܗ ܕܨܶܝܕܰܝܢ ܕܢ̣ܰܦܢܶܝܢ ܠܝܳܪܬܘ̣ܬܰܢ ܩܰܕܡܳܝܬܳܐ: ܫܘ̣ܒܚܳܐ ܠܣܳܗܕܳܐ ܫܰܪܝ̣ܪܳܐ ܕܰܐܣ̣ܗܶܕ ܩܘ̣ܕܰܡܬ݀ ܪܝ̣ܫ ܟܳܗ̈ܢܶܐ ܕܗܽܘ̣ܝܘ̣ ܒܪܶܗ ܕܰܐܠܳܗܳܐ ܚܰܝܳܐ ܘܒܰܪ ܐܝ̣ܬܘ̣ܬܳܐ ܡܬܘ̣ܡܳܝܬܳܐ: ܬܶܫܒܘ̣ܚܬܳܐ ܠܥܝ̣ܪܳܐ ܠܳܐ ܢܳܝܘ̣ܡܳܐ ܕܟܰܕ ܠܒ̣ܶܫ ܦܰܓܪܳܐ ܕܡ̣ܶܟ ܡܕܰܒܪܳܢܳܐܝ̣ܬ ܒܓܰܘ ܝܰܡܳܐ: ܘܰܐܥܝ̣ܪܘ̣ܗ̱ܝ ܬܰܠܡܝ̣̈ܕܶܐ ܕܢ̣ܰܫܠܶܐ ܠܥܰܙܝ̣ܙܘ̣ܬ ܡܰܚ̈ܫܘ̣ܠܶܐ: ܫܘ̣ܒܚܳܐ ܠܦܳܪܘ̣ܩܳܐ ܕܓܶܢܣܳܐ ܐ̱ܢܳܫܳܝܳܐ ܕܪܶܚܡܰܬ݀ ܐ̱ܢܳܫܘ̣ܬܶܗ ܥ̣ܨܳܬܶܗ ܕܢ̣ܶܠܒܰܫ ܡܘ̣ܟܳܟܳܐ ܘܢ̣ܺܐܬܶܐ ܠܨܰܥܪܳܐ ܘܫܝ̣ܛܘ̣ܬܳܐ: ܘܢ̣ܶܣܒܘ̣ܠ ܚܰܫ̈ܶܐ ܘܰܙܩܝ̣ܦܳܐ ܘܡܰܘܬܳܐ: ܬܶܫܒܘ̣ܚܬܳܐ ܠܨܰܝܳܪܳܐ ܡܗܝ̣ܪܳܐ ܕܰܐܬܩ̣ܶܢ ܒܪܶܡܙܳܐ ܕܒܳܪܘ̣ܝܘ̣ܬܳܐ ܕܝ̣ܠܶܗ ܘܰܕܐܘ̣ܡܳܢܘ̣ܬܶܗ ܠܟܽܠܳܗ̇ ܡܶܬܥܰܡܪܳܢܝ̣ܬܳܐ ܘܰܠܟܽܠ ܕܺܐܝܬ ܒܳܗ̇: ܫܘ̣ܒܚܳܐ ܘܣܶܓܕܬܳܐ ܠܩܝ̣ܬܳܪ ܩ̈ܳܠܶܐ ܕܰܗ̣ܘܳܐ ܫܰܠܝܳܐ ܘܫܰܬܝ̣ܩܳܐ ܒܬܰܪܒܝ̣ܬܳܐ ܦܰܓܪܳܢܳܝܬܳܐ ܘܶܐܫ̣ܬܰܘܫܰܛ ܒܩܰܘܡܬܳܐ ܐܳܕܳܡܳܝܬܳܐ ܗܰܘ̇ ܕܠܰܝܬ ܡܶܬܚܳܐ ܕܙܰܒܢܳܐ ܠܝ̣ܠܝ̣ܕܘ̣ܬܶܗ ܡܬܘ̣ܡܳܝܬܳܐ: ܬܶܫܒܘ̣ܚܬܳܐ ܠܪܳܥܝܳܐ ܕܺܐܝܣܪܳܐܝܶܠ ܥܰܫܝ̣ܢܳܐ ܕܕܰܒ̣ܰܪ ܠܥܳܢ̈ܶܗ ܐܰܝܟ ܝܰܘܣܶܦ ܢܰܟܦܳܐ: ܘܚܰܘܝ̣ ܗ̱ܘܳܐ ܓܰܢ̱ܒܳܪܘ̣ܬܶܗ ܟܰܕ ܐܶܬ̣ܳܐ ܠܦܘ̣ܪܩܳܢܰܢ: ܫܘ̣ܒܚܳܐ ܠܰܫܡܶܗ ܡܫܰܒܚܳܐ ܕܰܙܠ̣ܰܚ ܒܰܐܪܥܳܐ ܫܰܝܢܳܐ ܟܰܗܝ̣ܢܳܐ ܘܰܫܠܳܡܳܐ ܡܚܰܕܝܳܢܳܐ: ܘܰܐܪܡܝ̣ ܐܰܘܝܘ̣ܬܳܐ ܒܶܝܬ ܪ̈ܘ̣ܚܳܢܶܐ ܠܓܘ̣ܫ̈ܡܳܢܶܐ: ܘܚܰܝܶܕ ܐܶܢܽܘܢ ܠܚܰܕ ܓܰܒܳܐ ܝܰܡܝ̣ܢܳܝܳܐ: ܬܶܫܒܘ̣ܚܬܳܐ ܠܰܬܡܝ̣ܗ ܘܰܬܗܝ̣ܪ ܒܰܩܪܰܒܬܳܢܘ̣ܬܳܐ ܘܰܒܒܳܪܘ̣ܝܘ̣ܬܳܐ ܘܰܒܣܳܥܘ̣ܪܘ̣ܬ ܬܶܕܡܪ̈ܳܬܳܐ ܦܰܐܝܰܬ݀ ܠܐܰܠܳܗܳܐ: ܘܗܳܫܳܐ ܠܳܟ ܡܫܝ̣ܚܳܐ ܐܰܠܳܗܳܐ ܡܦܝ̣ܣܝ̣ܢܰܢ ܕܬ̣ܰܫܘܶܐ ܠܰܢ ܠܚܰܘ̈ܣܳܢܰܝܟ: ܘܠܰܩܝܳܡܬܳܐ ܕܡ̣ܶܢ ܝܰܡܝ̣ܢܳܟ ܘܰܠܡܰܦܰܩ ܒܪܘ̣ܚܳܐ ܕܰܩܕܳܡ ܒܺܐܡܰܐ ܕܝ̣ܠܳܟ ܕܚܝ̣ܠܬܳܐ: ܘܛܰܝܒܘ̣ܬܳܟ ܬ̣ܢܰܛܰܪܝ̱ ܠܰܢ ܡ̣ܶܢ ܟܽܠ ܦܰܚ̈ܶܐ ܘܰܡܨ̈ܝ̣ܕܳܬܳܐ ܕܳܐܟܶܠܩܰܪܨܳܐ ܡܳܪܘ̣ܕܳܐ ܐܰܝܟܰܢܳܐ ܕܰܢ̇ܡܰܢܰܥ ܠܚܰܪܬܳܐ ܛܳܒܬܳܐ ܘܰܒܫܘ̣ܠܳܡܳܐ ܡܫܰܝܢܳܐ ܕܫܳܦܰܪ ܠܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀